| Library / Tipiṭaka / திபிடக • Tipiṭaka / படிஸம்பி⁴தா³மக்³க³பாளி • Paṭisambhidāmaggapāḷi |
15. வத்து²னானத்தஞாணனித்³தே³ஸோ
15. Vatthunānattañāṇaniddeso
66. கத²ங் அஜ்ஜ²த்தவவத்தா²னே பஞ்ஞா வத்து²னானத்தே ஞாணங்? கத²ங் அஜ்ஜ²த்தத⁴ம்மே வவத்தே²தி? சக்கு²ங் அஜ்ஜ²த்தங் வவத்தே²தி, ஸோதங் அஜ்ஜ²த்தங் வவத்தே²தி, கா⁴னங் அஜ்ஜ²த்தங் வவத்தே²தி, ஜிவ்ஹங் அஜ்ஜ²த்தங் வவத்தே²தி, காயங் அஜ்ஜ²த்தங் வவத்தே²தி, மனங் அஜ்ஜ²த்தங் வவத்தே²தி.
66. Kathaṃ ajjhattavavatthāne paññā vatthunānatte ñāṇaṃ? Kathaṃ ajjhattadhamme vavattheti? Cakkhuṃ ajjhattaṃ vavattheti, sotaṃ ajjhattaṃ vavattheti, ghānaṃ ajjhattaṃ vavattheti, jivhaṃ ajjhattaṃ vavattheti, kāyaṃ ajjhattaṃ vavattheti, manaṃ ajjhattaṃ vavattheti.
கத²ங் சக்கு²ங் அஜ்ஜ²த்தங் வவத்தே²தி? சக்கு² அவிஜ்ஜாஸம்பூ⁴தந்தி வவத்தே²தி, சக்கு² தண்ஹாஸம்பூ⁴தந்தி வவத்தே²தி, சக்கு² கம்மஸம்பூ⁴தந்தி வவத்தே²தி, சக்கு² ஆஹாரஸம்பூ⁴தந்தி வவத்தே²தி, சக்கு² சதுன்னங் மஹாபூ⁴தானங் உபாதா³யாதி வவத்தே²தி, சக்கு² உப்பன்னந்தி வவத்தே²தி, சக்கு² ஸமுதா³க³தந்தி வவத்தே²தி. சக்கு² அஹுத்வா ஸம்பூ⁴தங், ஹுத்வா ந ப⁴விஸ்ஸதீதி வவத்தே²தி. சக்கு²ங் அந்தவந்ததோ வவத்தே²தி, சக்கு² அத்³து⁴வங் அஸஸ்ஸதங் விபரிணாமத⁴ம்மந்தி வவத்தே²தி, சக்கு² அனிச்சங் ஸங்க²தங் படிச்சஸமுப்பன்னங் க²யத⁴ம்மங் வயத⁴ம்மங் விராக³த⁴ம்மங் நிரோத⁴த⁴ம்மந்தி வவத்தே²தி . சக்கு²ங் அனிச்சதோ வவத்தே²தி, நோ நிச்சதோ; து³க்க²தோ வவத்தே²தி, நோ ஸுக²தோ; அனத்ததோ வவத்தே²தி, நோ அத்ததோ; நிப்³பி³ந்த³தி, நோ நந்த³தி; விரஜ்ஜதி, நோ ரஜ்ஜதி; நிரோதே⁴தி, நோ ஸமுதே³தி; படினிஸ்ஸஜ்ஜதி, நோ ஆதி³யதி. அனிச்சதோ வவத்தெ²ந்தோ நிச்சஸஞ்ஞங் பஜஹதி, து³க்க²தோ வவத்தெ²ந்தோ ஸுக²ஸஞ்ஞங் பஜஹதி, அனத்ததோ வவத்தெ²ந்தோ அத்தஸஞ்ஞங் பஜஹதி, நிப்³பி³ந்த³ந்தோ நந்தி³ங் பஜஹதி, விரஜ்ஜந்தோ ராக³ங் பஜஹதி, நிரோதெ⁴ந்தோ ஸமுத³யங் பஜஹதி, படினிஸ்ஸஜ்ஜந்தோ ஆதா³னங் பஜஹதி. ஏவங் சக்கு²ங் அஜ்ஜ²த்தங் வவத்தே²தி.
Kathaṃ cakkhuṃ ajjhattaṃ vavattheti? Cakkhu avijjāsambhūtanti vavattheti, cakkhu taṇhāsambhūtanti vavattheti, cakkhu kammasambhūtanti vavattheti, cakkhu āhārasambhūtanti vavattheti, cakkhu catunnaṃ mahābhūtānaṃ upādāyāti vavattheti, cakkhu uppannanti vavattheti, cakkhu samudāgatanti vavattheti. Cakkhu ahutvā sambhūtaṃ, hutvā na bhavissatīti vavattheti. Cakkhuṃ antavantato vavattheti, cakkhu addhuvaṃ asassataṃ vipariṇāmadhammanti vavattheti, cakkhu aniccaṃ saṅkhataṃ paṭiccasamuppannaṃ khayadhammaṃ vayadhammaṃ virāgadhammaṃ nirodhadhammanti vavattheti . Cakkhuṃ aniccato vavattheti, no niccato; dukkhato vavattheti, no sukhato; anattato vavattheti, no attato; nibbindati, no nandati; virajjati, no rajjati; nirodheti, no samudeti; paṭinissajjati, no ādiyati. Aniccato vavatthento niccasaññaṃ pajahati, dukkhato vavatthento sukhasaññaṃ pajahati, anattato vavatthento attasaññaṃ pajahati, nibbindanto nandiṃ pajahati, virajjanto rāgaṃ pajahati, nirodhento samudayaṃ pajahati, paṭinissajjanto ādānaṃ pajahati. Evaṃ cakkhuṃ ajjhattaṃ vavattheti.
கத²ங் ஸோதங் அஜ்ஜ²த்தங் வவத்தே²தி? ஸோதங் அவிஜ்ஜாஸம்பூ⁴தந்தி வவத்தே²தி…பே॰… ஏவங் ஸோதங் அஜ்ஜ²த்தங் வவத்தே²தி. கத²ங் கா⁴னங் அஜ்ஜ²த்தங் வவத்தே²தி? கா⁴னங் அவிஜ்ஜாஸம்பூ⁴தந்தி வவத்தே²தி…பே॰… ஏவங் கா⁴னங் அஜ்ஜ²த்தங் வவத்தே²தி. கத²ங் ஜிவ்ஹங் அஜ்ஜ²த்தங் வவத்தே²தி? ஜிவ்ஹா அவிஜ்ஜாஸம்பூ⁴தாதி வவத்தே²தி, ஜிவ்ஹா தண்ஹாஸம்பூ⁴தாதி வவத்தே²தி, ஜிவ்ஹா கம்மஸம்பூ⁴தாதி வவத்தே²தி, ஜிவ்ஹா ஆஹாரஸம்பூ⁴தாதி வவத்தே²தி, ஜிவ்ஹா சதுன்னங் மஹாபூ⁴தானங் உபாதா³யாதி வவத்தே²தி, ஜிவ்ஹா உப்பன்னாதி வவத்தே²தி ஜிவ்ஹா ஸமுதா³க³தாதி வவத்தே²தி. ஜிவ்ஹா அஹுத்வா ஸம்பூ⁴தா, ஹுத்வா ந ப⁴விஸ்ஸதீதி வவத்தே²தி. ஜிவ்ஹங் அந்தவந்ததோ வவத்தே²தி, ஜிவ்ஹா அத்³து⁴வா அஸஸ்ஸதா விபரிணாமத⁴ம்மாதி வவத்தே²தி, ஜிவ்ஹா அனிச்சா ஸங்க²தா படிச்சஸமுப்பன்னா க²யத⁴ம்மா வயத⁴ம்மா விராக³த⁴ம்மா நிரோத⁴த⁴ம்மாதி வவத்தே²தி. ஜிவ்ஹங் அனிச்சதோ வவத்தே²தி, நோ நிச்சதோ…பே॰… படினிஸ்ஸஜ்ஜதி, நோ ஆதி³யதி. அனிச்சதோ வவத்தெ²ந்தோ நிச்சஸஞ்ஞங் பஜஹதி…பே॰… படினிஸ்ஸஜ்ஜந்தோ ஆதா³னங் பஜஹதி. ஏவங் ஜிவ்ஹங் அஜ்ஜ²த்தங் வவத்தே²தி.
Kathaṃ sotaṃ ajjhattaṃ vavattheti? Sotaṃ avijjāsambhūtanti vavattheti…pe… evaṃ sotaṃ ajjhattaṃ vavattheti. Kathaṃ ghānaṃ ajjhattaṃ vavattheti? Ghānaṃ avijjāsambhūtanti vavattheti…pe… evaṃ ghānaṃ ajjhattaṃ vavattheti. Kathaṃ jivhaṃ ajjhattaṃ vavattheti? Jivhā avijjāsambhūtāti vavattheti, jivhā taṇhāsambhūtāti vavattheti, jivhā kammasambhūtāti vavattheti, jivhā āhārasambhūtāti vavattheti, jivhā catunnaṃ mahābhūtānaṃ upādāyāti vavattheti, jivhā uppannāti vavattheti jivhā samudāgatāti vavattheti. Jivhā ahutvā sambhūtā, hutvā na bhavissatīti vavattheti. Jivhaṃ antavantato vavattheti, jivhā addhuvā asassatā vipariṇāmadhammāti vavattheti, jivhā aniccā saṅkhatā paṭiccasamuppannā khayadhammā vayadhammā virāgadhammā nirodhadhammāti vavattheti. Jivhaṃ aniccato vavattheti, no niccato…pe… paṭinissajjati, no ādiyati. Aniccato vavatthento niccasaññaṃ pajahati…pe… paṭinissajjanto ādānaṃ pajahati. Evaṃ jivhaṃ ajjhattaṃ vavattheti.
கத²ங் காயங் அஜ்ஜ²த்தங் வவத்தே²தி? காயோ அவிஜ்ஜாஸம்பூ⁴தோதி வவத்தே²தி, காயோ தண்ஹாஸம்பூ⁴தோதி வவத்தே²தி, காயோ கம்மஸம்பூ⁴தோதி வவத்தே²தி, காயோ ஆஹாரஸம்பூ⁴தோதி வவத்தே²தி, காயோ சதுன்னங் மஹாபூ⁴தானங் உபாதா³யாதி வவத்தே²தி, காயோ உப்பன்னோதி வவத்தே²தி, காயோ ஸமுதா³க³தோதி வவத்தே²தி. காயோ அஹுத்வா ஸம்பூ⁴தோ, ஹுத்வா ந ப⁴விஸ்ஸதீதி வவத்தே²தி. காயங் அந்தவந்ததோ வவத்தே²தி, காயோ அத்³து⁴வோ அஸஸ்ஸதோ விபரிணாமத⁴ம்மோதி வவத்தே²தி, காயோ அனிச்சோ ஸங்க²தோ படிச்சஸமுப்பன்னோ க²யத⁴ம்மோ வயத⁴ம்மோ விராக³த⁴ம்மோ நிரோத⁴த⁴ம்மோதி வவத்தே²தி. காயங் அனிச்சதோ வவத்தே²தி, நோ நிச்சதோ; து³க்க²தோ வவத்தே²தி, நோ ஸுக²தோ…பே॰… படினிஸ்ஸஜ்ஜதி, நோ ஆதி³யதி. அனிச்சதோ வவத்தெ²ந்தோ நிச்சஸஞ்ஞங் பஜஹதி, து³க்க²தோ வவத்தெ²ந்தோ ஸுக²ஸஞ்ஞங் பஜஹதி…பே॰… படினிஸ்ஸஜ்ஜந்தோ ஆதா³னங் பஜஹதி. ஏவங் காயங் அஜ்ஜ²த்தங் வவத்தே²தி.
Kathaṃ kāyaṃ ajjhattaṃ vavattheti? Kāyo avijjāsambhūtoti vavattheti, kāyo taṇhāsambhūtoti vavattheti, kāyo kammasambhūtoti vavattheti, kāyo āhārasambhūtoti vavattheti, kāyo catunnaṃ mahābhūtānaṃ upādāyāti vavattheti, kāyo uppannoti vavattheti, kāyo samudāgatoti vavattheti. Kāyo ahutvā sambhūto, hutvā na bhavissatīti vavattheti. Kāyaṃ antavantato vavattheti, kāyo addhuvo asassato vipariṇāmadhammoti vavattheti, kāyo anicco saṅkhato paṭiccasamuppanno khayadhammo vayadhammo virāgadhammo nirodhadhammoti vavattheti. Kāyaṃ aniccato vavattheti, no niccato; dukkhato vavattheti, no sukhato…pe… paṭinissajjati, no ādiyati. Aniccato vavatthento niccasaññaṃ pajahati, dukkhato vavatthento sukhasaññaṃ pajahati…pe… paṭinissajjanto ādānaṃ pajahati. Evaṃ kāyaṃ ajjhattaṃ vavattheti.
கத²ங் மனங் அஜ்ஜ²த்தங் வவத்தே²தி? மனோ அவிஜ்ஜாஸம்பூ⁴தோதி வவத்தே²தி, மனோ தண்ஹாஸம்பூ⁴தோதி வவத்தே²தி, மனோ கம்மஸம்பூ⁴தோதி வவத்தே²தி, மனோ ஆஹாரஸம்பூ⁴தோதி வவத்தே²தி, மனோ உப்பன்னோதி வவத்தே²தி , மனோ ஸமுதா³க³தோதி வவத்தே²தி. மனோ அஹுத்வா ஸம்பூ⁴தோ, ஹுத்வா ந ப⁴விஸ்ஸதீதி வவத்தே²தி. மனங் அந்தவந்ததோ வவத்தே²தி, மனோ அத்³து⁴வோ அஸஸ்ஸதோ விபரிணாமத⁴ம்மோதி வவத்தே²தி, மனோ அனிச்சோ ஸங்க²தோ படிச்சஸமுப்பன்னோ க²யத⁴ம்மோ வயத⁴ம்மோ விராக³த⁴ம்மோ நிரோத⁴த⁴ம்மோதி வவத்தே²தி. மனங் அனிச்சதோ வவத்தே²தி, நோ நிச்சதோ; து³க்க²தோ வவத்தே²தி, நோ ஸுக²தோ; அனத்ததோ வவத்தே²தி, நோ அத்ததோ; நிப்³பி³ந்த³தி, நோ நந்த³தி; விரஜ்ஜதி, நோ ரஜ்ஜதி; நிரோதே⁴தி, நோ ஸமுதே³தி; படினிஸ்ஸஜ்ஜதி, நோ ஆதி³யதி. அனிச்சதோ வவத்தெ²ந்தோ நிச்சஸஞ்ஞங் பஜஹதி, து³க்க²தோ வவத்தெ²ந்தோ ஸுக²ஸஞ்ஞங் பஜஹதி, அனத்ததோ வவத்தெ²ந்தோ அத்தஸஞ்ஞங் பஜஹதி, நிப்³பி³ந்த³ந்தோ நந்தி³ங் பஜஹதி, விரஜ்ஜந்தோ ராக³ங் பஜஹதி, நிரோதெ⁴ந்தோ ஸமுத³யங் பஜஹதி, படினிஸ்ஸஜ்ஜந்தோ ஆதா³னங் பஜஹதி. ஏவங் மனங் அஜ்ஜ²த்தங் வவத்தே²தி. ஏவங் அஜ்ஜ²த்தத⁴ம்மே வவத்தே²தி. தங் ஞாதட்டே²ன ஞாணங், பஜானநட்டே²ன பஞ்ஞா. தேன வுச்சதி – ‘‘அஜ்ஜ²த்தவவத்தா²னே பஞ்ஞா வத்து²னானத்தே ஞாணங்’’.
Kathaṃ manaṃ ajjhattaṃ vavattheti? Mano avijjāsambhūtoti vavattheti, mano taṇhāsambhūtoti vavattheti, mano kammasambhūtoti vavattheti, mano āhārasambhūtoti vavattheti, mano uppannoti vavattheti , mano samudāgatoti vavattheti. Mano ahutvā sambhūto, hutvā na bhavissatīti vavattheti. Manaṃ antavantato vavattheti, mano addhuvo asassato vipariṇāmadhammoti vavattheti, mano anicco saṅkhato paṭiccasamuppanno khayadhammo vayadhammo virāgadhammo nirodhadhammoti vavattheti. Manaṃ aniccato vavattheti, no niccato; dukkhato vavattheti, no sukhato; anattato vavattheti, no attato; nibbindati, no nandati; virajjati, no rajjati; nirodheti, no samudeti; paṭinissajjati, no ādiyati. Aniccato vavatthento niccasaññaṃ pajahati, dukkhato vavatthento sukhasaññaṃ pajahati, anattato vavatthento attasaññaṃ pajahati, nibbindanto nandiṃ pajahati, virajjanto rāgaṃ pajahati, nirodhento samudayaṃ pajahati, paṭinissajjanto ādānaṃ pajahati. Evaṃ manaṃ ajjhattaṃ vavattheti. Evaṃ ajjhattadhamme vavattheti. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘ajjhattavavatthāne paññā vatthunānatte ñāṇaṃ’’.
வத்து²னானத்தஞாணனித்³தே³ஸோ பன்னரஸமோ.
Vatthunānattañāṇaniddeso pannarasamo.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā / 15. வத்து²னானத்தஞாணனித்³தே³ஸவண்ணனா • 15. Vatthunānattañāṇaniddesavaṇṇanā
