| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
১৫. ৰত্থুনানত্তঞাণনিদ্দেসো
15. Vatthunānattañāṇaniddeso
৬৬. কথং অজ্ঝত্তৰৰত্থানে পঞ্ঞা ৰত্থুনানত্তে ঞাণং? কথং অজ্ঝত্তধম্মে ৰৰত্থেতি? চক্খুং অজ্ঝত্তং ৰৰত্থেতি, সোতং অজ্ঝত্তং ৰৰত্থেতি, ঘানং অজ্ঝত্তং ৰৰত্থেতি, জিৰ্হং অজ্ঝত্তং ৰৰত্থেতি, কাযং অজ্ঝত্তং ৰৰত্থেতি, মনং অজ্ঝত্তং ৰৰত্থেতি।
66. Kathaṃ ajjhattavavatthāne paññā vatthunānatte ñāṇaṃ? Kathaṃ ajjhattadhamme vavattheti? Cakkhuṃ ajjhattaṃ vavattheti, sotaṃ ajjhattaṃ vavattheti, ghānaṃ ajjhattaṃ vavattheti, jivhaṃ ajjhattaṃ vavattheti, kāyaṃ ajjhattaṃ vavattheti, manaṃ ajjhattaṃ vavattheti.
কথং চক্খুং অজ্ঝত্তং ৰৰত্থেতি? চক্খু অৰিজ্জাসম্ভূতন্তি ৰৰত্থেতি, চক্খু তণ্হাসম্ভূতন্তি ৰৰত্থেতি, চক্খু কম্মসম্ভূতন্তি ৰৰত্থেতি, চক্খু আহারসম্ভূতন্তি ৰৰত্থেতি, চক্খু চতুন্নং মহাভূতানং উপাদাযাতি ৰৰত্থেতি, চক্খু উপ্পন্নন্তি ৰৰত্থেতি, চক্খু সমুদাগতন্তি ৰৰত্থেতি। চক্খু অহুত্ৰা সম্ভূতং, হুত্ৰা ন ভৰিস্সতীতি ৰৰত্থেতি। চক্খুং অন্তৰন্ততো ৰৰত্থেতি, চক্খু অদ্ধুৰং অসস্সতং ৰিপরিণামধম্মন্তি ৰৰত্থেতি, চক্খু অনিচ্চং সঙ্খতং পটিচ্চসমুপ্পন্নং খযধম্মং ৰযধম্মং ৰিরাগধম্মং নিরোধধম্মন্তি ৰৰত্থেতি । চক্খুং অনিচ্চতো ৰৰত্থেতি, নো নিচ্চতো; দুক্খতো ৰৰত্থেতি, নো সুখতো; অনত্ততো ৰৰত্থেতি, নো অত্ততো; নিব্বিন্দতি, নো নন্দতি; ৰিরজ্জতি, নো রজ্জতি; নিরোধেতি, নো সমুদেতি; পটিনিস্সজ্জতি, নো আদিযতি। অনিচ্চতো ৰৰত্থেন্তো নিচ্চসঞ্ঞং পজহতি, দুক্খতো ৰৰত্থেন্তো সুখসঞ্ঞং পজহতি, অনত্ততো ৰৰত্থেন্তো অত্তসঞ্ঞং পজহতি, নিব্বিন্দন্তো নন্দিং পজহতি, ৰিরজ্জন্তো রাগং পজহতি, নিরোধেন্তো সমুদযং পজহতি, পটিনিস্সজ্জন্তো আদানং পজহতি। এৰং চক্খুং অজ্ঝত্তং ৰৰত্থেতি।
Kathaṃ cakkhuṃ ajjhattaṃ vavattheti? Cakkhu avijjāsambhūtanti vavattheti, cakkhu taṇhāsambhūtanti vavattheti, cakkhu kammasambhūtanti vavattheti, cakkhu āhārasambhūtanti vavattheti, cakkhu catunnaṃ mahābhūtānaṃ upādāyāti vavattheti, cakkhu uppannanti vavattheti, cakkhu samudāgatanti vavattheti. Cakkhu ahutvā sambhūtaṃ, hutvā na bhavissatīti vavattheti. Cakkhuṃ antavantato vavattheti, cakkhu addhuvaṃ asassataṃ vipariṇāmadhammanti vavattheti, cakkhu aniccaṃ saṅkhataṃ paṭiccasamuppannaṃ khayadhammaṃ vayadhammaṃ virāgadhammaṃ nirodhadhammanti vavattheti . Cakkhuṃ aniccato vavattheti, no niccato; dukkhato vavattheti, no sukhato; anattato vavattheti, no attato; nibbindati, no nandati; virajjati, no rajjati; nirodheti, no samudeti; paṭinissajjati, no ādiyati. Aniccato vavatthento niccasaññaṃ pajahati, dukkhato vavatthento sukhasaññaṃ pajahati, anattato vavatthento attasaññaṃ pajahati, nibbindanto nandiṃ pajahati, virajjanto rāgaṃ pajahati, nirodhento samudayaṃ pajahati, paṭinissajjanto ādānaṃ pajahati. Evaṃ cakkhuṃ ajjhattaṃ vavattheti.
কথং সোতং অজ্ঝত্তং ৰৰত্থেতি? সোতং অৰিজ্জাসম্ভূতন্তি ৰৰত্থেতি…পে॰… এৰং সোতং অজ্ঝত্তং ৰৰত্থেতি। কথং ঘানং অজ্ঝত্তং ৰৰত্থেতি? ঘানং অৰিজ্জাসম্ভূতন্তি ৰৰত্থেতি…পে॰… এৰং ঘানং অজ্ঝত্তং ৰৰত্থেতি। কথং জিৰ্হং অজ্ঝত্তং ৰৰত্থেতি? জিৰ্হা অৰিজ্জাসম্ভূতাতি ৰৰত্থেতি, জিৰ্হা তণ্হাসম্ভূতাতি ৰৰত্থেতি, জিৰ্হা কম্মসম্ভূতাতি ৰৰত্থেতি, জিৰ্হা আহারসম্ভূতাতি ৰৰত্থেতি, জিৰ্হা চতুন্নং মহাভূতানং উপাদাযাতি ৰৰত্থেতি, জিৰ্হা উপ্পন্নাতি ৰৰত্থেতি জিৰ্হা সমুদাগতাতি ৰৰত্থেতি। জিৰ্হা অহুত্ৰা সম্ভূতা, হুত্ৰা ন ভৰিস্সতীতি ৰৰত্থেতি। জিৰ্হং অন্তৰন্ততো ৰৰত্থেতি, জিৰ্হা অদ্ধুৰা অসস্সতা ৰিপরিণামধম্মাতি ৰৰত্থেতি, জিৰ্হা অনিচ্চা সঙ্খতা পটিচ্চসমুপ্পন্না খযধম্মা ৰযধম্মা ৰিরাগধম্মা নিরোধধম্মাতি ৰৰত্থেতি। জিৰ্হং অনিচ্চতো ৰৰত্থেতি, নো নিচ্চতো…পে॰… পটিনিস্সজ্জতি, নো আদিযতি। অনিচ্চতো ৰৰত্থেন্তো নিচ্চসঞ্ঞং পজহতি…পে॰… পটিনিস্সজ্জন্তো আদানং পজহতি। এৰং জিৰ্হং অজ্ঝত্তং ৰৰত্থেতি।
Kathaṃ sotaṃ ajjhattaṃ vavattheti? Sotaṃ avijjāsambhūtanti vavattheti…pe… evaṃ sotaṃ ajjhattaṃ vavattheti. Kathaṃ ghānaṃ ajjhattaṃ vavattheti? Ghānaṃ avijjāsambhūtanti vavattheti…pe… evaṃ ghānaṃ ajjhattaṃ vavattheti. Kathaṃ jivhaṃ ajjhattaṃ vavattheti? Jivhā avijjāsambhūtāti vavattheti, jivhā taṇhāsambhūtāti vavattheti, jivhā kammasambhūtāti vavattheti, jivhā āhārasambhūtāti vavattheti, jivhā catunnaṃ mahābhūtānaṃ upādāyāti vavattheti, jivhā uppannāti vavattheti jivhā samudāgatāti vavattheti. Jivhā ahutvā sambhūtā, hutvā na bhavissatīti vavattheti. Jivhaṃ antavantato vavattheti, jivhā addhuvā asassatā vipariṇāmadhammāti vavattheti, jivhā aniccā saṅkhatā paṭiccasamuppannā khayadhammā vayadhammā virāgadhammā nirodhadhammāti vavattheti. Jivhaṃ aniccato vavattheti, no niccato…pe… paṭinissajjati, no ādiyati. Aniccato vavatthento niccasaññaṃ pajahati…pe… paṭinissajjanto ādānaṃ pajahati. Evaṃ jivhaṃ ajjhattaṃ vavattheti.
কথং কাযং অজ্ঝত্তং ৰৰত্থেতি? কাযো অৰিজ্জাসম্ভূতোতি ৰৰত্থেতি, কাযো তণ্হাসম্ভূতোতি ৰৰত্থেতি, কাযো কম্মসম্ভূতোতি ৰৰত্থেতি, কাযো আহারসম্ভূতোতি ৰৰত্থেতি, কাযো চতুন্নং মহাভূতানং উপাদাযাতি ৰৰত্থেতি, কাযো উপ্পন্নোতি ৰৰত্থেতি, কাযো সমুদাগতোতি ৰৰত্থেতি। কাযো অহুত্ৰা সম্ভূতো, হুত্ৰা ন ভৰিস্সতীতি ৰৰত্থেতি। কাযং অন্তৰন্ততো ৰৰত্থেতি, কাযো অদ্ধুৰো অসস্সতো ৰিপরিণামধম্মোতি ৰৰত্থেতি, কাযো অনিচ্চো সঙ্খতো পটিচ্চসমুপ্পন্নো খযধম্মো ৰযধম্মো ৰিরাগধম্মো নিরোধধম্মোতি ৰৰত্থেতি। কাযং অনিচ্চতো ৰৰত্থেতি, নো নিচ্চতো; দুক্খতো ৰৰত্থেতি, নো সুখতো…পে॰… পটিনিস্সজ্জতি, নো আদিযতি। অনিচ্চতো ৰৰত্থেন্তো নিচ্চসঞ্ঞং পজহতি, দুক্খতো ৰৰত্থেন্তো সুখসঞ্ঞং পজহতি…পে॰… পটিনিস্সজ্জন্তো আদানং পজহতি। এৰং কাযং অজ্ঝত্তং ৰৰত্থেতি।
Kathaṃ kāyaṃ ajjhattaṃ vavattheti? Kāyo avijjāsambhūtoti vavattheti, kāyo taṇhāsambhūtoti vavattheti, kāyo kammasambhūtoti vavattheti, kāyo āhārasambhūtoti vavattheti, kāyo catunnaṃ mahābhūtānaṃ upādāyāti vavattheti, kāyo uppannoti vavattheti, kāyo samudāgatoti vavattheti. Kāyo ahutvā sambhūto, hutvā na bhavissatīti vavattheti. Kāyaṃ antavantato vavattheti, kāyo addhuvo asassato vipariṇāmadhammoti vavattheti, kāyo anicco saṅkhato paṭiccasamuppanno khayadhammo vayadhammo virāgadhammo nirodhadhammoti vavattheti. Kāyaṃ aniccato vavattheti, no niccato; dukkhato vavattheti, no sukhato…pe… paṭinissajjati, no ādiyati. Aniccato vavatthento niccasaññaṃ pajahati, dukkhato vavatthento sukhasaññaṃ pajahati…pe… paṭinissajjanto ādānaṃ pajahati. Evaṃ kāyaṃ ajjhattaṃ vavattheti.
কথং মনং অজ্ঝত্তং ৰৰত্থেতি? মনো অৰিজ্জাসম্ভূতোতি ৰৰত্থেতি, মনো তণ্হাসম্ভূতোতি ৰৰত্থেতি, মনো কম্মসম্ভূতোতি ৰৰত্থেতি, মনো আহারসম্ভূতোতি ৰৰত্থেতি, মনো উপ্পন্নোতি ৰৰত্থেতি , মনো সমুদাগতোতি ৰৰত্থেতি। মনো অহুত্ৰা সম্ভূতো, হুত্ৰা ন ভৰিস্সতীতি ৰৰত্থেতি। মনং অন্তৰন্ততো ৰৰত্থেতি, মনো অদ্ধুৰো অসস্সতো ৰিপরিণামধম্মোতি ৰৰত্থেতি, মনো অনিচ্চো সঙ্খতো পটিচ্চসমুপ্পন্নো খযধম্মো ৰযধম্মো ৰিরাগধম্মো নিরোধধম্মোতি ৰৰত্থেতি। মনং অনিচ্চতো ৰৰত্থেতি, নো নিচ্চতো; দুক্খতো ৰৰত্থেতি, নো সুখতো; অনত্ততো ৰৰত্থেতি, নো অত্ততো; নিব্বিন্দতি, নো নন্দতি; ৰিরজ্জতি, নো রজ্জতি; নিরোধেতি, নো সমুদেতি; পটিনিস্সজ্জতি, নো আদিযতি। অনিচ্চতো ৰৰত্থেন্তো নিচ্চসঞ্ঞং পজহতি, দুক্খতো ৰৰত্থেন্তো সুখসঞ্ঞং পজহতি, অনত্ততো ৰৰত্থেন্তো অত্তসঞ্ঞং পজহতি, নিব্বিন্দন্তো নন্দিং পজহতি, ৰিরজ্জন্তো রাগং পজহতি, নিরোধেন্তো সমুদযং পজহতি, পটিনিস্সজ্জন্তো আদানং পজহতি। এৰং মনং অজ্ঝত্তং ৰৰত্থেতি। এৰং অজ্ঝত্তধম্মে ৰৰত্থেতি। তং ঞাতট্ঠেন ঞাণং, পজাননট্ঠেন পঞ্ঞা। তেন ৰুচ্চতি – ‘‘অজ্ঝত্তৰৰত্থানে পঞ্ঞা ৰত্থুনানত্তে ঞাণং’’।
Kathaṃ manaṃ ajjhattaṃ vavattheti? Mano avijjāsambhūtoti vavattheti, mano taṇhāsambhūtoti vavattheti, mano kammasambhūtoti vavattheti, mano āhārasambhūtoti vavattheti, mano uppannoti vavattheti , mano samudāgatoti vavattheti. Mano ahutvā sambhūto, hutvā na bhavissatīti vavattheti. Manaṃ antavantato vavattheti, mano addhuvo asassato vipariṇāmadhammoti vavattheti, mano anicco saṅkhato paṭiccasamuppanno khayadhammo vayadhammo virāgadhammo nirodhadhammoti vavattheti. Manaṃ aniccato vavattheti, no niccato; dukkhato vavattheti, no sukhato; anattato vavattheti, no attato; nibbindati, no nandati; virajjati, no rajjati; nirodheti, no samudeti; paṭinissajjati, no ādiyati. Aniccato vavatthento niccasaññaṃ pajahati, dukkhato vavatthento sukhasaññaṃ pajahati, anattato vavatthento attasaññaṃ pajahati, nibbindanto nandiṃ pajahati, virajjanto rāgaṃ pajahati, nirodhento samudayaṃ pajahati, paṭinissajjanto ādānaṃ pajahati. Evaṃ manaṃ ajjhattaṃ vavattheti. Evaṃ ajjhattadhamme vavattheti. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘ajjhattavavatthāne paññā vatthunānatte ñāṇaṃ’’.
ৰত্থুনানত্তঞাণনিদ্দেসো পন্নরসমো।
Vatthunānattañāṇaniddeso pannarasamo.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / ১৫. ৰত্থুনানত্তঞাণনিদ্দেসৰণ্ণনা • 15. Vatthunānattañāṇaniddesavaṇṇanā
