| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
১৪৩. ৰত্থুঠপনাদি
143. Vatthuṭhapanādi
২৩৯. ইধ পন, ভিক্খৰে, ভিক্খু তদহু পৰারণায সঙ্ঘমজ্ঝে উদাহরেয্য – ‘‘সুণাতু মে, ভন্তে, সঙ্ঘো। ইদং ৰত্থু পঞ্ঞাযতি, ন পুগ্গলো। যদি সঙ্ঘস্স পত্তকল্লং, ৰত্থুং ঠপেত্ৰা সঙ্ঘো পৰারেয্যা’’তি। সো এৰমস্স ৰচনীযো – ‘‘ভগৰতা খো, আৰুসো, ৰিসুদ্ধানং পৰারণা পঞ্ঞত্তা। সচে ৰত্থু পঞ্ঞাযতি, ন পুগ্গলো, ইদানেৰ নং ৰদেহী’’তি।
239. Idha pana, bhikkhave, bhikkhu tadahu pavāraṇāya saṅghamajjhe udāhareyya – ‘‘suṇātu me, bhante, saṅgho. Idaṃ vatthu paññāyati, na puggalo. Yadi saṅghassa pattakallaṃ, vatthuṃ ṭhapetvā saṅgho pavāreyyā’’ti. So evamassa vacanīyo – ‘‘bhagavatā kho, āvuso, visuddhānaṃ pavāraṇā paññattā. Sace vatthu paññāyati, na puggalo, idāneva naṃ vadehī’’ti.
ইধ পন, ভিক্খৰে, ভিক্খু তদহু পৰারণায সঙ্ঘমজ্ঝে উদাহরেয্য – ‘‘সুণাতু মে, ভন্তে, সঙ্ঘো। অযং পুগ্গলো পঞ্ঞাযতি, ন ৰত্থু। যদি সঙ্ঘস্স পত্তকল্লং, পুগ্গলং ঠপেত্ৰা সঙ্ঘো পৰারেয্যা’’তি। সো এৰমস্স ৰচনীযো – ‘‘ভগৰতা খো, আৰুসো, সমগ্গানং পৰারণা পঞ্ঞত্তা। সচে পুগ্গলো পঞ্ঞাযতি, ন ৰত্থু, ইদানেৰ নং ৰদেহী’’তি।
Idha pana, bhikkhave, bhikkhu tadahu pavāraṇāya saṅghamajjhe udāhareyya – ‘‘suṇātu me, bhante, saṅgho. Ayaṃ puggalo paññāyati, na vatthu. Yadi saṅghassa pattakallaṃ, puggalaṃ ṭhapetvā saṅgho pavāreyyā’’ti. So evamassa vacanīyo – ‘‘bhagavatā kho, āvuso, samaggānaṃ pavāraṇā paññattā. Sace puggalo paññāyati, na vatthu, idāneva naṃ vadehī’’ti.
ইধ পন, ভিক্খৰে, ভিক্খু তদহু পৰারণায সঙ্ঘমজ্ঝে উদাহরেয্য – ‘‘সুণাতু মে, ভন্তে, সঙ্ঘো। ইদং ৰত্থু চ পুগ্গলো চ পঞ্ঞাযতি। যদি সঙ্ঘস্স পত্তকল্লং, ৰত্থুঞ্চ পুগ্গলঞ্চ ঠপেত্ৰা সঙ্ঘো পৰারেয্যা’’তি। সো এৰমস্স ৰচনীযো – ‘‘ভগৰতা খো, আৰুসো, ৰিসুদ্ধানঞ্চ সমগ্গানঞ্চ পৰারণা পঞ্ঞত্তা। সচে ৰত্থু চ পুগ্গলো চ পঞ্ঞাযতি, ইদানেৰ নং ৰদেহী’’তি।
Idha pana, bhikkhave, bhikkhu tadahu pavāraṇāya saṅghamajjhe udāhareyya – ‘‘suṇātu me, bhante, saṅgho. Idaṃ vatthu ca puggalo ca paññāyati. Yadi saṅghassa pattakallaṃ, vatthuñca puggalañca ṭhapetvā saṅgho pavāreyyā’’ti. So evamassa vacanīyo – ‘‘bhagavatā kho, āvuso, visuddhānañca samaggānañca pavāraṇā paññattā. Sace vatthu ca puggalo ca paññāyati, idāneva naṃ vadehī’’ti.
পুব্বে চে, ভিক্খৰে, পৰারণায ৰত্থু পঞ্ঞাযতি, পচ্ছা পুগ্গলো, কল্লং ৰচনায। পুব্বে চে, ভিক্খৰে, পৰারণায পুগ্গলো পঞ্ঞাযতি, পচ্ছা ৰত্থু, কল্লং ৰচনায। পুব্বে চে, ভিক্খৰে, পৰারণায ৰত্থু চ পুগ্গলো চ পঞ্ঞাযতি, তং চে কতায পৰারণায উক্কোটেতি, উক্কোটনকং পাচিত্তিযন্তি।
Pubbe ce, bhikkhave, pavāraṇāya vatthu paññāyati, pacchā puggalo, kallaṃ vacanāya. Pubbe ce, bhikkhave, pavāraṇāya puggalo paññāyati, pacchā vatthu, kallaṃ vacanāya. Pubbe ce, bhikkhave, pavāraṇāya vatthu ca puggalo ca paññāyati, taṃ ce katāya pavāraṇāya ukkoṭeti, ukkoṭanakaṃ pācittiyanti.
ৰত্থুঠপনাদি নিট্ঠিতা।
Vatthuṭhapanādi niṭṭhitā.
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / ৰত্থুঠপনাদিকথা • Vatthuṭhapanādikathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / অনাপত্তিপন্নরসকাদিকথাৰণ্ণনা • Anāpattipannarasakādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / অফাসুৰিহারকথাদিৰণ্ণনা • Aphāsuvihārakathādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১৪৩. ৰত্থুট্ঠপনাদিকথা • 143. Vatthuṭṭhapanādikathā
