| Library / Tipiṭaka / ತಿಪಿಟಕ • Tipiṭaka / ಮಹಾವಗ್ಗಪಾಳಿ • Mahāvaggapāḷi |
೧೪೩. ವತ್ಥುಠಪನಾದಿ
143. Vatthuṭhapanādi
೨೩೯. ಇಧ ಪನ, ಭಿಕ್ಖವೇ, ಭಿಕ್ಖು ತದಹು ಪವಾರಣಾಯ ಸಙ್ಘಮಜ್ಝೇ ಉದಾಹರೇಯ್ಯ – ‘‘ಸುಣಾತು ಮೇ, ಭನ್ತೇ, ಸಙ್ಘೋ। ಇದಂ ವತ್ಥು ಪಞ್ಞಾಯತಿ, ನ ಪುಗ್ಗಲೋ। ಯದಿ ಸಙ್ಘಸ್ಸ ಪತ್ತಕಲ್ಲಂ, ವತ್ಥುಂ ಠಪೇತ್ವಾ ಸಙ್ಘೋ ಪವಾರೇಯ್ಯಾ’’ತಿ। ಸೋ ಏವಮಸ್ಸ ವಚನೀಯೋ – ‘‘ಭಗವತಾ ಖೋ, ಆವುಸೋ, ವಿಸುದ್ಧಾನಂ ಪವಾರಣಾ ಪಞ್ಞತ್ತಾ। ಸಚೇ ವತ್ಥು ಪಞ್ಞಾಯತಿ, ನ ಪುಗ್ಗಲೋ, ಇದಾನೇವ ನಂ ವದೇಹೀ’’ತಿ।
239. Idha pana, bhikkhave, bhikkhu tadahu pavāraṇāya saṅghamajjhe udāhareyya – ‘‘suṇātu me, bhante, saṅgho. Idaṃ vatthu paññāyati, na puggalo. Yadi saṅghassa pattakallaṃ, vatthuṃ ṭhapetvā saṅgho pavāreyyā’’ti. So evamassa vacanīyo – ‘‘bhagavatā kho, āvuso, visuddhānaṃ pavāraṇā paññattā. Sace vatthu paññāyati, na puggalo, idāneva naṃ vadehī’’ti.
ಇಧ ಪನ, ಭಿಕ್ಖವೇ, ಭಿಕ್ಖು ತದಹು ಪವಾರಣಾಯ ಸಙ್ಘಮಜ್ಝೇ ಉದಾಹರೇಯ್ಯ – ‘‘ಸುಣಾತು ಮೇ, ಭನ್ತೇ, ಸಙ್ಘೋ। ಅಯಂ ಪುಗ್ಗಲೋ ಪಞ್ಞಾಯತಿ, ನ ವತ್ಥು। ಯದಿ ಸಙ್ಘಸ್ಸ ಪತ್ತಕಲ್ಲಂ, ಪುಗ್ಗಲಂ ಠಪೇತ್ವಾ ಸಙ್ಘೋ ಪವಾರೇಯ್ಯಾ’’ತಿ। ಸೋ ಏವಮಸ್ಸ ವಚನೀಯೋ – ‘‘ಭಗವತಾ ಖೋ, ಆವುಸೋ, ಸಮಗ್ಗಾನಂ ಪವಾರಣಾ ಪಞ್ಞತ್ತಾ। ಸಚೇ ಪುಗ್ಗಲೋ ಪಞ್ಞಾಯತಿ, ನ ವತ್ಥು, ಇದಾನೇವ ನಂ ವದೇಹೀ’’ತಿ।
Idha pana, bhikkhave, bhikkhu tadahu pavāraṇāya saṅghamajjhe udāhareyya – ‘‘suṇātu me, bhante, saṅgho. Ayaṃ puggalo paññāyati, na vatthu. Yadi saṅghassa pattakallaṃ, puggalaṃ ṭhapetvā saṅgho pavāreyyā’’ti. So evamassa vacanīyo – ‘‘bhagavatā kho, āvuso, samaggānaṃ pavāraṇā paññattā. Sace puggalo paññāyati, na vatthu, idāneva naṃ vadehī’’ti.
ಇಧ ಪನ, ಭಿಕ್ಖವೇ, ಭಿಕ್ಖು ತದಹು ಪವಾರಣಾಯ ಸಙ್ಘಮಜ್ಝೇ ಉದಾಹರೇಯ್ಯ – ‘‘ಸುಣಾತು ಮೇ, ಭನ್ತೇ, ಸಙ್ಘೋ। ಇದಂ ವತ್ಥು ಚ ಪುಗ್ಗಲೋ ಚ ಪಞ್ಞಾಯತಿ। ಯದಿ ಸಙ್ಘಸ್ಸ ಪತ್ತಕಲ್ಲಂ, ವತ್ಥುಞ್ಚ ಪುಗ್ಗಲಞ್ಚ ಠಪೇತ್ವಾ ಸಙ್ಘೋ ಪವಾರೇಯ್ಯಾ’’ತಿ। ಸೋ ಏವಮಸ್ಸ ವಚನೀಯೋ – ‘‘ಭಗವತಾ ಖೋ, ಆವುಸೋ, ವಿಸುದ್ಧಾನಞ್ಚ ಸಮಗ್ಗಾನಞ್ಚ ಪವಾರಣಾ ಪಞ್ಞತ್ತಾ। ಸಚೇ ವತ್ಥು ಚ ಪುಗ್ಗಲೋ ಚ ಪಞ್ಞಾಯತಿ, ಇದಾನೇವ ನಂ ವದೇಹೀ’’ತಿ।
Idha pana, bhikkhave, bhikkhu tadahu pavāraṇāya saṅghamajjhe udāhareyya – ‘‘suṇātu me, bhante, saṅgho. Idaṃ vatthu ca puggalo ca paññāyati. Yadi saṅghassa pattakallaṃ, vatthuñca puggalañca ṭhapetvā saṅgho pavāreyyā’’ti. So evamassa vacanīyo – ‘‘bhagavatā kho, āvuso, visuddhānañca samaggānañca pavāraṇā paññattā. Sace vatthu ca puggalo ca paññāyati, idāneva naṃ vadehī’’ti.
ಪುಬ್ಬೇ ಚೇ, ಭಿಕ್ಖವೇ, ಪವಾರಣಾಯ ವತ್ಥು ಪಞ್ಞಾಯತಿ, ಪಚ್ಛಾ ಪುಗ್ಗಲೋ, ಕಲ್ಲಂ ವಚನಾಯ। ಪುಬ್ಬೇ ಚೇ, ಭಿಕ್ಖವೇ, ಪವಾರಣಾಯ ಪುಗ್ಗಲೋ ಪಞ್ಞಾಯತಿ, ಪಚ್ಛಾ ವತ್ಥು, ಕಲ್ಲಂ ವಚನಾಯ। ಪುಬ್ಬೇ ಚೇ, ಭಿಕ್ಖವೇ, ಪವಾರಣಾಯ ವತ್ಥು ಚ ಪುಗ್ಗಲೋ ಚ ಪಞ್ಞಾಯತಿ, ತಂ ಚೇ ಕತಾಯ ಪವಾರಣಾಯ ಉಕ್ಕೋಟೇತಿ, ಉಕ್ಕೋಟನಕಂ ಪಾಚಿತ್ತಿಯನ್ತಿ।
Pubbe ce, bhikkhave, pavāraṇāya vatthu paññāyati, pacchā puggalo, kallaṃ vacanāya. Pubbe ce, bhikkhave, pavāraṇāya puggalo paññāyati, pacchā vatthu, kallaṃ vacanāya. Pubbe ce, bhikkhave, pavāraṇāya vatthu ca puggalo ca paññāyati, taṃ ce katāya pavāraṇāya ukkoṭeti, ukkoṭanakaṃ pācittiyanti.
ವತ್ಥುಠಪನಾದಿ ನಿಟ್ಠಿತಾ।
Vatthuṭhapanādi niṭṭhitā.
Related texts:
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā / ವತ್ಥುಠಪನಾದಿಕಥಾ • Vatthuṭhapanādikathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಅನಾಪತ್ತಿಪನ್ನರಸಕಾದಿಕಥಾವಣ್ಣನಾ • Anāpattipannarasakādikathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಅಫಾಸುವಿಹಾರಕಥಾದಿವಣ್ಣನಾ • Aphāsuvihārakathādivaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೧೪೩. ವತ್ಥುಟ್ಠಪನಾದಿಕಥಾ • 143. Vatthuṭṭhapanādikathā
