| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
১৪৩. ৰত্থুট্ঠপনাদিকথা
143. Vatthuṭṭhapanādikathā
২৩৯. চোরা অগমংসু কিরাতি সম্বন্ধো। পোক্খরণিতো নীহরিত্ৰাতি সম্বন্ধো। সোতি ভিক্খু, এৰমাহাতি সম্বন্ধো। ৰুত্থেনাতি ৰসন্তেন, যেন কেনচি কতন্তি সম্বন্ধো। তং পুগ্গলন্তি ৰত্থুকতং তং পুগ্গলং। এত্থাতি ‘‘ৰত্থুং ঠপেত্ৰা সঙ্ঘো পৰারেয্যা’’তি পাঠে । ইমিনা ৰত্থুনা অপদিসাহীতি সম্বন্ধো। নন্তি পুগ্গলং। অনুৰিজ্জিত্ৰাতি অনুযুঞ্জিত্ৰা, পুচ্ছিত্ৰাতি অত্থো।
239. Corā agamaṃsu kirāti sambandho. Pokkharaṇito nīharitvāti sambandho. Soti bhikkhu, evamāhāti sambandho. Vutthenāti vasantena, yena kenaci katanti sambandho. Taṃ puggalanti vatthukataṃ taṃ puggalaṃ. Etthāti ‘‘vatthuṃ ṭhapetvā saṅgho pavāreyyā’’ti pāṭhe . Iminā vatthunā apadisāhīti sambandho. Nanti puggalaṃ. Anuvijjitvāti anuyuñjitvā, pucchitvāti attho.
একো ভিক্খু পূজেসি, পিৰীতি সম্বন্ধো। তস্সাতি ভিক্খুস্স। তদনুরূপোতি তেসং পূজনপিৰনানং অনুরূপো। সোতি চোদকো ভিক্খু। তং গন্ধন্তি তং সরীরগন্ধং। যং পুগ্গলন্তি যোজনা। ঠপেসীতি পৰারণায ঠপেসি। অযমস্সাতি অযং দোসো অস্স পুগ্গলস্স।
Eko bhikkhu pūjesi, pivīti sambandho. Tassāti bhikkhussa. Tadanurūpoti tesaṃ pūjanapivanānaṃ anurūpo. Soti codako bhikkhu. Taṃ gandhanti taṃ sarīragandhaṃ. Yaṃ puggalanti yojanā. Ṭhapesīti pavāraṇāya ṭhapesi. Ayamassāti ayaṃ doso assa puggalassa.
ইদানেৰ নন্তি এত্থ ‘‘ন’’ন্তি পদং ‘‘পুগ্গল’’ন্তি পদেন যোজেতব্বং। নং পুগ্গলন্তি হি অত্থো। উভযন্তি ৰত্থুঞ্চ পুগ্গলঞ্চাতি উভযং। কল্লং ৰচনাযাতি যুত্তং কথেতুং। কস্মা কল্লং ৰচনাযাতি যোজনা। পৰারণতো পুব্বে, পচ্ছা চাতি সম্বন্ধো। ইতি তস্মা কল্লং ৰচনাযাতি যোজনা। ইদঞ্হি উভযন্তি ৰত্থুপুগ্গলসঙ্খাতং ইদমেৰ উভযং। পৰারণায পুব্বেতি যোজনা। উক্কোটেন্তস্সাতি চালেন্তস্স।
Idāneva nanti ettha ‘‘na’’nti padaṃ ‘‘puggala’’nti padena yojetabbaṃ. Naṃ puggalanti hi attho. Ubhayanti vatthuñca puggalañcāti ubhayaṃ. Kallaṃ vacanāyāti yuttaṃ kathetuṃ. Kasmā kallaṃ vacanāyāti yojanā. Pavāraṇato pubbe, pacchā cāti sambandho. Iti tasmā kallaṃ vacanāyāti yojanā. Idañhi ubhayanti vatthupuggalasaṅkhātaṃ idameva ubhayaṃ. Pavāraṇāya pubbeti yojanā. Ukkoṭentassāti cālentassa.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ১৪৩. ৰত্থুঠপনাদি • 143. Vatthuṭhapanādi
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / ৰত্থুঠপনাদিকথা • Vatthuṭhapanādikathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / অনাপত্তিপন্নরসকাদিকথাৰণ্ণনা • Anāpattipannarasakādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / অফাসুৰিহারকথাদিৰণ্ণনা • Aphāsuvihārakathādivaṇṇanā
