| Library / Tipiṭaka / ತಿಪಿಟಕ • Tipiṭaka / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi |
೧೪೩. ವತ್ಥುಟ್ಠಪನಾದಿಕಥಾ
143. Vatthuṭṭhapanādikathā
೨೩೯. ಚೋರಾ ಅಗಮಂಸು ಕಿರಾತಿ ಸಮ್ಬನ್ಧೋ। ಪೋಕ್ಖರಣಿತೋ ನೀಹರಿತ್ವಾತಿ ಸಮ್ಬನ್ಧೋ। ಸೋತಿ ಭಿಕ್ಖು, ಏವಮಾಹಾತಿ ಸಮ್ಬನ್ಧೋ। ವುತ್ಥೇನಾತಿ ವಸನ್ತೇನ, ಯೇನ ಕೇನಚಿ ಕತನ್ತಿ ಸಮ್ಬನ್ಧೋ। ತಂ ಪುಗ್ಗಲನ್ತಿ ವತ್ಥುಕತಂ ತಂ ಪುಗ್ಗಲಂ। ಏತ್ಥಾತಿ ‘‘ವತ್ಥುಂ ಠಪೇತ್ವಾ ಸಙ್ಘೋ ಪವಾರೇಯ್ಯಾ’’ತಿ ಪಾಠೇ । ಇಮಿನಾ ವತ್ಥುನಾ ಅಪದಿಸಾಹೀತಿ ಸಮ್ಬನ್ಧೋ। ನನ್ತಿ ಪುಗ್ಗಲಂ। ಅನುವಿಜ್ಜಿತ್ವಾತಿ ಅನುಯುಞ್ಜಿತ್ವಾ, ಪುಚ್ಛಿತ್ವಾತಿ ಅತ್ಥೋ।
239. Corā agamaṃsu kirāti sambandho. Pokkharaṇito nīharitvāti sambandho. Soti bhikkhu, evamāhāti sambandho. Vutthenāti vasantena, yena kenaci katanti sambandho. Taṃ puggalanti vatthukataṃ taṃ puggalaṃ. Etthāti ‘‘vatthuṃ ṭhapetvā saṅgho pavāreyyā’’ti pāṭhe . Iminā vatthunā apadisāhīti sambandho. Nanti puggalaṃ. Anuvijjitvāti anuyuñjitvā, pucchitvāti attho.
ಏಕೋ ಭಿಕ್ಖು ಪೂಜೇಸಿ, ಪಿವೀತಿ ಸಮ್ಬನ್ಧೋ। ತಸ್ಸಾತಿ ಭಿಕ್ಖುಸ್ಸ। ತದನುರೂಪೋತಿ ತೇಸಂ ಪೂಜನಪಿವನಾನಂ ಅನುರೂಪೋ। ಸೋತಿ ಚೋದಕೋ ಭಿಕ್ಖು। ತಂ ಗನ್ಧನ್ತಿ ತಂ ಸರೀರಗನ್ಧಂ। ಯಂ ಪುಗ್ಗಲನ್ತಿ ಯೋಜನಾ। ಠಪೇಸೀತಿ ಪವಾರಣಾಯ ಠಪೇಸಿ। ಅಯಮಸ್ಸಾತಿ ಅಯಂ ದೋಸೋ ಅಸ್ಸ ಪುಗ್ಗಲಸ್ಸ।
Eko bhikkhu pūjesi, pivīti sambandho. Tassāti bhikkhussa. Tadanurūpoti tesaṃ pūjanapivanānaṃ anurūpo. Soti codako bhikkhu. Taṃ gandhanti taṃ sarīragandhaṃ. Yaṃ puggalanti yojanā. Ṭhapesīti pavāraṇāya ṭhapesi. Ayamassāti ayaṃ doso assa puggalassa.
ಇದಾನೇವ ನನ್ತಿ ಏತ್ಥ ‘‘ನ’’ನ್ತಿ ಪದಂ ‘‘ಪುಗ್ಗಲ’’ನ್ತಿ ಪದೇನ ಯೋಜೇತಬ್ಬಂ। ನಂ ಪುಗ್ಗಲನ್ತಿ ಹಿ ಅತ್ಥೋ। ಉಭಯನ್ತಿ ವತ್ಥುಞ್ಚ ಪುಗ್ಗಲಞ್ಚಾತಿ ಉಭಯಂ। ಕಲ್ಲಂ ವಚನಾಯಾತಿ ಯುತ್ತಂ ಕಥೇತುಂ। ಕಸ್ಮಾ ಕಲ್ಲಂ ವಚನಾಯಾತಿ ಯೋಜನಾ। ಪವಾರಣತೋ ಪುಬ್ಬೇ, ಪಚ್ಛಾ ಚಾತಿ ಸಮ್ಬನ್ಧೋ। ಇತಿ ತಸ್ಮಾ ಕಲ್ಲಂ ವಚನಾಯಾತಿ ಯೋಜನಾ। ಇದಞ್ಹಿ ಉಭಯನ್ತಿ ವತ್ಥುಪುಗ್ಗಲಸಙ್ಖಾತಂ ಇದಮೇವ ಉಭಯಂ। ಪವಾರಣಾಯ ಪುಬ್ಬೇತಿ ಯೋಜನಾ। ಉಕ್ಕೋಟೇನ್ತಸ್ಸಾತಿ ಚಾಲೇನ್ತಸ್ಸ।
Idāneva nanti ettha ‘‘na’’nti padaṃ ‘‘puggala’’nti padena yojetabbaṃ. Naṃ puggalanti hi attho. Ubhayanti vatthuñca puggalañcāti ubhayaṃ. Kallaṃ vacanāyāti yuttaṃ kathetuṃ. Kasmā kallaṃ vacanāyāti yojanā. Pavāraṇato pubbe, pacchā cāti sambandho. Iti tasmā kallaṃ vacanāyāti yojanā. Idañhi ubhayanti vatthupuggalasaṅkhātaṃ idameva ubhayaṃ. Pavāraṇāya pubbeti yojanā. Ukkoṭentassāti cālentassa.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಗ್ಗಪಾಳಿ • Mahāvaggapāḷi / ೧೪೩. ವತ್ಥುಠಪನಾದಿ • 143. Vatthuṭhapanādi
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā / ವತ್ಥುಠಪನಾದಿಕಥಾ • Vatthuṭhapanādikathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಅನಾಪತ್ತಿಪನ್ನರಸಕಾದಿಕಥಾವಣ್ಣನಾ • Anāpattipannarasakādikathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಅಫಾಸುವಿಹಾರಕಥಾದಿವಣ್ಣನಾ • Aphāsuvihārakathādivaṇṇanā
