| Library / Tipiṭaka / තිපිටක • Tipiṭaka / පාචිත්‍යාදියොජනාපාළි • Pācityādiyojanāpāḷi |
143. වත්‌ථුට්‌ඨපනාදිකථා
143. Vatthuṭṭhapanādikathā
239. චොරා අගමංසු කිරාති සම්‌බන්‌ධො. පොක්‌ඛරණිතො නීහරිත්‌වාති සම්‌බන්‌ධො. සොති භික්‌ඛු, එවමාහාති සම්‌බන්‌ධො. වුත්‌ථෙනාති වසන්‌තෙන, යෙන කෙනචි කතන්‌ති සම්‌බන්‌ධො. තං පුග්‌ගලන්‌ති වත්‌ථුකතං තං පුග්‌ගලං. එත්‌ථාති ‘‘වත්‌ථුං ඨපෙත්‌වා සඞ්‌ඝො පවාරෙය්‍යා’’ති පාඨෙ . ඉමිනා වත්‌ථුනා අපදිසාහීති සම්‌බන්‌ධො. නන්‌ති පුග්‌ගලං. අනුවිජ්‌ජිත්‌වාති අනුයුඤ්‌ජිත්‌වා, පුච්‌ඡිත්‌වාති අත්‌ථො.
239. Corā agamaṃsu kirāti sambandho. Pokkharaṇito nīharitvāti sambandho. Soti bhikkhu, evamāhāti sambandho. Vutthenāti vasantena, yena kenaci katanti sambandho. Taṃ puggalanti vatthukataṃ taṃ puggalaṃ. Etthāti ‘‘vatthuṃ ṭhapetvā saṅgho pavāreyyā’’ti pāṭhe . Iminā vatthunā apadisāhīti sambandho. Nanti puggalaṃ. Anuvijjitvāti anuyuñjitvā, pucchitvāti attho.
එකො භික්‌ඛු පූජෙසි, පිවීති සම්‌බන්‌ධො. තස්‌සාති භික්‌ඛුස්‌ස. තදනුරූපොති තෙසං පූජනපිවනානං අනුරූපො. සොති චොදකො භික්‌ඛු. තං ගන්‌ධන්‌ති තං සරීරගන්‌ධං. යං පුග්‌ගලන්‌ති යොජනා. ඨපෙසීති පවාරණාය ඨපෙසි. අයමස්‌සාති අයං දොසො අස්‌ස පුග්‌ගලස්‌ස.
Eko bhikkhu pūjesi, pivīti sambandho. Tassāti bhikkhussa. Tadanurūpoti tesaṃ pūjanapivanānaṃ anurūpo. Soti codako bhikkhu. Taṃ gandhanti taṃ sarīragandhaṃ. Yaṃ puggalanti yojanā. Ṭhapesīti pavāraṇāya ṭhapesi. Ayamassāti ayaṃ doso assa puggalassa.
ඉදානෙව නන්‌ති එත්‌ථ ‘‘න’’න්‌ති පදං ‘‘පුග්‌ගල’’න්‌ති පදෙන යොජෙතබ්‌බං. නං පුග්‌ගලන්‌ති හි අත්‌ථො. උභයන්‌ති වත්‌ථුඤ්‌ච පුග්‌ගලඤ්‌චාති උභයං. කල්‌ලං වචනායාති යුත්‌තං කථෙතුං. කස්‌මා කල්‌ලං වචනායාති යොජනා. පවාරණතො පුබ්‌බෙ, පච්‌ඡා චාති සම්‌බන්‌ධො. ඉති තස්‌මා කල්‌ලං වචනායාති යොජනා. ඉදඤ්‌හි උභයන්‌ති වත්‌ථුපුග්‌ගලසඞ්‌ඛාතං ඉදමෙව උභයං. පවාරණාය පුබ්‌බෙති යොජනා. උක්‌කොටෙන්‌තස්‌සාති චාලෙන්‌තස්‌ස.
Idāneva nanti ettha ‘‘na’’nti padaṃ ‘‘puggala’’nti padena yojetabbaṃ. Naṃ puggalanti hi attho. Ubhayanti vatthuñca puggalañcāti ubhayaṃ. Kallaṃ vacanāyāti yuttaṃ kathetuṃ. Kasmā kallaṃ vacanāyāti yojanā. Pavāraṇato pubbe, pacchā cāti sambandho. Iti tasmā kallaṃ vacanāyāti yojanā. Idañhi ubhayanti vatthupuggalasaṅkhātaṃ idameva ubhayaṃ. Pavāraṇāya pubbeti yojanā. Ukkoṭentassāti cālentassa.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවග්‌ගපාළි • Mahāvaggapāḷi / 143. වත්‌ථුඨපනාදි • 143. Vatthuṭhapanādi
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / වත්‌ථුඨපනාදිකථා • Vatthuṭhapanādikathā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / අනාපත්‌තිපන්‌නරසකාදිකථාවණ්‌ණනා • Anāpattipannarasakādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / අඵාසුවිහාරකථාදිවණ්‌ණනා • Aphāsuvihārakathādivaṇṇanā
