| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၉. ဝာယသင္ဂပဉ္ဟော
9. Vāyasaṅgapañho
၉. ‘‘ဘန္တေ နာဂသေန, ‘ဝာယသသ္သ ဒ္ဝေ အင္ဂာနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ဒ္ဝေ အင္ဂာနိ ဂဟေတဗ္ဗာနီ’’တိ? ‘‘ယထာ, မဟာရာဇ, ဝာယသော အာသင္ကိတပရိသင္ကိတော ယတ္တပ္ပယတ္တော စရတိ, ဧဝမေဝ ခော, မဟာရာဇ, ယောဂိနာ ယောဂာဝစရေန အာသင္ကိတပရိသင္ကိတေန ယတ္တပယတ္တေန ဥပဋ္ဌိတာယ သတိယာ သံဝုတေဟိ ဣန္ဒ္ရိယေဟိ စရိတဗ္ဗံ။ ဣဒံ, မဟာရာဇ, ဝာယသသ္သ ပဌမံ အင္ဂံ ဂဟေတဗ္ဗံ။
9. ‘‘Bhante nāgasena, ‘vāyasassa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, vāyaso āsaṅkitaparisaṅkito yattappayatto carati, evameva kho, mahārāja, yoginā yogāvacarena āsaṅkitaparisaṅkitena yattapayattena upaṭṭhitāya satiyā saṃvutehi indriyehi caritabbaṃ. Idaṃ, mahārāja, vāyasassa paṭhamaṃ aṅgaṃ gahetabbaṃ.
‘‘ပုန စပရံ, မဟာရာဇ, ဝာယသော ယံ ကိဉ္စိ ဘောဇနံ ဒိသ္ဝာ ဉာတီဟိ သံဝိဘဇိတ္ဝာ ဘုဉ္ဇတိ, ဧဝမေဝ ခော, မဟာရာဇ, ယောဂိနာ ယောဂာဝစရေန ယေ တေ လာဘာ ဓမ္မိကာ ဓမ္မလဒ္ဓာ အန္တမသော ပတ္တပရိယာပန္နမတ္တမ္ပိ, တထာရူပေဟိ လာဘေဟိ ပဋိဝိဘတ္တဘောဂိနာ ဘဝိတဗ္ဗံ သီလဝန္တေဟိ သဗ္ရဟ္မစာရီဟိ။ ဣဒံ, မဟာရာဇ, ဝာယသသ္သ ဒုတိယံ အင္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန သာရိပုတ္တေန ဓမ္မသေနာပတိနာ –
‘‘Puna caparaṃ, mahārāja, vāyaso yaṃ kiñci bhojanaṃ disvā ñātīhi saṃvibhajitvā bhuñjati, evameva kho, mahārāja, yoginā yogāvacarena ye te lābhā dhammikā dhammaladdhā antamaso pattapariyāpannamattampi, tathārūpehi lābhehi paṭivibhattabhoginā bhavitabbaṃ sīlavantehi sabrahmacārīhi. Idaṃ, mahārāja, vāyasassa dutiyaṃ aṅgaṃ gahetabbaṃ. Bhāsitampetaṃ, mahārāja, therena sāriputtena dhammasenāpatinā –
‘‘‘သစေ မေ ဥပနာမေန္တိ၊ ယထာလဒ္ဓံ တပသ္သိနော။
‘‘‘Sace me upanāmenti, yathāladdhaṃ tapassino;
သဗ္ဗေ သံဝိဘဇိတ္ဝာန၊ တတော ဘုဉ္ဇာမိ ဘောဇန’’’န္တိ။
Sabbe saṃvibhajitvāna, tato bhuñjāmi bhojana’’’nti.
ဝာယသင္ဂပဉ္ဟော နဝမော။
Vāyasaṅgapañho navamo.
