| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
9. වායසඞ්‌ගපඤ්‌හො
9. Vāyasaṅgapañho
9. ‘‘භන්‌තෙ නාගසෙන, ‘වායසස්‌ස ද්‌වෙ අඞ්‌ගානි ගහෙතබ්‌බානී’ති යං වදෙසි, කතමානි තානි ද්‌වෙ අඞ්‌ගානි ගහෙතබ්‌බානී’’ති? ‘‘යථා, මහාරාජ, වායසො ආසඞ්‌කිතපරිසඞ්‌කිතො යත්‌තප්‌පයත්‌තො චරති, එවමෙව ඛො, මහාරාජ, යොගිනා යොගාවචරෙන ආසඞ්‌කිතපරිසඞ්‌කිතෙන යත්‌තපයත්‌තෙන උපට්‌ඨිතාය සතියා සංවුතෙහි ඉන්‌ද්‍රියෙහි චරිතබ්‌බං. ඉදං, මහාරාජ, වායසස්‌ස පඨමං අඞ්‌ගං ගහෙතබ්‌බං.
9. ‘‘Bhante nāgasena, ‘vāyasassa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, vāyaso āsaṅkitaparisaṅkito yattappayatto carati, evameva kho, mahārāja, yoginā yogāvacarena āsaṅkitaparisaṅkitena yattapayattena upaṭṭhitāya satiyā saṃvutehi indriyehi caritabbaṃ. Idaṃ, mahārāja, vāyasassa paṭhamaṃ aṅgaṃ gahetabbaṃ.
‘‘පුන චපරං, මහාරාජ, වායසො යං කිඤ්‌චි භොජනං දිස්‌වා ඤාතීහි සංවිභජිත්‌වා භුඤ්‌ජති, එවමෙව ඛො, මහාරාජ, යොගිනා යොගාවචරෙන යෙ තෙ ලාභා ධම්‌මිකා ධම්‌මලද්‌ධා අන්‌තමසො පත්‌තපරියාපන්‌නමත්‌තම්‌පි, තථාරූපෙහි ලාභෙහි පටිවිභත්‌තභොගිනා භවිතබ්‌බං සීලවන්‌තෙහි සබ්‍රහ්‌මචාරීහි. ඉදං, මහාරාජ, වායසස්‌ස දුතියං අඞ්‌ගං ගහෙතබ්‌බං. භාසිතම්‌පෙතං, මහාරාජ, ථෙරෙන සාරිපුත්‌තෙන ධම්‌මසෙනාපතිනා –
‘‘Puna caparaṃ, mahārāja, vāyaso yaṃ kiñci bhojanaṃ disvā ñātīhi saṃvibhajitvā bhuñjati, evameva kho, mahārāja, yoginā yogāvacarena ye te lābhā dhammikā dhammaladdhā antamaso pattapariyāpannamattampi, tathārūpehi lābhehi paṭivibhattabhoginā bhavitabbaṃ sīlavantehi sabrahmacārīhi. Idaṃ, mahārāja, vāyasassa dutiyaṃ aṅgaṃ gahetabbaṃ. Bhāsitampetaṃ, mahārāja, therena sāriputtena dhammasenāpatinā –
‘‘‘සචෙ මෙ උපනාමෙන්‌ති, යථාලද්‌ධං තපස්‌සිනො;
‘‘‘Sace me upanāmenti, yathāladdhaṃ tapassino;
සබ්‌බෙ සංවිභජිත්‌වාන, තතො භුඤ්‌ජාමි භොජන’’’න්‌ති.
Sabbe saṃvibhajitvāna, tato bhuñjāmi bhojana’’’nti.
වායසඞ්‌ගපඤ්‌හො නවමො.
Vāyasaṅgapañho navamo.
