| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
9. වෙදනාලක්‌ඛණපඤ්‌හො
9. Vedanālakkhaṇapañho
9. ‘‘භන්‌තෙ නාගසෙන, කිංලක්‌ඛණා වෙදනා’’ති? ‘‘වෙදයිතලක්‌ඛණා, මහාරාජ, වෙදනා අනුභවනලක්‌ඛණා චා’’ති.
9. ‘‘Bhante nāgasena, kiṃlakkhaṇā vedanā’’ti? ‘‘Vedayitalakkhaṇā, mahārāja, vedanā anubhavanalakkhaṇā cā’’ti.
‘‘ඔපම්‌මං කරොහී’’ති. ‘‘යථා, මහාරාජ, කොචිදෙව පුරිසො රඤ්‌ඤො අධිකාරං කරෙය්‍ය, තස්‌ස රාජා තුට්‌ඨො අධිකාරං දදෙය්‍ය, සො තෙන අධිකාරෙන පඤ්‌චහි කාමගුණෙහි සමප්‌පිතො සමඞ්‌ගිභූතො පරිචරෙය්‍ය, තස්‌ස එවමස්‌ස ‘මයා ඛො පුබ්‌බෙ රඤ්‌ඤො අධිකාරො කතො, තස්‌ස මෙ රාජා තුට්‌ඨො අධිකාරං අදාසි, ස්‌වාහං තතොනිදානං ඉමං එවරූපං වෙදනං වෙදයාමී’ති.
‘‘Opammaṃ karohī’’ti. ‘‘Yathā, mahārāja, kocideva puriso rañño adhikāraṃ kareyya, tassa rājā tuṭṭho adhikāraṃ dadeyya, so tena adhikārena pañcahi kāmaguṇehi samappito samaṅgibhūto paricareyya, tassa evamassa ‘mayā kho pubbe rañño adhikāro kato, tassa me rājā tuṭṭho adhikāraṃ adāsi, svāhaṃ tatonidānaṃ imaṃ evarūpaṃ vedanaṃ vedayāmī’ti.
‘‘යථා වා පන, මහාරාජ, කොචිදෙව පුරිසො කුසලං කම්‌මං කත්‌වා කායස්‌ස භෙදා පරං මරණා සුගතිං සග්‌ගං ලොකං උපපජ්‌ජෙය්‍ය, සො ච තත්‌ථ දිබ්‌බෙහි පඤ්‌චහි කාමගුණෙහි සමප්‌පිතො සමඞ්‌ගිභූතො පරිචරෙය්‍ය, තස්‌ස එවමස්‌ස ‘ස්‌වාහං ඛො පුබ්‌බෙ කුසලං කම්‌මං අකාසිං, සොහං තතොනිදානං ඉමං එවරූපං වෙදනං වෙදයාමී’ති, එවං ඛො, මහාරාජ, වෙදයිතලක්‌ඛණා වෙදනා අනුභවනලක්‌ඛණා චා’’ති.
‘‘Yathā vā pana, mahārāja, kocideva puriso kusalaṃ kammaṃ katvā kāyassa bhedā paraṃ maraṇā sugatiṃ saggaṃ lokaṃ upapajjeyya, so ca tattha dibbehi pañcahi kāmaguṇehi samappito samaṅgibhūto paricareyya, tassa evamassa ‘svāhaṃ kho pubbe kusalaṃ kammaṃ akāsiṃ, sohaṃ tatonidānaṃ imaṃ evarūpaṃ vedanaṃ vedayāmī’ti, evaṃ kho, mahārāja, vedayitalakkhaṇā vedanā anubhavanalakkhaṇā cā’’ti.
‘‘කල්‌ලොසි , භන්‌තෙ නාගසෙනා’’ති.
‘‘Kallosi , bhante nāgasenā’’ti.
වෙදනාලක්‌ඛණපඤ්‌හො නවමො.
Vedanālakkhaṇapañho navamo.
