| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
5. வேத³னாபஞ்ஹோ
5. Vedanāpañho
5. ராஜா ஆஹ ‘‘ப⁴ந்தே நாக³ஸேன, ஸுகா² வேத³னா குஸலா வா அகுஸலா வா அப்³யாகதா வா’’தி? ‘‘ஸியா, மஹாராஜ, குஸலா, ஸியா அகுஸலா, ஸியா அப்³யாகதா’’தி. ‘‘யதி³, ப⁴ந்தே, குஸலா ந து³க்கா², யதி³ து³க்கா² ந குஸலா, குஸலங் து³க்க²ந்தி நுப்பஜ்ஜதீ’’தி. ‘‘தங் கிங் மஞ்ஞஸி, மஹாராஜ, இத⁴ புரிஸஸ்ஸ ஹத்தே² தத்தங் அயோகு³ளங் நிக்கி²பெய்ய, து³தியே ஹத்தே² ஸீதங் ஹிமபிண்ட³ங் நிக்கி²பெய்ய, கிங் நு கோ², மஹாராஜ, உபோ⁴பி தே த³ஹெய்யு’’ந்தி? ‘‘ஆம, ப⁴ந்தே, உபோ⁴பி தே த³ஹெய்யு’’ந்தி. ‘‘கிங் நு கோ², தே மஹாராஜ, உபோ⁴பி உண்ஹா’’தி? ‘‘ந ஹி ப⁴ந்தே’’தி. ‘‘கிங் பன தே, மஹாராஜ, உபோ⁴பி ஸீதலா’’தி? ‘‘ந ஹி ப⁴ந்தே’’தி. ‘‘ஆஜானாஹி நிக்³க³ஹங் யதி³ தத்தங் த³ஹதி, ந ச தே உபோ⁴பி உண்ஹா, தேன நுப்பஜ்ஜதி. யதி³ ஸீதலங் த³ஹதி, ந ச தே உபோ⁴பி ஸீதலா, தேன நுப்பஜ்ஜதி. கிஸ்ஸ பன தே, மஹாராஜ, உபோ⁴பி த³ஹந்தி, ந ச தே உபோ⁴பி உண்ஹா, ந ச தே உபோ⁴பி ஸீதலா? ஏகங் உண்ஹங், ஏகங் ஸீதலங், உபோ⁴பி தே த³ஹந்தி, தேன நுப்பஜ்ஜதீ’’தி. ‘‘நாஹங் படிப³லோ தயா வாதி³னா ஸத்³தி⁴ங் ஸல்லபிதுங், ஸாது⁴ அத்த²ங் ஜப்பேஹீ’’தி. ததோ தே²ரோ அபி⁴த⁴ம்மஸங்யுத்தாய கதா²ய ராஜானங் மிலிந்த³ங் ஸஞ்ஞாபேஸி –
5. Rājā āha ‘‘bhante nāgasena, sukhā vedanā kusalā vā akusalā vā abyākatā vā’’ti? ‘‘Siyā, mahārāja, kusalā, siyā akusalā, siyā abyākatā’’ti. ‘‘Yadi, bhante, kusalā na dukkhā, yadi dukkhā na kusalā, kusalaṃ dukkhanti nuppajjatī’’ti. ‘‘Taṃ kiṃ maññasi, mahārāja, idha purisassa hatthe tattaṃ ayoguḷaṃ nikkhipeyya, dutiye hatthe sītaṃ himapiṇḍaṃ nikkhipeyya, kiṃ nu kho, mahārāja, ubhopi te daheyyu’’nti? ‘‘Āma, bhante, ubhopi te daheyyu’’nti. ‘‘Kiṃ nu kho, te mahārāja, ubhopi uṇhā’’ti? ‘‘Na hi bhante’’ti. ‘‘Kiṃ pana te, mahārāja, ubhopi sītalā’’ti? ‘‘Na hi bhante’’ti. ‘‘Ājānāhi niggahaṃ yadi tattaṃ dahati, na ca te ubhopi uṇhā, tena nuppajjati. Yadi sītalaṃ dahati, na ca te ubhopi sītalā, tena nuppajjati. Kissa pana te, mahārāja, ubhopi dahanti, na ca te ubhopi uṇhā, na ca te ubhopi sītalā? Ekaṃ uṇhaṃ, ekaṃ sītalaṃ, ubhopi te dahanti, tena nuppajjatī’’ti. ‘‘Nāhaṃ paṭibalo tayā vādinā saddhiṃ sallapituṃ, sādhu atthaṃ jappehī’’ti. Tato thero abhidhammasaṃyuttāya kathāya rājānaṃ milindaṃ saññāpesi –
‘‘ச²யிமானி , மஹாராஜ, கே³ஹனிஸ்ஸிதானி ஸோமனஸ்ஸானி, ச² நெக்க²ம்மனிஸ்ஸிதானி ஸோமனஸ்ஸானி, ச² கே³ஹனிஸ்ஸிதானி தோ³மனஸ்ஸானி, ச² நெக்க²ம்மனிஸ்ஸிதானி தோ³மனஸ்ஸானி, ச² கே³ஹனிஸ்ஸிதா உபெக்கா², ச² நெக்க²ம்மனிஸ்ஸிதா உபெக்கா²தி, இமானி ச² ச²க்கானி, அதீதாபி ச²த்திங்ஸவிதா⁴ வேத³னா, அனாக³தாபி ச²த்திங்ஸவிதா⁴ வேத³னா, பச்சுப்பன்னாபி ச²த்திங்ஸவிதா⁴ வேத³னா, ததே³கஜ்ஜ²ங் அபி⁴ஸஞ்ஞுஹித்வா அபி⁴ஸம்பிண்டெ³த்வா அட்ட²ஸதங் வேத³னா ஹொந்தீ’’தி.
‘‘Chayimāni , mahārāja, gehanissitāni somanassāni, cha nekkhammanissitāni somanassāni, cha gehanissitāni domanassāni, cha nekkhammanissitāni domanassāni, cha gehanissitā upekkhā, cha nekkhammanissitā upekkhāti, imāni cha chakkāni, atītāpi chattiṃsavidhā vedanā, anāgatāpi chattiṃsavidhā vedanā, paccuppannāpi chattiṃsavidhā vedanā, tadekajjhaṃ abhisaññuhitvā abhisampiṇḍetvā aṭṭhasataṃ vedanā hontī’’ti.
‘‘கல்லோஸி, ப⁴ந்தே நாக³ஸேனா’’தி.
‘‘Kallosi, bhante nāgasenā’’ti.
வேத³னாபஞ்ஹோ பஞ்சமோ.
Vedanāpañho pañcamo.
