| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
9. වෙදනාසුත්‌තං
9. Vedanāsuttaṃ
415. ‘‘තිස්‌සො ඉමා, භික්‌ඛවෙ, වෙදනා. කතමා තිස්‌සො? සුඛා වෙදනා, දුක්‌ඛා වෙදනා, අදුක්‌ඛමසුඛා වෙදනා – ඉමා ඛො, භික්‌ඛවෙ, තිස්‌සො වෙදනා. ඉමාසං ඛො, භික්‌ඛවෙ, තිස්‌සන්‌නං වෙදනානං පරිඤ්‌ඤාය චත්‌තාරො සතිපට්‌ඨානා භාවෙතබ්‌බා.
415. ‘‘Tisso imā, bhikkhave, vedanā. Katamā tisso? Sukhā vedanā, dukkhā vedanā, adukkhamasukhā vedanā – imā kho, bhikkhave, tisso vedanā. Imāsaṃ kho, bhikkhave, tissannaṃ vedanānaṃ pariññāya cattāro satipaṭṭhānā bhāvetabbā.
‘‘කතමෙ චත්‌තාරො? ඉධ භික්‌ඛවෙ, භික්‌ඛු කායෙ කායානුපස්‌සී විහරති ආතාපී සම්‌පජානො සතිමා, විනෙය්‍ය ලොකෙ අභිජ්‌ඣාදොමනස්‌සං; වෙදනාසු…පෙ.… චිත්‌තෙ…පෙ.… ධම්‌මෙසු ධම්‌මානුපස්‌සී විහරති ආතාපී සම්‌පජානො සතිමා, විනෙය්‍ය ලොකෙ අභිජ්‌ඣාදොමනස්‌සං. ඉමාසං ඛො, භික්‌ඛවෙ, තිස්‌සන්‌නං වෙදනානං පරිඤ්‌ඤාය ඉමෙ චත්‌තාරො සතිපට්‌ඨානා භාවෙතබ්‌බා’’ති. නවමං.
‘‘Katame cattāro? Idha bhikkhave, bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṃ; vedanāsu…pe… citte…pe… dhammesu dhammānupassī viharati ātāpī sampajāno satimā, vineyya loke abhijjhādomanassaṃ. Imāsaṃ kho, bhikkhave, tissannaṃ vedanānaṃ pariññāya ime cattāro satipaṭṭhānā bhāvetabbā’’ti. Navamaṃ.
