| Library / Tipiṭaka / திபிடக • Tipiṭaka / பஞ்சபகரண-மூலடீகா • Pañcapakaraṇa-mūlaṭīkā |
2. வேத³னாத்திகவண்ணனா
2. Vedanāttikavaṇṇanā
1. வேத³னாரூபனிப்³பா³னானி பன திகமுத்தகானி படிச்சாதி³னியமங் பச்சயுப்பன்னவசனஞ்ச ந லப⁴ந்தி. படிச்சவாராதீ³ஸு பன ச²ஸு யதோ ஹேதுபச்சயாதி³தோ திகத⁴ம்மானங் உப்பத்தி வுத்தா, தத்த² யதா²னுரூபதோ ஆரம்மணாதி³பச்சயபா⁴வேன லப்³ப⁴ந்தீதி வேதி³தப்³பா³னீதி.
1. Vedanārūpanibbānāni pana tikamuttakāni paṭiccādiniyamaṃ paccayuppannavacanañca na labhanti. Paṭiccavārādīsu pana chasu yato hetupaccayādito tikadhammānaṃ uppatti vuttā, tattha yathānurūpato ārammaṇādipaccayabhāvena labbhantīti veditabbānīti.
10. ஸப்³ப³அரூபத⁴ம்மபரிக்³கா³ஹகா பன ஸஹஜாதாத³யோ பச்சயாதி இமினா குஸலத்திகேபி பரிஹீனங் ஸஹஜாதங் ரூபாரூபத⁴ம்மபரிக்³கா³ஹகத்தா ஆதி³ம்ஹி ட²பெத்வா ஆதி³ஸத்³தே³ன ஸப்³பா³ரூபத⁴ம்மபரிக்³கா³ஹகவசனேன ச பச்சயுப்பன்னவஸேன ஸப்³ப³அரூபத⁴ம்மபரிக்³கா³ஹகானங் ஆரம்மணாதீ³னங் பரிஹானிங் த³ஸ்ஸேதீதி த³ட்ட²ப்³ப³ங். தேன குஸலத்திகபரிஹீனானங் ஸப்³ப³ட்டா²னிகானங் சதுன்னங் ஸப்³ப³திகாதீ³ஸு பரிஹானி த³ஸ்ஸிதா ஹோதி. பச்சா²ஜாதபச்சயஞ்ச வினாவ உப்பத்திதோதி ஏதேன பன பச்சா²ஜாதபச்சயஸ்ஸ அனுலோமே பரிஹானிங், பச்சனீயே ச லாப⁴ங் த³ஸ்ஸேதி. ஸஹஜாதாத³யோதி வா ஸஹஜாதமூலகா ஸஹஜாதனிப³ந்த⁴னா படிச்சாதி³ங் ப²ரந்தேஹி ஸஹஜாதத⁴ம்மேஹி வினா பச்சயா அஹொந்தாதி வுத்தங் ஹோதி. கஸ்மா பன ஸஹஜாதனிப³ந்த⁴னா ஸப்³பா³ரூபத⁴ம்மபரிக்³கா³ஹகா ச யே, தேவ பரிஹாயந்தி , ந பன யோ ஸஹஜாதானிப³ந்த⁴னோ ஸப்³பா³ரூபத⁴ம்மபரிக்³கா³ஹகோ ச ந ஹோதி, ஸோ பச்சா²ஜாதோதி தத்த² காரணங் வத³ந்தோ ‘‘ஸஹஜாதாதீ³ஹி வினா அனுப்பத்திதோ பச்சா²ஜாதபச்சயஞ்ச வினாவ உப்பத்திதோ’’தி ஆஹ. தத்த² ஸஹஜாதாதீ³ஹி வினாதி ஸஹஜாதனிப³ந்த⁴னேஹி ஸப்³பா³ரூபத⁴ம்மபரிக்³கா³ஹகேஹி ச வினாதி அத்தோ². அத² வா ஸஹஜாதனிப³ந்த⁴னானமேவ பரிஹானி, ந பச்சா²ஜாதஸ்ஸ ஸஹஜாதானிப³ந்த⁴னஸ்ஸாதி எத்தே²வ காரணங் வத³ந்தோ ‘‘ஸஹஜாதாதீ³ஹி வினா அனுப்பத்திதோ பச்சா²ஜாதபச்சயஞ்ச வினாவ உப்பத்திதோ’’தி ஆஹ. ஸஹஜாதனிப³ந்த⁴னாபி பன ஸப்³ப³அரூபத⁴ம்மபரிக்³கா³ஹகாயேவ பரிஹாயந்தீதி த³ஸ்ஸிதமேதந்தி.
10. Sabbaarūpadhammapariggāhakā pana sahajātādayo paccayāti iminā kusalattikepi parihīnaṃ sahajātaṃ rūpārūpadhammapariggāhakattā ādimhi ṭhapetvā ādisaddena sabbārūpadhammapariggāhakavacanena ca paccayuppannavasena sabbaarūpadhammapariggāhakānaṃ ārammaṇādīnaṃ parihāniṃ dassetīti daṭṭhabbaṃ. Tena kusalattikaparihīnānaṃ sabbaṭṭhānikānaṃ catunnaṃ sabbatikādīsu parihāni dassitā hoti. Pacchājātapaccayañca vināva uppattitoti etena pana pacchājātapaccayassa anulome parihāniṃ, paccanīye ca lābhaṃ dasseti. Sahajātādayoti vā sahajātamūlakā sahajātanibandhanā paṭiccādiṃ pharantehi sahajātadhammehi vinā paccayā ahontāti vuttaṃ hoti. Kasmā pana sahajātanibandhanā sabbārūpadhammapariggāhakā ca ye, teva parihāyanti , na pana yo sahajātānibandhano sabbārūpadhammapariggāhako ca na hoti, so pacchājātoti tattha kāraṇaṃ vadanto ‘‘sahajātādīhi vinā anuppattito pacchājātapaccayañca vināva uppattito’’ti āha. Tattha sahajātādīhi vināti sahajātanibandhanehi sabbārūpadhammapariggāhakehi ca vināti attho. Atha vā sahajātanibandhanānameva parihāni, na pacchājātassa sahajātānibandhanassāti ettheva kāraṇaṃ vadanto ‘‘sahajātādīhi vinā anuppattito pacchājātapaccayañca vināva uppattito’’ti āha. Sahajātanibandhanāpi pana sabbaarūpadhammapariggāhakāyeva parihāyantīti dassitametanti.
17. நவிபாகேபி ஏஸேவ நயோதி நயத³ஸ்ஸனமேவ கரோதி, ந ச பச்சயபச்சயுப்பன்னஸாமஞ்ஞத³ஸ்ஸனங். ஸுகா²ய ஹி அது³க்க²மஸுகா²ய ச வேத³னாய ஸம்பயுத்தே த⁴ம்மே படிச்ச தாஹி வேத³னாஹி ஸம்பயுத்தா அஹேதுககிரியத⁴ம்மா விசிகிச்சு²த்³த⁴ச்சஸஹஜாதமோஹோ சாதி அயஞ்ஹெத்த² நயோதி. நவிப்பயுத்தே ஏகந்தி ஆருப்பே ஆவஜ்ஜனவஸேன வுத்தந்தி இத³ங் ஆவஜ்ஜனாஹேதுகமோஹானங் வஸேன வுத்தந்தி த³ட்ட²ப்³ப³ங்.
17. Navipākepi eseva nayoti nayadassanameva karoti, na ca paccayapaccayuppannasāmaññadassanaṃ. Sukhāya hi adukkhamasukhāya ca vedanāya sampayutte dhamme paṭicca tāhi vedanāhi sampayuttā ahetukakiriyadhammā vicikicchuddhaccasahajātamoho cāti ayañhettha nayoti. Navippayutte ekanti āruppe āvajjanavasena vuttanti idaṃ āvajjanāhetukamohānaṃ vasena vuttanti daṭṭhabbaṃ.
25-37. அனுலோமபச்சனீயே யதா² குஸலத்திகங், ஏவங் க³ணேதப்³ப³ந்தி ஹேதுமூலகாதீ³னங் நயானங் ஏகமூலகத்³விமூலகாதி³வஸேன ச யோஜெத்வா க³ஹேதப்³ப³தாஸாமஞ்ஞங் ஸந்தா⁴ய வுத்தங், ந க³ணனஸாமஞ்ஞங். இதோ பரேஸுபி ஏவரூபேஸு ஏஸேவ நயோ. அஹேதுகஸ்ஸ பன சித்துப்பாத³ஸ்ஸாதிஆதி³ நஹேதுமூலகங் ஸந்தா⁴ய வுத்தங், ‘‘அஹேதுகஸ்ஸ பன சித்துப்பாத³ஸ்ஸ மோஹஸ்ஸ சா’’தி பனெத்த² வத்தப்³ப³ங். மோஹஸ்ஸ சாபி ஹி அஹேதுகஸ்ஸ அதி⁴பதிஅபா⁴வதோ அதி⁴பதினோ நஹேதுமூலகே அனுலோமதோ அட்டா²னந்தி. பரிவத்தெத்வாபீதி நஹேதுபச்சயா நஅதி⁴பதிபச்சயா ஆரம்மணே தீணீதி ஏவங் புரதோ டி²தம்பி ஆரம்மணாதி³ங் பச்ச²தோ யோஜெத்வாதி அத்தோ².
25-37. Anulomapaccanīye yathā kusalattikaṃ, evaṃ gaṇetabbanti hetumūlakādīnaṃ nayānaṃ ekamūlakadvimūlakādivasena ca yojetvā gahetabbatāsāmaññaṃ sandhāya vuttaṃ, na gaṇanasāmaññaṃ. Ito paresupi evarūpesu eseva nayo. Ahetukassa pana cittuppādassātiādi nahetumūlakaṃ sandhāya vuttaṃ, ‘‘ahetukassa pana cittuppādassa mohassa cā’’ti panettha vattabbaṃ. Mohassa cāpi hi ahetukassa adhipatiabhāvato adhipatino nahetumūlake anulomato aṭṭhānanti. Parivattetvāpīti nahetupaccayā naadhipatipaccayā ārammaṇe tīṇīti evaṃ purato ṭhitampi ārammaṇādiṃ pacchato yojetvāti attho.
39. பஞ்ஹாவாரே தோ³மனஸ்ஸங் உப்பஜ்ஜதீதி ஏதேன தங்ஸம்பயுத்தே த³ஸ்ஸேதி. உபனிஸ்ஸயவிப⁴ங்கே³ ‘‘ஸத்³தா⁴பஞ்சகேஸு மானங் ஜப்பேதி தி³ட்டி²ங் க³ண்ஹாதீதி கத்தப்³ப³ங், அவஸேஸேஸு ந கத்தப்³ப³’’ந்தி இத³ங் பாட²க³தித³ஸ்ஸனத்த²ங் வுத்தங், ந பன ராகா³தீ³ஹி மானதி³ட்டீ²னங் அனுப்பத்திதோ. குஸலத்திகேபி ஹி ராகா³தீ³ஸு ‘‘மானங் ஜப்பேதி தி³ட்டி²ங் க³ண்ஹாதீ’’தி பாளி ந வுத்தா, ‘‘ராகோ³ தோ³ஸோ மோஹோ மானோ தி³ட்டி² பத்த²னா ராக³ஸ்ஸ தோ³ஸஸ்ஸ மோஹஸ்ஸ மானஸ்ஸ தி³ட்டி²யா பத்த²னாய உபனிஸ்ஸயபச்சயேன பச்சயோ’’தி (பட்டா²॰ 1.2.53) பன ராகா³தீ³னங் மானதி³ட்டி²உபனிஸ்ஸயபா⁴வோ வுத்தோ. ததா² இதா⁴பி த³ட்ட²ப்³ப³ந்தி . ‘‘ஸுகா²ய வேத³னாய ஸம்பயுத்தேன பன சித்தேன கா³மகா⁴தங் நிக³மகா⁴தங் கரோதீ’’தி ஸோமனஸ்ஸஸம்பயுத்தலோப⁴ஸஹக³தசித்தேன கா³மனிக³மவிலுப்பனங் ஸந்தா⁴ய வுத்தங்.
39. Pañhāvāre domanassaṃ uppajjatīti etena taṃsampayutte dasseti. Upanissayavibhaṅge ‘‘saddhāpañcakesu mānaṃ jappeti diṭṭhiṃ gaṇhātīti kattabbaṃ, avasesesu na kattabba’’nti idaṃ pāṭhagatidassanatthaṃ vuttaṃ, na pana rāgādīhi mānadiṭṭhīnaṃ anuppattito. Kusalattikepi hi rāgādīsu ‘‘mānaṃ jappeti diṭṭhiṃ gaṇhātī’’ti pāḷi na vuttā, ‘‘rāgo doso moho māno diṭṭhi patthanā rāgassa dosassa mohassa mānassa diṭṭhiyā patthanāya upanissayapaccayena paccayo’’ti (paṭṭhā. 1.2.53) pana rāgādīnaṃ mānadiṭṭhiupanissayabhāvo vutto. Tathā idhāpi daṭṭhabbanti . ‘‘Sukhāya vedanāya sampayuttena pana cittena gāmaghātaṃ nigamaghātaṃ karotī’’ti somanassasampayuttalobhasahagatacittena gāmanigamaviluppanaṃ sandhāya vuttaṃ.
62. ஸுத்³தா⁴னந்தி பச்சயபச்சயுப்பன்னபதா³னங் அனஞ்ஞத்தங் த³ஸ்ஸேதி. புரேஜாதபச்சா²ஜாதா பனெத்த² ந விஜ்ஜந்தி. ந ஹி புரேஜாதா பச்சா²ஜாதா வா அரூபத⁴ம்மா அரூபத⁴ம்மானங் பச்சயா ஹொந்தீதி எத்த² புரேஜாதாதி இமஸ்மிங் திகே வுச்சமானா அதி⁴காரப்பத்தா ஸுகா²ய வேத³னாய ஸம்பயுத்தாத³யோவ அரூபத⁴ம்மானங் புரேஜாதா ஹுத்வா பச்சயா ந ஹொந்தி புரேஜாதத்தாபா⁴வதோதி அதி⁴ப்பாயோ, ததா² பச்சா²ஜாதத்தாபா⁴வதோ பச்சா²ஜாதா வா ஹுத்வா ந ஹொந்தீதி.
62. Suddhānanti paccayapaccayuppannapadānaṃ anaññattaṃ dasseti. Purejātapacchājātā panettha na vijjanti.Na hi purejātā pacchājātā vā arūpadhammā arūpadhammānaṃ paccayā hontīti ettha purejātāti imasmiṃ tike vuccamānā adhikārappattā sukhāya vedanāya sampayuttādayova arūpadhammānaṃ purejātā hutvā paccayā na honti purejātattābhāvatoti adhippāyo, tathā pacchājātattābhāvato pacchājātā vā hutvā na hontīti.
63-64. ஸாதி⁴பதிஅமோஹவஸேனாதி அதி⁴பதிபா⁴வஸஹிதாமோஹவஸேனாதி அத்தோ².
63-64. Sādhipatiamohavasenāti adhipatibhāvasahitāmohavasenāti attho.
83-87. நஹேதுபச்சயா…பே॰… நஉபனிஸ்ஸயே அட்டா²தி நஹேதுபச்சயா நாரம்மணபச்சயா நஉபனிஸ்ஸயே அட்டா²தி ஏவங் ஸங்கி²பித்வா உத்³த⁴ரதி. நானாக்க²ணிககம்மபச்சயவஸேன வேதி³தப்³பா³தி இத³ங் ‘‘து³க்கா²ய வேத³னாய ஸம்பயுத்தோ ஸுகா²ய வேத³னாய ஸம்பயுத்தஸ்ஸா’’தி ஏதங் வஜ்ஜெத்வா அவஸேஸேஸு அட்ட²ஸுபி நானாக்க²ணிககம்மபச்சயஸம்ப⁴வங் ஸந்தா⁴ய வுத்தங். ந ஹி ஸஹஜாதபச்சயோ அட்ட²ஸுபி லப்³ப⁴தி, அத² கோ² தீஸ்வேவாதி.
83-87. Nahetupaccayā…pe… naupanissaye aṭṭhāti nahetupaccayā nārammaṇapaccayā naupanissaye aṭṭhāti evaṃ saṅkhipitvā uddharati. Nānākkhaṇikakammapaccayavasena veditabbāti idaṃ ‘‘dukkhāya vedanāya sampayutto sukhāya vedanāya sampayuttassā’’ti etaṃ vajjetvā avasesesu aṭṭhasupi nānākkhaṇikakammapaccayasambhavaṃ sandhāya vuttaṃ. Na hi sahajātapaccayo aṭṭhasupi labbhati, atha kho tīsvevāti.
வேத³னாத்திகவண்ணனா நிட்டி²தா.
Vedanāttikavaṇṇanā niṭṭhitā.
Related texts:
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 2. வேத³னாத்திகவண்ணனா • 2. Vedanāttikavaṇṇanā
