| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
3. வேதி³காரகத்தே²ரஅபதா³னவண்ணனா
3. Vedikārakattheraapadānavaṇṇanā
நிப்³பு³தே லோகனாத²ம்ஹீதிஆதி³கங் ஆயஸ்மதோ வேதி³காரகத்தே²ரஸ்ஸ அபதா³னங். அயம்பி புரிமஜினவரேஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பியத³ஸ்ஸிஸ்ஸ ப⁴க³வதோ காலே விப⁴வஸம்பன்னே ஏகஸ்மிங் குலே நிப்³ப³த்தோ விஞ்ஞுதங் பத்வா க⁴ராவாஸங் ஸண்ட²பெத்வா நிப்³பு³தே ஸத்த²ரி பஸன்னோ தஸ்ஸ சேதியே வலயங் காரேஸி, ஸத்தஹி ரதனேஹி பரிபூரெத்வா மஹாபூஜங் காரேஸி. ஸோ தேன புஞ்ஞேன தே³வமனுஸ்ஸேஸு ஸங்ஸரந்தோ அனேகேஸு ஜாதிஸதஸஹஸ்ஸேஸு பூஜனீயோ மஹத்³த⁴னோ மஹாபோ⁴கோ³ உப⁴யஸுக²ங் அனுப⁴வித்வா இமஸ்மிங் பு³த்³து⁴ப்பாதே³ குலகே³ஹே நிப்³ப³த்தோ விப⁴வஸம்பன்னோ பப்³ப³ஜித்வா வாயமந்தோ நசிரஸ்ஸேவ அரஹா அஹோஸி.
Nibbutelokanāthamhītiādikaṃ āyasmato vedikārakattherassa apadānaṃ. Ayampi purimajinavaresu katādhikāro tattha tattha bhave vivaṭṭūpanissayāni puññāni upacinanto piyadassissa bhagavato kāle vibhavasampanne ekasmiṃ kule nibbatto viññutaṃ patvā gharāvāsaṃ saṇṭhapetvā nibbute satthari pasanno tassa cetiye valayaṃ kāresi, sattahi ratanehi paripūretvā mahāpūjaṃ kāresi. So tena puññena devamanussesu saṃsaranto anekesu jātisatasahassesu pūjanīyo mahaddhano mahābhogo ubhayasukhaṃ anubhavitvā imasmiṃ buddhuppāde kulagehe nibbatto vibhavasampanno pabbajitvā vāyamanto nacirasseva arahā ahosi.
10. ஸோ ஏகதி³வஸங் அத்தனோ புப்³பே³ கதகுஸலங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ நிப்³பு³தே லோகனாத²ம்ஹீதிஆதி³மாஹ. தங் ஹெட்டா² வுத்தத்த²மேவ. பியத³ஸ்ஸீனருத்தமேதி பியங் ஸோமனஸ்ஸாகாரங் த³ஸ்ஸனங் யஸ்ஸ ஸோ பியத³ஸ்ஸீ, ஆரோஹபரிணாஹத்³வத்திங்ஸமஹாபுரிஸலக்க²ணஅஸீதானுப்³யஞ்ஜனப்³யாமப்பபா⁴மண்ட³லேஹி ஸாது⁴ மஹாஜனப்பஸாத³ங் ஜனயனாகாரத³ஸ்ஸனோதி அத்தோ². நரானங் உத்தமோதி நருத்தமோ, பியத³ஸ்ஸீ ச ஸோ நருத்தமோ சேதி பியத³ஸ்ஸீனருத்தமோ, தஸ்மிங் பியத³ஸ்ஸீனருத்தமே நிப்³பு³தே தா⁴துக³ப்³ப⁴ம்ஹி முத்தவேதி³ங் அஹங் அகாஸிந்தி ஸம்ப³ந்தோ⁴. புப்பா²தா⁴ரத்தா²ய பரியோஸானே வேதி³காவலயங் அகாஸிந்தி அத்தோ².
10. So ekadivasaṃ attano pubbe katakusalaṃ saritvā somanassajāto pubbacaritāpadānaṃ pakāsento nibbute lokanāthamhītiādimāha. Taṃ heṭṭhā vuttatthameva. Piyadassīnaruttameti piyaṃ somanassākāraṃ dassanaṃ yassa so piyadassī, ārohapariṇāhadvattiṃsamahāpurisalakkhaṇaasītānubyañjanabyāmappabhāmaṇḍalehi sādhu mahājanappasādaṃ janayanākāradassanoti attho. Narānaṃ uttamoti naruttamo, piyadassī ca so naruttamo ceti piyadassīnaruttamo, tasmiṃ piyadassīnaruttame nibbute dhātugabbhamhi muttavediṃ ahaṃ akāsinti sambandho. Pupphādhāratthāya pariyosāne vedikāvalayaṃ akāsinti attho.
11. மணீஹி பரிவாரெத்வாதி மணதி ஜோததி பபா⁴ஸதீதி மணி, அத² வா ஜனானங் மனங் பூரெந்தோ ஸோமனஸ்ஸங் கரொந்தோ இதோ க³தோ பவத்தோதி மணி, ஜாதிரங்க³மணிவேளுரியமணிஆதீ³ஹி அனேகேஹி மணீஹி கதவேதி³காவலயங் பரிவாரெத்வா உத்தமங் மஹாபூஜங் அகாஸிந்தி அத்தோ². ஸேஸங் உத்தானத்த²மேவாதி.
11.Maṇīhi parivāretvāti maṇati jotati pabhāsatīti maṇi, atha vā janānaṃ manaṃ pūrento somanassaṃ karonto ito gato pavattoti maṇi, jātiraṅgamaṇiveḷuriyamaṇiādīhi anekehi maṇīhi katavedikāvalayaṃ parivāretvā uttamaṃ mahāpūjaṃ akāsinti attho. Sesaṃ uttānatthamevāti.
வேதி³காரகத்தே²ரஅபதா³னவண்ணனா ஸமத்தா.
Vedikārakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 3. வேதி³காரகத்தே²ரஅபதா³னங் • 3. Vedikārakattheraapadānaṃ
