| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৩. ৰেদিকারকত্থেরঅপদানৰণ্ণনা
3. Vedikārakattheraapadānavaṇṇanā
নিব্বুতে লোকনাথম্হীতিআদিকং আযস্মতো ৰেদিকারকত্থেরস্স অপদানং। অযম্পি পুরিমজিনৰরেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো পিযদস্সিস্স ভগৰতো কালে ৰিভৰসম্পন্নে একস্মিং কুলে নিব্বত্তো ৰিঞ্ঞুতং পত্ৰা ঘরাৰাসং সণ্ঠপেত্ৰা নিব্বুতে সত্থরি পসন্নো তস্স চেতিযে ৰলযং কারেসি, সত্তহি রতনেহি পরিপূরেত্ৰা মহাপূজং কারেসি। সো তেন পুঞ্ঞেন দেৰমনুস্সেসু সংসরন্তো অনেকেসু জাতিসতসহস্সেসু পূজনীযো মহদ্ধনো মহাভোগো উভযসুখং অনুভৰিত্ৰা ইমস্মিং বুদ্ধুপ্পাদে কুলগেহে নিব্বত্তো ৰিভৰসম্পন্নো পব্বজিত্ৰা ৰাযমন্তো নচিরস্সেৰ অরহা অহোসি।
Nibbutelokanāthamhītiādikaṃ āyasmato vedikārakattherassa apadānaṃ. Ayampi purimajinavaresu katādhikāro tattha tattha bhave vivaṭṭūpanissayāni puññāni upacinanto piyadassissa bhagavato kāle vibhavasampanne ekasmiṃ kule nibbatto viññutaṃ patvā gharāvāsaṃ saṇṭhapetvā nibbute satthari pasanno tassa cetiye valayaṃ kāresi, sattahi ratanehi paripūretvā mahāpūjaṃ kāresi. So tena puññena devamanussesu saṃsaranto anekesu jātisatasahassesu pūjanīyo mahaddhano mahābhogo ubhayasukhaṃ anubhavitvā imasmiṃ buddhuppāde kulagehe nibbatto vibhavasampanno pabbajitvā vāyamanto nacirasseva arahā ahosi.
১০. সো একদিৰসং অত্তনো পুব্বে কতকুসলং সরিত্ৰা সোমনস্সজাতো পুব্বচরিতাপদানং পকাসেন্তো নিব্বুতে লোকনাথম্হীতিআদিমাহ। তং হেট্ঠা ৰুত্তত্থমেৰ। পিযদস্সীনরুত্তমেতি পিযং সোমনস্সাকারং দস্সনং যস্স সো পিযদস্সী, আরোহপরিণাহদ্ৰত্তিংসমহাপুরিসলক্খণঅসীতানুব্যঞ্জনব্যামপ্পভামণ্ডলেহি সাধু মহাজনপ্পসাদং জনযনাকারদস্সনোতি অত্থো। নরানং উত্তমোতি নরুত্তমো, পিযদস্সী চ সো নরুত্তমো চেতি পিযদস্সীনরুত্তমো, তস্মিং পিযদস্সীনরুত্তমে নিব্বুতে ধাতুগব্ভম্হি মুত্তৰেদিং অহং অকাসিন্তি সম্বন্ধো। পুপ্ফাধারত্থায পরিযোসানে ৰেদিকাৰলযং অকাসিন্তি অত্থো।
10. So ekadivasaṃ attano pubbe katakusalaṃ saritvā somanassajāto pubbacaritāpadānaṃ pakāsento nibbute lokanāthamhītiādimāha. Taṃ heṭṭhā vuttatthameva. Piyadassīnaruttameti piyaṃ somanassākāraṃ dassanaṃ yassa so piyadassī, ārohapariṇāhadvattiṃsamahāpurisalakkhaṇaasītānubyañjanabyāmappabhāmaṇḍalehi sādhu mahājanappasādaṃ janayanākāradassanoti attho. Narānaṃ uttamoti naruttamo, piyadassī ca so naruttamo ceti piyadassīnaruttamo, tasmiṃ piyadassīnaruttame nibbute dhātugabbhamhi muttavediṃ ahaṃ akāsinti sambandho. Pupphādhāratthāya pariyosāne vedikāvalayaṃ akāsinti attho.
১১. মণীহি পরিৰারেত্ৰাতি মণতি জোততি পভাসতীতি মণি, অথ ৰা জনানং মনং পূরেন্তো সোমনস্সং করোন্তো ইতো গতো পৰত্তোতি মণি, জাতিরঙ্গমণিৰেল়ুরিযমণিআদীহি অনেকেহি মণীহি কতৰেদিকাৰলযং পরিৰারেত্ৰা উত্তমং মহাপূজং অকাসিন্তি অত্থো। সেসং উত্তানত্থমেৰাতি।
11.Maṇīhi parivāretvāti maṇati jotati pabhāsatīti maṇi, atha vā janānaṃ manaṃ pūrento somanassaṃ karonto ito gato pavattoti maṇi, jātiraṅgamaṇiveḷuriyamaṇiādīhi anekehi maṇīhi katavedikāvalayaṃ parivāretvā uttamaṃ mahāpūjaṃ akāsinti attho. Sesaṃ uttānatthamevāti.
ৰেদিকারকত্থেরঅপদানৰণ্ণনা সমত্তা।
Vedikārakattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ৩. ৰেদিকারকত্থেরঅপদানং • 3. Vedikārakattheraapadānaṃ
