| Library / Tipiṭaka / д̇ибидага • Tipiṭaka / абад̣̇аана-адтагат̇аа • Apadāna-aṭṭhakathā |
3. взд̣̇игаарагад̇т̇зраабад̣̇аанаван̣н̣анаа
3. Vedikārakattheraapadānavaṇṇanā
ниб̣б̣уд̇з логанаат̇амхийд̇иаад̣̇игам̣ ааяасмад̇о взд̣̇игаарагад̇т̇зрасса абад̣̇аанам̣. аяамби буримаж̇инаварзсу гад̇аад̇хигааро д̇ад̇т̇а д̇ад̇т̇а бхавз виваддуубаниссаяаани бун̃н̃аани убажинанд̇о бияад̣̇ассисса бхаг̇авад̇о гаалз вибхавасамбаннз згасмим̣ гулз ниб̣б̣ад̇д̇о вин̃н̃уд̇ам̣ бад̇ваа гхарааваасам̣ сан̣табзд̇ваа ниб̣б̣уд̇з сад̇т̇ари басанно д̇асса жзд̇ияз валаяам̣ гаарзси, сад̇д̇ахи рад̇анзхи барибуурзд̇ваа махаабууж̇ам̣ гаарзси. со д̇зна бун̃н̃зна д̣̇звамануссзсу сам̣саранд̇о анзгзсу ж̇аад̇исад̇асахассзсу бууж̇анийяо махад̣̇д̇хано махаабхог̇о убхаяасукам̣ анубхавид̇ваа имасмим̣ б̣уд̣̇д̇хуббаад̣̇з гулаг̇зхз ниб̣б̣ад̇д̇о вибхавасамбанно баб̣б̣аж̇ид̇ваа вааяаманд̇о нажирассзва арахаа ахоси.
Nibbutelokanāthamhītiādikaṃ āyasmato vedikārakattherassa apadānaṃ. Ayampi purimajinavaresu katādhikāro tattha tattha bhave vivaṭṭūpanissayāni puññāni upacinanto piyadassissa bhagavato kāle vibhavasampanne ekasmiṃ kule nibbatto viññutaṃ patvā gharāvāsaṃ saṇṭhapetvā nibbute satthari pasanno tassa cetiye valayaṃ kāresi, sattahi ratanehi paripūretvā mahāpūjaṃ kāresi. So tena puññena devamanussesu saṃsaranto anekesu jātisatasahassesu pūjanīyo mahaddhano mahābhogo ubhayasukhaṃ anubhavitvā imasmiṃ buddhuppāde kulagehe nibbatto vibhavasampanno pabbajitvā vāyamanto nacirasseva arahā ahosi.
10. со згад̣̇ивасам̣ ад̇д̇ано буб̣б̣з гад̇агусалам̣ сарид̇ваа соманассаж̇аад̇о буб̣б̣ажарид̇аабад̣̇аанам̣ багаасзнд̇о ниб̣б̣уд̇з логанаат̇амхийд̇иаад̣̇имааха. д̇ам̣ хздтаа вуд̇д̇ад̇т̇амзва. бияад̣̇ассийнаруд̇д̇амзд̇и бияам̣ соманассаагаарам̣ д̣̇ассанам̣ яасса со бияад̣̇ассий, аарохабарин̣аахад̣̇вад̇д̇им̣самахаабурисалагкан̣аасийд̇аануб̣яан̃ж̇анаб̣яаамаббабхааман̣д̣алзхи саад̇ху махааж̇анаббасаад̣̇ам̣ ж̇анаяанаагаарад̣̇ассанод̇и ад̇т̇о. нараанам̣ уд̇д̇амод̇и наруд̇д̇амо, бияад̣̇ассий жа со наруд̇д̇амо жзд̇и бияад̣̇ассийнаруд̇д̇амо, д̇асмим̣ бияад̣̇ассийнаруд̇д̇амз ниб̣б̣уд̇з д̇хаад̇уг̇аб̣бхамхи муд̇д̇авзд̣̇им̣ ахам̣ агаасинд̇и самб̣анд̇хо. бубпаад̇хаарад̇т̇ааяа барияосаанз взд̣̇игаавалаяам̣ агаасинд̇и ад̇т̇о.
10. So ekadivasaṃ attano pubbe katakusalaṃ saritvā somanassajāto pubbacaritāpadānaṃ pakāsento nibbute lokanāthamhītiādimāha. Taṃ heṭṭhā vuttatthameva. Piyadassīnaruttameti piyaṃ somanassākāraṃ dassanaṃ yassa so piyadassī, ārohapariṇāhadvattiṃsamahāpurisalakkhaṇaasītānubyañjanabyāmappabhāmaṇḍalehi sādhu mahājanappasādaṃ janayanākāradassanoti attho. Narānaṃ uttamoti naruttamo, piyadassī ca so naruttamo ceti piyadassīnaruttamo, tasmiṃ piyadassīnaruttame nibbute dhātugabbhamhi muttavediṃ ahaṃ akāsinti sambandho. Pupphādhāratthāya pariyosāne vedikāvalayaṃ akāsinti attho.
11. ман̣ийхи бариваарзд̇ваад̇и ман̣ад̇и ж̇од̇ад̇и бабхаасад̇ийд̇и ман̣и, ат̇а ваа ж̇анаанам̣ манам̣ буурзнд̇о соманассам̣ гаронд̇о ид̇о г̇ад̇о бавад̇д̇од̇и ман̣и, ж̇аад̇иран̇г̇аман̣ивзл̣урияаман̣иаад̣̇ийхи анзгзхи ман̣ийхи гад̇авзд̣̇игаавалаяам̣ бариваарзд̇ваа уд̇д̇амам̣ махаабууж̇ам̣ агаасинд̇и ад̇т̇о. сзсам̣ уд̇д̇аанад̇т̇амзваад̇и.
11.Maṇīhi parivāretvāti maṇati jotati pabhāsatīti maṇi, atha vā janānaṃ manaṃ pūrento somanassaṃ karonto ito gato pavattoti maṇi, jātiraṅgamaṇiveḷuriyamaṇiādīhi anekehi maṇīhi katavedikāvalayaṃ parivāretvā uttamaṃ mahāpūjaṃ akāsinti attho. Sesaṃ uttānatthamevāti.
взд̣̇игаарагад̇т̇зраабад̣̇аанаван̣н̣анаа самад̇д̇аа.
Vedikārakattheraapadānavaṇṇanā samattā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / абад̣̇аанабаал̣и • Apadānapāḷi / 3. взд̣̇игаарагад̇т̇зраабад̣̇аанам̣ • 3. Vedikārakattheraapadānaṃ
