| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೩. ವೇದಿಕಾರಕತ್ಥೇರಅಪದಾನವಣ್ಣನಾ
3. Vedikārakattheraapadānavaṇṇanā
ನಿಬ್ಬುತೇ ಲೋಕನಾಥಮ್ಹೀತಿಆದಿಕಂ ಆಯಸ್ಮತೋ ವೇದಿಕಾರಕತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಜಿನವರೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ಪಿಯದಸ್ಸಿಸ್ಸ ಭಗವತೋ ಕಾಲೇ ವಿಭವಸಮ್ಪನ್ನೇ ಏಕಸ್ಮಿಂ ಕುಲೇ ನಿಬ್ಬತ್ತೋ ವಿಞ್ಞುತಂ ಪತ್ವಾ ಘರಾವಾಸಂ ಸಣ್ಠಪೇತ್ವಾ ನಿಬ್ಬುತೇ ಸತ್ಥರಿ ಪಸನ್ನೋ ತಸ್ಸ ಚೇತಿಯೇ ವಲಯಂ ಕಾರೇಸಿ, ಸತ್ತಹಿ ರತನೇಹಿ ಪರಿಪೂರೇತ್ವಾ ಮಹಾಪೂಜಂ ಕಾರೇಸಿ। ಸೋ ತೇನ ಪುಞ್ಞೇನ ದೇವಮನುಸ್ಸೇಸು ಸಂಸರನ್ತೋ ಅನೇಕೇಸು ಜಾತಿಸತಸಹಸ್ಸೇಸು ಪೂಜನೀಯೋ ಮಹದ್ಧನೋ ಮಹಾಭೋಗೋ ಉಭಯಸುಖಂ ಅನುಭವಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಕುಲಗೇಹೇ ನಿಬ್ಬತ್ತೋ ವಿಭವಸಮ್ಪನ್ನೋ ಪಬ್ಬಜಿತ್ವಾ ವಾಯಮನ್ತೋ ನಚಿರಸ್ಸೇವ ಅರಹಾ ಅಹೋಸಿ।
Nibbutelokanāthamhītiādikaṃ āyasmato vedikārakattherassa apadānaṃ. Ayampi purimajinavaresu katādhikāro tattha tattha bhave vivaṭṭūpanissayāni puññāni upacinanto piyadassissa bhagavato kāle vibhavasampanne ekasmiṃ kule nibbatto viññutaṃ patvā gharāvāsaṃ saṇṭhapetvā nibbute satthari pasanno tassa cetiye valayaṃ kāresi, sattahi ratanehi paripūretvā mahāpūjaṃ kāresi. So tena puññena devamanussesu saṃsaranto anekesu jātisatasahassesu pūjanīyo mahaddhano mahābhogo ubhayasukhaṃ anubhavitvā imasmiṃ buddhuppāde kulagehe nibbatto vibhavasampanno pabbajitvā vāyamanto nacirasseva arahā ahosi.
೧೦. ಸೋ ಏಕದಿವಸಂ ಅತ್ತನೋ ಪುಬ್ಬೇ ಕತಕುಸಲಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ನಿಬ್ಬುತೇ ಲೋಕನಾಥಮ್ಹೀತಿಆದಿಮಾಹ। ತಂ ಹೇಟ್ಠಾ ವುತ್ತತ್ಥಮೇವ। ಪಿಯದಸ್ಸೀನರುತ್ತಮೇತಿ ಪಿಯಂ ಸೋಮನಸ್ಸಾಕಾರಂ ದಸ್ಸನಂ ಯಸ್ಸ ಸೋ ಪಿಯದಸ್ಸೀ, ಆರೋಹಪರಿಣಾಹದ್ವತ್ತಿಂಸಮಹಾಪುರಿಸಲಕ್ಖಣಅಸೀತಾನುಬ್ಯಞ್ಜನಬ್ಯಾಮಪ್ಪಭಾಮಣ್ಡಲೇಹಿ ಸಾಧು ಮಹಾಜನಪ್ಪಸಾದಂ ಜನಯನಾಕಾರದಸ್ಸನೋತಿ ಅತ್ಥೋ। ನರಾನಂ ಉತ್ತಮೋತಿ ನರುತ್ತಮೋ, ಪಿಯದಸ್ಸೀ ಚ ಸೋ ನರುತ್ತಮೋ ಚೇತಿ ಪಿಯದಸ್ಸೀನರುತ್ತಮೋ, ತಸ್ಮಿಂ ಪಿಯದಸ್ಸೀನರುತ್ತಮೇ ನಿಬ್ಬುತೇ ಧಾತುಗಬ್ಭಮ್ಹಿ ಮುತ್ತವೇದಿಂ ಅಹಂ ಅಕಾಸಿನ್ತಿ ಸಮ್ಬನ್ಧೋ। ಪುಪ್ಫಾಧಾರತ್ಥಾಯ ಪರಿಯೋಸಾನೇ ವೇದಿಕಾವಲಯಂ ಅಕಾಸಿನ್ತಿ ಅತ್ಥೋ।
10. So ekadivasaṃ attano pubbe katakusalaṃ saritvā somanassajāto pubbacaritāpadānaṃ pakāsento nibbute lokanāthamhītiādimāha. Taṃ heṭṭhā vuttatthameva. Piyadassīnaruttameti piyaṃ somanassākāraṃ dassanaṃ yassa so piyadassī, ārohapariṇāhadvattiṃsamahāpurisalakkhaṇaasītānubyañjanabyāmappabhāmaṇḍalehi sādhu mahājanappasādaṃ janayanākāradassanoti attho. Narānaṃ uttamoti naruttamo, piyadassī ca so naruttamo ceti piyadassīnaruttamo, tasmiṃ piyadassīnaruttame nibbute dhātugabbhamhi muttavediṃ ahaṃ akāsinti sambandho. Pupphādhāratthāya pariyosāne vedikāvalayaṃ akāsinti attho.
೧೧. ಮಣೀಹಿ ಪರಿವಾರೇತ್ವಾತಿ ಮಣತಿ ಜೋತತಿ ಪಭಾಸತೀತಿ ಮಣಿ, ಅಥ ವಾ ಜನಾನಂ ಮನಂ ಪೂರೇನ್ತೋ ಸೋಮನಸ್ಸಂ ಕರೋನ್ತೋ ಇತೋ ಗತೋ ಪವತ್ತೋತಿ ಮಣಿ, ಜಾತಿರಙ್ಗಮಣಿವೇಳುರಿಯಮಣಿಆದೀಹಿ ಅನೇಕೇಹಿ ಮಣೀಹಿ ಕತವೇದಿಕಾವಲಯಂ ಪರಿವಾರೇತ್ವಾ ಉತ್ತಮಂ ಮಹಾಪೂಜಂ ಅಕಾಸಿನ್ತಿ ಅತ್ಥೋ। ಸೇಸಂ ಉತ್ತಾನತ್ಥಮೇವಾತಿ।
11.Maṇīhi parivāretvāti maṇati jotati pabhāsatīti maṇi, atha vā janānaṃ manaṃ pūrento somanassaṃ karonto ito gato pavattoti maṇi, jātiraṅgamaṇiveḷuriyamaṇiādīhi anekehi maṇīhi katavedikāvalayaṃ parivāretvā uttamaṃ mahāpūjaṃ akāsinti attho. Sesaṃ uttānatthamevāti.
ವೇದಿಕಾರಕತ್ಥೇರಅಪದಾನವಣ್ಣನಾ ಸಮತ್ತಾ।
Vedikārakattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೩. ವೇದಿಕಾರಕತ್ಥೇರಅಪದಾನಂ • 3. Vedikārakattheraapadānaṃ
