| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
8. வேஹாஸகுடிஸிக்கா²பத³வண்ணனா
8. Vehāsakuṭisikkhāpadavaṇṇanā
129. அட்ட²மஸிக்கா²பதே³ – உபரிவேஹாஸகுடியாதி உபரி அச்ச²ன்னதலாய த்³விபூ⁴மிககுடியா வா திபூ⁴மிகாதி³குடியா வா. மஞ்சங் ஸஹஸா அபி⁴னிஸீதீ³தி மஞ்சங் ஸஹஸா அபி⁴ப⁴வித்வா அஜ்ஜொ²த்த²ரித்வா நிஸீதி³. பு⁴ம்மத்தே² வா ஏதங் உபயோக³வசனங்; மஞ்சே நிஸீதீ³தி அத்தோ². அபீ⁴தி இத³ங் பன பத³ஸோப⁴னத்த²ங் உபஸக்³க³மத்தமேவ. நிப்பதித்வாதி நிபதித்வா நிக்க²மித்வா வா. தஸ்ஸ ஹி உபரி ஆணீபி ந தி³ன்னா, தஸ்மா நிக்க²ந்தோ. விஸ்ஸரமகாஸீதி விரூபங் ஆதுரஸ்ஸரமகாஸி.
129. Aṭṭhamasikkhāpade – uparivehāsakuṭiyāti upari acchannatalāya dvibhūmikakuṭiyā vā tibhūmikādikuṭiyā vā. Mañcaṃ sahasā abhinisīdīti mañcaṃ sahasā abhibhavitvā ajjhottharitvā nisīdi. Bhummatthe vā etaṃ upayogavacanaṃ; mañce nisīdīti attho. Abhīti idaṃ pana padasobhanatthaṃ upasaggamattameva. Nippatitvāti nipatitvā nikkhamitvā vā. Tassa hi upari āṇīpi na dinnā, tasmā nikkhanto. Vissaramakāsīti virūpaṃ āturassaramakāsi.
131. வேஹாஸகுடி நாம மஜ்ஜி²மஸ்ஸ புரிஸஸ்ஸ அஸீஸக⁴ட்டாதி யா பமாணமஜ்ஜி²மஸ்ஸ புரிஸஸ்ஸ ஸப்³ப³ஹெட்டி²மாஹி துலாஹி ஸீஸங் ந க⁴ட்டேதி, ஏதேன இத⁴ அதி⁴ப்பேதா வேஹாஸகுடி த³ஸ்ஸிதா ஹோதி, ந வேஹாஸகுடிலக்க²ணங். யா ஹி காசி உபரி அச்சி²ன்னதலா த்³விபூ⁴மிகா குடி திபூ⁴மிகாதி³குடி வா ‘‘வேஹாஸகுடீ’’தி வுச்சதி. இத⁴ பன அஸீஸக⁴ட்டா அதி⁴ப்பேதா. அபி⁴னிஸீத³னாதீ³ஸு புப்³பே³ வுத்தனயேனேவ பயோக³வஸேன ஆபத்திபே⁴தோ³ வேதி³தப்³போ³.
131.Vehāsakuṭi nāma majjhimassa purisassa asīsaghaṭṭāti yā pamāṇamajjhimassa purisassa sabbaheṭṭhimāhi tulāhi sīsaṃ na ghaṭṭeti, etena idha adhippetā vehāsakuṭi dassitā hoti, na vehāsakuṭilakkhaṇaṃ. Yā hi kāci upari acchinnatalā dvibhūmikā kuṭi tibhūmikādikuṭi vā ‘‘vehāsakuṭī’’ti vuccati. Idha pana asīsaghaṭṭā adhippetā. Abhinisīdanādīsu pubbe vuttanayeneva payogavasena āpattibhedo veditabbo.
133. அவேஹாஸகுடியாதி பூ⁴மியங் கதபண்ணஸாலாதீ³ஸு அனாபத்தி. ந ஹி ஸக்கா தத்த² பரஸ்ஸ பீளா காதுங். ஸீஸக⁴ட்டாயாதி யாயங் ஸீஸக⁴ட்டா ஹோதி, தத்தா²பி அனாபத்தி. ந ஹி ஸக்கா தத்த² ஹெட்டா²பாஸாதே³ அனோணதேன விசரிதுங், தஸ்மா அஸஞ்சரணட்டா²னத்தா பரபீளா ந ப⁴விஸ்ஸதி . ஹெட்டா² அபரிபோ⁴க³ங் ஹோதீதி யஸ்ஸா ஹெட்டா² த³ப்³ப³ஸம்பா⁴ராதீ³னங் நிக்கி²த்தத்தா அபரிபோ⁴க³ங் ஹோதி, தத்தா²பி அனாபத்தி. பத³ரஸஞ்சிதங் ஹோதீதி யஸ்ஸா உபரிமதலங் தா³ருப²லகேஹி வா க⁴னஸந்த²தங் ஹோதி, ஸுதா⁴தி³பரிகம்மகதங் வா தத்தா²பி அனாபத்தி. படாணி தி³ன்னா ஹோதீதி மஞ்சபீடா²னங் பாத³ஸிகா²ஸு ஆணீ தி³ன்னா ஹோதி, யத்த² நிஸீத³ந்தேபி ந நிப்பதந்தி, தாதி³ஸே மஞ்சபீடே² நிஸீத³தோபி அனாபத்தி. தஸ்மிங் டி²தோதி ஆஹச்சபாத³கே மஞ்சே வா பீடே² வா டி²தோ உபரி நாக³த³ந்தகாதீ³ஸு லக்³கி³தகங் சீவரங் வா கிஞ்சி வா க³ண்ஹாதி வா, அஞ்ஞங் வா லக்³கே³தி, தஸ்ஸாபி அனாபத்தி. ஸேஸங் உத்தானமேவ. ஏளகலோமஸமுட்டா²னங் – காயதோ ச காயசித்ததோ ச ஸமுட்டா²தி, கிரியங், நோஸஞ்ஞாவிமொக்க²ங், அசித்தகங், பண்ணத்திவஜ்ஜங், காயகம்மங், திசித்தங், திவேத³னந்தி.
133.Avehāsakuṭiyāti bhūmiyaṃ katapaṇṇasālādīsu anāpatti. Na hi sakkā tattha parassa pīḷā kātuṃ. Sīsaghaṭṭāyāti yāyaṃ sīsaghaṭṭā hoti, tatthāpi anāpatti. Na hi sakkā tattha heṭṭhāpāsāde anoṇatena vicarituṃ, tasmā asañcaraṇaṭṭhānattā parapīḷā na bhavissati . Heṭṭhā aparibhogaṃ hotīti yassā heṭṭhā dabbasambhārādīnaṃ nikkhittattā aparibhogaṃ hoti, tatthāpi anāpatti. Padarasañcitaṃ hotīti yassā uparimatalaṃ dāruphalakehi vā ghanasanthataṃ hoti, sudhādiparikammakataṃ vā tatthāpi anāpatti. Paṭāṇi dinnā hotīti mañcapīṭhānaṃ pādasikhāsu āṇī dinnā hoti, yattha nisīdantepi na nippatanti, tādise mañcapīṭhe nisīdatopi anāpatti. Tasmiṃ ṭhitoti āhaccapādake mañce vā pīṭhe vā ṭhito upari nāgadantakādīsu laggitakaṃ cīvaraṃ vā kiñci vā gaṇhāti vā, aññaṃ vā laggeti, tassāpi anāpatti. Sesaṃ uttānameva. Eḷakalomasamuṭṭhānaṃ – kāyato ca kāyacittato ca samuṭṭhāti, kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammaṃ, ticittaṃ, tivedananti.
வேஹாஸகுடிஸிக்கா²பத³ங் அட்ட²மங்.
Vehāsakuṭisikkhāpadaṃ aṭṭhamaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. பூ⁴தகா³மவக்³கோ³ • 2. Bhūtagāmavaggo
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 8. வேஹாஸகுடிஸிக்கா²பத³வண்ணனா • 8. Vehāsakuṭisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 8. வேஹாஸகுடிஸிக்கா²பத³வண்ணனா • 8. Vehāsakuṭisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 8. வேஹாஸகுடிஸிக்கா²பத³வண்ணனா • 8. Vehāsakuṭisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 8. வேஹாஸகுடிஸிக்கா²பத³ங் • 8. Vehāsakuṭisikkhāpadaṃ
