| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
8. வேஹாஸகுடிஸிக்கா²பத³வண்ணனா
8. Vehāsakuṭisikkhāpadavaṇṇanā
உபரிவேஹாஸகுடியாதி உபரிமதலே அஸந்த²தபத³ராய குடியா. தேனாஹ ‘‘உபரி அச்ச²ன்னதலாயா’’திஆதி³. யா ஹி காசி உபரி அச்ச²ன்னதலா த்³விபூ⁴மிககுடிகா வா திபூ⁴மிகாதி³குடிகா வா, ஸா ‘‘வேஹாஸகுடீ’’தி வுச்சதி. இத³ஞ்ஹி வேஹாஸகுடிலக்க²ணங். யதி³ ஏவங் கஸ்மா பத³பா⁴ஜனே ‘‘மஜ்ஜி²மஸ்ஸ புரிஸஸ்ஸ அஸீஸக⁴ட்டா’’தி (பாசி॰ 131) வுத்தந்தி ஆஹ ‘‘பத³பா⁴ஜனே பனா’’திஆதி³. இத⁴ அதி⁴ப்பேதங் குடிங் த³ஸ்ஸேதுந்தி இமஸ்மிங் ஸிக்கா²பதே³ அதி⁴ப்பேதங் வேஹாஸகுடிங் த³ஸ்ஸேதுங். மஜ்ஜி²மஸ்ஸ புரிஸஸ்ஸாதி பமாணமஜ்ஜி²மஸ்ஸ புரிஸஸ்ஸ. ஸப்³ப³ஹெட்டி²மாஹி துலாஹி ஸீஸங் ந க⁴ட்டேதீதி அஸீஸக⁴ட்டா. அங்கே³ விஜ்ஜி²த்வாதி அடனியோ விஜ்ஜி²த்வா. பவேஸிதபாத³கந்தி பவேஸிதபாத³ஸிக²ங். தஸ்மாதி ‘‘பூ⁴மத்தே² வா’’திஆதி³னா வுத்தமேவத்த²ங் காரணபா⁴வேன பச்சாமஸதி. யஸ்மா ஆஹச்சபாத³காதீ³ஸு யதா²வுத்தோ அத்தோ² ஹோதி, தஸ்மாதி வுத்தங் ஹோதி.
Uparivehāsakuṭiyāti uparimatale asanthatapadarāya kuṭiyā. Tenāha ‘‘upari acchannatalāyā’’tiādi. Yā hi kāci upari acchannatalā dvibhūmikakuṭikā vā tibhūmikādikuṭikā vā, sā ‘‘vehāsakuṭī’’ti vuccati. Idañhi vehāsakuṭilakkhaṇaṃ. Yadi evaṃ kasmā padabhājane ‘‘majjhimassa purisassa asīsaghaṭṭā’’ti (pāci. 131) vuttanti āha ‘‘padabhājane panā’’tiādi. Idha adhippetaṃ kuṭiṃ dassetunti imasmiṃ sikkhāpade adhippetaṃ vehāsakuṭiṃ dassetuṃ. Majjhimassa purisassāti pamāṇamajjhimassa purisassa. Sabbaheṭṭhimāhi tulāhi sīsaṃ na ghaṭṭetīti asīsaghaṭṭā. Aṅge vijjhitvāti aṭaniyo vijjhitvā. Pavesitapādakanti pavesitapādasikhaṃ. Tasmāti ‘‘bhūmatthe vā’’tiādinā vuttamevatthaṃ kāraṇabhāvena paccāmasati. Yasmā āhaccapādakādīsu yathāvutto attho hoti, tasmāti vuttaṃ hoti.
ஸஹஸாதி அபி⁴ப⁴வித்வா அஜ்ஜொ²த்த²ரித்வா. அவேஹாஸகுடிகாயாதி பூ⁴மியங் கதபண்ணஸாலாதீ³ஸு, தத்த² அனாபத்தி. ந ஹி ஸக்கா தத்த² பரஸ்ஸ பீளா காதுங். ஸீஸக⁴ட்டாயாதி யா ஸீஸங் க⁴ட்டா ஹோதி, தத்தா²பி அனாபத்தி. ந ஹி ஸக்கா தத்த² ஹெட்டா²பாஸாதே³ அனோணதேன விசரிதுங், தஸ்மா அஸஞ்சரணட்டா²னத்தா பரபீளா ந ப⁴விஸ்ஸதி. உபரிதலங் வா பத³ரஸஞ்சிதந்தி உபரிமதலங் தா³ருப²லகேஹி க⁴னஸந்த²தங். கிஞ்சி க³ண்ஹாதி வாதி உபரி நாக³த³ந்தகாதீ³ஸு லக்³கி³தங் சீவராதி³ங் யங் கிஞ்சி க³ண்ஹாதி வா. லக்³க³தி வாதி எத்தா²பி ஏஸேவ நயோ. படிபக்க²பூ⁴தா ஆணி படாணி. யஸ்ஸா தி³ன்னாய நிஸீத³ந்தேபி பாதா³ ந நிபதந்தி, ஏவங்பூ⁴தா ஆணி மஞ்சபீடா²னங் பாத³ஸிகா²ஸு தி³ன்னா ஹோதீதி அத்தோ². தேனாஹ ‘‘பாத³ஸீஸான’’ந்திஆதி³.
Sahasāti abhibhavitvā ajjhottharitvā. Avehāsakuṭikāyāti bhūmiyaṃ katapaṇṇasālādīsu, tattha anāpatti. Na hi sakkā tattha parassa pīḷā kātuṃ. Sīsaghaṭṭāyāti yā sīsaṃ ghaṭṭā hoti, tatthāpi anāpatti. Na hi sakkā tattha heṭṭhāpāsāde anoṇatena vicarituṃ, tasmā asañcaraṇaṭṭhānattā parapīḷā na bhavissati. Uparitalaṃ vā padarasañcitanti uparimatalaṃ dāruphalakehi ghanasanthataṃ. Kiñci gaṇhāti vāti upari nāgadantakādīsu laggitaṃ cīvarādiṃ yaṃ kiñci gaṇhāti vā. Laggati vāti etthāpi eseva nayo. Paṭipakkhabhūtā āṇi paṭāṇi. Yassā dinnāya nisīdantepi pādā na nipatanti, evaṃbhūtā āṇi mañcapīṭhānaṃ pādasikhāsu dinnā hotīti attho. Tenāha ‘‘pādasīsāna’’ntiādi.
வேஹாஸகுடிஸிக்கா²பத³வண்ணனா நிட்டி²தா.
Vehāsakuṭisikkhāpadavaṇṇanā niṭṭhitā.
