| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
10. வேலாமஸுத்தவண்ணனா
10. Velāmasuttavaṇṇanā
20. த³ஸமே ஸகுண்ட³கப⁴த்தந்தி ஸகுண்ட³கங் உத்தண்டு³லப⁴த்தங். பரித்தேஹி ஸகுண்டே³ஹி தண்டு³லேஹிபி ஸத்³தி⁴ங் விபக்கப⁴த்தங் உத்தண்டு³லமேவ ஹோதி. பி³ளங்க³ங் வுச்சதி ஆரனாளங், பி³ளங்க³தோ நிப்³ப³த்தனதோ ததே³வ கஞ்ஜியதோ ஜாதந்தி கஞ்ஜியங், தங் து³தியங் ஏதஸ்ஸாதி பி³ளங்க³து³தியங், தங் கஞ்ஜியது³தியந்தி வுத்தங். அஸக்கரித்வாதி தெ³ய்யத⁴ம்மம்பி புக்³க³லம்பி அஸக்கரித்வா. தெ³ய்யத⁴ம்மஸ்ஸ அஸக்கரணங் அஸம்பன்னகாரோ, புக்³க³லஸ்ஸ அஸக்கரணங் அக³ருகரணங். தெ³ய்யத⁴ம்மங் அஸக்கரொந்தோ ஹி உத்தண்டு³லாதி³தோ³ஸஸமன்னாக³தங் ஆஹாரங் தே³தி, ந ஸம்பன்னங் கரோதி. புக்³க³லங் அஸக்கரொந்தோ நிஸீத³னட்டா²னங் அஸம்மஜ்ஜித்வா யத்த² தத்த² வா நிஸீதா³பெத்வா யங் வா தங் வா தா³ரகங் பேஸெத்வா தே³தி. அசித்தீகத்வாதி ந சித்திங் கத்வா, ந பூஜெத்வாதி அத்தோ². பூஜெந்தோ ஹி பூஜேதப்³ப³வத்து²ங் சித்தே ட²பேதி, ந ததோ ப³ஹி கரோதி. சித்தங் வா அச்ச²ரியங் கத்வா படிபத்தி சித்தீகரணங் ஸம்பா⁴வனகிரியா, தப்படிக்கே²பதோ அசித்தீகரணங் அஸம்பா⁴வனகிரியா. அபவித்³த⁴ந்தி உச்சி²ட்டா²தி³ச²ட்³ட³னீயத⁴ம்மங் விய அவகி²த்தகங். யோ ஹி ச²ட்³டே³துகாமோ ஹுத்வா ரோகி³னோ ஸரீரே ஓத³னாதீ³னி மஜ்ஜித்வா வம்மிகே ரோக³ங் பக்கி²பந்தோ விய தே³தி, அயங் அபவித்³த⁴ங் தே³தி நாம. அனாக³மனதி³ட்டி²கோதி ‘‘அத்³தா⁴ இமஸ்ஸ தா³னஸ்ஸ ப²லங் மம ஆக³ச்ச²தீ’’தி ஏவங் யஸ்ஸ கம்மஸ்ஸகததி³ட்டி² அத்தி², ஸோ ஆக³மனதி³ட்டி²கோ. அயங் பன ந தாதி³ஸோதி அனாக³மனதி³ட்டி²கோ, ப²லங் பாடிகங்க²ங் ஹுத்வா ந தே³தீதி அத்தோ². தேனாஹ ‘‘ந கம்மஞ்ச ப²லஞ்ச ஸத்³த³ஹித்வா தே³தீ’’தி.
20. Dasame sakuṇḍakabhattanti sakuṇḍakaṃ uttaṇḍulabhattaṃ. Parittehi sakuṇḍehi taṇḍulehipi saddhiṃ vipakkabhattaṃ uttaṇḍulameva hoti. Biḷaṅgaṃ vuccati āranāḷaṃ, biḷaṅgato nibbattanato tadeva kañjiyato jātanti kañjiyaṃ, taṃ dutiyaṃ etassāti biḷaṅgadutiyaṃ, taṃ kañjiyadutiyanti vuttaṃ. Asakkaritvāti deyyadhammampi puggalampi asakkaritvā. Deyyadhammassa asakkaraṇaṃ asampannakāro, puggalassa asakkaraṇaṃ agarukaraṇaṃ. Deyyadhammaṃ asakkaronto hi uttaṇḍulādidosasamannāgataṃ āhāraṃ deti, na sampannaṃ karoti. Puggalaṃ asakkaronto nisīdanaṭṭhānaṃ asammajjitvā yattha tattha vā nisīdāpetvā yaṃ vā taṃ vā dārakaṃ pesetvā deti. Acittīkatvāti na cittiṃ katvā, na pūjetvāti attho. Pūjento hi pūjetabbavatthuṃ citte ṭhapeti, na tato bahi karoti. Cittaṃ vā acchariyaṃ katvā paṭipatti cittīkaraṇaṃ sambhāvanakiriyā, tappaṭikkhepato acittīkaraṇaṃ asambhāvanakiriyā. Apaviddhanti ucchiṭṭhādichaḍḍanīyadhammaṃ viya avakhittakaṃ. Yo hi chaḍḍetukāmo hutvā rogino sarīre odanādīni majjitvā vammike rogaṃ pakkhipanto viya deti, ayaṃ apaviddhaṃ deti nāma. Anāgamanadiṭṭhikoti ‘‘addhā imassa dānassa phalaṃ mama āgacchatī’’ti evaṃ yassa kammassakatadiṭṭhi atthi, so āgamanadiṭṭhiko. Ayaṃ pana na tādisoti anāgamanadiṭṭhiko, phalaṃ pāṭikaṅkhaṃ hutvā na detīti attho. Tenāha ‘‘na kammañca phalañca saddahitvā detī’’ti.
வேலாமோதி எத்த² மா-ஸத்³தோ³ படிஸேத⁴வசனோ. ஜாதிகொ³த்தரூபபோ⁴கா³தி³கு³ணானங் வேலா மரியாதா³ நத்தி² ஏதஸ்மிந்தி வேலாமோ. அத² வா யதா²வுத்தகு³ணானங் வேலா மரியாதா³ அமதி ஓஸானங் க³ச்ச²தி ஏதஸ்மிந்தி வேலாமோ, வேலங் வா மரியாத³ங் அமதி க³ச்ச²தி அதிக்கமதீதி வேலாமோ. தேனாஹ ‘‘ஜாதிகொ³த்த…பே॰… ஏவங்லத்³த⁴னாமோ’’தி. தீ³யதீதி தா³னங், தா³னவத்து². தங் அக்³கீ³யதி நிஸ்ஸஜ்ஜீயதி எத்தா²தி தா³னக்³க³ங். தா³னங் வா க³ண்ஹந்தி எத்தா²தி தா³னக்³க³ங், ஏவங் ப⁴த்தக்³க³ங், பரிவேஸனட்டா²னங். து³கூலஸந்த³னானீதி ரஜதபா⁴ஜனாதி³னிஸ்ஸிதே து³கூலே கீ²ரஸ்ஸ ஸந்த³னங் ஏதேஸந்தி து³கூலஸந்த³னானி. கங்ஸூபதா⁴ரணானீதி ரஜதமயதோ³ஹபா⁴ஜனானி. தேனாஹ ‘‘ரஜதமயகீ²ரபடிச்ச²கானீ’’தி. ரஜதமயானி கீ²ரபடிச்ச²கானி கீ²ரபடிக்³க³ஹபா⁴ஜனானி ஏதேஸந்தி ரஜதமயகீ²ரபடிச்ச²கானி. ஸோதெ⁴ய்யாதி மஹப்ப²லபா⁴வகரணேன விஸோதெ⁴ய்ய. மஹப்ப²லபா⁴வப்பத்தியா ஹி த³க்கி²ணா விஸுஜ்ஜ²தி நாம.
Velāmoti ettha mā-saddo paṭisedhavacano. Jātigottarūpabhogādiguṇānaṃ velā mariyādā natthi etasminti velāmo. Atha vā yathāvuttaguṇānaṃ velā mariyādā amati osānaṃ gacchati etasminti velāmo, velaṃ vā mariyādaṃ amati gacchati atikkamatīti velāmo. Tenāha ‘‘jātigotta…pe… evaṃladdhanāmo’’ti. Dīyatīti dānaṃ, dānavatthu. Taṃ aggīyati nissajjīyati etthāti dānaggaṃ. Dānaṃ vā gaṇhanti etthāti dānaggaṃ, evaṃ bhattaggaṃ, parivesanaṭṭhānaṃ. Dukūlasandanānīti rajatabhājanādinissite dukūle khīrassa sandanaṃ etesanti dukūlasandanāni. Kaṃsūpadhāraṇānīti rajatamayadohabhājanāni. Tenāha ‘‘rajatamayakhīrapaṭicchakānī’’ti. Rajatamayāni khīrapaṭicchakāni khīrapaṭiggahabhājanāni etesanti rajatamayakhīrapaṭicchakāni. Sodheyyāti mahapphalabhāvakaraṇena visodheyya. Mahapphalabhāvappattiyā hi dakkhiṇā visujjhati nāma.
மக்³கே³னாக³தங் அனிவத்தனஸரணந்தி இமினா லோகுத்தரஸரணக³மனங் தீ³பேதி. அபரேதிஆதி³னா லோகியஸரணக³மனங் வுத்தங். ஸரணங் நாம திண்ணங் ரதனானங் ஜீவிதபரிச்சாக³மயங் புஞ்ஞங் ஸப்³ப³ஸம்பத்திங் தே³தி, தஸ்மா மஹப்ப²லதரந்தி அதி⁴ப்பாயோ. இத³ஞ்ச – ‘‘ஸசே த்வங் யதா² க³ஹிதங் ஸரணங் ந பி⁴ந்தி³ஸ்ஸஸி, ஏவாஹங் தங் மாரேமீ’’தி யதி³பி கோசி திண்ஹேன ஸத்தே²ன ஜீவிதா வோரோபெய்ய, ததா²பி ‘‘நேவாஹங் பு³த்³த⁴ங் ந பு³த்³தோ⁴தி, த⁴ம்மங் ந த⁴ம்மோதி, ஸங்க⁴ங் ந ஸங்கோ⁴தி வதா³மீ’’தி த³ள்ஹதரங் கத்வா க³ஹிதஸ்ஸ வஸேன வுத்தங். மக்³கே³னாக³தந்தி லோகுத்தரஸீலங் ஸந்தா⁴ய வத³தி. அபரேதிஆதி³னா பன லோகியஸீலங் வுத்தங். ஸப்³பே³ஸங் ஸத்தானங் ஜீவிததா³னாதி³னிஹிதத³ண்ட³தாய ஸகலலோகியலோகுத்தரகு³ணாதி⁴ட்டா²னதோ சஸ்ஸ மஹப்ப²லமஹானிஸங்ஸதா வேதி³தப்³பா³.
Maggenāgataṃ anivattanasaraṇanti iminā lokuttarasaraṇagamanaṃ dīpeti. Aparetiādinā lokiyasaraṇagamanaṃ vuttaṃ. Saraṇaṃ nāma tiṇṇaṃ ratanānaṃ jīvitapariccāgamayaṃ puññaṃ sabbasampattiṃ deti, tasmā mahapphalataranti adhippāyo. Idañca – ‘‘sace tvaṃ yathā gahitaṃ saraṇaṃ na bhindissasi, evāhaṃ taṃ māremī’’ti yadipi koci tiṇhena satthena jīvitā voropeyya, tathāpi ‘‘nevāhaṃ buddhaṃ na buddhoti, dhammaṃ na dhammoti, saṅghaṃ na saṅghoti vadāmī’’ti daḷhataraṃ katvā gahitassa vasena vuttaṃ. Maggenāgatanti lokuttarasīlaṃ sandhāya vadati. Aparetiādinā pana lokiyasīlaṃ vuttaṃ. Sabbesaṃ sattānaṃ jīvitadānādinihitadaṇḍatāya sakalalokiyalokuttaraguṇādhiṭṭhānato cassa mahapphalamahānisaṃsatā veditabbā.
உபஸிங்க⁴னமத்தந்தி கா⁴யனமத்தங். க³த்³தோ³ஹனமத்தந்தி பாட²ந்தரே கோ³தோ³ஹனமத்தங் காலந்தி அத்தோ². ஸோ ச ந ஸகலோ கோ³தோ³ஹனக்க²ணோ அதி⁴ப்பேதோதி த³ஸ்ஸேதுங் ‘‘கா³வியா ஏகவாரங் த²னஅஞ்ச²னமத்த’’ந்தி அத்தோ² வுத்தோ. அஞ்ச²னமத்தந்தி ஆகட்³ட⁴னமத்தங். கா³வியா த²னங் க³ஹெத்வா ஏககீ²ரபி³ந்து³து³ஹனகாலமத்தம்பி க³த்³து³ஹனமத்தந்தி வத³ந்தி. எத்தகம்பி ஹி காலங் யோ வஸனக³ப்³ப⁴பரிவேணவிஹாரூபசாரபரிச்சே²தே³ன வா அபரிமாணாஸு லோகதா⁴தூஸு ஸப்³ப³ஸத்தே ஹிதப²ரணங் மெத்தசித்தங் பா⁴வேதுங் ஸக்கோதி. இத³ங் ததோ யதா²வுத்ததா³னாதி³தோ மஹப்ப²லதரங்.
Upasiṅghanamattanti ghāyanamattaṃ. Gaddohanamattanti pāṭhantare godohanamattaṃ kālanti attho. So ca na sakalo godohanakkhaṇo adhippetoti dassetuṃ ‘‘gāviyā ekavāraṃ thanaañchanamatta’’nti attho vutto. Añchanamattanti ākaḍḍhanamattaṃ. Gāviyā thanaṃ gahetvā ekakhīrabinduduhanakālamattampi gadduhanamattanti vadanti. Ettakampi hi kālaṃ yo vasanagabbhapariveṇavihārūpacāraparicchedena vā aparimāṇāsu lokadhātūsu sabbasatte hitapharaṇaṃ mettacittaṃ bhāvetuṃ sakkoti. Idaṃ tato yathāvuttadānādito mahapphalataraṃ.
வேலாமஸுத்தவண்ணனா நிட்டி²தா.
Velāmasuttavaṇṇanā niṭṭhitā.
ஸீஹனாத³வக்³க³வண்ணனா நிட்டி²தா.
Sīhanādavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. வேலாமஸுத்தங் • 10. Velāmasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 10. வேலாமஸுத்தவண்ணனா • 10. Velāmasuttavaṇṇanā
