| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) |
༣. ཝེནཱགཔུརསུཏྟཝཎྞནཱ
3. Venāgapurasuttavaṇṇanā
༦༤. ཏཏིཡེ ཨེཝཾནཱམཀེ ཛནཔདེཏི ཡཏྠ ནཱམགྒཧཎེན ཀོསལསདྡསྶ རུལ༹ྷཱིསདྡཏཾ དསྶེཏི། ཏཐཱ ཧི ཀོསལཱ ནཱམ ཛཱནཔདིནོ རཱཛཀུམཱརཱ, ཏེསཾ ནིཝཱསོ ཨེཀོཔི ཛནཔདོ རུལ༹ྷཱིསདྡེན ‘‘ཀོསལཱ’’ཏི ཝུཙྩཏི། ཨཀྑརཙིནྟཀཱ ཧི ཨཱིདིསེསུ ཋཱནེསུ ཡུཏྟེ ཝིཡ སལིངྒཝཙནཱནི (པཱཎིནི ༡.༢.༥༡) ཨིཙྪནྟི། ཨཡམེཏྠ རུལ༹ྷཱི ཡཐཱ ཨཉྙཏྠཱཔི ‘‘ཀུརཱུསུ ཝིཧརཏི, ཨངྒེསུ ཝིཧརཏཱི’’ཏི ཙ། ཏབྦིསེསནེ པན ཛནཔདསདྡེ ཛཱཏིསདྡེ ཨེཀཝཙནམེཝ ཡཐཱ ‘‘ཀོསལེསུ ཛནཔདེ’’ཏི། ཙཱརིཀནྟི ཙརཎཾ། ཙརཎཾ ཝཱ ཙཱརོ, སོ ཨེཝ ཙཱརིཀཱ། ཏཡིདཾ མགྒགམནཾ ཨིདྷཱདྷིཔྤེཏཾ, ན ཙུཎྞིཀགམནམཏྟནྟི ཨཱཧ ‘‘ཨདྡྷཱནགམནཾ གཙྪནྟོ’’ཏི། ཏཾ ཝིབྷཱགེན དསྶེཏུཾ ‘‘ཙཱརིཀཱ ཙ ནཱམེསཱ’’ཏིཨཱདི ཝུཏྟཾ། ཏཏྠ དཱུརེཔཱིཏི དཱུརེཔི ནཱཏིདཱུརེཔི། སཧསཱ གམནནྟི སཱིགྷགམནཾ། མཧཱཀསྶཔཔཙྩུགྒམནཱདཱིསཱུཏི ཨཱདི-སདྡེན ཨཱལ༹ཝཀཱདཱིནཾ ཨཏྠཱཡ གམནཾ སངྒཎྷཱཏི། བྷགཝཱ ཧི མཧཱཀསྶཔཏྠེརཾ པཙྩུགྒཙྪནྟོ མུཧུཏྟེན ཏིགཱཝུཏམགྒམགམཱསི། ཨཱལ༹ཝཀསྶཏྠཱཡ ཏིཾསཡོཛནཾ, ཏཐཱ ཨངྒུལིམཱལསྶ, པུཀྐུསཱཏིསྶ པན པཉྩཙཏྟཱལཱིསཡོཛནཾ, མཧཱཀཔྤིནསྶ ཝཱིསཡོཛནསཏཾ, དྷནིཡསྶཏྠཱཡ སཏྟ ཡོཛནསཏཱནི, དྷམྨསེནཱཔཏིནོ སདྡྷིཝིཧཱརིཀསྶ ཝནཝཱསིསྶ ཏིསྶསཱམཎེརསྶ ཏིགཱཝུཏཱདྷིཀཾ ཝཱིསཡོཛནསཏཾ ཨགམཱསི། ཨིམཾ སནྡྷཱཡཱཏི ཨིམཾ ཨཏུརིཏཙཱརིཀཾ སནྡྷཱཡ།
64. Tatiye evaṃnāmake janapadeti yattha nāmaggahaṇena kosalasaddassa ruḷhīsaddataṃ dasseti. Tathā hi kosalā nāma jānapadino rājakumārā, tesaṃ nivāso ekopi janapado ruḷhīsaddena ‘‘kosalā’’ti vuccati. Akkharacintakā hi īdisesu ṭhānesu yutte viya saliṅgavacanāni (pāṇini 1.2.51) icchanti. Ayamettha ruḷhī yathā aññatthāpi ‘‘kurūsu viharati, aṅgesu viharatī’’ti ca. Tabbisesane pana janapadasadde jātisadde ekavacanameva yathā ‘‘kosalesu janapade’’ti. Cārikanti caraṇaṃ. Caraṇaṃ vā cāro, so eva cārikā. Tayidaṃ maggagamanaṃ idhādhippetaṃ, na cuṇṇikagamanamattanti āha ‘‘addhānagamanaṃ gacchanto’’ti. Taṃ vibhāgena dassetuṃ ‘‘cārikā ca nāmesā’’tiādi vuttaṃ. Tattha dūrepīti dūrepi nātidūrepi. Sahasā gamananti sīghagamanaṃ. Mahākassapapaccuggamanādīsūti ādi-saddena āḷavakādīnaṃ atthāya gamanaṃ saṅgaṇhāti. Bhagavā hi mahākassapattheraṃ paccuggacchanto muhuttena tigāvutamaggamagamāsi. Āḷavakassatthāya tiṃsayojanaṃ, tathā aṅgulimālassa, pukkusātissa pana pañcacattālīsayojanaṃ, mahākappinassa vīsayojanasataṃ, dhaniyassatthāya satta yojanasatāni, dhammasenāpatino saddhivihārikassa vanavāsissa tissasāmaṇerassa tigāvutādhikaṃ vīsayojanasataṃ agamāsi. Imaṃ sandhāyāti imaṃ aturitacārikaṃ sandhāya.
ཨུཔལབྷིཾསཱུཏི ཨེཏྠ སཝནཝསེན ཨུཔལབྷིཾསཱུཏི ཨིམམཏྠཾ དསྶེནྟོ ‘‘སོཏདྭཱར…པེ॰… ཛཱནིཾསཱུ’’ཏི ཨཱཧ། སབྦམྤི ཝཱཀྱཾ ཨཝདྷཱརཎཕལཏྟཱ ཨནྟོགདྷཱཝདྷཱརཎནྟི ཨཱཧ ‘‘པདཔཱུརཎམཏྟེ ཝཱ ནིཔཱཏོ’’ཏི། ཨཝདྷཱརཎཏྠེནཱཏི པན ཨིམིནཱ ཨིཊྛཏྠཏོཝདྷཱརཎཏྠཾ ཁོ-སདྡགྒཧཎནྟི དསྶེཏི། ཨསྶོསཱིཏི པདཾ ཁོ-སདྡེ གཧིཏེ ཏེན ཕུལླིཏམཎྜིཏཝིབྷཱུསིཏཾ ཝིཡ ཧོནྟཾ པཱུརིཏཾ ནཱམ ཧོཏི, ཏེན ཙ པུརིམཔཙྪིམཔདཱནི སཾསིལིཊྛཱནི ནཱམ ཧོནྟི, ན ཏསྨིཾ ཨགྒཧིཏེཏི ཨཱཧ ‘‘པདཔཱུརཎེན བྱཉྫནསིལིཊྛཏཱམཏྟམེཝཱ’’ཏི། མཏྟསདྡོ ཝིསེསནིཝཏྟིཨཏྠོ། ཏེནསྶ ཨནཏྠནྟརདཱིཔནཏཱ དསྶིཏཱ ཧོཏི, ཨེཝསདྡེན པན བྱཉྫནསིལིཊྛཏཱཡ ཨེཀནྟིཀཏཱ།
Upalabhiṃsūti ettha savanavasena upalabhiṃsūti imamatthaṃ dassento ‘‘sotadvāra…pe… jāniṃsū’’ti āha. Sabbampi vākyaṃ avadhāraṇaphalattā antogadhāvadhāraṇanti āha ‘‘padapūraṇamatte vā nipāto’’ti. Avadhāraṇatthenāti pana iminā iṭṭhatthatovadhāraṇatthaṃ kho-saddaggahaṇanti dasseti. Assosīti padaṃ kho-sadde gahite tena phullitamaṇḍitavibhūsitaṃ viya hontaṃ pūritaṃ nāma hoti, tena ca purimapacchimapadāni saṃsiliṭṭhāni nāma honti, na tasmiṃ aggahiteti āha ‘‘padapūraṇena byañjanasiliṭṭhatāmattamevā’’ti. Mattasaddo visesanivattiattho. Tenassa anatthantaradīpanatā dassitā hoti, evasaddena pana byañjanasiliṭṭhatāya ekantikatā.
སམིཏཔཱཔཏྟཱཏི ཨཙྩནྟཾ ཨནཝསེསཏོ སཝཱསནཾ སམིཏཔཱཔཏྟཱ། ཨེཝཉྷི བཱཧིརཀཝཱིཏརཱགསེཀྑཱསེཀྑཔཱཔསམནཏོ བྷགཝཏོ པཱཔསམནཾ ཝིསེསིཏཾ ཧོཏི། ཏེནསྶ ཡཐཱབྷཱུཏགུཎཱདྷིགཏམེཏཾ ནཱམཾ ཡདིདཾ སམཎོཏི དཱིཔེཏི། ཨནེཀཏྠཏྟཱ ནིཔཱཏཱནཾ ཨིདྷ ཨནུསྶཝཏྠོ ཨདྷིཔྤེཏོཏི ཨཱཧ ‘‘ཁལཱུཏི ཨནུསྶཝཏྠེ ནིཔཱཏོ’’ཏི། ཨཱལཔནམཏྟནྟི པིཡཱལཱཔཝཙནམཏྟཾ། པིཡསམུདཱཧཱརཱ ཧེཏེ ‘‘བྷོ’’ཏི ཝཱ ‘‘ཨཱཝུསོ’’ཏི ཝཱ ‘‘དེཝཱནཾ པིཡཱ’’ཏི ཝཱ། གོཏྟཝསེནཱཏི ཨེཏྠ གཾ ཏཱཡཏཱིཏི གོཏྟཾ། གོཏམོཏི ཧི པཝཏྟམཱནཾ ཝཙནཾ བུདྡྷིཉྩ ཏཱཡཏི ཨེཀཾསིཀཝིསཡཏཱཡ རཀྑཏཱིཏི གོཏྟཾ། ཡཐཱ ཧི བུདྡྷི ཨཱརམྨཎབྷཱུཏེན ཨཏྠེན ཝིནཱ ན ཝཏྟཏི, ཏཐཱ ཨབྷིདྷཱནཾ ཨབྷིདྷེཡྻབྷཱུཏེན, ཏསྨཱ སོ གོཏྟསངྑཱཏོ ཨཏྠོ ཏཱནི ཏཱཡཏི རཀྑཏཱིཏི ཝུཙྩཏི། ཀོ པན སོཏི? ཨཉྙཀུལཔརམྤརཱསཱདྷཱརཎཾ ཏསྶ ཀུལསྶ ཨཱདིཔུརིསསམུདཱགཏཾ ཏཾཀུལཔརིཡཱཔནྣསཱདྷཱརཎཾ སཱམཉྙརཱུཔནྟི དཊྛབྦཾ། ཨེཏྠ ཙ སམཎོཏི ཨིམིནཱ པརིཀྑཀཛནེཧི བྷགཝཏོ བཧུམཏབྷཱཝོ དསྶིཏོ སམིཏཔཱཔཏཱཀིཏྟནཏོ། གོཏམོཏི ཨིམིནཱ ལོཀིཡཛནེཧི ཨུཙྩཱཀུལསམྦྷཱུཏཏཱ དཱིཔིཏཱ ཏེན ཨུདིཏོདིཏཝིཔུལཁཏྟིཡཀུལཝིབྷཱཝནཏོ། སབྦཁཏྟིཡཱནཉྷི ཨཱདིབྷཱུཏམཧཱསམྨཏམཧཱརཱཛཏོ པཊྛཱཡ ཨསམྦྷིནྣཾ ཨུལཱ༹རཏམཾ སཀྱརཱཛཀུལཾ།
Samitapāpattāti accantaṃ anavasesato savāsanaṃ samitapāpattā. Evañhi bāhirakavītarāgasekkhāsekkhapāpasamanato bhagavato pāpasamanaṃ visesitaṃ hoti. Tenassa yathābhūtaguṇādhigatametaṃ nāmaṃ yadidaṃ samaṇoti dīpeti. Anekatthattā nipātānaṃ idha anussavattho adhippetoti āha ‘‘khalūti anussavatthe nipāto’’ti. Ālapanamattanti piyālāpavacanamattaṃ. Piyasamudāhārā hete ‘‘bho’’ti vā ‘‘āvuso’’ti vā ‘‘devānaṃ piyā’’ti vā. Gottavasenāti ettha gaṃ tāyatīti gottaṃ. Gotamoti hi pavattamānaṃ vacanaṃ buddhiñca tāyati ekaṃsikavisayatāya rakkhatīti gottaṃ. Yathā hi buddhi ārammaṇabhūtena atthena vinā na vattati, tathā abhidhānaṃ abhidheyyabhūtena, tasmā so gottasaṅkhāto attho tāni tāyati rakkhatīti vuccati. Ko pana soti? Aññakulaparamparāsādhāraṇaṃ tassa kulassa ādipurisasamudāgataṃ taṃkulapariyāpannasādhāraṇaṃ sāmaññarūpanti daṭṭhabbaṃ. Ettha ca samaṇoti iminā parikkhakajanehi bhagavato bahumatabhāvo dassito samitapāpatākittanato. Gotamoti iminā lokiyajanehi uccākulasambhūtatā dīpitā tena uditoditavipulakhattiyakulavibhāvanato. Sabbakhattiyānañhi ādibhūtamahāsammatamahārājato paṭṭhāya asambhinnaṃ uḷāratamaṃ sakyarājakulaṃ.
ཀེནཙི པཱརིཛུཉྙེནཱཏི ཉཱཏིཔཱརིཛུཉྙབྷོགཔཱརིཛུཉྙཱདིནཱ ཀེནཙིཔི པཱརིཛུཉྙེན པརིཧཱནིཡཱ ཨནབྷིབྷཱུཏོ ཨནཛ྄ཛྷོཏྠཊོ། ཏཐཱ ཧི ཏསྶ ཀུལསྶ ན ཀིཉྩི པཱརིཛུཉྙཾ ལོཀནཱཐསྶ ཨབྷིཛཱཏིཡཾ, ཨཐ ཁོ ཝཌྜྷིཡེཝ། ཨབྷིནིཀྑམནེ ཙ ཏཏོཔི སམིདྡྷཏམབྷཱཝོ ལོཀེ པཱཀཊོ པཉྙཱཏོཏི། སཀྱཀུལཱ པབྦཛིཏོཏི ཨིདཾ ཝཙནཾ བྷགཝཏོ སདྡྷཱཔབྦཛིཏབྷཱཝདཱིཔནཾ ཝུཏྟཾ མཧནྟཾ ཉཱཏིཔརིཝཊྚཾ མཧནྟཉྩ བྷོགཀྑནྡྷཾ པཧཱཡ པབྦཛིཏབྷཱཝསིདྡྷིཏོ།
Kenaci pārijuññenāti ñātipārijuññabhogapārijuññādinā kenacipi pārijuññena parihāniyā anabhibhūto anajjhotthaṭo. Tathā hi tassa kulassa na kiñci pārijuññaṃ lokanāthassa abhijātiyaṃ, atha kho vaḍḍhiyeva. Abhinikkhamane ca tatopi samiddhatamabhāvo loke pākaṭo paññātoti. Sakyakulā pabbajitoti idaṃ vacanaṃ bhagavato saddhāpabbajitabhāvadīpanaṃ vuttaṃ mahantaṃ ñātiparivaṭṭaṃ mahantañca bhogakkhandhaṃ pahāya pabbajitabhāvasiddhito.
ཨིཏྠམྦྷཱུཏཱཁྱཱནཏྠེཏི ཨིཏྠཾ ཨེཝཾཔཀཱརོ བྷཱུཏོ ཛཱཏོཏི ཨེཝཾ ཀཐནཏྠེ། ཨུཔཡོགཝཙནནྟི ‘‘ཨབྦྷུགྒཏོ’’ཏི ཨེཏྠ ཨབྷི-སདྡོ ཨིཏྠམྦྷཱུཏཱཁྱཱནཏྠཛོཏཀོ, ཏེན ཡོགཏོ ‘‘ཏཾ ཁོ པན བྷཝནྟ’’ནྟི ཨིདཾ སཱམིཨཏྠེ ཨུཔཡོགཝཙནཾ། ཏེནཱཧ ‘‘ཏསྶ ཁོ པན བྷོཏོ གོཏམསྶཱཏི ཨཏྠོ’’ཏི། ཀལྱཱཎགུཎསམནྣཱགཏོཏི ཀལྱཱཎེཧི གུཎེཧི ཡུཏྟོ, ཏནྣིསྶིཏོ ཏབྦིསཡཏཱཡཱཏི ཨདྷིཔྤཱཡོ། སེཊྛོཏི ཨེཏྠཱཔི ཨེསེཝ ནཡོ། ཀིཏྟེཏབྦཏོ ཀིཏྟི, སཱ ཨེཝ སདྡནཱིཡཏོ སདྡོཏི ཨཱཧ ‘‘ཀིཏྟིསདྡོཏི ཀིཏྟིཡེཝཱ’’ཏི། ཨབྷིཏྠཝནཝསེན པཝཏྟོ སདྡོ ཐུཏིགྷོསོ། སདེཝཀཾ ལོཀཾ ཨཛ྄ཛྷོཏྠརིཏྭཱ ཨུགྒཏོཏི ཨནཉྙསཱདྷཱརཎེ གུཎེ ཨཱརབྦྷ པཝཏྟཏྟཱ སདེཝཀཾ ལོཀཾ ཨཛ྄ཛྷོཏྠརིཏྭཱ ཨབྷིབྷཝིཏྭཱ ཨུགྒཏོ།
Itthambhūtākhyānattheti itthaṃ evaṃpakāro bhūto jātoti evaṃ kathanatthe. Upayogavacananti ‘‘abbhuggato’’ti ettha abhi-saddo itthambhūtākhyānatthajotako, tena yogato ‘‘taṃ kho pana bhavanta’’nti idaṃ sāmiatthe upayogavacanaṃ. Tenāha ‘‘tassa kho pana bhoto gotamassāti attho’’ti. Kalyāṇaguṇasamannāgatoti kalyāṇehi guṇehi yutto, tannissito tabbisayatāyāti adhippāyo. Seṭṭhoti etthāpi eseva nayo. Kittetabbato kitti, sā eva saddanīyato saddoti āha ‘‘kittisaddoti kittiyevā’’ti. Abhitthavanavasena pavatto saddo thutighoso. Sadevakaṃ lokaṃ ajjhottharitvā uggatoti anaññasādhāraṇe guṇe ārabbha pavattattā sadevakaṃ lokaṃ ajjhottharitvā abhibhavitvā uggato.
སོ བྷགཝཱཏི ཡོ སོ སམཏིཾས པཱརམིཡོ པཱུརེཏྭཱ སབྦཀིལེསེ བྷཉྫིཏྭཱ ཨནུཏྟརཾ སམྨཱསམྦོདྷིཾ ཨབྷིསམྦུདྡྷོ དེཝཱནཾ ཨཏིདེཝོ སཀྐཱནཾ ཨཏིསཀྐོ བྲཧྨཱནཾ ཨཏིབྲཧྨཱ ལོཀནཱཐོ བྷཱགྱཝནྟཏཱདཱིཧི ཀཱརཎེཧི སདེཝཀེ ལོཀེ ‘‘བྷགཝཱ’’ཏི པཏྠཊཀིཏྟིསདྡོ, སོ བྷགཝཱ། ‘‘བྷགཝཱ’’ཏི ཙ ཨིདཾ སཏྠུ ནཱམཀིཏྟནཾ། ཏེནཱཧ ཨཱཡསྨཱ དྷམྨསེནཱཔཏི ‘‘བྷགཝཱཏི ནེཏཾ ནཱམཾ མཱཏརཱ ཀཏ’’ནྟིཨཱདི (མཧཱནི॰ ༨༤)། པརཏོ པན བྷགཝཱཏི གུཎཀིཏྟནཾ། ཡཐཱ ཀམྨཊྛཱནིཀེན ‘‘ཨརཧ’’ནྟིཨཱདཱིསུ ནཝསུ ཋཱནེསུ པཙྩེཀཾ ཨིཏི-སདྡཾ ཡོཛེཏྭཱ བུདྡྷགུཎཱ ཨནུསྶརིཡནྟི, ཨེཝཾ བུདྡྷགུཎསཾཀིཏྟནེནཔཱིཏི དསྶེནྟོ ‘‘ཨིཏིཔི ཨརཧཾ ཨིཏིཔི སམྨཱསམྦུདྡྷོ…པེ॰… ཨིཏིཔི བྷགཝཱ’’ཏི ཨཱཧ། ‘‘ཨིཏིཔེཏཾ བྷཱུཏཾ ཨིཏིཔེཏཾ ཏཙྪ’’ནྟིཨཱདཱིསུ (དཱི॰ ནི॰ ༡.༦) ཝིཡ ཨིདྷ ཨིཏིསདྡོ ཨཱསནྣཔཙྩཀྑཀརཎཏྠོ, པི-སདྡོ སམྤིཎྜནཏྠོ, ཏེན ཙ ཏེསཾ གུཎཱནཾ བཧུབྷཱཝོ དཱིཔིཏོ, ཏཱནི ཙ སཾཀིཏྟེནྟེན ཝིཉྙུནཱ ཙིཏྟསྶ སམྨུཁཱིབྷཱུཏཱནེཝ ཀཏྭཱ སཾཀིཏྟེཏབྦཱནཱིཏི དསྶེནྟོ ‘‘ཨིམིནཱ ཙ ཨིམིནཱ ཙ ཀཱརཎེནཱཏི ཝུཏྟཾ ཧོཏཱི’’ཏི ཨཱཧ། ཨེཝཾ ནིརཱུཔེཏྭཱ ཀིཏྟེནྟོ ཡོ ཀིཏྟེཏི, ཏསྶ བྷགཝཏི ཨཏིཝིཡ ཨབྷིཔྤསཱདོ ཧོཏི།
So bhagavāti yo so samatiṃsa pāramiyo pūretvā sabbakilese bhañjitvā anuttaraṃ sammāsambodhiṃ abhisambuddho devānaṃ atidevo sakkānaṃ atisakko brahmānaṃ atibrahmā lokanātho bhāgyavantatādīhi kāraṇehi sadevake loke ‘‘bhagavā’’ti patthaṭakittisaddo, so bhagavā. ‘‘Bhagavā’’ti ca idaṃ satthu nāmakittanaṃ. Tenāha āyasmā dhammasenāpati ‘‘bhagavāti netaṃ nāmaṃ mātarā kata’’ntiādi (mahāni. 84). Parato pana bhagavāti guṇakittanaṃ. Yathā kammaṭṭhānikena ‘‘araha’’ntiādīsu navasu ṭhānesu paccekaṃ iti-saddaṃ yojetvā buddhaguṇā anussariyanti, evaṃ buddhaguṇasaṃkittanenapīti dassento ‘‘itipi arahaṃ itipi sammāsambuddho…pe… itipi bhagavā’’ti āha. ‘‘Itipetaṃ bhūtaṃ itipetaṃ taccha’’ntiādīsu (dī. ni. 1.6) viya idha itisaddo āsannapaccakkhakaraṇattho, pi-saddo sampiṇḍanattho, tena ca tesaṃ guṇānaṃ bahubhāvo dīpito, tāni ca saṃkittentena viññunā cittassa sammukhībhūtāneva katvā saṃkittetabbānīti dassento ‘‘iminā ca iminā ca kāraṇenāti vuttaṃ hotī’’ti āha. Evaṃ nirūpetvā kittento yo kitteti, tassa bhagavati ativiya abhippasādo hoti.
ཨཱརཀཏྟཱཏི སུཝིདཱུརཏྟཱ། ཨརཱིནནྟི ཀིལེསཱརཱིནཾ། ཨརཱནནྟི སཾསཱརཙཀྐསྶ ཨརཱནཾ། ཧཏཏྟཱཏི ཝིདྡྷཾསིཏཏྟཱ། པཙྩཡཱདཱིནནྟི ཙཱིཝརཱདིཔཙྩཡཱནཉྩེཝ པཱུཛཱཝིསེསཱནཉྩ། ཏཏོཏི ཝིསུདྡྷིམགྒཏོ (ཝིསུདྡྷི॰ ༡.༡༢༥-༡༢༧)། ཡཐཱ ཙ ཝིསུདྡྷིམགྒཏོ, ཨེཝཾ ཏཾསཾཝཎྞནཱཏོཔི ནེསཾ ཝིཏྠཱརོ གཧེཏབྦོ།
Ārakattāti suvidūrattā. Arīnanti kilesārīnaṃ. Arānanti saṃsāracakkassa arānaṃ. Hatattāti viddhaṃsitattā. Paccayādīnanti cīvarādipaccayānañceva pūjāvisesānañca. Tatoti visuddhimaggato (visuddhi. 1.125-127). Yathā ca visuddhimaggato, evaṃ taṃsaṃvaṇṇanātopi nesaṃ vitthāro gahetabbo.
ཨིམཾ ལོཀནྟི ནཡིདཾ མཧཱཛནསྶ སམྨུཁམཏྟཾ སནྡྷཱཡ ཝུཏྟཾ, ཨཐ ཁོ ཨནཝསེསཾ པརིཡཱདཱཡཱཏི དསྶེཏུཾ ‘‘སདེཝཀ’’ནྟིཨཱདི ཝུཏྟཾ། ཏེནཱཧ ‘‘ཨིདཱནི ཝཏྟབྦཾ ནིདསྶེཏཱི’’ཏི། པཛཱཏཏྟཱཏི ཡཐཱསཀཾ ཀམྨཀིལེསེཧི ནིབྦཏྟཏྟཱ། པཉྩཀཱམཱཝཙརདེཝགྒཧཎཾ པཱརིསེསནཡེན ཨིཏརེསཾ པདནྟརེན གཧིཏཏྟཱ། སདེཝཀནྟི ཙ ཨཝཡཝེན ཝིགྒཧོ སམུདཱཡོ སམཱསཏྠོ། ཚཊྛཀཱམཱཝཙརདེཝགྒཧཎཾ པཙྩཱསཏྟིནཡེན། ཏཏྠ ཧི སོ ཛཱཏོ ཏནྣིཝཱསཱི ཙ། སབྲཧྨཀཝཙནེན བྲཧྨཀཱཡིཀཱདིབྲཧྨགྒཧཎནྟི ཨེཏྠཱཔི ཨེསེཝ ནཡོ། པཙྩཏྠིཀསམཎབྲཱཧྨཎགྒཧཎནྟི ནིདསྶནམཏྟམེཏཾ ཨཔཙྩཏྠིཀཱནཾ སམིཏབཱཧིཏཔཱཔཱནཉྩ སམཎབྲཱཧྨཎཱནཾ སམཎབྲཱཧྨཎཝཙནེན གཧིཏཏྟཱ། ཀཱམཾ ‘‘སདེཝཀ’’ནྟིཨཱདིཝིསེསནཱནཾ ཝསེན སཏྟཝིསཡོ ལོཀསདྡོཏི ཝིཉྙཱཡཏི ཏུལྱཡོགཝིསཡཏྟཱ ཏེསཾ, ‘‘སལོམཀོ སཔཀྑཀོ’’ཏིཨཱདཱིསུ པན ཨཏུལྱཡོགེཔི ཨཡཾ སམཱསོ ལབྦྷཏཱིཏི བྱབྷིཙཱརདསྶནཏོ པཛཱགཧཎནྟི ཨཱཧ ‘‘པཛཱཝཙནེན སཏྟལོཀགྒཧཎ’’ནྟི།
Imaṃlokanti nayidaṃ mahājanassa sammukhamattaṃ sandhāya vuttaṃ, atha kho anavasesaṃ pariyādāyāti dassetuṃ ‘‘sadevaka’’ntiādi vuttaṃ. Tenāha ‘‘idāni vattabbaṃ nidassetī’’ti. Pajātattāti yathāsakaṃ kammakilesehi nibbattattā. Pañcakāmāvacaradevaggahaṇaṃ pārisesanayena itaresaṃ padantarena gahitattā. Sadevakanti ca avayavena viggaho samudāyo samāsattho. Chaṭṭhakāmāvacaradevaggahaṇaṃ paccāsattinayena. Tattha hi so jāto tannivāsī ca. Sabrahmakavacanena brahmakāyikādibrahmaggahaṇanti etthāpi eseva nayo. Paccatthikasamaṇabrāhmaṇaggahaṇanti nidassanamattametaṃ apaccatthikānaṃ samitabāhitapāpānañca samaṇabrāhmaṇānaṃ samaṇabrāhmaṇavacanena gahitattā. Kāmaṃ ‘‘sadevaka’’ntiādivisesanānaṃ vasena sattavisayo lokasaddoti viññāyati tulyayogavisayattā tesaṃ, ‘‘salomako sapakkhako’’tiādīsu pana atulyayogepi ayaṃ samāso labbhatīti byabhicāradassanato pajāgahaṇanti āha ‘‘pajāvacanena sattalokaggahaṇa’’nti.
ཨརཱུཔིནོ སཏྟཱ ཨཏྟནོ ཨཱནེཉྫཝིཧཱརེན ཝིཧརནྟཱ དིབྦནྟཱིཏི དེཝཱཏི ཨིམཾ ནིབྦཙནཾ ལབྷནྟཱིཏི ཨཱཧ ‘‘སདེཝཀགྒཧཎེན ཨརཱུཔཱཝཙརལོཀོ གཧིཏོ’’ཏི། ཏེནཱཧ ‘‘ཨཱཀཱསཱནཉྩཱཡཏནཱུཔགཱནཾ དེཝཱནཾ སཧབྱཏ’’ནྟི (ཨ॰ ནི॰ ༣.༡༡༧)། སམཱརཀགྒཧཎེན ཚཀཱམཱཝཙརདེཝལོཀོ གཧིཏོ ཏསྶ སཝིསེསཾ མཱརསྶ ཝསེ ཝཏྟནཏོ། སབྲཧྨཀགྒཧཎེན རཱུཔཱིབྲཧྨལོཀོ གཧིཏོ ཨརཱུཔཱིབྲཧྨལོཀསྶ གཧིཏཏྟཱ། ཙཏུཔརིསཝསེནཱཏི ཁཏྟིཡཱདིཙཏུཔརིསཝསེན། ཨིཏརཱ པན ཙཏསྶོ པརིསཱ སམཱརཀཱདིགྒཧཎེན གཧིཏཱ ཨེཝཱཏི། ཨཝསེསསཏྟལོཀོ ནཱགགརུལཱ༹དིབྷེདོ། ཏཱིཧཱཀཱརེཧཱིཏི དེཝམཱརབྲཧྨསཧིཏཏཱསངྑཱཏེཧི ཏཱིཧི པཀཱརེཧི། ཏཱིསུ པདེསཱུཏི ‘‘སདེཝཀ’’ནྟིཨཱདཱིསུ ཏཱིསུ པདེསུ། ཏེན ཏེནཱཀཱརེནཱཏི སདེཝཀཏྟཱདིནཱ ཏེན ཏེན པཀཱརེན། ཏེདྷཱཏུཀམེཝ པརིཡཱདིནྣནྟི པོརཱཎཱ ཨཱཧཱུཏི ཡོཛནཱ།
Arūpino sattā attano āneñjavihārena viharantā dibbantīti devāti imaṃ nibbacanaṃ labhantīti āha ‘‘sadevakaggahaṇena arūpāvacaraloko gahito’’ti. Tenāha ‘‘ākāsānañcāyatanūpagānaṃ devānaṃ sahabyata’’nti (a. ni. 3.117). Samārakaggahaṇena chakāmāvacaradevaloko gahito tassa savisesaṃ mārassa vase vattanato. Sabrahmakaggahaṇena rūpībrahmaloko gahito arūpībrahmalokassa gahitattā. Catuparisavasenāti khattiyādicatuparisavasena. Itarā pana catasso parisā samārakādiggahaṇena gahitā evāti. Avasesasattaloko nāgagaruḷādibhedo. Tīhākārehīti devamārabrahmasahitatāsaṅkhātehi tīhi pakārehi. Tīsu padesūti ‘‘sadevaka’’ntiādīsu tīsu padesu. Tena tenākārenāti sadevakattādinā tena tena pakārena. Tedhātukameva pariyādinnanti porāṇā āhūti yojanā.
ཨབྷིཉྙཱཏི ཡཀཱརལོཔེནཱཡཾ ནིདྡེསོ, ཨབྷིཛཱནིཏྭཱཏི ཨཡམེཏྠ ཨཏྠོཏི ཨཱཧ ‘‘ཨབྷིཉྙཱཡ ཨདྷིཀེན ཉཱཎེན ཉཏྭཱ’’ཏི། ཨནུམཱནཱདིཔཊིཀྑེཔོཏི ཨནུམཱནཨཏྠཱཔཏྟིཨཱདིཔྤཊིཀྑེཔོ ཨེཀཔྤམཱཎཏྟཱ། སབྦཏྠ ཨཔྤཊིཧཏཉཱཎཙཱརཏཱཡ ཧི སབྦཔཙྩཀྑཱ བུདྡྷཱ བྷགཝནྟོ།
Abhiññāti yakāralopenāyaṃ niddeso, abhijānitvāti ayamettha atthoti āha ‘‘abhiññāya adhikena ñāṇena ñatvā’’ti. Anumānādipaṭikkhepoti anumānaatthāpattiādippaṭikkhepo ekappamāṇattā. Sabbattha appaṭihatañāṇacāratāya hi sabbapaccakkhā buddhā bhagavanto.
ཨནུཏྟརཾ ཝིཝེཀསུཁནྟི ཕལསམཱཔཏྟིསུཁཾ། ཏེན ཝིམིསྶཱཔི ཀདཱཙི བྷགཝཏོ དྷམྨདེསནཱ ཧོཏཱིཏི ‘‘ཧིཏྭཱཔཱི’’ཏི པི-སདྡགྒཧཎཾ། བྷགཝཱ ཧི དྷམྨཾ དེསེནྟོ ཡསྨིཾ ཁཎེ པརིསཱ སཱདྷུཀཱརཾ ཝཱ དེཏི, ཡཐཱསུཏཾ ཝཱ དྷམྨཾ པཙྩཝེཀྑཏི, ཏཾ ཁཎཾ པུབྦབྷཱགེན པརིཙྪིནྡིཏྭཱ ཕལསམཱཔཏྟིཾ སམཱཔཛྫཏི, ཡཐཱཔརིཙྪེདཉྩ སམཱཔཏྟིཏོ ཝུཊྛཱཡ ཋིཏཊྛཱནཏོ པཊྛཱཡ དྷམྨཾ དེསེཏི། ཨཔྤཾ ཝཱ བཧུཾ ཝཱ དེསེནྟོཏི ཨུགྒྷཊིཏཉྙུསྶ ཝསེན ཨཔྤཾ ཝཱ, ཝིཔཉྩིཏཉྙུསྶ ནེཡྻསྶ ཝཱ ཝསེན བཧུཾ ཝཱ དེསེནྟོ། དྷམྨསྶ ཀལྱཱཎཏཱ ཙ ནིཡྻཱནིཀཏཱ ཙ སབྦསོ ཨནཝཛྫབྷཱཝེནེཝཱཏི ཨཱཧ ‘‘ཨནཝཛྫམེཝ ཀཏྭཱ’’ཏི།
Anuttaraṃ vivekasukhanti phalasamāpattisukhaṃ. Tena vimissāpi kadāci bhagavato dhammadesanā hotīti ‘‘hitvāpī’’ti pi-saddaggahaṇaṃ. Bhagavā hi dhammaṃ desento yasmiṃ khaṇe parisā sādhukāraṃ vā deti, yathāsutaṃ vā dhammaṃ paccavekkhati, taṃ khaṇaṃ pubbabhāgena paricchinditvā phalasamāpattiṃ samāpajjati, yathāparicchedañca samāpattito vuṭṭhāya ṭhitaṭṭhānato paṭṭhāya dhammaṃ deseti. Appaṃ vā bahuṃ vā desentoti ugghaṭitaññussa vasena appaṃ vā, vipañcitaññussa neyyassa vā vasena bahuṃ vā desento. Dhammassa kalyāṇatā ca niyyānikatā ca sabbaso anavajjabhāvenevāti āha ‘‘anavajjameva katvā’’ti.
དེསཀཱཡཏྟེན ཨཱཎཱདིཝིདྷིནཱ ཨཏིསཛྫནཾ པབོདྷནཾ དེསནཱཏི སཱ པརིཡཏྟིདྷམྨཝསེན ཝེདིཏབྦཱཏི ཨཱཧ ‘‘དེསནཱཡ ཏཱཝ ཙཱཏུཔྤདིཀགཱཐཱཡཔཱི’’ཏིཨཱདི། ནིདཱནནིགམཱནིཔི སཏྠུ དེསནཱཡ ཨནུཝིདྷཱནཏོ ཏདནྟོགདྷཱནི ཨེཝཱཏི ཨཱཧ ‘‘ནིདཱནཾ ཨཱདི, ཨིདམཝོཙཱཏི པརིཡོསཱན’’ནྟི།
Desakāyattena āṇādividhinā atisajjanaṃ pabodhanaṃ desanāti sā pariyattidhammavasena veditabbāti āha ‘‘desanāya tāva cātuppadikagāthāyapī’’tiādi. Nidānanigamānipi satthu desanāya anuvidhānato tadantogadhāni evāti āha ‘‘nidānaṃ ādi, idamavocāti pariyosāna’’nti.
སཱསིཏབྦཔུགྒལགཏེན ཡཐཱཔརཱདྷཱདིསཱསིཏབྦབྷཱཝེན ཨནུསཱསནཾ ཏདངྒཝིནཡཱདིཝསེན ཝིནཡནཾ སཱསནནྟི ཏཾ པཊིཔཏྟིདྷམྨཝསེན ཝེདིཏབྦནྟི ཨཱཧ ‘‘སཱིལསམཱདྷིཝིཔསྶནཱ’’ཏིཨཱདི། ཀུསལཱནནྟི ཨནཝཛྫདྷམྨཱནཾ སཱིལསམཐཝིཔསྶནཱནཾ སཱིལདིཊྛཱིནཉྩ ཨཱདིབྷཱཝོ ཏཾམཱུལིཀཏྟཱ ཨུཏྟརིམནུསྶདྷམྨཱནཾ། ཨརིཡམགྒསྶ ཨནྟདྭཡཝིགམེན མཛ྄ཛྷིམཱཔཊིཔདཱབྷཱཝོ ཝིཡ སམྨཱཔཊིཔཏྟིཡཱ ཨཱརབྦྷ ནིབྦཏྟཱིནཾ ཝེམཛ྄ཛྷཏཱཔི མཛ྄ཛྷབྷཱཝོཏི ཝུཏྟཾ ‘‘ཨཏྠི, བྷིཀྑཝེ…པེ॰… མཛ྄ཛྷིམཾ ནཱམཱ’’ཏི། ཕལཾ པརིཡོསཱནཾ ནཱམ སཨུཔཱདིསེསཏཱཝསེན། ནིབྦཱནཾ པརིཡོསཱནཾ ནཱམ ཨནུཔཱདིསེསཏཱཝསེན། ཨིདཱནི ཏེསཾ དྭིནྣམྤི སཱསནསྶ པརིཡོསཱནཏཾ ཨཱགམེན དསྶེཏུཾ ‘‘ཏསྨཱཏིཧ ཏྭ’’ནྟིཨཱདི ཝུཏྟཾ། ‘‘སཱཏྠཾ སབྱཉྫན’’ནྟིཨཱདིཝཙནཏོ དྷམྨདེསནཱཡ ཨཱདིམཛ྄ཛྷཔརིཡོསཱནཾ ཨདྷིཔྤེཏནྟི ཨཱཧ ‘‘ཨིདྷ…པེ॰… ཨདྷིཔྤེཏ’’ནྟི། ཏསྨིཾ ཏསྨིཾ ཨཏྠེ ཀཐཱཝདྷིསདྡཔྤབནྡྷོ གཱཐཱཝསེན སུཏྟཝསེན ཙ ཝཝཏྠིཏོ པརིཡཏྟིདྷམྨོ, སོ ཨིདྷ དེསནཱཏི ཝུཏྟོ, ཏསྶ པན ཨཏྠོ ཝིསེསཏོ སཱིལཱདི ཨེཝཱཏི ཨཱཧ ‘‘བྷགཝཱ ཧི དྷམྨཾ དེསེནྟོ…པེ॰… དསྶེཏཱི’’ཏི། ཏཏྠ སཱིལཾ དསྶེཏྭཱཏི སཱིལགྒཧཎེན སསམྦྷཱརཾ སཱིལཾ གཧིཏཾ, ཏཐཱ མགྒགྒཧཎེན སསམྦྷཱརོ མགྒོཏི ཏདུབྷཡཝསེན ཨནཝསེསཏོ པརིཡཏྟིཨཏྠཾ པརིཡཱདཱཡ ཏིཊྛཏི། ཏེནཱཏི སཱིལཱདིདསྶནེན། ཨཏྠཝསེན ཧི ཨིདྷ དེསནཱཡ ཨཱདིཀལྱཱཎཱདིབྷཱཝོ ཨདྷིཔྤེཏོ། ཀཐིཀསཎྛིཏཱིཏི ཀཐིཀསྶ སཎྛཱནཾ ཀཐནཝསེན སམཝཊྛཱནཾ།
Sāsitabbapuggalagatena yathāparādhādisāsitabbabhāvena anusāsanaṃ tadaṅgavinayādivasena vinayanaṃ sāsananti taṃ paṭipattidhammavasena veditabbanti āha ‘‘sīlasamādhivipassanā’’tiādi. Kusalānanti anavajjadhammānaṃ sīlasamathavipassanānaṃ sīladiṭṭhīnañca ādibhāvo taṃmūlikattā uttarimanussadhammānaṃ. Ariyamaggassa antadvayavigamena majjhimāpaṭipadābhāvo viya sammāpaṭipattiyā ārabbha nibbattīnaṃ vemajjhatāpi majjhabhāvoti vuttaṃ ‘‘atthi, bhikkhave…pe… majjhimaṃ nāmā’’ti. Phalaṃ pariyosānaṃ nāma saupādisesatāvasena. Nibbānaṃ pariyosānaṃ nāma anupādisesatāvasena. Idāni tesaṃ dvinnampi sāsanassa pariyosānataṃ āgamena dassetuṃ ‘‘tasmātiha tva’’ntiādi vuttaṃ. ‘‘Sātthaṃ sabyañjana’’ntiādivacanato dhammadesanāya ādimajjhapariyosānaṃ adhippetanti āha ‘‘idha…pe… adhippeta’’nti. Tasmiṃ tasmiṃ atthe kathāvadhisaddappabandho gāthāvasena suttavasena ca vavatthito pariyattidhammo, so idha desanāti vutto, tassa pana attho visesato sīlādi evāti āha ‘‘bhagavā hi dhammaṃ desento…pe… dassetī’’ti. Tattha sīlaṃ dassetvāti sīlaggahaṇena sasambhāraṃ sīlaṃ gahitaṃ, tathā maggaggahaṇena sasambhāro maggoti tadubhayavasena anavasesato pariyattiatthaṃ pariyādāya tiṭṭhati. Tenāti sīlādidassanena. Atthavasena hi idha desanāya ādikalyāṇādibhāvo adhippeto. Kathikasaṇṭhitīti kathikassa saṇṭhānaṃ kathanavasena samavaṭṭhānaṃ.
ན སོ སཱཏྠཾ དེསེཏི ནིཡྻཱནཏྠཝིརཧཏོ ཏསྶཱ དེསནཱཡ། ཨེཀབྱཉྫནཱདིཡུཏྟཱ ཝཱཏི སིཐིལཱདིབྷེདེསུ བྱཉྫནེསུ ཨེཀཔྤཀཱརེནེཝ དྭིཔྤཀཱརེནེཝ ཝཱ བྱཉྫནེན ཡུཏྟཱ དམིལ༹བྷཱསཱ ཝིཡ། ཝིཝཊཀརཎཏཱཡ ཨོཊྛེ ཨཕུསཱཔེཏྭཱ ཨུཙྩཱརེཏབྦཏོ སབྦནིརོཊྛབྱཉྫནཱ ཝཱ ཀིརཱཏབྷཱསཱ ཝིཡ། སབྦསྶེཝ ཝིསྶཛྫནཱིཡཡུཏྟཏཱཡ སབྦཝིསྶཊྛབྱཉྫནཱ ཝཱ ཡཝནབྷཱསཱ ཝིཡ། སབྦསྶེཝ སཱནུསཱརཏཱཡ སབྦནིགྒཧིཏབྱཉྫནཱ ཝཱ པཱརསིཀཱདིམིལཀྑབྷཱསཱ ཝིཡ། སབྦཱཔེསཱ བྱཉྫནེཀདེསཝསེནེཝ པཝཏྟིཡཱ ཨཔརིཔུཎྞབྱཉྫནཱཏི ཀཏྭཱ ‘‘ཨབྱཉྫནཱ’’ཏི ཝུཏྟཱ།
Na so sātthaṃ deseti niyyānatthavirahato tassā desanāya. Ekabyañjanādiyuttā vāti sithilādibhedesu byañjanesu ekappakāreneva dvippakāreneva vā byañjanena yuttā damiḷabhāsā viya. Vivaṭakaraṇatāya oṭṭhe aphusāpetvā uccāretabbato sabbaniroṭṭhabyañjanā vā kirātabhāsā viya. Sabbasseva vissajjanīyayuttatāya sabbavissaṭṭhabyañjanāvā yavanabhāsā viya. Sabbasseva sānusāratāya sabbaniggahitabyañjanā vā pārasikādimilakkhabhāsā viya. Sabbāpesā byañjanekadesavaseneva pavattiyā aparipuṇṇabyañjanāti katvā ‘‘abyañjanā’’ti vuttā.
ཋཱནཀརཎཱནི སིཐིལཱནི ཀཏྭཱ ཨུཙྩཱརེཏབྦཾ ཨཀྑརཾ པཉྩསུ ཝགྒེསུ པཋམཏཏིཡནྟི ཨེཝམཱདི སིཐིལཾ། ཏཱནི ཨསིཐིལཱནི ཀཏྭཱ ཨུཙྩཱརེཏབྦཾ ཨཀྑརཾ ཝགྒེསུ དུཏིཡཙཏུཏྠནྟི ཨེཝམཱདི དྷནིཏཾ། དྭིམཏྟཀཱལཾ དཱིགྷཾ། ཨེཀམཏྟཀཱལཾ རསྶཾ། ཏདེཝ ལཧུཀཾ ལཧུཀམེཝ། སཾཡོགཔརཾ དཱིགྷཉྩ གརུཀཾ། ཋཱནཀརཎཱནི ནིགྒཧེཏྭཱ ཨུཙྩཱརེཏབྦཾ ནིགྒཧིཏཾ། པརེན སམྦནྡྷཾ ཀཏྭཱ ཨུཙྩཱརེཏབྦཾ སམྦནྡྷཾ། ཏཐཱ ན སམྦནྡྷཾ ཝཝཏྠིཏཾ། ཋཱནཀརཎཱནི ཝིསྶཊྛཱནི ཀཏྭཱ ཨུཙྩཱརེཏབྦཾ ཝིམུཏྟཾ། དསདྷཱ བྱཉྫནབུདྡྷིཡཱ པབྷེདོཏི ཨེཝཾ སིཐིལཱདིཝསེན བྱཉྫནབུདྡྷིཡཱ ཨཀྑརུཔྤཱདཀཙིཏྟསྶ དསཔྤཀཱརེན པབྷེདོ། སབྦཱནི ཧི ཨཀྑརཱནི ཙིཏྟསམུཊྛཱནཱནི ཡཐཱདྷིཔྤེཏཏྠབྱཉྫནཏོ བྱཉྫནཱནི ཙ།
Ṭhānakaraṇāni sithilāni katvā uccāretabbaṃ akkharaṃ pañcasu vaggesu paṭhamatatiyanti evamādi sithilaṃ. Tāni asithilāni katvā uccāretabbaṃ akkharaṃ vaggesu dutiyacatutthanti evamādi dhanitaṃ. Dvimattakālaṃ dīghaṃ. Ekamattakālaṃ rassaṃ. Tadeva lahukaṃ lahukameva. Saṃyogaparaṃ dīghañca garukaṃ. Ṭhānakaraṇāni niggahetvā uccāretabbaṃ niggahitaṃ. Parena sambandhaṃ katvā uccāretabbaṃ sambandhaṃ. Tathā na sambandhaṃ vavatthitaṃ. Ṭhānakaraṇāni vissaṭṭhāni katvā uccāretabbaṃ vimuttaṃ. Dasadhā byañjanabuddhiyā pabhedoti evaṃ sithilādivasena byañjanabuddhiyā akkharuppādakacittassa dasappakārena pabhedo. Sabbāni hi akkharāni cittasamuṭṭhānāni yathādhippetatthabyañjanato byañjanāni ca.
ཨམཀྑེཏྭཱཏི ཨམིལེཙྪེཏྭཱ, ཨཝིནཱསེཏྭཱ, ཨཧཱཔེཏྭཱཏི ཨཏྠོ། བྷགཝཱ ཡམཏྠཾ ཉཱཔེཏུཾ ཨེཀགཱཐཾ ཨེཀཝཱཀྱམྤི དེསེཏི, ཏམཏྠཾ ཏཱཡ དེསནཱཡ པརིམཎྜལཔདབྱཉྫནཱཡ ཨེཝ དེསེཏཱིཏི ཨཱཧ ‘‘པརིཔུཎྞབྱཉྫནམེཝ ཀཏྭཱ དྷམྨཾ དེསེཏཱི’’ཏི། ཨིདྷ ཀེཝལསདྡོ ཨནཝསེསཝཱཙཀོ, ན ཨཝོམིསྶཏཱདིཝཱཙཀོཏི ཨཱཧ ‘‘སཀལཱདྷིཝཙན’’ནྟི། པརིཔུཎྞནྟི སབྦསོ པུཎྞཾ། ཏཾ པན ཀིཉྩི ཨཱུནཾ ཝཱ ཨདྷིཀཾ ཝཱ ན ཧོཏཱིཏི ‘‘ཨནཱུནཱདྷིཀཝཙན’’ནྟི ཝུཏྟཾ། ཏཏྠ ཡདཏྠཾ དེསིཏཾ, ཏསྶ སཱདྷཀཏྟཱ ཨནཱུནཏཱ ཝེདིཏབྦཱ, ཏབྦིདྷུརསྶ པན ཨསཱདྷཀཏྟཱ ཨནདྷིཀཏཱ། སཀལནྟི སབྦབྷཱགཝནྟཾ། པརིཔུཎྞམེཝཱཏི སབྦསོ པརིཔུཎྞམེཝ། ཏེནཱཧ ‘‘ཨེཀདེསནཱཔི ཨཔརིཔུཎྞཱ ནཏྠཱི’’ཏི། ཨཔརིསུདྡྷཱ དེསནཱ ནཱམ ཧོཏི ཏཎྷཱསཾཀིལེསཏྟཱ། ལོཀཱམིསཾ ཙཱིཝརཱདཡོ པཙྩཡཱ, ཏཏྠ ཨགདྷིཏཙིཏྟཏཱཡ ལོཀཱམིསནིརཔེཀྑོ། ཧིཏཕརཎེནཱཏི ཧིཏཱུཔསཾཧརཎེན། མེཏྟཱབྷཱཝནཱཡ མུདུཧདཡོཏི མེཏྟཱབྷཱཝནཱཡ ཀརུཎཱཡ ཝཱ མུདུཧདཡོ། ཨུལླུམྤནསབྷཱཝསཎྛིཏེནཱཏི སཀལསཾཀིལེསཏོ ཝཊྚདུཀྑཏོ ཙ ཨུདྡྷརཎཱཀཱརཱཝཊྛིཏེན ཙིཏྟེན, ཀརུཎཱདྷིཔྤཱཡེནཱཏི ཨཏྠོ། ཏསྨཱཏི ཡསྨཱ སིཀྑཏྟཡསངྒཧཾ སཀལཾ སཱསནཾ ཨིདྷ བྲཧྨཙརིཡནྟི ཨདྷིཔྤེཏཾ, ཏསྨཱ། བྲཧྨཙརིཡནྟི ཨིམིནཱ སམཱནཱདྷིཀརཎཱནི སབྦཔདཱནི ཡོཛེཏྭཱ ཨཏྠཾ དསྶེནྟོ ‘‘སོ དྷམྨཾ དེསེཏི…པེ॰… པཀཱསེཏཱིཏི ཨེཝམེཏྠ ཨཏྠོ དཊྛབྦོ’’ཏི ཨཱཧ།
Amakkhetvāti amilecchetvā, avināsetvā, ahāpetvāti attho. Bhagavā yamatthaṃ ñāpetuṃ ekagāthaṃ ekavākyampi deseti, tamatthaṃ tāya desanāya parimaṇḍalapadabyañjanāya eva desetīti āha ‘‘paripuṇṇabyañjanameva katvā dhammaṃ desetī’’ti. Idha kevalasaddo anavasesavācako, na avomissatādivācakoti āha ‘‘sakalādhivacana’’nti. Paripuṇṇanti sabbaso puṇṇaṃ. Taṃ pana kiñci ūnaṃ vā adhikaṃ vā na hotīti ‘‘anūnādhikavacana’’nti vuttaṃ. Tattha yadatthaṃ desitaṃ, tassa sādhakattā anūnatā veditabbā, tabbidhurassa pana asādhakattā anadhikatā. Sakalanti sabbabhāgavantaṃ. Paripuṇṇamevāti sabbaso paripuṇṇameva. Tenāha ‘‘ekadesanāpi aparipuṇṇā natthī’’ti. Aparisuddhā desanā nāma hoti taṇhāsaṃkilesattā. Lokāmisaṃ cīvarādayo paccayā, tattha agadhitacittatāya lokāmisanirapekkho. Hitapharaṇenāti hitūpasaṃharaṇena. Mettābhāvanāya muduhadayoti mettābhāvanāya karuṇāya vā muduhadayo. Ullumpanasabhāvasaṇṭhitenāti sakalasaṃkilesato vaṭṭadukkhato ca uddharaṇākārāvaṭṭhitena cittena, karuṇādhippāyenāti attho. Tasmāti yasmā sikkhattayasaṅgahaṃ sakalaṃ sāsanaṃ idha brahmacariyanti adhippetaṃ, tasmā. Brahmacariyanti iminā samānādhikaraṇāni sabbapadāni yojetvā atthaṃ dassento ‘‘so dhammaṃ deseti…pe… pakāsetīti evamettha attho daṭṭhabbo’’ti āha.
སུནྡརནྟི བྷདྡཀཾ། བྷདྡཀཏཱ ཙ པསྶནྟསྶ ཧིཏསུཁཱཝཧབྷཱཝེན ཝེདིཏབྦཱཏི ཨཱཧ ‘‘ཨཏྠཱཝཧཾ སུཁཱཝཧ’’ནྟི། ཏཏྠ ཨཏྠཱཝཧནྟི དིཊྛདྷམྨིཀསམྤརཱཡིཀཔརམཏྠསཾཧིཏཧིཏཱཝཧཾ། སུཁཱཝཧནྟི ཡཐཱཝུཏྟཏིཝིདྷསུཁཱཝཧཾ། ཏཐཱནུརཱུཔཱནནྟི ཏཱདིསཱནཾ། ཡཱདིསེཧི པན གུཎེཧི བྷགཝཱ སམནྣཱགཏོ, ཏེཧི ཙཏུཔྤམཱཎིཀསྶ ལོཀསྶ སབྦཐཱཔི ཨཙྩནྟཔྤསཱདནཱིཡོ ཏེསཾ ཡཐཱབྷཱུཏསབྷཱཝཏྟཱཏི དསྶེནྟོ ‘‘ཡཐཱརཱུཔོ’’ཏིཨཱདིམཱཧ། ཏཏྠ ཡཐཱབྷཱུཏ…པེ॰… ཨརཧཏནྟི ཨིམིནཱ དྷམྨཔྤམཱཎལཱུཁཔྤམཱཎཱནཾ སཏྟཱནཾ བྷགཝཏོ པསཱདཱཝཧཏཱ དསྶིཏཱ, ཨིཏརེན ཨིཏརེསཾ། དསྶནམཏྟམྤི སཱདྷུ ཧོཏཱིཏི ཨེཏྠ ཀོསིཡཝཏྠུ ཀཐེཏབྦཾ། ཨུབྷཏོཔཀྑིཀཱཏི མིཙྪཱདིཊྛིསམྨཱདིཊྛིཝསེན ཨུབྷཡཔཀྑིཀཱ། ཀེརཱཊིཀཱཏི སཋཱ།
Sundaranti bhaddakaṃ. Bhaddakatā ca passantassa hitasukhāvahabhāvena veditabbāti āha ‘‘atthāvahaṃ sukhāvaha’’nti. Tattha atthāvahanti diṭṭhadhammikasamparāyikaparamatthasaṃhitahitāvahaṃ. Sukhāvahanti yathāvuttatividhasukhāvahaṃ. Tathānurūpānanti tādisānaṃ. Yādisehi pana guṇehi bhagavā samannāgato, tehi catuppamāṇikassa lokassa sabbathāpi accantappasādanīyo tesaṃ yathābhūtasabhāvattāti dassento ‘‘yathārūpo’’tiādimāha. Tattha yathābhūta…pe… arahatanti iminā dhammappamāṇalūkhappamāṇānaṃ sattānaṃ bhagavato pasādāvahatā dassitā, itarena itaresaṃ. Dassanamattampi sādhu hotīti ettha kosiyavatthu kathetabbaṃ. Ubhatopakkhikāti micchādiṭṭhisammādiṭṭhivasena ubhayapakkhikā. Kerāṭikāti saṭhā.
ཨནེཀཏྠཏྟཱ ནིཔཱཏཱནཾ ཡཱཝཉྩིདནྟི ནིཔཱཏསམུདཱཡོ ཨདྷིམཏྟཔྤམཱཎཔརིཙྪེདཾ དཱིཔེཏཱིཏི ཨཱཧ ‘‘ཨདྷིམཏྟཔྤམཱཎཔརིཙྪེདཝཙནམེཏ’’ནྟི། ཨདྷིམཏྟཝིཔྤསནྣཱནཱིཏི ཨདྷིཀཔྤམཱཎེན ཝིཔྤསནྣཱནི། ཝིཔྤསནྣཱནཱིཏི ཙ པཀཏིཨཱཀཱརཾ ཨཏིཀྐམིཏྭཱ ཝིཔྤསནྣཱནཱིཏི ཨཏྠོ། ནནུ ཙ ཙཀྑཱདཱིནཾ ཨིནྡྲིཡཱནཾ མནོཝིཉྙེཡྻཏྟཱ ཀཐཾ ཏེན ཏེསཾ ཝིཔྤསནྣཏཱ ཝིཉྙཱཡཏཱིཏི ཨཱཧ ‘‘ཏསྶ ཧཱི’’ཏིཨཱདི། ཏསྶཱཏི བྲཱཧྨཎསྶ། ཏེསནྟི ཙཀྑཱདཱིནཾ པཉྩནྣཾ ཨིནྡྲིཡཱནཾ། ཨེཝམྤི མནིནྡྲིཡེན པཏིཊྛིཏོཀཱསསྶ ཨདིཊྛཏྟཱ ཀཐཾ མནིནྡྲིཡསྶ ཝིཔྤསནྣཏཱ ཏེན ཝིཉྙཱཡཏཱིཏི ཨཱཧ ‘‘ཡསྨཱ པནཱ’’ཏིཨཱདི། ནཡགྒཱཧཔཉྙཱ ཧེསཱ ཏསྶ བྲཱཧྨཎསྶ། མནེ ཝིཔྤསནྣེཡེཝ ཧོཏི པསནྣཙིཏྟསམུཊྛིཏརཱུཔསམྤདཱཧི ཨེཝ ཙཀྑཱདཱིནཾ པཏིཊྛིཏོཀཱསསྶ པསནྣཏཱསམྦྷཝཏོ།
Anekatthattā nipātānaṃ yāvañcidanti nipātasamudāyo adhimattappamāṇaparicchedaṃ dīpetīti āha ‘‘adhimattappamāṇaparicchedavacanameta’’nti. Adhimattavippasannānīti adhikappamāṇena vippasannāni. Vippasannānīti ca pakatiākāraṃ atikkamitvā vippasannānīti attho. Nanu ca cakkhādīnaṃ indriyānaṃ manoviññeyyattā kathaṃ tena tesaṃ vippasannatā viññāyatīti āha ‘‘tassa hī’’tiādi. Tassāti brāhmaṇassa. Tesanti cakkhādīnaṃ pañcannaṃ indriyānaṃ. Evampi manindriyena patiṭṭhitokāsassa adiṭṭhattā kathaṃ manindriyassa vippasannatā tena viññāyatīti āha ‘‘yasmā panā’’tiādi. Nayaggāhapaññā hesā tassa brāhmaṇassa. Mane vippasanneyeva hoti pasannacittasamuṭṭhitarūpasampadāhi eva cakkhādīnaṃ patiṭṭhitokāsassa pasannatāsambhavato.
ཛམྦོནདསུཝཎྞཾ རཏྟཝཎྞམེཝ ཧོཏཱིཏི ཨཱཧ ‘‘སུརཏྟཝཎྞསྶཱ’’ཏི། ཛམྦོནདསུཝཎྞསྶ གྷཊིཀཱཏི ཛམྦོནདསུཝཎྞཔིཎྜཾ། ཨིམིནཱ ནེཀྑནྟི ནེཀྑཔྤམཱཎཛམྦོནདསུཝཎྞེན ཀཏཾ ཨཀཏབྷཎྜཾ ཝུཏྟནྟི དསྶེཏི། ནེཀྑནྟི ཝཱ ཨཏིརེཀཔཉྩསུཝཎྞེན ཀཏཔིལནྡྷནཾ ཀཏབྷཎྜཾ ཝུཏྟཾ། ཏཉྷི གྷཊྚནམཛྫནཀྑམཾ ཧོཏཱིཏི། སུཝཎྞནྟི ཙ པཉྩདྷརཎསྶ སམཉྙཱ, ཏསྨཱ པཉྩཝཱིསཏིདྷརཎཧིརཉྙཝིཙིཏཾ ཨཱབྷརཎཾ ཨིདྷ ནེཀྑནྟི ཨདྷིཔྤེཏཾ། ཛམྦོནདནྟི མཧཱཛམྦུསཱཁཱཡ པཝཏྟནདིཡཾ ནིབྦཏྟཾ། ཏཾ ཀིར རཏནཾ རཏྟཾ། སུཝཎྞཱཀཱརེ མཧཱཛམྦུཕལརསེ ཝཱ པཐཝིཡཾ པཝིཊྛེ སུཝཎྞངྐུརཱ ཨུཊྛཧནྟི, ཏེན སུཝཎྞེན ཀཏཔིལནྡྷནནྟིཔི ཨཏྠོ། སུཔརིཀམྨཀཏནྟི སུཊྛུ ཀཏཔརིཀམྨཾ། སམྤཧཊྛནྟི སམྨཱ པཧཊྛཾ གྷཊྚནཱདིཝསེན སུཀཏཔརིཀམྨཾ། ཏེནཱཧ ‘‘སུཝཎྞཀཱར…པེ॰… སུཔརིམཛྫིཏནྟི ཨཏྠོ’’ཏི།
Jambonadasuvaṇṇaṃ rattavaṇṇameva hotīti āha ‘‘surattavaṇṇassā’’ti. Jambonadasuvaṇṇassa ghaṭikāti jambonadasuvaṇṇapiṇḍaṃ. Iminā nekkhanti nekkhappamāṇajambonadasuvaṇṇena kataṃ akatabhaṇḍaṃ vuttanti dasseti. Nekkhanti vā atirekapañcasuvaṇṇena katapilandhanaṃ katabhaṇḍaṃ vuttaṃ. Tañhi ghaṭṭanamajjanakkhamaṃ hotīti. Suvaṇṇanti ca pañcadharaṇassa samaññā, tasmā pañcavīsatidharaṇahiraññavicitaṃ ābharaṇaṃ idha nekkhanti adhippetaṃ. Jambonadanti mahājambusākhāya pavattanadiyaṃ nibbattaṃ. Taṃ kira ratanaṃ rattaṃ. Suvaṇṇākāre mahājambuphalarase vā pathaviyaṃ paviṭṭhe suvaṇṇaṅkurā uṭṭhahanti, tena suvaṇṇena katapilandhanantipi attho. Suparikammakatanti suṭṭhu kataparikammaṃ. Sampahaṭṭhanti sammā pahaṭṭhaṃ ghaṭṭanādivasena sukataparikammaṃ. Tenāha ‘‘suvaṇṇakāra…pe… suparimajjitanti attho’’ti.
ཝཱལ༹རཱུཔཱནཱིཏི ཨཱཧརིམཱནི ཝཱལ༹རཱུཔཱནི། ‘‘ཨཀཔྤིཡརཱུཔཱཀུལོ ཨཀཔྤིཡམཉྩོ པལླངྐོཏི སཱརསམཱསེ། རཏནཙིཏྲནྟི བྷིཏྟིཙྪེདཱདིཝསེན རཏནཙིཏྲཾ། རུཀྑཏཱུལལཏཱཏཱུལཔོཊཀིཏཱུལཱནཾ ཝསེན ཏིཎྞཾ ཏཱུལཱནཾ། ཨུདྡལོམིཡཾ ཀེཙཱིཏི སཱརསམཱསཱཙརིཡཱ ཨུཏྟརཝིཧཱརིནོ ཙ། ཏཐཱ ཨེཀནྟལོམིཡཾ། ཀོསེཡྻཀཊྚིསྶམཡནྟི ཀོསེཡྻཀསཊམཡཾ། ཨཛིནཙམྨེཧཱིཏི ཨཛིནམིགཙམྨེཧི། ཏཱནི ཀིར ཙམྨཱནི སུཁུམཏརཱནི། ཏསྨཱ དུཔཊྚཏིཔཊྚཱནི ཀཏྭཱ སིབྦནྟི། ཏེན ཝུཏྟཾ ‘‘ཨཛིནཔྤཝེཎཱི’’ཏིཨཱདི།
Vāḷarūpānīti āharimāni vāḷarūpāni. ‘‘Akappiyarūpākulo akappiyamañco pallaṅkoti sārasamāse. Ratanacitranti bhitticchedādivasena ratanacitraṃ. Rukkhatūlalatātūlapoṭakitūlānaṃ vasena tiṇṇaṃ tūlānaṃ. Uddalomiyaṃ kecīti sārasamāsācariyā uttaravihārino ca. Tathā ekantalomiyaṃ. Koseyyakaṭṭissamayanti koseyyakasaṭamayaṃ. Ajinacammehīti ajinamigacammehi. Tāni kira cammāni sukhumatarāni. Tasmā dupaṭṭatipaṭṭāni katvā sibbanti. Tena vuttaṃ ‘‘ajinappaveṇī’’tiādi.
ནིཀཱམལཱབྷཱིཏི ཡཐིཙྪིཏལཱབྷཱི། ཏེནཱཧ ‘‘ཨིཙྪིཏིཙྪིཏལཱབྷཱི’’ཏི། ཝིཔུལལཱབྷཱིཏི ཨུལཱ༹རལཱབྷཱི། ཀསིརནྟི ཧི པརིཏྟཾ ཝུཙྩཏི, ཏཔྤཊིཀྑེཔེན ཨཀསིརཾ ཨུལཱ༹རཾ། ཏེནཱཧ ‘‘མཧནྟལཱབྷཱི’’ཏིཨཱདི།
Nikāmalābhīti yathicchitalābhī. Tenāha ‘‘icchiticchitalābhī’’ti. Vipulalābhīti uḷāralābhī. Kasiranti hi parittaṃ vuccati, tappaṭikkhepena akasiraṃ uḷāraṃ. Tenāha ‘‘mahantalābhī’’tiādi.
ལདྡྷཱ ཙ ན ཀཔྤནྟཱིཏི སཱམཉྙེན པཊིསིདྡྷཏྟཱ སབྦཐཱ ན ཀཔྤཏཱིཏི ཀསྶཙི ཨཱསངྐཱ སིཡཱ, ཏནྣིཝཏྟནཏྠཾ ‘‘ཀིཉྩི ཀིཉྩི ཀཔྤཏཱི’’ཏིཨཱདིམཱཧ། ཏཏྠ སུདྡྷཀོསེཡྻནྟི རཏནཔརིསིབྦནརཧིཏཾ། ཨེཏྠ ཙ ‘‘སུདྡྷཀོསེཡྻཾ པན ཝཊྚཏཱི’’ཏི ཝིནཡེ (མཧཱཝ॰ ཨཊྛ॰ ༢༥༤) ཝུཏྟཏྟཱ ཨིདྷཱཔི ཨེཏྟཀམེཝ ཝུཏྟཾ། དཱིགྷནིཀཱཡཊྛཀཐཱཡཾ (དཱི॰ ནི॰ ཨཊྛ॰ ༡.༡༥) པན ‘‘ཋཔེཏྭཱ ཏཱུལིཀཾ སབྦཱནེཝ གོནཀཱདཱིནི རཏནཔརིསིབྦིཏཱནི ན ཝཊྚནྟཱི’’ཏི ཝུཏྟཾ། ཏཏྠ ‘‘ཋཔེཏྭཱ ཏཱུལིཀ’’ནྟི ཨེཏེན རཏནསིབྦནརཧིཏཱཔཱི ཏཱུལིཀཱ ན ཝཊྚཏཱིཏི དཱིཔེཏི། ཝཙནཏོཏི ཨེཏེན ཝིནཡེ (ཙཱུལ༹ཝ॰ ༢༩༧) ཝུཏྟབྷཱཝཾ དསྶེཏི། ཨེཀེན ཝིདྷཱནེནཱཏི ཡཐཱཝུཏྟམེཝ ཝིདྷཱནཾ སནྡྷཱཡ ཝདཏི། ཡདི ཨེཝཾ ཀསྨཱ བྷགཝཏཱ ‘‘ལདྡྷཱ ཙ ན ཀཔྤནྟཱི’’ཏི སཱམཉྙེན པཊིསེདྷོ ཀཏོཏི ཨཱཧ ‘‘ཨཀཔྤིཡཾ པན ཨུཔཱདཱཡཱ’’ཏིཨཱདི།
Laddhā ca na kappantīti sāmaññena paṭisiddhattā sabbathā na kappatīti kassaci āsaṅkā siyā, tannivattanatthaṃ ‘‘kiñci kiñci kappatī’’tiādimāha. Tattha suddhakoseyyanti ratanaparisibbanarahitaṃ. Ettha ca ‘‘suddhakoseyyaṃ pana vaṭṭatī’’ti vinaye (mahāva. aṭṭha. 254) vuttattā idhāpi ettakameva vuttaṃ. Dīghanikāyaṭṭhakathāyaṃ (dī. ni. aṭṭha. 1.15) pana ‘‘ṭhapetvā tūlikaṃ sabbāneva gonakādīni ratanaparisibbitāni na vaṭṭantī’’ti vuttaṃ. Tattha ‘‘ṭhapetvā tūlika’’nti etena ratanasibbanarahitāpī tūlikā na vaṭṭatīti dīpeti. Vacanatoti etena vinaye (cūḷava. 297) vuttabhāvaṃ dasseti. Ekena vidhānenāti yathāvuttameva vidhānaṃ sandhāya vadati. Yadi evaṃ kasmā bhagavatā ‘‘laddhā ca na kappantī’’ti sāmaññena paṭisedho katoti āha ‘‘akappiyaṃ pana upādāyā’’tiādi.
པལླངྐནྟི ཨེཏྠ པརི-སདྡོ སམནྟཏོཏི ཨེཏསྨིཾ ཨཏྠེ ཝཏྟཏི, ཏསྨཱ ཝཱམཱུརུཾ དཀྑིཎཱུརུཉྩ སམཾ ཋཔེཏྭཱ ཨུབྷོ པཱདེ ཨཉྙམཉྙསམྦནྡྷེ ཀཏྭཱ ནིསཛྫཱ པལླངྐནྟི ཨཱཧ ‘‘སམནྟཏོ ཨཱུརུབདྡྷཱསན’’ནྟི། ཨཱུརཱུནཾ བནྡྷནཝསེན ནིསཛྫཱ། པལླངྐཾ ཨཱབྷུཛིཏྭཱཏི ཙ ཡཐཱ པལླངྐཝསེན ནིསཛྫཱ ཧོཏི, ཨེཝཾ ཨུབྷོ པཱདེ ཨཱབྷུཛེ སམིཉྫིཏེ ཀཏྭཱཏི ཨཏྠོ། ཏཾ པན ཨུབྷིནྣཾ པཱདཱནཾ ཏཐཱ སམྦནྡྷཏཱཀརཎནྟི ཨཱཧ ‘‘བནྡྷིཏྭཱ’’ཏི། ཨུཛུཾ ཀཱཡཾ པཎིདྷཱཡཱཏི ཨུཔརིམཾ སརཱིརཾ ཨུཛུཀཾ ཋཔེཏྭཱ ཨཊྛཱརས པིཊྛིཀཎྚཀེ ཀོཊིཡཱ ཀོཊིཾ པཊིཔཱདེཏྭཱ། ཨེཝཉྷི ནིསིནྣསྶ ཙམྨམཾསནྷཱརཱུནི ན པཎམནྟི། ཨཐསྶ ཡཱ ཏེསཾ པཎམནཔཙྩཡཱ ཁཎེ ཁཎེ ཝེདནཱ ཨུཔྤཛྫེཡྻུཾ, ཏཱ ན ཨུཔྤཛྫནྟི། ཏཱསུ ཨནུཔྤཛྫམཱནཱསུ ཙིཏྟཾ ཨེཀགྒཾ ཧོཏི, ཀམྨཊྛཱནཾ ན པརིཔཏཏི, ཝུདྡྷིཾ ཕཱཏིཾ གཙྪཏི། ཏེནཱཧ ‘‘ཨཊྛཱརས པིཊྛིཀཎྚཀེ’’ཏིཨཱདི། ཨུཛུཾ ཀཱཡཾ ཋཔེཏྭཱཏི ཨུཔརིམཾ ཀཱཡཾ ཨུཛུཀཾ ཋཔེཏྭཱ, ཨཡམེཝ ཝཱ པཱཋོ། ཧེཊྛིམཀཱཡསྶ ཧི ཨནུཛུཀཊྛཔནཾ ནིསཛྫཱཝཙནེནེཝ བོདྷིཏནྟི། ཨུཛུཾ ཀཱཡནྟི ཨེཏྠ ཀཱཡ-སདྡོ ཨུཔརིམཀཱཡཝིསཡོ།
Pallaṅkanti ettha pari-saddo samantatoti etasmiṃ atthe vattati, tasmā vāmūruṃ dakkhiṇūruñca samaṃ ṭhapetvā ubho pāde aññamaññasambandhe katvā nisajjā pallaṅkanti āha ‘‘samantato ūrubaddhāsana’’nti. Ūrūnaṃ bandhanavasena nisajjā. Pallaṅkaṃ ābhujitvāti ca yathā pallaṅkavasena nisajjā hoti, evaṃ ubho pāde ābhuje samiñjite katvāti attho. Taṃ pana ubhinnaṃ pādānaṃ tathā sambandhatākaraṇanti āha ‘‘bandhitvā’’ti. Ujuṃ kāyaṃ paṇidhāyāti uparimaṃ sarīraṃ ujukaṃ ṭhapetvā aṭṭhārasa piṭṭhikaṇṭake koṭiyā koṭiṃ paṭipādetvā. Evañhi nisinnassa cammamaṃsanhārūni na paṇamanti. Athassa yā tesaṃ paṇamanapaccayā khaṇe khaṇe vedanā uppajjeyyuṃ, tā na uppajjanti. Tāsu anuppajjamānāsu cittaṃ ekaggaṃ hoti, kammaṭṭhānaṃ na paripatati, vuddhiṃ phātiṃ gacchati. Tenāha ‘‘aṭṭhārasa piṭṭhikaṇṭake’’tiādi. Ujuṃ kāyaṃ ṭhapetvāti uparimaṃ kāyaṃ ujukaṃ ṭhapetvā, ayameva vā pāṭho. Heṭṭhimakāyassa hi anujukaṭṭhapanaṃ nisajjāvacaneneva bodhitanti. Ujuṃ kāyanti ettha kāya-saddo uparimakāyavisayo.
པརིམུཁནྟི ཨེཏྠ པརི-སདྡོ ཨབྷིསདྡེན སམཱནཏྠོཏི ཨཱཧ ‘‘ཀམྨཊྛཱནཱབྷིམུཁ’’ནྟི, བཧིདྡྷཱ པུཐུཏྟཱརམྨཎཏོ ནིཝཱརེཏྭཱ ཀམྨཊྛཱནཾཡེཝ པུརཀྑཏྭཱཏི ཨཏྠོ། ཨེཏྠ ཡཐཱ ‘‘ཝནནྟཉྙེཝ པཝིསཱམཱི’’ཏིཨཱདིནཱ བྷཱཝནཱནུརཱུཔཾ སེནཱསནཾ དསྶིཏཾ, ཨེཝཾ ‘‘ནིསཱིདཱམཱི’’ཏི ཨིམིནཱ ཨལཱིནཱནུདྡྷཙྩཔཀྑིཡོ སནྟོ ཨིརིཡཱཔཐོ དསྶིཏོ, ‘‘པལླངྐཾ ཨཱབྷུཛིཏྭཱ’’ཏི ཨིམིནཱ ནིསཛྫཱཡ དལ༹ྷབྷཱཝོ, ‘‘པརིམུཁཾ སཏིཾ ཨུཔཊྛཔེཏྭཱ’’ཏི ཨིམིནཱ ཨཱརམྨཎཔརིགྒཧཱུཔཱཡོ། པརིགྒཧིཏནིཡྻཱནནྟི སབྦཐཱ གཧིཏཱསམྨོསཾ པརིཙྩཏྟསམྨོསཾ སཏིཾ ཀཏྭཱ, པརམསཏིནེཔཀྐཾ ཨུཔཊྛཔེཏྭཱཏི ཨཏྠོ། པརཱིཏི པརིགྒཧཊྛོ ‘‘པརིཎཱཡིཀཱ’’ཏིཨཱདཱིསུ (དྷ॰ ས॰ ༡༦.༢༠) ཝིཡ། མུཁནྟི ནིཡྻཱནཊྛོ ‘‘སུཉྙཏཝིམོཀྑ’’ནྟིཨཱདཱིསུ (པཊི॰ མ॰ ༡.༢༠༩-༢༡༠) ཝིཡ། པཊིཔཀྑཏོ ནིགྒམནཊྛོ ཧི ནིཡྻཱནཊྛོ།
Parimukhanti ettha pari-saddo abhisaddena samānatthoti āha ‘‘kammaṭṭhānābhimukha’’nti, bahiddhā puthuttārammaṇato nivāretvā kammaṭṭhānaṃyeva purakkhatvāti attho. Ettha yathā ‘‘vanantaññeva pavisāmī’’tiādinā bhāvanānurūpaṃ senāsanaṃ dassitaṃ, evaṃ ‘‘nisīdāmī’’ti iminā alīnānuddhaccapakkhiyo santo iriyāpatho dassito, ‘‘pallaṅkaṃ ābhujitvā’’ti iminā nisajjāya daḷhabhāvo, ‘‘parimukhaṃ satiṃ upaṭṭhapetvā’’ti iminā ārammaṇapariggahūpāyo. Pariggahitaniyyānanti sabbathā gahitāsammosaṃ pariccattasammosaṃ satiṃ katvā, paramasatinepakkaṃ upaṭṭhapetvāti attho. Parīti pariggahaṭṭho ‘‘pariṇāyikā’’tiādīsu (dha. sa. 16.20) viya. Mukhanti niyyānaṭṭho ‘‘suññatavimokkha’’ntiādīsu (paṭi. ma. 1.209-210) viya. Paṭipakkhato niggamanaṭṭho hi niyyānaṭṭho.
ཙཏྟཱརི རཱུཔཱཝཙརཛ྄ཛྷཱནཱནི དིབྦབྷཱཝཱཝཧཏྟཱ དིབྦཝིཧཱརཱ ནཱམ ཧོནྟཱིཏི ཏདཱསནྣཔྤཝཏྟཙངྐམོཔི ཏདུཔཙཱརཏོ དིབྦོ ནཱམ ཧོཏཱིཏི ཨཱཧ ‘‘ཙཏྟཱརི ཧི རཱུཔཛ྄ཛྷཱནཱནཱི’’ཏིཨཱདི། སམཱཔཛྫིཏྭཱ ཙངྐམནྟསྶཱཏི ཨིདཉྩ ཙངྐམནྟསྶ ཨནྟརནྟརཱ སམཱཔཏྟིཾ སམཱཔཛྫིཏྭཱ ཨུཊྛཱཡུཊྛཱཡ ཙངྐམནཾ སནྡྷཱཡ ཝུཏྟཾ། ན ཧི སམཱཔཏྟིཾ སམཱཔཛྫིཏྭཱ ཨཝུཊྛིཏེན སཀྐཱ ཙངྐམིཏུཾ། སམཱཔཏྟིཏོ ཝུཊྛཱཡ ཙངྐམནྟསྶཔི ཙངྐམོཏི ཨིདཾ པན སམཱཔཏྟིཏོ ཝུཊྛཧིཏྭཱ ཨནྟརནྟརཱ སམཱཔཛྫིཏྭཱ ཙངྐམནྟསྶ ཝསེན ཝུཏྟཾ། དྭཱིསུ ཝིཧཱརེསཱུཏི བྲཧྨཝིཧཱརེ, ཨརིཡཝིཧཱརེ ཙ། མེཏྟཱཛྷཱནཱདཡོ ཧིཏཱུཔསཾཧཱརཱདིཝསེན པཝཏྟིཡཱ བྲཧྨབྷཱུཏཱ སེཊྛབྷཱུཏཱ ཝིཧཱརཱཏི བྲཧྨཝིཧཱརཱ། ཨནཉྙསཱདྷཱརཎཏྟཱ པན ཨརིཡཱནཾ ཝིཧཱརཱཏི ཨརིཡཝིཧཱརཱ, ཙཏསྶོཔི ཕལསམཱཔཏྟིཡོ། ཨིདྷ པན ཨརཧཏྟཕལསམཱཔཏྟིཡེཝ ཨཱགཏཱ།
Cattāri rūpāvacarajjhānāni dibbabhāvāvahattā dibbavihārā nāma hontīti tadāsannappavattacaṅkamopi tadupacārato dibbo nāma hotīti āha ‘‘cattāri hi rūpajjhānānī’’tiādi. Samāpajjitvā caṅkamantassāti idañca caṅkamantassa antarantarā samāpattiṃ samāpajjitvā uṭṭhāyuṭṭhāya caṅkamanaṃ sandhāya vuttaṃ. Na hi samāpattiṃ samāpajjitvā avuṭṭhitena sakkā caṅkamituṃ. Samāpattito vuṭṭhāya caṅkamantassapi caṅkamoti idaṃ pana samāpattito vuṭṭhahitvā antarantarā samāpajjitvā caṅkamantassa vasena vuttaṃ. Dvīsuvihāresūti brahmavihāre, ariyavihāre ca. Mettājhānādayo hitūpasaṃhārādivasena pavattiyā brahmabhūtā seṭṭhabhūtā vihārāti brahmavihārā. Anaññasādhāraṇattā pana ariyānaṃ vihārāti ariyavihārā, catassopi phalasamāpattiyo. Idha pana arahattaphalasamāpattiyeva āgatā.
པཙྩཝེཀྑཎཱཡ ཕལསམཱཔཏྟི ཀཐིཏཱ སམཱཔཏྟིཾ སམཱཔཛྫིཏྭཱ ཝུཊྛིཏསྶ པཙྩཝེཀྑཎཱསམྦྷཝཏོ། ཙངྐམཱདཡོཏི ཕལསམཱཔཏྟིཾ སམཱཔནྣསྶཔི སམཱཔཏྟིཏོ ཝུཊྛིཏསྶཔི ཙངྐམཊྛཱནནིསཛྫཱདཡོ། ཨརིཡཙངྐམཱདཡོ ཧོནྟི ན པན པཙྩཝེཀྑནྟསྶཱཏི ཨདྷིཔྤཱཡོ།
Paccavekkhaṇāya phalasamāpatti kathitā samāpattiṃ samāpajjitvā vuṭṭhitassa paccavekkhaṇāsambhavato. Caṅkamādayoti phalasamāpattiṃ samāpannassapi samāpattito vuṭṭhitassapi caṅkamaṭṭhānanisajjādayo. Ariyacaṅkamādayo honti na pana paccavekkhantassāti adhippāyo.
ཝེནཱགཔུརསུཏྟཝཎྞནཱ ནིཊྛིཏཱ།
Venāgapurasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༣. ཝེནཱགཔུརསུཏྟཾ • 3. Venāgapurasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༣. ཝེནཱགཔུརསུཏྟཝཎྞནཱ • 3. Venāgapurasuttavaṇṇanā
