| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
4. வேபசித்திஸுத்தவண்ணனா
4. Vepacittisuttavaṇṇanā
250. சதுத்தே² வேபசித்தீதி ஸோ கிர அஸுரானங் ஸப்³ப³ஜெட்ட²கோ. யேனாதி நிபாதமத்தங் நந்தி ச. கண்ட²பஞ்சமேஹீதி த்³வீஸு ஹத்தே²ஸு பாதே³ஸு கண்டே² சாதி ஏவங் பஞ்சஹி ப³ந்த⁴னேஹி. தானி பன நளினஸுத்தங் விய மக்கடகஸுத்தங் விய ச சக்கு²ஸ்ஸாபாத²ங் ஆக³ச்ச²ந்தி, இரியாபத²ங் ருஜ்ஜ²ந்தி. தேஹி பன சித்தேனேவ ப³ஜ்ஜ²தி, சித்தேனேவ முச்சதி. அக்கோஸதீதி சோரோஸி பா³லோஸி மூள்ஹோஸி தே²னோஸி ஒட்டோ²ஸி கோ³ணோஸி க³த்³ரபோ⁴ஸி நேரயிகோஸி திரச்சா²னக³தோஸி, நத்தி² துய்ஹங் ஸுக³தி, து³க்³க³தியேவ துய்ஹங் பாடிகங்கா²தி இமேஹி த³ஸஹி அக்கோஸவத்தூ²ஹி அக்கோஸதி. பரிபா⁴ஸதீதி, ஜரஸக்க, ந த்வங் ஸப்³ப³காலங் ஜினிஸ்ஸஸி, யதா³ அஸுரானங் ஜயோ ப⁴விஸ்ஸதி, ததா³ தம்பி ஏவங் ப³ந்தி⁴த்வா அஸுரப⁴வனஸ்ஸ த்³வாரே நிபஜ்ஜாபெத்வா போதா²பெஸ்ஸாமீதி ஆதீ³னி வத்வா தஜ்ஜேதி. ஸக்கோ விஜிதவிஜயோ ந தங் மனஸி கரோதி, மஹாபடிக்³க³ஹணங் பனஸ்ஸ மத்த²கே விது⁴னந்தோ ஸுத⁴ம்மதே³வஸப⁴ங் பவிஸதி சேவ நிக்க²மதி ச. அஜ்ஜ²பா⁴ஸீதி ‘‘கிங் நு கோ² ஏஸ ஸக்கோ இமானி ப²ருஸவசனானி ப⁴யேன திதிக்க²தி, உதா³ஹு அதி⁴வாஸனக²ந்தியா ஸமன்னாக³தத்தா’’தி? வீமங்ஸந்தோ அபா⁴ஸி.
250. Catutthe vepacittīti so kira asurānaṃ sabbajeṭṭhako. Yenāti nipātamattaṃ nanti ca. Kaṇṭhapañcamehīti dvīsu hatthesu pādesu kaṇṭhe cāti evaṃ pañcahi bandhanehi. Tāni pana naḷinasuttaṃ viya makkaṭakasuttaṃ viya ca cakkhussāpāthaṃ āgacchanti, iriyāpathaṃ rujjhanti. Tehi pana citteneva bajjhati, citteneva muccati. Akkosatīti corosi bālosi mūḷhosi thenosi oṭṭhosi goṇosi gadrabhosi nerayikosi tiracchānagatosi, natthi tuyhaṃ sugati, duggatiyeva tuyhaṃ pāṭikaṅkhāti imehi dasahi akkosavatthūhi akkosati. Paribhāsatīti, jarasakka, na tvaṃ sabbakālaṃ jinissasi, yadā asurānaṃ jayo bhavissati, tadā tampi evaṃ bandhitvā asurabhavanassa dvāre nipajjāpetvā pothāpessāmīti ādīni vatvā tajjeti. Sakko vijitavijayo na taṃ manasi karoti, mahāpaṭiggahaṇaṃ panassa matthake vidhunanto sudhammadevasabhaṃ pavisati ceva nikkhamati ca. Ajjhabhāsīti ‘‘kiṃ nu kho esa sakko imāni pharusavacanāni bhayena titikkhati, udāhu adhivāsanakhantiyā samannāgatattā’’ti? Vīmaṃsanto abhāsi.
து³ப்³ப³ல்யா நோதி து³ப்³ப³லபா⁴வேன நு. படிஸங்யுஜேதி படிஸங்யுஜெய்ய படிப்ப²ரெய்ய. பபி⁴ஜ்ஜெய்யுந்தி விரஜ்ஜெய்யுங். பகுஜ்ஜெ²ய்யுந்திபி பாடோ². பரந்தி பச்சத்தி²கங். யோ ஸதோ உபஸம்மதீதி யோ ஸதிமா ஹுத்வா உபஸம்மதி, தஸ்ஸ உபஸமங்யேவாஹங் பா³லஸ்ஸ படிஸேத⁴னங் மஞ்ஞேதி அத்தோ². யதா³ நங் மஞ்ஞதீதி யஸ்மா தங் மஞ்ஞதி. அஜ்ஜா²ருஹதீதி அஜ்ஜொ²த்த²ரதி. கோ³வ பி⁴ய்யோ பலாயினந்தி யதா² கோ³யுத்³தே⁴ தாவதே³வ த்³வே கா³வோ யுஜ்ஜ²ந்தே கோ³க³ணோ ஓலோகெந்தோ திட்ட²தி, யதா³ பன ஏகோ பலாயதி, அத² நங் பலாயந்தங் ஸப்³போ³ கோ³க³ணோ பி⁴ய்யோ அஜ்ஜொ²த்த²ரதி. ஏவங் து³ம்மேதோ⁴ க²மந்தங் பி⁴ய்யோ அஜ்ஜொ²த்த²ரதீதி அத்தோ².
Dubbalyā noti dubbalabhāvena nu. Paṭisaṃyujeti paṭisaṃyujeyya paṭipphareyya. Pabhijjeyyunti virajjeyyuṃ. Pakujjheyyuntipi pāṭho. Paranti paccatthikaṃ. Yo sato upasammatīti yo satimā hutvā upasammati, tassa upasamaṃyevāhaṃ bālassa paṭisedhanaṃ maññeti attho. Yadā naṃ maññatīti yasmā taṃ maññati. Ajjhāruhatīti ajjhottharati. Gova bhiyyo palāyinanti yathā goyuddhe tāvadeva dve gāvo yujjhante gogaṇo olokento tiṭṭhati, yadā pana eko palāyati, atha naṃ palāyantaṃ sabbo gogaṇo bhiyyo ajjhottharati. Evaṃ dummedho khamantaṃ bhiyyo ajjhottharatīti attho.
ஸத³த்த²பரமாதி ஸகத்த²பரமா. க²ந்த்யா பி⁴ய்யோ ந விஜ்ஜதீதி தேஸு ஸகஅத்த²பரமேஸு அத்தே²ஸு க²ந்திதோ உத்தரிதரோ அஞ்ஞோ அத்தோ² ந விஜ்ஜதி. தமாஹு பரமங் க²ந்திந்தி யோ ப³லவா திதிக்க²தி, தஸ்ஸ தங் க²ந்திங் பரமங் ஆஹு. பா³லப³லங் நாம அஞ்ஞாணப³லங். தங் யஸ்ஸ ப³லங், அப³லமேவ தங் ப³லந்தி ஆஹு கதெ²ந்தீதி தீ³பேதி. த⁴ம்மகு³த்தஸ்ஸாதி த⁴ம்மேன ரக்கி²தஸ்ஸ, த⁴ம்மங் வா ரக்க²ந்தஸ்ஸ. படிவத்தாதி படிப்ப²ரித்வா வத்தா, படிப்ப²ரித்வா வா பா³லப³லந்தி வதெ³ய்யாபி, த⁴ம்மட்ட²ங் பன சாலேதுங் ஸமத்தோ² நாம நத்தி². தஸ்ஸேவ தேன பாபியோதி தேன கோதே⁴ன தஸ்ஸேவ புக்³க³லஸ்ஸ பாபங். கதரஸ்ஸ? யோ குத்³த⁴ங் படிகுஜ்ஜ²தி. திகிச்ச²ந்தானந்தி ஏகவசனே ப³ஹுவசனங், திகிச்ச²ந்தந்தி அத்தோ². ஜனா மஞ்ஞந்தீதி ஏவரூபங் அத்தனோ ச பரஸ்ஸ சாதி உபி⁴ன்னங் அத்த²ங் திகிச்ச²ந்தங் நிப்பா²தெ³ந்தங் புக்³க³லங் ‘‘அந்த⁴பா³லோ அய’’ந்தி அந்த⁴பா³லபுது²ஜ்ஜனாவ ஏவங் மஞ்ஞந்தி. த⁴ம்மஸ்ஸ அகோவிதா³தி சதுஸச்சத⁴ம்மே அசே²கா. இதா⁴தி இமஸ்மிங் ஸாஸனே. கோ²தி நிபாதமத்தங். சதுத்த²ங்.
Sadatthaparamāti sakatthaparamā. Khantyā bhiyyo na vijjatīti tesu sakaatthaparamesu atthesu khantito uttaritaro añño attho na vijjati. Tamāhu paramaṃ khantinti yo balavā titikkhati, tassa taṃ khantiṃ paramaṃ āhu. Bālabalaṃ nāma aññāṇabalaṃ. Taṃ yassa balaṃ, abalameva taṃ balanti āhu kathentīti dīpeti. Dhammaguttassāti dhammena rakkhitassa, dhammaṃ vā rakkhantassa. Paṭivattāti paṭippharitvā vattā, paṭippharitvā vā bālabalanti vadeyyāpi, dhammaṭṭhaṃ pana cāletuṃ samattho nāma natthi. Tasseva tena pāpiyoti tena kodhena tasseva puggalassa pāpaṃ. Katarassa? Yo kuddhaṃ paṭikujjhati. Tikicchantānanti ekavacane bahuvacanaṃ, tikicchantanti attho. Janā maññantīti evarūpaṃ attano ca parassa cāti ubhinnaṃ atthaṃ tikicchantaṃ nipphādentaṃ puggalaṃ ‘‘andhabālo aya’’nti andhabālaputhujjanāva evaṃ maññanti. Dhammassa akovidāti catusaccadhamme achekā. Idhāti imasmiṃ sāsane. Khoti nipātamattaṃ. Catutthaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. வேபசித்திஸுத்தங் • 4. Vepacittisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4. வேபசித்திஸுத்தவண்ணனா • 4. Vepacittisuttavaṇṇanā
