| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৪. ৰেপচিত্তিসুত্তৰণ্ণনা
4. Vepacittisuttavaṇṇanā
২৫০. ‘‘মহানুভাৰতায অসুরানং চিত্তৰেপনেন ৰেপচিত্তী’’তি ৰদন্তি। ইসীহি পন অভযং যাচিতে ‘‘ভযমেৰ দদামী’’তি ৰত্ৰা তেহি ‘‘অক্খযং হোতু তে ভয’’ন্তি অভিসপৰসেন ৰুত্তকালতো পট্ঠায ৰেপনচিত্ততায ‘‘ৰেপচিত্তী’’তি ৰুচ্চতি, যং লোকিযা ‘‘পুলোমো’’তি চ ৰদন্তি। নিপাতপদানিপি কানিচি অত্থৰিসেসজোতকানি হোন্তীতি আহ ‘‘নিপাতমত্ত’’ন্তি হেতুঅত্থাদীনমেত্থ অসম্ভৰতো। তন্তি সক্কং দেৰানমিন্দং। কণ্ঠে পঞ্চমেহীতি কণ্ঠবন্ধনপঞ্চমেহি, ৰিভত্তিঅলোপেন নিদ্দেসো। চিত্তেনেৰাতি ‘‘ইমং বন্ধামি, অযং বজ্ঝতূ’’তি উপ্পন্নচিত্তেনেৰ। বজ্ঝতি বদ্ধো হোতি, অযং দেৰানুভাৰো। মুচ্চতীতি এত্থাপি এসেৰ নযো। দসহীতি ‘‘চোরোসী’’তিআদিনা ইধ ৰুত্তেহি দসহি। তেনাহ ‘‘ইমেহী’’তি। নিব্বত্তিত্ৰা চিরকালতং উপাদায খুংসনৰসেন ৰদতি ‘‘জরসক্কা’’তি। ন তং অক্কোসং মনসি করোতি দীঘরত্তং খন্তিসোরচ্চেসু নিরুল়্হঅজ্ঝাসযত্তা। মহাপটিগ্গহণন্তি মহন্তং উপসমব্যঞ্জনং। অস্সাতি ৰেপচিত্তস্স।
250. ‘‘Mahānubhāvatāya asurānaṃ cittavepanena vepacittī’’ti vadanti. Isīhi pana abhayaṃ yācite ‘‘bhayameva dadāmī’’ti vatvā tehi ‘‘akkhayaṃ hotu te bhaya’’nti abhisapavasena vuttakālato paṭṭhāya vepanacittatāya ‘‘vepacittī’’ti vuccati, yaṃ lokiyā ‘‘pulomo’’ti ca vadanti. Nipātapadānipi kānici atthavisesajotakāni hontīti āha ‘‘nipātamatta’’nti hetuatthādīnamettha asambhavato. Tanti sakkaṃ devānamindaṃ. Kaṇṭhe pañcamehīti kaṇṭhabandhanapañcamehi, vibhattialopena niddeso. Cittenevāti ‘‘imaṃ bandhāmi, ayaṃ bajjhatū’’ti uppannacitteneva. Bajjhati baddho hoti, ayaṃ devānubhāvo. Muccatīti etthāpi eseva nayo. Dasahīti ‘‘corosī’’tiādinā idha vuttehi dasahi. Tenāha ‘‘imehī’’ti. Nibbattitvā cirakālataṃ upādāya khuṃsanavasena vadati ‘‘jarasakkā’’ti. Na taṃ akkosaṃ manasi karoti dīgharattaṃ khantisoraccesu niruḷhaajjhāsayattā. Mahāpaṭiggahaṇanti mahantaṃ upasamabyañjanaṃ. Assāti vepacittassa.
পটিসংযুজেতি পটিসত্তু হুত্ৰা সংযুদ্ধং করেয্য। তেনাহ ‘‘পটিপ্ফরেয্যা’’তি। উপসমং…পে॰… মঞ্ঞে উপসমেনেৰ পচ্চত্থিকস্স নাযকভূতস্স কোধস্স পটিসেধনতো। তাদিসে হি কোধো পটিকিরিযং অলভন্তো অনুপাদানো ৰিয জাতৰেদো ৰূপসম্মতি। যদা-সদ্দো হেতুঅত্থো, ন কালত্থোতি আহ ‘‘যস্মা তং মঞ্ঞতী’’তি। তাৰদেৰ দ্ৰে গাৰো যুজ্ঝন্তেতি তস্মিংযেৰ খণে দ্ৰীসু গোণেসু যুজ্ঝন্তেসু।
Paṭisaṃyujeti paṭisattu hutvā saṃyuddhaṃ kareyya. Tenāha ‘‘paṭipphareyyā’’ti. Upasamaṃ…pe… maññe upasameneva paccatthikassa nāyakabhūtassa kodhassa paṭisedhanato. Tādise hi kodho paṭikiriyaṃ alabhanto anupādāno viya jātavedo vūpasammati. Yadā-saddo hetuattho, na kālatthoti āha ‘‘yasmā taṃ maññatī’’ti. Tāvadeva dve gāvo yujjhanteti tasmiṃyeva khaṇe dvīsu goṇesu yujjhantesu.
খন্তিতো উত্তরিতরো অঞ্ঞো অত্থো ন ৰিজ্জতি অনন্তরেৰ অস্স ৰিরোধং অনত্থং পটিবাহিত্ৰা দিট্ঠধম্মিকস্স চেৰ সম্পরাযিকস্স চ সংৰিধানতো। তং খন্তিং পরমং আহু সেট্ঠবলং ৰিরোধপচ্চযং অভিভুয্য পৰত্তনতো। বালযোগতো বালো, তস্স বলং বালবলং, অঞ্ঞাণন্তি আহ ‘‘বালবলং নাম অঞ্ঞাণবল’’ন্তি। তং যস্স বলন্তি তং অঞ্ঞাণবলং যস্স পুগ্গলস্স বলং, অবলমেৰ তং পঞ্ঞাবলেন ৰিদ্ধংসেতব্বতো। পটিৰত্তা ন ৰিজ্জতীতি ধম্মট্ঠং পটিপ্ফরিত্ৰা অভিভৰিত্ৰা পৰত্তা নত্থি। পটিৰচনমত্তং পন কোচি ৰদেয্যাপি, তং অকারণন্তি দস্সেন্তো ‘‘পটিপ্ফরিত্ৰা ৰা’’তিআদিমাহ। বালবলন্তি ‘‘পটিপ্ফরিত্ৰা’’তি ৰচনস্স কারণৰচনং। তস্সেৰ পুগ্গলস্স পটিকুজ্ঝনকস্স। নানত্তাৰিতক্কনতো উভিন্নং অত্থং। তিকিচ্ছন্তন্তি অনত্থপটিবাহনমুখেন পণ্ডিতকিচ্চকরণেন পটিসেধেন্তং। ‘‘বালো অয’’ন্তি এৰং পঞ্ঞপেতুং হেতুফলানং অনৰবোধতো চতুসচ্চধম্মে অছেকাতি।
Khantito uttaritaro añño attho na vijjati anantareva assa virodhaṃ anatthaṃ paṭibāhitvā diṭṭhadhammikassa ceva samparāyikassa ca saṃvidhānato. Taṃ khantiṃ paramaṃ āhu seṭṭhabalaṃ virodhapaccayaṃ abhibhuyya pavattanato. Bālayogato bālo, tassa balaṃ bālabalaṃ, aññāṇanti āha ‘‘bālabalaṃ nāma aññāṇabala’’nti. Taṃ yassa balanti taṃ aññāṇabalaṃ yassa puggalassa balaṃ, abalameva taṃ paññābalena viddhaṃsetabbato. Paṭivattā na vijjatīti dhammaṭṭhaṃ paṭippharitvā abhibhavitvā pavattā natthi. Paṭivacanamattaṃ pana koci vadeyyāpi, taṃ akāraṇanti dassento ‘‘paṭippharitvā vā’’tiādimāha. Bālabalanti ‘‘paṭippharitvā’’ti vacanassa kāraṇavacanaṃ. Tasseva puggalassa paṭikujjhanakassa. Nānattāvitakkanato ubhinnaṃ atthaṃ. Tikicchantanti anatthapaṭibāhanamukhena paṇḍitakiccakaraṇena paṭisedhentaṃ. ‘‘Bālo aya’’nti evaṃ paññapetuṃ hetuphalānaṃ anavabodhato catusaccadhamme achekāti.
ৰেপচিত্তিসুত্তৰণ্ণনা নিট্ঠিতা।
Vepacittisuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৪. ৰেপচিত্তিসুত্তং • 4. Vepacittisuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৪. ৰেপচিত্তিসুত্তৰণ্ণনা • 4. Vepacittisuttavaṇṇanā
