| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
10. வேபுல்லபப்³ப³தஸுத்தவண்ணனா
10. Vepullapabbatasuttavaṇṇanā
143. த³ஸமே பூ⁴தபுப்³ப³ந்தி அதீதகாலே ஏகங் அபதா³னங் ஆஹரித்வா த³ஸ்ஸேதி. ஸமஞ்ஞா உத³பாதீ³தி பஞ்ஞத்தி அஹோஸி. சதூஹேன ஆரோஹந்தீதி இத³ங் தா²மமஜ்ஜி²மே ஸந்தா⁴ய வுத்தங். அக்³க³ந்தி உத்தமங். ப⁴த்³த³யுக³ந்தி ஸுந்த³ரயுக³லங். தீஹேன ஆரோஹந்தீதி எத்தாவதா கிர த்³வின்னங் பு³த்³தா⁴னங் அந்தரே யோஜனங் பத²வீ உஸ்ஸன்னா, ஸோ பப்³ப³தோ தியோஜனுப்³பே³தோ⁴ ஜாதோ.
143. Dasame bhūtapubbanti atītakāle ekaṃ apadānaṃ āharitvā dasseti. Samaññā udapādīti paññatti ahosi. Catūhena ārohantīti idaṃ thāmamajjhime sandhāya vuttaṃ. Agganti uttamaṃ. Bhaddayuganti sundarayugalaṃ. Tīhena ārohantīti ettāvatā kira dvinnaṃ buddhānaṃ antare yojanaṃ pathavī ussannā, so pabbato tiyojanubbedho jāto.
அப்பங் வா பி⁴ய்யோதி வஸ்ஸஸததோ உத்தரிங் அப்பங் த³ஸ வா வீஸங் வா வஸ்ஸானி. புன வஸ்ஸஸதமேவ ஜீவனகோ நாம நத்தி², உத்தமகோடியா பன ஸட்டி² வா அஸீதி வா வஸ்ஸானி ஜீவந்தி. வஸ்ஸஸதங் பன அப்பத்வா பஞ்சவஸ்ஸத³ஸவஸ்ஸாதி³காலே மீயமானாவ ப³ஹுகா. எத்த² ச ககுஸந்தோ⁴ ப⁴க³வா சத்தாலீஸவஸ்ஸஸஹஸ்ஸாயுககாலே, கோணாக³மனோ திங்ஸவஸ்ஸஸஹஸ்ஸாயுககாலே நிப்³ப³த்தோதி இத³ங் அனுபுப்³பே³ன பரிஹீனஸதி³ஸங் கதங், ந பன ஏவங் பரிஹீனங், வட்³டி⁴த்வா வட்³டி⁴த்வா பரிஹீனந்தி வேதி³தப்³ப³ங். கத²ங்? ககுஸந்தோ⁴ தாவ ப⁴க³வா இமஸ்மிங்யேவ கப்பே சத்தாலீஸவஸ்ஸஸஹஸ்ஸாயுககாலே நிப்³ப³த்தோ ஆயுப்பமாணங் பஞ்ச கொட்டா²ஸே கத்வா சத்தாரோ ட²த்வா பஞ்சமே விஜ்ஜமானேயேவ பரினிப்³பு³தோ. தங் ஆயு பரிஹாயமானங் த³ஸவஸ்ஸகாலங் பத்வா புன வட்³ட⁴மானங் அஸங்கெ²ய்யங் ஹுத்வா ததோ பரிஹாயமானங் திங்ஸவஸ்ஸஸஹஸ்ஸாயுககாலே டி²தங், ததா³ கோணாக³மனோ நிப்³ப³த்தோ. தஸ்மிம்பி ததே²வ பரினிப்³பு³தே தங் ஆயு த³ஸவஸ்ஸகாலங் பத்வா புன வட்³ட⁴மானங் அஸங்கெ²ய்யங் ஹுத்வா பரிஹாயித்வா வீஸவஸ்ஸஸஹஸ்ஸகாலே டி²தங், ததா³ கஸ்ஸபோ ப⁴க³வா நிப்³ப³த்தோ. தஸ்மிம்பி ததே²வ பரினிப்³பு³தே தங் ஆயு த³ஸவஸ்ஸகாலங் பத்வா புன வட்³ட⁴மானங் அஸங்கெ²ய்யங் ஹுத்வா பரிஹாயித்வா வஸ்ஸஸதகாலங் பத்தங், அத² அம்ஹாகங் ஸம்மாஸம்பு³த்³தோ⁴ நிப்³ப³த்தோ. ஏவங் அனுபுப்³பே³ன பரிஹாயித்வா வட்³டி⁴த்வா வட்³டி⁴த்வா பரிஹீனந்தி வேதி³தப்³ப³ங். தத்த² ச யங் ஆயுபரிமாணேஸு மந்தே³ஸு பு³த்³தா⁴ நிப்³ப³த்தந்தி, தேஸம்பி ததே³வ ஆயுபரிமாணங் ஹோதீதி. த³ஸமங்.
Appaṃ vā bhiyyoti vassasatato uttariṃ appaṃ dasa vā vīsaṃ vā vassāni. Puna vassasatameva jīvanako nāma natthi, uttamakoṭiyā pana saṭṭhi vā asīti vā vassāni jīvanti. Vassasataṃ pana appatvā pañcavassadasavassādikāle mīyamānāva bahukā. Ettha ca kakusandho bhagavā cattālīsavassasahassāyukakāle, koṇāgamano tiṃsavassasahassāyukakāle nibbattoti idaṃ anupubbena parihīnasadisaṃ kataṃ, na pana evaṃ parihīnaṃ, vaḍḍhitvā vaḍḍhitvā parihīnanti veditabbaṃ. Kathaṃ? Kakusandho tāva bhagavā imasmiṃyeva kappe cattālīsavassasahassāyukakāle nibbatto āyuppamāṇaṃ pañca koṭṭhāse katvā cattāro ṭhatvā pañcame vijjamāneyeva parinibbuto. Taṃ āyu parihāyamānaṃ dasavassakālaṃ patvā puna vaḍḍhamānaṃ asaṅkheyyaṃ hutvā tato parihāyamānaṃ tiṃsavassasahassāyukakāle ṭhitaṃ, tadā koṇāgamano nibbatto. Tasmimpi tatheva parinibbute taṃ āyu dasavassakālaṃ patvā puna vaḍḍhamānaṃ asaṅkheyyaṃ hutvā parihāyitvā vīsavassasahassakāle ṭhitaṃ, tadā kassapo bhagavā nibbatto. Tasmimpi tatheva parinibbute taṃ āyu dasavassakālaṃ patvā puna vaḍḍhamānaṃ asaṅkheyyaṃ hutvā parihāyitvā vassasatakālaṃ pattaṃ, atha amhākaṃ sammāsambuddho nibbatto. Evaṃ anupubbena parihāyitvā vaḍḍhitvā vaḍḍhitvā parihīnanti veditabbaṃ. Tattha ca yaṃ āyuparimāṇesu mandesu buddhā nibbattanti, tesampi tadeva āyuparimāṇaṃ hotīti. Dasamaṃ.
து³தியோ வக்³கோ³.
Dutiyo vaggo.
அனமதக்³க³ஸங்யுத்தவண்ணனா நிட்டி²தா.
Anamataggasaṃyuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 10. வேபுல்லபப்³ப³தஸுத்தங் • 10. Vepullapabbatasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 10. வேபுல்லபப்³ப³தஸுத்தவண்ணனா • 10. Vepullapabbatasuttavaṇṇanā
