| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၁၀. ဝေပုလ္လပဗ္ဗတသုတ္တဝဏ္ဏနာ
10. Vepullapabbatasuttavaṇṇanā
၁၄၃. ဒသမေ ဘူတပုဗ္ဗန္တိ အတီတကာလေ ဧကံ အပဒာနံ အာဟရိတ္ဝာ ဒသ္သေတိ။ သမညာ ဥဒပာဒီတိ ပညတ္တိ အဟောသိ။ စတူဟေန အာရောဟန္တီတိ ဣဒံ ထာမမဇ္ဈိမေ သန္ဓာယ ဝုတ္တံ။ အဂ္ဂန္တိ ဥတ္တမံ။ ဘဒ္ဒယုဂန္တိ သုန္ဒရယုဂလံ။ တီဟေန အာရောဟန္တီတိ ဧတ္တာဝတာ ကိရ ဒ္ဝိန္နံ ဗုဒ္ဓာနံ အန္တရေ ယောဇနံ ပထဝီ ဥသ္သန္နာ, သော ပဗ္ဗတော တိယောဇနုဗ္ဗေဓော ဇာတော။
143. Dasame bhūtapubbanti atītakāle ekaṃ apadānaṃ āharitvā dasseti. Samaññā udapādīti paññatti ahosi. Catūhena ārohantīti idaṃ thāmamajjhime sandhāya vuttaṃ. Agganti uttamaṃ. Bhaddayuganti sundarayugalaṃ. Tīhena ārohantīti ettāvatā kira dvinnaṃ buddhānaṃ antare yojanaṃ pathavī ussannā, so pabbato tiyojanubbedho jāto.
အပ္ပံ ဝာ ဘိယ္ယောတိ ဝသ္သသတတော ဥတ္တရိံ အပ္ပံ ဒသ ဝာ ဝီသံ ဝာ ဝသ္သာနိ။ ပုန ဝသ္သသတမေဝ ဇီဝနကော နာမ နတ္ထိ, ဥတ္တမကောဋိယာ ပန သဋ္ဌိ ဝာ အသီတိ ဝာ ဝသ္သာနိ ဇီဝန္တိ။ ဝသ္သသတံ ပန အပ္ပတ္ဝာ ပဉ္စဝသ္သဒသဝသ္သာဒိကာလေ မီယမာနာဝ ဗဟုကာ။ ဧတ္ထ စ ကကုသန္ဓော ဘဂဝာ စတ္တာလီသဝသ္သသဟသ္သာယုကကာလေ, ကောဏာဂမနော တိံသဝသ္သသဟသ္သာယုကကာလေ နိဗ္ဗတ္တောတိ ဣဒံ အနုပုဗ္ဗေန ပရိဟီနသဒိသံ ကတံ, န ပန ဧဝံ ပရိဟီနံ, ဝဍ္ဎိတ္ဝာ ဝဍ္ဎိတ္ဝာ ပရိဟီနန္တိ ဝေဒိတဗ္ဗံ။ ကထံ? ကကုသန္ဓော တာဝ ဘဂဝာ ဣမသ္မိံယေဝ ကပ္ပေ စတ္တာလီသဝသ္သသဟသ္သာယုကကာလေ နိဗ္ဗတ္တော အာယုပ္ပမာဏံ ပဉ္စ ကောဋ္ဌာသေ ကတ္ဝာ စတ္တာရော ဌတ္ဝာ ပဉ္စမေ ဝိဇ္ဇမာနေယေဝ ပရိနိဗ္ဗုတော။ တံ အာယု ပရိဟာယမာနံ ဒသဝသ္သကာလံ ပတ္ဝာ ပုန ဝဍ္ဎမာနံ အသင္ခေယ္ယံ ဟုတ္ဝာ တတော ပရိဟာယမာနံ တိံသဝသ္သသဟသ္သာယုကကာလေ ဌိတံ, တဒာ ကောဏာဂမနော နိဗ္ဗတ္တော။ တသ္မိမ္ပိ တထေဝ ပရိနိဗ္ဗုတေ တံ အာယု ဒသဝသ္သကာလံ ပတ္ဝာ ပုန ဝဍ္ဎမာနံ အသင္ခေယ္ယံ ဟုတ္ဝာ ပရိဟာယိတ္ဝာ ဝီသဝသ္သသဟသ္သကာလေ ဌိတံ, တဒာ ကသ္သပော ဘဂဝာ နိဗ္ဗတ္တော။ တသ္မိမ္ပိ တထေဝ ပရိနိဗ္ဗုတေ တံ အာယု ဒသဝသ္သကာလံ ပတ္ဝာ ပုန ဝဍ္ဎမာနံ အသင္ခေယ္ယံ ဟုတ္ဝာ ပရိဟာယိတ္ဝာ ဝသ္သသတကာလံ ပတ္တံ, အထ အမ္ဟာကံ သမ္မာသမ္ဗုဒ္ဓော နိဗ္ဗတ္တော။ ဧဝံ အနုပုဗ္ဗေန ပရိဟာယိတ္ဝာ ဝဍ္ဎိတ္ဝာ ဝဍ္ဎိတ္ဝာ ပရိဟီနန္တိ ဝေဒိတဗ္ဗံ။ တတ္ထ စ ယံ အာယုပရိမာဏေသု မန္ဒေသု ဗုဒ္ဓာ နိဗ္ဗတ္တန္တိ, တေသမ္ပိ တဒေဝ အာယုပရိမာဏံ ဟောတီတိ။ ဒသမံ။
Appaṃ vā bhiyyoti vassasatato uttariṃ appaṃ dasa vā vīsaṃ vā vassāni. Puna vassasatameva jīvanako nāma natthi, uttamakoṭiyā pana saṭṭhi vā asīti vā vassāni jīvanti. Vassasataṃ pana appatvā pañcavassadasavassādikāle mīyamānāva bahukā. Ettha ca kakusandho bhagavā cattālīsavassasahassāyukakāle, koṇāgamano tiṃsavassasahassāyukakāle nibbattoti idaṃ anupubbena parihīnasadisaṃ kataṃ, na pana evaṃ parihīnaṃ, vaḍḍhitvā vaḍḍhitvā parihīnanti veditabbaṃ. Kathaṃ? Kakusandho tāva bhagavā imasmiṃyeva kappe cattālīsavassasahassāyukakāle nibbatto āyuppamāṇaṃ pañca koṭṭhāse katvā cattāro ṭhatvā pañcame vijjamāneyeva parinibbuto. Taṃ āyu parihāyamānaṃ dasavassakālaṃ patvā puna vaḍḍhamānaṃ asaṅkheyyaṃ hutvā tato parihāyamānaṃ tiṃsavassasahassāyukakāle ṭhitaṃ, tadā koṇāgamano nibbatto. Tasmimpi tatheva parinibbute taṃ āyu dasavassakālaṃ patvā puna vaḍḍhamānaṃ asaṅkheyyaṃ hutvā parihāyitvā vīsavassasahassakāle ṭhitaṃ, tadā kassapo bhagavā nibbatto. Tasmimpi tatheva parinibbute taṃ āyu dasavassakālaṃ patvā puna vaḍḍhamānaṃ asaṅkheyyaṃ hutvā parihāyitvā vassasatakālaṃ pattaṃ, atha amhākaṃ sammāsambuddho nibbatto. Evaṃ anupubbena parihāyitvā vaḍḍhitvā vaḍḍhitvā parihīnanti veditabbaṃ. Tattha ca yaṃ āyuparimāṇesu mandesu buddhā nibbattanti, tesampi tadeva āyuparimāṇaṃ hotīti. Dasamaṃ.
ဒုတိယော ဝဂ္ဂော။
Dutiyo vaggo.
အနမတဂ္ဂသံယုတ္တဝဏ္ဏနာ နိဋ္ဌိတာ။
Anamataggasaṃyuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁၀. ဝေပုလ္လပဗ္ဗတသုတ္တံ • 10. Vepullapabbatasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁၀. ဝေပုလ္လပဗ္ဗတသုတ္တဝဏ္ဏနာ • 10. Vepullapabbatasuttavaṇṇanā
