| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
10. වෙපුල්‌ලපබ්‌බතසුත්‌තවණ්‌ණනා
10. Vepullapabbatasuttavaṇṇanā
143. එකං අපදානං ආහරිත්‌වා දස්‌සෙති ‘‘එවං සංවෙගං ජනෙත්‌වා භික්‌ඛූ විසෙසං පාපෙස්‌සාමී’’ති. චතූහෙන ආරොහන්‌ති චතුයොජනුබ්‌බෙධත්‌තා. ද්‌වින්‌නං බුද්‌ධානන්‌ති කකුසන්‌ධස්‌ස කොණාගමනස්‌ස චාති ඉමෙසං ද්‌වින්‌නං බුද්‌ධානං. ‘‘තිවරා රොහිතස්‌සා සුප්‌පියා’’ති මනුස්‌සානං තස්‌මිං තස්‌මිං කාලෙ සමඤ්‌ඤා තත්‌ථ දෙසනාමවසෙන ජාතාති වෙදිතබ්‌බා, යථා එතරහි මාගධාති.
143.Ekaṃ apadānaṃ āharitvā dasseti ‘‘evaṃ saṃvegaṃ janetvā bhikkhū visesaṃ pāpessāmī’’ti. Catūhena ārohanti catuyojanubbedhattā. Dvinnaṃ buddhānanti kakusandhassa koṇāgamanassa cāti imesaṃ dvinnaṃ buddhānaṃ. ‘‘Tivarā rohitassā suppiyā’’ti manussānaṃ tasmiṃ tasmiṃ kāle samaññā tattha desanāmavasena jātāti veditabbā, yathā etarahi māgadhāti.
පුන වස්‌සසතන්‌ති පඨමවස්‌සසතතො උපරිවස්‌සසතං ජීවනකො නාම මනුස්‌සො නත්‌ථි. පරිහීනසදිසං කතං දෙසනාය. වඩ්‌ඪිත්‌වාති දසවස්‌සායුකභාවතො පට්‌ඨාය යාව අසඞ්‌ඛ්‍යෙය්‍යායුකභාවා වඩ්‌ඪිත්‌වා. ‘‘පරිහීන’’න්‌ති වත්‌වා තං පරිහීනභාවං දස්‌සෙන්‌තො ‘‘කථ’’න්‌තිආදිමාහ. යං ආයුප්‌පමාණෙසූති යත්‌තකං ආයුප්‌පමාණෙසූති.
Puna vassasatanti paṭhamavassasatato uparivassasataṃ jīvanako nāma manusso natthi. Parihīnasadisaṃ kataṃ desanāya. Vaḍḍhitvāti dasavassāyukabhāvato paṭṭhāya yāva asaṅkhyeyyāyukabhāvā vaḍḍhitvā. ‘‘Parihīna’’nti vatvā taṃ parihīnabhāvaṃ dassento ‘‘katha’’ntiādimāha. Yaṃ āyuppamāṇesūti yattakaṃ āyuppamāṇesūti.
වෙපුල්‌ලපබ්‌බතසුත්‌තවණ්‌ණනා නිට්‌ඨිතා.
Vepullapabbatasuttavaṇṇanā niṭṭhitā.
දුතියවග්‌ගවණ්‌ණනා නිට්‌ඨිතා.
Dutiyavaggavaṇṇanā niṭṭhitā.
සාරත්‌ථප්‌පකාසිනියා සංයුත්‌තනිකාය-අට්‌ඨකථාය
Sāratthappakāsiniyā saṃyuttanikāya-aṭṭhakathāya
අනමතග්‌ගසංයුත්‌තවණ්‌ණනාය ලීනත්‌ථප්‌පකාසනා සමත්‌තා.
Anamataggasaṃyuttavaṇṇanāya līnatthappakāsanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 10. වෙපුල්‌ලපබ්‌බතසුත්‌තං • 10. Vepullapabbatasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 10. වෙපුල්‌ලපබ්‌බතසුත්‌තවණ්‌ණනා • 10. Vepullapabbatasuttavaṇṇanā
