| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৯. ৰেরম্ভসুত্তং
9. Verambhasuttaṃ
১৬৫. সাৰত্থিযং ৰিহরতি…পে॰… ‘‘দারুণো, ভিক্খৰে, লাভসক্কারসিলোকো…পে॰… অধিগমায। উপরি, ভিক্খৰে, আকাসে ৰেরম্ভা 1 নাম ৰাতা ৰাযন্তি। তত্থ যো পক্খী গচ্ছতি তমেনং ৰেরম্ভা ৰাতা খিপন্তি। তস্স ৰেরম্ভৰাতক্খিত্তস্স অঞ্ঞেনেৰ পাদা গচ্ছন্তি, অঞ্ঞেন পক্খা গচ্ছন্তি, অঞ্ঞেন সীসং গচ্ছতি, অঞ্ঞেন কাযো গচ্ছতি। এৰমেৰ খো, ভিক্খৰে, ইধেকচ্চো ভিক্খু লাভসক্কারসিলোকেন অভিভূতো পরিযাদিণ্ণচিত্তো পুব্বণ্হসমযং নিৰাসেত্ৰা পত্তচীৰরমাদায গামং ৰা নিগমং ৰা পিণ্ডায পৰিসতি অরক্খিতেনেৰ কাযেন অরক্খিতায ৰাচায অরক্খিতেন চিত্তেন, অনুপট্ঠিতায সতিযা, অসংৰুতেহি ইন্দ্রিযেহি। সো তত্থ পস্সতি মাতুগামং দুন্নিৰত্থং ৰা দুপ্পারুতং ৰা। তস্স মাতুগামং দিস্ৰা দুন্নিৰত্থং ৰা দুপ্পারুতং ৰা রাগো চিত্তং অনুদ্ধংসেতি। সো রাগানুদ্ধংসিতেন চিত্তেন সিক্খং পচ্চক্খায হীনাযাৰত্ততি। তস্স অঞ্ঞে চীৰরং হরন্তি, অঞ্ঞে পত্তং হরন্তি, অঞ্ঞে নিসীদনং হরন্তি, অঞ্ঞে সূচিঘরং হরন্তি, ৰেরম্ভৰাতক্খিত্তস্সেৰ সকুণস্স। এৰং দারুণো খো, ভিক্খৰে, লাভসক্কারসিলোকো…পে॰… এৰঞ্হি ৰো, ভিক্খৰে, সিক্খিতব্ব’’ন্তি। নৰমং।
165. Sāvatthiyaṃ viharati…pe… ‘‘dāruṇo, bhikkhave, lābhasakkārasiloko…pe… adhigamāya. Upari, bhikkhave, ākāse verambhā 2 nāma vātā vāyanti. Tattha yo pakkhī gacchati tamenaṃ verambhā vātā khipanti. Tassa verambhavātakkhittassa aññeneva pādā gacchanti, aññena pakkhā gacchanti, aññena sīsaṃ gacchati, aññena kāyo gacchati. Evameva kho, bhikkhave, idhekacco bhikkhu lābhasakkārasilokena abhibhūto pariyādiṇṇacitto pubbaṇhasamayaṃ nivāsetvā pattacīvaramādāya gāmaṃ vā nigamaṃ vā piṇḍāya pavisati arakkhiteneva kāyena arakkhitāya vācāya arakkhitena cittena, anupaṭṭhitāya satiyā, asaṃvutehi indriyehi. So tattha passati mātugāmaṃ dunnivatthaṃ vā duppārutaṃ vā. Tassa mātugāmaṃ disvā dunnivatthaṃ vā duppārutaṃ vā rāgo cittaṃ anuddhaṃseti. So rāgānuddhaṃsitena cittena sikkhaṃ paccakkhāya hīnāyāvattati. Tassa aññe cīvaraṃ haranti, aññe pattaṃ haranti, aññe nisīdanaṃ haranti, aññe sūcigharaṃ haranti, verambhavātakkhittasseva sakuṇassa. Evaṃ dāruṇo kho, bhikkhave, lābhasakkārasiloko…pe… evañhi vo, bhikkhave, sikkhitabba’’nti. Navamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৯. ৰেরম্ভসুত্তৰণ্ণনা • 9. Verambhasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৯. ৰেরম্ভসুত্তৰণ্ণনা • 9. Verambhasuttavaṇṇanā
