| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
2. வேரஞ்ஜகஸுத்தவண்ணனா
2. Verañjakasuttavaṇṇanā
444. வேரஞ்ஜவாஸினோதி வேரஞ்ஜகா³மவாஸினோ. கேசி பன ‘‘விவித⁴ரட்ட²வாஸினோ வேரஞ்ஜகா’’தி ஏதமத்த²ங் வத³ந்தி, தேஸங் மதேன ‘‘வேரஜ்ஜகா’’தி பாளியா ப⁴விதப்³ப³ந்தி. அனியமிதகிச்சேனாதி ‘‘இமினா நாமா’’தி ஏவங் ந நியமிதேன கிச்சேன. அயங் விஸேஸோதி அயங் புக்³க³லாதி⁴ட்டா²னத⁴ம்மாதி⁴ட்டா²னகதோ இமேஸு த்³வீஸு ஸுத்தேஸு தே³ஸனாய விஸேஸோ, அத்தோ² பன தே³ஸனானயோ ச மஜ்ஜே² பி⁴ன்னஸுவண்ணங் விய அவிஸிட்டோ²தி த³ஸ்ஸேதி. கஸ்மா பன ப⁴க³வா கத்த²சி புக்³க³லாதி⁴ட்டா²னதே³ஸனங் தே³ஸேதி, கத்த²சி த⁴ம்மாதி⁴ட்டா²னந்தி? தே³ஸனாவிலாஸதோ வேனெய்யஜ்ஜா²ஸயதோ ச. தே³ஸனாவிலாஸப்பத்தா ஹி பு³த்³தா⁴ ப⁴க³வந்தோ, தே யதா²ருசி கத்த²சி புக்³க³லாதி⁴ட்டா²னங் கத்வா, கத்த²சி த⁴ம்மாதி⁴ட்டா²னங் கத்வா த⁴ம்மங் தே³ஸெந்தி. யே பன வேனெய்யா ஸாஸனக்கமங் அனோதிண்ணா, தேஸங் புக்³க³லாதி⁴ட்டா²னதே³ஸனங் தே³ஸெந்தி. யே ஓதிண்ணா, தேஸங் த⁴ம்மாதி⁴ட்டா²னங். ஸம்முதிஸச்சவிஸயா புக்³க³லாதி⁴ட்டா²னா, இதரா பரமத்த²ஸச்சவிஸயா. புரிமா கருணானுகூலா, இதரா பஞ்ஞானுகூலா. ஸத்³தா⁴னுஸாரிகொ³த்தானங் வா புரிமா. தே ஹி புக்³க³லப்பமாணா, பச்சி²மா த⁴ம்மானுஸாரீனங். ஸத்³தா⁴சரிததாய வா லோகாதி⁴பதீனங் வஸேன புக்³க³லாதி⁴ட்டா²னா, பஞ்ஞாசரிததாய த⁴ம்மாதி⁴பதீனங் வஸேன த⁴ம்மாதி⁴ட்டா²னா. புரிமா ச நெய்யத்தா², பச்சி²மா நீதத்தா². இதி ப⁴க³வா தங் தங் விஸேஸங் அவெக்கி²த்வா தத்த² தத்த² து³வித⁴ங் தே³ஸனங் தே³ஸேதீதி வேதி³தப்³ப³ங்.
444.Verañjavāsinoti verañjagāmavāsino. Keci pana ‘‘vividharaṭṭhavāsino verañjakā’’ti etamatthaṃ vadanti, tesaṃ matena ‘‘verajjakā’’ti pāḷiyā bhavitabbanti. Aniyamitakiccenāti ‘‘iminā nāmā’’ti evaṃ na niyamitena kiccena. Ayaṃ visesoti ayaṃ puggalādhiṭṭhānadhammādhiṭṭhānakato imesu dvīsu suttesu desanāya viseso, attho pana desanānayo ca majjhe bhinnasuvaṇṇaṃ viya avisiṭṭhoti dasseti. Kasmā pana bhagavā katthaci puggalādhiṭṭhānadesanaṃ deseti, katthaci dhammādhiṭṭhānanti? Desanāvilāsato veneyyajjhāsayato ca. Desanāvilāsappattā hi buddhā bhagavanto, te yathāruci katthaci puggalādhiṭṭhānaṃ katvā, katthaci dhammādhiṭṭhānaṃ katvā dhammaṃ desenti. Ye pana veneyyā sāsanakkamaṃ anotiṇṇā, tesaṃ puggalādhiṭṭhānadesanaṃ desenti. Ye otiṇṇā, tesaṃ dhammādhiṭṭhānaṃ. Sammutisaccavisayā puggalādhiṭṭhānā, itarā paramatthasaccavisayā. Purimā karuṇānukūlā, itarā paññānukūlā. Saddhānusārigottānaṃ vā purimā. Te hi puggalappamāṇā, pacchimā dhammānusārīnaṃ. Saddhācaritatāya vā lokādhipatīnaṃ vasena puggalādhiṭṭhānā, paññācaritatāya dhammādhipatīnaṃ vasena dhammādhiṭṭhānā. Purimā ca neyyatthā, pacchimā nītatthā. Iti bhagavā taṃ taṃ visesaṃ avekkhitvā tattha tattha duvidhaṃ desanaṃ desetīti veditabbaṃ.
வேரஞ்ஜகஸுத்தவண்ணனாய லீனத்த²ப்பகாஸனா ஸமத்தா.
Verañjakasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 2. வேரஞ்ஜகஸுத்தங் • 2. Verañjakasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 2. வேரஞ்ஜகஸுத்தவண்ணனா • 2. Verañjakasuttavaṇṇanā
