| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) |
2. махааваг̇г̇о
2. Mahāvaggo
1. взран̃ж̇асуд̇д̇аван̣н̣анаа
1. Verañjasuttavaṇṇanā
11. д̣̇уд̇ияасса батамз абхиваад̣̇зд̇ийд̇и звамаад̣̇ийни на саман̣о г̇од̇амод̇и зд̇т̇а вуд̇д̇анагаарзна яож̇зд̇ваа звамзд̇т̇а ад̇т̇о взд̣̇ид̇аб̣б̣о ‘‘на ванд̣̇ад̇и наасанаа вудтаад̇и, нааби ‘ид̇ха бхонд̇о нисийд̣̇анд̇уу’д̇и звам̣ аасанзна ваа ниманд̇зд̇ий’’д̇и. зд̇т̇а хи ваа-сад̣̇д̣̇о вибхааванз наама ад̇т̇з ‘‘руубам̣ нижжам̣ ваа анижжам̣ ваа’’д̇иаад̣̇ийсу вияа. звам̣ вад̇ваа ат̇а ад̇д̇ано абхиваад̣̇анаад̣̇ийни агаронд̇ам̣ бхаг̇аванд̇ам̣ д̣̇исваа ааха – д̇аяид̣̇ам̣, бхо г̇од̇ама, д̇ат̇зваад̇и. яам̣ д̇ам̣ маяаа суд̇ам̣, д̇ам̣ д̇ат̇зва, д̇ам̣ саванан̃жа мз д̣̇ассанан̃жа сам̣санд̣̇ад̇и самзд̇и, ад̇т̇ад̇о згийбхаавам̣ г̇ажчад̇и. на хи бхавам̣ г̇од̇амо…бз… аасанзна ваа ниманд̇зд̇ийд̇и. звам̣ ад̇д̇анаа суд̇ам̣ д̣̇идтзна ниг̇амзд̇ваа нинд̣̇анд̇о ааха – д̇аяид̣̇ам̣, бхо г̇од̇ама, на самбаннамзваад̇и д̇ам̣ абхиваад̣̇анаад̣̇ийнам̣ агаран̣ам̣ аяуд̇д̇амзваад̇и.
11. Dutiyassa paṭhame abhivādetīti evamādīni na samaṇo gotamoti ettha vuttanakārena yojetvā evamettha attho veditabbo ‘‘na vandati nāsanā vuṭṭhāti, nāpi ‘idha bhonto nisīdantū’ti evaṃ āsanena vā nimantetī’’ti. Ettha hi vā-saddo vibhāvane nāma atthe ‘‘rūpaṃ niccaṃ vā aniccaṃ vā’’tiādīsu viya. Evaṃ vatvā atha attano abhivādanādīni akarontaṃ bhagavantaṃ disvā āha – tayidaṃ, bho gotama, tathevāti. Yaṃ taṃ mayā sutaṃ, taṃ tatheva, taṃ savanañca me dassanañca saṃsandati sameti, atthato ekībhāvaṃ gacchati. Na hi bhavaṃ gotamo…pe… āsanena vā nimantetīti. Evaṃ attanā sutaṃ diṭṭhena nigametvā nindanto āha – tayidaṃ, bho gotama, na sampannamevāti taṃ abhivādanādīnaṃ akaraṇaṃ ayuttamevāti.
ат̇асса бхаг̇аваа ад̇д̇уггам̣санабаравамбханад̣̇осам̣ анубаг̇амма гарун̣аасийд̇алзна хад̣̇аязна д̇ам̣ ан̃н̃аан̣ам̣ вид̇хамид̇ваа яуд̇д̇абхаавам̣ д̣̇ассзд̇угаамо наахам̣ д̇ам̣ б̣раахман̣аад̇иаад̣̇имааха. д̇ад̇рааяам̣ сан̇кзбад̇т̇о – ахам̣, б̣раахман̣а, аббадихад̇зна саб̣б̣ан̃н̃уд̇ан̃н̃аан̣ажагкунаа ологзнд̇оби д̇ам̣ буг̇г̇алам̣ зд̇асмим̣ сад̣̇звагаад̣̇ибхзд̣̇з логз на бассаами, яамахам̣ абхиваад̣̇зяяам̣ ваа бажжудтзяяам̣ ваа аасанзна ваа ниманд̇зяяам̣. анажчарияам̣ ваа зд̇ам̣, сваахам̣ аж̇ж̇а саб̣б̣ан̃н̃уд̇ам̣ бад̇д̇о зваруубам̣ нибажжаагаараарахам̣ буг̇г̇алам̣ на бассаами. абижа ко яад̣̇аабаахам̣ самбад̇иж̇аад̇ова уд̇д̇арзна муко сад̇д̇абад̣̇авийд̇ихаарзна г̇анд̇ваа сагалам̣ д̣̇асасахассилогад̇хаад̇ум̣ ологзсим̣, д̇ад̣̇ааби зд̇асмим̣ сад̣̇звагаад̣̇ибхзд̣̇з логз д̇ам̣ буг̇г̇алам̣ на бассаами, яамахам̣ зваруубам̣ нибажжагаарам̣ гарзяяам̣. ат̇а ко мам̣ сол̣асагаббасахассааяуго кийн̣аасавамахааб̣рахмааби ан̃ж̇алим̣ баг̇г̇ахзд̇ваа ‘‘д̇вам̣ логз махаабурисо, д̇вам̣ сад̣̇звагасса логасса аг̇г̇о жа ж̇здто жа сздто жа, над̇т̇и д̇аяаа уд̇д̇арид̇аро’’д̇и сан̃ж̇аад̇асоманассо бад̇имаанзси. д̇ад̣̇ааби жаахам̣ ад̇д̇анаа уд̇д̇арид̇арам̣ абассанд̇о аасабхим̣ ваажам̣ нижчаарзсим̣ – ‘‘аг̇г̇охамасми логасса, ж̇здтохамасми логасса, сздтохамасми логассаа’’д̇и. звам̣ самбад̇иж̇аад̇ассааби маяхам̣ абхиваад̣̇анаад̣̇ирахо буг̇г̇ало над̇т̇и, сваахам̣ ид̣̇аани саб̣б̣ан̃н̃уд̇ам̣ бад̇д̇о гам̣ абхиваад̣̇зяяам̣. д̇асмаа д̇вам̣, б̣раахман̣а, маа д̇ат̇ааг̇ад̇аа зваруубам̣ бараманибажжагаарам̣ бад̇т̇аяи. яан̃хи, б̣раахман̣а, д̇ат̇ааг̇ад̇о абхиваад̣̇зяяа ваа…бз… аасанзна ваа ниманд̇зяяа, муд̣̇д̇хааби д̇асса буг̇г̇аласса рад̇д̇ибарияосаанз барибаагасит̇илаб̣анд̇ханам̣ ван̣даа муд̇д̇ад̇аалапалам̣ вияа г̇ийвад̇о чиж̇ж̇ид̇ваа сахасаава бхуумияам̣ нибад̇зяяа.
Athassa bhagavā attukkaṃsanaparavambhanadosaṃ anupagamma karuṇāsītalena hadayena taṃ aññāṇaṃ vidhamitvā yuttabhāvaṃ dassetukāmo nāhaṃ taṃ brāhmaṇātiādimāha. Tatrāyaṃ saṅkhepattho – ahaṃ, brāhmaṇa, appaṭihatena sabbaññutaññāṇacakkhunā olokentopi taṃ puggalaṃ etasmiṃ sadevakādibhede loke na passāmi, yamahaṃ abhivādeyyaṃ vā paccuṭṭheyyaṃ vā āsanena vā nimanteyyaṃ. Anacchariyaṃ vā etaṃ, svāhaṃ ajja sabbaññutaṃ patto evarūpaṃ nipaccākārārahaṃ puggalaṃ na passāmi. Apica kho yadāpāhaṃ sampatijātova uttarena mukho sattapadavītihārena gantvā sakalaṃ dasasahassilokadhātuṃ olokesiṃ, tadāpi etasmiṃ sadevakādibhede loke taṃ puggalaṃ na passāmi, yamahaṃ evarūpaṃ nipaccakāraṃ kareyyaṃ. Atha kho maṃ soḷasakappasahassāyuko khīṇāsavamahābrahmāpi añjaliṃ paggahetvā ‘‘tvaṃ loke mahāpuriso, tvaṃ sadevakassa lokassa aggo ca jeṭṭho ca seṭṭho ca, natthi tayā uttaritaro’’ti sañjātasomanasso patimānesi. Tadāpi cāhaṃ attanā uttaritaraṃ apassanto āsabhiṃ vācaṃ nicchāresiṃ – ‘‘aggohamasmi lokassa, jeṭṭhohamasmi lokassa, seṭṭhohamasmi lokassā’’ti. Evaṃ sampatijātassāpi mayhaṃ abhivādanādiraho puggalo natthi, svāhaṃ idāni sabbaññutaṃ patto kaṃ abhivādeyyaṃ. Tasmā tvaṃ, brāhmaṇa, mā tathāgatā evarūpaṃ paramanipaccakāraṃ patthayi. Yañhi, brāhmaṇa, tathāgato abhivādeyya vā…pe… āsanena vā nimanteyya, muddhāpi tassa puggalassa rattipariyosāne paripākasithilabandhanaṃ vaṇṭā muttatālaphalaṃ viya gīvato chijjitvā sahasāva bhūmiyaṃ nipateyya.
звам̣ вуд̇д̇зби б̣раахман̣о д̣̇уббан̃н̃ад̇ааяа д̇ат̇ааг̇ад̇асса логаж̇здтабхаавам̣ асаллагкзнд̇о гзвалам̣ д̇ам̣ важанам̣ асахамаано ааха – арасаруубо бхавам̣ г̇од̇амод̇и. аяам̣ гирасса ад̇хиббааяо – яам̣ логз абхиваад̣̇анабажжудтаанаан̃ж̇алигаммасаамийжигаммам̣ ‘‘саамаг̇г̇ирасо’’д̇и вужжад̇и, д̇ам̣ бход̇о г̇од̇амасса над̇т̇и. д̇асмаа арасаруубо бхавам̣ г̇од̇амо, арасаж̇аад̇иго арасасабхаавод̇и. ат̇асса бхаг̇аваа жид̇д̇амуд̣̇убхааваж̇ананад̇т̇ам̣ уж̇увибажжанийгабхаавам̣ барихаранд̇о ан̃н̃ат̇аа д̇асса важанасса ад̇т̇ам̣ ад̇д̇ани санд̣̇ассзнд̇о ад̇т̇и квзса, б̣раахман̣а, барияааяод̇иаад̣̇имааха.
Evaṃ vuttepi brāhmaṇo duppaññatāya tathāgatassa lokajeṭṭhabhāvaṃ asallakkhento kevalaṃ taṃ vacanaṃ asahamāno āha – arasarūpo bhavaṃ gotamoti. Ayaṃ kirassa adhippāyo – yaṃ loke abhivādanapaccuṭṭhānaañjalikammasāmīcikammaṃ ‘‘sāmaggiraso’’ti vuccati, taṃ bhoto gotamassa natthi. Tasmā arasarūpo bhavaṃ gotamo, arasajātiko arasasabhāvoti. Athassa bhagavā cittamudubhāvajananatthaṃ ujuvipaccanīkabhāvaṃ pariharanto aññathā tassa vacanassa atthaṃ attani sandassento atthi khvesa, brāhmaṇa, pariyāyotiādimāha.
д̇ад̇т̇а ад̇т̇и квзсаад̇и ад̇т̇и ко зса. барияааяод̇и гааран̣ам̣. ид̣̇ам̣ вуд̇д̇ам̣ ход̇и – ад̇т̇и ко, б̣раахман̣а, зд̇ам̣ гааран̣ам̣, язна гааран̣зна мам̣ ‘‘арасаруубо бхавам̣ г̇од̇амо’’д̇и вад̣̇амаано буг̇г̇ало саммаа вад̣̇зяяа, авид̇ат̇аваад̣̇ийд̇и сан̇кам̣ г̇ажчзяяа. гад̇амо бана сод̇и? яз д̇з, б̣раахман̣а, руубарасаа…бз… подтаб̣б̣арасаа, д̇з д̇ат̇ааг̇ад̇асса бахийнаад̇и. гим̣ вуд̇д̇ам̣ ход̇и? яз д̇з ж̇аад̇ивасзна ваа убабад̇д̇ивасзна ваа сздтасаммад̇аанамби бут̇уж̇ж̇анаанам̣ руубаарамман̣аад̣̇ийни ассаад̣̇знд̇аанам̣ абхинанд̣̇анд̇аанам̣ раж̇ж̇анд̇аанам̣ уббаж̇ж̇анд̇и гаамасукассаад̣̇асан̇каад̇аа руубарасаа, сад̣̇д̣̇арасаа, г̇анд̇харасаа, расарасаа, подтаб̣б̣арасаа, яз имам̣ логам̣ г̇ийвааяа б̣анд̇хид̇ваа вияа аавин̃чанд̇и, вад̇т̇аарамман̣аад̣̇исаамаг̇г̇ияан̃жа уббаннад̇д̇аа саамаг̇г̇ирасаад̇и вужжанд̇и. д̇з саб̣б̣зби д̇ат̇ааг̇ад̇асса бахийнаа. ‘‘маяхам̣ бахийнаа’’д̇и вад̇д̇аб̣б̣зби мамаагаарзна ад̇д̇аанам̣ анугкибанд̇о д̇хаммам̣ д̣̇зсзд̇и, д̣̇зсанаавилаасо ваа зса д̇ат̇ааг̇ад̇асса.
Tattha atthi khvesāti atthi kho esa. Pariyāyoti kāraṇaṃ. Idaṃ vuttaṃ hoti – atthi kho, brāhmaṇa, etaṃ kāraṇaṃ, yena kāraṇena maṃ ‘‘arasarūpo bhavaṃ gotamo’’ti vadamāno puggalo sammā vadeyya, avitathavādīti saṅkhaṃ gaccheyya. Katamo pana soti? Ye te, brāhmaṇa, rūparasā…pe… phoṭṭhabbarasā, te tathāgatassa pahīnāti. Kiṃ vuttaṃ hoti? Ye te jātivasena vā upapattivasena vā seṭṭhasammatānampi puthujjanānaṃ rūpārammaṇādīni assādentānaṃ abhinandantānaṃ rajjantānaṃ uppajjanti kāmasukhassādasaṅkhātā rūparasā, saddarasā, gandharasā, rasarasā, phoṭṭhabbarasā, ye imaṃ lokaṃ gīvāya bandhitvā viya āviñchanti, vatthārammaṇādisāmaggiyañca uppannattā sāmaggirasāti vuccanti. Te sabbepi tathāgatassa pahīnā. ‘‘Mayhaṃ pahīnā’’ti vattabbepi mamākārena attānaṃ anukkhipanto dhammaṃ deseti, desanāvilāso vā esa tathāgatassa.
д̇ад̇т̇а бахийнаад̇и жид̇д̇асанд̇аанад̇о виг̇ад̇аа, баж̇ахид̇аа ваа. зд̇асмим̣ банад̇т̇з гаран̣з саамиважанам̣ д̣̇адтаб̣б̣ам̣. арияамаг̇г̇асад̇т̇зна ужчиннам̣ д̇ан̣хаавиж̇ж̇аамаяам̣ муулам̣ зд̇зсанд̇и ужчиннамуулаа. д̇аалавад̇т̇у вияа нзсам̣ вад̇т̇у гад̇анд̇и д̇аалаавад̇т̇угад̇аа. яат̇аа хи д̇ааларугкам̣ самуулам̣ уд̣̇д̇харид̇ваа д̇асса вад̇т̇умад̇д̇з д̇асмим̣ бад̣̇зсз гад̇з на буна д̇асса д̇ааласса уббад̇д̇и бан̃н̃ааяад̇и, звам̣ арияамаг̇г̇асад̇т̇зна самуулз руубаад̣̇ирасз уд̣̇д̇харид̇ваа д̇зсам̣ буб̣б̣з уббаннабуб̣б̣абхаавзна вад̇т̇умад̇д̇з жид̇д̇асанд̇аанз гад̇з саб̣б̣зби д̇з д̇аалаавад̇т̇угад̇аад̇и вужжанд̇и. авирул̣хид̇хаммад̇д̇аа ваа мад̇т̇агажчиннад̇аало вияа гад̇аад̇и д̇аалаавад̇т̇угад̇аа. яасмаа бана звам̣ д̇аалаавад̇т̇угад̇аа анабхаавам̣гад̇аа хонд̇и , яат̇аа нзсам̣ бажчаабхааво на ход̇и, д̇ат̇аа гад̇аа хонд̇и. д̇асмаа ааха – анабхаавам̣гад̇аад̇и. ааяад̇им̣ ануббаад̣̇ад̇хаммаад̇и анааг̇ад̇з ануббаж̇ж̇анагасабхааваа.
Tattha pahīnāti cittasantānato vigatā, pajahitā vā. Etasmiṃ panatthe karaṇe sāmivacanaṃ daṭṭhabbaṃ. Ariyamaggasatthena ucchinnaṃ taṇhāvijjāmayaṃ mūlaṃ etesanti ucchinnamūlā. Tālavatthu viya nesaṃ vatthu katanti tālāvatthukatā. Yathā hi tālarukkhaṃ samūlaṃ uddharitvā tassa vatthumatte tasmiṃ padese kate na puna tassa tālassa uppatti paññāyati, evaṃ ariyamaggasatthena samūle rūpādirase uddharitvā tesaṃ pubbe uppannapubbabhāvena vatthumatte cittasantāne kate sabbepi te tālāvatthukatāti vuccanti. Aviruḷhidhammattā vā matthakacchinnatālo viya katāti tālāvatthukatā. Yasmā pana evaṃ tālāvatthukatā anabhāvaṃkatā honti , yathā nesaṃ pacchābhāvo na hoti, tathā katā honti. Tasmā āha – anabhāvaṃkatāti. Āyatiṃ anuppādadhammāti anāgate anuppajjanakasabhāvā.
но жа ко яам̣ д̇вам̣ санд̇хааяа вад̣̇зсийд̇и яан̃жа ко д̇вам̣ санд̇хааяа вад̣̇зси, со барияааяо на ход̇и. нану жа звам̣ вуд̇д̇з яо б̣раахман̣зна вуд̇д̇о саамаг̇г̇ирасо, д̇асса ад̇д̇ани виж̇ж̇амаанад̇аа анун̃н̃аад̇аа ход̇ийд̇и? на ход̇и. яо хи нам̣ саамаг̇г̇ирасам̣ гаад̇ум̣ бхаб̣б̣о худ̇ваа на гарод̇и, со д̇ад̣̇абхаавзна арасаруубод̇и вад̇д̇аб̣б̣ад̇ам̣ арахад̇и. бхаг̇аваа бана абхаб̣б̣ова зд̇ам̣ гаад̇ум̣, д̇знасса гааран̣з абхаб̣б̣ад̇ам̣ багаасзнд̇о ааха – ‘‘но жа ко яам̣ д̇вам̣ санд̇хааяа вад̣̇зсий’’д̇и. яам̣ барияааяам̣ санд̇хааяа д̇вам̣ мам̣ ‘‘арасаруубо’’д̇и вад̣̇зси, со амхзсу нзва вад̇д̇аб̣б̣од̇и.
No ca kho yaṃ tvaṃ sandhāya vadesīti yañca kho tvaṃ sandhāya vadesi, so pariyāyo na hoti. Nanu ca evaṃ vutte yo brāhmaṇena vutto sāmaggiraso, tassa attani vijjamānatā anuññātā hotīti? Na hoti. Yo hi naṃ sāmaggirasaṃ kātuṃ bhabbo hutvā na karoti, so tadabhāvena arasarūpoti vattabbataṃ arahati. Bhagavā pana abhabbova etaṃ kātuṃ, tenassa kāraṇe abhabbataṃ pakāsento āha – ‘‘no ca kho yaṃ tvaṃ sandhāya vadesī’’ti. Yaṃ pariyāyaṃ sandhāya tvaṃ maṃ ‘‘arasarūpo’’ti vadesi, so amhesu neva vattabboti.
звам̣ б̣раахман̣о ад̇д̇анаа ад̇хиббзд̇ам̣ арасаруубад̇ам̣ ааробзд̇ум̣ асаггонд̇о ат̇аабарам̣ ниб̣бхог̇о бхаванд̇иаад̣̇имааха. саб̣б̣абарияааязсу жзд̇т̇а вуд̇д̇анаязнзва яож̇анааггамам̣ вид̣̇ид̇ваа санд̇хааяабхаасид̇амад̇т̇ам̣ звам̣ взд̣̇ид̇аб̣б̣ам̣ – б̣раахман̣о д̇ад̣̇зва ваяовуд̣̇д̇хаанам̣ абхиваад̣̇анаад̣̇игаммам̣ логз ‘‘саамаг̇г̇ибарибхог̇о’’д̇и ман̃н̃амаано д̇ад̣̇абхаавзна жа бхаг̇аванд̇ам̣ ‘‘ниб̣бхог̇о’’д̇иаад̣̇имааха. бхаг̇аваа жа явааяам̣ руубаад̣̇ийсу сад̇д̇аанам̣ чанд̣̇арааг̇абарибхог̇о, д̇ад̣̇абхаавам̣ ад̇д̇ани самбассамаано абарам̣ барияааяамануж̇аани.
Evaṃ brāhmaṇo attanā adhippetaṃ arasarūpataṃ āropetuṃ asakkonto athāparaṃ nibbhogo bhavantiādimāha. Sabbapariyāyesu cettha vuttanayeneva yojanākkamaṃ viditvā sandhāyabhāsitamatthaṃ evaṃ veditabbaṃ – brāhmaṇo tadeva vayovuddhānaṃ abhivādanādikammaṃ loke ‘‘sāmaggiparibhogo’’ti maññamāno tadabhāvena ca bhagavantaṃ ‘‘nibbhogo’’tiādimāha. Bhagavā ca yvāyaṃ rūpādīsu sattānaṃ chandarāgaparibhogo, tadabhāvaṃ attani sampassamāno aparaṃ pariyāyamanujāni.
буна б̣раахман̣о яам̣ логз ваяовуд̣̇д̇хаанам̣ абхиваад̣̇анаад̣̇игуласамуд̣̇аажаарагаммам̣ логияаа гаронд̇и, д̇асса агирияам̣ самбассамаано бхаг̇аванд̇ам̣ агирияаваад̣̇од̇и ааха. бхаг̇аваа бана яасмаа гааяад̣̇ужжарид̇аад̣̇ийнам̣ агирияам̣ вад̣̇ад̇и, д̇асмаа д̇ам̣ агирияаваад̣̇ид̇ам̣ ад̇д̇ани самбассамаано абарам̣ барияааяамануж̇аани. д̇ад̇т̇а табзд̇ваа гааяад̣̇ужжарид̇аад̣̇ийни авасзсаа агусалаа д̇хаммаа анзгавихид̇аа баабагаа агусалаа д̇хаммаад̇и взд̣̇ид̇аб̣б̣аа.
Puna brāhmaṇo yaṃ loke vayovuddhānaṃ abhivādanādikulasamudācārakammaṃ lokiyā karonti, tassa akiriyaṃ sampassamāno bhagavantaṃ akiriyavādoti āha. Bhagavā pana yasmā kāyaduccaritādīnaṃ akiriyaṃ vadati, tasmā taṃ akiriyavāditaṃ attani sampassamāno aparaṃ pariyāyamanujāni. Tattha ṭhapetvā kāyaduccaritādīni avasesā akusalā dhammā anekavihitā pāpakā akusalā dhammāti veditabbā.
буна б̣раахман̣о д̇ад̣̇зва абхиваад̣̇анаад̣̇игаммам̣ бхаг̇авад̇и абассанд̇о ‘‘имам̣ ааг̇амма аяам̣ логад̇анд̇и логабавзн̣ий ужчиж̇ж̇ад̇ий’’д̇и ман̃н̃амаано бхаг̇аванд̇ам̣ ужчзд̣̇аваад̣̇од̇и ааха. бхаг̇аваа бана яасмаа бан̃жагаамаг̇ун̣игарааг̇асса жзва агусалажид̇д̇ад̣̇ваяасамбаяуд̇д̇асса жа д̣̇осасса анааг̇аамимаг̇г̇зна ужчзд̣̇ам̣ вад̣̇ад̇и, саб̣б̣аагусаласамбхавасса бана мохасса арахад̇д̇амаг̇г̇зна ужчзд̣̇ам̣ вад̣̇ад̇и, табзд̇ваа д̇з д̇аяо авасзсаанам̣ баабагаанам̣ агусалаанам̣ д̇хаммаанам̣ яат̇аануруубам̣ жад̇уухи маг̇г̇зхи ужчзд̣̇ам̣ вад̣̇ад̇и, д̇асмаа д̇ам̣ ужчзд̣̇аваад̣̇ам̣ ад̇д̇ани самбассамаано абарам̣ барияааяамануж̇аани.
Puna brāhmaṇo tadeva abhivādanādikammaṃ bhagavati apassanto ‘‘imaṃ āgamma ayaṃ lokatanti lokapaveṇī ucchijjatī’’ti maññamāno bhagavantaṃ ucchedavādoti āha. Bhagavā pana yasmā pañcakāmaguṇikarāgassa ceva akusalacittadvayasampayuttassa ca dosassa anāgāmimaggena ucchedaṃ vadati, sabbākusalasambhavassa pana mohassa arahattamaggena ucchedaṃ vadati, ṭhapetvā te tayo avasesānaṃ pāpakānaṃ akusalānaṃ dhammānaṃ yathānurūpaṃ catūhi maggehi ucchedaṃ vadati, tasmā taṃ ucchedavādaṃ attani sampassamāno aparaṃ pariyāyamanujāni.
буна б̣раахман̣о ‘‘ж̇иг̇ужчад̇и ман̃н̃з саман̣о г̇од̇амо ид̣̇ам̣ ваяовуд̣̇д̇хаанам̣ абхиваад̣̇анаад̣̇игуласамуд̣̇аажаарагаммам̣, д̇зна д̇ам̣ на гарод̇ий’’д̇и ман̃н̃амаано бхаг̇аванд̇ам̣ ж̇зг̇ужчийд̇и ааха. бхаг̇аваа бана яасмаа ж̇иг̇ужчад̇и гааяад̣̇ужжарид̇аад̣̇ийхи, яаани гааяаважийманод̣̇ужжарид̇аани жзва яаава жа агусалаанам̣ лаамагад̇хаммаанам̣ самаабад̇д̇и самаабаж̇ж̇анаа саман̇г̇ибхааво, д̇ам̣ саб̣б̣амби г̇уут̇ам̣ вияа ман̣д̣анагаж̇аад̇иго бурисо ж̇иг̇ужчад̇и хирийяад̇и, д̇асмаа д̇ам̣ ж̇зг̇ужчид̇ам̣ ад̇д̇ани самбассамаано абарам̣ барияааяамануж̇аани. д̇ад̇т̇а гааяад̣̇ужжарид̇знаад̇иаад̣̇и гаран̣аважанам̣ убаяог̇ад̇т̇з д̣̇адтаб̣б̣ам̣.
Puna brāhmaṇo ‘‘jigucchati maññe samaṇo gotamo idaṃ vayovuddhānaṃ abhivādanādikulasamudācārakammaṃ, tena taṃ na karotī’’ti maññamāno bhagavantaṃ jegucchīti āha. Bhagavā pana yasmā jigucchati kāyaduccaritādīhi, yāni kāyavacīmanoduccaritāni ceva yāva ca akusalānaṃ lāmakadhammānaṃ samāpatti samāpajjanā samaṅgibhāvo, taṃ sabbampi gūthaṃ viya maṇḍanakajātiko puriso jigucchati hirīyati, tasmā taṃ jegucchitaṃ attani sampassamāno aparaṃ pariyāyamanujāni. Tattha kāyaduccaritenātiādi karaṇavacanaṃ upayogatthe daṭṭhabbaṃ.
буна б̣раахман̣о д̇ад̣̇зва абхиваад̣̇анаад̣̇игаммам̣ бхаг̇авад̇и абассанд̇о ‘‘аяам̣ ид̣̇ам̣ логаж̇здтагагаммам̣ винзд̇и винаасзд̇и, ат̇а ваа яасмаа зд̇ам̣ саамийжигаммам̣ на гарод̇и, д̇асмаа аяам̣ винзд̇аб̣б̣о ниг̇г̇ан̣хид̇аб̣б̣о’’д̇и ман̃н̃амаано бхаг̇аванд̇ам̣ взнаяигод̇и ааха. д̇ад̇рааяам̣ бад̣̇ад̇т̇о – винаяад̇ийд̇и винаяо, винаасзд̇ийд̇и вуд̇д̇ам̣ ход̇и. винаяо зва взнаяиго. винаяам̣ ваа арахад̇ийд̇и взнаяиго, ниг̇г̇ахам̣ арахад̇ийд̇и вуд̇д̇ам̣ ход̇и. бхаг̇аваа бана яасмаа рааг̇аад̣̇ийнам̣ винаяааяа вуубасамааяа д̇хаммам̣ д̣̇зсзд̇и, д̇асмаа взнаяиго ход̇и. аяамзва жзд̇т̇а бад̣̇ад̇т̇о – винаяааяа д̇хаммам̣ д̣̇зсзд̇ийд̇и взнаяиго. вижид̇раа хи д̇ад̣̇д̇хид̇авуд̇д̇и. свааяам̣ д̇ам̣ взнаяигабхаавам̣ ад̇д̇ани самбассамаано абарам̣ барияааяамануж̇аани.
Puna brāhmaṇo tadeva abhivādanādikammaṃ bhagavati apassanto ‘‘ayaṃ idaṃ lokajeṭṭhakakammaṃ vineti vināseti, atha vā yasmā etaṃ sāmīcikammaṃ na karoti, tasmā ayaṃ vinetabbo niggaṇhitabbo’’ti maññamāno bhagavantaṃ venayikoti āha. Tatrāyaṃ padattho – vinayatīti vinayo, vināsetīti vuttaṃ hoti. Vinayo eva venayiko. Vinayaṃ vā arahatīti venayiko, niggahaṃ arahatīti vuttaṃ hoti. Bhagavā pana yasmā rāgādīnaṃ vinayāya vūpasamāya dhammaṃ deseti, tasmā venayiko hoti. Ayameva cettha padattho – vinayāya dhammaṃ desetīti venayiko. Vicitrā hi taddhitavutti. Svāyaṃ taṃ venayikabhāvaṃ attani sampassamāno aparaṃ pariyāyamanujāni.
буна б̣раахман̣о яасмаа абхиваад̣̇анаад̣̇ийни саамийжигаммаани гаронд̇аа ваяовуд̣̇д̇хз д̇осзнд̇и хаасзнд̇и , агаронд̇аа бана д̇аабзнд̇и вихзсзнд̇и д̣̇оманассам̣ нзсам̣ уббаад̣̇знд̇и, бхаг̇аваа жа д̇аани на гарод̇и, д̇асмаа ‘‘аяам̣ ваяовуд̣̇д̇хз д̇абад̇ий’’д̇и ман̃н̃амаано саббурисаажааравирахид̇ад̇д̇аа ваа ‘‘габан̣абурисо аяа’’нд̇и ман̃н̃амаано бхаг̇аванд̇ам̣ д̇абассийд̇и ааха. д̇ад̇рааяам̣ бад̣̇ад̇т̇о – д̇абад̇ийд̇и д̇або, росзд̇и вихзсзд̇ийд̇и ад̇т̇о. саамийжигаммаагаран̣ассзд̇ам̣ ад̇хиважанам̣. д̇або асса ад̇т̇ийд̇и д̇абассий. д̣̇уд̇ияз ад̇т̇авигаббз б̣яан̃ж̇анаани авижаарзд̇ваа логз габан̣абурисо д̇абассийд̇и вужжад̇и. бхаг̇аваа бана яз агусалаа д̇хаммаа логам̣ д̇абанад̇о д̇абанийяаани вужжанд̇и, д̇зсам̣ бахийнад̇д̇аа яасмаа д̇абассийд̇и сан̇кам̣ г̇ад̇о. д̇асмаа д̇ам̣ д̇абассид̇ам̣ ад̇д̇ани самбассамаано абарам̣ барияааяамануж̇аани. д̇ад̇рааяам̣ важанад̇т̇о – д̇абанд̇ийд̇и д̇абаа, агусалад̇хаммаанамзд̇ам̣ ад̇хиважанам̣. д̇з д̇абз асси нирасси бахааси вид̣̇д̇хам̣сийд̇и д̇абассий.
Puna brāhmaṇo yasmā abhivādanādīni sāmīcikammāni karontā vayovuddhe tosenti hāsenti , akarontā pana tāpenti vihesenti domanassaṃ nesaṃ uppādenti, bhagavā ca tāni na karoti, tasmā ‘‘ayaṃ vayovuddhe tapatī’’ti maññamāno sappurisācāravirahitattā vā ‘‘kapaṇapuriso aya’’nti maññamāno bhagavantaṃ tapassīti āha. Tatrāyaṃ padattho – tapatīti tapo, roseti vihesetīti attho. Sāmīcikammākaraṇassetaṃ adhivacanaṃ. Tapo assa atthīti tapassī. Dutiye atthavikappe byañjanāni avicāretvā loke kapaṇapuriso tapassīti vuccati. Bhagavā pana ye akusalā dhammā lokaṃ tapanato tapanīyāni vuccanti, tesaṃ pahīnattā yasmā tapassīti saṅkhaṃ gato. Tasmā taṃ tapassitaṃ attani sampassamāno aparaṃ pariyāyamanujāni. Tatrāyaṃ vacanattho – tapantīti tapā, akusaladhammānametaṃ adhivacanaṃ. Te tape assi nirassi pahāsi viddhaṃsīti tapassī.
буна б̣раахман̣о д̇ам̣ абхиваад̣̇анаад̣̇игаммам̣ д̣̇звалогаг̇аб̣бхасамбад̇д̇ияаа д̣̇звалогабадисанд̇хибадилаабхааяа сам̣вад̇д̇ад̇ийд̇и ман̃н̃амаано бхаг̇авад̇и жасса абхаавам̣ д̣̇исваа бхаг̇аванд̇ам̣ абаг̇аб̣бход̇и ааха. год̇хавасзна ваа бхаг̇авад̇о маад̇угужчисмим̣ бадисанд̇хиг̇г̇ахан̣з д̣̇осам̣ д̣̇ассзнд̇оби звамааха. д̇ад̇рааяам̣ важанад̇т̇о – г̇аб̣бхад̇о абаг̇ад̇од̇и абаг̇аб̣бхо, абхаб̣б̣о д̣̇звалогуубабад̇д̇им̣ баабун̣ид̇унд̇и ад̇хиббааяо. хийно ваа г̇аб̣бхо ассаад̇и абаг̇аб̣бхо. д̣̇звалогаг̇аб̣бхабариб̣аахирад̇д̇аа ааяад̇им̣ хийнаг̇аб̣бхабадилаабхабхааг̇ийд̇и. хийно ваасса маад̇угужчисмим̣ г̇аб̣бхаваасо ахосийд̇и ад̇хиббааяо. бхаг̇авад̇о бана яасмаа ааяад̇им̣ г̇аб̣бхасзяяаа абаг̇ад̇аа, д̇асмаа со д̇ам̣ абаг̇аб̣бхад̇ам̣ ад̇д̇ани самбассамаано абарам̣ барияааяамануж̇аани. д̇ад̇ра жа яасса ко, б̣раахман̣а, ааяад̇им̣ г̇аб̣бхасзяяаа бунаб̣бхаваабхиниб̣б̣ад̇д̇и бахийнаад̇и зд̇зсам̣ бад̣̇аанам̣ звамад̇т̇о д̣̇адтаб̣б̣о – ‘‘б̣раахман̣а, яасса буг̇г̇аласса анааг̇ад̇з г̇аб̣бхасзяяаа бунаб̣бхавз жа абхиниб̣б̣ад̇д̇и ануд̇д̇арзна маг̇г̇зна вихад̇агааран̣ад̇д̇аа бахийнаа. г̇аб̣бхасзяяааг̇ахан̣зна жзд̇т̇а ж̇алааб̣уж̇аяони г̇ахид̇аа, бунаб̣бхаваабхиниб̣б̣ад̇д̇иг̇г̇ахан̣зна ид̇араа д̇иссо’’би.
Puna brāhmaṇo taṃ abhivādanādikammaṃ devalokagabbhasampattiyā devalokapaṭisandhipaṭilābhāya saṃvattatīti maññamāno bhagavati cassa abhāvaṃ disvā bhagavantaṃ apagabbhoti āha. Kodhavasena vā bhagavato mātukucchismiṃ paṭisandhiggahaṇe dosaṃ dassentopi evamāha. Tatrāyaṃ vacanattho – gabbhato apagatoti apagabbho, abhabbo devalokūpapattiṃ pāpuṇitunti adhippāyo. Hīno vā gabbho assāti apagabbho. Devalokagabbhaparibāhirattā āyatiṃ hīnagabbhapaṭilābhabhāgīti. Hīno vāssa mātukucchismiṃ gabbhavāso ahosīti adhippāyo. Bhagavato pana yasmā āyatiṃ gabbhaseyyā apagatā, tasmā so taṃ apagabbhataṃ attani sampassamāno aparaṃ pariyāyamanujāni. Tatra ca yassa kho, brāhmaṇa, āyatiṃ gabbhaseyyā punabbhavābhinibbatti pahīnāti etesaṃ padānaṃ evamattho daṭṭhabbo – ‘‘brāhmaṇa, yassa puggalassa anāgate gabbhaseyyā punabbhave ca abhinibbatti anuttarena maggena vihatakāraṇattā pahīnā. Gabbhaseyyāgahaṇena cettha jalābujayoni gahitā, punabbhavābhinibbattiggahaṇena itarā tisso’’pi.
абижа г̇аб̣бхасса сзяяаа г̇аб̣бхасзяяаа. бунаб̣бхаво зва абхиниб̣б̣ад̇д̇и бунаб̣бхаваабхиниб̣б̣ад̇д̇ийд̇и звамзд̇т̇а ад̇т̇о д̣̇адтаб̣б̣о. яат̇аа жа вин̃н̃аан̣адтид̇ийд̇и вуд̇д̇зби на вин̃н̃аан̣ад̇о ан̃н̃аа тид̇и ад̇т̇и, звамид̇хааби на г̇аб̣бхад̇о ан̃н̃аа сзяяаа взд̣̇ид̇аб̣б̣аа. абхиниб̣б̣ад̇д̇и жа наама яасмаа бунаб̣бхавабхууд̇ааби абунаб̣бхавабхууд̇ааби ад̇т̇и, ид̇ха жа бунаб̣бхавабхууд̇аа ад̇хиббзд̇аа, д̇асмаа вуд̇д̇ам̣ – ‘‘бунаб̣бхаво зва абхиниб̣б̣ад̇д̇и бунаб̣бхаваабхиниб̣б̣ад̇д̇ий’’д̇и.
Apica gabbhassa seyyā gabbhaseyyā. Punabbhavo eva abhinibbatti punabbhavābhinibbattīti evamettha attho daṭṭhabbo. Yathā ca viññāṇaṭṭhitīti vuttepi na viññāṇato aññā ṭhiti atthi, evamidhāpi na gabbhato aññā seyyā veditabbā. Abhinibbatti ca nāma yasmā punabbhavabhūtāpi apunabbhavabhūtāpi atthi, idha ca punabbhavabhūtā adhippetā, tasmā vuttaṃ – ‘‘punabbhavo eva abhinibbatti punabbhavābhinibbattī’’ti.
звам̣ ааг̇ад̇агаалад̇о бадтааяа арасаруубад̇аад̣̇ийхи адтахи аггосавад̇т̇уухи аггосанд̇амби б̣раахман̣ам̣ бхаг̇аваа д̇хаммиссаро д̇хаммарааж̇аа д̇хаммасаамий д̇ат̇ааг̇ад̇о анугамбааяа сийд̇алзнзва жагкунаа б̣раахман̣ам̣ олзгзнд̇о яам̣ д̇хаммад̇хаад̇ум̣ бадивиж̇жхид̇ваа д̣̇зсанаавилаасаббад̇д̇аа наама ход̇и, д̇ассаа д̇хаммад̇хаад̇уяаа суббадивид̣̇д̇хад̇д̇аа виг̇ад̇авалаахагз набхз бун̣н̣ажанд̣̇о вияа жа сарад̣̇агаалз суурияо вияа жа б̣раахман̣асса хад̣̇аяанд̇хагаарам̣ вид̇хамзнд̇о д̇ааниязва аггосавад̇т̇ууни д̇зна д̇зна барияааязна ан̃н̃ат̇аа д̣̇ассзд̇ваа бунаби ад̇д̇ано гарун̣аавибпаарам̣ адтахи логад̇хаммзхи агамбияабхаавзна бадилад̣̇д̇хад̇аад̣̇иг̇ун̣алагкан̣ам̣ бат̇ависамажид̇д̇ад̇ам̣ агуббад̇хаммад̇ан̃жа багаасзнд̇о ‘‘аяам̣ б̣раахман̣о гзвалам̣ балид̇асиракан̣д̣ад̣̇анд̇авалид̇д̇ажад̇аад̣̇ийхи ад̇д̇ано вуд̣̇д̇хабхаавам̣ саллагкзд̇и, но жа ко ж̇аанаад̇и ад̇д̇аанам̣ ж̇аад̇ияаа ануг̇ад̇ам̣ ж̇арааяа анусадам̣ б̣яаад̇хино ад̇хибхууд̇ам̣ маран̣зна аб̣бхаахад̇ам̣ аж̇ж̇а марид̇ваа буна свзва уд̇д̇аанасзяяад̣̇аарагабхааваг̇аманийяам̣ . маханд̇зна ко бана уссаахзна мама санд̇игам̣ ааг̇ад̇о, д̇ад̣̇асса ааг̇аманам̣ саад̇т̇агам̣ ход̇уу’’д̇и жинд̇зд̇ваа имасмим̣ логз ад̇д̇ано аббадисамам̣ бурзж̇аад̇абхаавам̣ д̣̇ассзнд̇о сзяяат̇ааби, б̣раахман̣аад̇иаад̣̇инаа наязна б̣раахман̣асса д̇хаммад̣̇зсанам̣ вад̣дхзси.
Evaṃ āgatakālato paṭṭhāya arasarūpatādīhi aṭṭhahi akkosavatthūhi akkosantampi brāhmaṇaṃ bhagavā dhammissaro dhammarājā dhammasāmī tathāgato anukampāya sītaleneva cakkhunā brāhmaṇaṃ olekento yaṃ dhammadhātuṃ paṭivijjhitvā desanāvilāsappattā nāma hoti, tassā dhammadhātuyā suppaṭividdhattā vigatavalāhake nabhe puṇṇacando viya ca saradakāle sūriyo viya ca brāhmaṇassa hadayandhakāraṃ vidhamento tāniyeva akkosavatthūni tena tena pariyāyena aññathā dassetvā punapi attano karuṇāvipphāraṃ aṭṭhahi lokadhammehi akampiyabhāvena paṭiladdhatādiguṇalakkhaṇaṃ pathavisamacittataṃ akuppadhammatañca pakāsento ‘‘ayaṃ brāhmaṇo kevalaṃ palitasirakhaṇḍadantavalittacatādīhi attano vuddhabhāvaṃ sallakkheti, no ca kho jānāti attānaṃ jātiyā anugataṃ jarāya anusaṭaṃ byādhino adhibhūtaṃ maraṇena abbhāhataṃ ajja maritvā puna sveva uttānaseyyadārakabhāvagamanīyaṃ . Mahantena kho pana ussāhena mama santikaṃ āgato, tadassa āgamanaṃ sātthakaṃ hotū’’ti cintetvā imasmiṃ loke attano appaṭisamaṃ purejātabhāvaṃ dassento seyyathāpi, brāhmaṇātiādinā nayena brāhmaṇassa dhammadesanaṃ vaḍḍhesi.
д̇ад̇т̇а сзяяат̇аабийд̇иаад̣̇ийнам̣ хздтаа вуд̇анаязнзва ад̇т̇о взд̣̇ид̇аб̣б̣о. аяам̣ бана висзсо – хздтаа вуд̇д̇анаязнзва хи д̇з гуггудабод̇агаа багкз вид̇хунанд̇аа д̇ам̣кан̣аануруубам̣ вираванд̇аа нигкаманд̇и. звам̣ нигкаманд̇аанан̃жа д̇зсам̣ яо батамад̇арам̣ нигкамад̇и, со ж̇здтод̇и вужжад̇и. д̇асмаа бхаг̇аваа д̇ааяа убамааяа ад̇д̇ано ж̇здтабхаавам̣ саад̇хзд̇угаамо б̣раахман̣ам̣ бужчад̇и – яо ну ко д̇зсам̣ гуггудажчаабод̇агаанам̣…бз… гинд̇и сваасса важанийяод̇и. д̇ад̇т̇а гуггудажчаабагаананд̇и гуггудабод̇агаанам̣. гинд̇и сваасса важанийяод̇и со гинд̇и важанийяо асса, гим̣ вад̇д̇аб̣б̣о бхавзяяа ж̇здто ваа ганидто ваад̇и.
Tattha seyyathāpītiādīnaṃ heṭṭhā vutanayeneva attho veditabbo. Ayaṃ pana viseso – heṭṭhā vuttanayeneva hi te kukkuṭapotakā pakkhe vidhunantā taṃkhaṇānurūpaṃ viravantā nikkhamanti. Evaṃ nikkhamantānañca tesaṃ yo paṭhamataraṃ nikkhamati, so jeṭṭhoti vuccati. Tasmā bhagavā tāya upamāya attano jeṭṭhabhāvaṃ sādhetukāmo brāhmaṇaṃ pucchati – yo nu kho tesaṃ kukkuṭacchāpotakānaṃ…pe… kinti svāssa vacanīyoti. Tattha kukkuṭacchāpakānanti kukkuṭapotakānaṃ. Kinti svāssa vacanīyoti so kinti vacanīyo assa, kiṃ vattabbo bhaveyya jeṭṭho vā kaniṭṭho vāti.
‘‘ж̇здто’’д̇исса, бхо г̇од̇ама, важанийяод̇и, бхо г̇од̇ама, со ж̇здто ид̇и асса важанийяо. гасмаад̇и жз? со хи нзсам̣ ж̇здтод̇и, яасмаа со нзсам̣ вуд̣̇д̇хад̇арод̇и ад̇т̇о. ат̇асса бхаг̇аваа обаммам̣ самбадибаад̣̇знд̇о звамзва код̇и ааха, яат̇аа со гуггудабод̇аго, звам̣ ахамби. авиж̇ж̇ааг̇ад̇ааяа баж̇ааяаад̇и авиж̇ж̇аа вужжад̇и ан̃н̃аан̣ам̣, д̇ад̇т̇а г̇ад̇ааяа. баж̇ааяаад̇и сад̇д̇ад̇хиважанамзд̇ам̣, авиж̇ж̇аагосасса анд̇о бавидтзсу сад̇д̇зсууби вуд̇д̇ам̣ ход̇и. ан̣д̣абхууд̇ааяаад̇и ан̣д̣з бхууд̇ааяа баж̇аад̇ааяа сан̃ж̇аад̇ааяа. яат̇аа хи ан̣д̣з ниб̣б̣ад̇д̇аа згажжз сад̇д̇аа ан̣д̣абхууд̇аад̇и вужжанд̇и, звамаяам̣ саб̣б̣ааби баж̇аа авиж̇ж̇ан̣д̣агосз ниб̣б̣ад̇д̇ад̇д̇аа ан̣д̣абхууд̇аад̇и вужжад̇и. барияонад̣̇д̇хааяаад̇и д̇зна авиж̇ж̇ан̣д̣агосзна саманд̇ад̇о онад̣̇д̇хааяа б̣ад̣̇д̇хааяа взтид̇ааяа. авиж̇ж̇ан̣д̣агосам̣ бад̣̇аалзд̇ваад̇и д̇ам̣ авиж̇ж̇аамаяам̣ ан̣д̣агосам̣ бхинд̣̇ид̇ваа. згова логзд̇и сагалзби логасанниваасз ахамзва зго ад̣̇уд̇ияо. ануд̇д̇арам̣ саммаасамб̣од̇хим̣ абхисамб̣уд̣̇д̇ход̇и уд̇д̇арарахид̇ам̣ саб̣б̣асздтам̣ саммаа сааман̃жа б̣од̇хим̣, ат̇а ваа басад̇т̇ам̣ сунд̣̇аран̃жа б̣од̇хим̣. арахад̇д̇амаг̇г̇ан̃аан̣ассзд̇ам̣ наамам̣, саб̣б̣ан̃н̃уд̇ан̃н̃аан̣ассааби наамамзва. убхаяамби ваддад̇и. ан̃н̃зсам̣ арахад̇д̇амаг̇г̇о ануд̇д̇араа б̣од̇хи ход̇и, на ход̇ийд̇и? на ход̇и. гасмаа? асаб̣б̣аг̇ун̣ад̣̇ааяагад̇д̇аа. д̇зсан̃хи гассажи арахад̇д̇амаг̇г̇о арахад̇д̇апаламзва д̣̇зд̇и, гассажи д̇иссо виж̇ж̇аа, гассажи ча абхин̃н̃аа, гассажи жад̇ассо бадисамбхид̣̇аа, гассажи саавагабаарамин̃аан̣ам̣. бажжзгаб̣уд̣̇д̇хаанамби бажжзгаб̣од̇хин̃аан̣амзва д̣̇зд̇и, б̣уд̣̇д̇хаанам̣ бана саб̣б̣аг̇ун̣асамбад̇д̇им̣ д̣̇зд̇и абхисзго вияа ран̃н̃о саб̣б̣алогиссарабхаавам̣. д̇асмаа ан̃н̃асса гассажиби ануд̇д̇араа б̣од̇хи на ход̇ийд̇и. абхисамб̣уд̣̇д̇ход̇и аб̣бхан̃н̃аасим̣ бадивиж̇жхим̣, бад̇д̇омхи ад̇хиг̇ад̇омхийд̇и вуд̇д̇ам̣ ход̇и.
‘‘Jeṭṭho’’tissa, bho gotama, vacanīyoti, bho gotama, so jeṭṭho iti assa vacanīyo. Kasmāti ce? So hi nesaṃ jeṭṭhoti, yasmā so nesaṃ vuddhataroti attho. Athassa bhagavā opammaṃ sampaṭipādento evameva khoti āha, yathā so kukkuṭapotako, evaṃ ahampi. Avijjāgatāyapajāyāti avijjā vuccati aññāṇaṃ, tattha gatāya. Pajāyāti sattadhivacanametaṃ, avijjākosassa anto paviṭṭhesu sattesūpi vuttaṃ hoti. Aṇḍabhūtāyāti aṇḍe bhūtāya pajātāya sañjātāya. Yathā hi aṇḍe nibbattā ekacce sattā aṇḍabhūtāti vuccanti, evamayaṃ sabbāpi pajā avijjaṇḍakose nibbattattā aṇḍabhūtāti vuccati. Pariyonaddhāyāti tena avijjaṇḍakosena samantato onaddhāya baddhāya veṭhitāya. Avijjaṇḍakosaṃ padāletvāti taṃ avijjāmayaṃ aṇḍakosaṃ bhinditvā. Ekova loketi sakalepi lokasannivāse ahameva eko adutiyo. Anuttaraṃ sammāsambodhiṃ abhisambuddhoti uttararahitaṃ sabbaseṭṭhaṃ sammā sāmañca bodhiṃ, atha vā pasatthaṃ sundarañca bodhiṃ. Arahattamaggañāṇassetaṃ nāmaṃ, sabbaññutaññāṇassāpi nāmameva. Ubhayampi vaṭṭati. Aññesaṃ arahattamaggo anuttarā bodhi hoti, na hotīti? Na hoti. Kasmā? Asabbaguṇadāyakattā. Tesañhi kassaci arahattamaggo arahattaphalameva deti, kassaci tisso vijjā, kassaci cha abhiññā, kassaci catasso paṭisambhidā, kassaci sāvakapāramiñāṇaṃ. Paccekabuddhānampi paccekabodhiñāṇameva deti, buddhānaṃ pana sabbaguṇasampattiṃ deti abhiseko viya rañño sabbalokissarabhāvaṃ. Tasmā aññassa kassacipi anuttarā bodhi na hotīti. Abhisambuddhoti abbhaññāsiṃ paṭivijjhiṃ, pattomhi adhigatomhīti vuttaṃ hoti.
ид̣̇аани яад̣̇зд̇ам̣ бхаг̇авад̇аа ‘‘звамзва ко’’д̇иаад̣̇инаа наязна вуд̇д̇ам̣ обаммасамбадибаад̣̇анам̣, д̇ам̣ звам̣ ад̇т̇зна сам̣санд̣̇ид̇ваа взд̣̇ид̇аб̣б̣ам̣ – яат̇аа хи д̇ассаа гуггудияаа ад̇д̇ано ан̣д̣зсу ад̇хисаяанаад̣̇ид̇ивид̇хагирияаагаран̣ам̣, звам̣ б̣од̇хибаллан̇гз нисиннасса б̣од̇хисад̇д̇абхууд̇асса бхаг̇авад̇о ад̇д̇ано санд̇аанз анижжам̣, д̣̇угкам̣, анад̇д̇аад̇и д̇ивид̇хаанубассанаагаран̣ам̣. гуггудияаа д̇ивид̇хагирияаасамбаад̣̇анзна ан̣д̣аанам̣ абууд̇ибхааво вияа б̣од̇хисад̇д̇абхууд̇асса бхаг̇авад̇о д̇ивид̇хаанубассанаасамбаад̣̇анзна вибассанаан̃аан̣асса абарихаани. гуггудияаа д̇ивид̇хагирияаагаран̣зна ан̣д̣аанам̣ алласинзхабарияаад̣̇аанам̣ вияа б̣од̇хисад̇д̇абхууд̇асса бхаг̇авад̇о д̇ивид̇хаанубассанаасамбаад̣̇анзна бхавад̇д̇аяаануг̇ад̇аниганд̇исинзхабарияаад̣̇аанам̣. гуггудияаа д̇ивид̇хагирияаагаран̣зна ан̣д̣агабаалаанам̣ д̇анубхааво вияа б̣од̇хисад̇д̇абхууд̇асса бхаг̇авад̇о д̇ивид̇хаанубассанаасамбаад̣̇анзна авиж̇ж̇ан̣д̣агосасса д̇анубхааво, гуггудияаа д̇ивид̇хагирияаагаран̣зна гуггудабод̇агасса баад̣̇анакад̇ун̣д̣агаанам̣ т̇ад̣̇д̇хакарабхааво вияа б̣од̇хисад̇д̇абхууд̇асса бхаг̇авад̇о д̇ивид̇хаанубассанаасамбаад̣̇анзна вибассанаан̃аан̣асса д̇игкакаравиббасаннасуурабхааво. гуггудияаа д̇ивид̇хагирияаагаран̣зна гуггудабод̇агасса барин̣аамагаало вияа б̣од̇хисад̇д̇абхууд̇асса бхаг̇авад̇о д̇ивид̇хаанубассанаасамбаад̣̇анзна вибассанаан̃аан̣асса барин̣аамагаало вад̣дхигаало г̇аб̣бхаг̇г̇ахан̣агаало. гуггудияаа д̇ивид̇хагирияаагаран̣зна гуггудабод̇агасса баад̣̇анакасикааяа ваа мукад̇ун̣д̣агзна ваа ан̣д̣агосам̣ бад̣̇аалзд̇ваа багкз бабподзд̇ваа сод̇т̇инаа абхиниб̣бхид̣̇аагаало вияа бхаг̇авад̇о д̇ивид̇хаанубассанаасамбаад̣̇анзна вибассанаан̃аан̣аг̇аб̣бхам̣ г̇ан̣хаабзд̇ваа анубуб̣б̣аад̇хиг̇ад̇зна арахад̇д̇амаг̇г̇зна авиж̇ж̇ан̣д̣агосам̣ бад̣̇аалзд̇ваа абхин̃н̃аабагкз бабподзд̇ваа сод̇т̇инаа сагалаб̣уд̣̇д̇хаг̇ун̣асажчигад̇агаало взд̣̇ид̇аб̣б̣о.
Idāni yadetaṃ bhagavatā ‘‘evameva kho’’tiādinā nayena vuttaṃ opammasampaṭipādanaṃ, taṃ evaṃ atthena saṃsanditvā veditabbaṃ – yathā hi tassā kukkuṭiyā attano aṇḍesu adhisayanāditividhakiriyākaraṇaṃ, evaṃ bodhipallaṅke nisinnassa bodhisattabhūtassa bhagavato attano santāne aniccaṃ, dukkhaṃ, anattāti tividhānupassanākaraṇaṃ. Kukkuṭiyā tividhakiriyāsampādanena aṇḍānaṃ apūtibhāvo viya bodhisattabhūtassa bhagavato tividhānupassanāsampādanena vipassanāñāṇassa aparihāni. Kukkuṭiyā tividhakiriyākaraṇena aṇḍānaṃ allasinehapariyādānaṃ viya bodhisattabhūtassa bhagavato tividhānupassanāsampādanena bhavattayānugatanikantisinehapariyādānaṃ. Kukkuṭiyā tividhakiriyākaraṇena aṇḍakapālānaṃ tanubhāvo viya bodhisattabhūtassa bhagavato tividhānupassanāsampādanena avijjaṇḍakosassa tanubhāvo, kukkuṭiyā tividhakiriyākaraṇena kukkuṭapotakassa pādanakhatuṇḍakānaṃ thaddhakharabhāvo viya bodhisattabhūtassa bhagavato tividhānupassanāsampādanena vipassanāñāṇassa tikkhakharavippasannasūrabhāvo. Kukkuṭiyā tividhakiriyākaraṇena kukkuṭapotakassa pariṇāmakālo viya bodhisattabhūtassa bhagavato tividhānupassanāsampādanena vipassanāñāṇassa pariṇāmakālo vaḍḍhikālo gabbhaggahaṇakālo. Kukkuṭiyā tividhakiriyākaraṇena kukkuṭapotakassa pādanakhasikhāya vā mukhatuṇḍakena vā aṇḍakosaṃ padāletvā pakkhe papphoṭetvā sotthinā abhinibbhidākālo viya bhagavato tividhānupassanāsampādanena vipassanāñāṇagabbhaṃ gaṇhāpetvā anupubbādhigatena arahattamaggena avijjaṇḍakosaṃ padāletvā abhiññāpakkhe papphoṭetvā sotthinā sakalabuddhaguṇasacchikatakālo veditabbo.
ахан̃хи, б̣раахман̣а, ж̇здто сздто логассаад̇и, б̣раахман̣а, яат̇аа д̇зсам̣ гуггудабод̇агаанам̣ батамад̇арам̣ ан̣д̣агосам̣ бад̣̇аалзд̇ваа абхиниб̣б̣ад̇д̇о гуггудабод̇аго ж̇здто ход̇и, звам̣ авиж̇ж̇ааг̇ад̇ааяа баж̇ааяа д̇ам̣ авиж̇ж̇ан̣д̣агосам̣ бад̣̇аалзд̇ваа батамад̇арам̣ арияааяа ж̇аад̇ияаа ж̇аад̇ад̇д̇аа ахан̃хи ж̇здто вуд̣̇д̇хад̇амод̇и сан̇кам̣ г̇ад̇о, саб̣б̣аг̇ун̣зхи бана аббадисамад̇д̇аа сздтод̇и.
Ahañhi, brāhmaṇa, jeṭṭho seṭṭho lokassāti, brāhmaṇa, yathā tesaṃ kukkuṭapotakānaṃ paṭhamataraṃ aṇḍakosaṃ padāletvā abhinibbatto kukkuṭapotako jeṭṭho hoti, evaṃ avijjāgatāya pajāya taṃ avijjaṇḍakosaṃ padāletvā paṭhamataraṃ ariyāya jātiyā jātattā ahañhi jeṭṭho vuddhatamoti saṅkhaṃ gato, sabbaguṇehi pana appaṭisamattā seṭṭhoti.
звам̣ бхаг̇аваа ад̇д̇ано ануд̇д̇арам̣ ж̇здтасздтабхаавам̣ б̣раахман̣асса багаасзд̇ваа ид̣̇аани яааяа бадибад̣̇ааяа д̇ам̣ ад̇хиг̇ад̇о, д̇ам̣ бадибад̣̇ам̣ буб̣б̣абхааг̇ад̇о бабхуд̇и д̣̇ассзд̇ум̣ аарад̣̇д̇хам̣ ко бана мз, б̣раахман̣аад̇иаад̣̇имааха. д̇ад̇т̇а аарад̣̇д̇хам̣ ко бана мз, б̣раахман̣а, вийрияам̣ ахосийд̇и, б̣раахман̣а, на маяаа аяам̣ ануд̇д̇аро ж̇здтасздтабхааво гусийд̇зна мудтассад̇инаа саарад̣̇д̇хагааязна вигкид̇д̇ажид̇зна ад̇хиг̇ад̇о, абижа ко д̇ад̣̇ад̇хиг̇амааяа аарад̣̇д̇хам̣ ко бана мз вийрияам̣ ахоси. б̣од̇химан̣д̣з нисиннзна маяаа жад̇усаммаббад̇хаанабхзд̣̇ам̣ вийрияам̣ аарад̣̇д̇хам̣ ахоси, баг̇г̇ахид̇ам̣ асит̇илаббавад̇д̇ид̇ам̣. аарад̣̇д̇хад̇д̇ааязва жа мз д̇ам̣ асаллийнам̣ ахоси . на гзвалан̃жа вийрияамзва, сад̇иби мз аарамман̣аабхимукабхаавзна убадтид̇аа ахоси, убадтид̇ад̇д̇ааязва жа асаммудтаа. бассад̣̇д̇хо гааяо асаарад̣̇д̇ход̇и гааяажид̇д̇аббассад̣̇д̇хивасзна гааяоби мз бассад̣̇д̇хо ахоси. д̇ад̇т̇а яасмаа наамагааяз бассад̣̇д̇хз руубагааяоби бассад̣̇д̇хоязва ход̇и, д̇асмаа ‘‘наамагааяо руубагааяо’’д̇и ависзсзд̇ваава ‘‘бассад̣̇д̇хо гааяо’’д̇и вуд̇д̇ам̣. асаарад̣̇д̇ход̇и со жа ко бассад̣̇д̇хад̇д̇ааязва асаарад̣̇д̇хо, виг̇ад̇ад̣̇арат̇од̇и вуд̇д̇ам̣ ход̇и . самаахид̇ам̣ жид̇д̇ам̣ згаг̇г̇анд̇и жид̇д̇амби мз саммаа аахид̇ам̣ судту табид̇ам̣ аббид̇ам̣ вияа ахоси, самаахид̇ад̇д̇аа зва жа згаг̇г̇ам̣ ажалам̣ нибпанд̣̇ананд̇и. зд̇д̇аавад̇аа жхаанасса буб̣б̣абхааг̇абадибад̣̇аа гат̇ид̇аа ход̇и.
Evaṃ bhagavā attano anuttaraṃ jeṭṭhaseṭṭhabhāvaṃ brāhmaṇassa pakāsetvā idāni yāya paṭipadāya taṃ adhigato, taṃ paṭipadaṃ pubbabhāgato pabhuti dassetuṃ āraddhaṃ kho pana me, brāhmaṇātiādimāha. Tattha āraddhaṃ kho pana me, brāhmaṇa, vīriyaṃ ahosīti, brāhmaṇa, na mayā ayaṃ anuttaro jeṭṭhaseṭṭhabhāvo kusītena muṭṭhassatinā sāraddhakāyena vikkhittacitena adhigato, apica kho tadadhigamāya āraddhaṃ kho pana me vīriyaṃ ahosi. Bodhimaṇḍe nisinnena mayā catusammappadhānabhedaṃ vīriyaṃ āraddhaṃ ahosi, paggahitaṃ asithilappavattitaṃ. Āraddhattāyeva ca me taṃ asallīnaṃ ahosi . Na kevalañca vīriyameva, satipi me ārammaṇābhimukhabhāvena upaṭṭhitā ahosi, upaṭṭhitattāyeva ca asammuṭṭhā. Passaddho kāyo asāraddhoti kāyacittappassaddhivasena kāyopi me passaddho ahosi. Tattha yasmā nāmakāye passaddhe rūpakāyopi passaddhoyeva hoti, tasmā ‘‘nāmakāyo rūpakāyo’’ti avisesetvāva ‘‘passaddho kāyo’’ti vuttaṃ. Asāraddhoti so ca kho passaddhattāyeva asāraddho, vigatadarathoti vuttaṃ hoti . Samāhitaṃ cittaṃ ekagganti cittampi me sammā āhitaṃ suṭṭhu ṭhapitaṃ appitaṃ viya ahosi, samāhitattā eva ca ekaggaṃ acalaṃ nipphandananti. Ettāvatā jhānassa pubbabhāgapaṭipadā kathitā hoti.
ид̣̇аани имааяа бадибад̣̇ааяа ад̇хиг̇ад̇ам̣ батамаж̇жхаанам̣ аад̣̇им̣ гад̇ваа виж̇ж̇аад̇д̇аяабарияосаанам̣ висзсам̣ д̣̇ассзнд̇о со ко аханд̇иаад̣̇имааха. д̇ад̇т̇а яам̣ яаава винижчаяанаязна вад̇д̇аб̣б̣ам̣ сияаа, д̇ам̣ висуд̣̇д̇химаг̇г̇з (висуд̣̇д̇хи. 1.69) вуд̇д̇амзва.
Idāni imāya paṭipadāya adhigataṃ paṭhamajjhānaṃ ādiṃ katvā vijjāttayapariyosānaṃ visesaṃ dassento so kho ahantiādimāha. Tattha yaṃ yāva vinicchayanayena vattabbaṃ siyā, taṃ visuddhimagge (visuddhi. 1.69) vuttameva.
аяам̣ ко мз, б̣раахман̣аад̇иаад̣̇ийсу бана виж̇ж̇аад̇и вид̣̇ид̇агаран̣адтзна виж̇ж̇аа. гим̣ вид̣̇ид̇ам̣ гарод̇и ? буб̣б̣зниваасам̣. авиж̇ж̇аад̇и д̇ассзва буб̣б̣зниваасасса авид̣̇ид̇агаран̣адтзна д̇аббадижчаад̣̇агамохо. д̇амод̇и свзва мохо д̇аббадижчаад̣̇агадтзна д̇амо наама. аалогод̇и саа зва виж̇ж̇аа обхаасагаран̣адтзна аалогод̇и. зд̇т̇а жа виж̇ж̇аа ад̇хиг̇ад̇аад̇и ад̇т̇о, сзсам̣ басам̣сааважанам̣. яож̇анаа банзд̇т̇а – аяам̣ ко мз виж̇ж̇аа ад̇хиг̇ад̇аа, д̇асса мз ад̇хиг̇ад̇авиж̇ж̇асса авиж̇ж̇аа вихад̇аа, винадтаад̇и ад̇т̇о. гасмаа? яасмаа виж̇ж̇аа уббаннаа. зса наяо ид̇арасмимби бад̣̇ад̣̇ваяз. яат̇аа д̇анд̇и зд̇т̇а д̇анд̇и нибаад̇амад̇д̇ам̣. сад̇ияаа авиббаваасзна аббамад̇д̇асса вийрияаад̇аабзна аад̇аабино гааяз жа ж̇ийвид̇з жа анабзгкаад̇ааяа бахид̇ад̇д̇асса бзсид̇ад̇д̇ассаад̇и ад̇т̇о. ид̣̇ам̣ вуд̇д̇ам̣ ход̇и – яат̇аа аббамад̇д̇асса аад̇аабино бахид̇ад̇д̇асса вихарад̇о авиж̇ж̇аа вихан̃н̃зяяа, виж̇ж̇аа уббаж̇ж̇зяяа д̇амо вихан̃н̃зяяа, аалого уббаж̇ж̇зяяа, звамзва мама авиж̇ж̇аа вихад̇аа, виж̇ж̇аа уббаннаа, д̇амо вихад̇о, аалого уббанно. зд̇асса мз бад̇хаанаануяог̇асса ануруубамзва палам̣ лад̣̇д̇ханд̇и.
Ayaṃ kho me, brāhmaṇātiādīsu pana vijjāti viditakaraṇaṭṭhena vijjā. Kiṃ viditaṃ karoti ? Pubbenivāsaṃ. Avijjāti tasseva pubbenivāsassa aviditakaraṇaṭṭhena tappaṭicchādakamoho. Tamoti sveva moho tappaṭicchādakaṭṭhena tamo nāma. Ālokoti sā eva vijjā obhāsakaraṇaṭṭhena ālokoti. Ettha ca vijjā adhigatāti attho, sesaṃ pasaṃsāvacanaṃ. Yojanā panettha – ayaṃ kho me vijjā adhigatā, tassa me adhigatavijjassa avijjā vihatā, vinaṭṭhāti attho. Kasmā? Yasmā vijjā uppannā. Esa nayo itarasmimpi padadvaye. Yathā tanti ettha tanti nipātamattaṃ. Satiyā avippavāsena appamattassa vīriyātāpena ātāpino kāye ca jīvite ca anapekkhātāya pahitattassa pesitattassāti attho. Idaṃ vuttaṃ hoti – yathā appamattassa ātāpino pahitattassa viharato avijjā vihaññeyya, vijjā uppajjeyya tamo vihaññeyya, āloko uppajjeyya, evameva mama avijjā vihatā, vijjā uppannā, tamo vihato, āloko uppanno. Etassa me padhānānuyogassa anurūpameva phalaṃ laddhanti.
аяам̣ ко мз, б̣раахман̣а, батамаа абхиниб̣бхид̣̇аа ахоси гуггудажчаабагассзва ан̣д̣агосамхаад̇и аяам̣ ко мама, б̣раахман̣а, буб̣б̣зниваасаануссад̇ин̃аан̣амукад̇ун̣д̣агзна буб̣б̣з нивуд̇т̇аканд̇хаббадижчаад̣̇агам̣ авиж̇ж̇ан̣д̣агосам̣ бад̣̇аалзд̇ваа батамаа абхиниб̣бхид̣̇аа батамаа нигканд̇и батамаа арияааж̇аад̇и ахоси гуггудажчаабагассзва мукад̇ун̣д̣агзна ваа м̣ баад̣̇анакасикааяа ваа ан̣д̣агосам̣ бад̣̇аалзд̇ваа д̇амхаа ан̣д̣агосамхаа абхиниб̣бхид̣̇аа нигканд̇и гуггуданигааяз бажжааж̇аад̇ийд̇и. аяам̣ д̇аава буб̣б̣зниваасагат̇ааяам̣ наяо.
Ayaṃ kho me, brāhmaṇa, paṭhamā abhinibbhidā ahosi kukkuṭacchāpakasseva aṇḍakosamhāti ayaṃ kho mama, brāhmaṇa, pubbenivāsānussatiñāṇamukhatuṇḍakena pubbe nivutthakhandhappaṭicchādakaṃ avijjaṇḍakosaṃ padāletvā paṭhamā abhinibbhidā paṭhamā nikkhanti paṭhamā ariyājāti ahosi kukkuṭacchāpakasseva mukhatuṇḍakena vā ṃ pādanakhasikhāya vā aṇḍakosaṃ padāletvā tamhā aṇḍakosamhā abhinibbhidā nikkhanti kukkuṭanikāye paccājātīti. Ayaṃ tāva pubbenivāsakathāyaṃ nayo.
жуд̇убабаад̇агат̇ааяа бана виж̇ж̇аад̇и д̣̇иб̣б̣ажагкун̃аан̣авиж̇ж̇аа. авиж̇ж̇аад̇и жуд̇убабаад̇аббадижчаад̣̇игаа авиж̇ж̇аа. яат̇аа бана буб̣б̣зниваасагат̇ааяам̣ ‘‘буб̣б̣зниваасаануссад̇ин̃аан̣амукад̇ун̣д̣агзна буб̣б̣з нивуд̇т̇агканд̇хаббадижчаад̣̇агам̣ авиж̇ж̇ан̣д̣агосам̣ бад̣̇аалзд̇ваа’’д̇и вуд̇д̇ам̣, звамид̇ха ‘‘жуд̇убабаад̇ан̃аан̣амукад̇ун̣д̣агзна жуд̇убабаад̇аббадижчаад̣̇агам̣ авиж̇ж̇ан̣д̣агосам̣ бад̣̇аалзд̇ваа’’д̇и вад̇д̇аб̣б̣ам̣.
Cutupapātakathāya pana vijjāti dibbacakkhuñāṇavijjā. Avijjāti cutupapātappaṭicchādikā avijjā. Yathā pana pubbenivāsakathāyaṃ ‘‘pubbenivāsānussatiñāṇamukhatuṇḍakena pubbe nivutthakkhandhappaṭicchādakaṃ avijjaṇḍakosaṃ padāletvā’’ti vuttaṃ, evamidha ‘‘cutupapātañāṇamukhatuṇḍakena cutupapātappaṭicchādakaṃ avijjaṇḍakosaṃ padāletvā’’ti vattabbaṃ.
яам̣ банзд̇ам̣ бажжавзгкан̣ан̃аан̣абариг̇г̇ахид̇ам̣ аасаваанам̣ каяан̃аан̣аад̇хиг̇амам̣ б̣раахман̣асса д̣̇ассзнд̇о аяам̣ ко мз, б̣раахман̣а, д̇ад̇ияаа виж̇ж̇аад̇иаад̣̇имааха, д̇ад̇т̇а виж̇ж̇аад̇и арахад̇д̇амаг̇г̇авиж̇ж̇аа. авиж̇ж̇аад̇и жад̇усажжаббадижчаад̣̇игаа авиж̇ж̇аа. аяам̣ ко мз, б̣раахман̣а, д̇ад̇ияаа абхиниб̣бхид̣̇аа ахосийд̇и зд̇т̇а аяам̣ ко мама, б̣раахман̣а, аасаваанам̣ каяан̃аан̣амукад̇ун̣д̣агзна жад̇усажжабадижчаад̣̇агам̣ авиж̇ж̇ан̣д̣агосам̣ бад̣̇аалзд̇ваа д̇ад̇ияаа абхиниб̣бхид̣̇аа д̇ад̇ияаа нигканд̇и д̇ад̇ияаа арияаж̇аад̇и ахоси гуггудажчаабагассзва мукад̇ун̣д̣агзна ваа баад̣̇анакасикааяа ваа ан̣д̣агосам̣ бад̣̇аалзд̇ваа д̇амхаа ан̣д̣агосамхаа абхиниб̣бхид̣̇аа нигканд̇и гуггуданигааяз бажжааж̇аад̇ийд̇и.
Yaṃ panetaṃ paccavekkhaṇañāṇapariggahitaṃ āsavānaṃ khayañāṇādhigamaṃ brāhmaṇassa dassento ayaṃ kho me, brāhmaṇa, tatiyā vijjātiādimāha, tattha vijjāti arahattamaggavijjā. Avijjāti catusaccappaṭicchādikā avijjā. Ayaṃ kho me, brāhmaṇa, tatiyā abhinibbhidā ahosīti ettha ayaṃ kho mama, brāhmaṇa, āsavānaṃ khayañāṇamukhatuṇḍakena catusaccapaṭicchādakaṃ avijjaṇḍakosaṃ padāletvā tatiyā abhinibbhidā tatiyā nikkhanti tatiyā ariyajāti ahosi kukkuṭacchāpakasseva mukhatuṇḍakena vā pādanakhasikhāya vā aṇḍakosaṃ padāletvā tamhā aṇḍakosamhā abhinibbhidā nikkhanti kukkuṭanikāye paccājātīti.
зд̇д̇аавад̇аа гим̣ д̣̇ассзсийд̇и? со хи, б̣раахман̣а, гуггудажчаабаго ан̣д̣агосам̣ бад̣̇аалзд̇ваа д̇ад̇о нигкаманд̇о сагимзва ж̇ааяад̇и, ахам̣ бана буб̣б̣знивуд̇т̇агканд̇хаббадижчаад̣̇агам̣ авиж̇ж̇ан̣д̣агосам̣ бхинд̣̇ид̇ваа батамам̣ д̇аава буб̣б̣зниваасаануссад̇ин̃аан̣авиж̇ж̇ааяа ж̇аад̇о. д̇ад̇о сад̇д̇аанам̣ жуд̇ибадисанд̇хиббадижчаад̣̇агам̣ авиж̇ж̇ан̣д̣агосам̣ бад̣̇аалзд̇ваа д̣̇уд̇ияам̣ д̣̇иб̣б̣ажагкун̃аан̣авиж̇ж̇ааяа ж̇аад̇о, буна жад̇усажжаббадижчаад̣̇агам̣ авиж̇ж̇ан̣д̣агосам̣ бад̣̇аалзд̇ваа д̇ад̇ияам̣ аасаваанам̣ каяан̃аан̣авиж̇ж̇ааяа ж̇аад̇о. звам̣ д̇ийхи виж̇ж̇аахи д̇игкад̇д̇ум̣ ж̇аад̇омхи. саа жа мз ж̇аад̇и арияаа субарисуд̣̇д̇хаад̇и ид̣̇ам̣ д̣̇ассзд̇и. звам̣д̣̇ассзнд̇о жа буб̣б̣зниваасан̃аан̣зна ад̇ийд̇ам̣сан̃аан̣ам̣, д̣̇иб̣б̣ажагкунаа бажжуббаннаанааг̇ад̇ам̣сан̃аан̣ам̣, аасавагкаязна сагалалогияалогуд̇д̇араг̇ун̣анд̇и звам̣ д̇ийхи виж̇ж̇аахи саб̣б̣зби саб̣б̣ан̃н̃уг̇ун̣з багаасзд̇ваа ад̇д̇ано арияааяа ж̇аад̇ияаа ж̇здтасздтабхаавам̣ б̣раахман̣асса д̣̇ассзси.
Ettāvatā kiṃ dassesīti? So hi, brāhmaṇa, kukkuṭacchāpako aṇḍakosaṃ padāletvā tato nikkhamanto sakimeva jāyati, ahaṃ pana pubbenivutthakkhandhappaṭicchādakaṃ avijjaṇḍakosaṃ bhinditvā paṭhamaṃ tāva pubbenivāsānussatiñāṇavijjāya jāto. Tato sattānaṃ cutipaṭisandhippaṭicchādakaṃ avijjaṇḍakosaṃ padāletvā dutiyaṃ dibbacakkhuñāṇavijjāya jāto, puna catusaccappaṭicchādakaṃ avijjaṇḍakosaṃ padāletvā tatiyaṃ āsavānaṃ khayañāṇavijjāya jāto. Evaṃ tīhi vijjāhi tikkhattuṃ jātomhi. Sā ca me jāti ariyā suparisuddhāti idaṃ dasseti. Evaṃdassento ca pubbenivāsañāṇena atītaṃsañāṇaṃ, dibbacakkhunā paccuppannānāgataṃsañāṇaṃ, āsavakkhayena sakalalokiyalokuttaraguṇanti evaṃ tīhi vijjāhi sabbepi sabbaññuguṇe pakāsetvā attano ariyāya jātiyā jeṭṭhaseṭṭhabhāvaṃ brāhmaṇassa dassesi.
звам̣ вуд̇д̇з взран̃ж̇о б̣раахман̣од̇и звам̣ бхаг̇авад̇аа логаанугамбагзна б̣раахман̣ам̣ анугамбамаанзна ниг̇ухид̇аб̣б̣зби ад̇д̇ано арияааяа ж̇аад̇ияаа ж̇здтасздтабхаавз виж̇ж̇аад̇д̇аяабагаасигааяа д̇хаммад̣̇зсанааяа вуд̇д̇з бийд̇ивибпаарабарибун̣н̣аг̇ад̇д̇ажид̇д̇о взран̃ж̇о б̣раахман̣о д̇ам̣ бхаг̇авад̇о арияааяа ж̇аад̇ияаа ж̇здтасздтабхаавам̣ вид̣̇ид̇ваа ‘‘ийд̣̇исам̣ наамаахам̣ саб̣б̣алогаж̇здтам̣ саб̣б̣аг̇ун̣асаманнааг̇ад̇ам̣ саб̣б̣ан̃н̃ум̣ ‘ан̃н̃зсам̣ абхиваад̣̇анаад̣̇игаммам̣ на гарод̇ий’д̇и аважам̣, д̇хирад̇т̇у вад̇а, бхо, ан̃н̃аан̣а’’нд̇и ад̇д̇аанам̣ г̇арахид̇ваа ‘‘аяам̣ д̣̇аани логз арияааяа ж̇аад̇ияаа бурзж̇аад̇адтзна ж̇здто, саб̣б̣аг̇ун̣зхи аббадисамадтзна сздто’’д̇и нидтам̣ г̇анд̇ваа бхаг̇аванд̇ам̣ зд̇ад̣̇авожа – ж̇здто бхавам̣ г̇од̇амо сздто бхавам̣ г̇од̇амод̇и. зван̃жа бана вад̇ваа буна д̇ам̣ бхаг̇авад̇о д̇хаммад̣̇зсанам̣ аб̣бханумод̣̇амаано абхигганд̇ам̣ бхо г̇од̇амаад̇иаад̣̇имааха. д̇ам̣ вуд̇д̇ад̇т̇амзваад̇и.
Evaṃ vutte verañjo brāhmaṇoti evaṃ bhagavatā lokānukampakena brāhmaṇaṃ anukampamānena niguhitabbepi attano ariyāya jātiyā jeṭṭhaseṭṭhabhāve vijjāttayapakāsikāya dhammadesanāya vutte pītivipphāraparipuṇṇagattacitto verañjo brāhmaṇo taṃ bhagavato ariyāya jātiyā jeṭṭhaseṭṭhabhāvaṃ viditvā ‘‘īdisaṃ nāmāhaṃ sabbalokajeṭṭhaṃ sabbaguṇasamannāgataṃ sabbaññuṃ ‘aññesaṃ abhivādanādikammaṃ na karotī’ti avacaṃ, dhiratthu vata, bho, aññāṇa’’nti attānaṃ garahitvā ‘‘ayaṃ dāni loke ariyāya jātiyā purejātaṭṭhena jeṭṭho, sabbaguṇehi appaṭisamaṭṭhena seṭṭho’’ti niṭṭhaṃ gantvā bhagavantaṃ etadavoca – jeṭṭho bhavaṃ gotamo seṭṭho bhavaṃ gotamoti. Evañca pana vatvā puna taṃ bhagavato dhammadesanaṃ abbhanumodamāno abhikkantaṃ bho gotamātiādimāha. Taṃ vuttatthamevāti.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 1. взран̃ж̇асуд̇д̇ам̣ • 1. Verañjasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / ан̇г̇уд̇д̇аранигааяа (дийгаа) • Aṅguttaranikāya (ṭīkā) / 1. взран̃ж̇асуд̇д̇аван̣н̣анаа • 1. Verañjasuttavaṇṇanā
