| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (дийгаа) • Aṅguttaranikāya (ṭīkā) |
2. махааваг̇г̇о
2. Mahāvaggo
1. взран̃ж̇асуд̇д̇аван̣н̣анаа
1. Verañjasuttavaṇṇanā
11. д̣̇уд̇ияасса батамз взран̃ж̇ааяам̣ вихарад̇ийд̇и (баараа. адта. 1.1) зд̇т̇а взран̃ж̇аад̇и д̇асса наг̇арассзд̇ам̣ ад̇хиважанам̣, д̇ассам̣ взран̃ж̇ааяам̣. самийбад̇т̇з бхуммаважанам̣. нал̣зрубужиманд̣̇амуулзд̇и зд̇т̇а нал̣зру наама яагко. бужиманд̣̇од̇и нимб̣аругко. мууланд̇и самийбам̣. аяан̃хи муула-сад̣̇д̣̇о ‘‘муулаани уд̣̇д̇харзяяа анд̇амасо усийранаал̣имад̇д̇аанибий’’д̇иаад̣̇ийсу (а. ни. 4.195) мууламуулз д̣̇иссад̇и. ‘‘лобхо агусаламуула’’нд̇иаад̣̇ийсу (д̣̇ий. ни. 3.305; бари. 323) асаад̇хааран̣ахзд̇умхи. ‘‘яаава маж̇жханхигз гаалз чааяаа парад̇и, ниваад̇з бан̣н̣аани бад̇анд̇и, зд̇д̇аавад̇аа ругкамуула’’нд̇иаад̣̇ийсу (баараа. 494) самийбз. ид̇ха бана самийбз ад̇хиббзд̇о, д̇асмаа нал̣зруяагкзна ад̇хиг̇г̇ахид̇асса бужиманд̣̇асса самийбзд̇и звамзд̇т̇а ад̇т̇о д̣̇адтаб̣б̣о. со гира бужиманд̣̇о раман̣ийяо баасаад̣̇иго анзгзсам̣ ругкаанам̣ аад̇хибажжам̣ вияа гурумаано д̇асса наг̇арасса авид̣̇уурз г̇аманааг̇аманасамбаннз таанз ахоси. ат̇а бхаг̇аваа взран̃ж̇ам̣ г̇анд̇ваа бад̇ируубз таанз вихаранд̇о д̇асса ругкасса самийбз хздтаабхааг̇з вихааси. д̇зна вуд̇д̇ам̣ ‘‘взран̃ж̇ааяам̣ вихарад̇и нал̣зрубужиманд̣̇амуулз’’д̇и.
11. Dutiyassa paṭhame verañjāyaṃ viharatīti (pārā. aṭṭha. 1.1) ettha verañjāti tassa nagarassetaṃ adhivacanaṃ, tassaṃ verañjāyaṃ. Samīpatthe bhummavacanaṃ. Naḷerupucimandamūleti ettha naḷeru nāma yakkho. Pucimandoti nimbarukkho. Mūlanti samīpaṃ. Ayañhi mūla-saddo ‘‘mūlāni uddhareyya antamaso usīranāḷimattānipī’’tiādīsu (a. ni. 4.195) mūlamūle dissati. ‘‘Lobho akusalamūla’’ntiādīsu (dī. ni. 3.305; pari. 323) asādhāraṇahetumhi. ‘‘Yāva majjhanhike kāle chāyā pharati, nivāte paṇṇāni patanti, ettāvatā rukkhamūla’’ntiādīsu (pārā. 494) samīpe. Idha pana samīpe adhippeto, tasmā naḷeruyakkhena adhiggahitassa pucimandassa samīpeti evamettha attho daṭṭhabbo. So kira pucimando ramaṇīyo pāsādiko anekesaṃ rukkhānaṃ ādhipaccaṃ viya kurumāno tassa nagarassa avidūre gamanāgamanasampanne ṭhāne ahosi. Atha bhagavā verañjaṃ gantvā patirūpe ṭhāne viharanto tassa rukkhassa samīpe heṭṭhābhāge vihāsi. Tena vuttaṃ ‘‘verañjāyaṃ viharati naḷerupucimandamūle’’ti.
бажжудтаанам̣ (саарад̇т̇а. дий. 1.2) наама аасанаа вудтаананд̇и ааха ‘‘наасанаа вудтаад̇ий’’д̇и. нисиннаасанад̇о на вудтахад̇ийд̇и ад̇т̇о. зд̇т̇а жа ж̇ин̣н̣з…бз… ваяоануббад̇д̇зд̇и убаяог̇аважанам̣ аасанаа вудтаанагирияаабзгкам̣ на ход̇и. д̇асмаа ‘‘ж̇ин̣н̣з…бз… ваяоануббад̇д̇з д̣̇исваа’’д̇и аж̇жхаахаарам̣ гад̇ваа ад̇т̇о взд̣̇ид̇аб̣б̣о. ат̇а ваа бажжуг̇г̇аманагирияаабзгкам̣ убаяог̇аважанам̣, д̇асмаа на бажжудтаад̇ийд̇и удтааяа бажжуг̇г̇аманам̣ на гарод̇ийд̇и ад̇т̇о взд̣̇ид̇аб̣б̣о. бажжуг̇г̇аманамби хи бажжудтаананд̇и вужжад̇и. вуд̇д̇ан̃хзд̇ам̣ ‘‘аажарияам̣ бана д̣̇уурад̇ова д̣̇исваа бажжудтааяа бажжуг̇г̇аманагаран̣ам̣ бажжудтаанам̣ наамаа’’д̇и. наасанаа вудтаад̇ийд̇и иминаа бана бажжуг̇г̇аманаабхаавасса убалагкан̣амад̇д̇ам̣ д̣̇ассид̇анд̇и д̣̇адтаб̣б̣ам̣. вибхааванз наама ад̇т̇зд̇и багад̇ивибхааванасан̇каад̇з ад̇т̇з. на абхиваад̣̇зд̇и ваад̇и на абхиваад̣̇зд̇аб̣б̣анд̇и ваа саллагкзд̇ийд̇и вуд̇д̇ам̣ ход̇и.
Paccuṭṭhānaṃ (sārattha. ṭī. 1.2) nāma āsanā vuṭṭhānanti āha ‘‘nāsanā vuṭṭhātī’’ti. Nisinnāsanato na vuṭṭhahatīti attho. Ettha ca jiṇṇe…pe… vayoanuppatteti upayogavacanaṃ āsanā vuṭṭhānakiriyāpekkhaṃ na hoti. Tasmā ‘‘jiṇṇe…pe… vayoanuppatte disvā’’ti ajjhāhāraṃ katvā attho veditabbo. Atha vā paccuggamanakiriyāpekkhaṃ upayogavacanaṃ, tasmā na paccuṭṭhātīti uṭṭhāya paccuggamanaṃ na karotīti attho veditabbo. Paccuggamanampi hi paccuṭṭhānanti vuccati. Vuttañhetaṃ ‘‘ācariyaṃ pana dūratova disvā paccuṭṭhāya paccuggamanakaraṇaṃ paccuṭṭhānaṃ nāmā’’ti. Nāsanā vuṭṭhātīti iminā pana paccuggamanābhāvassa upalakkhaṇamattaṃ dassitanti daṭṭhabbaṃ. Vibhāvane nāma attheti pakativibhāvanasaṅkhāte atthe. Na abhivādeti vāti na abhivādetabbanti vā sallakkhetīti vuttaṃ hoti.
д̇ам̣ ан̃н̃аан̣анд̇и ‘‘аяам̣ мама абхиваад̣̇анаад̣̇ийни гаад̇ум̣ арахаруубо на ход̇ий’’д̇и аж̇аананавасзна бавад̇д̇ам̣ ан̃н̃аан̣ам̣. ологзнд̇од̇и ‘‘д̣̇угкам̣ ко аг̇аараво вихарад̇и аббад̇иссо, гим̣ ну ко ахам̣ саман̣ам̣ ваа б̣раахман̣ам̣ ваа саггарзяяам̣ г̇арум̣ гарзяяа’’нд̇иаад̣̇исуд̇д̇авасзнзва (а. ни. 4.21) н̃аан̣ажагкунаа ологзнд̇о. нибажжагаараараханд̇и бан̣ибаад̇аарахам̣. самбад̇иж̇аад̇од̇и мухуд̇д̇аж̇аад̇о, ж̇аад̇асамананд̇арамзваад̇и вуд̇д̇ам̣ ход̇и. уд̇д̇арзна мукод̇и уд̇д̇арад̣̇исаабхимуко. ‘‘сад̇д̇абад̣̇авийд̇ихаарзна г̇анд̇ваа сагалам̣ д̣̇асасахассилогад̇хаад̇ум̣ ологзси’’нд̇и ид̣̇ам̣ –
Taṃ aññāṇanti ‘‘ayaṃ mama abhivādanādīni kātuṃ araharūpo na hotī’’ti ajānanavasena pavattaṃ aññāṇaṃ. Olokentoti ‘‘dukkhaṃ kho agāravo viharati appatisso, kiṃ nu kho ahaṃ samaṇaṃ vā brāhmaṇaṃ vā sakkareyyaṃ garuṃ kareyya’’ntiādisuttavaseneva (a. ni. 4.21) ñāṇacakkhunā olokento. Nipaccakārārahanti paṇipātārahaṃ. Sampatijātoti muhuttajāto, jātasamanantaramevāti vuttaṃ hoti. Uttarena mukhoti uttaradisābhimukho. ‘‘Sattapadavītihārena gantvā sakalaṃ dasasahassilokadhātuṃ olokesi’’nti idaṃ –
‘‘д̇хаммад̇аа зсаа, бхигкавз, самбад̇иж̇аад̇о б̣од̇хисад̇д̇о самзхи баад̣̇зхи бад̇идтахид̇ваа уд̇д̇араабхимуко сад̇д̇абад̣̇авийд̇ихаарзна г̇ажчад̇и, сзд̇амхи чад̇д̇з ануд̇хаарияамаанз саб̣б̣аа д̣̇исаа вилогзд̇и, аасабхин̃жа ваажам̣ бхаасад̇ий’’д̇и (д̣̇ий. ни. 2.31) –
‘‘Dhammatā esā, bhikkhave, sampatijāto bodhisatto samehi pādehi patiṭṭhahitvā uttarābhimukho sattapadavītihārena gacchati, setamhi chatte anudhāriyamāne sabbā disā viloketi, āsabhiñca vācaṃ bhāsatī’’ti (dī. ni. 2.31) –
звам̣ баал̣ияам̣ сад̇д̇абад̣̇авийд̇ихаарубари тид̇асса вияа саб̣б̣аад̣̇исаанулоганасса гат̇ид̇ад̇д̇аа вуд̇д̇ам̣, на банзд̇ам̣ звам̣ д̣̇адтаб̣б̣ам̣ сад̇д̇абад̣̇авийд̇ихаарад̇о баг̇зва д̣̇исаавилоганасса гад̇ад̇д̇аа. махаасад̇д̇о хи мануссаанам̣ хад̇т̇ад̇о мужжид̇ваа бурад̇т̇имам̣ д̣̇исам̣ ологзси, анзгаани жаггаваал̣асахассаани зган̇г̇ан̣аани ахзсум̣. д̇ад̇т̇а д̣̇звамануссаа г̇анд̇хамаалаад̣̇ийхи бууж̇аяамаанаа, ‘‘махаабуриса, ид̇ха д̇умхзхи сад̣̇исоби над̇т̇и, гуд̇о уд̇д̇арид̇аро’’д̇и аахам̣су. звам̣ жад̇ассо д̣̇исаа, жад̇ассо ануд̣̇исаа, хздтаа, убарийд̇и д̣̇асаби д̣̇исаа анувилогзд̇ваа ад̇д̇ано сад̣̇исам̣ ад̣̇исваа ‘‘аяам̣ уд̇д̇арад̣̇исаа’’д̇и сад̇д̇абад̣̇авийд̇ихаарзна аг̇амаасийд̇и взд̣̇ид̇аб̣б̣аа. ологзсинд̇и мама бун̃н̃аанубхаавзна логавиваран̣абаадихаарияз ж̇аад̇з бан̃н̃ааяамаанам̣ д̣̇асасахассилогад̇хаад̇ум̣ мам̣сажагкунаава ологзсинд̇и ад̇т̇о.
Evaṃ pāḷiyaṃ sattapadavītihārupari ṭhitassa viya sabbādisānulokanassa kathitattā vuttaṃ, na panetaṃ evaṃ daṭṭhabbaṃ sattapadavītihārato pageva disāvilokanassa katattā. Mahāsatto hi manussānaṃ hatthato muccitvā puratthimaṃ disaṃ olokesi, anekāni cakkavāḷasahassāni ekaṅgaṇāni ahesuṃ. Tattha devamanussā gandhamālādīhi pūjayamānā, ‘‘mahāpurisa, idha tumhehi sadisopi natthi, kuto uttaritaro’’ti āhaṃsu. Evaṃ catasso disā, catasso anudisā, heṭṭhā, uparīti dasapi disā anuviloketvā attano sadisaṃ adisvā ‘‘ayaṃ uttaradisā’’ti sattapadavītihārena agamāsīti veditabbā. Olokesinti mama puññānubhāvena lokavivaraṇapāṭihāriye jāte paññāyamānaṃ dasasahassilokadhātuṃ maṃsacakkhunāva olokesinti attho.
махаабурисод̇и ж̇аад̇иг̇од̇д̇агулаббад̣̇зсаад̣̇ивасзна маханд̇абурисо. аг̇г̇од̇и г̇ун̣зхи саб̣б̣аббад̇хаано. ж̇здтод̇и г̇ун̣авасзнзва саб̣б̣зсам̣ вуд̣̇д̇хад̇амо, г̇ун̣зхи махаллагад̇амод̇и вуд̇д̇ам̣ ход̇и. сздтод̇и г̇ун̣авасзнзва саб̣б̣зсам̣ басад̇т̇ад̇амо. ад̇т̇ад̇о бана бажчимаани д̣̇вз буримассзва взважанаанийд̇и взд̣̇ид̇аб̣б̣ам̣. д̇аяаад̇и ниссаггз гаран̣аважанам̣. уд̇д̇арид̇арод̇и ад̇хигад̇аро. бад̇имаанзсийд̇и бууж̇зси. аасабхинд̇и уд̇д̇амам̣. маяхам̣ абхиваад̣̇анаад̣̇ирахо буг̇г̇алод̇и маяхам̣ абхиваад̣̇анаад̣̇игирияааяа арахо анужчавиго буг̇г̇ало. нижжасаабзгкад̇ааяа банзд̇т̇а самаасо д̣̇адтаб̣б̣о. д̇ат̇ааг̇ад̇аад̇и д̇ат̇ааг̇ад̇ад̇о, д̇ат̇ааг̇ад̇асса санд̇игаад̇и вуд̇д̇ам̣ ход̇и. зваруубанд̇и абхиваад̣̇анаад̣̇исабхаавам̣. барибаагасит̇илаб̣анд̇хананд̇и барибаагзна сит̇илаб̣анд̇ханам̣.
Mahāpurisoti jātigottakulappadesādivasena mahantapuriso. Aggoti guṇehi sabbappadhāno. Jeṭṭhoti guṇavaseneva sabbesaṃ vuddhatamo, guṇehi mahallakatamoti vuttaṃ hoti. Seṭṭhoti guṇavaseneva sabbesaṃ pasatthatamo. Atthato pana pacchimāni dve purimasseva vevacanānīti veditabbaṃ. Tayāti nissakke karaṇavacanaṃ. Uttaritaroti adhikataro. Patimānesīti pūjesi. Āsabhinti uttamaṃ. Mayhaṃ abhivādanādiraho puggaloti mayhaṃ abhivādanādikiriyāya araho anucchaviko puggalo. Niccasāpekkhatāya panettha samāso daṭṭhabbo. Tathāgatāti tathāgatato, tathāgatassa santikāti vuttaṃ hoti. Evarūpanti abhivādanādisabhāvaṃ. Paripākasithilabandhananti paripākena sithilabandhanaṃ.
д̇ам̣ важананд̇и ‘‘наахам̣ д̇ам̣ б̣раахман̣аа’’д̇иаад̣̇иважанам̣. ‘‘наахам̣ арасаруубо, маад̣̇исаа ваа арасаруубаа’’д̇и вуд̇д̇з б̣раахман̣о т̇ад̣̇д̇хо бхавзяяа. д̇зна вуд̇д̇ам̣ ‘‘жид̇д̇амуд̣̇убхааваж̇ананад̇т̇а’’нд̇и.
Taṃ vacananti ‘‘nāhaṃ taṃ brāhmaṇā’’tiādivacanaṃ. ‘‘Nāhaṃ arasarūpo, mādisā vā arasarūpā’’ti vutte brāhmaṇo thaddho bhaveyya. Tena vuttaṃ ‘‘cittamudubhāvajananattha’’nti.
гад̇амо бана сод̇и барияааяаабзгко буллин̇г̇анид̣̇д̣̇зсо, гад̇амо со барияааяод̇и ад̇т̇о? ж̇аад̇ивасзнаад̇и кад̇д̇ияаад̣̇иж̇аад̇ивасзна. убабад̇д̇ивасзнаад̇и д̣̇звзсу убабад̇д̇ивасзна. сздтасаммад̇аанамбийд̇и аби-сад̣̇д̣̇зна баг̇зва асздтасаммад̇аананд̇и д̣̇ассзд̇и. абхинанд̣̇анд̇аананд̇и саббийд̇игад̇ан̣хаавасзна бамод̣̇амаанаанам̣. раж̇ж̇анд̇аананд̇и б̣алаварааг̇авасзна раж̇ж̇анд̇аанам̣. руубабарибхог̇зна уббаннад̇ан̣хаасамбаяуд̇д̇асоманассавзд̣̇анаа руубад̇о ниб̣б̣ад̇д̇ид̇ваа хад̣̇аяад̇аббанад̇о амб̣арасаад̣̇аяо вияа руубарасаад̇и вужжанд̇и. аавин̃жанд̇ийд̇и аагад̣дханд̇и. вад̇т̇аарамман̣аад̣̇исаамаг̇г̇ияанд̇и вад̇т̇уаарамман̣аад̣̇игааран̣асаамаг̇г̇ияам̣. анугкибанд̇од̇и ад̇д̇уггам̣санавасзна гат̇ид̇з б̣раахман̣асса асаббааяабхаавад̇о ад̇д̇аанам̣ анугкибанд̇о ануггам̣сзнд̇о.
Katamo pana soti pariyāyāpekkho pulliṅganiddeso, katamo so pariyāyoti attho? Jātivasenāti khattiyādijātivasena. Upapattivasenāti devesu upapattivasena. Seṭṭhasammatānampīti api-saddena pageva aseṭṭhasammatānanti dasseti. Abhinandantānanti sappītikataṇhāvasena pamodamānānaṃ. Rajjantānanti balavarāgavasena rajjantānaṃ. Rūpaparibhogena uppannataṇhāsampayuttasomanassavedanā rūpato nibbattitvā hadayatappanato ambarasādayo viya rūparasāti vuccanti. Āviñcantīti ākaḍḍhanti. Vatthārammaṇādisāmaggiyanti vatthuārammaṇādikāraṇasāmaggiyaṃ. Anukkhipantoti attukkaṃsanavasena kathite brāhmaṇassa asappāyabhāvato attānaṃ anukkhipanto anukkaṃsento.
зд̇асмим̣ банад̇т̇з гаран̣з саамиважананд̇и ‘‘ж̇ахид̇аа’’д̇и зд̇асмим̣ ад̇т̇з д̇ат̇ааг̇ад̇ассаад̇и гаран̣з саамиважанам̣, д̇ат̇ааг̇ад̇зна ж̇ахид̇аад̇и ад̇т̇о. мууланд̇и бхавамуулам̣. ‘‘д̇аалавад̇т̇угад̇аа’’д̇и вад̇д̇аб̣б̣з ‘‘одтамуко’’д̇иаад̣̇ийсу вияа маж̇жхзбад̣̇алобам̣ гад̇ваа а-гааран̃жа д̣̇ийгхам̣ гад̇ваа ‘‘д̇аалаавад̇т̇угад̇аа’’д̇и вуд̇д̇анд̇и ааха ‘‘д̇аалавад̇т̇у вияа нзсам̣ вад̇т̇у гад̇анд̇и д̇аалаавад̇т̇угад̇аа’’д̇и. д̇ад̇т̇а д̇ааласса вад̇т̇у д̇аалавад̇т̇у. яат̇аа аараамасса вад̇т̇убхууд̇абуб̣б̣о бад̣̇зсо аараамасса абхаавз ‘‘аараамавад̇т̇уу’’д̇и вужжад̇и, звам̣ д̇ааласса бад̇идтид̇огаасо самуулам̣ уд̣̇д̇харид̇з д̇аалз бад̣̇зсамад̇д̇з тид̇з д̇ааласса вад̇т̇убхууд̇абуб̣б̣ад̇д̇аа ‘‘д̇аалавад̇т̇уу’’д̇и вужжад̇и. нзсанд̇и руубарасаад̣̇ийнам̣. гат̇ам̣ бана д̇аалавад̇т̇у вияа нзсам̣ вад̇т̇у гад̇анд̇и ааха ‘‘яат̇аа хий’’д̇иаад̣̇и. руубаад̣̇ибарибхог̇зна уббаннад̇ан̣хааяуд̇д̇асоманассавзд̣̇анаасан̇каад̇аруубарасаад̣̇ийнам̣ жид̇д̇асанд̇аанасса ад̇хидтаанабхаавад̇о вуд̇д̇ам̣ ‘‘д̇зсам̣ буб̣б̣з уббаннабуб̣б̣абхаавзна вад̇т̇умад̇д̇з жид̇д̇асанд̇аанз гад̇з’’д̇и. д̇ад̇т̇а буб̣б̣зд̇и бурз, сарааг̇агаалзд̇и вуд̇д̇ам̣ ход̇и. д̇аалаавад̇т̇угад̇аад̇и вужжанд̇ийд̇и д̇аалавад̇т̇у вияа ад̇д̇ано вад̇т̇усса гад̇ад̇д̇аа руубарасаад̣̇аяо ‘‘д̇аалаавад̇т̇угад̇аа’’д̇и вужжанд̇и. зд̇зна бахийнагилзсаанам̣ буна уббад̇д̇ияаа абхааво д̣̇ассид̇о.
Etasmiṃ panatthe karaṇe sāmivacananti ‘‘jahitā’’ti etasmiṃ atthe tathāgatassāti karaṇe sāmivacanaṃ, tathāgatena jahitāti attho. Mūlanti bhavamūlaṃ. ‘‘Tālavatthukatā’’ti vattabbe ‘‘oṭṭhamukho’’tiādīsu viya majjhepadalopaṃ katvā a-kārañca dīghaṃ katvā ‘‘tālāvatthukatā’’ti vuttanti āha ‘‘tālavatthu viya nesaṃ vatthu katanti tālāvatthukatā’’ti. Tattha tālassa vatthu tālavatthu. Yathā ārāmassa vatthubhūtapubbo padeso ārāmassa abhāve ‘‘ārāmavatthū’’ti vuccati, evaṃ tālassa patiṭṭhitokāso samūlaṃ uddharite tāle padesamatte ṭhite tālassa vatthubhūtapubbattā ‘‘tālavatthū’’ti vuccati. Nesanti rūparasādīnaṃ. Kathaṃ pana tālavatthu viya nesaṃ vatthu katanti āha ‘‘yathā hī’’tiādi. Rūpādiparibhogena uppannataṇhāyuttasomanassavedanāsaṅkhātarūparasādīnaṃ cittasantānassa adhiṭṭhānabhāvato vuttaṃ ‘‘tesaṃ pubbe uppannapubbabhāvena vatthumatte cittasantāne kate’’ti. Tattha pubbeti pure, sarāgakāleti vuttaṃ hoti. Tālāvatthukatāti vuccantīti tālavatthu viya attano vatthussa katattā rūparasādayo ‘‘tālāvatthukatā’’ti vuccanti. Etena pahīnakilesānaṃ puna uppattiyā abhāvo dassito.
авирул̣хид̇хаммад̇д̇аад̇и авирул̣хисабхаавад̇ааяа. мад̇т̇агажчинно д̇аало бад̇д̇апалаад̣̇ийнам̣ авад̇т̇убхууд̇о д̇аалаавад̇т̇ууд̇и ааха ‘‘мад̇т̇агажчиннад̇аало вияа гад̇аа’’д̇и. зд̇зна ‘‘д̇аалаавад̇т̇у вияа гад̇аад̇и д̇аалаавад̇т̇угад̇аа’’д̇и аяам̣ виг̇г̇ахо д̣̇ассид̇о. зд̇т̇а бана ‘‘авад̇т̇убхууд̇о д̇аало вияа гад̇аад̇и авад̇т̇уд̇аалагад̇аа’’д̇и вад̇д̇аб̣б̣з висзсанасса баранибаад̇ам̣ гад̇ваа ‘‘д̇аалаавад̇т̇угад̇аа’’д̇и вуд̇д̇анд̇и д̣̇адтаб̣б̣ам̣. иминаа банад̇т̇зна ид̣̇ам̣ д̣̇ассзд̇и – руубарасаад̣̇иважанзна вибаагад̇хаммад̇хаммаа худ̇ваа буб̣б̣з уббаннагусалаагусалаа д̇хаммаа г̇ахид̇аа, д̇з уббаннааби мад̇т̇агасад̣̇исаанам̣ д̇ан̣хаавиж̇ж̇аанам̣ маг̇г̇асад̇т̇зна чиннад̇д̇аа ааяад̇им̣ д̇аалабад̇д̇асад̣̇исз вибаагагканд̇хз ниб̣б̣ад̇д̇зд̇ум̣ асамад̇т̇аа ж̇аад̇аа, д̇асмаа д̇аалаавад̇т̇у вияа гад̇аад̇и д̇аалаавад̇т̇угад̇аа руубарасаад̣̇аяод̇и . имасмим̣ ад̇т̇з ‘‘абхинанд̣̇анд̇аана’’нд̇и иминаа бад̣̇зна гусаласоманассамби сан̇г̇ахид̇анд̇и вад̣̇анд̇и. анабхаавам̣ гад̇аад̇и зд̇т̇а ану-сад̣̇д̣̇о бажчаасад̣̇д̣̇зна самаанад̇т̇од̇и ааха ‘‘яат̇аа нзсам̣ бажчаабхааво на ход̇ий’’д̇иаад̣̇и.
Aviruḷhidhammattāti aviruḷhisabhāvatāya. Matthakacchinno tālo pattaphalādīnaṃ avatthubhūto tālāvatthūti āha ‘‘matthakacchinnatālo viya katā’’ti. Etena ‘‘tālāvatthu viya katāti tālāvatthukatā’’ti ayaṃ viggaho dassito. Ettha pana ‘‘avatthubhūto tālo viya katāti avatthutālakatā’’ti vattabbe visesanassa paranipātaṃ katvā ‘‘tālāvatthukatā’’ti vuttanti daṭṭhabbaṃ. Iminā panatthena idaṃ dasseti – rūparasādivacanena vipākadhammadhammā hutvā pubbe uppannakusalākusalā dhammā gahitā, te uppannāpi matthakasadisānaṃ taṇhāvijjānaṃ maggasatthena chinnattā āyatiṃ tālapattasadise vipākakkhandhe nibbattetuṃ asamatthā jātā, tasmā tālāvatthu viya katāti tālāvatthukatā rūparasādayoti . Imasmiṃ atthe ‘‘abhinandantāna’’nti iminā padena kusalasomanassampi saṅgahitanti vadanti. Anabhāvaṃ katāti ettha anu-saddo pacchāsaddena samānatthoti āha ‘‘yathā nesaṃ pacchābhāvo na hotī’’tiādi.
яан̃жа ко д̇вам̣ санд̇хааяа вад̣̇зси, со барияааяо на ход̇ийд̇и яам̣ ванд̣̇анаад̣̇исаамаг̇г̇ирасаабхаавасан̇каад̇ам̣ гааран̣ам̣ арасаруубад̇ааяа вад̣̇зси, д̇ам̣ гааран̣ам̣ на ход̇и, на виж̇ж̇ад̇ийд̇и ад̇т̇о. нану жааяам̣ б̣раахман̣о яам̣ ванд̣̇анаад̣̇исаамаг̇г̇ирасаабхаавасан̇каад̇абарияааяам̣ санд̇хааяа ‘‘арасаруубо бхавам̣ г̇од̇амо’’д̇и ааха, ‘‘со барияааяо над̇т̇ий’’д̇и вуд̇д̇з ванд̣̇анаад̣̇ийни бхаг̇аваа гарод̇ийд̇и аабаж̇ж̇ад̇ийд̇и имам̣ анидтаббасан̇г̇ам̣ д̣̇ассзнд̇о ааха ‘‘нану жаа’’д̇иаад̣̇и.
Yañca kho tvaṃ sandhāya vadesi, so pariyāyo na hotīti yaṃ vandanādisāmaggirasābhāvasaṅkhātaṃ kāraṇaṃ arasarūpatāya vadesi, taṃ kāraṇaṃ na hoti, na vijjatīti attho. Nanu cāyaṃ brāhmaṇo yaṃ vandanādisāmaggirasābhāvasaṅkhātapariyāyaṃ sandhāya ‘‘arasarūpo bhavaṃ gotamo’’ti āha, ‘‘so pariyāyo natthī’’ti vutte vandanādīni bhagavā karotīti āpajjatīti imaṃ aniṭṭhappasaṅgaṃ dassento āha ‘‘nanu cā’’tiādi.
саб̣б̣абарияааязсууд̇и саб̣б̣аваарзсу. санд̇хааяабхаасид̇амад̇д̇анд̇и яам̣ санд̇хааяа б̣раахман̣о ‘‘ниб̣бхог̇о бхавам̣ г̇од̇амо’’д̇иаад̣̇имааха. бхаг̇аваа жа яам̣ санд̇хааяа ниб̣бхог̇ад̇аад̣̇им̣ ад̇д̇ани ануж̇аанаад̇и, д̇ам̣ санд̇хааяабхаасид̇амад̇д̇ам̣. чанд̣̇арааг̇абарибхог̇од̇и чанд̣̇арааг̇авасзна барибхог̇о. абарам̣ барияааяанд̇и ан̃н̃ам̣ гааран̣ам̣.
Sabbapariyāyesūti sabbavāresu. Sandhāyabhāsitamattanti yaṃ sandhāya brāhmaṇo ‘‘nibbhogo bhavaṃ gotamo’’tiādimāha. Bhagavā ca yaṃ sandhāya nibbhogatādiṃ attani anujānāti, taṃ sandhāyabhāsitamattaṃ. Chandarāgaparibhogoti chandarāgavasena paribhogo. Aparaṃ pariyāyanti aññaṃ kāraṇaṃ.
гуласамуд̣̇аажаарагамманд̇и гулаажаарасан̇каад̇ам̣ гаммам̣, гулажаарид̇д̇анд̇и ад̇т̇о. агирияанд̇и агаран̣абхаавам̣ . ‘‘анзгавихид̇аанам̣ баабагаанам̣ агусалаанам̣ д̇хаммаана’’нд̇и сааман̃н̃аважанзби баарисзсан̃ааяад̇о вуд̇д̇аавасзсаа агусалад̇хаммаа г̇ахзд̇аб̣б̣аад̇и ааха ‘‘табзд̇ваа д̇з д̇хаммз’’д̇иаад̣̇и, д̇з яат̇аавуд̇д̇агааяад̣̇ужжарид̇аад̣̇игз агусалад̇хаммз табзд̇ваад̇и ад̇т̇о. анзгавихид̇аад̇и анзгаббагаараа.
Kulasamudācārakammanti kulācārasaṅkhātaṃ kammaṃ, kulacārittanti attho. Akiriyanti akaraṇabhāvaṃ . ‘‘Anekavihitānaṃ pāpakānaṃ akusalānaṃ dhammāna’’nti sāmaññavacanepi pārisesañāyato vuttāvasesā akusaladhammā gahetabbāti āha ‘‘ṭhapetvā te dhamme’’tiādi, te yathāvuttakāyaduccaritādike akusaladhamme ṭhapetvāti attho. Anekavihitāti anekappakārā.
аяам̣ логад̇анд̇ийд̇и аяам̣ вуд̣дхаанам̣ абхиваад̣̇анаад̣̇игирияалагкан̣аа логаббавзн̣ий. анааг̇аамиб̣рахмаанам̣ алан̇гаараад̣̇ийсу анааг̇аамибхигкуунан̃жа жийвараад̣̇ийсу ниганд̇ивасзна рааг̇уббад̇д̇и ход̇ийд̇и анааг̇аамимаг̇г̇зна бан̃жагаамаг̇ун̣игарааг̇ассзва бахаанам̣ взд̣̇ид̇аб̣б̣анд̇и ааха ‘‘бан̃жагаамаг̇ун̣игарааг̇ассаа’’д̇и. руубаад̣̇ийсу бан̃жасу гаамаг̇ун̣зсу вад̇т̇угаамагодтаасзсу уббаж̇ж̇амаано рааг̇о ‘‘бан̃жагаамаг̇ун̣игарааг̇о’’д̇и взд̣̇ид̇аб̣б̣о. годтаасаважано хзд̇т̇а г̇ун̣а-сад̣̇д̣̇о ‘‘ваяог̇ун̣аа анубуб̣б̣ам̣ ж̇аханд̇ий’’д̇иаад̣̇ийсу (сам̣. ни. 1.4) вияа. агусалажид̇д̇ад̣̇ваяасамбаяуд̇д̇ассаад̇и д̣̇оманассасахаг̇ад̇ажид̇д̇ад̣̇ваяасамбаяуд̇д̇асса. мохасса саб̣б̣аагусаласаад̇хааран̣ад̇д̇аа ааха ‘‘саб̣б̣аагусаласамбхавассаа’’д̇и. авасзсаананд̇и саггааяад̣̇идтиаад̣̇ийнам̣.
Ayaṃ lokatantīti ayaṃ vuḍḍhānaṃ abhivādanādikiriyalakkhaṇā lokappaveṇī. Anāgāmibrahmānaṃ alaṅkārādīsu anāgāmibhikkhūnañca cīvarādīsu nikantivasena rāguppatti hotīti anāgāmimaggena pañcakāmaguṇikarāgasseva pahānaṃ veditabbanti āha ‘‘pañcakāmaguṇikarāgassā’’ti. Rūpādīsu pañcasu kāmaguṇesu vatthukāmakoṭṭhāsesu uppajjamāno rāgo ‘‘pañcakāmaguṇikarāgo’’ti veditabbo. Koṭṭhāsavacano hettha guṇa-saddo ‘‘vayoguṇā anupubbaṃ jahantī’’tiādīsu (saṃ. ni. 1.4) viya. Akusalacittadvayasampayuttassāti domanassasahagatacittadvayasampayuttassa. Mohassa sabbākusalasādhāraṇattā āha ‘‘sabbākusalasambhavassā’’ti. Avasesānanti sakkāyadiṭṭhiādīnaṃ.
ж̇иг̇ужчад̇и ман̃н̃зд̇и ахамабхиж̇аад̇о руубаваа бан̃н̃аваа гат̇ам̣ наама ан̃н̃зсам̣ абхиваад̣̇анаад̣̇им̣ гарзяяанд̇и ж̇иг̇ужчад̇и вияа, ж̇иг̇ужчад̇ийд̇и ваа саллагкзми. агусалад̇хаммз ж̇иг̇ужчамаано д̇зсам̣ саман̇г̇ибхаавамби ж̇иг̇ужчад̇ийд̇и вуд̇д̇ам̣ ‘‘агусалаанам̣ д̇хаммаанам̣ самаабад̇д̇ияаа ж̇иг̇ужчад̇ий’’д̇и. самаабад̇д̇ийд̇и зд̇ассзва взважанам̣ самаабаж̇ж̇анаа саман̇г̇ибхаавод̇и. ман̣д̣анаж̇аад̇игод̇и ман̣д̣анагасабхааво, ман̣д̣анагасийлод̇и ад̇т̇о. ж̇зг̇ужчид̇анд̇и ж̇иг̇ужчанасийлад̇ам̣.
Jigucchati maññeti ahamabhijāto rūpavā paññavā kathaṃ nāma aññesaṃ abhivādanādiṃ kareyyanti jigucchati viya, jigucchatīti vā sallakkhemi. Akusaladhamme jigucchamāno tesaṃ samaṅgibhāvampi jigucchatīti vuttaṃ ‘‘akusalānaṃ dhammānaṃ samāpattiyā jigucchatī’’ti. Samāpattīti etasseva vevacanaṃ samāpajjanā samaṅgibhāvoti. Maṇḍanajātikoti maṇḍanakasabhāvo, maṇḍanakasīloti attho. Jegucchitanti jigucchanasīlataṃ.
логаж̇здтагагамманд̇и логаж̇здтагаанам̣ гад̇д̇аб̣б̣агаммам̣, логз ваа сздтасаммад̇ам̣ гаммам̣. д̇ад̇раад̇и д̇зсу д̣̇вийсуби ад̇т̇авигаббзсу. бад̣̇аабхихид̇о ад̇т̇о бад̣̇ад̇т̇о, б̣яан̃ж̇анад̇т̇од̇и вуд̇д̇ам̣ ход̇и. винаяам̣ ваа арахад̇ийд̇и зд̇т̇а винаяанам̣ винаяо, ниг̇г̇ан̣хананд̇и ад̇т̇о. д̇знааха ‘‘ниг̇г̇ахам̣ арахад̇ийд̇и вуд̇д̇ам̣ ход̇ий’’д̇и. нану жа батамам̣ вуд̇д̇зсу д̣̇вийсуби ад̇т̇авигаббзсу сагад̇т̇з арахад̇т̇з жа д̇ад̣̇д̇хид̇абажжаяо сад̣̇д̣̇алагкан̣ад̇о д̣̇иссад̇и, на бана ‘‘винаяааяа д̇хаммам̣ д̣̇зсзд̇ий’’д̇и имасмим̣ ад̇т̇з. д̇асмаа гат̇амзд̇т̇а д̇ад̣̇д̇хид̇абажжаяод̇и ааха ‘‘вижид̇раа хи д̇ад̣̇д̇хид̇авуд̇д̇ий’’д̇и. вижид̇рад̇аа жзд̇т̇а логаббамаан̣ад̇о взд̣̇ид̇аб̣б̣аа. д̇ат̇аа хи яасмим̣ яасмим̣ ад̇т̇з д̇ад̣̇д̇хид̇аббаяог̇о логасса, д̇ад̇т̇а д̇ад̇т̇а д̇ад̣̇д̇хид̇авуд̇д̇и логад̇о сид̣̇д̇хаад̇и вижид̇раа д̇ад̣̇д̇хид̇авуд̇д̇и, д̇асмаа яат̇аа ‘‘маа сад̣̇д̣̇амагаасий’’д̇и вад̣̇анд̇о ‘‘маасад̣̇д̣̇иго’’д̇и вужжад̇и, звам̣ винаяааяа д̇хаммам̣ д̣̇зсзд̇ийд̇и взнаяигод̇и вужжад̇ийд̇и ад̇хиббааяо.
Lokajeṭṭhakakammanti lokajeṭṭhakānaṃ kattabbakammaṃ, loke vā seṭṭhasammataṃ kammaṃ. Tatrāti tesu dvīsupi atthavikappesu. Padābhihito attho padattho, byañjanatthoti vuttaṃ hoti. Vinayaṃ vā arahatīti ettha vinayanaṃ vinayo, niggaṇhananti attho. Tenāha ‘‘niggahaṃ arahatīti vuttaṃ hotī’’ti. Nanu ca paṭhamaṃ vuttesu dvīsupi atthavikappesu sakatthe arahatthe ca taddhitapaccayo saddalakkhaṇato dissati, na pana ‘‘vinayāya dhammaṃ desetī’’ti imasmiṃ atthe. Tasmā kathamettha taddhitapaccayoti āha ‘‘vicitrā hi taddhitavuttī’’ti. Vicitratā cettha lokappamāṇato veditabbā. Tathā hi yasmiṃ yasmiṃ atthe taddhitappayogo lokassa, tattha tattha taddhitavutti lokato siddhāti vicitrā taddhitavutti, tasmā yathā ‘‘mā saddamakāsī’’ti vadanto ‘‘māsaddiko’’ti vuccati, evaṃ vinayāya dhammaṃ desetīti venayikoti vuccatīti adhippāyo.
габан̣абурисод̇и г̇ун̣авирахид̇ад̇ааяа д̣̇ийнамануссо. б̣яан̃ж̇анаани авижаарзд̇ваад̇и д̇иссад̣̇ад̇д̇аад̣̇исад̣̇д̣̇зсу вияа ‘‘имасмим̣ ад̇т̇з аяам̣ наама бажжаяо’’д̇и звам̣ б̣яан̃ж̇анавижаарам̣ агад̇ваа, анибпаннабаадибад̣̇игавасзнаад̇и вуд̇д̇ам̣ ход̇и.
Kapaṇapurisoti guṇavirahitatāya dīnamanusso. Byañjanāni avicāretvāti tissadattādisaddesu viya ‘‘imasmiṃ atthe ayaṃ nāma paccayo’’ti evaṃ byañjanavicāraṃ akatvā, anipphannapāṭipadikavasenāti vuttaṃ hoti.
‘‘д̣̇звалогаг̇аб̣бхасамбад̇д̇ияаа’’д̇и вад̇вааби табзд̇ваа бхуммад̣̇звз сзсад̣̇звзсу г̇аб̣бхаг̇г̇ахан̣асса абхаавад̇о бадисанд̇хиязвзд̇т̇а г̇аб̣бхасамбад̇д̇ийд̇и взд̣̇ид̇аб̣б̣аад̇и вуд̇д̇амзвад̇т̇ам̣ виварид̇ваа д̣̇ассзнд̇о ааха ‘‘д̣̇звалогабадисанд̇хибадилаабхааяа сам̣вад̇д̇ад̇ий’’д̇и. ассаад̇и абхиваад̣̇анаад̣̇исаамийжигаммасса. маад̇угужчисмим̣ бадисанд̇хиг̇г̇ахан̣з д̣̇осам̣ д̣̇ассзнд̇од̇и маад̇ид̇о абарисуд̣̇д̇хабхаавам̣ д̣̇ассзнд̇о, аггосид̇угаамасса д̣̇аасияаа буд̇д̇од̇и д̣̇аасигужчимхи ниб̣б̣ад̇д̇абхаавз д̣̇осам̣ д̣̇ассзд̇ваа аггосанам̣ вияа бхаг̇авад̇о маад̇угужчисмим̣ бадисанд̇хиг̇г̇ахан̣з д̣̇осам̣ д̣̇ассзд̇ваа аггосанд̇оби звамаахаад̇и ад̇хиббааяо. г̇аб̣бхад̇од̇и д̣̇звалогаббадисанд̇хид̇о. д̇знзвааха ‘‘абхаб̣б̣о д̣̇звалогуубабад̇д̇им̣ баабун̣ид̇унд̇и ад̇хиббааяо’’д̇и. ‘‘хийно ваа г̇аб̣бхо ассаад̇и абаг̇аб̣бхо’’д̇и имасса виг̇г̇ахасса згзна барияааязна ад̇хиббааяам̣ д̣̇ассзнд̇о ааха ‘‘д̣̇звалогаг̇аб̣бхабариб̣аахирад̇д̇аа ааяад̇им̣ хийнаг̇аб̣бхабадилаабхабхааг̇ий’’д̇и. ид̇и-сад̣̇д̣̇о хзд̇уад̇т̇о. яасмаа ааяад̇имби хийнаг̇аб̣бхабадилаабхабхааг̇ий, д̇асмаа хийно ваа г̇аб̣бхо ассаад̇и абаг̇аб̣бход̇и ад̇хиббааяо. буна д̇ассзва виг̇г̇ахасса ‘‘год̇хавасзна…бз… д̣̇ассзнд̇о’’д̇и хздтаа вуд̇д̇анаяасса ануруубам̣ гад̇ваа ад̇хиббааяам̣ д̣̇ассзнд̇о ааха ‘‘хийно ваасса маад̇угужчисмим̣ г̇аб̣бхаваасо ахосийд̇и ад̇хиббааяо’’д̇и. г̇аб̣бха-сад̣̇д̣̇о ад̇т̇и маад̇угужчибарияааяо ‘‘г̇аб̣бхз васад̇и маан̣аво’’д̇иаад̣̇ийсу (ж̇аа. 1.15.363) вияа. ад̇т̇и маад̇угужчисмим̣ ниб̣б̣ад̇д̇асад̇д̇абарияааяо ‘‘анд̇амасо г̇аб̣бхабаад̇анам̣ убаад̣̇ааяаа’’д̇иаад̣̇ийсу (махаава. 129) вияа. д̇ад̇т̇а маад̇угужчибарияааяам̣ г̇ахзд̇ваа ад̇т̇ам̣ д̣̇ассзнд̇о ааха ‘‘анааг̇ад̇з г̇аб̣бхасзяяаа’’д̇и. г̇аб̣бхз сзяяаа г̇аб̣бхасзяяаа. ануд̇д̇арзна маг̇г̇знаад̇и аг̇г̇амаг̇г̇зна. гаммагилзсаанам̣ маг̇г̇зна вихад̇ад̇д̇аа ааха ‘‘вихад̇агааран̣ад̇д̇аа’’д̇и. ид̇араа д̇иссобийд̇и ан̣д̣аж̇асам̣сзд̣̇аж̇аобабаад̇игаа. зд̇т̇а жа яад̣̇иби ‘‘абаг̇аб̣бхо’’д̇и имасса ануруубад̇о г̇аб̣бхасзяяаа зва вад̇д̇аб̣б̣аа, басан̇г̇ад̇о бана лаб̣бхамаанам̣ саб̣б̣амби вад̇д̇ум̣ ваддад̇ийд̇и бунаб̣бхаваабхиниб̣б̣ад̇д̇иби вуд̇д̇аад̇и взд̣̇ид̇аб̣б̣аа.
‘‘Devalokagabbhasampattiyā’’ti vatvāpi ṭhapetvā bhummadeve sesadevesu gabbhaggahaṇassa abhāvato paṭisandhiyevettha gabbhasampattīti veditabbāti vuttamevatthaṃ vivaritvā dassento āha ‘‘devalokapaṭisandhipaṭilābhāya saṃvattatī’’ti. Assāti abhivādanādisāmīcikammassa. Mātukucchismiṃpaṭisandhiggahaṇe dosaṃ dassentoti mātito aparisuddhabhāvaṃ dassento, akkositukāmassa dāsiyā puttoti dāsikucchimhi nibbattabhāve dosaṃ dassetvā akkosanaṃ viya bhagavato mātukucchismiṃ paṭisandhiggahaṇe dosaṃ dassetvā akkosantopi evamāhāti adhippāyo. Gabbhatoti devalokappaṭisandhito. Tenevāha ‘‘abhabbo devalokūpapattiṃ pāpuṇitunti adhippāyo’’ti. ‘‘Hīno vā gabbho assāti apagabbho’’ti imassa viggahassa ekena pariyāyena adhippāyaṃ dassento āha ‘‘devalokagabbhaparibāhirattā āyatiṃ hīnagabbhapaṭilābhabhāgī’’ti. Iti-saddo hetuattho. Yasmā āyatimpi hīnagabbhapaṭilābhabhāgī, tasmā hīno vā gabbho assāti apagabbhoti adhippāyo. Puna tasseva viggahassa ‘‘kodhavasena…pe… dassento’’ti heṭṭhā vuttanayassa anurūpaṃ katvā adhippāyaṃ dassento āha ‘‘hīno vāssa mātukucchismiṃ gabbhavāso ahosīti adhippāyo’’ti. Gabbha-saddo atthi mātukucchipariyāyo ‘‘gabbhe vasati māṇavo’’tiādīsu (jā. 1.15.363) viya. Atthi mātukucchismiṃ nibbattasattapariyāyo ‘‘antamaso gabbhapātanaṃ upādāyā’’tiādīsu (mahāva. 129) viya. Tattha mātukucchipariyāyaṃ gahetvā atthaṃ dassento āha ‘‘anāgate gabbhaseyyā’’ti. Gabbhe seyyā gabbhaseyyā. Anuttarena maggenāti aggamaggena. Kammakilesānaṃ maggena vihatattā āha ‘‘vihatakāraṇattā’’ti. Itarā tissopīti aṇḍajasaṃsedajaopapātikā. Ettha ca yadipi ‘‘apagabbho’’ti imassa anurūpato gabbhaseyyā eva vattabbā, pasaṅgato pana labbhamānaṃ sabbampi vattuṃ vaṭṭatīti punabbhavābhinibbattipi vuttāti veditabbā.
ид̣̇аани сад̇д̇абарияааяасса г̇аб̣бха-сад̣̇д̣̇асса васзна виг̇г̇аханаанад̇д̇ам̣ д̣̇ассзнд̇о ааха ‘‘абижаа’’д̇иаад̣̇и. имасмим̣ бана вигаббз г̇аб̣бхасзяяаа бунаб̣бхаваабхиниб̣б̣ад̇д̇ийд̇и убхаяамби г̇аб̣бхасзяяавасзнзва вуд̇д̇анд̇иби вад̣̇анд̇и. нану жа ‘‘ааяад̇им̣ г̇аб̣бхасзяяаа бахийнаа’’д̇и вуд̇д̇ад̇д̇аа г̇аб̣бхасса сзяяаа зва бахийнаа, на бана г̇аб̣бход̇и аабаж̇ж̇ад̇ийд̇и ааха ‘‘яат̇аа жаа’’д̇иаад̣̇и. ат̇а ‘‘абхиниб̣б̣ад̇д̇ий’’д̇и зд̇д̇агамзва авад̇ваа бунаб̣бхаваг̇г̇ахан̣ам̣ гимад̇т̇анд̇и ааха ‘‘абхиниб̣б̣ад̇д̇и жа наамаа’’д̇иаад̣̇и. абунаб̣бхавабхууд̇аад̇и кан̣з кан̣з уббаж̇ж̇амаанаанам̣ д̇хаммаанам̣ абхиниб̣б̣ад̇д̇и.
Idāni sattapariyāyassa gabbha-saddassa vasena viggahanānattaṃ dassento āha ‘‘apicā’’tiādi. Imasmiṃ pana vikappe gabbhaseyyā punabbhavābhinibbattīti ubhayampi gabbhaseyyavaseneva vuttantipi vadanti. Nanu ca ‘‘āyatiṃ gabbhaseyyā pahīnā’’ti vuttattā gabbhassa seyyā eva pahīnā, na pana gabbhoti āpajjatīti āha ‘‘yathā cā’’tiādi. Atha ‘‘abhinibbattī’’ti ettakameva avatvā punabbhavaggahaṇaṃ kimatthanti āha ‘‘abhinibbatti ca nāmā’’tiādi. Apunabbhavabhūtāti khaṇe khaṇe uppajjamānānaṃ dhammānaṃ abhinibbatti.
д̇хаммад̇хаад̇унд̇и зд̇т̇а д̇хаммз анавасзсз д̇хаарзд̇и яаат̇аавад̇о убад̇хаарзд̇ийд̇и д̇хаммад̇хаад̇у, д̇хаммаанам̣ яат̇аасабхаавад̇о аваб̣уж̇жханасабхааво, саб̣б̣ан̃н̃уд̇ан̃н̃аан̣ассзд̇ам̣ ад̇хиважанам̣. бадивиж̇жхид̇ваад̇и сажчигад̇ваа, бадилабхид̇ваад̇и ад̇т̇о, бадилаабхахзд̇ууд̇и вуд̇д̇ам̣ ход̇и. д̣̇зсанаавилаасаббад̇д̇о ход̇ийд̇и руживасзна баривад̇д̇зд̇ваа д̣̇ассзд̇ум̣ самад̇т̇ад̇аа д̣̇зсанаавилаасо, д̇ам̣ бад̇д̇о ад̇хиг̇ад̇од̇и ад̇т̇о. гарун̣аавибпааранд̇и саб̣б̣асад̇д̇зсу махаагарун̣ааяа паран̣ам̣. д̇аад̣̇илагкан̣амзва буна убамааяа вибхаавзд̇ваа д̣̇ассзнд̇о ааха ‘‘бат̇авийсамажид̇д̇ад̇а’’нд̇и. яат̇аа бат̇авий сужиасужинигкзбажчзд̣̇анабхзд̣̇анаад̣̇ийсу на вигамбад̇и, анурод̇хавирод̇хам̣ на баабун̣аад̇и, звам̣ идтаанидтзсу лаабхаалаабхаад̣̇ийсу анурод̇хавирод̇хаббахаанад̇о авигамбид̇ажид̇д̇ад̇ааяа бат̇авийсамажид̇д̇ад̇анд̇и ад̇т̇о. агуббад̇хаммад̇анд̇и зд̇т̇а агуббад̇хаммо наама паласамаабад̇д̇ийд̇и гзжи вад̣̇анд̇и. ‘‘барзсу бана аггосанд̇зсуби ад̇д̇ано бат̇авийсамажид̇д̇ад̇ааяа агуббанасабхаавад̇анд̇и звамзд̇т̇а ад̇т̇о г̇ахзд̇аб̣б̣о’’д̇и амхаагам̣ канд̇и. ж̇арааяа анусаданд̇и ж̇арааяа баливзтид̇ам̣. б̣раахман̣асса вуд̣̇д̇хад̇ааяа аасаннавуд̇д̇имаран̣анд̇и самбхааванавасзна ‘‘аж̇ж̇а марид̇ваа’’д̇иаад̣̇и вуд̇д̇ам̣. ‘‘маханд̇зна ко бана уссаахзнаа’’д̇и саад̇ху ко бана д̇ат̇ааруубаанам̣ арахад̇ам̣ д̣̇ассанам̣ ход̇ий’’д̇и звам̣ сан̃ж̇аад̇амахуссаахзна. аббадисамам̣ бурзж̇аад̇абхааванд̇и анан̃н̃асаад̇хааран̣ам̣ бурзж̇аад̇абхаавам̣. над̇т̇и зд̇асса бадисамод̇и аббадисамо, бурзж̇аад̇абхааво.
Dhammadhātunti ettha dhamme anavasese dhāreti yāthāvato upadhāretīti dhammadhātu, dhammānaṃ yathāsabhāvato avabujjhanasabhāvo, sabbaññutaññāṇassetaṃ adhivacanaṃ. Paṭivijjhitvāti sacchikatvā, paṭilabhitvāti attho, paṭilābhahetūti vuttaṃ hoti. Desanāvilāsappatto hotīti rucivasena parivattetvā dassetuṃ samatthatā desanāvilāso, taṃ patto adhigatoti attho. Karuṇāvipphāranti sabbasattesu mahākaruṇāya pharaṇaṃ. Tādilakkhaṇameva puna upamāya vibhāvetvā dassento āha ‘‘pathavīsamacittata’’nti. Yathā pathavī suciasucinikkhepacchedanabhedanādīsu na vikampati, anurodhavirodhaṃ na pāpuṇāti, evaṃ iṭṭhāniṭṭhesu lābhālābhādīsu anurodhavirodhappahānato avikampitacittatāya pathavīsamacittatanti attho. Akuppadhammatanti ettha akuppadhammo nāma phalasamāpattīti keci vadanti. ‘‘Paresu pana akkosantesupi attano pathavīsamacittatāya akuppanasabhāvatanti evamettha attho gahetabbo’’ti amhākaṃ khanti. Jarāya anusaṭanti jarāya paliveṭhitaṃ. Brāhmaṇassa vuddhatāya āsannavuttimaraṇanti sambhāvanavasena ‘‘ajja maritvā’’tiādi vuttaṃ. ‘‘Mahantena kho pana ussāhenā’’ti sādhu kho pana tathārūpānaṃ arahataṃ dassanaṃ hotī’’ti evaṃ sañjātamahussāhena. Appaṭisamaṃ purejātabhāvanti anaññasādhāraṇaṃ purejātabhāvaṃ. Natthi etassa paṭisamoti appaṭisamo, purejātabhāvo.
багкз вид̇хунанд̇аад̇и бад̇д̇з жаалзнд̇аа. нигкаманд̇аананд̇и нид̣̇д̇хааран̣з саамиважанам̣, нигканд̇зсууд̇и ад̇т̇о.
Pakkhe vidhunantāti patte cālentā. Nikkhamantānanti niddhāraṇe sāmivacanaṃ, nikkhantesūti attho.
со ж̇здто ид̇и асса важанийяод̇и яо батамад̇арам̣ ан̣д̣агосад̇о нигканд̇о гуггудабод̇аго, со ж̇здтод̇и важанийяо асса, бхавзяяаад̇и ад̇т̇о. самбадибаад̣̇знд̇од̇и сам̣санд̣̇знд̇о. д̇ибхуумабарияаабаннааби сад̇д̇аа авиж̇ж̇аагосасса анд̇о бавидтаа д̇ад̇т̇а д̇ад̇т̇а аббахийнааяа авиж̇ж̇ааяа взтид̇ад̇д̇аад̇и ааха ‘‘авиж̇ж̇аагосасса анд̇о бавидтзсу сад̇д̇зсуу’’д̇и ан̣д̣агосанд̇и б̣ийж̇агабаалам̣. логасанниваасзд̇и логоязва сан̇г̇амма самааг̇амма ниваасанадтзна логасанниваасо, сад̇д̇анигааяо. саммаасамб̣од̇хинд̇и зд̇т̇а саммаад̇и авибарийд̇ад̇т̇о, сам̣-сад̣̇д̣̇о сааманд̇и имамад̇т̇ам̣ д̣̇ийбзд̇и. д̇асмаа саммаа авибарийд̇знаагаарзна саяамзва жад̇д̇аари сажжаани б̣уж̇жхад̇и бадивиж̇жхад̇ийд̇и саммаасамб̣од̇хийд̇и маг̇г̇о вужжад̇и. д̇знааха ‘‘саммаа сааман̃жа б̣од̇хи’’нд̇и, саммаа саяамзва жа б̣уж̇жханаганд̇и ад̇т̇о. саммаад̇и ваа басад̇т̇аважано, сам̣-сад̣̇д̣̇о сунд̣̇араважанод̇и ааха ‘‘ат̇а ваа басад̇т̇ам̣ сунд̣̇аран̃жа б̣од̇хи’’нд̇и.
So jeṭṭho iti assa vacanīyoti yo paṭhamataraṃ aṇḍakosato nikkhanto kukkuṭapotako, so jeṭṭhoti vacanīyo assa, bhaveyyāti attho. Sampaṭipādentoti saṃsandento. Tibhūmapariyāpannāpi sattā avijjākosassa anto paviṭṭhā tattha tattha appahīnāya avijjāya veṭhitattāti āha ‘‘avijjākosassa anto paviṭṭhesu sattesū’’ti aṇḍakosanti bījakapālaṃ. Lokasannivāseti lokoyeva saṅgamma samāgamma nivāsanaṭṭhena lokasannivāso, sattanikāyo. Sammāsambodhinti ettha sammāti aviparītattho, saṃ-saddo sāmanti imamatthaṃ dīpeti. Tasmā sammā aviparītenākārena sayameva cattāri saccāni bujjhati paṭivijjhatīti sammāsambodhīti maggo vuccati. Tenāha ‘‘sammā sāmañca bodhi’’nti, sammā sayameva ca bujjhanakanti attho. Sammāti vā pasatthavacano, saṃ-saddo sundaravacanoti āha ‘‘atha vā pasatthaṃ sundarañca bodhi’’nti.
асаб̣б̣аг̇ун̣ад̣̇ааяагад̇д̇аад̇и саб̣б̣аг̇ун̣аанам̣ ад̣̇ааяагад̇д̇аа. саб̣б̣аг̇ун̣з на д̣̇ад̣̇аад̇ийд̇и хи асаб̣б̣аг̇ун̣ад̣̇ааяаго , асамад̇т̇асамаасояам̣ г̇амагад̇д̇аа яат̇аа ‘‘асуурияабассаани мукааний’’д̇и. д̇иссо виж̇ж̇аад̇и убаниссаяавад̇о сахзва арахад̇д̇апалзна д̇иссо виж̇ж̇аа д̣̇зд̇и. нану жзд̇т̇а д̇ийсу виж̇ж̇аасу аасавагкаяан̃аан̣асса маг̇г̇абарияаабаннад̇д̇аа гат̇амзд̇ам̣ яуж̇ж̇ад̇и ‘‘маг̇г̇о д̇иссо виж̇ж̇аа д̣̇зд̇ий’’д̇и? нааяам̣ д̣̇осо. сад̇иби аасавагкаяан̃аан̣асса маг̇г̇абарияаабаннабхаавз адтан̇г̇игз маг̇г̇з сад̇и маг̇г̇ан̃аан̣зна сад̣̇д̇хим̣ д̇иссо виж̇ж̇аа барибун̣н̣аа хонд̇ийд̇и ‘‘маг̇г̇о д̇иссо виж̇ж̇аа д̣̇зд̇ий’’д̇и вужжад̇и. ча абхин̃н̃аад̇и зд̇т̇ааби зсзва наяо. саавагабаарамин̃аан̣анд̇и аг̇г̇асаавагзхи бадилабхид̇аб̣б̣амзва логияалогуд̇д̇аран̃аан̣ам̣. бажжзгаб̣од̇хин̃аан̣анд̇и зд̇т̇ааби иминаава наязна ад̇т̇о взд̣̇ид̇аб̣б̣о. аб̣бхан̃н̃аасинд̇и ж̇ааним̣. ж̇аананан̃жа на ануссаваад̣̇ивасзнаад̇и ааха ‘‘бадивиж̇жхи’’нд̇и, бажжагкамагаасинд̇и ад̇т̇о. бадивзд̇хоби на д̣̇уурз тид̇асса лагкан̣аббадивзд̇хо вияаад̇и ааха ‘‘бад̇д̇омхий’’д̇и, баабун̣инд̇и ад̇т̇о. баабун̣анан̃жа на саяам̣ г̇анд̇ваад̇и ааха ‘‘ад̇хиг̇ад̇омхий’’д̇и, санд̇аанз уббаад̣̇анавасзна бадилабхинд̇и ад̇т̇о.
Asabbaguṇadāyakattāti sabbaguṇānaṃ adāyakattā. Sabbaguṇe na dadātīti hi asabbaguṇadāyako, asamatthasamāsoyaṃ gamakattā yathā ‘‘asūriyapassāni mukhānī’’ti. Tisso vijjāti upanissayavato saheva arahattaphalena tisso vijjā deti. Nanu cettha tīsu vijjāsu āsavakkhayañāṇassa maggapariyāpannattā kathametaṃ yujjati ‘‘maggo tisso vijjā detī’’ti? Nāyaṃ doso. Satipi āsavakkhayañāṇassa maggapariyāpannabhāve aṭṭhaṅgike magge sati maggañāṇena saddhiṃ tisso vijjā paripuṇṇā hontīti ‘‘maggo tisso vijjā detī’’ti vuccati. Cha abhiññāti etthāpi eseva nayo. Sāvakapāramiñāṇanti aggasāvakehi paṭilabhitabbameva lokiyalokuttarañāṇaṃ. Paccekabodhiñāṇanti etthāpi imināva nayena attho veditabbo. Abbhaññāsinti jāniṃ. Jānanañca na anussavādivasenāti āha ‘‘paṭivijjhi’’nti, paccakkhamakāsinti attho. Paṭivedhopi na dūre ṭhitassa lakkhaṇappaṭivedho viyāti āha ‘‘pattomhī’’ti, pāpuṇinti attho. Pāpuṇanañca na sayaṃ gantvāti āha ‘‘adhigatomhī’’ti, santāne uppādanavasena paṭilabhinti attho.
обаммасамбадибаад̣̇ананд̇и обаммад̇т̇асса убамзяязна саммад̣̇зва бадибаад̣̇анам̣. ад̇т̇знаад̇и убамзяяад̇т̇зна. яат̇аа гуггудияаа ан̣д̣зсу д̇ивид̇хагирияаагаран̣ам̣ гуггудажчаабагаанам̣ ан̣д̣агосад̇о нигкаманасса муулагааран̣ам̣, звам̣ б̣од̇хисад̇д̇абхууд̇асса бхаг̇авад̇о д̇ивид̇хаанубассанаагаран̣ам̣ авиж̇ж̇ан̣д̣агосад̇о нигкаманасса муулагааран̣анд̇и ааха ‘‘яат̇аа хи д̇ассаа гуггудияаа…бз… д̇ивид̇хаанубассанаагаран̣а’’нд̇и. ‘‘санд̇аанз’’д̇и вуд̇д̇ад̇д̇аа ан̣д̣асад̣̇исад̇аа санд̇аанасса, б̣ахи нигканд̇агуггудажчаабагасад̣̇исад̇аа б̣уд̣̇д̇хаг̇ун̣аанам̣, б̣уд̣̇д̇хаг̇ун̣аад̇и жа ад̇т̇ад̇о б̣уд̣̇д̇хоязва ‘‘д̇ат̇ааг̇ад̇асса ко зд̇ам̣, ваасздта, ад̇хиважанам̣ д̇хаммагааяо ид̇ибий’’д̇и важанад̇о. авиж̇ж̇ан̣д̣агосасса д̇анубхаавод̇и б̣алававибассанаавасзна авиж̇ж̇ан̣д̣агосасса д̇анубхааво, бадижчаад̣̇анасааман̃н̃зна жа авиж̇ж̇ааяа ан̣д̣агосасад̣̇исад̇аа. муд̣̇убхууд̇ассаби карабхааваабад̇д̇и ход̇ийд̇и д̇аннивад̇д̇анад̇т̇ам̣ ‘‘т̇ад̣̇д̇хакарабхааво’’д̇и вуд̇д̇ам̣. д̇игкакаравиббасаннасуурабхаавод̇и зд̇т̇а бариг̇г̇аяхамаанзсу сан̇каарзсу вибассанаан̃аан̣асса самаад̇хинд̣̇рияавасзна сукаануббавзсо д̇игкад̇аа, анубависид̇вааби сад̇инд̣̇рияавасзна анад̇иггаманад̇о агун̣тад̇аа карабхааво. д̇игкоби хи згажжо саро лагкам̣ бад̇ваа гун̣то ход̇и, на д̇ат̇аа ид̣̇ам̣. сад̇иби карабхаавз сукумаббавад̇д̇ивасзна гилзсасамуд̣̇аажаарасан̇кобхарахид̇ад̇ааяа сад̣̇д̇хинд̣̇рияавасзна басаннабхааво, сад̇иби басаннабхаавз анд̇араа аносаггид̇ваа гилзсабажжад̇т̇игаанам̣ судту абхибхаванад̇о вийрияинд̣̇рияавасзна суурабхааво взд̣̇ид̇аб̣б̣о. звамимзхи багаарзхи сан̇каарубзгкаан̃аан̣амзва г̇ахид̇анд̇и д̣̇адтаб̣б̣ам̣. вибассанаан̃аан̣асса барин̣аамагаалод̇и вибассанааяа вудтаанаг̇ааминибхааваабад̇д̇и. д̇ад̣̇аа жа саа маг̇г̇ан̃аан̣аг̇аб̣бхам̣ д̇хаарзнд̇ий вияа ход̇ийд̇и ааха ‘‘г̇аб̣бхаг̇г̇ахан̣агаало’’д̇и. г̇аб̣бхам̣ г̇ан̣хаабзд̇ваад̇и сан̇каарубзгкааяа ананд̇арам̣ сикааббад̇д̇аануломавибассанаавасзна маг̇г̇авиж̇ааяанад̇т̇ам̣ г̇аб̣бхам̣ г̇ан̣хаабзд̇ваа. абхин̃н̃аабагкзд̇и логияаабхин̃н̃аабагкз. логуд̇д̇араабхин̃н̃аа хи авиж̇ж̇ан̣д̣агосам̣ бад̣̇аалид̇аа. бод̇т̇агзсу бана гад̇т̇ажи ‘‘чаабхин̃н̃аабагкз’’д̇и ликанд̇и, со абаатод̇и взд̣̇ид̇аб̣б̣о.
Opammasampaṭipādananti opammatthassa upameyyena sammadeva paṭipādanaṃ. Atthenāti upameyyatthena. Yathā kukkuṭiyā aṇḍesu tividhakiriyākaraṇaṃ kukkuṭacchāpakānaṃ aṇḍakosato nikkhamanassa mūlakāraṇaṃ, evaṃ bodhisattabhūtassa bhagavato tividhānupassanākaraṇaṃ avijjaṇḍakosato nikkhamanassa mūlakāraṇanti āha ‘‘yathā hi tassā kukkuṭiyā…pe… tividhānupassanākaraṇa’’nti. ‘‘Santāne’’ti vuttattā aṇḍasadisatā santānassa, bahi nikkhantakukkuṭacchāpakasadisatā buddhaguṇānaṃ, buddhaguṇāti ca atthato buddhoyeva ‘‘tathāgatassa kho etaṃ, vāseṭṭha, adhivacanaṃ dhammakāyo itipī’’ti vacanato. Avijjaṇḍakosassa tanubhāvoti balavavipassanāvasena avijjaṇḍakosassa tanubhāvo, paṭicchādanasāmaññena ca avijjāya aṇḍakosasadisatā. Mudubhūtassapi kharabhāvāpatti hotīti tannivattanatthaṃ ‘‘thaddhakharabhāvo’’ti vuttaṃ. Tikkhakharavippasannasūrabhāvoti ettha pariggayhamānesu saṅkhāresu vipassanāñāṇassa samādhindriyavasena sukhānuppaveso tikkhatā, anupavisitvāpi satindriyavasena anatikkamanato akuṇṭhatā kharabhāvo. Tikkhopi hi ekacco saro lakkhaṃ patvā kuṇṭho hoti, na tathā idaṃ. Satipi kharabhāve sukhumappavattivasena kilesasamudācārasaṅkhobharahitatāya saddhindriyavasena pasannabhāvo, satipi pasannabhāve antarā anosakkitvā kilesapaccatthikānaṃ suṭṭhu abhibhavanato vīriyindriyavasena sūrabhāvo veditabbo. Evamimehi pakārehi saṅkhārupekkhāñāṇameva gahitanti daṭṭhabbaṃ. Vipassanāñāṇassa pariṇāmakāloti vipassanāya vuṭṭhānagāminibhāvāpatti. Tadā ca sā maggañāṇagabbhaṃ dhārentī viya hotīti āha ‘‘gabbhaggahaṇakālo’’ti. Gabbhaṃ gaṇhāpetvāti saṅkhārupekkhāya anantaraṃ sikhāppattaanulomavipassanāvasena maggavijāyanatthaṃ gabbhaṃ gaṇhāpetvā. Abhiññāpakkheti lokiyābhiññāpakkhe. Lokuttarābhiññā hi avijjaṇḍakosaṃ padālitā. Potthakesu pana katthaci ‘‘chābhiññāpakkhe’’ti likhanti, so apāṭhoti veditabbo.
ж̇здто сздтод̇и вуд̣̇д̇хад̇амад̇д̇аа ж̇здто, саб̣б̣аг̇ун̣зхи уд̇д̇амад̇д̇аа басад̇т̇ад̇амод̇и сздто.
Jeṭṭho seṭṭhoti vuddhatamattā jeṭṭho, sabbaguṇehi uttamattā pasatthatamoti seṭṭho.
ид̣̇аани ‘‘аарад̣̇д̇хам̣ ко бана мз, б̣раахман̣а, вийрияа’’нд̇иаад̣̇игааяа д̣̇зсанааяа анусанд̇хим̣ д̣̇ассзнд̇о ааха ‘‘звам̣ бхаг̇аваа’’д̇иаад̣̇и. д̇ад̇т̇а буб̣б̣абхааг̇ад̇о бабхуд̇ийд̇и бхааванааяа буб̣б̣абхааг̇ийяавийрияаарамбхаад̣̇ид̇о бадтааяа. мудтассад̇инаад̇и винадтассад̇инаа, сад̇ивирахид̇знаад̇и ад̇т̇о. саарад̣̇д̇хагааязнаад̇и сад̣̇арат̇агааязна. б̣од̇химан̣д̣зд̇и б̣од̇хисан̇каад̇асса н̃аан̣асса ман̣д̣абхааваббад̇д̇з таанз. б̣од̇хийд̇и хи бан̃н̃аа вужжад̇и. саа зд̇т̇а ман̣д̣аа басаннаа ж̇аад̇аад̇и со бад̣̇зсо ‘‘б̣од̇химан̣д̣о’’д̇и бан̃н̃аад̇о. баг̇г̇ахид̇анд̇и аарамбхам̣ сит̇илам̣ агад̇ваа д̣̇ал̣хабараггамасан̇каад̇уссаханабхаавзна г̇ахид̇ам̣. д̇знааха ‘‘асит̇илаббавад̇д̇ид̇а’’нд̇и. асаллийнанд̇и асан̇гужид̇ам̣ госаж̇ж̇авасзна сан̇гожам̣ анаабаннам̣. убадтид̇аад̇и ог̇ааханасан̇каад̇зна абилаабанабхаавзна аарамман̣ам̣ убаг̇анд̇ваа тид̇аа. д̇знааха ‘‘аарамман̣аабхимукийбхаавзнаа’’д̇и. саммосасса вид̣̇д̇хам̣санавасзна бавад̇д̇ияаа на саммудтаад̇и асаммудтаа. гин̃жааби жид̇д̇аббассад̣̇д̇хивасзна жид̇д̇амзва бассад̣̇д̇хам̣, гааяаббассад̣̇д̇хивасзнзва жа гааяо бассад̣̇д̇хо ход̇и , д̇ат̇ааби яасмаа гааяаббассад̣̇д̇хи уббаж̇ж̇амаанаа жид̇д̇аббассад̣̇д̇хияаа сахзва уббаж̇ж̇ад̇и, на винаа, д̇асмаа вуд̇д̇ам̣ ‘‘гааяажид̇д̇аббассад̣̇д̇хивасзнаа’’д̇и. гааяаббассад̣̇д̇хияаа убхаязсамби гааяаанам̣ бассамбханаавахад̇д̇аа вуд̇д̇ам̣ ‘‘руубагааяоби бассад̣̇д̇хоязва ход̇ий’’д̇и.
Idāni ‘‘āraddhaṃ kho pana me, brāhmaṇa, vīriya’’ntiādikāya desanāya anusandhiṃ dassento āha ‘‘evaṃ bhagavā’’tiādi. Tattha pubbabhāgato pabhutīti bhāvanāya pubbabhāgīyavīriyārambhādito paṭṭhāya. Muṭṭhassatināti vinaṭṭhassatinā, sativirahitenāti attho. Sāraddhakāyenāti sadarathakāyena. Bodhimaṇḍeti bodhisaṅkhātassa ñāṇassa maṇḍabhāvappatte ṭhāne. Bodhīti hi paññā vuccati. Sā ettha maṇḍā pasannā jātāti so padeso ‘‘bodhimaṇḍo’’ti paññāto. Paggahitanti ārambhaṃ sithilaṃ akatvā daḷhaparakkamasaṅkhātussahanabhāvena gahitaṃ. Tenāha ‘‘asithilappavattita’’nti. Asallīnanti asaṅkucitaṃ kosajjavasena saṅkocaṃ anāpannaṃ. Upaṭṭhitāti ogāhanasaṅkhātena apilāpanabhāvena ārammaṇaṃ upagantvā ṭhitā. Tenāha ‘‘ārammaṇābhimukhībhāvenā’’ti. Sammosassa viddhaṃsanavasena pavattiyā na sammuṭṭhāti asammuṭṭhā. Kiñcāpi cittappassaddhivasena cittameva passaddhaṃ, kāyappassaddhivaseneva ca kāyo passaddho hoti , tathāpi yasmā kāyappassaddhi uppajjamānā cittappassaddhiyā saheva uppajjati, na vinā, tasmā vuttaṃ ‘‘kāyacittappassaddhivasenā’’ti. Kāyappassaddhiyā ubhayesampi kāyānaṃ passambhanāvahattā vuttaṃ ‘‘rūpakāyopi passaddhoyeva hotī’’ti.
со жа код̇и со жа ко гааяо. виг̇ад̇ад̣̇арат̇од̇и виг̇ад̇агилзсад̣̇арат̇о. наамагааяз хи виг̇ад̇ад̣̇арат̇з руубагааяоби вуубасанд̇ад̣̇арат̇абарил̣аахо ход̇и. саммаа аахид̇анд̇и наанаарамман̣зсу вид̇хааванасан̇каад̇ам̣ вигкзбам̣ вижчинд̣̇ид̇ваа згасмим̣язва аарамман̣з авигкид̇д̇абхааваабаад̣̇анзна саммад̣̇зва аахид̇ам̣ табид̇ам̣. д̇знааха ‘‘судту табид̇а’’нд̇иаад̣̇и. жид̇д̇асса анзгаг̇г̇абхааво вигкзбавасзна жан̃жалад̇аа, саа сад̇и згаг̇г̇ад̇ааяа на ход̇ийд̇и ааха ‘‘згаг̇г̇ам̣ ажалам̣ нибпанд̣̇ана’’нд̇и. зд̇д̇аавад̇аад̇и ‘‘аарад̣̇д̇хам̣ ко банаа’’д̇иаад̣̇инаа вийрияасад̇ибассад̣̇д̇хисамаад̇хийнам̣ гижжасид̣̇д̇хид̣̇ассанзна. нану жа сад̣̇д̇хаабан̃н̃аанамби гижжасид̣̇д̇хи жхаанасса буб̣б̣абхааг̇аббадибад̣̇ааяа ижчид̇аб̣б̣аад̇и? сажжам̣, саа бана наананд̇аригабхаавзна авуд̇д̇асид̣̇д̇хаад̇и на г̇ахид̇аа. асад̇и хи сад̣̇д̇хааяа вийрияаарамбхаад̣̇ийнам̣ асамбхавоязва, бан̃н̃аабариг̇г̇ахз жа нзсам̣ асад̇и н̃ааяаарамбхаад̣̇ибхааво на сияаа, д̇ат̇аа асаллийнаасаммосад̇аад̣̇аяо вийрияаад̣̇ийнанд̇и асаллийнад̇аад̣̇иг̇г̇ахан̣знзвзд̇т̇а бан̃н̃аагижжасид̣̇д̇хи г̇ахид̇аад̇и д̣̇адтаб̣б̣ам̣. жхаанабхааванааяам̣ ваа самаад̇хигижжам̣ ад̇хигам̣ ижчид̇аб̣б̣анд̇и д̣̇ассзд̇ум̣ самаад̇хибарияосаанаава жхаанасса буб̣б̣абхааг̇аббадибад̣̇аа гат̇ид̇аад̇и д̣̇адтаб̣б̣ам̣.
So ca khoti so ca kho kāyo. Vigatadarathoti vigatakilesadaratho. Nāmakāye hi vigatadarathe rūpakāyopi vūpasantadarathapariḷāho hoti. Sammā āhitanti nānārammaṇesu vidhāvanasaṅkhātaṃ vikkhepaṃ vicchinditvā ekasmiṃyeva ārammaṇe avikkhittabhāvāpādanena sammadeva āhitaṃ ṭhapitaṃ. Tenāha ‘‘suṭṭhu ṭhapita’’ntiādi. Cittassa anekaggabhāvo vikkhepavasena cañcalatā, sā sati ekaggatāya na hotīti āha ‘‘ekaggaṃ acalaṃ nipphandana’’nti. Ettāvatāti ‘‘āraddhaṃ kho panā’’tiādinā vīriyasatipassaddhisamādhīnaṃ kiccasiddhidassanena. Nanu ca saddhāpaññānampi kiccasiddhi jhānassa pubbabhāgappaṭipadāya icchitabbāti? Saccaṃ, sā pana nānantarikabhāvena avuttasiddhāti na gahitā. Asati hi saddhāya vīriyārambhādīnaṃ asambhavoyeva, paññāpariggahe ca nesaṃ asati ñāyārambhādibhāvo na siyā, tathā asallīnāsammosatādayo vīriyādīnanti asallīnatādiggahaṇenevettha paññākiccasiddhi gahitāti daṭṭhabbaṃ. Jhānabhāvanāyaṃ vā samādhikiccaṃ adhikaṃ icchitabbanti dassetuṃ samādhipariyosānāva jhānassa pubbabhāgappaṭipadā kathitāti daṭṭhabbaṃ.
ад̇ийд̇абхавз канд̇хаа д̇аббадиб̣ад̣̇д̇хаани наамаг̇од̇д̇аани жа саб̣б̣ам̣ буб̣б̣зниваасам̣д̇взва г̇ахид̇анд̇и ааха ‘‘гим̣ вид̣̇ид̇ам̣ гарод̇и? буб̣б̣знивааса’’нд̇и. мохо бадижчаад̣̇агадтзна д̇амо вияа д̇амод̇и ааха ‘‘свзва мохо’’д̇и. обхаасагаран̣адтзнаад̇и гаад̇аб̣б̣ад̇о гаран̣ам̣. обхаасова гаран̣ам̣ обхаасагаран̣ам̣. ад̇д̇ано бажжаязхи обхаасабхаавзна ниб̣б̣ад̇д̇зд̇аб̣б̣адтзнаад̇и ад̇т̇о. сзсам̣ басам̣сааважананд̇и бадибагкавид̇хаманабавад̇д̇ивисзсаанам̣ б̣од̇ханад̇о вуд̇д̇ам̣. авиж̇ж̇аа вихад̇аад̇и зд̇зна виж̇аананадтзна виж̇ж̇аад̇и аяамби ад̇т̇о д̣̇ийбид̇од̇и д̣̇адтаб̣б̣ам̣. ‘‘гасмаа? яасмаа виж̇ж̇аа уббаннаа’’д̇и зд̇зна виж̇ж̇аабадибагкаа авиж̇ж̇аа. бадибагкад̇аа жассаа бахаад̇аб̣б̣абхаавзна виж̇ж̇ааяа жа бахааяагабхаавзнаад̇и д̣̇ассзд̇и. зса наяо ид̇арасмимби бад̣̇ад̣̇ваязд̇и иминаа ‘‘д̇амо вихад̇о винадто. гасмаа? яасмаа аалого уббанно’’д̇и имамад̇т̇ам̣ ад̇ид̣̇исад̇и. гилзсаанам̣ аад̇аабанабарид̇аабанадтзна вийрияам̣ аад̇аабод̇и ааха ‘‘вийрияаад̇аабзна аад̇аабино’’д̇и, вийрияавад̇од̇и ад̇т̇о. бзсид̇ад̇д̇ассаад̇и яат̇аад̇хиббзд̇ад̇т̇асид̣̇д̇хим̣ бад̇и виссадтажид̇д̇асса. яат̇аа аббамад̇д̇асса аад̇аабино бахид̇ад̇д̇асса вихарад̇од̇и ан̃н̃ассаби гассажи маад̣̇исассаад̇и ад̇хиббааяо. бад̇хаанаануяог̇ассаад̇и саммаббад̇хаанамануяуд̇д̇асса.
Atītabhave khandhā tappaṭibaddhāni nāmagottāni ca sabbaṃ pubbenivāsaṃtveva gahitanti āha ‘‘kiṃ viditaṃ karoti? Pubbenivāsa’’nti. Moho paṭicchādakaṭṭhena tamo viya tamoti āha ‘‘sveva moho’’ti. Obhāsakaraṇaṭṭhenāti kātabbato karaṇaṃ. Obhāsova karaṇaṃ obhāsakaraṇaṃ. Attano paccayehi obhāsabhāvena nibbattetabbaṭṭhenāti attho. Sesaṃ pasaṃsāvacananti paṭipakkhavidhamanapavattivisesānaṃ bodhanato vuttaṃ. Avijjā vihatāti etena vijānanaṭṭhena vijjāti ayampi attho dīpitoti daṭṭhabbaṃ. ‘‘Kasmā? Yasmā vijjā uppannā’’ti etena vijjāpaṭipakkhā avijjā. Paṭipakkhatā cassā pahātabbabhāvena vijjāya ca pahāyakabhāvenāti dasseti. Esa nayo itarasmimpi padadvayeti iminā ‘‘tamo vihato vinaṭṭho. Kasmā? Yasmā āloko uppanno’’ti imamatthaṃ atidisati. Kilesānaṃ ātāpanaparitāpanaṭṭhena vīriyaṃ ātāpoti āha ‘‘vīriyātāpena ātāpino’’ti, vīriyavatoti attho. Pesitattassāti yathādhippetatthasiddhiṃ pati vissaṭṭhacittassa. Yathā appamattassa ātāpino pahitattassa viharatoti aññassapi kassaci mādisassāti adhippāyo. Padhānānuyogassāti sammappadhānamanuyuttassa.
бажжавзгкан̣ан̃аан̣абариг̇г̇ахид̇анд̇и на батамад̣̇уд̇ияан̃аан̣ад̣̇ваяаад̇хиг̇амам̣ вияа гзваланд̇и ад̇хиббааяо. д̣̇ассзнд̇од̇и ниг̇аманавасзна д̣̇ассзнд̇о. саруубад̇о хи буб̣б̣з д̣̇ассид̇амзваад̇и.
Paccavekkhaṇañāṇapariggahitanti na paṭhamadutiyañāṇadvayādhigamaṃ viya kevalanti adhippāyo. Dassentoti nigamanavasena dassento. Sarūpato hi pubbe dassitamevāti.
д̇игкад̇д̇ум̣ ж̇аад̇од̇и иминаа бана ид̣̇ам̣ д̣̇ассзд̇и – ‘‘ахам̣, б̣раахман̣а, батамавиж̇ж̇ааяа ж̇аад̇оязва бурзж̇аад̇асса сахаж̇аад̇асса ваа абхаавад̇о саб̣б̣зсам̣ вуд̣̇д̇хо махаллаго, гиман̇г̇ам̣ бана д̇ийхи виж̇ж̇аахи д̇игкад̇д̇ум̣ ж̇аад̇о’’д̇и. буб̣б̣зниваасан̃аан̣зна ад̇ийд̇ам̣сан̃аан̣анд̇и ад̇ийд̇аарамман̣асабхааг̇ад̇ааяа д̇аб̣бхаавибхаавад̇о жа буб̣б̣зниваасан̃аан̣зна ад̇ийд̇ам̣сан̃аан̣ам̣ багаасзд̇ваад̇и яож̇зд̇аб̣б̣ам̣. д̇ад̇т̇а ад̇ийд̇ам̣сан̃аан̣анд̇и ад̇ийд̇агканд̇хааяад̇анад̇хаад̇усан̇каад̇з ад̇ийд̇з годтаасз аббадихад̇ан̃аан̣ам̣. д̣̇иб̣б̣ажагкун̃аан̣асса бажжуббаннаарамман̣ад̇д̇аа яат̇аагаммуубаг̇ан̃аан̣асса анааг̇ад̇ам̣сан̃аан̣асса жа д̣̇иб̣б̣ажагкувасзнзва иж̇жханад̇о д̣̇иб̣б̣ажагкуно барибхан̣д̣ан̃аан̣ад̇д̇аа д̣̇иб̣б̣ажагкумхиязва жа тид̇асса жзд̇обарияан̃аан̣асид̣̇д̇хид̇о вуд̇д̇ам̣ ‘‘д̣̇иб̣б̣ажагкунаа бажжуббаннаанааг̇ад̇ам̣сан̃аан̣а’’нд̇и. д̇ад̇т̇а д̣̇иб̣б̣ажагкунаад̇и сабарибхан̣д̣зна д̣̇иб̣б̣ажагкун̃аан̣зна. бажжуббаннам̣со жа анааг̇ад̇ам̣со жа бажжуббаннаанааг̇ад̇ам̣сам̣, д̇ад̇т̇а н̃аан̣ам̣ бажжуббаннаанааг̇ад̇ам̣сан̃аан̣ам̣. аасавагкаяан̃аан̣аад̇хиг̇амзнзва саб̣б̣ан̃н̃уд̇ан̃н̃аан̣асса вияа сзсаасаад̇хааран̣ачан̃аан̣ад̣̇асаб̣алан̃аан̣ааавзн̣игаб̣уд̣̇д̇хад̇хаммаад̣̇ийнамби анан̃н̃асаад̇хааран̣аанам̣ б̣уд̣̇д̇хаг̇ун̣аанам̣ иж̇жханад̇о вуд̇д̇ам̣ ‘‘аасавагкаязна сагалалогияалогуд̇д̇араг̇ун̣а’’нд̇и. д̇знааха ‘‘саб̣б̣зби саб̣б̣ан̃н̃уг̇ун̣з багаасзд̇ваа’’д̇и.
Tikkhattuṃ jātoti iminā pana idaṃ dasseti – ‘‘ahaṃ, brāhmaṇa, paṭhamavijjāya jātoyeva purejātassa sahajātassa vā abhāvato sabbesaṃ vuddho mahallako, kimaṅgaṃ pana tīhi vijjāhi tikkhattuṃ jāto’’ti. Pubbenivāsañāṇena atītaṃsañāṇanti atītārammaṇasabhāgatāya tabbhāvibhāvato ca pubbenivāsañāṇena atītaṃsañāṇaṃ pakāsetvāti yojetabbaṃ. Tattha atītaṃsañāṇanti atītakkhandhāyatanadhātusaṅkhāte atīte koṭṭhāse appaṭihatañāṇaṃ. Dibbacakkhuñāṇassa paccuppannārammaṇattā yathākammūpagañāṇassa anāgataṃsañāṇassa ca dibbacakkhuvaseneva ijjhanato dibbacakkhuno paribhaṇḍañāṇattā dibbacakkhumhiyeva ca ṭhitassa cetopariyañāṇasiddhito vuttaṃ ‘‘dibbacakkhunā paccuppannānāgataṃsañāṇa’’nti. Tattha dibbacakkhunāti saparibhaṇḍena dibbacakkhuñāṇena. Paccuppannaṃso ca anāgataṃso ca paccuppannānāgataṃsaṃ, tattha ñāṇaṃ paccuppannānāgataṃsañāṇaṃ. Āsavakkhayañāṇādhigameneva sabbaññutaññāṇassa viya sesāsādhāraṇachañāṇadasabalañāṇaāveṇikabuddhadhammādīnampi anaññasādhāraṇānaṃ buddhaguṇānaṃ ijjhanato vuttaṃ ‘‘āsavakkhayena sakalalokiyalokuttaraguṇa’’nti. Tenāha ‘‘sabbepi sabbaññuguṇe pakāsetvā’’ti.
бийд̇ивибпаарабарибун̣н̣аг̇ад̇д̇ажид̇д̇од̇и бийд̇ипаран̣зна барибун̣н̣агааяажид̇д̇о. ан̃н̃аан̣анд̇и ан̃н̃аан̣ассаад̇и ад̇т̇о. д̇хи-сад̣̇д̣̇аяог̇ад̇о хи саамиад̇т̇з зд̇ам̣ убаяог̇аважанам̣. сзсамзд̇т̇а сувин̃н̃зяяамзва.
Pītivipphāraparipuṇṇagattacittoti pītipharaṇena paripuṇṇakāyacitto. Aññāṇanti aññāṇassāti attho. Dhi-saddayogato hi sāmiatthe etaṃ upayogavacanaṃ. Sesamettha suviññeyyameva.
взран̃ж̇асуд̇д̇аван̣н̣анаа нидтид̇аа.
Verañjasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 1. взран̃ж̇асуд̇д̇ам̣ • 1. Verañjasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) / 1. взран̃ж̇асуд̇д̇аван̣н̣анаа • 1. Verañjasuttavaṇṇanā
