[103] 3. வேரிஜாதகவண்ணனா

யத்த² வேரீ நிவிஸதீதி இத³ங் ஸத்தா² ஜேதவனே விஹரந்தோ அனாத²பிண்டி³கங் ஆரப்³ப⁴ கதே²ஸி. அனாத²பிண்டி³கோ கிர போ⁴க³கா³மங் க³ந்த்வா ஆக³ச்ச²ந்தோ அந்தராமக்³கே³ சோரே தி³ஸ்வா ‘‘அந்தராமக்³கே³ வஸிதுங் ந யுத்தங், ஸாவத்தி²மேவ க³மிஸ்ஸாமீ’’தி வேகே³ன கோ³ணே பாஜெத்வா ஸாவத்தி²மேவ ஆக³ந்த்வா புனதி³வஸே விஹாரங் க³தோ ஸத்து² ஏதமத்த²ங் ஆரோசேஸி. ஸத்தா² ‘‘புப்³பே³பி க³ஹபதி பண்டி³தா அந்தராமக்³கே³ சோரே தி³ஸ்வா அந்தரா அவிலம்ப³மானா அத்தனோ வஸனட்டா²னமேவ க³மிங்ஸூ’’தி வத்வா தேன யாசிதோ அதீதங் ஆஹரி.

அதீதே பா³ராணஸியங் ப்³ரஹ்மத³த்தே ரஜ்ஜங் காரெந்தே போ³தி⁴ஸத்தோ மஹாவிப⁴வோ ஸெட்டி² ஹுத்வா ஏகங் கா³மகங் நிமந்தனங் பு⁴ஞ்ஜனத்தா²ய க³ந்த்வா பச்சாக³ச்ச²ந்தோ அந்தராமக்³கே³ சோரே தி³ஸ்வா அந்தராமக்³கே³ அவஸித்வாவ வேகே³ன கோ³ணே பாஜெந்தோ அத்தனோ கே³ஹமேவ ஆக³ந்த்வா நானக்³க³ரஸேஹி பு⁴ஞ்ஜித்வா மஹாஸயனே நிஸின்னோ ‘‘சோரானங் ஹத்த²தோ முச்சித்வா நிப்³ப⁴யட்டா²னங் அத்தனோ கே³ஹங் ஆக³தொம்ஹீ’’தி உதா³னவஸேன இமங் கா³த²மாஹ –

103.

‘‘யத்த² வேரீ நிவிஸதி, ந வஸே தத்த² பண்டி³தோ;

ஏகரத்தங் தி³ரத்தங் வா, து³க்க²ங் வஸதி வேரிஸூ’’தி.

தத்த² வேரீதி வேரசேதனாஸமங்கி³புக்³க³லோ. நிவிஸதீதி பதிட்டா²தி. ந வஸே தத்த² பண்டி³தோதி ஸோ வேரீபுக்³க³லோ யஸ்மிங் டா²னே பதிட்டி²தோ ஹுத்வா வஸதி, தத்த² பண்டி³தோ பண்டி³ச்சேன ஸமன்னாக³தோ ந வஸெய்ய. கிங்காரணா? ஏகரத்தங் தி³ரத்தங் வா, து³க்க²ங் வஸதி வேரிஸூதி, வேரீனஞ்ஹி அந்தரே வஸந்தோ ஏகாஹம்பி த்³வீஹம்பி து³க்க²மேவ வஸதீதி அத்தோ².

ஏவங் மஹாஸத்தோ உதா³னங் உதா³னெத்வா தா³னாதீ³னி புஞ்ஞானி கத்வா யதா²கம்மங் க³தோ.

ஸத்தா² இமங் த⁴ம்மதே³ஸனங் ஆஹரித்வா ஜாதகங் ஸமோதா⁴னேஸி – ‘‘ததா³ அஹமேவ பா³ராணஸிஸெட்டி² அஹோஸி’’ந்தி.

வேரிஜாதகவண்ணனா ததியா.