| Library / Tipiṭaka / តិបិដក • Tipiṭaka / សំយុត្តនិកាយ (អដ្ឋកថា) • Saṃyuttanikāya (aṭṭhakathā) |
៨. វេរោចនអសុរិន្ទសុត្តវណ្ណនា
8. Verocanaasurindasuttavaṇṇanā
២៥៤. អដ្ឋមេ អដ្ឋំសូតិ ទ្វារបាលរូបកានិ វិយ ឋិតា។ និប្ផទាតិ និប្ផត្តិ, យាវ អត្ថោ និប្ផជ្ជតិ, តាវ វាយមេថេវាតិ វទតិ។ ទុតិយគាថា សក្កស្ស។ តត្ថ ខន្ត្យា ភិយ្យោតិ និប្ផន្នសោភនេសុ អត្ថេសុ ខន្តិតោ ឧត្តរិតរោ អត្ថោ នាម នត្ថិ។ អត្ថជាតាតិ កិច្ចជាតា។ សោណសិង្គាលាទយោបិ ហិ ឧបាទាយ អកិច្ចជាតោ សត្តោ នាម នត្ថិ។ ឥតោ ឯត្តោ គមនមត្តម្បិ កិច្ចមេវ ហោតិ។ សំយោគបរមា ត្វេវ, សម្ភោគា សព្ពបាណិនន្តិ បារិវាសិកឱទនាទីនិ ហិ អសម្ភោគារហានិ ហោន្តិ, តានិ បុន ឧណ្ហាបេត្វា ភជ្ជិត្វា សប្បិមធុផាណិតាទីហិ សំយោជិតានិ សម្ភោគារហានិ ហោន្តិ។ តេនាហ ‘‘សំយោគបរមា ត្វេវ, សម្ភោគា សព្ពបាណិន’’ន្តិ ។ និប្ផន្នសោភនោ អត្ថោតិ ឥមេ អត្ថា នាម និប្ផន្នាវ សោភន្តិ។ បុន ចតុត្ថគាថា សក្កស្ស។ តត្ថាបិ វុត្តនយេនេវ អត្ថោ វេទិតព្ពោ។ អដ្ឋមំ។
254. Aṭṭhame aṭṭhaṃsūti dvārapālarūpakāni viya ṭhitā. Nipphadāti nipphatti, yāva attho nipphajjati, tāva vāyamethevāti vadati. Dutiyagāthā sakkassa. Tattha khantyā bhiyyoti nipphannasobhanesu atthesu khantito uttaritaro attho nāma natthi. Atthajātāti kiccajātā. Soṇasiṅgālādayopi hi upādāya akiccajāto satto nāma natthi. Ito etto gamanamattampi kiccameva hoti. Saṃyogaparamā tveva, sambhogā sabbapāṇinanti pārivāsikaodanādīni hi asambhogārahāni honti, tāni puna uṇhāpetvā bhajjitvā sappimadhuphāṇitādīhi saṃyojitāni sambhogārahāni honti. Tenāha ‘‘saṃyogaparamā tveva, sambhogā sabbapāṇina’’nti . Nipphannasobhano atthoti ime atthā nāma nipphannāva sobhanti. Puna catutthagāthā sakkassa. Tatthāpi vuttanayeneva attho veditabbo. Aṭṭhamaṃ.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៨. វេរោចនអសុរិន្ទសុត្តំ • 8. Verocanaasurindasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ៨. វេរោចនអសុរិន្ទសុត្តវណ្ណនា • 8. Verocanaasurindasuttavaṇṇanā
