| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၈. ဝေရောစနအသုရိန္ဒသုတ္တဝဏ္ဏနာ
8. Verocanaasurindasuttavaṇṇanā
၂၅၄. အဋ္ဌမေ အဋ္ဌံသူတိ ဒ္ဝာရပာလရူပကာနိ ဝိယ ဌိတာ။ နိပ္ဖဒာတိ နိပ္ဖတ္တိ, ယာဝ အတ္ထော နိပ္ဖဇ္ဇတိ, တာဝ ဝာယမေထေဝာတိ ဝဒတိ။ ဒုတိယဂာထာ သက္ကသ္သ။ တတ္ထ ခန္တ္ယာ ဘိယ္ယောတိ နိပ္ဖန္နသောဘနေသု အတ္ထေသု ခန္တိတော ဥတ္တရိတရော အတ္ထော နာမ နတ္ထိ။ အတ္ထဇာတာတိ ကိစ္စဇာတာ။ သောဏသိင္ဂာလာဒယောပိ ဟိ ဥပာဒာယ အကိစ္စဇာတော သတ္တော နာမ နတ္ထိ။ ဣတော ဧတ္တော ဂမနမတ္တမ္ပိ ကိစ္စမေဝ ဟောတိ။ သံယောဂပရမာ တ္ဝေဝ, သမ္ဘောဂာ သဗ္ဗပာဏိနန္တိ ပာရိဝာသိကဩဒနာဒီနိ ဟိ အသမ္ဘောဂာရဟာနိ ဟောန္တိ, တာနိ ပုန ဥဏ္ဟာပေတ္ဝာ ဘဇ္ဇိတ္ဝာ သပ္ပိမဓုဖာဏိတာဒီဟိ သံယောဇိတာနိ သမ္ဘောဂာရဟာနိ ဟောန္တိ။ တေနာဟ ‘‘သံယောဂပရမာ တ္ဝေဝ, သမ္ဘောဂာ သဗ္ဗပာဏိန’’န္တိ ။ နိပ္ဖန္နသောဘနော အတ္ထောတိ ဣမေ အတ္ထာ နာမ နိပ္ဖန္နာဝ သောဘန္တိ။ ပုန စတုတ္ထဂာထာ သက္ကသ္သ။ တတ္ထာပိ ဝုတ္တနယေနေဝ အတ္ထော ဝေဒိတဗ္ဗော။ အဋ္ဌမံ။
254. Aṭṭhame aṭṭhaṃsūti dvārapālarūpakāni viya ṭhitā. Nipphadāti nipphatti, yāva attho nipphajjati, tāva vāyamethevāti vadati. Dutiyagāthā sakkassa. Tattha khantyā bhiyyoti nipphannasobhanesu atthesu khantito uttaritaro attho nāma natthi. Atthajātāti kiccajātā. Soṇasiṅgālādayopi hi upādāya akiccajāto satto nāma natthi. Ito etto gamanamattampi kiccameva hoti. Saṃyogaparamā tveva, sambhogā sabbapāṇinanti pārivāsikaodanādīni hi asambhogārahāni honti, tāni puna uṇhāpetvā bhajjitvā sappimadhuphāṇitādīhi saṃyojitāni sambhogārahāni honti. Tenāha ‘‘saṃyogaparamā tveva, sambhogā sabbapāṇina’’nti . Nipphannasobhano atthoti ime atthā nāma nipphannāva sobhanti. Puna catutthagāthā sakkassa. Tatthāpi vuttanayeneva attho veditabbo. Aṭṭhamaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၈. ဝေရောစနအသုရိန္ဒသုတ္တံ • 8. Verocanaasurindasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၈. ဝေရောစနအသုရိန္ဒသုတ္တဝဏ္ဏနာ • 8. Verocanaasurindasuttavaṇṇanā
