| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
9. взсаалийсуд̇д̇аван̣н̣анаа
9. Vesālīsuttavaṇṇanā
985. навамз взсаалияанд̇и звам̣наамагз ид̇т̇илин̇г̇авасзна бавад̇д̇авохаарз наг̇арз. д̇ан̃хи наг̇арам̣ д̇игкад̇д̇ум̣ баагаарабаригкзбавад̣дханзна висаалийбхууд̇ад̇д̇аа взсаалийд̇и вужжад̇и. ид̣̇амби жа наг̇арам̣ саб̣б̣ан̃н̃уд̇ам̣ бад̇д̇зязва саммаасамб̣уд̣̇д̇хз саб̣б̣аагааравзбуллад̇ам̣ бад̇д̇анд̇и взд̣̇ид̇аб̣б̣ам̣. звам̣ г̇ожараг̇аамам̣ д̣̇ассзд̇ваа ниваасадтаанамааха махааванз гуудааг̇аарасаалааяанд̇и. д̇ад̇т̇а махааванам̣ наама саяам̣ж̇аад̇ам̣ аробимам̣ сабарижчзд̣̇ам̣ маханд̇ам̣ ванам̣. габилавад̇т̇усааманд̇аа бана махааванам̣ химаванд̇зна саха згааб̣ад̣̇д̇хам̣ абарижчзд̣̇ам̣ худ̇ваа махаасамуд̣̇д̣̇ам̣ аахажжа тид̇ам̣. ид̣̇ам̣ д̇аад̣̇исам̣ на ход̇и, сабарижчзд̣̇ам̣ маханд̇ам̣ вананд̇и махааванам̣. гуудааг̇аарасаалаа бана махааванам̣ ниссааяа гад̇з аараамз гуудааг̇аарам̣ анд̇огад̇ваа хам̣саваддагажчаннзна гад̇аа саб̣б̣аагаарасамбаннаа б̣уд̣̇д̇хасса бхаг̇авад̇о г̇анд̇хагудийд̇и взд̣̇ид̇аб̣б̣аа.
985. Navame vesāliyanti evaṃnāmake itthiliṅgavasena pavattavohāre nagare. Tañhi nagaraṃ tikkhattuṃ pākāraparikkhepavaḍḍhanena visālībhūtattā vesālīti vuccati. Idampi ca nagaraṃ sabbaññutaṃ patteyeva sammāsambuddhe sabbākāravepullataṃ pattanti veditabbaṃ. Evaṃ gocaragāmaṃ dassetvā nivāsaṭṭhānamāha mahāvane kūṭāgārasālāyanti. Tattha mahāvanaṃ nāma sayaṃjātaṃ aropimaṃ saparicchedaṃ mahantaṃ vanaṃ. Kapilavatthusāmantā pana mahāvanaṃ himavantena saha ekābaddhaṃ aparicchedaṃ hutvā mahāsamuddaṃ āhacca ṭhitaṃ. Idaṃ tādisaṃ na hoti, saparicchedaṃ mahantaṃ vananti mahāvanaṃ. Kūṭāgārasālā pana mahāvanaṃ nissāya kate ārāme kūṭāgāraṃ antokatvā haṃsavaṭṭakacchannena katā sabbākārasampannā buddhassa bhagavato gandhakuṭīti veditabbā.
анзгабарияааязна асубхагат̇ам̣ гат̇зд̇ийд̇и анзгзхи гааран̣зхи асубхаагаарасанд̣̇ассанаббавад̇д̇ам̣ гааяавижчанд̣̇анийяагат̇ам̣ гат̇зд̇и. сзяяат̇ид̣̇ам̣ – ад̇т̇и имасмим̣ гааяз гзсаа ломаа накаа д̣̇анд̇аа…бз… муд̇д̇анд̇и. гим̣ вуд̇д̇ам̣ ход̇и? бхигкавз, имасмим̣ б̣яаамамад̇д̇з гал̣зварз саб̣б̣аагаарзнаби вижинанд̇о на гожи гин̃жи муд̇д̇ам̣ ваа ман̣им̣ ваа взл̣урияам̣ ваа аг̇арум̣ ваа жанд̣̇анам̣ ваа гун̇гумам̣ ваа габбурам̣ ваа ваасажун̣н̣аад̣̇им̣ ваа ан̣умад̇д̇амби сужибхаавам̣ бассад̇и, ат̇а ко барамад̣̇уг̇г̇анд̇хам̣ ж̇зг̇ужчаассиригад̣̇ассанам̣ гзсаломаад̣̇инаанаббагаарам̣ асужимзва бассад̇и, д̇асмаа на зд̇т̇а чанд̣̇о ваа рааг̇о ваа гаран̣ийяо. язби уд̇д̇аман̇г̇з сираси ж̇аад̇аа гзсаа наама, д̇зби асубхаа жзва асужино жа бадигуулаа жа. со жа нзсам̣ асубхаасужибадигуулабхааво ван̣н̣ад̇оби сан̣таанад̇оби г̇анд̇хад̇оби аасаяад̇оби огаасад̇обийд̇и бан̃жахаагаарзхи взд̣̇ид̇аб̣б̣о. звам̣ ломаад̣̇ийнамбийд̇и аяамзд̇т̇а сан̇кзбо, вид̇т̇ааро бана висуд̣̇д̇химаг̇г̇з (висуд̣̇д̇хи. 1.307) вуд̇д̇анаязнзва взд̣̇ид̇аб̣б̣о. ид̇и бхаг̇аваа згамзгасмим̣ годтаасз бан̃жабан̃жаббабхзд̣̇зна анзгабарияааязна асубхагат̇ам̣ гат̇зд̇и.
Anekapariyāyena asubhakathaṃ kathetīti anekehi kāraṇehi asubhākārasandassanappavattaṃ kāyavicchandanīyakathaṃ katheti. Seyyathidaṃ – atthi imasmiṃ kāye kesā lomā nakhā dantā…pe… muttanti. Kiṃ vuttaṃ hoti? Bhikkhave, imasmiṃ byāmamatte kaḷevare sabbākārenapi vicinanto na koci kiñci muttaṃ vā maṇiṃ vā veḷuriyaṃ vā agaruṃ vā candanaṃ vā kuṅkumaṃ vā kappuraṃ vā vāsacuṇṇādiṃ vā aṇumattampi sucibhāvaṃ passati, atha kho paramaduggandhaṃ jegucchaassirikadassanaṃ kesalomādinānappakāraṃ asucimeva passati, tasmā na ettha chando vā rāgo vā karaṇīyo. Yepi uttamaṅge sirasi jātā kesā nāma, tepi asubhā ceva asucino ca paṭikūlā ca. So ca nesaṃ asubhāsucipaṭikūlabhāvo vaṇṇatopi saṇṭhānatopi gandhatopi āsayatopi okāsatopīti pañcahākārehi veditabbo. Evaṃ lomādīnampīti ayamettha saṅkhepo, vitthāro pana visuddhimagge (visuddhi. 1.307) vuttanayeneva veditabbo. Iti bhagavā ekamekasmiṃ koṭṭhāse pañcapañcappabhedena anekapariyāyena asubhakathaṃ katheti.
асубхааяа ван̣н̣ам̣ бхаасад̇ийд̇и уд̣̇д̇хумаад̇агаад̣̇ивасзна асубхамаад̇игам̣ нигкибид̇ваа бад̣̇абхааж̇анийязна д̇ам̣ вибхаж̇анд̇о ван̣н̣знд̇о асубхааяа ван̣н̣ам̣ бхаасад̇и. асубхабхааванааяа ван̣н̣ам̣ бхаасад̇ийд̇и яаа аяам̣ гзсаад̣̇ийсу ваа уд̣̇д̇хумаад̇агаад̣̇ийсу ваа аж̇жхад̇д̇аб̣ахид̣̇д̇хаавад̇т̇уусу асубхаагаарам̣ г̇ахзд̇ваа бавад̇д̇асса жид̇д̇асса бхааванаа вад̣дханаа паад̇игаммам̣, д̇ассаа асубхабхааванааяа аанисам̣сам̣ д̣̇ассзнд̇о ван̣н̣ам̣ бхаасад̇и, г̇ун̣ам̣ баригид̇д̇зд̇и. сзяяат̇ид̣̇ам̣ – ‘‘асубхабхааванаабхияуд̇д̇о, бхигкавз, бхигку гзсаад̣̇ийсу ваа вад̇т̇уусу уд̣̇д̇хумаад̇агаад̣̇ийсу ваа бан̃жан̇г̇авиббахийнам̣ бан̃жан̇г̇асаманнааг̇ад̇ам̣ д̇ивид̇хагаляаан̣ам̣ д̣̇асалагкан̣асамбаннам̣ батамаж̇жхаанам̣ бадилабхад̇и. со д̇ам̣ батамаж̇жхаанасан̇каад̇ам̣ жид̇д̇аман̃ж̇уусам̣ ниссааяа вибассанам̣ вад̣дхзд̇ваа уд̇д̇амад̇т̇ам̣ арахад̇д̇ам̣ баабун̣аад̇ий’’д̇и.
Asubhāya vaṇṇaṃ bhāsatīti uddhumātakādivasena asubhamātikaṃ nikkhipitvā padabhājanīyena taṃ vibhajanto vaṇṇento asubhāya vaṇṇaṃ bhāsati. Asubhabhāvanāya vaṇṇaṃ bhāsatīti yā ayaṃ kesādīsu vā uddhumātakādīsu vā ajjhattabahiddhāvatthūsu asubhākāraṃ gahetvā pavattassa cittassa bhāvanā vaḍḍhanā phātikammaṃ, tassā asubhabhāvanāya ānisaṃsaṃ dassento vaṇṇaṃ bhāsati, guṇaṃ parikitteti. Seyyathidaṃ – ‘‘asubhabhāvanābhiyutto, bhikkhave, bhikkhu kesādīsu vā vatthūsu uddhumātakādīsu vā pañcaṅgavippahīnaṃ pañcaṅgasamannāgataṃ tividhakalyāṇaṃ dasalakkhaṇasampannaṃ paṭhamajjhānaṃ paṭilabhati. So taṃ paṭhamajjhānasaṅkhātaṃ cittamañjūsaṃ nissāya vipassanaṃ vaḍḍhetvā uttamatthaṃ arahattaṃ pāpuṇātī’’ti.
ижчаамахам̣, бхигкавз, ад̣дхамаасам̣ бадисаллийяид̇унд̇и ахам̣, бхигкавз, згам̣ ад̣дхамаасам̣ бадисаллийяид̇ум̣ нилийяид̇ум̣ згагова худ̇ваа вихарид̇ум̣ ижчаамийд̇и ад̇т̇о. наамхи гзнажи убасан̇гамид̇аб̣б̣о ан̃н̃ад̇ра згзна бин̣д̣абаад̇анийхаарагзнаад̇и яо ад̇д̇анаа баяуд̇д̇аваажам̣ агад̇ваа мамад̇т̇ааяа сад̣̇д̇хзсу гулзсу бадияад̇д̇абин̣д̣абаад̇ам̣ нийхарид̇ваа маяхам̣ убанаамзд̇и, д̇ам̣ бин̣д̣абаад̇анийхаарагам̣ згам̣ бхигкум̣ табзд̇ваа наамхи ан̃н̃зна гзнажи бхигкунаа ваа г̇ахадтзна ваа убасан̇гамид̇аб̣б̣од̇и.
Icchāmahaṃ, bhikkhave, aḍḍhamāsaṃ paṭisallīyitunti ahaṃ, bhikkhave, ekaṃ aḍḍhamāsaṃ paṭisallīyituṃ nilīyituṃ ekakova hutvā viharituṃ icchāmīti attho. Nāmhi kenaci upasaṅkamitabbo aññatra ekena piṇḍapātanīhārakenāti yo attanā payuttavācaṃ akatvā mamatthāya saddhesu kulesu paṭiyattapiṇḍapātaṃ nīharitvā mayhaṃ upanāmeti, taṃ piṇḍapātanīhārakaṃ ekaṃ bhikkhuṃ ṭhapetvā nāmhi aññena kenaci bhikkhunā vā gahaṭṭhena vā upasaṅkamitabboti.
гасмаа бана звамаахаад̇и? ад̇ийд̇з гира бан̃жасад̇аа миг̇алуд̣̇д̣̇агаа махад̇ийхи д̣̇ан̣д̣авааг̇ураад̣̇ийхи аран̃н̃ам̣ баригкибид̇ваа хадтад̇удтаа згад̇оязва яааваж̇ийвам̣ миг̇абагкигхаад̇агаммзна ж̇ийвигам̣ габбзд̇ваа нираяз уббаннаа. д̇з д̇ад̇т̇а бажжид̇ваа буб̣б̣з гад̇зна гзнажид̣̇зва гусалагаммзна мануссзсу уббаннаа галяаан̣уубаниссаяавасзна саб̣б̣зби бхаг̇авад̇о санд̇игз баб̣б̣аж̇ж̇ан̃жа убасамбад̣̇ан̃жа лабхим̣су. д̇зсам̣ д̇ад̇о муулаагусалагаммад̇о авибаггавибаагаа абараабаражзд̇анаа д̇асмим̣ ад̣дхамаасаб̣бханд̇арз ад̇д̇уубаггамзна жа баруубаггамзна жа ж̇ийвид̇уубажчзд̣̇ааяа огаасамагааси. д̇ам̣ бхаг̇аваа ад̣̇д̣̇аса. гаммавибааго жа наама на саггаа гзнажи бадиб̣аахид̇ум̣. д̇зсу жа бхигкуусу бут̇уж̇ж̇анааби ад̇т̇и, сод̇аабаннасагад̣̇ааг̇аамианааг̇аамикийн̣аасавааби. д̇ад̇т̇а кийн̣аасаваа аббадисанд̇хигаа, ид̇арз арияасаавагаа нияад̇аг̇ад̇игаа суг̇ад̇ибарааяан̣аа, бут̇уж̇ж̇анаанам̣ г̇ад̇и анияад̇аа.
Kasmā pana evamāhāti? Atīte kira pañcasatā migaluddakā mahatīhi daṇḍavāgurādīhi araññaṃ parikkhipitvā haṭṭhatuṭṭhā ekatoyeva yāvajīvaṃ migapakkhighātakammena jīvikaṃ kappetvā niraye uppannā. Te tattha paccitvā pubbe katena kenacideva kusalakammena manussesu uppannā kalyāṇūpanissayavasena sabbepi bhagavato santike pabbajjañca upasampadañca labhiṃsu. Tesaṃ tato mūlākusalakammato avipakkavipākā aparāparacetanā tasmiṃ aḍḍhamāsabbhantare attūpakkamena ca parūpakkamena ca jīvitūpacchedāya okāsamakāsi. Taṃ bhagavā addasa. Kammavipāko ca nāma na sakkā kenaci paṭibāhituṃ. Tesu ca bhikkhūsu puthujjanāpi atthi, sotāpannasakadāgāmianāgāmikhīṇāsavāpi. Tattha khīṇāsavā appaṭisandhikā, itare ariyasāvakā niyatagatikā sugatiparāyaṇā, puthujjanānaṃ gati aniyatā.
ат̇а бхаг̇аваа жинд̇зси – ‘‘имз ад̇д̇абхаавз чанд̣̇арааг̇зна маран̣абхаяабхийд̇аа на сагкиссанд̇и г̇ад̇им̣ висод̇хзд̇ум̣, ханд̣̇а нзсам̣ чанд̣̇арааг̇аббахаанааяа асубхагат̇ам̣ гат̇зми. д̇ам̣ суд̇ваа ад̇д̇абхаавз виг̇ад̇ажчанд̣̇арааг̇ад̇ааяа г̇ад̇ивисод̇ханам̣ гад̇ваа саг̇г̇з бадисанд̇хим̣ г̇ан̣хиссанд̇и, звам̣ д̇зсам̣ мама санд̇игз баб̣б̣аж̇ж̇аа саад̇т̇игаа бхависсад̇ий’’д̇и. д̇ад̇о д̇зсам̣ ануг̇г̇ахааяа асубхагат̇ам̣ гат̇зси гаммадтаанасийсзна, но маран̣аван̣н̣асам̣ван̣н̣анаад̇хиббааязна. гат̇зд̇ваа жа банасса зд̇ад̣̇ахоси – ‘‘сажз имам̣ ад̣дхамаасам̣ мам̣ бхигкуу бассиссанд̇и, ‘аж̇ж̇а зго бхигку мад̇о, аж̇ж̇а д̣̇вз…бз… аж̇ж̇а д̣̇асаа’д̇и ааг̇анд̇ваа аарожзссанд̇и, аяан̃жа гаммавибааго на саггаа маяаа ваа ан̃н̃зна ваа бадиб̣аахид̇ум̣, сваахам̣ д̇ам̣ суд̇вааби гим̣ гариссаами, гим̣ мз анад̇т̇агзна анаяаб̣яасанзна суд̇зна, ханд̣̇аахам̣ бхигкуунам̣ ад̣̇ассанам̣ убаг̇ажчаамий’’д̇и. д̇асмаа звамааха – ‘‘ижчаамахам̣, бхигкавз, ад̣дхамаасам̣ бадисаллийяид̇ум̣, наамхи гзнажи убасан̇гамид̇аб̣б̣о ан̃н̃ад̇ра згзна бин̣д̣абаад̇анийхаарагзнаа’’д̇и.
Atha bhagavā cintesi – ‘‘ime attabhāve chandarāgena maraṇabhayabhītā na sakkhissanti gatiṃ visodhetuṃ, handa nesaṃ chandarāgappahānāya asubhakathaṃ kathemi. Taṃ sutvā attabhāve vigatacchandarāgatāya gativisodhanaṃ katvā sagge paṭisandhiṃ gaṇhissanti, evaṃ tesaṃ mama santike pabbajjā sātthikā bhavissatī’’ti. Tato tesaṃ anuggahāya asubhakathaṃ kathesi kammaṭṭhānasīsena, no maraṇavaṇṇasaṃvaṇṇanādhippāyena. Kathetvā ca panassa etadahosi – ‘‘sace imaṃ aḍḍhamāsaṃ maṃ bhikkhū passissanti, ‘ajja eko bhikkhu mato, ajja dve…pe… ajja dasā’ti āgantvā ārocessanti, ayañca kammavipāko na sakkā mayā vā aññena vā paṭibāhituṃ, svāhaṃ taṃ sutvāpi kiṃ karissāmi, kiṃ me anatthakena anayabyasanena sutena, handāhaṃ bhikkhūnaṃ adassanaṃ upagacchāmī’’ti. Tasmā evamāha – ‘‘icchāmahaṃ, bhikkhave, aḍḍhamāsaṃ paṭisallīyituṃ, nāmhi kenaci upasaṅkamitabbo aññatra ekena piṇḍapātanīhārakenā’’ti.
абарз банааху – ‘‘баруубаваад̣̇авиваж̇ж̇анад̇т̇ам̣ звам̣ вад̇ваа бадисаллийно’’д̇и. барз гира бхаг̇аванд̇ам̣ убавад̣̇иссанд̇и – ‘‘аяам̣ ‘саб̣б̣ан̃н̃уу ахам̣ сад̣̇д̇хаммаваражаггавад̇д̇ий’д̇и бадиж̇аанамаано ад̇д̇аноби саавагз ан̃н̃аман̃н̃ам̣ гхаад̇знд̇з ниваарзд̇ум̣ на саггод̇и, гим̣ ан̃н̃ам̣ сагкиссад̇ий’’д̇и? д̇ад̇ра бан̣д̣ид̇аа вагканд̇и – ‘‘бхаг̇аваа бадисаллаанамануяуд̇д̇о на имам̣ бавад̇д̇им̣ ж̇аанаад̇и, гожисса аарожаяид̇ааби над̇т̇и , сажз ж̇аанзяяа ад̣̇д̇хаа ниваарзяяаа’’д̇и. ид̣̇ам̣ бана ижчаамад̇д̇ам̣, батамамзвзд̇т̇а гааран̣ам̣. наассуд̇хаад̇и зд̇т̇а ассуд̇хаад̇и бад̣̇абууран̣амад̇д̇з авад̇хааран̣ад̇т̇з ваа нибаад̇о, нзва гожи бхаг̇аванд̇ам̣ убасан̇гамийд̇и ад̇т̇о.
Apare panāhu – ‘‘parūpavādavivajjanatthaṃ evaṃ vatvā paṭisallīno’’ti. Pare kira bhagavantaṃ upavadissanti – ‘‘ayaṃ ‘sabbaññū ahaṃ saddhammavaracakkavattī’ti paṭijānamāno attanopi sāvake aññamaññaṃ ghātente nivāretuṃ na sakkoti, kiṃ aññaṃ sakkhissatī’’ti? Tatra paṇḍitā vakkhanti – ‘‘bhagavā paṭisallānamanuyutto na imaṃ pavattiṃ jānāti, kocissa ārocayitāpi natthi , sace jāneyya addhā nivāreyyā’’ti. Idaṃ pana icchāmattaṃ, paṭhamamevettha kāraṇaṃ. Nāssudhāti ettha assudhāti padapūraṇamatte avadhāraṇatthe vā nipāto, neva koci bhagavantaṃ upasaṅkamīti attho.
анзгзхи ван̣н̣асан̣таанаад̣̇ийхи гааран̣зхи вогааро ассаад̇и анзгаагааравогааро. анзгаагааравогин̣н̣о анзгаагаарзна саммиссод̇и вуд̇д̇ам̣ ход̇и. го со? асубхабхааванаануяог̇о, д̇ам̣ анзгаагааравогаарам̣. асубхабхааванаануяог̇амануяуд̇д̇аа вихаранд̇ийд̇и яуд̇д̇аббаяуд̇д̇аа вихаранд̇и. аддийяамаанаад̇и д̇зна гааязна аддаа д̣̇угкид̇аа хонд̇и. харааяамаанаад̇и лаж̇ж̇амаанаа. ж̇иг̇ужчамаанаад̇и ж̇иг̇ужчам̣ уббаад̣̇аяамаанаа. сад̇т̇ахаарагам̣ бариязсанд̇ийд̇и ж̇ийвид̇ахаран̣агасад̇т̇ам̣ бариязсанд̇и. на гзвалан̃жа д̇з сад̇т̇ам̣ бариязсид̇ваа ад̇д̇анаа ваа ад̇д̇аанам̣ ж̇ийвид̇аа воробзнд̇и, миг̇алан̣д̣игамби бана саман̣агуд̇д̇агам̣ убасан̇гамид̇ваа, ‘‘саад̇ху но, аавусо, ж̇ийвид̇аа воробзхий’’д̇и вад̣̇анд̇и. зд̇т̇а жа арияаа нзва баан̣аад̇ибаад̇ам̣ гарим̣су, на самаад̣̇абзсум̣, на саманун̃н̃аа ахзсум̣. бут̇уж̇ж̇анаа бана саб̣б̣амагам̣су.
Anekehi vaṇṇasaṇṭhānādīhi kāraṇehi vokāro assāti anekākāravokāro. Anekākāravokiṇṇo anekākārena sammissoti vuttaṃ hoti. Ko so? Asubhabhāvanānuyogo, taṃ anekākāravokāraṃ. Asubhabhāvanānuyogamanuyuttā viharantīti yuttappayuttā viharanti. Aṭṭīyamānāti tena kāyena aṭṭā dukkhitā honti. Harāyamānāti lajjamānā. Jigucchamānāti jigucchaṃ uppādayamānā. Satthahārakaṃ pariyesantīti jīvitaharaṇakasatthaṃ pariyesanti. Na kevalañca te satthaṃ pariyesitvā attanā vā attānaṃ jīvitā voropenti, migalaṇḍikampi pana samaṇakuttakaṃ upasaṅkamitvā, ‘‘sādhu no, āvuso, jīvitā voropehī’’ti vadanti. Ettha ca ariyā neva pāṇātipātaṃ kariṃsu, na samādapesuṃ, na samanuññā ahesuṃ. Puthujjanā pana sabbamakaṃsu.
бадисаллаанаа вудтид̇од̇и д̇зсам̣ бан̃жаннам̣ бхигкусад̇аанам̣ ж̇ийвид̇агкаяаббад̇д̇абхаавам̣ н̃ад̇ваа д̇ад̇о згийбхаавад̇о вудтид̇о ж̇аананд̇оби аж̇аананд̇о вияа гат̇аасамудтаабанад̇т̇ам̣ ааяасманд̇ам̣ аананд̣̇ам̣ ааманд̇зси. гим̣ ну ко, аананд̣̇а, д̇анубхууд̇о вияа бхигкусан̇гход̇и ид̇о, аананд̣̇а, буб̣б̣з б̣ахуу бхигкуу згад̇о убадтаанам̣ ааг̇ажчанд̇и, уд̣̇д̣̇зсам̣ барибужчам̣ г̇ан̣ханд̇и, саж̇жхааяанд̇и, згабаж̇ж̇од̇о вияа аараамо д̣̇иссад̇и. ид̣̇аани бана ад̣дхамаасамад̇д̇асса ажжаязна д̇анубхууд̇о вияа д̇ануго манд̣̇о аббаго вирал̣о вияа ж̇аад̇о бхигкусан̇гхо. гим̣ ну ко гааран̣ам̣? гим̣ д̣̇исаасу багганд̇аа бхигкууд̇и?
Paṭisallānā vuṭṭhitoti tesaṃ pañcannaṃ bhikkhusatānaṃ jīvitakkhayappattabhāvaṃ ñatvā tato ekībhāvato vuṭṭhito jānantopi ajānanto viya kathāsamuṭṭhāpanatthaṃ āyasmantaṃ ānandaṃ āmantesi. Kiṃ nu kho, ānanda, tanubhūto viya bhikkhusaṅghoti ito, ānanda, pubbe bahū bhikkhū ekato upaṭṭhānaṃ āgacchanti, uddesaṃ paripucchaṃ gaṇhanti, sajjhāyanti, ekapajjoto viya ārāmo dissati. Idāni pana aḍḍhamāsamattassa accayena tanubhūto viya tanuko mando appako viraḷo viya jāto bhikkhusaṅgho. Kiṃ nu kho kāraṇaṃ? Kiṃ disāsu pakkantā bhikkhūti?
ат̇ааяасмаа аананд̣̇о гаммавибаагзна д̇зсам̣ ж̇ийвид̇агкаяаббад̇д̇им̣ асаллагкзнд̇о асубхагаммадтаанаануяог̇абажжаяаа бана саллагкзнд̇о д̇ат̇аа хи бана, бханд̇з бхаг̇аваад̇иаад̣̇им̣ вад̇ваа бхигкуунам̣ арахад̇д̇аббад̇д̇ияаа ан̃н̃ам̣ гаммадтаанам̣ яаажанд̇о, саад̇ху, бханд̇з, бхаг̇аваад̇иаад̣̇имааха. д̇ассад̇т̇о – саад̇ху, бханд̇з, бхаг̇аваа ан̃н̃ам̣ гааран̣ам̣ аажигкад̇у, язна бхигкусан̇гхо арахад̇д̇з бад̇идтахзяяа . махаасамуд̣̇д̣̇ам̣ орохан̣ад̇ид̇т̇аани вияа ан̃н̃ааниби д̣̇асаануссад̇и, д̣̇асагасин̣а, жад̇уд̇хаад̇увавад̇т̇аана, б̣рахмавихаара, аанаабаанассад̇ибабхзд̣̇аани б̣ахууни ниб̣б̣аанорохан̣агаммадтаанаани санд̇и, д̇зсу бхаг̇аваа бхигкуу самассаасзд̇ваа ан̃н̃ад̇арам̣ гаммадтаанам̣ аажигкад̇ууд̇и ад̇хиббааяо.
Athāyasmā ānando kammavipākena tesaṃ jīvitakkhayappattiṃ asallakkhento asubhakammaṭṭhānānuyogapaccayā pana sallakkhento tathā hi pana, bhante bhagavātiādiṃ vatvā bhikkhūnaṃ arahattappattiyā aññaṃ kammaṭṭhānaṃ yācanto, sādhu, bhante, bhagavātiādimāha. Tassattho – sādhu, bhante, bhagavā aññaṃ kāraṇaṃ ācikkhatu, yena bhikkhusaṅgho arahatte patiṭṭhaheyya . Mahāsamuddaṃ orohaṇatitthāni viya aññānipi dasānussati, dasakasiṇa, catudhātuvavatthāna, brahmavihāra, ānāpānassatipabhedāni bahūni nibbānorohaṇakammaṭṭhānāni santi, tesu bhagavā bhikkhū samassāsetvā aññataraṃ kammaṭṭhānaṃ ācikkhatūti adhippāyo.
ат̇а бхаг̇аваа д̇ат̇аа гаад̇угаамо т̇зрам̣ уяяож̇знд̇о д̇знахаананд̣̇аад̇иаад̣̇имааха. д̇ад̇т̇а взсаалим̣ убаниссааяаад̇и взсаалияам̣ убаниссааяа саманд̇аа г̇аавуд̇зби ад̣дхаяож̇анзби яаавад̇игаа вихаранд̇и, д̇з саб̣б̣з саннибаад̇зхийд̇и ад̇т̇о. саб̣б̣з убадтаанасаалааяам̣ саннибаад̇зд̇ваад̇и ад̇д̇анаа г̇анд̇ум̣ яуд̇д̇адтаанам̣ саяам̣ г̇анд̇ваа ан̃н̃ад̇т̇а д̣̇ахарабхигкуу бахин̣ид̇ваа мухуд̇д̇знзва анавасзсз бхигкуу убадтаанасаалааяам̣ самуухам̣ гад̇ваа. яассад̣̇аани, бханд̇з, бхаг̇аваа гаалам̣ ман̃н̃ад̇ийд̇и зд̇т̇а аяамад̇хиббааяо – бхаг̇аваа бхигкусан̇гхо саннибад̇ид̇о, зса гаало бхигкуунам̣ д̇хаммагат̇ам̣ гаад̇ум̣, анусаасаним̣ д̣̇аад̇ум̣, ид̣̇аани яасса д̇умхз гаалам̣ ж̇аанаат̇а, д̇ам̣ гаад̇аб̣б̣анд̇и.
Atha bhagavā tathā kātukāmo theraṃ uyyojento tenahānandātiādimāha. Tattha vesāliṃ upanissāyāti vesāliyaṃ upanissāya samantā gāvutepi aḍḍhayojanepi yāvatikā viharanti, te sabbe sannipātehīti attho. Sabbe upaṭṭhānasālāyaṃ sannipātetvāti attanā gantuṃ yuttaṭṭhānaṃ sayaṃ gantvā aññattha daharabhikkhū pahiṇitvā muhutteneva anavasese bhikkhū upaṭṭhānasālāyaṃ samūhaṃ katvā. Yassadāni, bhante, bhagavā kālaṃ maññatīti ettha ayamadhippāyo – bhagavā bhikkhusaṅgho sannipatito, esa kālo bhikkhūnaṃ dhammakathaṃ kātuṃ, anusāsaniṃ dātuṃ, idāni yassa tumhe kālaṃ jānātha, taṃ kātabbanti.
ат̇а ко бхаг̇аваа бхигкуу ааманд̇зси, аяамби ко, бхигкавзд̇и. ааманд̇зд̇ваа жа бана бхигкуунам̣ арахад̇д̇аббад̇д̇ияаа буб̣б̣з аажигкид̇аасубхагаммадтаанад̇о ан̃н̃ам̣ барияааяам̣ аажигканд̇о аанаабаанассад̇исамаад̇хийд̇иаад̣̇имааха. д̇ад̇т̇а аанаабаанассад̇исамаад̇хийд̇и аанаабаанабариг̇г̇аахигааяа сад̇ияаа сад̣̇д̇хим̣ самбаяуд̇д̇о самаад̇хи, аанаабаанассад̇ияам̣ ваа самаад̇хи, аанаабаанассад̇исамаад̇хи. бхаавид̇од̇и уббаад̣̇ид̇о вад̣дхид̇о ваа. б̣ахулийгад̇од̇и бунаббунам̣ гад̇о. санд̇о жзва бан̣ийд̇о жаад̇и санд̇о жзва бан̣ийд̇о жзва. убхаяад̇т̇а звасад̣̇д̣̇зна нияамо взд̣̇ид̇аб̣б̣о. гим̣ вуд̇д̇ам̣ ход̇и? аяан̃хи яат̇аа асубхагаммадтаанам̣ гзвалам̣ бадивзд̇хавасзна санд̇ан̃жа бан̣ийд̇ан̃жа, ол̣ааригаарамман̣ад̇д̇аа бана бадигуулаарамман̣ад̇д̇аа жа аарамман̣авасзна нзва санд̇ам̣ на бан̣ийд̇ам̣, на звам̣ гзнажи барияааязна асанд̇о ваа аббан̣ийд̇о ваа, абижа ко аарамман̣асанд̇ад̇ааяаби санд̇о вуубасанд̇о ниб̣б̣уд̇о, бадивзд̇хасан̇каад̇ааяа ан̇г̇асанд̇ад̇ааяаби, аарамман̣абан̣ийд̇ад̇ааяа бан̣ийд̇о ад̇ид̇д̇игаро, ан̇г̇абан̣ийд̇ад̇ааяабийд̇и. д̇зна вуд̇д̇ам̣ ‘‘санд̇о жзва бан̣ийд̇о жаа’’д̇и.
Atha kho bhagavā bhikkhū āmantesi, ayampi kho, bhikkhaveti. Āmantetvā ca pana bhikkhūnaṃ arahattappattiyā pubbe ācikkhitaasubhakammaṭṭhānato aññaṃ pariyāyaṃ ācikkhanto ānāpānassatisamādhītiādimāha. Tattha ānāpānassatisamādhīti ānāpānapariggāhikāya satiyā saddhiṃ sampayutto samādhi, ānāpānassatiyaṃ vā samādhi, ānāpānassatisamādhi. Bhāvitoti uppādito vaḍḍhito vā. Bahulīkatoti punappunaṃ kato. Santo ceva paṇīto cāti santo ceva paṇīto ceva. Ubhayattha evasaddena niyamo veditabbo. Kiṃ vuttaṃ hoti? Ayañhi yathā asubhakammaṭṭhānaṃ kevalaṃ paṭivedhavasena santañca paṇītañca, oḷārikārammaṇattā pana paṭikūlārammaṇattā ca ārammaṇavasena neva santaṃ na paṇītaṃ, na evaṃ kenaci pariyāyena asanto vā appaṇīto vā, apica kho ārammaṇasantatāyapi santo vūpasanto nibbuto, paṭivedhasaṅkhātāya aṅgasantatāyapi, ārammaṇapaṇītatāya paṇīto atittikaro, aṅgapaṇītatāyapīti. Tena vuttaṃ ‘‘santo ceva paṇīto cā’’ti.
асзжанаго жа суко жа вихаарод̇и зд̇т̇а бана наасса сзжананд̇и асзжанаго, анаасид̇д̇аго аб̣б̣огин̣н̣о баадиязгго аавзн̣иго, над̇т̇и зд̇т̇а баригаммзна ваа убажаарзна ваа санд̇ад̇аа, аад̣̇исаманнаахаарад̇о бабхуд̇и ад̇д̇ано сабхаавзнзва санд̇о жа бан̣ийд̇о жаад̇и ад̇т̇о. гзжи ‘‘асзжанаго’’д̇и анаасид̇д̇аго ож̇аванд̇о, сабхаавзнзва мад̇хуро’’д̇и вад̣̇анд̇и. звамаяам̣ асзжанаго жа аббид̇аббид̇агкан̣з гааяигажзд̇асигасукаббадилаабхааяа сам̣вад̇д̇анад̇о суко жа вихаарод̇и взд̣̇ид̇аб̣б̣о.
Asecanakoca sukho ca vihāroti ettha pana nāssa secananti asecanako, anāsittako abbokiṇṇo pāṭiyekko āveṇiko, natthi ettha parikammena vā upacārena vā santatā, ādisamannāhārato pabhuti attano sabhāveneva santo ca paṇīto cāti attho. Keci ‘‘asecanako’’ti anāsittako ojavanto, sabhāveneva madhuro’’ti vadanti. Evamayaṃ asecanako ca appitappitakkhaṇe kāyikacetasikasukhappaṭilābhāya saṃvattanato sukho ca vihāroti veditabbo.
уббаннуббаннзд̇и авигкамбхид̇з. баабагзд̇и лаамагз. агусалз д̇хаммзд̇и агосалласамбхууд̇з д̇хаммз. таанасо анд̇арад̇хаабзд̇ийд̇и кан̣знзва анд̇арад̇хаабзд̇и вигкамбхзд̇и. вуубасамзд̇ийд̇и судту убасамзд̇и, ниб̣б̣зд̇хабхааг̇ияад̇д̇аа анубуб̣б̣зна арияамаг̇г̇авуд̣̇д̇хиббад̇д̇о самужчинд̣̇ад̇и, бадиббассамбхзд̇ийд̇и вуд̇д̇ам̣ ход̇и. г̇имхаанам̣ бажчимз маасзд̇и аасаал̣хамаасз. уухад̇ам̣ раж̇ож̇алланд̇и адта маасз ваад̇аад̇абасугкааяа г̇омахим̣саад̣̇ибаад̣̇аббахаарасамбхиннааяа бат̇авияаа уд̣̇д̇хам̣ хад̇ам̣ уухад̇ам̣ аагаасз самудтид̇ам̣ раж̇ан̃жа рзн̣ун̃жа. махаа агааламзгход̇и саб̣б̣ам̣ набхам̣ аж̇жход̇т̇арид̇ваа удтид̇о аасаал̣хаж̇ун̣хабагкз сагалам̣ ад̣дхамаасам̣ вассанагамзгхо. со хи асамбад̇д̇з вассагаалз уббаннад̇д̇аа агааламзгход̇и ид̇ха ад̇хиббзд̇о. таанасо анд̇араад̇хаабзд̇и вуубасамзд̇ийд̇и кан̣знзва ад̣̇ассанам̣ нзд̇и бат̇авияам̣ саннисийд̣̇аабзд̇и. звамзва код̇и обамманид̣̇ассанамзд̇ам̣. д̇ад̇о барам̣ вуд̇д̇анаяамзва.
Uppannuppanneti avikkhambhite. Pāpaketi lāmake. Akusale dhammeti akosallasambhūte dhamme. Ṭhānaso antaradhāpetīti khaṇeneva antaradhāpeti vikkhambheti. Vūpasametīti suṭṭhu upasameti, nibbedhabhāgiyattā anupubbena ariyamaggavuddhippatto samucchindati, paṭippassambhetīti vuttaṃ hoti. Gimhānaṃ pacchime māseti āsāḷhamāse. Ūhataṃ rajojallanti aṭṭha māse vātātapasukkhāya gomahiṃsādipādappahārasambhinnāya pathaviyā uddhaṃ hataṃ ūhataṃ ākāse samuṭṭhitaṃ rajañca reṇuñca. Mahā akālameghoti sabbaṃ nabhaṃ ajjhottharitvā uṭṭhito āsāḷhajuṇhapakkhe sakalaṃ aḍḍhamāsaṃ vassanakamegho. So hi asampatte vassakāle uppannattā akālameghoti idha adhippeto. Ṭhānaso antarādhāpeti vūpasametīti khaṇeneva adassanaṃ neti pathaviyaṃ sannisīdāpeti. Evameva khoti opammanidassanametaṃ. Tato paraṃ vuttanayameva.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 9. взсаалийсуд̇д̇ам̣ • 9. Vesālīsuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 9. взсаалийсуд̇д̇аван̣н̣анаа • 9. Vesālīsuttavaṇṇanā
