| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) |
༩. ཝེསཱལཱིསུཏྟཝཎྞནཱ
9. Vesālīsuttavaṇṇanā
༩༨༥. ནཝམེ ཝེསཱལིཡནྟི ཨེཝཾནཱམཀེ ཨིཏྠིལིངྒཝསེན པཝཏྟཝོཧཱརེ ནགརེ། ཏཉྷི ནགརཾ ཏིཀྑཏྟུཾ པཱཀཱརཔརིཀྑེཔཝཌྜྷནེན ཝིསཱལཱིབྷཱུཏཏྟཱ ཝེསཱལཱིཏི ཝུཙྩཏི། ཨིདམྤི ཙ ནགརཾ སབྦཉྙུཏཾ པཏྟེཡེཝ སམྨཱསམྦུདྡྷེ སབྦཱཀཱརཝེཔུལླཏཾ པཏྟནྟི ཝེདིཏབྦཾ། ཨེཝཾ གོཙརགཱམཾ དསྶེཏྭཱ ནིཝཱསཊྛཱནམཱཧ མཧཱཝནེ ཀཱུཊཱགཱརསཱལཱཡནྟི། ཏཏྠ མཧཱཝནཾ ནཱམ སཡཾཛཱཏཾ ཨརོཔིམཾ སཔརིཙྪེདཾ མཧནྟཾ ཝནཾ། ཀཔིལཝཏྠུསཱམནྟཱ པན མཧཱཝནཾ ཧིམཝནྟེན སཧ ཨེཀཱབདྡྷཾ ཨཔརིཙྪེདཾ ཧུཏྭཱ མཧཱསམུདྡཾ ཨཱཧཙྩ ཋིཏཾ། ཨིདཾ ཏཱདིསཾ ན ཧོཏི, སཔརིཙྪེདཾ མཧནྟཾ ཝནནྟི མཧཱཝནཾ། ཀཱུཊཱགཱརསཱལཱ པན མཧཱཝནཾ ནིསྶཱཡ ཀཏེ ཨཱརཱམེ ཀཱུཊཱགཱརཾ ཨནྟོཀཏྭཱ ཧཾསཝཊྚཀཙྪནྣེན ཀཏཱ སབྦཱཀཱརསམྤནྣཱ བུདྡྷསྶ བྷགཝཏོ གནྡྷཀུཊཱིཏི ཝེདིཏབྦཱ།
985. Navame vesāliyanti evaṃnāmake itthiliṅgavasena pavattavohāre nagare. Tañhi nagaraṃ tikkhattuṃ pākāraparikkhepavaḍḍhanena visālībhūtattā vesālīti vuccati. Idampi ca nagaraṃ sabbaññutaṃ patteyeva sammāsambuddhe sabbākāravepullataṃ pattanti veditabbaṃ. Evaṃ gocaragāmaṃ dassetvā nivāsaṭṭhānamāha mahāvane kūṭāgārasālāyanti. Tattha mahāvanaṃ nāma sayaṃjātaṃ aropimaṃ saparicchedaṃ mahantaṃ vanaṃ. Kapilavatthusāmantā pana mahāvanaṃ himavantena saha ekābaddhaṃ aparicchedaṃ hutvā mahāsamuddaṃ āhacca ṭhitaṃ. Idaṃ tādisaṃ na hoti, saparicchedaṃ mahantaṃ vananti mahāvanaṃ. Kūṭāgārasālā pana mahāvanaṃ nissāya kate ārāme kūṭāgāraṃ antokatvā haṃsavaṭṭakacchannena katā sabbākārasampannā buddhassa bhagavato gandhakuṭīti veditabbā.
ཨནེཀཔརིཡཱཡེན ཨསུབྷཀཐཾ ཀཐེཏཱིཏི ཨནེཀེཧི ཀཱརཎེཧི ཨསུབྷཱཀཱརསནྡསྶནཔྤཝཏྟཾ ཀཱཡཝིཙྪནྡནཱིཡཀཐཾ ཀཐེཏི། སེཡྻཐིདཾ – ཨཏྠི ཨིམསྨིཾ ཀཱཡེ ཀེསཱ ལོམཱ ནཁཱ དནྟཱ…པེ॰… མུཏྟནྟི། ཀིཾ ཝུཏྟཾ ཧོཏི? བྷིཀྑཝེ, ཨིམསྨིཾ བྱཱམམཏྟེ ཀལེ༹ཝརེ སབྦཱཀཱརེནཔི ཝིཙིནནྟོ ན ཀོཙི ཀིཉྩི མུཏྟཾ ཝཱ མཎིཾ ཝཱ ཝེལུ༹རིཡཾ ཝཱ ཨགརུཾ ཝཱ ཙནྡནཾ ཝཱ ཀུངྐུམཾ ཝཱ ཀཔྤུརཾ ཝཱ ཝཱསཙུཎྞཱདིཾ ཝཱ ཨཎུམཏྟམྤི སུཙིབྷཱཝཾ པསྶཏི, ཨཐ ཁོ པརམདུགྒནྡྷཾ ཛེགུཙྪཨསྶིརིཀདསྶནཾ ཀེསལོམཱདིནཱནཔྤཀཱརཾ ཨསུཙིམེཝ པསྶཏི, ཏསྨཱ ན ཨེཏྠ ཚནྡོ ཝཱ རཱགོ ཝཱ ཀརཎཱིཡོ། ཡེཔི ཨུཏྟམངྒེ སིརསི ཛཱཏཱ ཀེསཱ ནཱམ, ཏེཔི ཨསུབྷཱ ཙེཝ ཨསུཙིནོ ཙ པཊིཀཱུལཱ ཙ། སོ ཙ ནེསཾ ཨསུབྷཱསུཙིཔཊིཀཱུལབྷཱཝོ ཝཎྞཏོཔི སཎྛཱནཏོཔི གནྡྷཏོཔི ཨཱསཡཏོཔི ཨོཀཱསཏོཔཱིཏི པཉྩཧཱཀཱརེཧི ཝེདིཏབྦོ། ཨེཝཾ ལོམཱདཱིནམྤཱིཏི ཨཡམེཏྠ སངྑེཔོ, ཝིཏྠཱརོ པན ཝིསུདྡྷིམགྒེ (ཝིསུདྡྷི॰ ༡.༣༠༧) ཝུཏྟནཡེནེཝ ཝེདིཏབྦོ། ཨིཏི བྷགཝཱ ཨེཀམེཀསྨིཾ ཀོཊྛཱསེ པཉྩཔཉྩཔྤབྷེདེན ཨནེཀཔརིཡཱཡེན ཨསུབྷཀཐཾ ཀཐེཏི།
Anekapariyāyena asubhakathaṃ kathetīti anekehi kāraṇehi asubhākārasandassanappavattaṃ kāyavicchandanīyakathaṃ katheti. Seyyathidaṃ – atthi imasmiṃ kāye kesā lomā nakhā dantā…pe… muttanti. Kiṃ vuttaṃ hoti? Bhikkhave, imasmiṃ byāmamatte kaḷevare sabbākārenapi vicinanto na koci kiñci muttaṃ vā maṇiṃ vā veḷuriyaṃ vā agaruṃ vā candanaṃ vā kuṅkumaṃ vā kappuraṃ vā vāsacuṇṇādiṃ vā aṇumattampi sucibhāvaṃ passati, atha kho paramaduggandhaṃ jegucchaassirikadassanaṃ kesalomādinānappakāraṃ asucimeva passati, tasmā na ettha chando vā rāgo vā karaṇīyo. Yepi uttamaṅge sirasi jātā kesā nāma, tepi asubhā ceva asucino ca paṭikūlā ca. So ca nesaṃ asubhāsucipaṭikūlabhāvo vaṇṇatopi saṇṭhānatopi gandhatopi āsayatopi okāsatopīti pañcahākārehi veditabbo. Evaṃ lomādīnampīti ayamettha saṅkhepo, vitthāro pana visuddhimagge (visuddhi. 1.307) vuttanayeneva veditabbo. Iti bhagavā ekamekasmiṃ koṭṭhāse pañcapañcappabhedena anekapariyāyena asubhakathaṃ katheti.
ཨསུབྷཱཡ ཝཎྞཾ བྷཱསཏཱིཏི ཨུདྡྷུམཱཏཀཱདིཝསེན ཨསུབྷམཱཏིཀཾ ནིཀྑིཔིཏྭཱ པདབྷཱཛནཱིཡེན ཏཾ ཝིབྷཛནྟོ ཝཎྞེནྟོ ཨསུབྷཱཡ ཝཎྞཾ བྷཱསཏི། ཨསུབྷབྷཱཝནཱཡ ཝཎྞཾ བྷཱསཏཱིཏི ཡཱ ཨཡཾ ཀེསཱདཱིསུ ཝཱ ཨུདྡྷུམཱཏཀཱདཱིསུ ཝཱ ཨཛ྄ཛྷཏྟབཧིདྡྷཱཝཏྠཱུསུ ཨསུབྷཱཀཱརཾ གཧེཏྭཱ པཝཏྟསྶ ཙིཏྟསྶ བྷཱཝནཱ ཝཌྜྷནཱ ཕཱཏིཀམྨཾ, ཏསྶཱ ཨསུབྷབྷཱཝནཱཡ ཨཱནིསཾསཾ དསྶེནྟོ ཝཎྞཾ བྷཱསཏི, གུཎཾ པརིཀིཏྟེཏི། སེཡྻཐིདཾ – ‘‘ཨསུབྷབྷཱཝནཱབྷིཡུཏྟོ, བྷིཀྑཝེ, བྷིཀྑུ ཀེསཱདཱིསུ ཝཱ ཝཏྠཱུསུ ཨུདྡྷུམཱཏཀཱདཱིསུ ཝཱ པཉྩངྒཝིཔྤཧཱིནཾ པཉྩངྒསམནྣཱགཏཾ ཏིཝིདྷཀལྱཱཎཾ དསལཀྑཎསམྤནྣཾ པཋམཛ྄ཛྷཱནཾ པཊིལབྷཏི། སོ ཏཾ པཋམཛ྄ཛྷཱནསངྑཱཏཾ ཙིཏྟམཉྫཱུསཾ ནིསྶཱཡ ཝིཔསྶནཾ ཝཌྜྷེཏྭཱ ཨུཏྟམཏྠཾ ཨརཧཏྟཾ པཱཔུཎཱཏཱི’’ཏི།
Asubhāya vaṇṇaṃ bhāsatīti uddhumātakādivasena asubhamātikaṃ nikkhipitvā padabhājanīyena taṃ vibhajanto vaṇṇento asubhāya vaṇṇaṃ bhāsati. Asubhabhāvanāya vaṇṇaṃ bhāsatīti yā ayaṃ kesādīsu vā uddhumātakādīsu vā ajjhattabahiddhāvatthūsu asubhākāraṃ gahetvā pavattassa cittassa bhāvanā vaḍḍhanā phātikammaṃ, tassā asubhabhāvanāya ānisaṃsaṃ dassento vaṇṇaṃ bhāsati, guṇaṃ parikitteti. Seyyathidaṃ – ‘‘asubhabhāvanābhiyutto, bhikkhave, bhikkhu kesādīsu vā vatthūsu uddhumātakādīsu vā pañcaṅgavippahīnaṃ pañcaṅgasamannāgataṃ tividhakalyāṇaṃ dasalakkhaṇasampannaṃ paṭhamajjhānaṃ paṭilabhati. So taṃ paṭhamajjhānasaṅkhātaṃ cittamañjūsaṃ nissāya vipassanaṃ vaḍḍhetvā uttamatthaṃ arahattaṃ pāpuṇātī’’ti.
ཨིཙྪཱམཧཾ, བྷིཀྑཝེ, ཨཌྜྷམཱསཾ པཊིསལླཱིཡིཏུནྟི ཨཧཾ, བྷིཀྑཝེ, ཨེཀཾ ཨཌྜྷམཱསཾ པཊིསལླཱིཡིཏུཾ ནིལཱིཡིཏུཾ ཨེཀཀོཝ ཧུཏྭཱ ཝིཧརིཏུཾ ཨིཙྪཱམཱིཏི ཨཏྠོ། ནཱམྷི ཀེནཙི ཨུཔསངྐམིཏབྦོ ཨཉྙཏྲ ཨེཀེན པིཎྜཔཱཏནཱིཧཱརཀེནཱཏི ཡོ ཨཏྟནཱ པཡུཏྟཝཱཙཾ ཨཀཏྭཱ མམཏྠཱཡ སདྡྷེསུ ཀུལེསུ པཊིཡཏྟཔིཎྜཔཱཏཾ ནཱིཧརིཏྭཱ མཡ྄ཧཾ ཨུཔནཱམེཏི, ཏཾ པིཎྜཔཱཏནཱིཧཱརཀཾ ཨེཀཾ བྷིཀྑུཾ ཋཔེཏྭཱ ནཱམྷི ཨཉྙེན ཀེནཙི བྷིཀྑུནཱ ཝཱ གཧཊྛེན ཝཱ ཨུཔསངྐམིཏབྦོཏི།
Icchāmahaṃ, bhikkhave, aḍḍhamāsaṃ paṭisallīyitunti ahaṃ, bhikkhave, ekaṃ aḍḍhamāsaṃ paṭisallīyituṃ nilīyituṃ ekakova hutvā viharituṃ icchāmīti attho. Nāmhi kenaci upasaṅkamitabbo aññatra ekena piṇḍapātanīhārakenāti yo attanā payuttavācaṃ akatvā mamatthāya saddhesu kulesu paṭiyattapiṇḍapātaṃ nīharitvā mayhaṃ upanāmeti, taṃ piṇḍapātanīhārakaṃ ekaṃ bhikkhuṃ ṭhapetvā nāmhi aññena kenaci bhikkhunā vā gahaṭṭhena vā upasaṅkamitabboti.
ཀསྨཱ པན ཨེཝམཱཧཱཏི? ཨཏཱིཏེ ཀིར པཉྩསཏཱ མིགལུདྡཀཱ མཧཏཱིཧི དཎྜཝཱགུརཱདཱིཧི ཨརཉྙཾ པརིཀྑིཔིཏྭཱ ཧཊྛཏུཊྛཱ ཨེཀཏོཡེཝ ཡཱཝཛཱིཝཾ མིགཔཀྑིགྷཱཏཀམྨེན ཛཱིཝིཀཾ ཀཔྤེཏྭཱ ནིརཡེ ཨུཔྤནྣཱ། ཏེ ཏཏྠ པཙྩིཏྭཱ པུབྦེ ཀཏེན ཀེནཙིདེཝ ཀུསལཀམྨེན མནུསྶེསུ ཨུཔྤནྣཱ ཀལྱཱཎཱུཔནིསྶཡཝསེན སབྦེཔི བྷགཝཏོ སནྟིཀེ པབྦཛྫཉྩ ཨུཔསམྤདཉྩ ལབྷིཾསུ། ཏེསཾ ཏཏོ མཱུལཱཀུསལཀམྨཏོ ཨཝིཔཀྐཝིཔཱཀཱ ཨཔརཱཔརཙེཏནཱ ཏསྨིཾ ཨཌྜྷམཱསབྦྷནྟརེ ཨཏྟཱུཔཀྐམེན ཙ པརཱུཔཀྐམེན ཙ ཛཱིཝིཏཱུཔཙྪེདཱཡ ཨོཀཱསམཀཱསི། ཏཾ བྷགཝཱ ཨདྡས། ཀམྨཝིཔཱཀོ ཙ ནཱམ ན སཀྐཱ ཀེནཙི པཊིབཱཧིཏུཾ། ཏེསུ ཙ བྷིཀྑཱུསུ པུཐུཛྫནཱཔི ཨཏྠི, སོཏཱཔནྣསཀདཱགཱམིཨནཱགཱམིཁཱིཎཱསཝཱཔི། ཏཏྠ ཁཱིཎཱསཝཱ ཨཔྤཊིསནྡྷིཀཱ, ཨིཏརེ ཨརིཡསཱཝཀཱ ནིཡཏགཏིཀཱ སུགཏིཔརཱཡཎཱ, པུཐུཛྫནཱནཾ གཏི ཨནིཡཏཱ།
Kasmā pana evamāhāti? Atīte kira pañcasatā migaluddakā mahatīhi daṇḍavāgurādīhi araññaṃ parikkhipitvā haṭṭhatuṭṭhā ekatoyeva yāvajīvaṃ migapakkhighātakammena jīvikaṃ kappetvā niraye uppannā. Te tattha paccitvā pubbe katena kenacideva kusalakammena manussesu uppannā kalyāṇūpanissayavasena sabbepi bhagavato santike pabbajjañca upasampadañca labhiṃsu. Tesaṃ tato mūlākusalakammato avipakkavipākā aparāparacetanā tasmiṃ aḍḍhamāsabbhantare attūpakkamena ca parūpakkamena ca jīvitūpacchedāya okāsamakāsi. Taṃ bhagavā addasa. Kammavipāko ca nāma na sakkā kenaci paṭibāhituṃ. Tesu ca bhikkhūsu puthujjanāpi atthi, sotāpannasakadāgāmianāgāmikhīṇāsavāpi. Tattha khīṇāsavā appaṭisandhikā, itare ariyasāvakā niyatagatikā sugatiparāyaṇā, puthujjanānaṃ gati aniyatā.
ཨཐ བྷགཝཱ ཙིནྟེསི – ‘‘ཨིམེ ཨཏྟབྷཱཝེ ཚནྡརཱགེན མརཎབྷཡབྷཱིཏཱ ན སཀྑིསྶནྟི གཏིཾ ཝིསོདྷེཏུཾ, ཧནྡ ནེསཾ ཚནྡརཱགཔྤཧཱནཱཡ ཨསུབྷཀཐཾ ཀཐེམི། ཏཾ སུཏྭཱ ཨཏྟབྷཱཝེ ཝིགཏཙྪནྡརཱགཏཱཡ གཏིཝིསོདྷནཾ ཀཏྭཱ སགྒེ པཊིསནྡྷིཾ གཎྷིསྶནྟི, ཨེཝཾ ཏེསཾ མམ སནྟིཀེ པབྦཛྫཱ སཱཏྠིཀཱ བྷཝིསྶཏཱི’’ཏི། ཏཏོ ཏེསཾ ཨནུགྒཧཱཡ ཨསུབྷཀཐཾ ཀཐེསི ཀམྨཊྛཱནསཱིསེན, ནོ མརཎཝཎྞསཾཝཎྞནཱདྷིཔྤཱཡེན། ཀཐེཏྭཱ ཙ པནསྶ ཨེཏདཧོསི – ‘‘སཙེ ཨིམཾ ཨཌྜྷམཱསཾ མཾ བྷིཀྑཱུ པསྶིསྶནྟི, ‘ཨཛྫ ཨེཀོ བྷིཀྑུ མཏོ, ཨཛྫ དྭེ…པེ॰… ཨཛྫ དསཱ’ཏི ཨཱགནྟྭཱ ཨཱརོཙེསྶནྟི, ཨཡཉྩ ཀམྨཝིཔཱཀོ ན སཀྐཱ མཡཱ ཝཱ ཨཉྙེན ཝཱ པཊིབཱཧིཏུཾ, སྭཱཧཾ ཏཾ སུཏྭཱཔི ཀིཾ ཀརིསྶཱམི, ཀིཾ མེ ཨནཏྠཀེན ཨནཡབྱསནེན སུཏེན, ཧནྡཱཧཾ བྷིཀྑཱུནཾ ཨདསྶནཾ ཨུཔགཙྪཱམཱི’’ཏི། ཏསྨཱ ཨེཝམཱཧ – ‘‘ཨིཙྪཱམཧཾ, བྷིཀྑཝེ, ཨཌྜྷམཱསཾ པཊིསལླཱིཡིཏུཾ, ནཱམྷི ཀེནཙི ཨུཔསངྐམིཏབྦོ ཨཉྙཏྲ ཨེཀེན པིཎྜཔཱཏནཱིཧཱརཀེནཱ’’ཏི།
Atha bhagavā cintesi – ‘‘ime attabhāve chandarāgena maraṇabhayabhītā na sakkhissanti gatiṃ visodhetuṃ, handa nesaṃ chandarāgappahānāya asubhakathaṃ kathemi. Taṃ sutvā attabhāve vigatacchandarāgatāya gativisodhanaṃ katvā sagge paṭisandhiṃ gaṇhissanti, evaṃ tesaṃ mama santike pabbajjā sātthikā bhavissatī’’ti. Tato tesaṃ anuggahāya asubhakathaṃ kathesi kammaṭṭhānasīsena, no maraṇavaṇṇasaṃvaṇṇanādhippāyena. Kathetvā ca panassa etadahosi – ‘‘sace imaṃ aḍḍhamāsaṃ maṃ bhikkhū passissanti, ‘ajja eko bhikkhu mato, ajja dve…pe… ajja dasā’ti āgantvā ārocessanti, ayañca kammavipāko na sakkā mayā vā aññena vā paṭibāhituṃ, svāhaṃ taṃ sutvāpi kiṃ karissāmi, kiṃ me anatthakena anayabyasanena sutena, handāhaṃ bhikkhūnaṃ adassanaṃ upagacchāmī’’ti. Tasmā evamāha – ‘‘icchāmahaṃ, bhikkhave, aḍḍhamāsaṃ paṭisallīyituṃ, nāmhi kenaci upasaṅkamitabbo aññatra ekena piṇḍapātanīhārakenā’’ti.
ཨཔརེ པནཱཧུ – ‘‘པརཱུཔཝཱདཝིཝཛྫནཏྠཾ ཨེཝཾ ཝཏྭཱ པཊིསལླཱིནོ’’ཏི། པརེ ཀིར བྷགཝནྟཾ ཨུཔཝདིསྶནྟི – ‘‘ཨཡཾ ‘སབྦཉྙཱུ ཨཧཾ སདྡྷམྨཝརཙཀྐཝཏྟཱི’ཏི པཊིཛཱནམཱནོ ཨཏྟནོཔི སཱཝཀེ ཨཉྙམཉྙཾ གྷཱཏེནྟེ ནིཝཱརེཏུཾ ན སཀྐོཏི, ཀིཾ ཨཉྙཾ སཀྑིསྶཏཱི’’ཏི? ཏཏྲ པཎྜིཏཱ ཝཀྑནྟི – ‘‘བྷགཝཱ པཊིསལླཱནམནུཡུཏྟོ ན ཨིམཾ པཝཏྟིཾ ཛཱནཱཏི, ཀོཙིསྶ ཨཱརོཙཡིཏཱཔི ནཏྠི , སཙེ ཛཱནེཡྻ ཨདྡྷཱ ནིཝཱརེཡྻཱ’’ཏི། ཨིདཾ པན ཨིཙྪཱམཏྟཾ, པཋམམེཝེཏྠ ཀཱརཎཾ། ནཱསྶུདྷཱཏི ཨེཏྠ ཨསྶུདྷཱཏི པདཔཱུརཎམཏྟེ ཨཝདྷཱརཎཏྠེ ཝཱ ནིཔཱཏོ, ནེཝ ཀོཙི བྷགཝནྟཾ ཨུཔསངྐམཱིཏི ཨཏྠོ།
Apare panāhu – ‘‘parūpavādavivajjanatthaṃ evaṃ vatvā paṭisallīno’’ti. Pare kira bhagavantaṃ upavadissanti – ‘‘ayaṃ ‘sabbaññū ahaṃ saddhammavaracakkavattī’ti paṭijānamāno attanopi sāvake aññamaññaṃ ghātente nivāretuṃ na sakkoti, kiṃ aññaṃ sakkhissatī’’ti? Tatra paṇḍitā vakkhanti – ‘‘bhagavā paṭisallānamanuyutto na imaṃ pavattiṃ jānāti, kocissa ārocayitāpi natthi , sace jāneyya addhā nivāreyyā’’ti. Idaṃ pana icchāmattaṃ, paṭhamamevettha kāraṇaṃ. Nāssudhāti ettha assudhāti padapūraṇamatte avadhāraṇatthe vā nipāto, neva koci bhagavantaṃ upasaṅkamīti attho.
ཨནེཀེཧི ཝཎྞསཎྛཱནཱདཱིཧི ཀཱརཎེཧི ཝོཀཱརོ ཨསྶཱཏི ཨནེཀཱཀཱརཝོཀཱརོ། ཨནེཀཱཀཱརཝོཀིཎྞོ ཨནེཀཱཀཱརེན སམྨིསྶོཏི ཝུཏྟཾ ཧོཏི། ཀོ སོ? ཨསུབྷབྷཱཝནཱནུཡོགོ, ཏཾ ཨནེཀཱཀཱརཝོཀཱརཾ། ཨསུབྷབྷཱཝནཱནུཡོགམནུཡུཏྟཱ ཝིཧརནྟཱིཏི ཡུཏྟཔྤཡུཏྟཱ ཝིཧརནྟི། ཨཊྚཱིཡམཱནཱཏི ཏེན ཀཱཡེན ཨཊྚཱ དུཀྑིཏཱ ཧོནྟི། ཧརཱཡམཱནཱཏི ལཛྫམཱནཱ། ཛིགུཙྪམཱནཱཏི ཛིགུཙྪཾ ཨུཔྤཱདཡམཱནཱ། སཏྠཧཱརཀཾ པརིཡེསནྟཱིཏི ཛཱིཝིཏཧརཎཀསཏྠཾ པརིཡེསནྟི། ན ཀེཝལཉྩ ཏེ སཏྠཾ པརིཡེསིཏྭཱ ཨཏྟནཱ ཝཱ ཨཏྟཱནཾ ཛཱིཝིཏཱ ཝོརོཔེནྟི, མིགལཎྜིཀམྤི པན སམཎཀུཏྟཀཾ ཨུཔསངྐམིཏྭཱ, ‘‘སཱདྷུ ནོ, ཨཱཝུསོ, ཛཱིཝིཏཱ ཝོརོཔེཧཱི’’ཏི ཝདནྟི། ཨེཏྠ ཙ ཨརིཡཱ ནེཝ པཱཎཱཏིཔཱཏཾ ཀརིཾསུ, ན སམཱདཔེསུཾ, ན སམནུཉྙཱ ཨཧེསུཾ། པུཐུཛྫནཱ པན སབྦམཀཾསུ།
Anekehi vaṇṇasaṇṭhānādīhi kāraṇehi vokāro assāti anekākāravokāro. Anekākāravokiṇṇo anekākārena sammissoti vuttaṃ hoti. Ko so? Asubhabhāvanānuyogo, taṃ anekākāravokāraṃ. Asubhabhāvanānuyogamanuyuttā viharantīti yuttappayuttā viharanti. Aṭṭīyamānāti tena kāyena aṭṭā dukkhitā honti. Harāyamānāti lajjamānā. Jigucchamānāti jigucchaṃ uppādayamānā. Satthahārakaṃ pariyesantīti jīvitaharaṇakasatthaṃ pariyesanti. Na kevalañca te satthaṃ pariyesitvā attanā vā attānaṃ jīvitā voropenti, migalaṇḍikampi pana samaṇakuttakaṃ upasaṅkamitvā, ‘‘sādhu no, āvuso, jīvitā voropehī’’ti vadanti. Ettha ca ariyā neva pāṇātipātaṃ kariṃsu, na samādapesuṃ, na samanuññā ahesuṃ. Puthujjanā pana sabbamakaṃsu.
པཊིསལླཱནཱ ཝུཊྛིཏོཏི ཏེསཾ པཉྩནྣཾ བྷིཀྑུསཏཱནཾ ཛཱིཝིཏཀྑཡཔྤཏྟབྷཱཝཾ ཉཏྭཱ ཏཏོ ཨེཀཱིབྷཱཝཏོ ཝུཊྛིཏོ ཛཱནནྟོཔི ཨཛཱནནྟོ ཝིཡ ཀཐཱསམུཊྛཱཔནཏྠཾ ཨཱཡསྨནྟཾ ཨཱནནྡཾ ཨཱམནྟེསི། ཀིཾ ནུ ཁོ, ཨཱནནྡ, ཏནུབྷཱུཏོ ཝིཡ བྷིཀྑུསངྒྷོཏི ཨིཏོ, ཨཱནནྡ, པུབྦེ བཧཱུ བྷིཀྑཱུ ཨེཀཏོ ཨུཔཊྛཱནཾ ཨཱགཙྪནྟི, ཨུདྡེསཾ པརིཔུཙྪཾ གཎྷནྟི, སཛ྄ཛྷཱཡནྟི, ཨེཀཔཛྫོཏོ ཝིཡ ཨཱརཱམོ དིསྶཏི། ཨིདཱནི པན ཨཌྜྷམཱསམཏྟསྶ ཨཙྩཡེན ཏནུབྷཱུཏོ ཝིཡ ཏནུཀོ མནྡོ ཨཔྤཀོ ཝིརལོ༹ ཝིཡ ཛཱཏོ བྷིཀྑུསངྒྷོ། ཀིཾ ནུ ཁོ ཀཱརཎཾ? ཀིཾ དིསཱསུ པཀྐནྟཱ བྷིཀྑཱུཏི?
Paṭisallānā vuṭṭhitoti tesaṃ pañcannaṃ bhikkhusatānaṃ jīvitakkhayappattabhāvaṃ ñatvā tato ekībhāvato vuṭṭhito jānantopi ajānanto viya kathāsamuṭṭhāpanatthaṃ āyasmantaṃ ānandaṃ āmantesi. Kiṃ nu kho, ānanda, tanubhūto viya bhikkhusaṅghoti ito, ānanda, pubbe bahū bhikkhū ekato upaṭṭhānaṃ āgacchanti, uddesaṃ paripucchaṃ gaṇhanti, sajjhāyanti, ekapajjoto viya ārāmo dissati. Idāni pana aḍḍhamāsamattassa accayena tanubhūto viya tanuko mando appako viraḷo viya jāto bhikkhusaṅgho. Kiṃ nu kho kāraṇaṃ? Kiṃ disāsu pakkantā bhikkhūti?
ཨཐཱཡསྨཱ ཨཱནནྡོ ཀམྨཝིཔཱཀེན ཏེསཾ ཛཱིཝིཏཀྑཡཔྤཏྟིཾ ཨསལླཀྑེནྟོ ཨསུབྷཀམྨཊྛཱནཱནུཡོགཔཙྩཡཱ པན སལླཀྑེནྟོ ཏཐཱ ཧི པན, བྷནྟེ བྷགཝཱཏིཨཱདིཾ ཝཏྭཱ བྷིཀྑཱུནཾ ཨརཧཏྟཔྤཏྟིཡཱ ཨཉྙཾ ཀམྨཊྛཱནཾ ཡཱཙནྟོ, སཱདྷུ, བྷནྟེ, བྷགཝཱཏིཨཱདིམཱཧ། ཏསྶཏྠོ – སཱདྷུ, བྷནྟེ, བྷགཝཱ ཨཉྙཾ ཀཱརཎཾ ཨཱཙིཀྑཏུ, ཡེན བྷིཀྑུསངྒྷོ ཨརཧཏྟེ པཏིཊྛཧེཡྻ ། མཧཱསམུདྡཾ ཨོརོཧཎཏིཏྠཱནི ཝིཡ ཨཉྙཱནིཔི དསཱནུསྶཏི, དསཀསིཎ, ཙཏུདྷཱཏུཝཝཏྠཱན, བྲཧྨཝིཧཱར, ཨཱནཱཔཱནསྶཏིཔབྷེདཱནི བཧཱུནི ནིབྦཱནོརོཧཎཀམྨཊྛཱནཱནི སནྟི, ཏེསུ བྷགཝཱ བྷིཀྑཱུ སམསྶཱསེཏྭཱ ཨཉྙཏརཾ ཀམྨཊྛཱནཾ ཨཱཙིཀྑཏཱུཏི ཨདྷིཔྤཱཡོ།
Athāyasmā ānando kammavipākena tesaṃ jīvitakkhayappattiṃ asallakkhento asubhakammaṭṭhānānuyogapaccayā pana sallakkhento tathā hi pana, bhante bhagavātiādiṃ vatvā bhikkhūnaṃ arahattappattiyā aññaṃ kammaṭṭhānaṃ yācanto, sādhu, bhante, bhagavātiādimāha. Tassattho – sādhu, bhante, bhagavā aññaṃ kāraṇaṃ ācikkhatu, yena bhikkhusaṅgho arahatte patiṭṭhaheyya . Mahāsamuddaṃ orohaṇatitthāni viya aññānipi dasānussati, dasakasiṇa, catudhātuvavatthāna, brahmavihāra, ānāpānassatipabhedāni bahūni nibbānorohaṇakammaṭṭhānāni santi, tesu bhagavā bhikkhū samassāsetvā aññataraṃ kammaṭṭhānaṃ ācikkhatūti adhippāyo.
ཨཐ བྷགཝཱ ཏཐཱ ཀཱཏུཀཱམོ ཐེརཾ ཨུཡྻོཛེནྟོ ཏེནཧཱནནྡཱཏིཨཱདིམཱཧ། ཏཏྠ ཝེསཱལིཾ ཨུཔནིསྶཱཡཱཏི ཝེསཱལིཡཾ ཨུཔནིསྶཱཡ སམནྟཱ གཱཝུཏེཔི ཨཌྜྷཡོཛནེཔི ཡཱཝཏིཀཱ ཝིཧརནྟི, ཏེ སབྦེ སནྣིཔཱཏེཧཱིཏི ཨཏྠོ། སབྦེ ཨུཔཊྛཱནསཱལཱཡཾ སནྣིཔཱཏེཏྭཱཏི ཨཏྟནཱ གནྟུཾ ཡུཏྟཊྛཱནཾ སཡཾ གནྟྭཱ ཨཉྙཏྠ དཧརབྷིཀྑཱུ པཧིཎིཏྭཱ མུཧུཏྟེནེཝ ཨནཝསེསེ བྷིཀྑཱུ ཨུཔཊྛཱནསཱལཱཡཾ སམཱུཧཾ ཀཏྭཱ། ཡསྶདཱནི, བྷནྟེ, བྷགཝཱ ཀཱལཾ མཉྙཏཱིཏི ཨེཏྠ ཨཡམདྷིཔྤཱཡོ – བྷགཝཱ བྷིཀྑུསངྒྷོ སནྣིཔཏིཏོ, ཨེས ཀཱལོ བྷིཀྑཱུནཾ དྷམྨཀཐཾ ཀཱཏུཾ, ཨནུསཱསནིཾ དཱཏུཾ, ཨིདཱནི ཡསྶ ཏུམྷེ ཀཱལཾ ཛཱནཱཐ, ཏཾ ཀཱཏབྦནྟི།
Atha bhagavā tathā kātukāmo theraṃ uyyojento tenahānandātiādimāha. Tattha vesāliṃ upanissāyāti vesāliyaṃ upanissāya samantā gāvutepi aḍḍhayojanepi yāvatikā viharanti, te sabbe sannipātehīti attho. Sabbe upaṭṭhānasālāyaṃ sannipātetvāti attanā gantuṃ yuttaṭṭhānaṃ sayaṃ gantvā aññattha daharabhikkhū pahiṇitvā muhutteneva anavasese bhikkhū upaṭṭhānasālāyaṃ samūhaṃ katvā. Yassadāni, bhante, bhagavā kālaṃ maññatīti ettha ayamadhippāyo – bhagavā bhikkhusaṅgho sannipatito, esa kālo bhikkhūnaṃ dhammakathaṃ kātuṃ, anusāsaniṃ dātuṃ, idāni yassa tumhe kālaṃ jānātha, taṃ kātabbanti.
ཨཐ ཁོ བྷགཝཱ བྷིཀྑཱུ ཨཱམནྟེསི, ཨཡམྤི ཁོ, བྷིཀྑཝེཏི། ཨཱམནྟེཏྭཱ ཙ པན བྷིཀྑཱུནཾ ཨརཧཏྟཔྤཏྟིཡཱ པུབྦེ ཨཱཙིཀྑིཏཨསུབྷཀམྨཊྛཱནཏོ ཨཉྙཾ པརིཡཱཡཾ ཨཱཙིཀྑནྟོ ཨཱནཱཔཱནསྶཏིསམཱདྷཱིཏིཨཱདིམཱཧ། ཏཏྠ ཨཱནཱཔཱནསྶཏིསམཱདྷཱིཏི ཨཱནཱཔཱནཔརིགྒཱཧིཀཱཡ སཏིཡཱ སདྡྷིཾ སམྤཡུཏྟོ སམཱདྷི, ཨཱནཱཔཱནསྶཏིཡཾ ཝཱ སམཱདྷི, ཨཱནཱཔཱནསྶཏིསམཱདྷི། བྷཱཝིཏོཏི ཨུཔྤཱདིཏོ ཝཌྜྷིཏོ ཝཱ། བཧུལཱིཀཏོཏི པུནཔྤུནཾ ཀཏོ། སནྟོ ཙེཝ པཎཱིཏོ ཙཱཏི སནྟོ ཙེཝ པཎཱིཏོ ཙེཝ། ཨུབྷཡཏྠ ཨེཝསདྡེན ནིཡམོ ཝེདིཏབྦོ། ཀིཾ ཝུཏྟཾ ཧོཏི? ཨཡཉྷི ཡཐཱ ཨསུབྷཀམྨཊྛཱནཾ ཀེཝལཾ པཊིཝེདྷཝསེན སནྟཉྩ པཎཱིཏཉྩ, ཨོལཱ༹རིཀཱརམྨཎཏྟཱ པན པཊིཀཱུལཱརམྨཎཏྟཱ ཙ ཨཱརམྨཎཝསེན ནེཝ སནྟཾ ན པཎཱིཏཾ, ན ཨེཝཾ ཀེནཙི པརིཡཱཡེན ཨསནྟོ ཝཱ ཨཔྤཎཱིཏོ ཝཱ, ཨཔིཙ ཁོ ཨཱརམྨཎསནྟཏཱཡཔི སནྟོ ཝཱུཔསནྟོ ནིབྦུཏོ, པཊིཝེདྷསངྑཱཏཱཡ ཨངྒསནྟཏཱཡཔི, ཨཱརམྨཎཔཎཱིཏཏཱཡ པཎཱིཏོ ཨཏིཏྟིཀརོ, ཨངྒཔཎཱིཏཏཱཡཔཱིཏི། ཏེན ཝུཏྟཾ ‘‘སནྟོ ཙེཝ པཎཱིཏོ ཙཱ’’ཏི།
Atha kho bhagavā bhikkhū āmantesi, ayampi kho, bhikkhaveti. Āmantetvā ca pana bhikkhūnaṃ arahattappattiyā pubbe ācikkhitaasubhakammaṭṭhānato aññaṃ pariyāyaṃ ācikkhanto ānāpānassatisamādhītiādimāha. Tattha ānāpānassatisamādhīti ānāpānapariggāhikāya satiyā saddhiṃ sampayutto samādhi, ānāpānassatiyaṃ vā samādhi, ānāpānassatisamādhi. Bhāvitoti uppādito vaḍḍhito vā. Bahulīkatoti punappunaṃ kato. Santo ceva paṇīto cāti santo ceva paṇīto ceva. Ubhayattha evasaddena niyamo veditabbo. Kiṃ vuttaṃ hoti? Ayañhi yathā asubhakammaṭṭhānaṃ kevalaṃ paṭivedhavasena santañca paṇītañca, oḷārikārammaṇattā pana paṭikūlārammaṇattā ca ārammaṇavasena neva santaṃ na paṇītaṃ, na evaṃ kenaci pariyāyena asanto vā appaṇīto vā, apica kho ārammaṇasantatāyapi santo vūpasanto nibbuto, paṭivedhasaṅkhātāya aṅgasantatāyapi, ārammaṇapaṇītatāya paṇīto atittikaro, aṅgapaṇītatāyapīti. Tena vuttaṃ ‘‘santo ceva paṇīto cā’’ti.
ཨསེཙནཀོ ཙ སུཁོ ཙ ཝིཧཱརོཏི ཨེཏྠ པན ནཱསྶ སེཙནནྟི ཨསེཙནཀོ, ཨནཱསིཏྟཀོ ཨབྦོཀིཎྞོ པཱཊིཡེཀྐོ ཨཱཝེཎིཀོ, ནཏྠི ཨེཏྠ པརིཀམྨེན ཝཱ ཨུཔཙཱརེན ཝཱ སནྟཏཱ, ཨཱདིསམནྣཱཧཱརཏོ པབྷུཏི ཨཏྟནོ སབྷཱཝེནེཝ སནྟོ ཙ པཎཱིཏོ ཙཱཏི ཨཏྠོ། ཀེཙི ‘‘ཨསེཙནཀོ’’ཏི ཨནཱསིཏྟཀོ ཨོཛཝནྟོ, སབྷཱཝེནེཝ མདྷུརོ’’ཏི ཝདནྟི། ཨེཝམཡཾ ཨསེཙནཀོ ཙ ཨཔྤིཏཔྤིཏཀྑཎེ ཀཱཡིཀཙེཏསིཀསུཁཔྤཊིལཱབྷཱཡ སཾཝཏྟནཏོ སུཁོ ཙ ཝིཧཱརོཏི ཝེདིཏབྦོ།
Asecanakoca sukho ca vihāroti ettha pana nāssa secananti asecanako, anāsittako abbokiṇṇo pāṭiyekko āveṇiko, natthi ettha parikammena vā upacārena vā santatā, ādisamannāhārato pabhuti attano sabhāveneva santo ca paṇīto cāti attho. Keci ‘‘asecanako’’ti anāsittako ojavanto, sabhāveneva madhuro’’ti vadanti. Evamayaṃ asecanako ca appitappitakkhaṇe kāyikacetasikasukhappaṭilābhāya saṃvattanato sukho ca vihāroti veditabbo.
ཨུཔྤནྣུཔྤནྣེཏི ཨཝིཀྑམྦྷིཏེ། པཱཔཀེཏི ལཱམཀེ། ཨཀུསལེ དྷམྨེཏི ཨཀོསལླསམྦྷཱུཏེ དྷམྨེ། ཋཱནསོ ཨནྟརདྷཱཔེཏཱིཏི ཁཎེནེཝ ཨནྟརདྷཱཔེཏི ཝིཀྑམྦྷེཏི། ཝཱུཔསམེཏཱིཏི སུཊྛུ ཨུཔསམེཏི, ནིབྦེདྷབྷཱགིཡཏྟཱ ཨནུཔུབྦེན ཨརིཡམགྒཝུདྡྷིཔྤཏྟོ སམུཙྪིནྡཏི, པཊིཔྤསྶམྦྷེཏཱིཏི ཝུཏྟཾ ཧོཏི། གིམྷཱནཾ པཙྪིམེ མཱསེཏི ཨཱསཱལ༹ྷམཱསེ། ཨཱུཧཏཾ རཛོཛལླནྟི ཨཊྛ མཱསེ ཝཱཏཱཏཔསུཀྑཱཡ གོམཧིཾསཱདིཔཱདཔྤཧཱརསམྦྷིནྣཱཡ པཐཝིཡཱ ཨུདྡྷཾ ཧཏཾ ཨཱུཧཏཾ ཨཱཀཱསེ སམུཊྛིཏཾ རཛཉྩ རེཎུཉྩ། མཧཱ ཨཀཱལམེགྷོཏི སབྦཾ ནབྷཾ ཨཛ྄ཛྷོཏྠརིཏྭཱ ཨུཊྛིཏོ ཨཱསཱལ༹ྷཛུཎྷཔཀྑེ སཀལཾ ཨཌྜྷམཱསཾ ཝསྶནཀམེགྷོ། སོ ཧི ཨསམྤཏྟེ ཝསྶཀཱལེ ཨུཔྤནྣཏྟཱ ཨཀཱལམེགྷོཏི ཨིདྷ ཨདྷིཔྤེཏོ། ཋཱནསོ ཨནྟརཱདྷཱཔེཏི ཝཱུཔསམེཏཱིཏི ཁཎེནེཝ ཨདསྶནཾ ནེཏི པཐཝིཡཾ སནྣིསཱིདཱཔེཏི། ཨེཝམེཝ ཁོཏི ཨོཔམྨནིདསྶནམེཏཾ། ཏཏོ པརཾ ཝུཏྟནཡམེཝ།
Uppannuppanneti avikkhambhite. Pāpaketi lāmake. Akusale dhammeti akosallasambhūte dhamme. Ṭhānaso antaradhāpetīti khaṇeneva antaradhāpeti vikkhambheti. Vūpasametīti suṭṭhu upasameti, nibbedhabhāgiyattā anupubbena ariyamaggavuddhippatto samucchindati, paṭippassambhetīti vuttaṃ hoti. Gimhānaṃ pacchime māseti āsāḷhamāse. Ūhataṃ rajojallanti aṭṭha māse vātātapasukkhāya gomahiṃsādipādappahārasambhinnāya pathaviyā uddhaṃ hataṃ ūhataṃ ākāse samuṭṭhitaṃ rajañca reṇuñca. Mahā akālameghoti sabbaṃ nabhaṃ ajjhottharitvā uṭṭhito āsāḷhajuṇhapakkhe sakalaṃ aḍḍhamāsaṃ vassanakamegho. So hi asampatte vassakāle uppannattā akālameghoti idha adhippeto. Ṭhānaso antarādhāpeti vūpasametīti khaṇeneva adassanaṃ neti pathaviyaṃ sannisīdāpeti. Evameva khoti opammanidassanametaṃ. Tato paraṃ vuttanayameva.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༩. ཝེསཱལཱིསུཏྟཾ • 9. Vesālīsuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༩. ཝེསཱལཱིསུཏྟཝཎྞནཱ • 9. Vesālīsuttavaṇṇanā
