| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
8. வேஸாரஜ்ஜஸுத்தவண்ணனா
8. Vesārajjasuttavaṇṇanā
8. அட்ட²மே ப்³யாமோஹவஸேன ஸரணபரியேஸனங் ஸாரஜ்ஜனங் ஸாரதோ³, ப்³யாமோஹப⁴யங். விக³தோ ஸாரதோ³ ஏதஸ்ஸாதி விஸாரதோ³, தஸ்ஸ பா⁴வோ வேஸாரஜ்ஜங். தங் பன ஞாணஸம்பத³ங், பஹானஸம்பத³ங், தே³ஸனாவிஸேஸஸம்பத³ங் கே²மஞ்ச நிஸ்ஸாய பவத்தங் சதுப்³பி³த⁴பச்சவெக்க²ணஞாணங். தேனாஹ ‘‘சதூஸு டா²னேஸூ’’திஆதி³. உஸப⁴ஸ்ஸ இத³ந்தி ஆஸப⁴ங், ஸெட்ட²ட்டா²னங். ஸப்³ப³ஞ்ஞுதபடிஜானநவஸேன அபி⁴முக²ங் க³ச்ச²ந்தி, அட்ட² வா பரிஸா உபஸங்கமந்தீதி ஆஸபா⁴, புப்³ப³பு³த்³தா⁴. இத³ங் பனாதி பு³த்³தா⁴னங் டா²னங் ஸப்³ப³ஞ்ஞுதமேவ வத³தி. திட்ட²மானோவாதி அவத³ந்தோபி திட்ட²மானோவ படிஜானாதி நாமாதி அத்தோ². உபக³ச்ச²தீதி அனுஜானாதி.
8. Aṭṭhame byāmohavasena saraṇapariyesanaṃ sārajjanaṃ sārado, byāmohabhayaṃ. Vigato sārado etassāti visārado, tassa bhāvo vesārajjaṃ. Taṃ pana ñāṇasampadaṃ, pahānasampadaṃ, desanāvisesasampadaṃ khemañca nissāya pavattaṃ catubbidhapaccavekkhaṇañāṇaṃ. Tenāha ‘‘catūsu ṭhānesū’’tiādi. Usabhassa idanti āsabhaṃ, seṭṭhaṭṭhānaṃ. Sabbaññutapaṭijānanavasena abhimukhaṃ gacchanti, aṭṭha vā parisā upasaṅkamantīti āsabhā, pubbabuddhā. Idaṃ panāti buddhānaṃ ṭhānaṃ sabbaññutameva vadati. Tiṭṭhamānovāti avadantopi tiṭṭhamānova paṭijānāti nāmāti attho. Upagacchatīti anujānāti.
அட்ட²ஸு பரிஸாஸூதி ‘‘அபி⁴ஜானாமி கோ² பனாஹங், ஸாரிபுத்த, அனேகஸதங் க²த்தியபரிஸங் உபஸங்கமிதா…பே॰… ப்³ராஹ்மணபரிஸங் க³ஹபதிபரிஸங், ஸமணபரிஸங், சாதுமஹாராஜிகபரிஸங், தாவதிங்ஸபரிஸங், மாரபரிஸங், ப்³ரஹ்மபரிஸங் உபஸங்கமிதா, தத்ரபி மயா ஸன்னிஸின்னபுப்³ப³ஞ்சேவ ஸல்லபிதபுப்³ப³ஞ்ச ஸாகச்சா² ச ஸமாபஜ்ஜிதபுப்³பா³. தத்ர வத மங் ‘ப⁴யங் வா ஸாரஜ்ஜங் வா ஓக்கமிஸ்ஸதீ’தி நிமித்தமேதங், ஸாரிபுத்த, ந ஸமனுபஸ்ஸாமீ’’தி (ம॰ நி॰ 1.151) ஏவங் வுத்தபரிஸாஸு. அபீ⁴தனாத³ங் நத³தீதி பரதோ த³ஸ்ஸிதஞாணயோகே³ன விஸாரதோ³ அஹந்தி அபீ⁴தனாத³ங் நத³தி. ஸீஹனாத³ஸுத்தேனாதி க²ந்த⁴வக்³கே³ ஆக³தேன ஸீஹனாத³ஸுத்தேன.
Aṭṭhasu parisāsūti ‘‘abhijānāmi kho panāhaṃ, sāriputta, anekasataṃ khattiyaparisaṃ upasaṅkamitā…pe… brāhmaṇaparisaṃ gahapatiparisaṃ, samaṇaparisaṃ, cātumahārājikaparisaṃ, tāvatiṃsaparisaṃ, māraparisaṃ, brahmaparisaṃ upasaṅkamitā, tatrapi mayā sannisinnapubbañceva sallapitapubbañca sākacchā ca samāpajjitapubbā. Tatra vata maṃ ‘bhayaṃ vā sārajjaṃ vā okkamissatī’ti nimittametaṃ, sāriputta, na samanupassāmī’’ti (ma. ni. 1.151) evaṃ vuttaparisāsu. Abhītanādaṃ nadatīti parato dassitañāṇayogena visārado ahanti abhītanādaṃ nadati. Sīhanādasuttenāti khandhavagge āgatena sīhanādasuttena.
‘‘தே³வமனுஸ்ஸானங் சதுசக்கங் வத்ததீ’’தி (அ॰ நி॰ 4.31) ஸுத்தஸேஸேன ஸப்புரிஸூபனிஸ்ஸயாதி³ப²லஸம்பத்திபவத்தி வுத்தா, புரிமஸப்புரிஸூபனிஸ்ஸயாதி³உபனிஸ்ஸயா பச்சி²மஸப்புரிஸூபனிஸ்ஸயாதி³ஸம்பத்திபவத்தி வா வுத்தா. ஆதி³-ஸத்³தே³ன தத்த² ச சக்கஸத்³த³ஸ்ஸ க³ஹணங் வேதி³தப்³ப³ங். விசக்கஸண்டா²னா அஸனி ஏவ அஸனிவிசக்கங். உரசக்காதீ³ஸூதி ஆதி³-ஸத்³தே³ன ஆணாஸமூஹாதீ³ஸுபி சக்கஸத்³த³ஸ்ஸ பவத்தி வேதி³தப்³பா³. ‘‘ஸங்க⁴பே⁴த³ங் கரிஸ்ஸாம சக்கபே⁴த³’’ந்திஆதீ³ஸு (பாரா॰ 409; சூளவ॰ 343) ஹி ஆணா ‘‘சக்க’’ந்தி வுத்தா. ‘‘தே³வசக்கங் அஸுரசக்க’’ந்திஆதீ³ஸு ஸமூஹோதி.
‘‘Devamanussānaṃ catucakkaṃ vattatī’’ti (a. ni. 4.31) suttasesena sappurisūpanissayādiphalasampattipavatti vuttā, purimasappurisūpanissayādiupanissayā pacchimasappurisūpanissayādisampattipavatti vā vuttā. Ādi-saddena tattha ca cakkasaddassa gahaṇaṃ veditabbaṃ. Vicakkasaṇṭhānā asani eva asanivicakkaṃ. Uracakkādīsūti ādi-saddena āṇāsamūhādīsupi cakkasaddassa pavatti veditabbā. ‘‘Saṅghabhedaṃ karissāma cakkabheda’’ntiādīsu (pārā. 409; cūḷava. 343) hi āṇā ‘‘cakka’’nti vuttā. ‘‘Devacakkaṃ asuracakka’’ntiādīsu samūhoti.
படிவேத⁴னிட்ட²த்தா அரஹத்தமக்³க³ஞாணங் படிவேதோ⁴தி ‘‘ப²லக்க²ணே உப்பன்னங் நாமா’’தி வுத்தங். தேன படிலத்³த⁴ஸ்ஸபி தே³ஸனாஞாணஸ்ஸ கிச்சனிப்ப²த்தி பரஸ்ஸ பு³ஜ்ஜ²னமத்தேன ஹோதீதி ‘‘அஞ்ஞாஸிகொண்ட³ஞ்ஞஸ்ஸ ஸோதாபத்தி…பே॰… ப²லக்க²ணே பவத்தங் நாமா’’தி வுத்தங். ததோ பரங் பன யாவ பரினிப்³பா³னா தே³ஸனாஞாணப்பவத்தி தஸ்ஸேவ பவத்திதஸ்ஸ த⁴ம்மசக்கஸ்ஸ டா²னந்தி வேதி³தப்³ப³ங்.
Paṭivedhaniṭṭhattā arahattamaggañāṇaṃ paṭivedhoti ‘‘phalakkhaṇe uppannaṃ nāmā’’ti vuttaṃ. Tena paṭiladdhassapi desanāñāṇassa kiccanipphatti parassa bujjhanamattena hotīti ‘‘aññāsikoṇḍaññassa sotāpatti…pe… phalakkhaṇe pavattaṃ nāmā’’ti vuttaṃ. Tato paraṃ pana yāva parinibbānā desanāñāṇappavatti tasseva pavattitassa dhammacakkassa ṭhānanti veditabbaṃ.
த³ஸ்ஸிதத⁴ம்மேஸூதி வுத்தத⁴ம்மேஸு. வசனமத்தமேவ ஹி தேஸங், ந பன த³ஸ்ஸனங் தாதி³ஸஸ்ஸேவ த⁴ம்மஸ்ஸ அபா⁴வதோ. ப⁴க³வதோ ஏவ வா ‘‘இமே த⁴ம்மா அனபி⁴ஸம்பு³த்³தோ⁴’’தி பரஸ்ஸ வசனவஸேன த³ஸ்ஸிதத⁴ம்மேஸு. ‘‘த⁴ம்மபடிஸம்பி⁴தா³’’திஆதீ³ஸு (விப⁴॰ 718-721) விய த⁴ம்ம-ஸத்³தோ³ ஹேதுபரியாயோதி ஆஹ ‘‘ஸஹத⁴ம்மேனாதி ஸஹேதுனா’’தி. ஹேதூதி ச உபபத்திஸாத⁴னஹேது வேதி³தப்³போ³, ந காரகோ, ஸம்பாபகோ வா. நிமித்தந்தி சோத³னாய காரணங். தத்த² சோத³கோ சோத³னங் கரோதீதி காரணங், த⁴ம்மோ சோத³னங் கரோதி ஏதேனாதி காரணங். தேனாஹ ‘‘புக்³க³லோபீ’’திஆதி³. கே²மந்தி கேனசி அப்படிபா³ஹியபா⁴வேன அனுபத்³து³தங்.
Dassitadhammesūti vuttadhammesu. Vacanamattameva hi tesaṃ, na pana dassanaṃ tādisasseva dhammassa abhāvato. Bhagavato eva vā ‘‘ime dhammā anabhisambuddho’’ti parassa vacanavasena dassitadhammesu. ‘‘Dhammapaṭisambhidā’’tiādīsu (vibha. 718-721) viya dhamma-saddo hetupariyāyoti āha ‘‘sahadhammenāti sahetunā’’ti. Hetūti ca upapattisādhanahetu veditabbo, na kārako, sampāpako vā. Nimittanti codanāya kāraṇaṃ. Tattha codako codanaṃ karotīti kāraṇaṃ, dhammo codanaṃ karoti etenāti kāraṇaṃ. Tenāha ‘‘puggalopī’’tiādi. Khemanti kenaci appaṭibāhiyabhāvena anupaddutaṃ.
அந்தராயோ ஏதேஸங் அத்தி², அந்தராயே வா நியுத்தாதி அந்தராயிகா. ஏவங்பூ⁴தா பன தே யஸ்மா அந்தராயகரா நாம ஹொந்தி, தஸ்மா ஆஹ ‘‘அந்தராயங் கரொந்தீதி அந்தராயிகா’’தி. அஸஞ்சிச்ச வீதிக்கமே நாதிஸாவஜ்ஜாதி கத்வா வுத்தங் ‘‘ஸஞ்சிச்ச வீதிக்கந்தா’’தி. ஸத்த ஆபத்திக்க²ந்தா⁴திஆதி³ நித³ஸ்ஸனமத்தங் இதரேஸம்பி சதுன்னங் ‘‘அந்தராயிகா’’தி வுத்தத⁴ம்மானங் தப்³பா⁴வே ப்³யபி⁴சாராபா⁴வதோ. இத⁴ பன மேது²னத⁴ம்மோ அதி⁴ப்பேதோதி இத³ங் அட்டு²ப்பத்திவஸேன வுத்தங் அரிட்ட²ஸிக்கா²பத³ங் (பாசி॰ 417) விய. யஸ்மா தங்க²ணம்பி காமானங் ஆதீ³னவங் தி³ஸ்வா விரதோ ஹோதி சே, விஸேஸங் அதி⁴க³ச்ச²தி, ந காமேஸு ஆஸத்தோ, தஸ்மா வுத்தங் ‘‘மேது²ன…பே॰…அந்தராயோ ஹோதீ’’தி. தத்த² யஸ்ஸ கஸ்ஸசீதி ந கேவலங் பப்³ப³ஜிதஸ்ஸேவ, அத² கோ² யஸ்ஸ கஸ்ஸசி. ததா² ஹி வுத்தங் ‘‘மேது²னமனுயுத்தஸ்ஸ, முஸ்ஸதேவாபி ஸாஸன’’ந்தி (ஸு॰ நி॰ 820).
Antarāyo etesaṃ atthi, antarāye vā niyuttāti antarāyikā. Evaṃbhūtā pana te yasmā antarāyakarā nāma honti, tasmā āha ‘‘antarāyaṃ karontīti antarāyikā’’ti. Asañcicca vītikkame nātisāvajjāti katvā vuttaṃ ‘‘sañcicca vītikkantā’’ti. Satta āpattikkhandhātiādi nidassanamattaṃ itaresampi catunnaṃ ‘‘antarāyikā’’ti vuttadhammānaṃ tabbhāve byabhicārābhāvato. Idha pana methunadhammo adhippetoti idaṃ aṭṭhuppattivasena vuttaṃ ariṭṭhasikkhāpadaṃ (pāci. 417) viya. Yasmā taṃkhaṇampi kāmānaṃ ādīnavaṃ disvā virato hoti ce, visesaṃ adhigacchati, na kāmesu āsatto, tasmā vuttaṃ ‘‘methuna…pe…antarāyo hotī’’ti. Tattha yassa kassacīti na kevalaṃ pabbajitasseva, atha kho yassa kassaci. Tathā hi vuttaṃ ‘‘methunamanuyuttassa, mussatevāpi sāsana’’nti (su. ni. 820).
தஸ்மிங் அனிய்யானிகத⁴ம்மேதி தஸ்மிங் பரேஹி பரிகப்பிதஅனிய்யானிகத⁴ம்மனிமித்தங். நிமித்தத்தே² ஹி இத³ங் கம்மஸங்யோகே³ பு⁴ம்மங்.
Tasmiṃ aniyyānikadhammeti tasmiṃ parehi parikappitaaniyyānikadhammanimittaṃ. Nimittatthe hi idaṃ kammasaṃyoge bhummaṃ.
உபனிப³த்³தா⁴தி விரசிதா. தேனாஹ ‘‘அபி⁴ஸங்க²தா’’தி. புது²பா⁴வந்தி ப³ஹுபா⁴வங். புதூ²ஹி வா ஸிதாதி ப³ஹூஹி ஸமணப்³ராஹ்மணேஹி ஸிதா உபனிப³த்³தா⁴.
Upanibaddhāti viracitā. Tenāha ‘‘abhisaṅkhatā’’ti. Puthubhāvanti bahubhāvaṃ. Puthūhi vā sitāti bahūhi samaṇabrāhmaṇehi sitā upanibaddhā.
வேஸாரஜ்ஜஸுத்தவண்ணனா நிட்டி²தா.
Vesārajjasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 8. வேஸாரஜ்ஜஸுத்தங் • 8. Vesārajjasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 8. வேஸாரஜ்ஜஸுத்தவண்ணனா • 8. Vesārajjasuttavaṇṇanā
