Library / Tipiṭaka / তিপিটক • Tipiṭaka / চরিযাপিটক-অট্ঠকথা • Cariyāpiṭaka-aṭṭhakathā

    ৯. ৰেস্সন্তরচরিযাৰণ্ণনা

    9. Vessantaracariyāvaṇṇanā

    ৬৭. নৰমে যা মে অহোসি জনিকাতি এত্থ মেতি ৰেস্সন্তরভূতং অত্তানং সন্ধায সত্থা ৰদতি। তেনেৰাহ – ‘‘ফুস্সতী নাম খত্তিযা’’তি। তদা হিস্স মাতা ‘‘ফুস্সতী’’তি এৰংনামিকা খত্তিযানী অহোসি। সা অতীতাসু জাতীসূতি সা ততো অনন্তরাতীতজাতিযং। একত্থে হি এতং বহুৰচনং। সক্কস্স মহেসী পিযা অহোসীতি সম্বন্ধো। অথ ৰা যা মে অহোসি জনিকা ইমস্মিং চরিমত্তভাৰে, সা অতীতাসু জাতীসু ফুস্সতী নাম, তত্থ অতীতায জাতিযা খত্তিযা, যত্থাহং তস্সা কুচ্ছিম্হি ৰেস্সন্তরো হুত্ৰা নিব্বত্তিং, ততো অনন্তরাতীতায সক্কস্স মহেসী পিযা অহোসীতি। তত্রাযং অনুপুব্বিকথা –

    67. Navame yā me ahosi janikāti ettha meti vessantarabhūtaṃ attānaṃ sandhāya satthā vadati. Tenevāha – ‘‘phussatī nāma khattiyā’’ti. Tadā hissa mātā ‘‘phussatī’’ti evaṃnāmikā khattiyānī ahosi. Sā atītāsu jātīsūti sā tato anantarātītajātiyaṃ. Ekatthe hi etaṃ bahuvacanaṃ. Sakkassa mahesī piyā ahosīti sambandho. Atha vā yā me ahosi janikā imasmiṃ carimattabhāve, sā atītāsu jātīsu phussatī nāma, tattha atītāya jātiyā khattiyā, yatthāhaṃ tassā kucchimhi vessantaro hutvā nibbattiṃ, tato anantarātītāya sakkassa mahesī piyā ahosīti. Tatrāyaṃ anupubbikathā –

    ইতো হি একনৰুতে কপ্পে ৰিপস্সী নাম সত্থা লোকে উদপাদি। তস্মিং বন্ধুমতীনগরং উপনিস্সায খেমে মিগদাযে ৰিহরন্তে বন্ধুমা রাজা কেনচি রঞ্ঞা পেসিতং মহগ্ঘং চন্দনসারং অত্তনো জেট্ঠধীতায অদাসি। সা তেন সুখুমং চন্দনচুণ্ণং কারেত্ৰা সমুগ্গং পূরেত্ৰা ৰিহারং গন্ত্ৰা সত্থু সুৰণ্ণৰণ্ণং সরীরং পূজেত্ৰা সেসচুণ্ণানি গন্ধকুটিযং ৰিকিরিত্ৰা ‘‘ভন্তে, অনাগতে তুম্হাদিসস্স বুদ্ধস্স মাতা ভৰেয্য’’ন্তি পত্থনং অকাসি। সা ততো চুতা তস্সা চন্দনচুণ্ণপূজায ফলেন রত্তচন্দনপরিপ্ফোসিতেন ৰিয সরীরেন দেৰেসু চ মনুস্সেসু চ সংসরন্তী তাৰতিংসভৰনে সক্কস্স দেৰরঞ্ঞো অগ্গমহেসী হুত্ৰা নিব্বত্তি। অথস্সা আযুপরিযোসানে পুব্বনিমিত্তেসু উপ্পন্নেসু সক্কো দেৰরাজা তস্সা পরিক্খীণাযুকতং ঞত্ৰা তস্সা অনুকম্পায ‘‘ভদ্দে, ফুস্সতি দস তে ৰরে দম্মি, তে গণ্হস্সূ’’তি আহ। তেন ৰুত্তং –

    Ito hi ekanavute kappe vipassī nāma satthā loke udapādi. Tasmiṃ bandhumatīnagaraṃ upanissāya kheme migadāye viharante bandhumā rājā kenaci raññā pesitaṃ mahagghaṃ candanasāraṃ attano jeṭṭhadhītāya adāsi. Sā tena sukhumaṃ candanacuṇṇaṃ kāretvā samuggaṃ pūretvā vihāraṃ gantvā satthu suvaṇṇavaṇṇaṃ sarīraṃ pūjetvā sesacuṇṇāni gandhakuṭiyaṃ vikiritvā ‘‘bhante, anāgate tumhādisassa buddhassa mātā bhaveyya’’nti patthanaṃ akāsi. Sā tato cutā tassā candanacuṇṇapūjāya phalena rattacandanaparipphositena viya sarīrena devesu ca manussesu ca saṃsarantī tāvatiṃsabhavane sakkassa devarañño aggamahesī hutvā nibbatti. Athassā āyupariyosāne pubbanimittesu uppannesu sakko devarājā tassā parikkhīṇāyukataṃ ñatvā tassā anukampāya ‘‘bhadde, phussati dasa te vare dammi, te gaṇhassū’’ti āha. Tena vuttaṃ –

    ৬৮.

    68.

    ‘‘তস্সা আযুক্খযং ঞত্ৰা, দেৰিন্দো এতদব্রৰি।

    ‘‘Tassā āyukkhayaṃ ñatvā, devindo etadabravi;

    ‘দদামি তে দস ৰরে, ৰর ভদ্দে যদিচ্ছসী’’’তি॥

    ‘Dadāmi te dasa vare, vara bhadde yadicchasī’’’ti.

    তত্থ ৰরাতি ৰরস্সু ৰরং গণ্হ। ভদ্দে, যদিচ্ছসীতি, ভদ্দে, ফুস্সতি যং ইচ্ছসি যং তৰ পিযং, তং দসহি কোট্ঠাসেহি ‘‘ৰরং ৰরস্সু পটিগ্গণ্হাহী’’তি ৰদতি।

    Tattha varāti varassu varaṃ gaṇha. Bhadde, yadicchasīti, bhadde, phussati yaṃ icchasi yaṃ tava piyaṃ, taṃ dasahi koṭṭhāsehi ‘‘varaṃ varassu paṭiggaṇhāhī’’ti vadati.

    ৬৯. পুনিদমব্রৰীতি পুন ইদং সা অত্তনো চৰনধম্মতং অজানন্তী ‘‘কিং নু মে অপরাধত্থী’’তিআদিকং অভাসি। সা হি পমত্তা হুত্ৰা অত্তনো আযুক্খযং অজানন্তী অযং ‘‘ৰরং গণ্হা’’তি ৰদন্তো ‘‘কত্থচি মম উপ্পজ্জনং ইচ্ছতী’’তি ঞত্ৰা এৰমাহ। তত্থ অপরাধত্থীতি অপরাধো অত্থি। কিং নু দেস্সা অহং তৰাতি কিং কারণং অহং তৰ দেস্সা কুজ্ঝিতব্বা অপ্পিযা জাতা। রম্মা চাৰেসি মং ঠানাতি রমণীযা ইমস্মা ঠানা চাৰেসি। ৰাতোৰ ধরণীরুহন্তি যেন বলৰা মালুতো ৰিয রুক্খং উম্মূলেন্তো ইমম্হা দেৰলোকা চাৰেতুকামোসি কিং নু কারণন্তি তং পুচ্ছতি।

    69.Punidamabravīti puna idaṃ sā attano cavanadhammataṃ ajānantī ‘‘kiṃ nu me aparādhatthī’’tiādikaṃ abhāsi. Sā hi pamattā hutvā attano āyukkhayaṃ ajānantī ayaṃ ‘‘varaṃ gaṇhā’’ti vadanto ‘‘katthaci mama uppajjanaṃ icchatī’’ti ñatvā evamāha. Tattha aparādhatthīti aparādho atthi. Kiṃ nu dessā ahaṃ tavāti kiṃ kāraṇaṃ ahaṃ tava dessā kujjhitabbā appiyā jātā. Rammā cāvesi maṃ ṭhānāti ramaṇīyā imasmā ṭhānā cāvesi. Vātova dharaṇīruhanti yena balavā māluto viya rukkhaṃ ummūlento imamhā devalokā cāvetukāmosi kiṃ nu kāraṇanti taṃ pucchati.

    ৭০. তস্সিদন্তি তস্সা ইদং। ন চেৰ তে কতং পাপন্তি ন চেৰ তযা কিঞ্চি পাপং কতং যেন তে অপরাধো সিযা। ন চ মে ত্ৰংসি অপ্পিযাতি মম ত্ৰং ন চাপি অপ্পিযা, যেন দেস্সা নাম মম অপ্পিযাতি অধিপ্পাযো।

    70.Tassidanti tassā idaṃ. Na ceva te kataṃ pāpanti na ceva tayā kiñci pāpaṃ kataṃ yena te aparādho siyā. Na ca me tvaṃsi appiyāti mama tvaṃ na cāpi appiyā, yena dessā nāma mama appiyāti adhippāyo.

    ৭১. ইদানি যেন অধিপ্পাযেন ৰরে দাতুকামো, তং দস্সেন্তো ‘‘এত্তকংযেৰ তে আযু, চৰনকালো ভৰিস্সতী’’তি ৰত্ৰা ৰরে গণ্হাপেন্তো ‘‘পটিগ্গণ্হ মযা দিন্নে, ৰরে দস ৰরুত্তমে’’তি আহ।

    71. Idāni yena adhippāyena vare dātukāmo, taṃ dassento ‘‘ettakaṃyeva te āyu, cavanakālo bhavissatī’’ti vatvā vare gaṇhāpento ‘‘paṭiggaṇha mayā dinne, vare dasa varuttame’’ti āha.

    তত্থ ৰরুত্তমেতি ৰরেসু উত্তমে অগ্গৰরে।

    Tattha varuttameti varesu uttame aggavare.

    ৭২. দিন্নৰরাতি ‘‘ৰরে দস্সামী’’তি পটিঞ্ঞাদানৰসেন দিন্নৰরা। তুট্ঠহট্ঠাতি ইচ্ছিতলাভপরিতোসেন তুট্ঠা চেৰ তস্স চ সিখাপ্পত্তিদস্সনেন হাসৰসেন হট্ঠা চ। পমোদিতাতি বলৰপামোজ্জেন পমুদিতা। মমং অব্ভন্তরং কত্ৰাতি তেসু ৰরেসু মং অব্ভন্তরং করিত্ৰা। দস ৰরে ৰরীতি সা অত্তনো খীণাযুকভাৰং ঞত্ৰা সক্কেন ৰরদানত্থং কতোকাসা সকলজম্বুদীপতলং ওলোকেন্তী অত্তনো অনুচ্ছৰিকং সিৰিরঞ্ঞো নিৰেসনং দিস্ৰা তত্থ তস্স অগ্গমহেসিভাৰো নীলনেত্ততা নীলভমুকতা ফুস্সতীতিনামং গুণৰিসেসযুত্তপুত্তপটিলাভো অনুন্নতকুচ্ছিভাৰো অলম্বত্থনতা অপলিতভাৰো সুখুমচ্ছৰিতা ৰজ্ঝজনানং মোচনসমত্থতা চাতি ইমে দস ৰরে গণ্হি।

    72.Dinnavarāti ‘‘vare dassāmī’’ti paṭiññādānavasena dinnavarā. Tuṭṭhahaṭṭhāti icchitalābhaparitosena tuṭṭhā ceva tassa ca sikhāppattidassanena hāsavasena haṭṭhā ca. Pamoditāti balavapāmojjena pamuditā. Mamaṃ abbhantaraṃ katvāti tesu varesu maṃ abbhantaraṃ karitvā. Dasa vare varīti sā attano khīṇāyukabhāvaṃ ñatvā sakkena varadānatthaṃ katokāsā sakalajambudīpatalaṃ olokentī attano anucchavikaṃ sivirañño nivesanaṃ disvā tattha tassa aggamahesibhāvo nīlanettatā nīlabhamukatā phussatītināmaṃ guṇavisesayuttaputtapaṭilābho anunnatakucchibhāvo alambatthanatā apalitabhāvo sukhumacchavitā vajjhajanānaṃ mocanasamatthatā cāti ime dasa vare gaṇhi.

    ইতি সা দস ৰরে গহেত্ৰা ততো চুতা মদ্দরঞ্ঞো অগ্গমহেসিযা কুচ্ছিম্হি নিব্বত্তি। জাযমানা চ সা চন্দনচুণ্ণপরিপ্ফোসিতেন ৰিয সরীরেন জাতা। তেনস্সা নামগ্গহণদিৰসে ‘‘ফুস্সতী’’ ত্ৰেৰ নামং করিংসু। সা মহন্তেন পরিৰারেন ৰড্ঢিত্ৰা সোল়সৰস্সকালে উত্তমরূপধরা অহোসি। অথ নং জেতুত্তরনগরে সিৰিমহারাজা পুত্তস্স সঞ্জযকুমারস্সত্থায আনেত্ৰা সেতচ্ছত্তং উস্সাপেত্ৰা তং সোল়সন্নং ইত্থিসহস্সানং জেট্ঠকং কত্ৰা অগ্গমহেসিট্ঠানে ঠপেসি। তেন ৰুত্তং –

    Iti sā dasa vare gahetvā tato cutā maddarañño aggamahesiyā kucchimhi nibbatti. Jāyamānā ca sā candanacuṇṇaparipphositena viya sarīrena jātā. Tenassā nāmaggahaṇadivase ‘‘phussatī’’ tveva nāmaṃ kariṃsu. Sā mahantena parivārena vaḍḍhitvā soḷasavassakāle uttamarūpadharā ahosi. Atha naṃ jetuttaranagare sivimahārājā puttassa sañjayakumārassatthāya ānetvā setacchattaṃ ussāpetvā taṃ soḷasannaṃ itthisahassānaṃ jeṭṭhakaṃ katvā aggamahesiṭṭhāne ṭhapesi. Tena vuttaṃ –

    ৭৩.

    73.

    ‘‘ততো চুতা সা ফুস্সতী, খত্তিযে উপপজ্জথ।

    ‘‘Tato cutā sā phussatī, khattiye upapajjatha;

    জেতুত্তরম্হি নগরে, সঞ্জযেন সমাগমী’’তি॥

    Jetuttaramhi nagare, sañjayena samāgamī’’ti.

    সা সঞ্জযরঞ্ঞো পিযা অহোসি মনাপা। অথ সক্কো আৰজ্জেন্তো ‘‘মযা ফুস্সতিযা দিন্নৰরেসু নৰ ৰরা সমিদ্ধা’’তি দিস্ৰা ‘‘পুত্তৰরো ন সমিদ্ধো, তম্পিস্সা সমিজ্ঝাপেস্সামী’’তি চিন্তেত্ৰা বোধিসত্তং তদা তাৰতিংসদেৰলোকে খীণাযুকং দিস্ৰা তস্স সন্তিকং গন্ত্ৰা ‘‘মারিস, তযা মনুস্সলোকে সিৰিসঞ্জযরঞ্ঞো অগ্গমহেসিযা কুচ্ছিম্হি পটিসন্ধিং গণ্হিতুং ৰট্টতী’’তি তস্স চেৰ অঞ্ঞেসঞ্চ চৰনধম্মানং সট্ঠিসহস্সানং দেৰপুত্তানং পটিঞ্ঞং গহেত্ৰা সকট্ঠানমেৰ গতো। মহাসত্তোপি ততো চৰিত্ৰা তত্থুপ্পন্নো। সেসা দেৰপুত্তাপি সট্ঠিসহস্সানং অমচ্চানং গেহেসু নিব্বত্তিংসু। মহাসত্তে কুচ্ছিগতে ফুস্সতিদেৰী চতূসু নগরদ্ৰারেসু নগরমজ্ঝে নিৰেসনদ্ৰারেতি ছ দানসালাযো কারেত্ৰা দেৰসিকং ছসতসহস্সানি ৰিস্সজ্জেত্ৰা দানং দাতুং দোহল়িনী অহোসি। রাজা তস্সা দোহল়ং সুত্ৰা নেমিত্তকে ব্রাহ্মণে পক্কোসাপেত্ৰা পুচ্ছিত্ৰা ‘‘মহারাজ, দেৰিযা কুচ্ছিম্হি দানাভিরতো উল়ারো সত্তো উপ্পন্নো, দানেন তিত্তিং ন পাপুণিস্সতী’’তি সুত্ৰা তুট্ঠমানসো ৰুত্তপ্পকারং দানং পট্ঠপেসি। সমণব্রাহ্মণজিণ্ণাতুরকপণদ্ধিকৰনিব্বকযাচকে সন্তপ্পেসি। বোধিসত্তস্স পটিসন্ধিগ্গহণতো পট্ঠায রঞ্ঞো আযস্স পমাণং নাহোসি। তস্স পুঞ্ঞানুভাৰেন সকলজম্বুদীপে রাজানো পণ্ণাকারং পহিণন্তি। তেন ৰুত্তং –

    Sā sañjayarañño piyā ahosi manāpā. Atha sakko āvajjento ‘‘mayā phussatiyā dinnavaresu nava varā samiddhā’’ti disvā ‘‘puttavaro na samiddho, tampissā samijjhāpessāmī’’ti cintetvā bodhisattaṃ tadā tāvatiṃsadevaloke khīṇāyukaṃ disvā tassa santikaṃ gantvā ‘‘mārisa, tayā manussaloke sivisañjayarañño aggamahesiyā kucchimhi paṭisandhiṃ gaṇhituṃ vaṭṭatī’’ti tassa ceva aññesañca cavanadhammānaṃ saṭṭhisahassānaṃ devaputtānaṃ paṭiññaṃ gahetvā sakaṭṭhānameva gato. Mahāsattopi tato cavitvā tatthuppanno. Sesā devaputtāpi saṭṭhisahassānaṃ amaccānaṃ gehesu nibbattiṃsu. Mahāsatte kucchigate phussatidevī catūsu nagaradvāresu nagaramajjhe nivesanadvāreti cha dānasālāyo kāretvā devasikaṃ chasatasahassāni vissajjetvā dānaṃ dātuṃ dohaḷinī ahosi. Rājā tassā dohaḷaṃ sutvā nemittake brāhmaṇe pakkosāpetvā pucchitvā ‘‘mahārāja, deviyā kucchimhi dānābhirato uḷāro satto uppanno, dānena tittiṃ na pāpuṇissatī’’ti sutvā tuṭṭhamānaso vuttappakāraṃ dānaṃ paṭṭhapesi. Samaṇabrāhmaṇajiṇṇāturakapaṇaddhikavanibbakayācake santappesi. Bodhisattassa paṭisandhiggahaṇato paṭṭhāya rañño āyassa pamāṇaṃ nāhosi. Tassa puññānubhāvena sakalajambudīpe rājāno paṇṇākāraṃ pahiṇanti. Tena vuttaṃ –

    ৭৪.

    74.

    ‘‘যদাহং ফুস্সতিযা কুচ্ছিং, ওক্কন্তো পিযমাতুযা।

    ‘‘Yadāhaṃ phussatiyā kucchiṃ, okkanto piyamātuyā;

    মম তেজেন মে মাতা, তদা দানরতা অহু॥

    Mama tejena me mātā, tadā dānaratā ahu.

    ৭৫.

    75.

    ‘‘অধনে আতুরে জিণ্ণে, যাচকে অদ্ধিকে জনে।

    ‘‘Adhane āture jiṇṇe, yācake addhike jane;

    সমণে ব্রাহ্মণে খীণে, দেতি দানং অকিঞ্চনে’’তি।

    Samaṇe brāhmaṇe khīṇe, deti dānaṃ akiñcane’’ti;

    তত্থ মম তেজেনাতি মম দানজ্ঝাসযানুভাৰেন। খীণেতি ভোগাদীহি পরিক্খীণে পারিজুঞ্ঞপ্পত্তে। অকিঞ্চনেতি অপরিগ্গহে। সব্বত্থ ৰিসযে ভুম্মং। অধনাদযো হি দানধম্মস্স পৰত্তিযা ৰিসযো।

    Tattha mama tejenāti mama dānajjhāsayānubhāvena. Khīṇeti bhogādīhi parikkhīṇe pārijuññappatte. Akiñcaneti apariggahe. Sabbattha visaye bhummaṃ. Adhanādayo hi dānadhammassa pavattiyā visayo.

    দেৰী মহন্তেন পরিহারেন গব্ভং ধারেন্তী দসমাসে পরিপুণ্ণে নগরং দট্ঠুকামা হুত্ৰা রঞ্ঞো আরোচেসি। রাজা দেৰনগরং ৰিয নগরং অলঙ্কারাপেত্ৰা দেৰিং রথৰরং আরোপেত্ৰা নগরং পদক্খিণং কারেসি। তস্সা ৰেস্সৰীথিযা মজ্ঝপ্পত্তকালে কম্মজৰাতা চলিংসু। অমচ্চা রঞ্ঞো আরোচেসুং। সো ৰেস্সৰীথিযংযেৰস্সা সূতিঘরং কারেত্ৰা আরক্খং গণ্হাপেসি। সা তত্থ পুত্তং ৰিজাযি। তেনাহ –

    Devī mahantena parihārena gabbhaṃ dhārentī dasamāse paripuṇṇe nagaraṃ daṭṭhukāmā hutvā rañño ārocesi. Rājā devanagaraṃ viya nagaraṃ alaṅkārāpetvā deviṃ rathavaraṃ āropetvā nagaraṃ padakkhiṇaṃ kāresi. Tassā vessavīthiyā majjhappattakāle kammajavātā caliṃsu. Amaccā rañño ārocesuṃ. So vessavīthiyaṃyevassā sūtigharaṃ kāretvā ārakkhaṃ gaṇhāpesi. Sā tattha puttaṃ vijāyi. Tenāha –

    ৭৬.

    76.

    ‘‘দসমাসে ধারযিত্ৰান, করোন্তে পুরং পদক্খিণং।

    ‘‘Dasamāse dhārayitvāna, karonte puraṃ padakkhiṇaṃ;

    ৰেস্সানং ৰীথিযা মজ্ঝে, জনেসি ফুস্সতী মমং॥

    Vessānaṃ vīthiyā majjhe, janesi phussatī mamaṃ.

    ৭৭. ‘‘ন ময্হং মত্তিকং নামং, নাপি পেত্তিকসম্ভৰং।

    77. ‘‘Na mayhaṃ mattikaṃ nāmaṃ, nāpi pettikasambhavaṃ.

    জাতেত্থ ৰেস্সৰীথিযং, তস্মা ৰেস্সন্তরো অহূ’’তি॥

    Jātettha vessavīthiyaṃ, tasmā vessantaro ahū’’ti.

    তত্থ করোন্তে পুরং পদক্খিণন্তি দেৰিং গহেত্ৰা সঞ্জযমহারাজে নগরং পদক্খিণং কুরুমানে। ৰেস্সানন্তি ৰাণিজানং।

    Tattha karonte puraṃ padakkhiṇanti deviṃ gahetvā sañjayamahārāje nagaraṃ padakkhiṇaṃ kurumāne. Vessānanti vāṇijānaṃ.

    ন মত্তিকং নামন্তি ন মাতুআগতং মাতামহাদীনং নামং। পেত্তিকসম্ভৰন্তি পিতু ইদন্তি পেত্তিকং , সম্ভৰতি এতস্মাতি সম্ভৰো, তং পেত্তিকং সম্ভৰো এতস্সাতি পেত্তিকসম্ভৰং, নামং। মাতাপিতুসম্বন্ধৰসেন ন কতন্তি দস্সেতি। জাতেত্থাতি জাতো এত্থ। ‘‘জাতোম্হী’’তিপি পাঠো। তস্মা ৰেস্সন্তরো অহূতি যস্মা তদা ৰেস্সৰীথিযং জাতো, তস্মা ৰেস্সন্তরো নাম অহোসি, ৰেস্সন্তরোতি নামং অকংসূতি অত্থো।

    Na mattikaṃ nāmanti na mātuāgataṃ mātāmahādīnaṃ nāmaṃ. Pettikasambhavanti pitu idanti pettikaṃ , sambhavati etasmāti sambhavo, taṃ pettikaṃ sambhavo etassāti pettikasambhavaṃ, nāmaṃ. Mātāpitusambandhavasena na katanti dasseti. Jātetthāti jāto ettha. ‘‘Jātomhī’’tipi pāṭho. Tasmā vessantaro ahūti yasmā tadā vessavīthiyaṃ jāto, tasmā vessantaro nāma ahosi, vessantaroti nāmaṃ akaṃsūti attho.

    মহাসত্তো মাতু কুচ্ছিতো নিক্খমন্তো ৰিসদো হুত্ৰা অক্খীনি উম্মীলেত্ৰাৰ নিক্খমি। নিক্খন্তমত্তে এৰ মাতু হত্থং পসারেত্ৰা ‘‘অম্ম, দানং দস্সামি, অত্থি কিঞ্চী’’তি আহ। অথস্স মাতা ‘‘তাত, যথাজ্ঝাসযং দানং দেহী’’তি হত্থসমীপে সহস্সত্থৰিকং ঠপেসি। বোধিসত্তো হি উম্মঙ্গজাতকে (জা॰ ২.২২.৫৯০ আদযো) ইমস্মিং জাতকে পচ্ছিমত্তভাৰেতি তীসু ঠানেসু জাতমত্তোৰ কথেসি। রাজা মহাসত্তস্স অতিদীঘাদিদোসৰিৰজ্জিতা মধুরখীরা চতুসট্ঠিধাতিযো উপট্ঠাপেসি। তেন সদ্ধিং জাতানং সট্ঠিযা দারকসহস্সানম্পি ধাতিযো দাপেসি। সো সট্ঠিদারকসহস্সেহি সদ্ধিং মহন্তেন পরিৰারেন ৰড্ঢতি। তস্স রাজা সতসহস্সগ্ঘনকং কুমারপিল়ন্ধনং কারাপেত্ৰা অদাসি। সো চতুপঞ্চৰস্সিককালে তং ওমুঞ্চিত্ৰা ধাতীনং দত্ৰা পুন তাহি দীযমানং ন গণ্হাতি। তং সুত্ৰা রাজা ‘‘মম পুত্তেন দিন্নং সুদিন্ন’’ন্তি ৰত্ৰা অপরম্পি কারেসি। তম্পি দেতি। দারককালেযেৰ ধাতীনং নৰৰারে পিল়ন্ধনং অদাসি।

    Mahāsatto mātu kucchito nikkhamanto visado hutvā akkhīni ummīletvāva nikkhami. Nikkhantamatte eva mātu hatthaṃ pasāretvā ‘‘amma, dānaṃ dassāmi, atthi kiñcī’’ti āha. Athassa mātā ‘‘tāta, yathājjhāsayaṃ dānaṃ dehī’’ti hatthasamīpe sahassatthavikaṃ ṭhapesi. Bodhisatto hi ummaṅgajātake (jā. 2.22.590 ādayo) imasmiṃ jātake pacchimattabhāveti tīsu ṭhānesu jātamattova kathesi. Rājā mahāsattassa atidīghādidosavivajjitā madhurakhīrā catusaṭṭhidhātiyo upaṭṭhāpesi. Tena saddhiṃ jātānaṃ saṭṭhiyā dārakasahassānampi dhātiyo dāpesi. So saṭṭhidārakasahassehi saddhiṃ mahantena parivārena vaḍḍhati. Tassa rājā satasahassagghanakaṃ kumārapiḷandhanaṃ kārāpetvā adāsi. So catupañcavassikakāle taṃ omuñcitvā dhātīnaṃ datvā puna tāhi dīyamānaṃ na gaṇhāti. Taṃ sutvā rājā ‘‘mama puttena dinnaṃ sudinna’’nti vatvā aparampi kāresi. Tampi deti. Dārakakāleyeva dhātīnaṃ navavāre piḷandhanaṃ adāsi.

    অট্ঠৰস্সিককালে পন সযনপীঠে নিসিন্নো চিন্তেসি – ‘‘অহং বাহিরকদানং দেমি, ন তং মং পরিতোসেতি, অজ্ঝত্তিকদানং দাতুকামোম্হি। সচে হি মং কোচি হদযং যাচেয্য, হদযং নীহরিত্ৰা দদেয্যং। সচে অক্খীনি যাচেয্য, অক্খীনি উপ্পাটেত্ৰা দদেয্যং। সচে সকলসরীরে মংসং রুধিরম্পি ৰা যাচেয্য, সকলসরীরতো মংসং ছিন্দিত্ৰা রুধিরম্পি অসিনা ৰিজ্ঝিত্ৰা দদেয্যং। অথাপি কোচি ‘দাসো মে হোহী’তি ৰদেয্য, অত্তানং তস্স সাৰেত্ৰা দদেয্য’’ন্তি। তস্সেৰং সভাৰং সরসং চিন্তেন্তস্স চতুনহুতাধিকদ্ৰিযোজনসতসহস্সবহলা অযং মহাপথৰী উদকপরিযন্তং কত্ৰা কম্পি। সিনেরুপব্বতরাজা ওনমিত্ৰা জেতুত্তরনগরাভিমুখো অট্ঠাসি। তেন ৰুত্তং –

    Aṭṭhavassikakāle pana sayanapīṭhe nisinno cintesi – ‘‘ahaṃ bāhirakadānaṃ demi, na taṃ maṃ paritoseti, ajjhattikadānaṃ dātukāmomhi. Sace hi maṃ koci hadayaṃ yāceyya, hadayaṃ nīharitvā dadeyyaṃ. Sace akkhīni yāceyya, akkhīni uppāṭetvā dadeyyaṃ. Sace sakalasarīre maṃsaṃ rudhirampi vā yāceyya, sakalasarīrato maṃsaṃ chinditvā rudhirampi asinā vijjhitvā dadeyyaṃ. Athāpi koci ‘dāso me hohī’ti vadeyya, attānaṃ tassa sāvetvā dadeyya’’nti. Tassevaṃ sabhāvaṃ sarasaṃ cintentassa catunahutādhikadviyojanasatasahassabahalā ayaṃ mahāpathavī udakapariyantaṃ katvā kampi. Sinerupabbatarājā onamitvā jetuttaranagarābhimukho aṭṭhāsi. Tena vuttaṃ –

    ৭৮.

    78.

    ‘‘যদাহং দারকো হোমি, জাতিযা অট্ঠৰস্সিকো।

    ‘‘Yadāhaṃ dārako homi, jātiyā aṭṭhavassiko;

    তদা নিসজ্জ পাসাদে, দানং দাতুং ৰিচিন্তযিং॥

    Tadā nisajja pāsāde, dānaṃ dātuṃ vicintayiṃ.

    ৭৯.

    79.

    ‘‘হদযং দদেয্যং চক্খুং, মংসম্পি রুধিরম্পি চ।

    ‘‘Hadayaṃ dadeyyaṃ cakkhuṃ, maṃsampi rudhirampi ca;

    দদেয্যং কাযং সাৰেত্ৰা, যদি কোচি যাচযে মমং॥

    Dadeyyaṃ kāyaṃ sāvetvā, yadi koci yācaye mamaṃ.

    ৮০.

    80.

    ‘‘সভাৰং চিন্তযন্তস্স, অকম্পিতমসণ্ঠিতং।

    ‘‘Sabhāvaṃ cintayantassa, akampitamasaṇṭhitaṃ;

    অকম্পি তত্থ পথৰী, সিনেরুৰনৰটংসকা’’তি॥

    Akampi tattha pathavī, sineruvanavaṭaṃsakā’’ti.

    তত্থ সাৰেত্ৰাতি ‘‘অজ্জ পট্ঠায অহং ইমস্স দাসো’’তি দাসভাৰং সাৰেত্ৰা। যদি কোচি যাচযে মমন্তি কোচি মং যদি যাচেয্য। সভাৰং চিন্তযন্তস্সাতি অৰিপরীতং অত্তনো যথাভূতং সভাৰং অতিত্তিমং যথাজ্ঝাসযং চিন্তেন্তস্স মম, মযি চিন্তেন্তেতি অত্থো। অকম্পিতন্তি কম্পিতরহিতং। অসণ্ঠিতন্তি সঙ্কোচরহিতং। যেন হি লোভাদিনা অবোধিসত্তানং চক্খাদিদানে চিত্তুত্রাসসঙ্খাতং কম্পিতং সঙ্কোচসঙ্খাতং সণ্ঠিতঞ্চ সিযা, তেন ৰিনাতি অত্থো। অকম্পীতি অচলি। সিনেরুৰনৰটংসকাতি সিনেরুম্হি উট্ঠিতনন্দনৰনফারুসকৰনমিস্সকৰনচিত্তলতাৰনাদিকপ্পকতরুৰনং সিনেরুৰনং। অথ ৰা সিনেরু চ জম্বুদীপাদীসু রমণীযৰনঞ্চ সিনেরুৰনং , তং ৰনং ৰটংসকং এতিস্সাতি সিনেরুৰনৰটংসকা।

    Tattha sāvetvāti ‘‘ajja paṭṭhāya ahaṃ imassa dāso’’ti dāsabhāvaṃ sāvetvā. Yadi koci yācaye mamanti koci maṃ yadi yāceyya. Sabhāvaṃ cintayantassāti aviparītaṃ attano yathābhūtaṃ sabhāvaṃ atittimaṃ yathājjhāsayaṃ cintentassa mama, mayi cintenteti attho. Akampitanti kampitarahitaṃ. Asaṇṭhitanti saṅkocarahitaṃ. Yena hi lobhādinā abodhisattānaṃ cakkhādidāne cittutrāsasaṅkhātaṃ kampitaṃ saṅkocasaṅkhātaṃ saṇṭhitañca siyā, tena vināti attho. Akampīti acali. Sineruvanavaṭaṃsakāti sinerumhi uṭṭhitanandanavanaphārusakavanamissakavanacittalatāvanādikappakataruvanaṃ sineruvanaṃ. Atha vā sineru ca jambudīpādīsu ramaṇīyavanañca sineruvanaṃ , taṃ vanaṃ vaṭaṃsakaṃ etissāti sineruvanavaṭaṃsakā.

    এৰঞ্চ পথৰিকম্পনে ৰত্তমানে মধুরগম্ভীরদেৰো গজ্জন্তো খণিকৰস্সং ৰস্সি, ৰিজ্জুলতা নিচ্ছরিংসু, মহাসমুদ্দো উব্ভিজ্জি, সক্কো দেৰরাজা অপ্ফোটেসি, মহাব্রহ্মা সাধুকারমদাসি, যাৰ ব্রহ্মলোকা এককোলাহলং অহোসি। মহাসত্তো সোল়সৰস্সকালেযেৰ সব্বসিপ্পানং নিপ্ফত্তিং পাপুণি। তস্স পিতা রজ্জং দাতুকামো মাতরা সদ্ধিং মন্তেত্ৰা মদ্দরাজকুলতো মাতুলধীতরং মদ্দিং নাম রাজকঞ্ঞং আনেত্ৰা সোল়সন্নং ইত্থিসহস্সানং জেট্ঠকং অগ্গমহেসিং কত্ৰা মহাসত্তং রজ্জে অভিসিঞ্চি। মহাসত্তো রজ্জে পতিট্ঠিতকালতো পট্ঠায দেৰসিকং ছসতসহস্সানি ৰিস্সজ্জেত্ৰা মহাদানং পৰত্তেন্তো অন্ৰদ্ধমাসং দানং ওলোকেতুং উপসঙ্কমতি। অপরভাগে মদ্দিদেৰী পুত্তং ৰিজাযি। তং কঞ্চনজালেন সম্পটিচ্ছিংসু, তেনস্স ‘‘জালিকুমারো’’ত্ৰেৰ নামং করিংসু। তস্স পদসা গমনকালে সা ধীতরং ৰিজাযি। তং কণ্হাজিনেন সম্পটিচ্ছিংসু, তেনস্সা ‘‘কণ্হাজিনা’’ত্ৰেৰ নামং করিংসু। তেন ৰুত্তং –

    Evañca pathavikampane vattamāne madhuragambhīradevo gajjanto khaṇikavassaṃ vassi, vijjulatā nicchariṃsu, mahāsamuddo ubbhijji, sakko devarājā apphoṭesi, mahābrahmā sādhukāramadāsi, yāva brahmalokā ekakolāhalaṃ ahosi. Mahāsatto soḷasavassakāleyeva sabbasippānaṃ nipphattiṃ pāpuṇi. Tassa pitā rajjaṃ dātukāmo mātarā saddhiṃ mantetvā maddarājakulato mātuladhītaraṃ maddiṃ nāma rājakaññaṃ ānetvā soḷasannaṃ itthisahassānaṃ jeṭṭhakaṃ aggamahesiṃ katvā mahāsattaṃ rajje abhisiñci. Mahāsatto rajje patiṭṭhitakālato paṭṭhāya devasikaṃ chasatasahassāni vissajjetvā mahādānaṃ pavattento anvaddhamāsaṃ dānaṃ oloketuṃ upasaṅkamati. Aparabhāge maddidevī puttaṃ vijāyi. Taṃ kañcanajālena sampaṭicchiṃsu, tenassa ‘‘jālikumāro’’tveva nāmaṃ kariṃsu. Tassa padasā gamanakāle sā dhītaraṃ vijāyi. Taṃ kaṇhājinena sampaṭicchiṃsu, tenassā ‘‘kaṇhājinā’’tveva nāmaṃ kariṃsu. Tena vuttaṃ –

    ৮১.

    81.

    ‘‘অন্ৰদ্ধমাসে পন্নরসে, পুণ্ণমাসে উপোসথে।

    ‘‘Anvaddhamāse pannarase, puṇṇamāse uposathe;

    পচ্চযং নাগমারুয্হ, দানং দাতুং উপাগমি’’ন্তি॥

    Paccayaṃ nāgamāruyha, dānaṃ dātuṃ upāgami’’nti.

    তত্থ অন্ৰদ্ধমাসেতি অনুঅদ্ধমাসে, অদ্ধমাসে অদ্ধমাসেতি অত্থো। পুণ্ণমাসেতি পুণ্ণমাসিযং, মাসপরিপূরিযা চন্দপরিপূরিযা চ সমন্নাগতে পন্নরসে দানং দাতুং উপাগমিন্তি সম্বন্ধো। তত্রাযং যোজনা – পচ্চযং নাগমারুয্হ অদ্ধমাসে অদ্ধমাসে দানং দাতুং দানসালং উপাগমিং, এৰং উপগচ্ছন্তো চ যদা একস্মিং পন্নরসে পুণ্ণমাসিউপোসথে দানং দাতুং উপাগমিং, তদা কলিঙ্গরট্ঠৰিসযা ব্রাহ্মণা উপগঞ্ছু মন্তি তত্থ পচ্চযং নাগন্তি পচ্চযনামকং মঙ্গলহত্থিং। বোধিসত্তস্স হি জাতদিৰসে একা আকাসচারিনী করেণুকা অভিমঙ্গলসম্মতং সব্বসেতহত্থিপোতকং আনেত্ৰা মঙ্গলহত্থিট্ঠানে ঠপেত্ৰা পক্কামি। তস্স মহাসত্তং পচ্চযং কত্ৰা লদ্ধত্তা ‘‘পচ্চযো’’ত্ৰেৰ নামং করিংসু। তং পচ্চযনামকং ওপৰয্হং হত্থিনাগং আরুয্হ দানং দাতুং উপাগমিন্তি। তেন ৰুত্তং –

    Tattha anvaddhamāseti anuaddhamāse, addhamāse addhamāseti attho. Puṇṇamāseti puṇṇamāsiyaṃ, māsaparipūriyā candaparipūriyā ca samannāgate pannarase dānaṃ dātuṃ upāgaminti sambandho. Tatrāyaṃ yojanā – paccayaṃ nāgamāruyha addhamāse addhamāse dānaṃ dātuṃ dānasālaṃ upāgamiṃ, evaṃ upagacchanto ca yadā ekasmiṃ pannarase puṇṇamāsiuposathe dānaṃ dātuṃ upāgamiṃ, tadā kaliṅgaraṭṭhavisayā brāhmaṇā upagañchumanti tattha paccayaṃ nāganti paccayanāmakaṃ maṅgalahatthiṃ. Bodhisattassa hi jātadivase ekā ākāsacārinī kareṇukā abhimaṅgalasammataṃ sabbasetahatthipotakaṃ ānetvā maṅgalahatthiṭṭhāne ṭhapetvā pakkāmi. Tassa mahāsattaṃ paccayaṃ katvā laddhattā ‘‘paccayo’’tveva nāmaṃ kariṃsu. Taṃ paccayanāmakaṃ opavayhaṃ hatthināgaṃ āruyha dānaṃ dātuṃ upāgaminti. Tena vuttaṃ –

    ৮২.

    82.

    ‘‘কলিঙ্গরট্ঠৰিসযা, ব্রাহ্মণা উপগঞ্ছু মং।

    ‘‘Kaliṅgaraṭṭhavisayā, brāhmaṇā upagañchu maṃ;

    অযাচুং মং হত্থিনাগং, ধঞ্ঞং মঙ্গলসম্মতং॥

    Ayācuṃ maṃ hatthināgaṃ, dhaññaṃ maṅgalasammataṃ.

    ৮৩.

    83.

    ‘‘অৰুট্ঠিকো জনপদো, দুব্ভিক্খো ছাতকো মহা।

    ‘‘Avuṭṭhiko janapado, dubbhikkho chātako mahā;

    দদাহি পৰরং নাগং, সব্বসেতং গজুত্তম’’ন্তি॥

    Dadāhi pavaraṃ nāgaṃ, sabbasetaṃ gajuttama’’nti.

    তত্থ ‘‘কলিঙ্গরট্ঠৰিসযা’’তিআদিগাথা হেট্ঠা কুরুরাজচরিতেপি (চরিযা॰ ১.২১-২২) আগতা এৰ, তস্মা তাসং অত্থো কথামগ্গো চ তত্থ ৰুত্তনযেনেৰ ৰেদিতব্বো। ইধ পন মঙ্গলহত্থিনো সেতত্তা ‘‘সব্বসেতং গজুত্তম’’ন্তি ৰুত্তং। বোধিসত্তো হত্থিক্খন্ধৰরগতো –

    Tattha ‘‘kaliṅgaraṭṭhavisayā’’tiādigāthā heṭṭhā kururājacaritepi (cariyā. 1.21-22) āgatā eva, tasmā tāsaṃ attho kathāmaggo ca tattha vuttanayeneva veditabbo. Idha pana maṅgalahatthino setattā ‘‘sabbasetaṃ gajuttama’’nti vuttaṃ. Bodhisatto hatthikkhandhavaragato –

    ৮৪.

    84.

    ‘‘দদামি ন ৰিকম্পামি, যং মং যাচন্তি ব্রাহ্মণা।

    ‘‘Dadāmi na vikampāmi, yaṃ maṃ yācanti brāhmaṇā;

    সন্তং নপ্পটিগূহামি, দানে মে রমতে মনো’’তি॥ –

    Santaṃ nappaṭigūhāmi, dāne me ramate mano’’ti. –

    অত্তনো দানাভিরতিং পৰেদেন্তো –

    Attano dānābhiratiṃ pavedento –

    ৮৫.

    85.

    ‘‘ন মে যাচকমনুপ্পত্তে, পটিক্খেপো অনুচ্ছৰো।

    ‘‘Na me yācakamanuppatte, paṭikkhepo anucchavo;

    মা মে ভিজ্জি সমাদানং, দস্সামি ৰিপুলং গজ’’ন্তি॥ (চরিযা॰ ১.২৩) –

    Mā me bhijji samādānaṃ, dassāmi vipulaṃ gaja’’nti. (cariyā. 1.23) –

    পটিজানিত্ৰা হত্থিক্খন্ধতো ওরুয্হ অনলঙ্কতট্ঠানং ওলোকনত্থং অনুপরিযাযিত্ৰা অনলঙ্কতট্ঠানং অদিস্ৰা কুসুমমিস্সগন্ধোদকভরিতং সুৰণ্ণভিঙ্গারং গহেত্ৰা ‘‘ভোন্তো ইতো এথা’’তি অলঙ্কতরজতদামসদিসং হত্থিসোণ্ডং তেসং হত্থে ঠপেত্ৰা উদকং পাতেত্ৰা অলঙ্কতৰারণং অদাসি। তেন ৰুত্তং –

    Paṭijānitvā hatthikkhandhato oruyha analaṅkataṭṭhānaṃ olokanatthaṃ anupariyāyitvā analaṅkataṭṭhānaṃ adisvā kusumamissagandhodakabharitaṃ suvaṇṇabhiṅgāraṃ gahetvā ‘‘bhonto ito ethā’’ti alaṅkatarajatadāmasadisaṃ hatthisoṇḍaṃ tesaṃ hatthe ṭhapetvā udakaṃ pātetvā alaṅkatavāraṇaṃ adāsi. Tena vuttaṃ –

    ৮৬.

    86.

    ‘‘নাগং গহেত্ৰা সোণ্ডায, ভিঙ্গারে রতনামযে।

    ‘‘Nāgaṃ gahetvā soṇḍāya, bhiṅgāre ratanāmaye;

    জলং হত্থে আকিরিত্ৰা, ব্রাহ্মণানং অদং গজ’’ন্তি॥ (চরিযা॰ ১.২৪)।

    Jalaṃ hatthe ākiritvā, brāhmaṇānaṃ adaṃ gaja’’nti. (cariyā. 1.24);

    তত্থ সন্তন্তি ৰিজ্জমানং দেয্যধম্মং। নপ্পটিগূহামীতি ন পটিচ্ছাদেমি। যো হি অত্তনো সন্তকং ‘‘ময্হমেৰ হোতূ’’তি চিন্তেতি, যাচিতো ৰা পটিক্খিপতি, সো যাচকানং অভিমুখে ঠিতম্পি অত্থতো পটিচ্ছাদেতি নাম। মহাসত্তো পন অত্তনো সীসং আদিং কত্ৰা অজ্ঝত্তিকদানং দাতুকামোৰ, কথং বাহিরং পটিক্খিপতি, তস্মা আহ ‘‘সন্তং নপ্পটিগূহামী’’তি। তেনেৰাহ ‘‘দানে মে রমতে মনো’’তি। সেসং হেট্ঠা ৰুত্তত্থমেৰ।

    Tattha santanti vijjamānaṃ deyyadhammaṃ. Nappaṭigūhāmīti na paṭicchādemi. Yo hi attano santakaṃ ‘‘mayhameva hotū’’ti cinteti, yācito vā paṭikkhipati, so yācakānaṃ abhimukhe ṭhitampi atthato paṭicchādeti nāma. Mahāsatto pana attano sīsaṃ ādiṃ katvā ajjhattikadānaṃ dātukāmova, kathaṃ bāhiraṃ paṭikkhipati, tasmā āha ‘‘santaṃ nappaṭigūhāmī’’ti. Tenevāha ‘‘dāne me ramate mano’’ti. Sesaṃ heṭṭhā vuttatthameva.

    তস্স পন হত্থিনো চতূসু পাদেসু অলঙ্কারা চত্তারি সতসহস্সানি অগ্ঘন্তি, উভোসু পস্সেসু অলঙ্কারা দ্ৰে সতসহস্সানি, হেট্ঠা উদরে কম্বলং সতসহস্সং, পিট্ঠিযং মুত্তাজালং মণিজালং কঞ্চনজালন্তি তীণি জালানি তীণি সতসহস্সানি, উভো কণ্ণালঙ্কারা দ্ৰে সতসহস্সানি, পিট্ঠিযং অত্থতকম্বলং সতসহস্সং, কুম্ভালঙ্কারো সতসহস্সং, তযো ৰটংসকা তীণি সতসহস্সানি, কণ্ণচূল়ালঙ্কারো সতসহস্সং, দ্ৰিন্নং দন্তানং অলঙ্কারা দ্ৰে সতসহস্সানি, সোণ্ডায সোৰত্থিকালঙ্কারো সতসহস্সং, নঙ্গুট্ঠালঙ্কারো সতসহস্সং, আরোহণনিস্সেণি সতসহস্সং, ভুঞ্জনকটাহং সতসহস্সং, ঠপেত্ৰা অনগ্ঘভণ্ডং ইদং তাৰ এত্তকং চতুৰীসতি সতসহস্সানি অগ্ঘতি। ছত্তপিণ্ডিযং পন মণি, চূল়ামণি, মুত্তাহারে মণি, অঙ্কুসে মণি, হত্থিকণ্ঠৰেঠনমুত্তাহারে মণি, হত্থিকুম্ভে মণীতি ইমানি ছ অনগ্ঘানি, হত্থীপি অনগ্ঘো এৰাতি হত্থিনা সদ্ধিং সত্ত অনগ্ঘানি, তানি সব্বানি ব্রাহ্মণানং অদাসি। তথা হত্থিনো পরিচারকানি পঞ্চ কুলসতানি হত্থিমেণ্ডহত্থিগোপকেহি সদ্ধিং অদাসি। সহ দানেন পনস্স হেট্ঠা ৰুত্তনযেনেৰ ভূমিকম্পাদযো অহেসুং। তেন ৰুত্তং –

    Tassa pana hatthino catūsu pādesu alaṅkārā cattāri satasahassāni agghanti, ubhosu passesu alaṅkārā dve satasahassāni, heṭṭhā udare kambalaṃ satasahassaṃ, piṭṭhiyaṃ muttājālaṃ maṇijālaṃ kañcanajālanti tīṇi jālāni tīṇi satasahassāni, ubho kaṇṇālaṅkārā dve satasahassāni, piṭṭhiyaṃ atthatakambalaṃ satasahassaṃ, kumbhālaṅkāro satasahassaṃ, tayo vaṭaṃsakā tīṇi satasahassāni, kaṇṇacūḷālaṅkāro satasahassaṃ, dvinnaṃ dantānaṃ alaṅkārā dve satasahassāni, soṇḍāya sovatthikālaṅkāro satasahassaṃ, naṅguṭṭhālaṅkāro satasahassaṃ, ārohaṇanisseṇi satasahassaṃ, bhuñjanakaṭāhaṃ satasahassaṃ, ṭhapetvā anagghabhaṇḍaṃ idaṃ tāva ettakaṃ catuvīsati satasahassāni agghati. Chattapiṇḍiyaṃ pana maṇi, cūḷāmaṇi, muttāhāre maṇi, aṅkuse maṇi, hatthikaṇṭhaveṭhanamuttāhāre maṇi, hatthikumbhe maṇīti imāni cha anagghāni, hatthīpi anaggho evāti hatthinā saddhiṃ satta anagghāni, tāni sabbāni brāhmaṇānaṃ adāsi. Tathā hatthino paricārakāni pañca kulasatāni hatthimeṇḍahatthigopakehi saddhiṃ adāsi. Saha dānena panassa heṭṭhā vuttanayeneva bhūmikampādayo ahesuṃ. Tena vuttaṃ –

    ৮৭.

    87.

    ‘‘পুনাপরং দদন্তস্স, সব্বসেতং গজুত্তমং।

    ‘‘Punāparaṃ dadantassa, sabbasetaṃ gajuttamaṃ;

    তদাপি পথৰী কম্পি, সিনেরুৰনৰটংসকা’’তি॥

    Tadāpi pathavī kampi, sineruvanavaṭaṃsakā’’ti.

    জাতকেপি (জা॰ ২.২২.১৬৭৩) ৰুত্তং –

    Jātakepi (jā. 2.22.1673) vuttaṃ –

    ‘‘তদাসি যং ভিংসনকং, তদাসি লোমহংসনং।

    ‘‘Tadāsi yaṃ bhiṃsanakaṃ, tadāsi lomahaṃsanaṃ;

    হত্থিনাগে পদিন্নম্হি, মেদনী সম্পকম্পথা’’তি॥

    Hatthināge padinnamhi, medanī sampakampathā’’ti.

    ৮৮. তস্স নাগস্স দানেনাতি ছহি অনগ্ঘেহি সদ্ধিং চতুৰীসতিসতসহস্সগ্ঘনিকঅলঙ্কারভণ্ডসহিতস্স তস্স মঙ্গলহত্থিস্স পরিচ্চাগেন। সিৰযোতি সিৰিরাজকুমারা চেৰ সিৰিরট্ঠৰাসিনো চ। ‘‘সিৰযো’’তি চ দেসনাসীসমেতং। তত্থ হি অমচ্চা পারিসজ্জা ব্রাহ্মণগহপতিকা নেগমজানপদা নাগরা সকলরট্ঠৰাসিনো চ সঞ্জযমহারাজং ফুস্সতিদেৰিং মদ্দিদেৰিঞ্চ ঠপেত্ৰা সব্বে এৰ। কুদ্ধাতি দেৰতাৰত্তনেন বোধিসত্তস্স কুদ্ধা। সমাগতাতি সন্নিপতিতা। তে কির ব্রাহ্মণা হত্থিং লভিত্ৰা তং অভিরুহিত্ৰা মহাদ্ৰারেন পৰিসিত্ৰা নগরমজ্ঝেন পাযিংসু। মহাজনেন চ ‘‘অম্ভো ব্রাহ্মণা, অম্হাকং হত্থী কুতো অভিরুল়্হো’’তি ৰুত্তে ‘‘ৰেস্সন্তরমহারাজেন নো হত্থী দিন্নো, কে তুম্হে’’তি হত্থৰিকারাদীহি ঘট্টেন্তা অগমংসু। অথ অমচ্চে আদিং কত্ৰা মহাজনা রাজদ্ৰারে সন্নিপতিত্ৰা ‘‘রঞ্ঞা নাম ব্রাহ্মণানং ধনং ৰা ধঞ্ঞং ৰা খেত্তং ৰা ৰত্থু ৰা দাসিদাসপরিচারিকা ৰা দাতব্বা সিযা, কথঞ্হি নামাযং ৰেস্সন্তরমহারাজা রাজারহং মঙ্গলহত্থিং দস্সতি, ন ইদানি এৰং রজ্জং ৰিনাসেতুং দস্সামা’’তি উজ্ঝাযিত্ৰা সঞ্জযমহারাজস্স তমত্থং আরোচেত্ৰা তেন অনুনীযমানা অননুযন্তা অগমংসু। কেৰলং পন –

    88.Tassanāgassa dānenāti chahi anagghehi saddhiṃ catuvīsatisatasahassagghanikaalaṅkārabhaṇḍasahitassa tassa maṅgalahatthissa pariccāgena. Sivayoti sivirājakumārā ceva siviraṭṭhavāsino ca. ‘‘Sivayo’’ti ca desanāsīsametaṃ. Tattha hi amaccā pārisajjā brāhmaṇagahapatikā negamajānapadā nāgarā sakalaraṭṭhavāsino ca sañjayamahārājaṃ phussatideviṃ maddideviñca ṭhapetvā sabbe eva. Kuddhāti devatāvattanena bodhisattassa kuddhā. Samāgatāti sannipatitā. Te kira brāhmaṇā hatthiṃ labhitvā taṃ abhiruhitvā mahādvārena pavisitvā nagaramajjhena pāyiṃsu. Mahājanena ca ‘‘ambho brāhmaṇā, amhākaṃ hatthī kuto abhiruḷho’’ti vutte ‘‘vessantaramahārājena no hatthī dinno, ke tumhe’’ti hatthavikārādīhi ghaṭṭentā agamaṃsu. Atha amacce ādiṃ katvā mahājanā rājadvāre sannipatitvā ‘‘raññā nāma brāhmaṇānaṃ dhanaṃ vā dhaññaṃ vā khettaṃ vā vatthu vā dāsidāsaparicārikā vā dātabbā siyā, kathañhi nāmāyaṃ vessantaramahārājā rājārahaṃ maṅgalahatthiṃ dassati, na idāni evaṃ rajjaṃ vināsetuṃ dassāmā’’ti ujjhāyitvā sañjayamahārājassa tamatthaṃ ārocetvā tena anunīyamānā ananuyantā agamaṃsu. Kevalaṃ pana –

    ‘‘মা নং দণ্ডেন সত্থেন, ন হি সো বন্ধনারহো।

    ‘‘Mā naṃ daṇḍena satthena, na hi so bandhanāraho;

    পব্বাজেহি চ নং রট্ঠা, ৰঙ্কে ৰসতু পব্বতে’’তি॥ (জা॰ ২.২২.১৬৮৭) –

    Pabbājehi ca naṃ raṭṭhā, vaṅke vasatu pabbate’’ti. (jā. 2.22.1687) –

    ৰদিংসু। তেন ৰুত্তং –

    Vadiṃsu. Tena vuttaṃ –

    ‘‘পব্বাজেসুং সকা রট্ঠা, ৰঙ্কং গচ্ছতু পব্বত’’ন্তি॥

    ‘‘Pabbājesuṃ sakā raṭṭhā, vaṅkaṃ gacchatu pabbata’’nti.

    তত্থ পব্বাজেসুন্তি রজ্জতো বহি ৰাসত্থায উস্সুক্কমকংসু। –

    Tattha pabbājesunti rajjato bahi vāsatthāya ussukkamakaṃsu; –

    রাজাপি ‘‘মহা খো অযং পটিপক্খো, হন্দ মম পুত্তো কতিপাহং রজ্জতো বহি ৰসতূ’’তি চিন্তেত্ৰা –

    Rājāpi ‘‘mahā kho ayaṃ paṭipakkho, handa mama putto katipāhaṃ rajjato bahi vasatū’’ti cintetvā –

    ‘‘এসো চে সিৰীনং ছন্দো, ছন্দং নপ্পনুদামসে।

    ‘‘Eso ce sivīnaṃ chando, chandaṃ nappanudāmase;

    ইমং সো ৰসতু রত্তিং, কামে চ পরিভুঞ্জতু॥

    Imaṃ so vasatu rattiṃ, kāme ca paribhuñjatu.

    ‘‘ততো রত্যা ৰিৰসানে, সূরিযুগ্গমনং পতি।

    ‘‘Tato ratyā vivasāne, sūriyuggamanaṃ pati;

    সমগ্গা সিৰযো হুত্ৰা, রট্ঠা পব্বাজযন্তু ন’’ন্তি॥ (জা॰ ২.২২.১৬৮৮-১৬৮৯) –

    Samaggā sivayo hutvā, raṭṭhā pabbājayantu na’’nti. (jā. 2.22.1688-1689) –

    ৰত্ৰা পুত্তস্স সন্তিকে কত্তারং পেসেসি ‘‘ইমং পৰত্তিং মম পুত্তস্স আরোচেহী’’তি। সো তথা অকাসি।

    Vatvā puttassa santike kattāraṃ pesesi ‘‘imaṃ pavattiṃ mama puttassa ārocehī’’ti. So tathā akāsi.

    মহাসত্তোপি তং সুত্ৰা –

    Mahāsattopi taṃ sutvā –

    ‘‘কিস্মিং মে সিৰযো কুদ্ধা, নাহং পস্সামি দুক্কটং।

    ‘‘Kismiṃ me sivayo kuddhā, nāhaṃ passāmi dukkaṭaṃ;

    তং মে কত্তে ৰিযাচিক্খ, কস্মা পব্বাজযন্তি ম’’ন্তি॥ (জা॰ ২.২২.১৭০১) –

    Taṃ me katte viyācikkha, kasmā pabbājayanti ma’’nti. (jā. 2.22.1701) –

    কারণং পুচ্ছি। তেন ‘‘তুম্হাকং হত্থিদানেনা’’তি ৰুত্তে সোমনস্সপ্পত্তো হুত্ৰা –

    Kāraṇaṃ pucchi. Tena ‘‘tumhākaṃ hatthidānenā’’ti vutte somanassappatto hutvā –

    ‘‘হদযং চক্খুম্পহং দজ্জং, কিং মে বাহিরকং ধনং।

    ‘‘Hadayaṃ cakkhumpahaṃ dajjaṃ, kiṃ me bāhirakaṃ dhanaṃ;

    হিরঞ্ঞং ৰা সুৰণ্ণং ৰা, মুত্তা ৰেল়ুরিযা মণি॥

    Hiraññaṃ vā suvaṇṇaṃ vā, muttā veḷuriyā maṇi.

    ‘‘দক্খিণং ৰাপহং বাহুং, দিস্ৰা যাচকমাগতে।

    ‘‘Dakkhiṇaṃ vāpahaṃ bāhuṃ, disvā yācakamāgate;

    দদেয্যং ন ৰিকম্পেয্যং, দানে মে রমতে মনো॥

    Dadeyyaṃ na vikampeyyaṃ, dāne me ramate mano.

    ‘‘কামং মং সিৰযো সব্বে, পব্বাজেন্তু হনন্তু ৰা।

    ‘‘Kāmaṃ maṃ sivayo sabbe, pabbājentu hanantu vā;

    নেৰ দানা ৰিরমিস্সং, কামং ছিন্দন্তু সত্তধা’’তি॥ (জা॰ ২.২২.১৭০৩-১৭০৫) –

    Neva dānā viramissaṃ, kāmaṃ chindantu sattadhā’’ti. (jā. 2.22.1703-1705) –

    ৰত্ৰা ‘‘নাগরা মে একদিৰসং দানং দাতুং ওকাসং দেন্তু, স্ৰে দানং দত্ৰা ততিযদিৰসে গমিস্সামী’’তি ৰত্ৰা কত্তারং তেসং সন্তিকে পেসেত্ৰা ‘‘অহং স্ৰে সত্তসতকং নাম মহাদানং দস্সামি , সত্তহত্থিসতানি সত্তঅস্সসতানি সত্তরথসতানি সত্তইত্থিসতানি সত্তদাসসতানি সত্তদাসিসতানি সত্তধেনুসতানি পটিযাদেহি, নানপ্পকারঞ্চ অন্নপানাদিং সব্বং দাতব্বযুত্তকং উপট্ঠপেহী’’তি সব্বকম্মিকং অমচ্চং আণাপেত্ৰা এককোৰ মদ্দিদেৰিযা ৰসনট্ঠানং গন্ত্ৰা ‘‘ভদ্দে মদ্দি, অনুগামিকনিধিং নিদহমানা, সীলৰন্তেসু দদেয্যাসী’’তি তম্পি দানে নিযোজেত্ৰা তস্সা অত্তনো গমনকারণং আচিক্খিত্ৰা ‘‘অহং ৰনং ৰসনত্থায গমিস্সামি, ত্ৰং ইধেৰ অনুক্কণ্ঠিতা ৰসাহী’’তি আহ। সা ‘‘নাহং, মহারাজ, তুম্হেহি ৰিনা একদিৰসম্পি ৰসিস্সামী’’তি আহ।

    Vatvā ‘‘nāgarā me ekadivasaṃ dānaṃ dātuṃ okāsaṃ dentu, sve dānaṃ datvā tatiyadivase gamissāmī’’ti vatvā kattāraṃ tesaṃ santike pesetvā ‘‘ahaṃ sve sattasatakaṃ nāma mahādānaṃ dassāmi , sattahatthisatāni sattaassasatāni sattarathasatāni sattaitthisatāni sattadāsasatāni sattadāsisatāni sattadhenusatāni paṭiyādehi, nānappakārañca annapānādiṃ sabbaṃ dātabbayuttakaṃ upaṭṭhapehī’’ti sabbakammikaṃ amaccaṃ āṇāpetvā ekakova maddideviyā vasanaṭṭhānaṃ gantvā ‘‘bhadde maddi, anugāmikanidhiṃ nidahamānā, sīlavantesu dadeyyāsī’’ti tampi dāne niyojetvā tassā attano gamanakāraṇaṃ ācikkhitvā ‘‘ahaṃ vanaṃ vasanatthāya gamissāmi, tvaṃ idheva anukkaṇṭhitā vasāhī’’ti āha. Sā ‘‘nāhaṃ, mahārāja, tumhehi vinā ekadivasampi vasissāmī’’ti āha.

    দুতিযদিৰসে সত্তসতকং মহাদানং পৰত্তেসি। তস্স সত্তসতকং দানং দেন্তস্সেৰ সাযং অহোসি। অলঙ্কতরথেন মাতাপিতূনং ৰসনট্ঠানং গন্ত্ৰা ‘‘অহং স্ৰে গমিস্সামী’’তি তে আপুচ্ছিত্ৰা অকামকানং তেসং অস্সুমুখানং রোদন্তানংযেৰ ৰন্দিত্ৰা পদক্খিণং কত্ৰা ততো নিক্খমিত্ৰা তং দিৰসং অত্তনো নিৰেসনে ৰসিত্ৰা পুনদিৰসে ‘‘গমিস্সামী’’তি পাসাদতো ওতরি। মদ্দিদেৰী সস্সুসসুরেহি নানানযেহি যাচিত্ৰা নিৰত্তিযমানাপি তেসং ৰচনং অনাদিযিত্ৰা তে ৰন্দিত্ৰা পদক্খিণং কত্ৰা সেসিত্থিযো অপলোকেত্ৰা দ্ৰে পুত্তে আদায ৰেস্সন্তরস্স পঠমতরং গন্ত্ৰা রথে অট্ঠাসি।

    Dutiyadivase sattasatakaṃ mahādānaṃ pavattesi. Tassa sattasatakaṃ dānaṃ dentasseva sāyaṃ ahosi. Alaṅkatarathena mātāpitūnaṃ vasanaṭṭhānaṃ gantvā ‘‘ahaṃ sve gamissāmī’’ti te āpucchitvā akāmakānaṃ tesaṃ assumukhānaṃ rodantānaṃyeva vanditvā padakkhiṇaṃ katvā tato nikkhamitvā taṃ divasaṃ attano nivesane vasitvā punadivase ‘‘gamissāmī’’ti pāsādato otari. Maddidevī sassusasurehi nānānayehi yācitvā nivattiyamānāpi tesaṃ vacanaṃ anādiyitvā te vanditvā padakkhiṇaṃ katvā sesitthiyo apaloketvā dve putte ādāya vessantarassa paṭhamataraṃ gantvā rathe aṭṭhāsi.

    মহাপুরিসো রথং অভিরুহিত্ৰা রথে ঠিতো মহাজনং আপুচ্ছিত্ৰা ‘‘অপ্পমত্তা দানাদীনি পুঞ্ঞানি করোথা’’তি ওৰাদমস্স দত্ৰা নগরতো নিক্খমি। বোধিসত্তস্স মাতা ‘‘পুত্তো মে দানৰিত্তকো দানং দেতূ’’তি আভরণেহি সদ্ধিং সত্তরতনপূরানি সকটানি উভোসু পস্সেসু পেসেসি। সোপি অত্তনো কাযারুল়্হমেৰ আভরণভণ্ডং সম্পত্তযাচকানং অট্ঠারস ৰারে দত্ৰা সেসং সব্বমদাসি। নগরা নিক্খমিত্ৰাৰ নিৰত্তিত্ৰা ওলোকেতুকামো অহোসি। অথস্স পুঞ্ঞানুভাৰেন রথপ্পমাণে ঠানে মহাপথৰী ভিজ্জিত্ৰা পরিৰত্তিত্ৰা রথং নগরাভিমুখং অকাসি। সো মাতাপিতূনং ৰসনট্ঠানং ওলোকেসি। তেন কারুঞ্ঞেন পথৰিকম্পো অহোসি। তেন ৰুত্তং ‘‘তেসং নিচ্ছুভমানান’’ন্তিআদি।

    Mahāpuriso rathaṃ abhiruhitvā rathe ṭhito mahājanaṃ āpucchitvā ‘‘appamattā dānādīni puññāni karothā’’ti ovādamassa datvā nagarato nikkhami. Bodhisattassa mātā ‘‘putto me dānavittako dānaṃ detū’’ti ābharaṇehi saddhiṃ sattaratanapūrāni sakaṭāni ubhosu passesu pesesi. Sopi attano kāyāruḷhameva ābharaṇabhaṇḍaṃ sampattayācakānaṃ aṭṭhārasa vāre datvā sesaṃ sabbamadāsi. Nagarā nikkhamitvāva nivattitvā oloketukāmo ahosi. Athassa puññānubhāvena rathappamāṇe ṭhāne mahāpathavī bhijjitvā parivattitvā rathaṃ nagarābhimukhaṃ akāsi. So mātāpitūnaṃ vasanaṭṭhānaṃ olokesi. Tena kāruññena pathavikampo ahosi. Tena vuttaṃ ‘‘tesaṃ nicchubhamānāna’’ntiādi.

    ৮৯-৯০. তত্থ নিচ্ছুভমানানন্তি তেসু সিৰীসু নিক্কড্ঢন্তেসু, পব্বাজেন্তেসূতি অত্থো। তেসং ৰা নিক্খমন্তানং। মহাদানং পৰত্তেতুন্তি সত্তসতকমহাদানং দাতুং। আযাচিস্সন্তি যাচিং। সাৰযিত্ৰাতি ঘোসাপেত্ৰা। কণ্ণভেরিন্তি যুগলমহাভেরিং। দদামহন্তি দদামি অহং।

    89-90. Tattha nicchubhamānānanti tesu sivīsu nikkaḍḍhantesu, pabbājentesūti attho. Tesaṃ vā nikkhamantānaṃ. Mahādānaṃ pavattetunti sattasatakamahādānaṃ dātuṃ. Āyācissanti yāciṃ. Sāvayitvāti ghosāpetvā. Kaṇṇabherinti yugalamahābheriṃ. Dadāmahanti dadāmi ahaṃ.

    ৯১. অথেত্থাতি অথেৰং দানে দীযমানে এতস্মিং দানগ্গে। তুমূলোতি এককোলাহলীভূতো। ভেরৰোতি ভযাৰহো। মহাসত্তঞ্হি ঠপেত্ৰা অঞ্ঞেসং সো ভযং জনেতি, তস্স ভযজননাকারং দস্সেতুং। ‘‘দানেনিম’’ন্তিআদি ৰুত্তং। ইমং ৰেস্সন্তরমহারাজানং দানেন হেতুনা সিৰযো রট্ঠতো নীহরন্তি পব্বাজেন্তি, তথাপি পুন চ এৰরূপং দানং দেতি অযন্তি।

    91.Athetthāti athevaṃ dāne dīyamāne etasmiṃ dānagge. Tumūloti ekakolāhalībhūto. Bheravoti bhayāvaho. Mahāsattañhi ṭhapetvā aññesaṃ so bhayaṃ janeti, tassa bhayajananākāraṃ dassetuṃ. ‘‘Dānenima’’ntiādi vuttaṃ. Imaṃ vessantaramahārājānaṃ dānena hetunā sivayo raṭṭhato nīharanti pabbājenti, tathāpi puna ca evarūpaṃ dānaṃ deti ayanti.

    ৯২-৯৪. ইদানি তং দানং দস্সেতুং ‘‘হত্থি’’ন্তি গাথমাহ। তত্থ গৰন্তি ধেনুং। চতুৰাহিং রথং দত্ৰাতি ৰহন্তীতি ৰাহিনো, অস্সা, চতুরো আজঞ্ঞসিন্ধৰে রথঞ্চ ব্রাহ্মণানং দত্ৰাতি অত্থো। মহাসত্তো হি তথা নগরতো নিক্খমন্তো সহজাতে সট্ঠিসহস্সে অমচ্চে সেসজনঞ্চ অস্সুপুণ্ণমুখং অনুবদ্ধন্তং নিৰত্তেত্ৰা রথং পাজেন্তো মদ্দিং আহ – ‘‘সচে, ভদ্দে, পচ্ছতো যাচকা আগচ্ছন্তি, উপধারেয্যাসী’’তি। সা ওলোকেন্তী নিসীদি। অথস্স সত্তসতকমহাদানং গমনকালে কতদানঞ্চ সম্পাপুণিতুং অসক্কোন্তা চত্তারো ব্রাহ্মণা আগন্ত্ৰা ‘‘ৰেস্সন্তরো কুহি’’ন্তি পুচ্ছিত্ৰা ‘‘দানং দত্ৰা রথেন গতো’’তি ৰুত্তে ‘‘অস্সে যাচিস্সামা’’তি অনুবন্ধিংসু। মদ্দী তে আগচ্ছন্তে দিস্ৰা ‘‘যাচকা, দেৰা’’তি আরোচেসি। মহাসত্তো রথং ঠপেসি। তে আগন্ত্ৰা অস্সে যাচিংসু। মহাসত্তো অস্সে অদাসি। তে তে গহেত্ৰা গতা। অস্সেসু পন দিন্নেসু রথধুরং আকাসেযেৰ অট্ঠাসি। অথ চত্তারো দেৰপুত্তা রোহিতমিগৰণ্ণেনাগন্ত্ৰা রথধুরং সম্পটিচ্ছিত্ৰা অগমংসু। মহাসত্তো তেসং দেৰপুত্তভাৰং ঞত্ৰা –

    92-94. Idāni taṃ dānaṃ dassetuṃ ‘‘hatthi’’nti gāthamāha. Tattha gavanti dhenuṃ. Catuvāhiṃ rathaṃ datvāti vahantīti vāhino, assā, caturo ājaññasindhave rathañca brāhmaṇānaṃ datvāti attho. Mahāsatto hi tathā nagarato nikkhamanto sahajāte saṭṭhisahasse amacce sesajanañca assupuṇṇamukhaṃ anubaddhantaṃ nivattetvā rathaṃ pājento maddiṃ āha – ‘‘sace, bhadde, pacchato yācakā āgacchanti, upadhāreyyāsī’’ti. Sā olokentī nisīdi. Athassa sattasatakamahādānaṃ gamanakāle katadānañca sampāpuṇituṃ asakkontā cattāro brāhmaṇā āgantvā ‘‘vessantaro kuhi’’nti pucchitvā ‘‘dānaṃ datvā rathena gato’’ti vutte ‘‘asse yācissāmā’’ti anubandhiṃsu. Maddī te āgacchante disvā ‘‘yācakā, devā’’ti ārocesi. Mahāsatto rathaṃ ṭhapesi. Te āgantvā asse yāciṃsu. Mahāsatto asse adāsi. Te te gahetvā gatā. Assesu pana dinnesu rathadhuraṃ ākāseyeva aṭṭhāsi. Atha cattāro devaputtā rohitamigavaṇṇenāgantvā rathadhuraṃ sampaṭicchitvā agamaṃsu. Mahāsatto tesaṃ devaputtabhāvaṃ ñatvā –

    ‘‘ইঙ্ঘ মদ্দি নিসামেহি, চিত্তরূপংৰ দিস্সতি।

    ‘‘Iṅgha maddi nisāmehi, cittarūpaṃva dissati;

    মিগরোহিচ্চৰণ্ণেন, দক্খিণস্সা ৰহন্তি ম’’ন্তি॥ (জা॰ ২.২২.১৮৬৪) –

    Migarohiccavaṇṇena, dakkhiṇassā vahanti ma’’nti. (jā. 2.22.1864) –

    মদ্দিযা আহ।

    Maddiyā āha.

    তত্থ চিত্তরূপংৰাতি অচ্ছরিযরূপং ৰিয। দক্খিণস্সাতি সুসিক্খিতঅস্সা ৰিয মং ৰহন্তি।

    Tattha cittarūpaṃvāti acchariyarūpaṃ viya. Dakkhiṇassāti susikkhitaassā viya maṃ vahanti.

    অথ নং এৰং গচ্ছন্তং অপরো ব্রাহ্মণো আগন্ত্ৰা রথং যাচি। মহাসত্তো পুত্তদারং ওতারেত্ৰা রথং অদাসি। রথে পন দিন্নে দেৰপুত্তা অন্তরধাযিংসু। ততো পট্ঠায পন সব্বেপি পত্তিকাৰ অহেসুং। অথ মহাসত্তো ‘‘মদ্দি, ত্ৰং কণ্হাজিনং গণ্হাহি, অহং জালিকুমারং গণ্হামী’’তি উভোপি দ্ৰে দারকে অঙ্কেনাদায অঞ্ঞমঞ্ঞং পিযসল্লাপা পটিপথং আগচ্ছন্তে মনুস্সে ৰঙ্কপব্বতস্স মগ্গং পুচ্ছন্তা সযমেৰ ওনতেসু ফলরুক্খেসু ফলানি দারকানং দদন্তা অত্থকামাহি দেৰতাহি মগ্গস্স সঙ্খিপিতত্তা তদহেৰ চেতরট্ঠং সম্পাপুণিংসু। তেন ৰুত্তং ‘‘চতুৰাহিং রথং দত্ৰা’’তিআদি।

    Atha naṃ evaṃ gacchantaṃ aparo brāhmaṇo āgantvā rathaṃ yāci. Mahāsatto puttadāraṃ otāretvā rathaṃ adāsi. Rathe pana dinne devaputtā antaradhāyiṃsu. Tato paṭṭhāya pana sabbepi pattikāva ahesuṃ. Atha mahāsatto ‘‘maddi, tvaṃ kaṇhājinaṃ gaṇhāhi, ahaṃ jālikumāraṃ gaṇhāmī’’ti ubhopi dve dārake aṅkenādāya aññamaññaṃ piyasallāpā paṭipathaṃ āgacchante manusse vaṅkapabbatassa maggaṃ pucchantā sayameva onatesu phalarukkhesu phalāni dārakānaṃ dadantā atthakāmāhi devatāhi maggassa saṅkhipitattā tadaheva cetaraṭṭhaṃ sampāpuṇiṃsu. Tena vuttaṃ ‘‘catuvāhiṃ rathaṃ datvā’’tiādi.

    তত্থ ঠত্ৰা চাতুম্মহাপথেতি অত্তনো গমনমগ্গেন পস্সতো আগতেন তেন ব্রাহ্মণেন আগতমগ্গেন চ ৰিনিৰিজ্ঝিত্ৰা গতট্ঠানত্তা চতুক্কসঙ্খাতে চতুমহাপথে ঠত্ৰা তস্স ব্রাহ্মণস্স রথং দত্ৰা। একাকিযোতি অমচ্চসেৰকাদিসহাযাভাৰেন এককো। তেনেৰাহ ‘‘অদুতিযো’’তি। মদ্দিদেৰিং ইদমব্রৰীতি মদ্দিদেৰিং ইদং অভাসি।

    Tattha ṭhatvā cātummahāpatheti attano gamanamaggena passato āgatena tena brāhmaṇena āgatamaggena ca vinivijjhitvā gataṭṭhānattā catukkasaṅkhāte catumahāpathe ṭhatvā tassa brāhmaṇassa rathaṃ datvā. Ekākiyoti amaccasevakādisahāyābhāvena ekako. Tenevāha ‘‘adutiyo’’ti. Maddideviṃ idamabravīti maddideviṃ idaṃ abhāsi.

    ৯৬-৯৯. পদুমং পুণ্ডরীকংৰাতি পদুমং ৰিয, পুণ্ডরীকং ৰিয চ। কণ্হাজিনগ্গহীতি কণ্হাজিনং অগ্গহেসি। অভিজাতাতি জাতিসম্পন্না। ৰিসমং সমন্তি ৰিসমং সমঞ্চ ভূমিপ্পদেসং। এন্তীতি আগচ্ছন্তি। অনুমগ্গে পটিপ্পথেতি অনুমগ্গে ৰা পটিপথে ৰাতি ৰা-সদ্দস্স লোপো দট্ঠব্বো। করুণন্তি ভাৰনপুংসকনিদ্দেসো, করুণাযিতত্তন্তি অত্থো। দুক্খং তে পটিৰেদেন্তীতি ইমে এৰং সুখুমালা পদসা গচ্ছন্তি, দূরেৰ ইতো ৰঙ্কপব্বতোতি তে তদা অম্হেসু কারুঞ্ঞৰসেন অত্তনা দুক্খং পটিলভন্তি, তথা অত্তনো উপ্পন্নদুক্খং পটিৰেদেন্তি ৰাতি অত্থো।

    96-99.Padumaṃ puṇḍarīkaṃvāti padumaṃ viya, puṇḍarīkaṃ viya ca. Kaṇhājinaggahīti kaṇhājinaṃ aggahesi. Abhijātāti jātisampannā. Visamaṃ samanti visamaṃ samañca bhūmippadesaṃ. Entīti āgacchanti. Anumagge paṭippatheti anumagge vā paṭipathe vāti vā-saddassa lopo daṭṭhabbo. Karuṇanti bhāvanapuṃsakaniddeso, karuṇāyitattanti attho. Dukkhaṃ te paṭivedentīti ime evaṃ sukhumālā padasā gacchanti, dūreva ito vaṅkapabbatoti te tadā amhesu kāruññavasena attanā dukkhaṃ paṭilabhanti, tathā attano uppannadukkhaṃ paṭivedenti vāti attho.

    ১০০-১. পৰনেতি মহাৰনে। ফলিনেতি ফলৰন্তে। উব্বিদ্ধাতি উদ্ধং উগ্গতা উচ্চা। উপগচ্ছন্তি দারকেতি যথা ফলানি দারকানং হত্থূপগয্হকানি হোন্তি, এৰং রুক্খা সযমেৰ সাখাহি ওনমিত্ৰা দারকে উপেন্তি।

    100-1.Pavaneti mahāvane. Phalineti phalavante. Ubbiddhāti uddhaṃ uggatā uccā. Upagacchanti dāraketi yathā phalāni dārakānaṃ hatthūpagayhakāni honti, evaṃ rukkhā sayameva sākhāhi onamitvā dārake upenti.

    ১০২. অচ্ছরিযন্তি অচ্ছরাযোগ্গং, অচ্ছরং পহরিতুং যুত্তং। অভূতপুব্বং ভূতন্তি অব্ভুতং। লোমানং হংসনসমত্থতায লোমহংসনং। সাহুকারন্তি সাধুকারং, অযমেৰ ৰা পাঠো। ইত্থিরতনভাৰেন সব্বেহি অঙ্গেহি অৰযৰেহি সোভতীতি সব্বঙ্গসোভনা।

    102.Acchariyanti accharāyoggaṃ, accharaṃ paharituṃ yuttaṃ. Abhūtapubbaṃ bhūtanti abbhutaṃ. Lomānaṃ haṃsanasamatthatāya lomahaṃsanaṃ. Sāhukāranti sādhukāraṃ, ayameva vā pāṭho. Itthiratanabhāvena sabbehi aṅgehi avayavehi sobhatīti sabbaṅgasobhanā.

    ১০৩-৪. অচ্ছেরং ৰতাতি অচ্ছরিযং ৰত। ৰেস্সন্তরস্স তেজেনাতি ৰেস্সন্তরস্স পুঞ্ঞানুভাৰেন। সঙ্খিপিংসু পথং যক্খাতি দেৰতা মহাসত্তস্স পুঞ্ঞতেজেন চোদিতা তং মগ্গং পরিক্খযং পাপেসুং, অপ্পকং অকংসু, তং পন দারকেসু করুণায কতং ৰিয কত্ৰা ৰুত্তং ‘‘অনুকম্পায দারকে’’তি। জেতুত্তরনগরতো হি সুৰণ্ণগিরিতালো নাম পব্বতো পঞ্চ যোজনানি, ততো কোন্তিমারা নাম নদী পঞ্চ যোজনানি, ততো মারঞ্জনাগিরি নাম পব্বতো পঞ্চ যোজনানি, ততো দণ্ডব্রাহ্মণগামো নাম পঞ্চ যোজনানি, ততো মাতুলনগরং দস যোজনানি, ইতি তং রট্ঠং জেতুত্তরনগরতো তিংস যোজনানি হোতি। দেৰতা বোধিসত্তস্স পুঞ্ঞতেজেন চোদিতা মগ্গং পরিক্খযং পাপেসুং। তং সব্বং একাহেনেৰ অতিক্কমিংসু। তেন ৰুত্তং ‘‘নিক্খন্তদিৰসেনেৰ, চেতরট্ঠমুপাগমু’’ন্তি।

    103-4.Accheraṃ vatāti acchariyaṃ vata. Vessantarassa tejenāti vessantarassa puññānubhāvena. Saṅkhipiṃsu pathaṃ yakkhāti devatā mahāsattassa puññatejena coditā taṃ maggaṃ parikkhayaṃ pāpesuṃ, appakaṃ akaṃsu, taṃ pana dārakesu karuṇāya kataṃ viya katvā vuttaṃ ‘‘anukampāya dārake’’ti. Jetuttaranagarato hi suvaṇṇagiritālo nāma pabbato pañca yojanāni, tato kontimārā nāma nadī pañca yojanāni, tato mārañjanāgiri nāma pabbato pañca yojanāni, tato daṇḍabrāhmaṇagāmo nāma pañca yojanāni, tato mātulanagaraṃ dasa yojanāni, iti taṃ raṭṭhaṃ jetuttaranagarato tiṃsa yojanāni hoti. Devatā bodhisattassa puññatejena coditā maggaṃ parikkhayaṃ pāpesuṃ. Taṃ sabbaṃ ekāheneva atikkamiṃsu. Tena vuttaṃ ‘‘nikkhantadivaseneva, cetaraṭṭhamupāgamu’’nti.

    এৰং মহাসত্তো সাযন্হসমযং চেতরট্ঠে মাতুলনগরং পত্ৰা তস্স নগরস্স দ্ৰারসমীপে সালাযং নিসীদি। অথস্স মদ্দিদেৰী পাদেসু রজং পুঞ্ছিত্ৰা পাদে সম্বাহিত্ৰা ‘‘ৰেস্সন্তরস্স আগতভাৰং জানাপেস্সামী’’তি সালতো নিক্খমিত্ৰা তস্স চক্খুপথে সালদ্ৰারে অট্ঠাসি। নগরং পৰিসন্তিযো চ নিক্খমন্তিযো চ ইত্থিযো তং দিস্ৰা পরিৰারেসুং। মহাজনো তঞ্চ ৰেস্সন্তরঞ্চ পুত্তে চস্স তথা আগতে দিস্ৰা রাজূনং আচিক্খি। সট্ঠিসহস্সা রাজানো রোদন্তা পরিদেৰন্তা তস্স সন্তিকং আগন্ত্ৰা মগ্গপরিস্সমং ৰিনোদেত্ৰা তথা আগমনকারণং পুচ্ছিংসু।

    Evaṃ mahāsatto sāyanhasamayaṃ cetaraṭṭhe mātulanagaraṃ patvā tassa nagarassa dvārasamīpe sālāyaṃ nisīdi. Athassa maddidevī pādesu rajaṃ puñchitvā pāde sambāhitvā ‘‘vessantarassa āgatabhāvaṃ jānāpessāmī’’ti sālato nikkhamitvā tassa cakkhupathe sāladvāre aṭṭhāsi. Nagaraṃ pavisantiyo ca nikkhamantiyo ca itthiyo taṃ disvā parivāresuṃ. Mahājano tañca vessantarañca putte cassa tathā āgate disvā rājūnaṃ ācikkhi. Saṭṭhisahassā rājāno rodantā paridevantā tassa santikaṃ āgantvā maggaparissamaṃ vinodetvā tathā āgamanakāraṇaṃ pucchiṃsu.

    মহাসত্তো হত্থিদানং আদিং কত্ৰা সব্বং কথেসি। তং সুত্ৰা তে অত্তনো রজ্জেন নিমন্তযিংসু। মহাপুরিসো ‘‘মযা তুম্হাকং রজ্জং পটিগ্গহিতমেৰ হোতু, রাজা পন মং রট্ঠা পব্বাজেতি, তস্মা ৰঙ্কপব্বতমেৰ গমিস্সামী’’তি ৰত্ৰা তেহি নানপ্পকারং তত্থ ৰাসং যাচিযমানোপি তং অনলঙ্করিত্ৰা তেহি গহিতারক্খো তং রত্তিং সালাযমেৰ ৰসিত্ৰা পুনদিৰসে পাতোৰ নানগ্গরসভোজনং ভুঞ্জিত্ৰা তেহি পরিৰুতো নিক্খমিত্ৰা পন্নরসযোজনমগ্গং গন্ত্ৰা ৰনদ্ৰারে ঠত্ৰা তে নিৰত্তেত্ৰা পুরতো পন্নরসযোজনমগ্গং তেহি আচিক্খিতনিযামেনেৰ অগমাসি। তেন ৰুত্তং –

    Mahāsatto hatthidānaṃ ādiṃ katvā sabbaṃ kathesi. Taṃ sutvā te attano rajjena nimantayiṃsu. Mahāpuriso ‘‘mayā tumhākaṃ rajjaṃ paṭiggahitameva hotu, rājā pana maṃ raṭṭhā pabbājeti, tasmā vaṅkapabbatameva gamissāmī’’ti vatvā tehi nānappakāraṃ tattha vāsaṃ yāciyamānopi taṃ analaṅkaritvā tehi gahitārakkho taṃ rattiṃ sālāyameva vasitvā punadivase pātova nānaggarasabhojanaṃ bhuñjitvā tehi parivuto nikkhamitvā pannarasayojanamaggaṃ gantvā vanadvāre ṭhatvā te nivattetvā purato pannarasayojanamaggaṃ tehi ācikkhitaniyāmeneva agamāsi. Tena vuttaṃ –

    ১০৫.

    105.

    ‘‘সট্ঠিরাজসহস্সানি, তদা ৰসন্তি মাতুলে।

    ‘‘Saṭṭhirājasahassāni, tadā vasanti mātule;

    সব্বে পঞ্জলিকা হুত্ৰা, রোদমানা উপাগমুং॥

    Sabbe pañjalikā hutvā, rodamānā upāgamuṃ.

    ১০৬.

    106.

    ‘‘তত্থ ৰত্তেত্ৰা সল্লাপং, চেতেহি চেতপুত্তেহি।

    ‘‘Tattha vattetvā sallāpaṃ, cetehi cetaputtehi;

    তে ততো নিক্খমিত্ৰান, ৰঙ্কং অগমু পব্বত’’ন্তি॥

    Te tato nikkhamitvāna, vaṅkaṃ agamu pabbata’’nti.

    তত্থ তত্থ ৰত্তেত্ৰা সল্লাপন্তি তত্থ তেহি রাজূহি সমাগমেহি সদ্ধিং পটিসম্মোদমানা কথং পৰত্তেত্ৰা। চেতপুত্তেহীতি চেতরাজপুত্তেহি। তে ততো নিক্খমিত্ৰানাতি তে রাজানো ততো ৰনদ্ৰারট্ঠানে নিৰত্তেত্ৰা। ৰঙ্কং অগমু পব্বতন্তি অম্হে চত্তারো জনা ৰঙ্কপব্বতং উদ্দিস্স অগমম্হা।

    Tattha tattha vattetvā sallāpanti tattha tehi rājūhi samāgamehi saddhiṃ paṭisammodamānā kathaṃ pavattetvā. Cetaputtehīti cetarājaputtehi. Te tato nikkhamitvānāti te rājāno tato vanadvāraṭṭhāne nivattetvā. Vaṅkaṃ agamu pabbatanti amhe cattāro janā vaṅkapabbataṃ uddissa agamamhā.

    অথ মহাসত্তো তেহি আচিক্খিতমগ্গেন গচ্ছন্তো গন্ধমাদনপব্বতং পত্ৰা তং দিৰসং তত্থ ৰসিত্ৰা ততো উত্তরদিসাভিমুখো ৰেপুল্লপব্বতপাদেন গন্ত্ৰা কেতুমতীনদীতীরে নিসীদিত্ৰা ৰনচরকেন দিন্নং মধুমংসং খাদিত্ৰা তস্স সুৰণ্ণসূচিং দত্ৰা ন্হত্ৰা পিৰিত্ৰা পটিপ্পস্সদ্ধদরথো নদিং উত্তরিত্ৰা সানুপব্বতসিখরে ঠিতস্স নিগ্রোধস্স মূলে থোকং নিসীদিত্ৰা উট্ঠায গচ্ছন্তো নালিকপব্বতং পরিহরন্তো মুচলিন্দসরং গন্ত্ৰা সরতীরেন পুব্বুত্তরকণ্ণং পত্ৰা একপদিকমগ্গেনেৰ ৰনঘটং পৰিসিত্ৰা তং অতিক্কম্ম গিরিৰিদুগ্গানং নদীপভৰানং পুরতো চতুরস্সপোক্খরণিং পাপুণি।

    Atha mahāsatto tehi ācikkhitamaggena gacchanto gandhamādanapabbataṃ patvā taṃ divasaṃ tattha vasitvā tato uttaradisābhimukho vepullapabbatapādena gantvā ketumatīnadītīre nisīditvā vanacarakena dinnaṃ madhumaṃsaṃ khāditvā tassa suvaṇṇasūciṃ datvā nhatvā pivitvā paṭippassaddhadaratho nadiṃ uttaritvā sānupabbatasikhare ṭhitassa nigrodhassa mūle thokaṃ nisīditvā uṭṭhāya gacchanto nālikapabbataṃ pariharanto mucalindasaraṃ gantvā saratīrena pubbuttarakaṇṇaṃ patvā ekapadikamaggeneva vanaghaṭaṃ pavisitvā taṃ atikkamma girividuggānaṃ nadīpabhavānaṃ purato caturassapokkharaṇiṃ pāpuṇi.

    ১০৭. তস্মিং খণে সক্কো আৰজ্জেন্তো ‘‘মহাসত্তো হিমৰন্তং পৰিট্ঠো, ৰসনট্ঠানং লদ্ধুং ৰট্টতী’’তি চিন্তেত্ৰা ৰিস্সকম্মং পেসেসি – ‘‘গচ্ছ ৰঙ্কপব্বতকুচ্ছিম্হি রমণীযে ঠানে অস্সমপদং মাপেহী’’তি। সো তত্থ দ্ৰে পণ্ণসালাযো দ্ৰে চঙ্কমে দ্ৰে চ রত্তিট্ঠানদিৰাট্ঠানানি মাপেত্ৰা তেসু তেসু ঠানেসু নানাপুপ্ফৰিচিত্তে রুক্খে ফলিতে রুক্খে পুপ্ফগচ্ছে কদলিৰনাদীনি চ দস্সেত্ৰা সব্বে পব্বজিতপরিক্খারে পটিযাদেত্ৰা ‘‘যেকেচি পব্বজিতুকামা, তে গণ্হন্তূ’’তি অক্খরানি লিখিত্ৰা অমনুস্সে চ ভেরৰসদ্দে মিগপক্খিনো চ পটিক্কমাপেত্ৰা সকট্ঠানমেৰ গতো।

    107. Tasmiṃ khaṇe sakko āvajjento ‘‘mahāsatto himavantaṃ paviṭṭho, vasanaṭṭhānaṃ laddhuṃ vaṭṭatī’’ti cintetvā vissakammaṃ pesesi – ‘‘gaccha vaṅkapabbatakucchimhi ramaṇīye ṭhāne assamapadaṃ māpehī’’ti. So tattha dve paṇṇasālāyo dve caṅkame dve ca rattiṭṭhānadivāṭṭhānāni māpetvā tesu tesu ṭhānesu nānāpupphavicitte rukkhe phalite rukkhe pupphagacche kadalivanādīni ca dassetvā sabbe pabbajitaparikkhāre paṭiyādetvā ‘‘yekeci pabbajitukāmā, te gaṇhantū’’ti akkharāni likhitvā amanusse ca bheravasadde migapakkhino ca paṭikkamāpetvā sakaṭṭhānameva gato.

    মহাসত্তো একপদিকমগ্গং দিস্ৰা ‘‘পব্বজিতানং ৰসনট্ঠানং ভৰিস্সতী’’তি মদ্দিঞ্চ পুত্তে চ তত্থেৰ ঠপেত্ৰা অস্সমপদং পৰিসিত্ৰা অক্খরানি ওলোকেত্ৰা ‘‘সক্কেন দিন্নোস্মী’’তি পণ্ণসালদ্ৰারং ৰিৰরিত্ৰা পৰিট্ঠো খগ্গঞ্চ ধনুঞ্চ অপনেত্ৰা সাটকে ওমুঞ্চিত্ৰা ইসিৰেসং গহেত্ৰা কত্তরদণ্ডং আদায নিক্খমিত্ৰা পচ্চেকবুদ্ধসদিসেন উপসমেন দারকানং সন্তিকং অগমাসি। মদ্দিদেৰীপি মহাসত্তং দিস্ৰা পাদেসু পতিত্ৰা রোদিত্ৰা তেনেৰ সদ্ধিং অস্সমং পৰিসিত্ৰা অত্তনো পণ্ণসালং গন্ত্ৰা ইসিৰেসং গণ্হি। পচ্ছা পুত্তেপি তাপসকুমারকে করিংসু। বোধিসত্তো মদ্দিং ৰরং যাচি ‘‘মযং ইতো পট্ঠায পব্বজিতা নাম, ইত্থী চ নাম ব্রহ্মচরিযস্স মলং, মা দানি অকালে মম সন্তিকং আগচ্ছা’’তি। সা ‘‘সাধূ’’তি সম্পটিচ্ছিত্ৰা মহাসত্তম্পি ৰরং যাচি ‘‘দেৰ, তুম্হে পুত্তে গহেত্ৰা ইধেৰ হোথ, অহং ফলাফলং আহরিস্সামী’’তি। সা ততো পট্ঠায অরঞ্ঞতো ফলাফলানি আহরিত্ৰা তযো জনে পটিজগ্গি। ইতি চত্তারো খত্তিযা ৰঙ্কপব্বতকুচ্ছিযং সত্তমাসমত্তং ৰসিংসু। তেন ৰুত্তং ‘‘আমন্তযিত্ৰা দেৰিন্দো, ৰিস্সকম্মং মহিদ্ধিক’’ন্তিআদি।

    Mahāsatto ekapadikamaggaṃ disvā ‘‘pabbajitānaṃ vasanaṭṭhānaṃ bhavissatī’’ti maddiñca putte ca tattheva ṭhapetvā assamapadaṃ pavisitvā akkharāni oloketvā ‘‘sakkena dinnosmī’’ti paṇṇasāladvāraṃ vivaritvā paviṭṭho khaggañca dhanuñca apanetvā sāṭake omuñcitvā isivesaṃ gahetvā kattaradaṇḍaṃ ādāya nikkhamitvā paccekabuddhasadisena upasamena dārakānaṃ santikaṃ agamāsi. Maddidevīpi mahāsattaṃ disvā pādesu patitvā roditvā teneva saddhiṃ assamaṃ pavisitvā attano paṇṇasālaṃ gantvā isivesaṃ gaṇhi. Pacchā puttepi tāpasakumārake kariṃsu. Bodhisatto maddiṃ varaṃ yāci ‘‘mayaṃ ito paṭṭhāya pabbajitā nāma, itthī ca nāma brahmacariyassa malaṃ, mā dāni akāle mama santikaṃ āgacchā’’ti. Sā ‘‘sādhū’’ti sampaṭicchitvā mahāsattampi varaṃ yāci ‘‘deva, tumhe putte gahetvā idheva hotha, ahaṃ phalāphalaṃ āharissāmī’’ti. Sā tato paṭṭhāya araññato phalāphalāni āharitvā tayo jane paṭijaggi. Iti cattāro khattiyā vaṅkapabbatakucchiyaṃ sattamāsamattaṃ vasiṃsu. Tena vuttaṃ ‘‘āmantayitvā devindo, vissakammaṃ mahiddhika’’ntiādi.

    তত্থ আমন্তযিত্ৰাতি পক্কোসাপেত্ৰা। মহিদ্ধিকন্তি মহতিযা দেৰিদ্ধিযা সমন্নাগতং। অস্সমং সুকতন্তি অস্সমপদং সুকতং কত্ৰা। রম্মং ৰেস্সন্তরস্স ৰসনানুচ্ছৰিকং পণ্ণসালং। সুমাপযাতি সুট্ঠু মাপয। আণাপেসীতি ৰচনসেসো। সুমাপযীতি সম্মা মাপেসি।

    Tattha āmantayitvāti pakkosāpetvā. Mahiddhikanti mahatiyā deviddhiyā samannāgataṃ. Assamaṃ sukatanti assamapadaṃ sukataṃ katvā. Rammaṃ vessantarassa vasanānucchavikaṃ paṇṇasālaṃ. Sumāpayāti suṭṭhu māpaya. Āṇāpesīti vacanaseso. Sumāpayīti sammā māpesi.

    ১১১. অসুঞ্ঞোতি যথা সো অস্সমো অসুঞ্ঞো হোতি, এৰং তস্স অসুঞ্ঞভাৰকরণেন অসুঞ্ঞো হোমি। ‘‘অসুঞ্ঞে’’তি ৰা পাঠো, মম ৰসনেনেৰ অসুঞ্ঞে অস্সমে দারকে অনুরক্খন্তো ৰসামি তত্থ তিট্ঠামি। বোধিসত্তস্স মেত্তানুভাৰেন সমন্তা তিযোজনে সব্বে তিরচ্ছানাপি মেত্তং পটিলভিংসু।

    111.Asuññoti yathā so assamo asuñño hoti, evaṃ tassa asuññabhāvakaraṇena asuñño homi. ‘‘Asuññe’’ti vā pāṭho, mama vasaneneva asuññe assame dārake anurakkhanto vasāmi tattha tiṭṭhāmi. Bodhisattassa mettānubhāvena samantā tiyojane sabbe tiracchānāpi mettaṃ paṭilabhiṃsu.

    এৰং তেসু তত্থ ৰসন্তেসু কলিঙ্গরট্ঠৰাসী জূজকো নাম ব্রাহ্মণো অমিত্ততাপনায নাম ভরিযায ‘‘নাহং তে নিচ্চং ধঞ্ঞকোট্টনউদকাহরণযাগুভত্তপচনাদীনি কাতুং সক্কোমি, পরিচারকং মে দাসং ৰা দাসিং ৰা আনেহী’’তি ৰুত্তে ‘‘কুতোহং তে ভোতি দুগ্গতো দাসং ৰা দাসিং ৰা লভিস্সামী’’তি ৰত্ৰা তায ‘‘এস ৰেস্সন্তরো রাজা ৰঙ্কপব্বতে ৰসতি। তস্স পুত্তে ময্হং পরিচারকে যাচিত্ৰা আনেহী’’তি ৰুত্তে কিলেসৰসেন তস্সা পটিবদ্ধচিত্ততায তস্সা ৰচনং অতিক্কমিতুং অসক্কোন্তো পাথেয্যং পটিযাদাপেত্ৰা অনুক্কমেন জেতুত্তরনগরং পত্ৰা ‘‘কুহিং ৰেস্সন্তরমহারাজা’’তি পুচ্ছি।

    Evaṃ tesu tattha vasantesu kaliṅgaraṭṭhavāsī jūjako nāma brāhmaṇo amittatāpanāya nāma bhariyāya ‘‘nāhaṃ te niccaṃ dhaññakoṭṭanaudakāharaṇayāgubhattapacanādīni kātuṃ sakkomi, paricārakaṃ me dāsaṃ vā dāsiṃ vā ānehī’’ti vutte ‘‘kutohaṃ te bhoti duggato dāsaṃ vā dāsiṃ vā labhissāmī’’ti vatvā tāya ‘‘esa vessantaro rājā vaṅkapabbate vasati. Tassa putte mayhaṃ paricārake yācitvā ānehī’’ti vutte kilesavasena tassā paṭibaddhacittatāya tassā vacanaṃ atikkamituṃ asakkonto pātheyyaṃ paṭiyādāpetvā anukkamena jetuttaranagaraṃ patvā ‘‘kuhiṃ vessantaramahārājā’’ti pucchi.

    মহাজনো ‘‘ইমেসং যাচকানং অতিদানেন অম্হাকং রাজা রট্ঠা পব্বাজিতো, এৰং অম্হাকং রাজানং নাসেত্ৰা পুনপি ইধেৰ আগচ্ছতী’’তি লেড্ডুদণ্ডাদিহত্থো উপক্কোসন্তো ব্রাহ্মণং অনুবন্ধি। সো দেৰতাৰিগ্গহিতো হুত্ৰা ততো নিক্খমিত্ৰা ৰঙ্কপব্বতগামিমগ্গং অভিরুল়্হো অনুক্কমেন ৰনদ্ৰারং পত্ৰা মহাৰনং অজ্ঝোগাহেত্ৰা মগ্গমূল়্হো হুত্ৰা ৰিচরন্তো তেহি রাজূহি বোধিসত্তস্স আরক্খণত্থায ঠপিতেন চেতপুত্তেন সমাগঞ্ছি। তেন ‘‘কহং, ভো ব্রাহ্মণ, গচ্ছসী’’তি পুট্ঠো ‘‘ৰেস্সন্তরমহারাজস্স সন্তিক’’ন্তি ৰুত্তে ‘‘অদ্ধা অযং ব্রাহ্মণো তস্স পুত্তে ৰা দেৰিং ৰা যাচিতুং গচ্ছতী’’তি চিন্তেত্ৰা ‘‘মা খো, ত্ৰং ব্রাহ্মণ, তত্থ গঞ্ছি, সচে গচ্ছসি, এত্থেৰ তে সীসং ছিন্দিত্ৰা ময্হং সুনখানং ঘাসং করিস্সামী’’তি তেন সন্তজ্জিতো মরণভযভীতো ‘‘অহমস্স পিতরা পেসিতো দূতো, ‘তং আনেস্সামী’তি আগতো’’তি মুসাৰাদং অভাসি। তং সুত্ৰা চেতপুত্তো তুট্ঠহট্ঠো ব্রাহ্মণস্স সক্কারসম্মানং কত্ৰা ৰঙ্কপব্বতগামিমগ্গং আচিক্খি। সো ততো পরং গচ্ছন্তো অন্তরামগ্গে অচ্চুতেন নাম তাপসেন সদ্ধিং সমাগন্ত্ৰা তম্পি মগ্গং পুচ্ছিত্ৰা তেনাপি মগ্গে আচিক্খিতে তেন আচিক্খিতসঞ্ঞায মগ্গং গচ্ছন্তো অনুক্কমেন বোধিসত্তস্স অস্সমপদট্ঠানসমীপং গন্ত্ৰা মদ্দিদেৰিযা ফলাফলত্থং গতকালে বোধিসত্তং উপসঙ্কমিত্ৰা উভো দারকে যাচি। তেন ৰুত্তং –

    Mahājano ‘‘imesaṃ yācakānaṃ atidānena amhākaṃ rājā raṭṭhā pabbājito, evaṃ amhākaṃ rājānaṃ nāsetvā punapi idheva āgacchatī’’ti leḍḍudaṇḍādihattho upakkosanto brāhmaṇaṃ anubandhi. So devatāviggahito hutvā tato nikkhamitvā vaṅkapabbatagāmimaggaṃ abhiruḷho anukkamena vanadvāraṃ patvā mahāvanaṃ ajjhogāhetvā maggamūḷho hutvā vicaranto tehi rājūhi bodhisattassa ārakkhaṇatthāya ṭhapitena cetaputtena samāgañchi. Tena ‘‘kahaṃ, bho brāhmaṇa, gacchasī’’ti puṭṭho ‘‘vessantaramahārājassa santika’’nti vutte ‘‘addhā ayaṃ brāhmaṇo tassa putte vā deviṃ vā yācituṃ gacchatī’’ti cintetvā ‘‘mā kho, tvaṃ brāhmaṇa, tattha gañchi, sace gacchasi, ettheva te sīsaṃ chinditvā mayhaṃ sunakhānaṃ ghāsaṃ karissāmī’’ti tena santajjito maraṇabhayabhīto ‘‘ahamassa pitarā pesito dūto, ‘taṃ ānessāmī’ti āgato’’ti musāvādaṃ abhāsi. Taṃ sutvā cetaputto tuṭṭhahaṭṭho brāhmaṇassa sakkārasammānaṃ katvā vaṅkapabbatagāmimaggaṃ ācikkhi. So tato paraṃ gacchanto antarāmagge accutena nāma tāpasena saddhiṃ samāgantvā tampi maggaṃ pucchitvā tenāpi magge ācikkhite tena ācikkhitasaññāya maggaṃ gacchanto anukkamena bodhisattassa assamapadaṭṭhānasamīpaṃ gantvā maddideviyā phalāphalatthaṃ gatakāle bodhisattaṃ upasaṅkamitvā ubho dārake yāci. Tena vuttaṃ –

    ১১২.

    112.

    ‘‘পৰনে ৰসমানস্স, অদ্ধিকো মং উপাগমি।

    ‘‘Pavane vasamānassa, addhiko maṃ upāgami;

    অযাচি পুত্তকে ময্হং, জালিং কণ্হাজিনং চুভো’’তি॥

    Ayāci puttake mayhaṃ, jāliṃ kaṇhājinaṃ cubho’’ti.

    এৰং ব্রাহ্মণেন দারকেসু যাচিতেসু মহাসত্তো ‘‘চিরস্সং ৰত মে যাচকো অধিগতো, অজ্জাহং অনৰসেসতো দানপারমিং পূরেস্সামী’’তি অধিপ্পাযেন সোমনস্সজাতো পসারিতহত্থে সহস্সত্থৰিকং ঠপেন্তো ৰিয ব্রাহ্মণস্স চিত্তং পরিতোসেন্তো সকলঞ্চ তং পব্বতকুচ্ছিং উন্নাদেন্তো ‘‘দদামি তৰ ময্হং পুত্তকে, অপি চ মদ্দিদেৰী পন পাতোৰ ফলাফলত্থায ৰনং গন্ত্ৰা সাযং আগমিস্সতি, তায আগতায তে পুত্তকে দস্সেত্ৰা ত্ৰঞ্চ মূলফলাফলং খাদিত্ৰা একরত্তিং ৰসিত্ৰা ৰিগতপরিস্সমো পাতোৰ গমিস্সসী’’তি আহ। ব্রাহ্মণো ‘‘কামঞ্চেস উল়ারজ্ঝাসযতায পুত্তকে দদাতি, মাতা পন ৰচ্ছগিদ্ধা আগন্ত্ৰা দানস্স অন্তরাযম্পি করেয্য, যংনূনাহং ইমং নিপ্পীল়েত্ৰা দারকে গহেত্ৰা অজ্জেৰ গচ্ছেয্য’’ন্তি চিন্তেত্ৰা ‘‘পুত্তা চে তে ময্হং দিন্না, কিং দানি মাতরং দস্সেত্ৰা পেসিতেহি, দারকে গহেত্ৰা অজ্জেৰ গমিস্সামী’’তি আহ। ‘‘সচে, ত্ৰং ব্রাহ্মণ, রাজপুত্তিং মাতরং দট্ঠুং ন ইচ্ছসি, ইমে দারকে গহেত্ৰা জেতুত্তরনগরং গচ্ছ, তত্থ সঞ্জযমহারাজা দারকে গহেত্ৰা মহন্তং তে ধনং দস্সতি, তেন দাসদাসিযো গণ্হিস্সসি, সুখঞ্চ জীৰিস্সসি, অঞ্ঞথা ইমে সুখুমালা রাজদারকা, কিং তে ৰেয্যাৰচ্চং করিস্সন্তী’’তি আহ।

    Evaṃ brāhmaṇena dārakesu yācitesu mahāsatto ‘‘cirassaṃ vata me yācako adhigato, ajjāhaṃ anavasesato dānapāramiṃ pūressāmī’’ti adhippāyena somanassajāto pasāritahatthe sahassatthavikaṃ ṭhapento viya brāhmaṇassa cittaṃ paritosento sakalañca taṃ pabbatakucchiṃ unnādento ‘‘dadāmi tava mayhaṃ puttake, api ca maddidevī pana pātova phalāphalatthāya vanaṃ gantvā sāyaṃ āgamissati, tāya āgatāya te puttake dassetvā tvañca mūlaphalāphalaṃ khāditvā ekarattiṃ vasitvā vigataparissamo pātova gamissasī’’ti āha. Brāhmaṇo ‘‘kāmañcesa uḷārajjhāsayatāya puttake dadāti, mātā pana vacchagiddhā āgantvā dānassa antarāyampi kareyya, yaṃnūnāhaṃ imaṃ nippīḷetvā dārake gahetvā ajjeva gaccheyya’’nti cintetvā ‘‘puttā ce te mayhaṃ dinnā, kiṃ dāni mātaraṃ dassetvā pesitehi, dārake gahetvā ajjeva gamissāmī’’ti āha. ‘‘Sace, tvaṃ brāhmaṇa, rājaputtiṃ mātaraṃ daṭṭhuṃ na icchasi, ime dārake gahetvā jetuttaranagaraṃ gaccha, tattha sañjayamahārājā dārake gahetvā mahantaṃ te dhanaṃ dassati, tena dāsadāsiyo gaṇhissasi, sukhañca jīvissasi, aññathā ime sukhumālā rājadārakā, kiṃ te veyyāvaccaṃ karissantī’’ti āha.

    ব্রাহ্মণো ‘‘এৰম্পি মযা ন সক্কা কাতুং, রাজদণ্ডতো ভাযামি, ময্হমেৰ গামং নেস্সামী’’তি আহ। ইমং তেসং কথাসল্লাপং সুত্ৰা দারকা ‘‘পিতা নো খো অম্হে ব্রাহ্মণস্স দাতুকামো’’তি পক্কমিত্ৰা পোক্খরণিং গন্ত্ৰা পদুমিনিগচ্ছে নিলীযিংসু। ব্রাহ্মণো তে অদিস্ৰাৰ ‘‘ত্ৰং ‘দারকে দদামী’তি ৰত্ৰা তে অপক্কমাপেসি, এসো তে সাধুভাৰো’’তি আহ। অথ মহাসত্তো সহসাৰ উট্ঠহিত্ৰা দারকে গৰেসন্তো পদুমিনিগচ্ছে নিলীনে দিস্ৰা ‘‘এথ, তাতা, মা ময্হং দানপারমিযা অন্তরাযং অকত্থ, মম দানজ্ঝাসযং মত্থকং পাপেথ, অযঞ্চ ব্রাহ্মণো তুম্হে গহেত্ৰা তুম্হাকং অয্যকস্স সঞ্জযমহারাজস্স সন্তিকং গমিস্সতি , তাত জালি, ত্ৰং ভুজিস্সো হোতুকামো ব্রাহ্মণস্স নিক্খসহস্সং দত্ৰা ভুজিস্সো ভৰেয্যাসি, কণ্হাজিনে ত্ৰং দাসসতং দাসিসতং হত্থিসতং অস্সসতং উসভসতং নিক্খসতন্তি সব্বসতং দত্ৰা ভুজিস্সা ভৰেয্যাসী’’তি কুমারে অগ্ঘাপেত্ৰা সমস্সাসেত্ৰা গহেত্ৰা অস্সমপদং গন্ত্ৰা কমণ্ডলুনা উদকং গহেত্ৰা সব্বঞ্ঞুতঞ্ঞাণস্স পচ্চযং কত্ৰা ব্রাহ্মণস্স হত্থে উদকং পাতেত্ৰা অতিৰিয পীতিসোমনস্সজাতো হুত্ৰা পথৰিং উন্নাদেন্তো পিযপুত্তদানং অদাসি। ইধাপি পুব্বে ৰুত্তনযেনেৰ পথৰিকম্পাদযো অহেসুং। তেন ৰুত্তং –

    Brāhmaṇo ‘‘evampi mayā na sakkā kātuṃ, rājadaṇḍato bhāyāmi, mayhameva gāmaṃ nessāmī’’ti āha. Imaṃ tesaṃ kathāsallāpaṃ sutvā dārakā ‘‘pitā no kho amhe brāhmaṇassa dātukāmo’’ti pakkamitvā pokkharaṇiṃ gantvā paduminigacche nilīyiṃsu. Brāhmaṇo te adisvāva ‘‘tvaṃ ‘dārake dadāmī’ti vatvā te apakkamāpesi, eso te sādhubhāvo’’ti āha. Atha mahāsatto sahasāva uṭṭhahitvā dārake gavesanto paduminigacche nilīne disvā ‘‘etha, tātā, mā mayhaṃ dānapāramiyā antarāyaṃ akattha, mama dānajjhāsayaṃ matthakaṃ pāpetha, ayañca brāhmaṇo tumhe gahetvā tumhākaṃ ayyakassa sañjayamahārājassa santikaṃ gamissati , tāta jāli, tvaṃ bhujisso hotukāmo brāhmaṇassa nikkhasahassaṃ datvā bhujisso bhaveyyāsi, kaṇhājine tvaṃ dāsasataṃ dāsisataṃ hatthisataṃ assasataṃ usabhasataṃ nikkhasatanti sabbasataṃ datvā bhujissā bhaveyyāsī’’ti kumāre agghāpetvā samassāsetvā gahetvā assamapadaṃ gantvā kamaṇḍalunā udakaṃ gahetvā sabbaññutaññāṇassa paccayaṃ katvā brāhmaṇassa hatthe udakaṃ pātetvā ativiya pītisomanassajāto hutvā pathaviṃ unnādento piyaputtadānaṃ adāsi. Idhāpi pubbe vuttanayeneva pathavikampādayo ahesuṃ. Tena vuttaṃ –

    ১১৩.

    113.

    ‘‘যাচকং উপগতং দিস্ৰা, হাসো মে উপপজ্জথ।

    ‘‘Yācakaṃ upagataṃ disvā, hāso me upapajjatha;

    উভো পুত্তে গহেত্ৰান, অদাসিং ব্রাহ্মণে তদা॥

    Ubho putte gahetvāna, adāsiṃ brāhmaṇe tadā.

    ১১৪.

    114.

    ‘‘সকে পুত্তে চজন্তস্স, জূজকে ব্রাহ্মণে যদা।

    ‘‘Sake putte cajantassa, jūjake brāhmaṇe yadā;

    তদাপি পথৰী কম্পি, সিনেরুৰনৰটংসকা’’তি॥

    Tadāpi pathavī kampi, sineruvanavaṭaṃsakā’’ti.

    অথ ব্রাহ্মণো দারকে অগন্তুকামে লতায হত্থেসু বন্ধিত্ৰা আকড্ঢি। তেসং বন্ধট্ঠানে ছৰিং ছিন্দিত্ৰা লোহিতং পগ্ঘরি। সো লতাদণ্ডেন পহরন্তো আকড্ঢি। তে পিতরং ওলোকেত্ৰা।

    Atha brāhmaṇo dārake agantukāme latāya hatthesu bandhitvā ākaḍḍhi. Tesaṃ bandhaṭṭhāne chaviṃ chinditvā lohitaṃ pagghari. So latādaṇḍena paharanto ākaḍḍhi. Te pitaraṃ oloketvā.

    ‘‘অম্মা চ তাত নিক্খন্তা, ত্ৰঞ্চ নো তাত দস্সসি।

    ‘‘Ammā ca tāta nikkhantā, tvañca no tāta dassasi;

    মা নো ত্ৰং তাত অদদা, যাৰ অম্মাপি এতু নো।

    Mā no tvaṃ tāta adadā, yāva ammāpi etu no;

    তদাযং ব্রাহ্মণো কামং, ৰিক্কিণাতু হনাতু ৰা’’তি॥ (জা॰ ২.২২.২১২৬) –

    Tadāyaṃ brāhmaṇo kāmaṃ, vikkiṇātu hanātu vā’’ti. (jā. 2.22.2126) –

    ৰত্ৰা পুনপি অযং এৰরূপো ঘোরদস্সনো কুরূরকম্মন্তো –

    Vatvā punapi ayaṃ evarūpo ghoradassano kurūrakammanto –

    ‘‘মনুস্সো উদাহু যক্খো, মংসলোহিতভোজনো।

    ‘‘Manusso udāhu yakkho, maṃsalohitabhojano;

    গামা অরঞ্ঞমাগম্ম, ধনং তং তাত যাচতি।

    Gāmā araññamāgamma, dhanaṃ taṃ tāta yācati;

    নীযমানে পিসাচেন, কিং নু তাত উদিক্খসী’’তি॥ (জা॰ ২.২২.২১৩০-২১৩১) –

    Nīyamāne pisācena, kiṃ nu tāta udikkhasī’’ti. (jā. 2.22.2130-2131) –

    আদীনি ৰদন্তা পরিদেৰিংসু। তত্থ ধনন্তি পুত্তধনং।

    Ādīni vadantā parideviṃsu. Tattha dhananti puttadhanaṃ.

    জূজকো দারকে তথা পরিদেৰন্তেযেৰ পোথেন্তোৰ গহেত্ৰা পক্কামি। মহাসত্তস্স দারকানং করুণং পরিদেৰিতেন তস্স চ ব্রাহ্মণস্স অকারুঞ্ঞভাৰেন বলৰসোকো উপ্পজ্জি, ৰিপ্পটিসারো চ উদপাদি। সো তঙ্খণঞ্ঞেৰ বোধিসত্তানং পৰেণিং অনুস্সরি। ‘‘সব্বেৰ হি বোধিসত্তা পঞ্চ মহাপরিচ্চাগে পরিচ্চজিত্ৰা বুদ্ধা ভৰিস্সন্তি, অহম্পি তেসং অব্ভন্তরো, পুত্তদানঞ্চ মহাপরিচ্চাগানং অঞ্ঞতরং, তস্মা ৰেস্সন্তর দানং দত্ৰা পচ্ছানুতাপো ন তে অনুচ্ছৰিকো’’তি অত্তানং পরিভাসেত্ৰা ‘‘দিন্নকালতো পট্ঠায মম তে ন কিঞ্চি হোন্তী’’তি অত্তানং উপত্থম্ভেত্ৰা দল়্হসমাদানং অধিট্ঠায পণ্ণসালদ্ৰারে পাসাণফলকে কঞ্চনপটিমা ৰিয নিসীদি।

    Jūjako dārake tathā paridevanteyeva pothentova gahetvā pakkāmi. Mahāsattassa dārakānaṃ karuṇaṃ paridevitena tassa ca brāhmaṇassa akāruññabhāvena balavasoko uppajji, vippaṭisāro ca udapādi. So taṅkhaṇaññeva bodhisattānaṃ paveṇiṃ anussari. ‘‘Sabbeva hi bodhisattā pañca mahāpariccāge pariccajitvā buddhā bhavissanti, ahampi tesaṃ abbhantaro, puttadānañca mahāpariccāgānaṃ aññataraṃ, tasmā vessantara dānaṃ datvā pacchānutāpo na te anucchaviko’’ti attānaṃ paribhāsetvā ‘‘dinnakālato paṭṭhāya mama te na kiñci hontī’’ti attānaṃ upatthambhetvā daḷhasamādānaṃ adhiṭṭhāya paṇṇasāladvāre pāsāṇaphalake kañcanapaṭimā viya nisīdi.

    অথ মদ্দিদেৰী অরঞ্ঞতো ফলাফলং গহেত্ৰা নিৰত্তন্তী ‘‘মা মহাসত্তস্স দানন্তরাযো হোতূ’’তি ৰাল়মিগরূপধরাহি দেৰতাহি উপরুদ্ধমগ্গা তেসু অপগতেসু চিরেন অস্সমং পত্ৰা ‘‘অজ্জ মে দুস্সুপিনং দিট্ঠং, দুন্নিমিত্তানি চ উপ্পন্নানি, কিং নু খো ভৰিস্সতী’’তি চিন্তেন্তী অস্সমং পৰিসিত্ৰা পুত্তকে অপস্সন্তী বোধিসত্তস্স সন্তিকং গন্ত্ৰা ‘‘দেৰ, ন খো অম্হাকং পুত্তকে পস্সামি, কুহিং তে গতা’’তি আহ। সো তুণ্হী অহোসি। সা পুত্তকে উপধারেন্তী তহিং তহিং উপধাৰিত্ৰা গৰেসন্তী অদিস্ৰা পুনপি গন্ত্ৰা পুচ্ছি। বোধিসত্তো ‘‘কক্খল়কথায নং পুত্তসোকং জহাপেস্সামী’’তি চিন্তেত্ৰা –

    Atha maddidevī araññato phalāphalaṃ gahetvā nivattantī ‘‘mā mahāsattassa dānantarāyo hotū’’ti vāḷamigarūpadharāhi devatāhi uparuddhamaggā tesu apagatesu cirena assamaṃ patvā ‘‘ajja me dussupinaṃ diṭṭhaṃ, dunnimittāni ca uppannāni, kiṃ nu kho bhavissatī’’ti cintentī assamaṃ pavisitvā puttake apassantī bodhisattassa santikaṃ gantvā ‘‘deva, na kho amhākaṃ puttake passāmi, kuhiṃ te gatā’’ti āha. So tuṇhī ahosi. Sā puttake upadhārentī tahiṃ tahiṃ upadhāvitvā gavesantī adisvā punapi gantvā pucchi. Bodhisatto ‘‘kakkhaḷakathāya naṃ puttasokaṃ jahāpessāmī’’ti cintetvā –

    ‘‘নূন মদ্দী ৰরারোহা, রাজপুত্তী যসস্সিনী।

    ‘‘Nūna maddī varārohā, rājaputtī yasassinī;

    পাতো গতাসি উঞ্ছায, কিমিদং সাযমাগতা’’তি॥ (জা॰ ২.২২.২২২৫) –

    Pāto gatāsi uñchāya, kimidaṃ sāyamāgatā’’ti. (jā. 2.22.2225) –

    ৰত্ৰা তায চিরাযনকারণে কথিতে পুনপি দারকে সন্ধায ন কিঞ্চি আহ। সা পুত্তসোকেন তে উপধারেন্তী পুনপি ৰাতৰেগেন ৰনানি ৰিচরি। তায একরত্তিযং ৰিচরিতট্ঠানং পরিগ্গণ্হন্তং পন্নরসযোজনমত্তং অহোসি। অথ ৰিভাতায রত্তিযা মহাসত্তস্স সন্তিকং গন্ত্ৰা ঠিতা দারকানং অদস্সনেন বলৰসোকাভিভূতা তস্স পাদমূলে ছিন্নকদলী ৰিয ভূমিযং ৰিসঞ্ঞী হুত্ৰা পতি। সো ‘‘মতা’’তি সঞ্ঞায কম্পমানো উপ্পন্নবলৰসোকোপি সতিং পচ্চুপট্ঠপেত্ৰা ‘‘জানিস্সামি তাৰ জীৰতি, ন জীৰতী’’তি সত্তমাসে কাযসংসগ্গং অনাপন্নপুব্বোপি অঞ্ঞস্স অভাৰেন তস্সা সীসং উক্খিপিত্ৰা ঊরূসু ঠপেত্ৰা উদকেন পরিপ্ফোসিত্ৰা উরঞ্চ মুখঞ্চ হদযঞ্চ পরিমজ্জি। মদ্দীপি খো থোকং ৰীতিনামেত্ৰা সতিং পটিলভিত্ৰা হিরোত্তপ্পং পচ্চুপট্ঠপেত্ৰা ‘‘দেৰ, দারকা তে কুহিং গতা’’তি পুচ্ছি। সো আহ – ‘‘দেৰি, একস্স মে ব্রাহ্মণস্স মং যাচিত্ৰা আগতস্স দাসত্থায দিন্না’’তি ৰত্ৰা তায ‘‘কস্মা, দেৰ, পুত্তে ব্রাহ্মণস্স দত্ৰা মম সব্বরত্তিং পরিদেৰিত্ৰা ৰিচরন্তিযা নাচিক্খী’’তি ৰুত্তে ‘‘পঠমমেৰ ৰুত্তে তৰ চিত্তদুক্খং বহু ভৰিস্সতি, ইদানি পন সরীরদুক্খেন তনুকং ভৰিস্সতী’’তি ৰত্ৰা –

    Vatvā tāya cirāyanakāraṇe kathite punapi dārake sandhāya na kiñci āha. Sā puttasokena te upadhārentī punapi vātavegena vanāni vicari. Tāya ekarattiyaṃ vicaritaṭṭhānaṃ pariggaṇhantaṃ pannarasayojanamattaṃ ahosi. Atha vibhātāya rattiyā mahāsattassa santikaṃ gantvā ṭhitā dārakānaṃ adassanena balavasokābhibhūtā tassa pādamūle chinnakadalī viya bhūmiyaṃ visaññī hutvā pati. So ‘‘matā’’ti saññāya kampamāno uppannabalavasokopi satiṃ paccupaṭṭhapetvā ‘‘jānissāmi tāva jīvati, na jīvatī’’ti sattamāse kāyasaṃsaggaṃ anāpannapubbopi aññassa abhāvena tassā sīsaṃ ukkhipitvā ūrūsu ṭhapetvā udakena paripphositvā urañca mukhañca hadayañca parimajji. Maddīpi kho thokaṃ vītināmetvā satiṃ paṭilabhitvā hirottappaṃ paccupaṭṭhapetvā ‘‘deva, dārakā te kuhiṃ gatā’’ti pucchi. So āha – ‘‘devi, ekassa me brāhmaṇassa maṃ yācitvā āgatassa dāsatthāya dinnā’’ti vatvā tāya ‘‘kasmā, deva, putte brāhmaṇassa datvā mama sabbarattiṃ paridevitvā vicarantiyā nācikkhī’’ti vutte ‘‘paṭhamameva vutte tava cittadukkhaṃ bahu bhavissati, idāni pana sarīradukkhena tanukaṃ bhavissatī’’ti vatvā –

    ‘‘মং পস্স মদ্দি মা পুত্তে, মা বাল়্হং পরিদেৰসি।

    ‘‘Maṃ passa maddi mā putte, mā bāḷhaṃ paridevasi;

    লচ্ছাম পুত্তে জীৰন্তা, অরোগা চ ভৰামসে’’তি॥ (জা॰ ২.২২.২২৬০) –

    Lacchāma putte jīvantā, arogā ca bhavāmase’’ti. (jā. 2.22.2260) –

    সো সমস্সাসেত্ৰা পুন –

    So samassāsetvā puna –

    ‘‘পুত্তে পসুঞ্চ ধঞ্ঞঞ্চ, যঞ্চ অঞ্ঞং ঘরে ধনং।

    ‘‘Putte pasuñca dhaññañca, yañca aññaṃ ghare dhanaṃ;

    দজ্জা সপ্পুরিসো দানং, দিস্ৰা যাচকমাগতং।

    Dajjā sappuriso dānaṃ, disvā yācakamāgataṃ;

    অনুমোদাহি মে মদ্দি, পুত্তকে দানমুত্তম’’ন্তি॥ (জা॰ ২.২২.২২৬১) –

    Anumodāhi me maddi, puttake dānamuttama’’nti. (jā. 2.22.2261) –

    ৰত্ৰা অত্তনো পুত্তদানং তং অনুমোদাপেসি।

    Vatvā attano puttadānaṃ taṃ anumodāpesi.

    সাপি –

    Sāpi –

    ‘‘অনুমোদামি তে দেৰ, পুত্তকে দানমুত্তমং।

    ‘‘Anumodāmi te deva, puttake dānamuttamaṃ;

    দত্ৰা চিত্তং পসাদেহি, ভিয্যো দানং দদো ভৰা’’তি॥ (জা॰ ২.২২.২২৬২) –

    Datvā cittaṃ pasādehi, bhiyyo dānaṃ dado bhavā’’ti. (jā. 2.22.2262) –

    ৰত্ৰা অনুমোদি।

    Vatvā anumodi.

    এৰং তেসু অঞ্ঞমঞ্ঞং সম্মোদনীযং কথং কথেন্তেসু সক্কো চিন্তেসি – ‘‘মহাপুরিসো হিয্যো জূজকস্স পথৰিং উন্নাদেত্ৰা দারকে অদাসি। ইদানি নং কোচি হীনপুরিসো উপসঙ্কমিত্ৰা মদ্দিদেৰিং যাচিত্ৰা গহেত্ৰা গচ্ছেয্য, ততো রাজা নিপ্পচ্চযো ভৰেয্য, হন্দাহং ব্রাহ্মণৰণ্ণেন নং উপসঙ্কমিত্ৰা মদ্দিং যাচিত্ৰা পারমিকূটং গাহাপেত্ৰা কস্সচি অৰিস্সজ্জিযং কত্ৰা পুন নং তস্সেৰ দত্ৰা আগমিস্সামী’’তি। সো সূরিযুগ্গমনৰেলাযং ব্রাহ্মণৰণ্ণেন তস্স সন্তিকং অগমাসি। তং দিস্ৰা মহাপুরিসো ‘‘অতিথি নো আগতো’’তি পীতিসোমনস্সজাতো তেন সদ্ধিং মধুরপটিসন্থারং কত্ৰা ‘‘ব্রাহ্মণ, কেনত্থেন ইধাগতোসী’’তি পুচ্ছি। অথ নং সক্কো মদ্দিদেৰিং যাচি। তেন ৰুত্তং –

    Evaṃ tesu aññamaññaṃ sammodanīyaṃ kathaṃ kathentesu sakko cintesi – ‘‘mahāpuriso hiyyo jūjakassa pathaviṃ unnādetvā dārake adāsi. Idāni naṃ koci hīnapuriso upasaṅkamitvā maddideviṃ yācitvā gahetvā gaccheyya, tato rājā nippaccayo bhaveyya, handāhaṃ brāhmaṇavaṇṇena naṃ upasaṅkamitvā maddiṃ yācitvā pāramikūṭaṃ gāhāpetvā kassaci avissajjiyaṃ katvā puna naṃ tasseva datvā āgamissāmī’’ti. So sūriyuggamanavelāyaṃ brāhmaṇavaṇṇena tassa santikaṃ agamāsi. Taṃ disvā mahāpuriso ‘‘atithi no āgato’’ti pītisomanassajāto tena saddhiṃ madhurapaṭisanthāraṃ katvā ‘‘brāhmaṇa, kenatthena idhāgatosī’’ti pucchi. Atha naṃ sakko maddideviṃ yāci. Tena vuttaṃ –

    ১১৫.

    115.

    ‘‘পুনদেৰ সক্কো ওরুয্হ, হুত্ৰা ব্রাহ্মণসন্নিভো।

    ‘‘Punadeva sakko oruyha, hutvā brāhmaṇasannibho;

    অযাচি মং মদ্দিদেৰিং, সীলৰন্তিং পতিব্বত’’ন্তি॥

    Ayāci maṃ maddideviṃ, sīlavantiṃ patibbata’’nti.

    তত্থ পুনদেৰাতি দারকে দিন্নদিৰসতো পচ্ছা এৰ। তদনন্তরমেৰাতি অত্থো। ওরুয্হাতি দেৰলোকতো ওতরিত্ৰা। ব্রাহ্মণসন্নিভোতি ব্রাহ্মণসমানৰণ্ণো।

    Tattha punadevāti dārake dinnadivasato pacchā eva. Tadanantaramevāti attho. Oruyhāti devalokato otaritvā. Brāhmaṇasannibhoti brāhmaṇasamānavaṇṇo.

    অথ মহাসত্তো ‘‘হিয্যো মে দ্ৰেপি দারকে ব্রাহ্মণস্স দিন্না, অহম্পি অরঞ্ঞে এককোৰ, কথং তে মদ্দিং সীলৰন্তিং পতিব্বতং দস্সামী’’তি অৰত্ৰাৰ পসারিতহত্থে অনগ্ঘরতনং ঠপেন্তো ৰিয অসজ্জিত্ৰা অবজ্ঝিত্ৰা অনোলীনমানসো ‘‘অজ্জ মে দানপারমী মত্থকং পাপুণিস্সতী’’তি হট্ঠতুট্ঠো গিরিং উন্নাদেন্তো ৰিয –

    Atha mahāsatto ‘‘hiyyo me dvepi dārake brāhmaṇassa dinnā, ahampi araññe ekakova, kathaṃ te maddiṃ sīlavantiṃ patibbataṃ dassāmī’’ti avatvāva pasāritahatthe anaggharatanaṃ ṭhapento viya asajjitvā abajjhitvā anolīnamānaso ‘‘ajja me dānapāramī matthakaṃ pāpuṇissatī’’ti haṭṭhatuṭṭho giriṃ unnādento viya –

    ‘‘দদামি ন ৰিকম্পামি, যং মং যাচসি ব্রাহ্মণ।

    ‘‘Dadāmi na vikampāmi, yaṃ maṃ yācasi brāhmaṇa;

    সন্তং নপ্পটিগূহামি, দানে মে রমতী মনো’’তি॥ (জা॰ ২.২২.২২৭৮) –

    Santaṃ nappaṭigūhāmi, dāne me ramatī mano’’ti. (jā. 2.22.2278) –

    ৰত্ৰা সীঘমেৰ কমণ্ডলুনা উদকং আহরিত্ৰা ব্রাহ্মণস্স হত্থে উদকং পাতেত্ৰা ভরিযমদাসি। তেন ৰুত্তং –

    Vatvā sīghameva kamaṇḍalunā udakaṃ āharitvā brāhmaṇassa hatthe udakaṃ pātetvā bhariyamadāsi. Tena vuttaṃ –

    ১১৬.

    116.

    ‘‘মদ্দিং হত্থে গহেত্ৰান, উদকঞ্জলি পূরিয।

    ‘‘Maddiṃ hatthe gahetvāna, udakañjali pūriya;

    পসন্নমনসঙ্কপ্পো, তস্স মদ্দিং অদাসহ’’ন্তি॥

    Pasannamanasaṅkappo, tassa maddiṃ adāsaha’’nti.

    তত্থ উদকঞ্জলীতি উদকং অঞ্জলিং, ‘‘উদক’’ন্তি চ করণত্থে পচ্চত্তৰচনং, উদকেন তস্স ব্রাহ্মণস্স অঞ্জলিং পসারিতহত্থতলং পূরেত্ৰাতি অত্থো। পসন্নমনসঙ্কপ্পোতি ‘‘অদ্ধা ইমিনা পরিচ্চাগেন দানপারমিং মত্থকং পাপেত্ৰা সম্মাসম্বোধিং অধিগমিস্সামী’’তি উপন্নসদ্ধাপসাদেন পসন্নচিত্তসঙ্কপ্পো। তঙ্খণঞ্ঞেৰ হেট্ঠা ৰুত্তপ্পকারানি সব্বপাটিহারিযানি পাতুরহেসুং। ‘‘ইদানিস্স ন দূরে সম্মাসম্বোধী’’তি দেৰগণা ব্রহ্মগণা অতিৰিয পীতিসোমনস্সজাতা অহেসুং। তেন ৰুত্তং –

    Tattha udakañjalīti udakaṃ añjaliṃ, ‘‘udaka’’nti ca karaṇatthe paccattavacanaṃ, udakena tassa brāhmaṇassa añjaliṃ pasāritahatthatalaṃ pūretvāti attho. Pasannamanasaṅkappoti ‘‘addhā iminā pariccāgena dānapāramiṃ matthakaṃ pāpetvā sammāsambodhiṃ adhigamissāmī’’ti upannasaddhāpasādena pasannacittasaṅkappo. Taṅkhaṇaññeva heṭṭhā vuttappakārāni sabbapāṭihāriyāni pāturahesuṃ. ‘‘Idānissa na dūre sammāsambodhī’’ti devagaṇā brahmagaṇā ativiya pītisomanassajātā ahesuṃ. Tena vuttaṃ –

    ১১৭.

    117.

    ‘‘মদ্দিযা দীযমানায, গগনে দেৰা পমোদিতা।

    ‘‘Maddiyā dīyamānāya, gagane devā pamoditā;

    তদাপি পথৰী কম্পি, সিনেরুৰনৰটংসকা’’তি॥

    Tadāpi pathavī kampi, sineruvanavaṭaṃsakā’’ti.

    ততো পন দীযমানায মদ্দিযা দেৰিযা রুণ্ণং ৰা দুম্মুখং ৰা ভাকুটিমত্তং ৰা নাহোসি, এৰং চস্সা অহোসি ‘‘যং দেৰো ইচ্ছতি, তং করোতূ’’তি।

    Tato pana dīyamānāya maddiyā deviyā ruṇṇaṃ vā dummukhaṃ vā bhākuṭimattaṃ vā nāhosi, evaṃ cassā ahosi ‘‘yaṃ devo icchati, taṃ karotū’’ti.

    ‘‘কোমারী যস্সাহং ভরিযা, সামিকো মম ইস্সরো।

    ‘‘Komārī yassāhaṃ bhariyā, sāmiko mama issaro;

    যস্সিচ্ছে তস্স মং দজ্জা, ৰিক্কিণেয্য হনেয্য ৰা’’তি॥ (জা॰ ২.২২.২২৮২) –

    Yassicche tassa maṃ dajjā, vikkiṇeyya haneyya vā’’ti. (jā. 2.22.2282) –

    আহ।

    Āha.

    মহাপুরিসোপি ‘‘অম্ভো, ব্রাহ্মণ, মদ্দিতো মে সতগুণেন সহস্সগুণেন সতসহস্সগুণেন সব্বঞ্ঞুতঞ্ঞাণমেৰ পিযতরং, ইদং মে দানং সব্বঞ্ঞুতঞ্ঞাণপ্পটিৰেধস্স পচ্চযো হোতূ’’তি ৰত্ৰা অদাসি। তেন ৰুত্তং –

    Mahāpurisopi ‘‘ambho, brāhmaṇa, maddito me sataguṇena sahassaguṇena satasahassaguṇena sabbaññutaññāṇameva piyataraṃ, idaṃ me dānaṃ sabbaññutaññāṇappaṭivedhassa paccayo hotū’’ti vatvā adāsi. Tena vuttaṃ –

    ১১৮.

    118.

    ‘‘জালিং কণ্হাজিনং ধীতং, মদ্দিদেৰিং পতিব্বতং।

    ‘‘Jāliṃ kaṇhājinaṃ dhītaṃ, maddideviṃ patibbataṃ;

    চজমানো ন চিন্তেসিং, বোধিযাযেৰ কারণা॥

    Cajamāno na cintesiṃ, bodhiyāyeva kāraṇā.

    ১১৯.

    119.

    ন মে দেস্সা উভো পুত্তা, মদ্দিদেৰী ন দেস্সিযা।

    Na me dessā ubho puttā, maddidevī na dessiyā;

    সব্বঞ্ঞুতং পিযং ময্হং, তস্মা পিযে অদাসহ’’ন্তি॥

    Sabbaññutaṃ piyaṃ mayhaṃ, tasmā piye adāsaha’’nti.

    তত্থ চজমানো ন চিন্তেসিন্তি পরিচ্চজন্তো সন্তাপৰসেন ন চিন্তেসিং, ৰিস্সট্ঠো হুত্ৰা পরিচ্চজিন্তি অত্থো।

    Tattha cajamāno na cintesinti pariccajanto santāpavasena na cintesiṃ, vissaṭṭho hutvā pariccajinti attho.

    এত্থাহ – কস্মা পনাযং মহাপুরিসো অত্তনো পুত্তদারে জাতিসম্পন্নে খত্তিযে পরস্স দাসভাৰেন পরিচ্চজি, ন হি যেসং কেসঞ্চিপি ভুজিস্সানং অভুজিস্সভাৰকরণং সাধুধম্মোতি? ৰুচ্চতে – অনুধম্মভাৰতো। অযঞ্হি বুদ্ধকারকে ধম্মে অনুগতধম্মতা, যদিদং সব্বস্স অত্তনিযস্স মমন্তি পরিগ্গহিতৰত্থুনো অনৰসেসপরিচ্চাগো, ন হি দেয্যধম্মপটিগ্গাহকৰিকপ্পরহিতং দানপারমিং পরিপূরেতুং উস্সুক্কমাপন্নানং বোধিসত্তানং মমন্তি পরিগ্গহিতৰত্থুং যাচন্তস্স যাচকস্স ন পরিচ্চজিতুং যুত্তং, পোরাণোপি চাযমনুধম্মো। সব্বেসঞ্হি বোধিসত্তানং অযং আচিণ্ণসমাচিণ্ণধম্মো কুলৰংসো কুলপ্পৰেণী, যদিদং সব্বস্স পরিচ্চাগো। তত্থ চ ৰিসেসতো পিযতরৰত্থুপরিচ্চাগো, ন হি কেচি বোধিসত্তা ৰংসানুগতং রজ্জিস্সরিযাদিধনপরিচ্চাগং, অত্তনো সীসনযনাদিঅঙ্গপরিচ্চাগং, পিযজীৰিতপরিচ্চাগং, কুলৰংসপতিট্ঠাপকপিযপুত্তপরিচ্চাগং, মনাপচারিনীপিযভরিযাপরিচ্চাগন্তি ইমে পঞ্চ মহাপরিচ্চাগে অপরিচ্চজিত্ৰা বুদ্ধা নাম ভূতপুব্বা অত্থি। তথা হি মঙ্গলে ভগৰতি বোধিসত্তভূতে বোধিপরিযেসনং চরমানে চ চরিমত্তভাৰতো ততিযে অত্তভাৰে সপুত্তদারে একস্মিং পব্বতে ৰসন্তে খরদাঠিকো নাম যক্খো মহাপুরিসস্স দানজ্ঝাসযতং সুত্ৰা ব্রাহ্মণৰণ্ণেন উপসঙ্কমিত্ৰা মহাসত্তং দ্ৰে দারকে যাচি।

    Etthāha – kasmā panāyaṃ mahāpuriso attano puttadāre jātisampanne khattiye parassa dāsabhāvena pariccaji, na hi yesaṃ kesañcipi bhujissānaṃ abhujissabhāvakaraṇaṃ sādhudhammoti? Vuccate – anudhammabhāvato. Ayañhi buddhakārake dhamme anugatadhammatā, yadidaṃ sabbassa attaniyassa mamanti pariggahitavatthuno anavasesapariccāgo, na hi deyyadhammapaṭiggāhakavikapparahitaṃ dānapāramiṃ paripūretuṃ ussukkamāpannānaṃ bodhisattānaṃ mamanti pariggahitavatthuṃ yācantassa yācakassa na pariccajituṃ yuttaṃ, porāṇopi cāyamanudhammo. Sabbesañhi bodhisattānaṃ ayaṃ āciṇṇasamāciṇṇadhammo kulavaṃso kulappaveṇī, yadidaṃ sabbassa pariccāgo. Tattha ca visesato piyataravatthupariccāgo, na hi keci bodhisattā vaṃsānugataṃ rajjissariyādidhanapariccāgaṃ, attano sīsanayanādiaṅgapariccāgaṃ, piyajīvitapariccāgaṃ, kulavaṃsapatiṭṭhāpakapiyaputtapariccāgaṃ, manāpacārinīpiyabhariyāpariccāganti ime pañca mahāpariccāge apariccajitvā buddhā nāma bhūtapubbā atthi. Tathā hi maṅgale bhagavati bodhisattabhūte bodhipariyesanaṃ caramāne ca carimattabhāvato tatiye attabhāve saputtadāre ekasmiṃ pabbate vasante kharadāṭhiko nāma yakkho mahāpurisassa dānajjhāsayataṃ sutvā brāhmaṇavaṇṇena upasaṅkamitvā mahāsattaṃ dve dārake yāci.

    মহাসত্তো ‘‘দদামি ব্রাহ্মণস্স পুত্তকে’’তি হট্ঠপহট্ঠো উদকপরিযন্তং পথৰিং কম্পেন্তো দ্ৰেপি দারকে অদাসি। যক্খো চঙ্কমনকোটিযং আলম্বনফলকং নিস্সায ঠিতো মহাসত্তস্স পস্সন্তস্সেৰ মুল়ালকলাপং ৰিয দ্ৰে দারকে খাদি। অগ্গিজালং ৰিয লোহিতধারং উগ্গিরমানং যক্খস্স মুখং ওলোকেন্তস্স মহাপুরিসস্স ‘‘ৰঞ্চেসি ৰত মং যক্খো’’তি উপ্পজ্জনকচিত্তুপ্পাদস্স ওকাসং অদেন্তস্স উপাযকোসল্লস্স সুভাৰিতত্তা অতীতধম্মানং অপ্পটিসন্ধিসভাৰতো অনিচ্চাদিৰসেন সঙ্খারানং সুপরিমদ্দিতভাৰতো চ এৰং ইত্তরট্ঠিতিকেন পভঙ্গুনা অসারেন সঙ্খারকলাপেন ‘‘পূরিতা ৰত মে দানপারমী, মহন্তং ৰত মে অত্থং সাধেত্ৰা ইদং অধিগত’’ন্তি সোমনস্সমেৰ উপ্পজ্জি। সো ইদং অনঞ্ঞসাধারণং তস্মিং খণে অত্তনো চিত্তাচারং ঞত্ৰা ‘‘ইমস্স নিস্সন্দেন অনাগতে ইমিনাৰ নীহারেন সরীরতো রস্মিযো নিক্খমন্তূ’’তি পত্থনমকাসি। তস্স তং পত্থনং নিস্সায বুদ্ধভূতস্স সরীরপ্পভা নিচ্চমেৰ দসসহস্সিলোকধাতুং ফরিত্ৰা অট্ঠাসি (ধ॰ স॰ অট্ঠ॰ নিদানকথা)। এৰং অঞ্ঞেপি বোধিসত্তা অত্তনো পিযতরং পুত্তদারং পরিচ্চজিত্ৰা সব্বঞ্ঞুতঞ্ঞাণং পটিৰিজ্ঝিংসু।

    Mahāsatto ‘‘dadāmi brāhmaṇassa puttake’’ti haṭṭhapahaṭṭho udakapariyantaṃ pathaviṃ kampento dvepi dārake adāsi. Yakkho caṅkamanakoṭiyaṃ ālambanaphalakaṃ nissāya ṭhito mahāsattassa passantasseva muḷālakalāpaṃ viya dve dārake khādi. Aggijālaṃ viya lohitadhāraṃ uggiramānaṃ yakkhassa mukhaṃ olokentassa mahāpurisassa ‘‘vañcesi vata maṃ yakkho’’ti uppajjanakacittuppādassa okāsaṃ adentassa upāyakosallassa subhāvitattā atītadhammānaṃ appaṭisandhisabhāvato aniccādivasena saṅkhārānaṃ suparimadditabhāvato ca evaṃ ittaraṭṭhitikena pabhaṅgunā asārena saṅkhārakalāpena ‘‘pūritā vata me dānapāramī, mahantaṃ vata me atthaṃ sādhetvā idaṃ adhigata’’nti somanassameva uppajji. So idaṃ anaññasādhāraṇaṃ tasmiṃ khaṇe attano cittācāraṃ ñatvā ‘‘imassa nissandena anāgate imināva nīhārena sarīrato rasmiyo nikkhamantū’’ti patthanamakāsi. Tassa taṃ patthanaṃ nissāya buddhabhūtassa sarīrappabhā niccameva dasasahassilokadhātuṃ pharitvā aṭṭhāsi (dha. sa. aṭṭha. nidānakathā). Evaṃ aññepi bodhisattā attano piyataraṃ puttadāraṃ pariccajitvā sabbaññutaññāṇaṃ paṭivijjhiṃsu.

    অপি চ যথা নাম কোচি পুরিসো কস্সচি সন্তিকে গামং ৰা জনপদং ৰা কেণিযা গহেত্ৰা কম্মং করোন্তো অত্তনো অন্তেৰাসিকানং ৰা পমাদেন পূতিভূতং ধনং ধারেয্য, তমেনং সো গাহাপেত্ৰা বন্ধনাগারং পৰেসেয্য। তস্স এৰমস্স ‘‘অহং খো ইমস্স রঞ্ঞো কম্মং করোন্তো এত্তকং নাম ধনং ধারেমি, তেনাহং রঞ্ঞা বন্ধনাগারে পৰেসিতো, সচাহং ইধেৰ হোমি, অত্তানঞ্চ জীযেয্য, পুত্তদারকম্মকরপোরিসা চ মে জীৰিকাপগতা মহন্তং অনযব্যসনং আপজ্জেয্যুং। যংনূনাহং রঞ্ঞো আরোচেত্ৰা অত্তনো পুত্তং ৰা কনিট্ঠভাতরং ৰা ইধ ঠপেত্ৰা নিক্খমেয্যং । এৰাহং ইতো বন্ধনতো মুত্তো নচিরস্সেৰ যথামিত্তং যথাসন্দিট্ঠং ধনং সংহরিত্ৰা রঞ্ঞো দত্ৰা তম্পি বন্ধনতো মোচেমি, অপ্পমত্তোৰ হুত্ৰা উট্ঠানবলেন অত্তনো সম্পত্তিং পটিপাকতিকং করিস্সামী’’তি। সো তথা করেয্য। এৰং সম্পদমিদং দট্ঠব্বং।

    Api ca yathā nāma koci puriso kassaci santike gāmaṃ vā janapadaṃ vā keṇiyā gahetvā kammaṃ karonto attano antevāsikānaṃ vā pamādena pūtibhūtaṃ dhanaṃ dhāreyya, tamenaṃ so gāhāpetvā bandhanāgāraṃ paveseyya. Tassa evamassa ‘‘ahaṃ kho imassa rañño kammaṃ karonto ettakaṃ nāma dhanaṃ dhāremi, tenāhaṃ raññā bandhanāgāre pavesito, sacāhaṃ idheva homi, attānañca jīyeyya, puttadārakammakaraporisā ca me jīvikāpagatā mahantaṃ anayabyasanaṃ āpajjeyyuṃ. Yaṃnūnāhaṃ rañño ārocetvā attano puttaṃ vā kaniṭṭhabhātaraṃ vā idha ṭhapetvā nikkhameyyaṃ . Evāhaṃ ito bandhanato mutto nacirasseva yathāmittaṃ yathāsandiṭṭhaṃ dhanaṃ saṃharitvā rañño datvā tampi bandhanato mocemi, appamattova hutvā uṭṭhānabalena attano sampattiṃ paṭipākatikaṃ karissāmī’’ti. So tathā kareyya. Evaṃ sampadamidaṃ daṭṭhabbaṃ.

    তত্রিদং ওপম্মসংসন্দনং – রাজা ৰিয কম্মং, বন্ধনাগারো ৰিয সংসারো, রঞ্ঞা বন্ধনাগারে ঠপিতপুরিসো ৰিয কম্মৰসেন সংসারচারকে ঠিতো মহাপুরিসো, তস্স বন্ধনাগারে ঠিতপুরিসস্স তত্থ পুত্তস্স ৰা ভাতুনো ৰা পরাধীনভাৰকরণেন তেসং অত্তনো চ দুক্খপ্পমোচনং ৰিয মহাপুরিসস্স অত্তনো পুত্তাদিকে পরেসং দত্ৰা সব্বঞ্ঞুতঞ্ঞাণপ্পটিলাভেন সব্বসত্তানং ৰট্টদুক্খপ্পমোচনং, তস্স ৰিগতদুক্খস্স তেহি সদ্ধিং যথাধিপ্পেতসম্পত্তিযং পতিট্ঠানং ৰিয মহাপুরিসস্স অরহত্তমগ্গেন অপগতৰট্টদুক্খস্স বুদ্ধভাৰেন দসবলাদিসব্বঞ্ঞুতঞ্ঞাণসম্পত্তিসমন্নাগমো অত্তনো ৰচনকারকানং ৰিজ্জত্তযাদিসম্পত্তিসমন্নাগমো চাতি এৰং অনৰজ্জসভাৰো এৰ মহাপুরিসানং পুত্তদারপরিচ্চাগো। এতেনেৰ নযেন নেসং অঙ্গজীৰিতপরিচ্চাগে যা চোদনা, সাপি ৰিসোধিতাতি ৰেদিতব্বাতি।

    Tatridaṃ opammasaṃsandanaṃ – rājā viya kammaṃ, bandhanāgāro viya saṃsāro, raññā bandhanāgāre ṭhapitapuriso viya kammavasena saṃsāracārake ṭhito mahāpuriso, tassa bandhanāgāre ṭhitapurisassa tattha puttassa vā bhātuno vā parādhīnabhāvakaraṇena tesaṃ attano ca dukkhappamocanaṃ viya mahāpurisassa attano puttādike paresaṃ datvā sabbaññutaññāṇappaṭilābhena sabbasattānaṃ vaṭṭadukkhappamocanaṃ, tassa vigatadukkhassa tehi saddhiṃ yathādhippetasampattiyaṃ patiṭṭhānaṃ viya mahāpurisassa arahattamaggena apagatavaṭṭadukkhassa buddhabhāvena dasabalādisabbaññutaññāṇasampattisamannāgamo attano vacanakārakānaṃ vijjattayādisampattisamannāgamo cāti evaṃ anavajjasabhāvo eva mahāpurisānaṃ puttadārapariccāgo. Eteneva nayena nesaṃ aṅgajīvitapariccāge yā codanā, sāpi visodhitāti veditabbāti.

    এৰং পন মহাসত্তেন মদ্দিদেৰিযা দিন্নায সক্কো অচ্ছরিযব্ভুতচিত্তজাতো হুত্ৰা –

    Evaṃ pana mahāsattena maddideviyā dinnāya sakko acchariyabbhutacittajāto hutvā –

    ‘‘সব্বে জিতা তে পচ্চূহা, যে দিব্বা যে চ মানুসা।

    ‘‘Sabbe jitā te paccūhā, ye dibbā ye ca mānusā;

    নিন্নাদিতা তে পথৰী, সদ্দো তে তিদিৰং গতো॥ (জা॰ ২.২২.২২৮৩-২২৮৪)।

    Ninnāditā te pathavī, saddo te tidivaṃ gato. (jā. 2.22.2283-2284);

    ‘‘দুদ্দদং দদমানানং, দুক্করং কম্ম কুব্বতং।

    ‘‘Duddadaṃ dadamānānaṃ, dukkaraṃ kamma kubbataṃ;

    অসন্তো নানুকুব্বন্তি, সতং ধম্মো দুরন্নযো॥

    Asanto nānukubbanti, sataṃ dhammo durannayo.

    ‘‘তস্মা সতঞ্চ অসতং, নানা হোতি ইতো গতি।

    ‘‘Tasmā satañca asataṃ, nānā hoti ito gati;

    অসন্তো নিরযং যন্তি, সন্তো সগ্গপরাযনা’’তি॥ (জা॰ ২.২২.২২৮৬-২২৮৭) –

    Asanto nirayaṃ yanti, santo saggaparāyanā’’ti. (jā. 2.22.2286-2287) –

    আদিনা নযেন মহাপুরিসস্স দানানুমোদনৰসেন থুতিং অকাসি।

    Ādinā nayena mahāpurisassa dānānumodanavasena thutiṃ akāsi.

    তত্থ পচ্চূহাতি পচ্চত্থিকা। দিব্বাতি দিব্বযসপটিবাহকা। মানুসাতি মনুস্সযসপটিবাহকা। কে পন তেতি? মচ্ছরিযধম্মা, তে সব্বে পুত্তদারং দেন্তেন মহাসত্তেন জিতাতি দস্সেতি। দুদ্দদন্তি পুত্তদারাদিদুদ্দদং দদমানানং তমেৰ দুক্করং কুব্বতং তুম্হাদিসানং কম্মং অঞ্ঞে সাৰকপচ্চেকবোধিসত্তা নানুকুব্বন্তি, পগেৰ অসন্তো মচ্ছরিনো। তস্মা সতং ধম্মো দুরন্নযো সাধূনং মহাবোধিসত্তানং পটিপত্তিধম্মো অঞ্ঞেহি দুরনুগমো।

    Tattha paccūhāti paccatthikā. Dibbāti dibbayasapaṭibāhakā. Mānusāti manussayasapaṭibāhakā. Ke pana teti? Macchariyadhammā, te sabbe puttadāraṃ dentena mahāsattena jitāti dasseti. Duddadanti puttadārādiduddadaṃ dadamānānaṃ tameva dukkaraṃ kubbataṃ tumhādisānaṃ kammaṃ aññe sāvakapaccekabodhisattā nānukubbanti, pageva asanto maccharino. Tasmā sataṃ dhammo durannayo sādhūnaṃ mahābodhisattānaṃ paṭipattidhammo aññehi duranugamo.

    এৰং সক্কো মহাপুরিসস্স অনুমোদনৰসেন থুতিং কত্ৰা মদ্দিদেৰিং নিয্যাতেন্তো –

    Evaṃ sakko mahāpurisassa anumodanavasena thutiṃ katvā maddideviṃ niyyātento –

    ‘‘দদামি ভোতো ভরিযং, মদ্দিং সব্বঙ্গসোভনং।

    ‘‘Dadāmi bhoto bhariyaṃ, maddiṃ sabbaṅgasobhanaṃ;

    ত্ৰঞ্চেৰ মদ্দিযা ছন্নো, মদ্দী চ পতিনো তৰা’’তি॥ (জা॰ ২.২২.২২৮৯) –

    Tvañceva maddiyā channo, maddī ca patino tavā’’ti. (jā. 2.22.2289) –

    ৰত্ৰা তং মদ্দিং পটিদত্ৰা দিব্বত্তভাৰেন জলন্তো তরুণসূরিযো ৰিয আকাসে ঠত্ৰা অত্তানং আচিক্খন্তো –

    Vatvā taṃ maddiṃ paṭidatvā dibbattabhāvena jalanto taruṇasūriyo viya ākāse ṭhatvā attānaṃ ācikkhanto –

    ‘‘সক্কোহমস্মি দেৰিন্দো, আগতোস্মি তৰন্তিকে।

    ‘‘Sakkohamasmi devindo, āgatosmi tavantike;

    ৰরং ৰরস্সু রাজিসি, ৰরে অট্ঠ দদামি তে’’তি॥ (জা॰ ২.২২.২২৯২) –

    Varaṃ varassu rājisi, vare aṭṭha dadāmi te’’ti. (jā. 2.22.2292) –

    ৰত্ৰা ৰরেহি নিমন্তেসি। মহাসত্তোপি ‘‘পিতা মং পুনদেৰ রজ্জে পতিট্ঠাপেতু, ৰজ্ঝপ্পত্তং ৰধতো মোচেয্যং, সব্বসত্তানং অৰস্সযো ভৰেয্যং, পরদারং ন গচ্ছেয্যং, ইত্থীনং ৰসং ন গচ্ছেয্যং, পুত্তো মে দীঘাযুকো সিযা, অন্নপানাদিদেয্যধম্মো বহুকো সিযা, তঞ্চ অপরিক্খযং পসন্নচিত্তো দদেয্যং, এৰং মহাদানানি পৰত্তেত্ৰা দেৰলোকং গন্ত্ৰা ততো ইধাগতো সব্বঞ্ঞুতং পাপুণেয্য’’ন্তি ইমে অট্ঠ ৰরে যাচি। সক্কো ‘‘নচিরস্সেৰ পিতা সঞ্জযমহারাজা ইধেৰ আগন্ত্ৰা তং গহেত্ৰা রজ্জে পতিট্ঠাপেস্সতি, ইতরো চ সব্বো তে মনোরথো মত্থকং পাপুণিস্সতি, মা চিন্তযি, অপ্পমত্তো হোহী’’তি ওৰদিত্ৰা সকট্ঠানমেৰ গতো। বোধিসত্তো চ মদ্দিদেৰী চ সম্মোদমানা সক্কদত্তিযে অস্সমে ৰসিংসু।

    Vatvā varehi nimantesi. Mahāsattopi ‘‘pitā maṃ punadeva rajje patiṭṭhāpetu, vajjhappattaṃ vadhato moceyyaṃ, sabbasattānaṃ avassayo bhaveyyaṃ, paradāraṃ na gaccheyyaṃ, itthīnaṃ vasaṃ na gaccheyyaṃ, putto me dīghāyuko siyā, annapānādideyyadhammo bahuko siyā, tañca aparikkhayaṃ pasannacitto dadeyyaṃ, evaṃ mahādānāni pavattetvā devalokaṃ gantvā tato idhāgato sabbaññutaṃ pāpuṇeyya’’nti ime aṭṭha vare yāci. Sakko ‘‘nacirasseva pitā sañjayamahārājā idheva āgantvā taṃ gahetvā rajje patiṭṭhāpessati, itaro ca sabbo te manoratho matthakaṃ pāpuṇissati, mā cintayi, appamatto hohī’’ti ovaditvā sakaṭṭhānameva gato. Bodhisatto ca maddidevī ca sammodamānā sakkadattiye assame vasiṃsu.

    জূজকেপি কুমারে গহেত্ৰা গচ্ছন্তে দেৰতা আরক্খমকংসু। দিৰসে দিৰসে একা দেৰধীতা রত্তিভাগে আগন্ত্ৰা মদ্দিৰণ্ণেন কুমারে পটিজগ্গি। সো দেৰতাৰিগ্গহিতো হুত্ৰা ‘‘কলিঙ্গরট্ঠং গমিস্সামী’’তি অড্ঢমাসেন জেতুত্তরনগরমেৰ সম্পাপুণি। রাজা ৰিনিচ্ছযে নিসিন্নো ব্রাহ্মণেন সদ্ধিং দারকে রাজঙ্গণেন গচ্ছন্তে দিস্ৰা সঞ্জানিত্ৰা ব্রাহ্মণেন সদ্ধিং তে পক্কোসাপেত্ৰা তং পৰত্তিং সুত্ৰা বোধিসত্তেন কথিতনিযামেনেৰ ধনং দত্ৰা কুমারে কিণিত্ৰা ন্হাপেত্ৰা ভোজেত্ৰা সব্বালঙ্কারপটিমণ্ডিতে কত্ৰা রাজা দারকং ফুস্সতিদেৰী দারিকং উচ্ছঙ্গে কত্ৰা বোধিসত্তস্স রাজপুত্তিযা চ পৰত্তিং সুণিংসু।

    Jūjakepi kumāre gahetvā gacchante devatā ārakkhamakaṃsu. Divase divase ekā devadhītā rattibhāge āgantvā maddivaṇṇena kumāre paṭijaggi. So devatāviggahito hutvā ‘‘kaliṅgaraṭṭhaṃ gamissāmī’’ti aḍḍhamāsena jetuttaranagarameva sampāpuṇi. Rājā vinicchaye nisinno brāhmaṇena saddhiṃ dārake rājaṅgaṇena gacchante disvā sañjānitvā brāhmaṇena saddhiṃ te pakkosāpetvā taṃ pavattiṃ sutvā bodhisattena kathitaniyāmeneva dhanaṃ datvā kumāre kiṇitvā nhāpetvā bhojetvā sabbālaṅkārapaṭimaṇḍite katvā rājā dārakaṃ phussatidevī dārikaṃ ucchaṅge katvā bodhisattassa rājaputtiyā ca pavattiṃ suṇiṃsu.

    তং সুত্ৰা রাজা ‘‘ভূনহচ্চং ৰত মযা কত’’ন্তি সংৰিগ্গমানসো তাৰদেৰ দ্ৰাদসঅক্খোভনীপরিমাণং সেনং সন্নয্হিত্ৰা ৰঙ্কপব্বতাভিমুখো পাযাসি সদ্ধিং ফুস্সতিদেৰিযা চেৰ দারকেহি চ। অনুক্কমেন গন্ত্ৰা পুত্তেন চ সুণিসায চ সমাগঞ্ছি। ৰেস্সন্তরো পিযপুত্তে দিস্ৰা সোকং সন্ধারেতুং অসক্কোন্তো ৰিসঞ্ঞী হুত্ৰা তত্থেৰ পতি, তথা মদ্দী মাতাপিতরো সহজাতা সট্ঠিসহস্সা চ অমচ্চা। তং কারুঞ্ঞং পস্সন্তেসু একোপি সকভাৰেন সন্ধারেতুং নাসক্খি, সকলং অস্সমপদং যুগন্ধরৰাতপমদ্দিতং ৰিয সালৰনং অহোসি। সক্কো দেৰরাজা তেসং ৰিসঞ্ঞিভাৰৰিনোদনত্থং পোক্খরৰস্সং ৰস্সাপেসি, তেমেতুকামা তেমেন্তি, পোক্খরে পতিতৰস্সং ৰিয ৰিনিৰত্তিত্ৰা উদকং গচ্ছতি। সব্বে সঞ্ঞং পটিলভিংসু। তদাপি পথৰিকম্পাদযো হেট্ঠা ৰুত্তপ্পকারা অচ্ছরিযা পাতুরহেসুং। তেন ৰুত্তং –

    Taṃ sutvā rājā ‘‘bhūnahaccaṃ vata mayā kata’’nti saṃviggamānaso tāvadeva dvādasaakkhobhanīparimāṇaṃ senaṃ sannayhitvā vaṅkapabbatābhimukho pāyāsi saddhiṃ phussatideviyā ceva dārakehi ca. Anukkamena gantvā puttena ca suṇisāya ca samāgañchi. Vessantaro piyaputte disvā sokaṃ sandhāretuṃ asakkonto visaññī hutvā tattheva pati, tathā maddī mātāpitaro sahajātā saṭṭhisahassā ca amaccā. Taṃ kāruññaṃ passantesu ekopi sakabhāvena sandhāretuṃ nāsakkhi, sakalaṃ assamapadaṃ yugandharavātapamadditaṃ viya sālavanaṃ ahosi. Sakko devarājā tesaṃ visaññibhāvavinodanatthaṃ pokkharavassaṃ vassāpesi, temetukāmā tementi, pokkhare patitavassaṃ viya vinivattitvā udakaṃ gacchati. Sabbe saññaṃ paṭilabhiṃsu. Tadāpi pathavikampādayo heṭṭhā vuttappakārā acchariyā pāturahesuṃ. Tena vuttaṃ –

    ১২০.

    120.

    ‘‘পুনাপরং ব্রহারঞ্ঞে, মাতাপিতুসমাগমে।

    ‘‘Punāparaṃ brahāraññe, mātāpitusamāgame;

    করুণং পরিদেৰন্তে, সল্লপন্তে সুখং দুখং॥

    Karuṇaṃ paridevante, sallapante sukhaṃ dukhaṃ.

    ১২১.

    121.

    ‘‘হিরোত্তপ্পেন গরুনা, উভিন্নং উপসঙ্কমি।

    ‘‘Hirottappena garunā, ubhinnaṃ upasaṅkami;

    তদাপি পথৰী কম্পি, সিনেরুৰনৰটংসকা’’তি॥

    Tadāpi pathavī kampi, sineruvanavaṭaṃsakā’’ti.

    তত্থ করুণং পরিদেৰন্তেতি মাতাপিতরো আদিং কত্ৰা সব্বস্মিং আগতজনে করুণং পরিদেৰমানে। সল্লপন্তে সুখং দুখন্তি সুখদুক্খং পুচ্ছিত্ৰা পটিসন্থারৰসেন আলাপসল্লাপং করোন্তে। হিরোত্তপ্পেন গরুনা উভিন্নন্তি ইমে সিৰীনং ৰচনং গহেত্ৰা অদূসকং ধম্মে ঠিতং মং পব্বাজযিংসূতি চিত্তপ্পকোপং অকত্ৰা উভোসু এতেসু মাতাপিতূসু ধম্মগারৰসমুস্সিতেন হিরোত্তপ্পেনেৰ যথারূপে উপসঙ্কমি। তেন মে ধম্মতেজেন তদাপি পথৰী কম্পি।

    Tattha karuṇaṃ paridevanteti mātāpitaro ādiṃ katvā sabbasmiṃ āgatajane karuṇaṃ paridevamāne. Sallapante sukhaṃ dukhanti sukhadukkhaṃ pucchitvā paṭisanthāravasena ālāpasallāpaṃ karonte. Hirottappena garunā ubhinnanti ime sivīnaṃ vacanaṃ gahetvā adūsakaṃ dhamme ṭhitaṃ maṃ pabbājayiṃsūti cittappakopaṃ akatvā ubhosu etesu mātāpitūsu dhammagāravasamussitena hirottappeneva yathārūpe upasaṅkami. Tena me dhammatejena tadāpi pathavī kampi.

    অথ সঞ্জযমহারাজা বোধিসত্তং খমাপেত্ৰা রজ্জং পটিচ্ছাপেত্ৰা তঙ্খণঞ্ঞেৰ কেসমস্সুকম্মাদীনি কারাপেত্ৰা ন্হাপেত্ৰা সব্বাভরণৰিভূসিতং দেৰরাজানমিৰ ৰিরোচমানং সহ মদ্দিদেৰিযা রজ্জে অভিসিঞ্চিত্ৰা তাৰদেৰ চ ততো পট্ঠায দ্ৰাদসঅক্খোভনীপরিমাণায চতুরঙ্গিনিযা সেনায চ পুত্তং পরিৰারযিত্ৰা ৰঙ্কপব্বততো যাৰ জেতুত্তরনগরা সট্ঠিযোজনমগ্গং অলঙ্কারাপেত্ৰা দ্ৰীহি মাসেহি সুখেনেৰ নগরং পৰেসেসি। মহাজনো উল়ারং পীতিসোমনস্সং পটিসংৰেদেসি। চেলুক্খেপাদযো পৰত্তিংসু। নগরে চ নন্দিভেরিং চরাপেসুং। অন্তমসো বিল়ারে উপাদায সব্বেসং বন্ধনে ঠিতানং বন্ধনমোক্খো অহোসি। সো নগরং পৰিট্ঠদিৰসেযেৰ পচ্চূসকালে চিন্তেসি – ‘‘স্ৰে ৰিভাতায রত্তিযা মমাগতভাৰং সুত্ৰা যাচকা আগমিস্সন্তি, তেসাহং কিং দস্সামী’’তি। তস্মিং খণে সক্কস্স আসনং উণ্হাকারং দস্সেসি। সো আৰজ্জেন্তো তং কারণং ঞত্ৰা তাৰদেৰ রাজনিৰেসনস্স পুরিমৰত্থুং পচ্ছিমৰত্থুঞ্চ কটিপ্পমাণং পূরেন্তো ঘনমেঘো ৰিয সত্তরতনৰস্সং ৰস্সাপেসি। সকলনগরে জণ্ণুপ্পমাণং ৰস্সাপেসীতি। তেন ৰুত্তং –

    Atha sañjayamahārājā bodhisattaṃ khamāpetvā rajjaṃ paṭicchāpetvā taṅkhaṇaññeva kesamassukammādīni kārāpetvā nhāpetvā sabbābharaṇavibhūsitaṃ devarājānamiva virocamānaṃ saha maddideviyā rajje abhisiñcitvā tāvadeva ca tato paṭṭhāya dvādasaakkhobhanīparimāṇāya caturaṅginiyā senāya ca puttaṃ parivārayitvā vaṅkapabbatato yāva jetuttaranagarā saṭṭhiyojanamaggaṃ alaṅkārāpetvā dvīhi māsehi sukheneva nagaraṃ pavesesi. Mahājano uḷāraṃ pītisomanassaṃ paṭisaṃvedesi. Celukkhepādayo pavattiṃsu. Nagare ca nandibheriṃ carāpesuṃ. Antamaso biḷāre upādāya sabbesaṃ bandhane ṭhitānaṃ bandhanamokkho ahosi. So nagaraṃ paviṭṭhadivaseyeva paccūsakāle cintesi – ‘‘sve vibhātāya rattiyā mamāgatabhāvaṃ sutvā yācakā āgamissanti, tesāhaṃ kiṃ dassāmī’’ti. Tasmiṃ khaṇe sakkassa āsanaṃ uṇhākāraṃ dassesi. So āvajjento taṃ kāraṇaṃ ñatvā tāvadeva rājanivesanassa purimavatthuṃ pacchimavatthuñca kaṭippamāṇaṃ pūrento ghanamegho viya sattaratanavassaṃ vassāpesi. Sakalanagare jaṇṇuppamāṇaṃ vassāpesīti. Tena vuttaṃ –

    ১২২.

    122.

    ‘‘পুনাপরং ব্রহারঞ্ঞা, নিক্খমিত্ৰা সঞাতিভি।

    ‘‘Punāparaṃ brahāraññā, nikkhamitvā sañātibhi;

    পৰিসামি পুরং রম্মং, জেতুত্তরং পুরুত্তমং॥

    Pavisāmi puraṃ rammaṃ, jetuttaraṃ puruttamaṃ.

    ১২৩.

    123.

    ‘‘রতনানি সত্ত ৰস্সিংসু, মহামেঘো পৰস্সথ।

    ‘‘Ratanāni satta vassiṃsu, mahāmegho pavassatha;

    তদাপি পথৰী কম্পি, সিনেরুৰনৰটংসকা॥

    Tadāpi pathavī kampi, sineruvanavaṭaṃsakā.

    ১২৪.

    124.

    ‘‘অচেতনাযং পথৰী, অৰিঞ্ঞায সুখং দুখং।

    ‘‘Acetanāyaṃ pathavī, aviññāya sukhaṃ dukhaṃ;

    সাপি দানবলা ময্হং, সত্তক্খত্তুং পকম্পথা’’তি॥

    Sāpi dānabalā mayhaṃ, sattakkhattuṃ pakampathā’’ti.

    এৰং সত্তরতনৰস্সে ৰুট্ঠে পুনদিৰসে মহাসত্তো ‘‘যেসং কুলানং পুরিমপচ্ছিমৰত্থূসু ৰুট্ঠধনং, তেসঞ্ঞেৰ হোতূ’’তি দাপেত্ৰা অৰসেসং আহরাপেত্ৰা অত্তনো গেহৰত্থুস্মিং ধনেন সদ্ধিং কোট্ঠাগারেসু ওকিরাপেত্ৰা মহাদানং পৰত্তেসি। অচেতনাযং পথৰীতি চেতনারহিতা অযং মহাভূতা পথৰী, দেৰতা পন চেতনাসহিতা। অৰিঞ্ঞায সুখং দুখন্তি অচেতনত্তা এৰ সুখং দুক্খং অজানিত্ৰা। সতিপি সুখদুক্খপচ্চযসংযোগে তং নানুভৰন্তী। সাপি দানবলা ময্হন্তি এৰংভূতাপি সা মহাপথৰী মম দানপুঞ্ঞানুভাৰহেতু। সত্তক্খত্তুং পকম্পথাতি অট্ঠৰস্সিককালে হদযমংসাদীনিপি যাচকানং দদেয্যন্তি দানজ্ঝাসযুপ্পাদে মঙ্গলহত্থিদানে পব্বাজনকালে পৰত্তিতমহাদানে পুত্তদানে ভরিযাদানে ৰঙ্কপব্বতে ঞাতিসমাগমে নগরং পৰিট্ঠদিৰসে রতনৰস্সকালেতি ইমেসু ঠানেসু সত্তৰারং অকম্পিত্থ। এৰং একস্মিংযেৰ অত্তভাৰে সত্তক্খত্তুং মহাপথৰিকম্পনাদিঅচ্ছরিযপাতুভাৰহেতুভূতানি যাৰতাযুকং মহাদানানি পৰত্তেত্ৰা মহাসত্তো আযুপরিযোসানে তুসিতপুরে উপ্পজ্জি। তেনাহ ভগৰা –

    Evaṃ sattaratanavasse vuṭṭhe punadivase mahāsatto ‘‘yesaṃ kulānaṃ purimapacchimavatthūsu vuṭṭhadhanaṃ, tesaññeva hotū’’ti dāpetvā avasesaṃ āharāpetvā attano gehavatthusmiṃ dhanena saddhiṃ koṭṭhāgāresu okirāpetvā mahādānaṃ pavattesi. Acetanāyaṃ pathavīti cetanārahitā ayaṃ mahābhūtā pathavī, devatā pana cetanāsahitā. Aviññāya sukhaṃ dukhanti acetanattā eva sukhaṃ dukkhaṃ ajānitvā. Satipi sukhadukkhapaccayasaṃyoge taṃ nānubhavantī. Sāpi dānabalā mayhanti evaṃbhūtāpi sā mahāpathavī mama dānapuññānubhāvahetu. Sattakkhattuṃ pakampathāti aṭṭhavassikakāle hadayamaṃsādīnipi yācakānaṃ dadeyyanti dānajjhāsayuppāde maṅgalahatthidāne pabbājanakāle pavattitamahādāne puttadāne bhariyādāne vaṅkapabbate ñātisamāgame nagaraṃ paviṭṭhadivase ratanavassakāleti imesu ṭhānesu sattavāraṃ akampittha. Evaṃ ekasmiṃyeva attabhāve sattakkhattuṃ mahāpathavikampanādiacchariyapātubhāvahetubhūtāni yāvatāyukaṃ mahādānāni pavattetvā mahāsatto āyupariyosāne tusitapure uppajji. Tenāha bhagavā –

    ‘‘ততো ৰেস্সন্তরো রাজা, দানং দত্ৰান খত্তিযো।

    ‘‘Tato vessantaro rājā, dānaṃ datvāna khattiyo;

    কাযস্স ভেদা সপ্পঞ্ঞো, সগ্গং সো উপপজ্জথা’’তি॥ (জা॰ ২.২২.২৪৪০)।

    Kāyassa bhedā sappañño, saggaṃ so upapajjathā’’ti. (jā. 2.22.2440);

    তদা জূজকো দেৰদত্তো অহোসি, অমিত্ততাপনা চিঞ্চমাণৰিকা , চেতপুত্তো ছন্নো, অচ্চুততাপসো সারিপুত্তো, সক্কো অনুরুদ্ধো, মদ্দী রাহুলমাতা, জালিকুমারো রাহুলো, কণ্হাজিনা উপ্পলৰণ্ণা, মাতাপিতরো মহারাজকুলানি, সেসপরিসা বুদ্ধপরিসা, ৰেস্সন্তরো রাজা লোকনাথো।

    Tadā jūjako devadatto ahosi, amittatāpanā ciñcamāṇavikā , cetaputto channo, accutatāpaso sāriputto, sakko anuruddho, maddī rāhulamātā, jālikumāro rāhulo, kaṇhājinā uppalavaṇṇā, mātāpitaro mahārājakulāni, sesaparisā buddhaparisā, vessantaro rājā lokanātho.

    ইধাপি হেট্ঠা ৰুত্তনযেনেৰ যথারহং সেসপারমিযো নিদ্ধারেতব্বা। তথা মহাসত্তে কুচ্ছিগতে মাতু দেৰসিকং ছসতসহস্সানি ৰিস্সজ্জেত্ৰা দানং দাতুকামতাদোহল়ো, তথা দীযমানেপি ধনস্স পরিক্খযাভাৰো, জাতক্খণে এৰ হত্থং পসারেত্ৰা ‘‘দানং দস্সামি, অত্থি কিঞ্চী’’তি ৰাচানিচ্ছারণং, চতুপঞ্চৰস্সিককালে অত্তনো অলঙ্কারস্স ধাতীনং হত্থগতস্স পুন অগ্গহেতুকামতা, অট্ঠৰস্সিককালে হদযমংসাদিকস্স অত্তনো সরীরাৰযৰস্স দাতুকামতাতি এৰমাদিকা সত্তক্খত্তুং মহাপথৰিকম্পনাদিঅনেকচ্ছরিযপাতুভাৰহেতুভূতা ইধ মহাপুরিসস্স গুণানুভাৰা ৰিভাৰেতব্বা। তেনেতং ৰুচ্চতি –

    Idhāpi heṭṭhā vuttanayeneva yathārahaṃ sesapāramiyo niddhāretabbā. Tathā mahāsatte kucchigate mātu devasikaṃ chasatasahassāni vissajjetvā dānaṃ dātukāmatādohaḷo, tathā dīyamānepi dhanassa parikkhayābhāvo, jātakkhaṇe eva hatthaṃ pasāretvā ‘‘dānaṃ dassāmi, atthi kiñcī’’ti vācānicchāraṇaṃ, catupañcavassikakāle attano alaṅkārassa dhātīnaṃ hatthagatassa puna aggahetukāmatā, aṭṭhavassikakāle hadayamaṃsādikassa attano sarīrāvayavassa dātukāmatāti evamādikā sattakkhattuṃ mahāpathavikampanādianekacchariyapātubhāvahetubhūtā idha mahāpurisassa guṇānubhāvā vibhāvetabbā. Tenetaṃ vuccati –

    ‘‘এৰং অচ্ছরিযা হেতে, অব্ভুতা চ মহেসিনো…পে॰…।

    ‘‘Evaṃ acchariyā hete, abbhutā ca mahesino…pe…;

    তেসু চিত্তপ্পসাদোপি, দুক্খতো পরিমোচযে।

    Tesu cittappasādopi, dukkhato parimocaye;

    পগেৰানুকিরিযা তেসং, ধম্মস্স অনুধম্মতো’’তি॥

    Pagevānukiriyā tesaṃ, dhammassa anudhammato’’ti.

    ৰেস্সন্তরচরিযাৰণ্ণনা নিট্ঠিতা।

    Vessantaracariyāvaṇṇanā niṭṭhitā.




    Next: ১০. সসপণ্ডিতচরিযাৰণ্ণনা • 10. Sasapaṇḍitacariyāvaṇṇanā




    Related texts:



    তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / চরিযাপিটকপাল়ি • Cariyāpiṭakapāḷi / ৯. ৰেস্সন্তরচরিযা • 9. Vessantaracariyā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact