| Library / Tipiṭaka / д̇ибидага • Tipiṭaka / милинд̣̇абан̃хабаал̣и • Milindapañhapāḷi |
3. взссанд̇араваг̇г̇о
3. Vessantaravaggo
1. взссанд̇арабан̃хо
1. Vessantarapañho
1. ‘‘бханд̇з нааг̇асзна, саб̣б̣зва б̣од̇хисад̇д̇аа буд̇д̇ад̣̇аарам̣ д̣̇знд̇и, уд̣̇ааху взссанд̇арзнзва ран̃н̃аа буд̇д̇ад̣̇аарам̣ д̣̇инна’’нд̇и? ‘‘саб̣б̣зби, махаарааж̇а, б̣од̇хисад̇д̇аа буд̇д̇ад̣̇аарам̣ д̣̇знд̇и, на взссанд̇арзнзва ран̃н̃аа буд̇д̇ад̣̇аарам̣ д̣̇инна’’нд̇и. ‘‘аби жа ко, бханд̇з нааг̇асзна, д̇зсам̣ анумад̇зна д̣̇знд̇ий’’д̇и. ‘‘бхарияаа, махаарааж̇а, анумад̇аа, д̣̇аарагаа бана б̣аалад̇ааяа вилабим̣су 1, яад̣̇и д̇з ад̇т̇ад̇о ж̇аанзяяум̣, д̇зби анумод̣̇зяяум̣, на д̇з вилабзяяу’’нд̇и.
1. ‘‘Bhante nāgasena, sabbeva bodhisattā puttadāraṃ denti, udāhu vessantareneva raññā puttadāraṃ dinna’’nti? ‘‘Sabbepi, mahārāja, bodhisattā puttadāraṃ denti, na vessantareneva raññā puttadāraṃ dinna’’nti. ‘‘Api ca kho, bhante nāgasena, tesaṃ anumatena dentī’’ti. ‘‘Bhariyā, mahārāja, anumatā, dārakā pana bālatāya vilapiṃsu 2, yadi te atthato jāneyyuṃ, tepi anumodeyyuṃ, na te vilapeyyu’’nti.
‘‘д̣̇уггарам̣, бханд̇з нааг̇асзна, б̣од̇хисад̇д̇зна гад̇ам̣, яам̣ со ад̇д̇ано орасз бияз буд̇д̇з б̣раахман̣асса д̣̇аасад̇т̇ааяа ад̣̇ааси.
‘‘Dukkaraṃ, bhante nāgasena, bodhisattena kataṃ, yaṃ so attano orase piye putte brāhmaṇassa dāsatthāya adāsi.
‘‘ид̣̇амби д̣̇уд̇ияам̣ д̣̇уггарад̇о д̣̇уггарад̇арам̣, яам̣ со ад̇д̇ано орасз бияз буд̇д̇з б̣аалагз д̇арун̣агз лад̇ааяа б̣анд̇хид̇ваа д̇зна б̣раахман̣зна лад̇ааяа анумаж̇ж̇ийяанд̇з д̣̇исваа аж̇жхубзгки.
‘‘Idampi dutiyaṃ dukkarato dukkarataraṃ, yaṃ so attano orase piye putte bālake taruṇake latāya bandhitvā tena brāhmaṇena latāya anumajjīyante disvā ajjhupekkhi.
‘‘ид̣̇амби д̇ад̇ияам̣ д̣̇уггарад̇о д̣̇уггарад̇арам̣, яам̣ со сагзна б̣алзна б̣анд̇ханаа мужжид̇ваа ааг̇ад̇з д̣̇аарагз саараж̇ж̇амубаг̇ад̇з бунад̣̇зва лад̇ааяа б̣анд̇хид̇ваа ад̣̇ааси.
‘‘Idampi tatiyaṃ dukkarato dukkarataraṃ, yaṃ so sakena balena bandhanā muccitvā āgate dārake sārajjamupagate punadeva latāya bandhitvā adāsi.
‘‘ид̣̇амби жад̇уд̇т̇ам̣ д̣̇уггарад̇о д̣̇уггарад̇арам̣, яам̣ со д̣̇аарагз ‘аяам̣ ко, д̇аад̇а, яагко каад̣̇ид̇ум̣ нзд̇и амхз’д̇и вилабанд̇з ‘маа бхааяид̇т̇аа’д̇и на ассаасзси.
‘‘Idampi catutthaṃ dukkarato dukkarataraṃ, yaṃ so dārake ‘ayaṃ kho, tāta, yakkho khādituṃ neti amhe’ti vilapante ‘mā bhāyitthā’ti na assāsesi.
‘‘ид̣̇амби бан̃жамам̣ д̣̇уггарад̇о д̣̇уггарад̇арам̣, яам̣ со ж̇аалисса гумаарасса руд̣̇амаанасса баад̣̇зсу нибад̇ид̇ваа ‘алам̣, д̇аад̇а, ган̣хааж̇инам̣ нивад̇д̇зхи, ахамзва г̇ажчаами яагкзна саха, каад̣̇ад̇у мам̣ яагко’д̇и яаажамаанасса звам̣ на самбадижчи.
‘‘Idampi pañcamaṃ dukkarato dukkarataraṃ, yaṃ so jālissa kumārassa rudamānassa pādesu nipatitvā ‘alaṃ, tāta, kaṇhājinaṃ nivattehi, ahameva gacchāmi yakkhena saha, khādatu maṃ yakkho’ti yācamānassa evaṃ na sampaṭicchi.
‘‘ид̣̇амби чадтам̣ д̣̇уггарад̇о д̣̇уггарад̇арам̣, яам̣ со ж̇аалисса гумаарасса ‘баасаан̣асамам̣ нууна д̇з, д̇аад̇а, хад̣̇аяам̣, яам̣ д̇вам̣ амхаагам̣ д̣̇угкид̇аанам̣ бзгкамаано ниммануссагз б̣рахааран̃н̃з яагкзна нийяамаанз на ниваарзсий’д̇и вилабамаанасса гаарун̃н̃ам̣ наагааси.
‘‘Idampi chaṭṭhaṃ dukkarato dukkarataraṃ, yaṃ so jālissa kumārassa ‘pāsāṇasamaṃ nūna te, tāta, hadayaṃ, yaṃ tvaṃ amhākaṃ dukkhitānaṃ pekkhamāno nimmanussake brahāraññe yakkhena nīyamāne na nivāresī’ti vilapamānassa kāruññaṃ nākāsi.
‘‘ид̣̇амби сад̇д̇амам̣ д̣̇уггарад̇о д̣̇уггарад̇арам̣, яам̣ д̇асса рул̣арул̣асса бхиймабхиймасса нийд̇з д̣̇аарагз ад̣̇ассанам̣ г̇амид̇з на пали хад̣̇аяам̣ сад̇ад̇хаа ваа сахассад̇хаа ваа, бун̃н̃агаамзна мануж̇зна гим̣ барад̣̇угкаабанзна, нану наама сагад̣̇аанам̣ д̣̇аад̇аб̣б̣ам̣ ход̇ий’’д̇и?
‘‘Idampi sattamaṃ dukkarato dukkarataraṃ, yaṃ tassa ruḷaruḷassa bhīmabhīmassa nīte dārake adassanaṃ gamite na phali hadayaṃ satadhā vā sahassadhā vā, puññakāmena manujena kiṃ paradukkhāpanena, nanu nāma sakadānaṃ dātabbaṃ hotī’’ti?
‘‘д̣̇уггарасса, махаарааж̇а, гад̇ад̇д̇аа б̣од̇хисад̇д̇асса гид̇д̇исад̣̇д̣̇о д̣̇асасахассияаа логад̇хаад̇уяаа сад̣̇звамануссзсу аб̣бхуг̇г̇ад̇о, д̣̇зваа д̣̇звабхаванз багид̇д̇знд̇и, асураа асурабхаванз багид̇д̇знд̇и, г̇арул̣аа г̇арул̣абхаванз багид̇д̇знд̇и, нааг̇аа нааг̇абхаванз багид̇д̇знд̇и, яагкаа яагкабхаванз багид̇д̇знд̇и, анубуб̣б̣зна д̇асса гид̇д̇исад̣̇д̣̇о барамбарааяа аж̇ж̇зд̇арахи ид̇ха амхаагам̣ самаяам̣ ануббад̇д̇о, д̇ам̣ маяам̣ д̣̇аанам̣ багид̇д̇знд̇аа вигобзнд̇аа нисиннаа суд̣̇иннам̣, уд̣̇ааху д̣̇уд̣̇д̣̇иннанд̇и. со ко банааяам̣, махаарааж̇а, гид̇д̇исад̣̇д̣̇о нибун̣аанам̣ вин̃н̃уунам̣ вид̣̇уунам̣ вибхаавийнам̣ б̣од̇хисад̇д̇аанам̣ д̣̇аса г̇ун̣з ануд̣̇ассад̇и. гад̇амз д̣̇аса? аг̇зд̇хад̇аа нираалаяад̇аа жааг̇о бахаанам̣ абунараавад̇д̇ид̇аа сукумад̇аа маханд̇ад̇аа д̣̇урануб̣од̇хад̇аа д̣̇уллабхад̇аа асад̣̇исад̇аа б̣уд̣̇д̇хад̇хаммасса, со ко банааяам̣, махаарааж̇а, гид̇д̇исад̣̇д̣̇о нибун̣аанам̣ вин̃н̃уунам̣ вид̣̇уунам̣ вибхаавийнам̣ б̣од̇хисад̇д̇аанам̣ имз д̣̇аса г̇ун̣з ануд̣̇ассад̇ий’’д̇и.
‘‘Dukkarassa, mahārāja, katattā bodhisattassa kittisaddo dasasahassiyā lokadhātuyā sadevamanussesu abbhuggato, devā devabhavane pakittenti, asurā asurabhavane pakittenti, garuḷā garuḷabhavane pakittenti, nāgā nāgabhavane pakittenti, yakkhā yakkhabhavane pakittenti, anupubbena tassa kittisaddo paramparāya ajjetarahi idha amhākaṃ samayaṃ anuppatto, taṃ mayaṃ dānaṃ pakittentā vikopentā nisinnā sudinnaṃ, udāhu duddinnanti. So kho panāyaṃ, mahārāja, kittisaddo nipuṇānaṃ viññūnaṃ vidūnaṃ vibhāvīnaṃ bodhisattānaṃ dasa guṇe anudassati. Katame dasa? Agedhatā nirālayatā cāgo pahānaṃ apunarāvattitā sukhumatā mahantatā duranubodhatā dullabhatā asadisatā buddhadhammassa, so kho panāyaṃ, mahārāja, kittisaddo nipuṇānaṃ viññūnaṃ vidūnaṃ vibhāvīnaṃ bodhisattānaṃ ime dasa guṇe anudassatī’’ti.
‘‘бханд̇з нааг̇асзна, яо барам̣ д̣̇угкаабзд̇ваа д̣̇аанам̣ д̣̇зд̇и, аби ну д̇ам̣ д̣̇аанам̣ сукавибаагам̣ ход̇и саг̇г̇асам̣вад̇д̇анига’’нд̇и? ‘‘аама, махаарааж̇а, гим̣ вад̇д̇аб̣б̣а’’нд̇и. ‘‘ин̇гха, бханд̇з нааг̇асзна, гааран̣ам̣ убад̣̇ассзхий’’д̇и. ‘‘ид̇ха, махаарааж̇а, гожи саман̣о ваа б̣раахман̣о ваа сийлаваа ход̇и галяаан̣ад̇хаммо, со бхавзяяа багкахад̇о ваа бийтасаббий ваа ан̃н̃ад̇арам̣ ваа б̣яаад̇хим̣ аабанно, д̇амзнам̣ яо гожи бун̃н̃агаамо яаанам̣ ааробзд̇ваа бад̇т̇ид̇ам̣ д̣̇зсаманубаабзяяа, аби ну ко, махаарааж̇а, д̇асса бурисасса д̇ад̇онид̣̇аанам̣ гин̃жи сукам̣ ниб̣б̣ад̇д̇зяяа саг̇г̇асам̣вад̇д̇анигам̣ д̇ам̣ гамма’’нд̇и? ‘‘аама, бханд̇з, гим̣ вад̇д̇аб̣б̣ам̣? хад̇т̇ияаанам̣ ваа со, бханд̇з, бурисо лабхзяяа ассаяаанам̣ ваа рат̇аяаанам̣ ваа, т̇алз т̇алаяаанам̣ ж̇алз ж̇алаяаанам̣ д̣̇звзсу д̣̇зваяаанам̣ мануссзсу мануссаяаанам̣, д̇ад̣̇анужчавигам̣ д̇ад̣̇ануломигам̣ бхавз бхавз ниб̣б̣ад̇д̇зяяа, д̇ад̣̇анужчавигаани д̇ад̣̇ануломигаани жасса сукаани ниб̣б̣ад̇д̇зяяум̣, суг̇ад̇ид̇о суг̇ад̇им̣ г̇ажчзяяа, д̇знзва гаммаабхисанд̣̇зна ид̣̇д̇хияаанам̣ абхируяха бад̇т̇ид̇ам̣ ниб̣б̣аананаг̇арам̣ баабун̣зяяаа’’д̇и. ‘‘д̇зна хи, махаарааж̇а, барад̣̇угкаабанзна д̣̇иннад̣̇аанам̣ сукавибаагам̣ ход̇и саг̇г̇асам̣вад̇д̇анигам̣ , яам̣ со бурисо б̣алийб̣ад̣̇д̣̇з д̣̇угкаабзд̇ваа зваруубам̣ сукам̣ анубхавад̇и.
‘‘Bhante nāgasena, yo paraṃ dukkhāpetvā dānaṃ deti, api nu taṃ dānaṃ sukhavipākaṃ hoti saggasaṃvattanika’’nti? ‘‘Āma, mahārāja, kiṃ vattabba’’nti. ‘‘Iṅgha, bhante nāgasena, kāraṇaṃ upadassehī’’ti. ‘‘Idha, mahārāja, koci samaṇo vā brāhmaṇo vā sīlavā hoti kalyāṇadhammo, so bhaveyya pakkhahato vā pīṭhasappī vā aññataraṃ vā byādhiṃ āpanno, tamenaṃ yo koci puññakāmo yānaṃ āropetvā patthitaṃ desamanupāpeyya, api nu kho, mahārāja, tassa purisassa tatonidānaṃ kiñci sukhaṃ nibbatteyya saggasaṃvattanikaṃ taṃ kamma’’nti? ‘‘Āma, bhante, kiṃ vattabbaṃ? Hatthiyānaṃ vā so, bhante, puriso labheyya assayānaṃ vā rathayānaṃ vā, thale thalayānaṃ jale jalayānaṃ devesu devayānaṃ manussesu manussayānaṃ, tadanucchavikaṃ tadanulomikaṃ bhave bhave nibbatteyya, tadanucchavikāni tadanulomikāni cassa sukhāni nibbatteyyuṃ, sugatito sugatiṃ gaccheyya, teneva kammābhisandena iddhiyānaṃ abhiruyha patthitaṃ nibbānanagaraṃ pāpuṇeyyā’’ti. ‘‘Tena hi, mahārāja, paradukkhāpanena dinnadānaṃ sukhavipākaṃ hoti saggasaṃvattanikaṃ , yaṃ so puriso balībadde dukkhāpetvā evarūpaṃ sukhaṃ anubhavati.
‘‘абарамби , махаарааж̇а, уд̇д̇арим̣ гааран̣ам̣ сун̣охи, яат̇аа барад̣̇угкаабанзна д̣̇иннад̣̇аанам̣ сукавибаагам̣ ход̇и саг̇г̇асам̣вад̇д̇анигам̣. ид̇ха, махаарааж̇а, яо гожи рааж̇аа ж̇анабад̣̇ад̇о д̇хаммигам̣ б̣алим̣ уд̣̇д̇хараабзд̇ваа аан̣аабавад̇д̇анзна д̣̇аанам̣ д̣̇ад̣̇зяяа, аби ну ко со, махаарааж̇а, рааж̇аа д̇ад̇онид̣̇аанам̣ гин̃жи сукам̣ анубхавзяяа саг̇г̇асам̣вад̇д̇анигам̣ д̇ам̣ д̣̇аана’’нд̇и? ‘‘аама, бханд̇з, гим̣ вад̇д̇аб̣б̣ам̣, д̇ад̇онид̣̇аанам̣ со, бханд̇з, рааж̇аа уд̇д̇арим̣ анзгасад̇асахассаг̇ун̣ам̣ лабхзяяа. рааж̇уунам̣ ад̇ирааж̇аа бхавзяяа, д̣̇зваанам̣ ад̇ид̣̇зво бхавзяяа, б̣рахмаанам̣ ад̇иб̣рахмаа бхавзяяа, саман̣аанам̣ ад̇исаман̣о бхавзяяа, б̣раахман̣аанам̣ ад̇иб̣раахман̣о бхавзяяа, араханд̇аанам̣ ад̇иарахаа 3 бхавзяяаа’’д̇и. ‘‘д̇зна хи, махаарааж̇а, барад̣̇угкаабанзна д̣̇иннад̣̇аанам̣ сукавибаагам̣ ход̇и саг̇г̇асам̣вад̇д̇анигам̣, яам̣ со рааж̇аа б̣алинаа ж̇анам̣ бийл̣зд̇ваа д̣̇иннад̣̇аанзна зваруубам̣ уд̇д̇арим̣ яасасукам̣ анубхавад̇ий’’д̇и.
‘‘Aparampi , mahārāja, uttariṃ kāraṇaṃ suṇohi, yathā paradukkhāpanena dinnadānaṃ sukhavipākaṃ hoti saggasaṃvattanikaṃ. Idha, mahārāja, yo koci rājā janapadato dhammikaṃ baliṃ uddharāpetvā āṇāpavattanena dānaṃ dadeyya, api nu kho so, mahārāja, rājā tatonidānaṃ kiñci sukhaṃ anubhaveyya saggasaṃvattanikaṃ taṃ dāna’’nti? ‘‘Āma, bhante, kiṃ vattabbaṃ, tatonidānaṃ so, bhante, rājā uttariṃ anekasatasahassaguṇaṃ labheyya. Rājūnaṃ atirājā bhaveyya, devānaṃ atidevo bhaveyya, brahmānaṃ atibrahmā bhaveyya, samaṇānaṃ atisamaṇo bhaveyya, brāhmaṇānaṃ atibrāhmaṇo bhaveyya, arahantānaṃ atiarahā 4 bhaveyyā’’ti. ‘‘Tena hi, mahārāja, paradukkhāpanena dinnadānaṃ sukhavipākaṃ hoti saggasaṃvattanikaṃ, yaṃ so rājā balinā janaṃ pīḷetvā dinnadānena evarūpaṃ uttariṃ yasasukhaṃ anubhavatī’’ti.
‘‘ад̇ид̣̇аанам̣, бханд̇з нааг̇асзна, взссанд̇арзна ран̃н̃аа д̣̇иннам̣, яам̣ со сагам̣ бхарияам̣ барасса бхарияад̇т̇ааяа ад̣̇ааси, сагз орасз буд̇д̇з б̣раахман̣асса д̣̇аасад̇т̇ааяа ад̣̇ааси, ад̇ид̣̇аанам̣ наама, бханд̇з нааг̇асзна, логз вид̣̇уухи нинд̣̇ид̇ам̣ г̇арахид̇ам̣, яат̇аа наама, бханд̇з нааг̇асзна, ад̇ибхаарзна сагадасса агко бхиж̇ж̇ад̇и, ад̇ибхаарзна нааваа осийд̣̇ад̇и, ад̇ибхуд̇д̇зна бхож̇анам̣ висамам̣ барин̣амад̇и, ад̇ивассзна д̇хан̃н̃ам̣ винассад̇и, ад̇ид̣̇аанзна бхог̇агкаяам̣ убзд̇и, ад̇ид̇аабзна бат̇авий убад̣аяхад̇и, ад̇ирааг̇зна уммад̇д̇аго ход̇и, ад̇ид̣̇осзна важ̇жхо ход̇и, ад̇имохзна анаяам̣ аабаж̇ж̇ад̇и, ад̇илобхзна жораг̇г̇ахан̣амубаг̇ажчад̇и, ад̇ибхаязна нируж̇жхад̇и, ад̇ибуурзна над̣̇ий уд̇д̇арад̇и, ад̇иваад̇зна асани бад̇ад̇и, ад̇иаг̇г̇инаа од̣̇анам̣ уд̇д̇арад̇и, ад̇исан̃жаран̣зна на жирам̣ ж̇ийвад̇и. звамзва ко, бханд̇з нааг̇асзна, ад̇ид̣̇аанам̣ наама логз вид̣̇уухи нинд̣̇ид̇ам̣ г̇арахид̇ам̣, ад̇ид̣̇аанам̣, бханд̇з нааг̇асзна, взссанд̇арзна ран̃н̃аа д̣̇иннам̣, на д̇ад̇т̇а гин̃жи палам̣ ижчид̇аб̣б̣а’’нд̇и.
‘‘Atidānaṃ, bhante nāgasena, vessantarena raññā dinnaṃ, yaṃ so sakaṃ bhariyaṃ parassa bhariyatthāya adāsi, sake orase putte brāhmaṇassa dāsatthāya adāsi, atidānaṃ nāma, bhante nāgasena, loke vidūhi ninditaṃ garahitaṃ, yathā nāma, bhante nāgasena, atibhārena sakaṭassa akkho bhijjati, atibhārena nāvā osīdati, atibhuttena bhojanaṃ visamaṃ pariṇamati, ativassena dhaññaṃ vinassati, atidānena bhogakkhayaṃ upeti, atitāpena pathavī upaḍayhati, atirāgena ummattako hoti, atidosena vajjho hoti, atimohena anayaṃ āpajjati, atilobhena coraggahaṇamupagacchati, atibhayena nirujjhati, atipūrena nadī uttarati, ativātena asani patati, atiagginā odanaṃ uttarati, atisañcaraṇena na ciraṃ jīvati. Evameva kho, bhante nāgasena, atidānaṃ nāma loke vidūhi ninditaṃ garahitaṃ, atidānaṃ, bhante nāgasena, vessantarena raññā dinnaṃ, na tattha kiñci phalaṃ icchitabba’’nti.
‘‘ад̇ид̣̇аанам̣, махаарааж̇а, логз вид̣̇уухи ван̣н̣ид̇ам̣ т̇уд̇ам̣ басад̇т̇ам̣, яз гзжи яаад̣̇исам̣ гийд̣̇исам̣ д̣̇аанам̣ д̣̇знд̇и 5, ад̇ид̣̇аанад̣̇ааяий логз гид̇д̇им̣ баабун̣аад̇и. яат̇аа , махаарааж̇а, ад̇ибаварад̇ааяа д̣̇иб̣б̣ам̣ ванамуулам̣ г̇ахид̇амби хад̇т̇абаасз тид̇аанам̣ бараж̇анаанам̣ на д̣̇ассаяад̇и, аг̇ад̣̇о ад̇иж̇ажжад̇ааяа 6 бийл̣ааяа самуг̇гхаад̇аго рог̇аанам̣ анд̇агаро, аг̇г̇и ад̇иж̇од̇ид̇ааяа д̣ахад̇и, уд̣̇агам̣ ад̇исийд̇ад̇ааяа ниб̣б̣аабзд̇и, бад̣̇умам̣ барисуд̣̇д̇хад̇ааяа на убалимбад̇и вааригад̣̇д̣̇амзна, ман̣и ад̇иг̇ун̣ад̇ааяа гаамад̣̇ад̣̇о, важ̇ирам̣ ад̇ид̇икин̣ад̇ааяа виж̇жхад̇и ман̣имуд̇д̇аапалигам̣, бат̇авий ад̇имаханд̇ад̇ааяа нарораг̇амиг̇абагкиж̇аласзлабаб̣б̣ад̇ад̣̇умз д̇хаарзд̇и, самуд̣̇д̣̇о ад̇имаханд̇ад̇ааяа абарибууран̣о, синзру ад̇ибхаарад̇ааяа ажало, аагаасо ад̇ивид̇т̇аарад̇ааяа ананд̇о, суурияо ад̇иббабхад̇ааяа д̇имирам̣ гхаад̇зд̇и, сийхо ад̇иж̇аад̇ид̇ааяа виг̇ад̇абхаяо, малло ад̇иб̣алавад̇ааяа бадималлам̣ киббам̣ угкибад̇и , рааж̇аа ад̇ибун̃н̃ад̇ааяа ад̇хибад̇и, бхигку ад̇исийлаванд̇ад̇ааяа нааг̇аяагканарамаруухи намассанийяо, б̣уд̣̇д̇хо ад̇иаг̇г̇ад̇ааяа 7 анубамо. звамзва ко, махаарааж̇а, ад̇ид̣̇аанам̣ наама логз вид̣̇уухи ван̣н̣ид̇ам̣ т̇уд̇ам̣ басад̇т̇ам̣, яз гзжи яаад̣̇исам̣ гийд̣̇исам̣ д̣̇аанам̣ д̣̇знд̇и, ад̇ид̣̇аанад̣̇ааяий логз гид̇д̇им̣ баабун̣аад̇и, ад̇ид̣̇аанзна взссанд̇аро рааж̇аа д̣̇асасахассияаа логад̇хаад̇уяаа ван̣н̣ид̇о т̇уд̇о басад̇т̇о махид̇о гид̇д̇ид̇о, д̇знзва ад̇ид̣̇аанзна взссанд̇аро рааж̇аа аж̇ж̇зд̇арахи б̣уд̣̇д̇хо ж̇аад̇о аг̇г̇о сад̣̇звагз логз.
‘‘Atidānaṃ, mahārāja, loke vidūhi vaṇṇitaṃ thutaṃ pasatthaṃ, ye keci yādisaṃ kīdisaṃ dānaṃ denti 8, atidānadāyī loke kittiṃ pāpuṇāti. Yathā , mahārāja, atipavaratāya dibbaṃ vanamūlaṃ gahitampi hatthapāse ṭhitānaṃ parajanānaṃ na dassayati, agado atijaccatāya 9 pīḷāya samugghātako rogānaṃ antakaro, aggi atijotitāya ḍahati, udakaṃ atisītatāya nibbāpeti, padumaṃ parisuddhatāya na upalimpati vārikaddamena, maṇi atiguṇatāya kāmadado, vajiraṃ atitikhiṇatāya vijjhati maṇimuttāphalikaṃ, pathavī atimahantatāya naroragamigapakkhijalaselapabbatadume dhāreti, samuddo atimahantatāya aparipūraṇo, sineru atibhāratāya acalo, ākāso ativitthāratāya ananto, sūriyo atippabhatāya timiraṃ ghāteti, sīho atijātitāya vigatabhayo, mallo atibalavatāya paṭimallaṃ khippaṃ ukkhipati , rājā atipuññatāya adhipati, bhikkhu atisīlavantatāya nāgayakkhanaramarūhi namassanīyo, buddho atiaggatāya 10 anupamo. Evameva kho, mahārāja, atidānaṃ nāma loke vidūhi vaṇṇitaṃ thutaṃ pasatthaṃ, ye keci yādisaṃ kīdisaṃ dānaṃ denti, atidānadāyī loke kittiṃ pāpuṇāti, atidānena vessantaro rājā dasasahassiyā lokadhātuyā vaṇṇito thuto pasattho mahito kittito, teneva atidānena vessantaro rājā ajjetarahi buddho jāto aggo sadevake loke.
‘‘ад̇т̇и бана, махаарааж̇а, логз табанийяам̣ д̣̇аанам̣, яам̣ д̣̇агкин̣зяяз ануббад̇д̇з на д̣̇аад̇аб̣б̣а’’нд̇и? ‘‘д̣̇аса ко банимаани, бханд̇з нааг̇асзна, д̣̇аанаани, яаани логз ад̣̇аанасаммад̇аани, яо д̇аани д̣̇аанаани д̣̇зд̇и, со абааяаг̇аамий ход̇и. гад̇амаани д̣̇аса? маж̇ж̇ад̣̇аанам̣, бханд̇з нааг̇асзна, логз ад̣̇аанасаммад̇ам̣, яо д̇ам̣ д̣̇аанам̣ д̣̇зд̇и, со абааяаг̇аамий ход̇и. самаж̇ж̇ад̣̇аанам̣…бз… ид̇т̇ид̣̇аанам̣…бз… усабхад̣̇аанам̣…бз… жид̇д̇агаммад̣̇аанам̣…бз… сад̇т̇ад̣̇аанам̣ …бз… висад̣̇аанам̣…бз… сан̇калигад̣̇аанам̣…бз… гуггудасуугарад̣̇аанам̣…бз… д̇улаагуудамаанагуудад̣̇аанам̣, бханд̇з нааг̇асзна, логз ад̣̇аанасаммад̇ам̣ ход̇и, яо д̇ам̣ д̣̇аанам̣ д̣̇зд̇и, со абааяаг̇аамий ход̇и. имаани ко, бханд̇з нааг̇асзна, д̣̇аса д̣̇аанаани логз ад̣̇аанасаммад̇аани, яо д̇аани д̣̇аанаани д̣̇зд̇и, со абааяаг̇аамий ход̇ий’’д̇и.
‘‘Atthi pana, mahārāja, loke ṭhapanīyaṃ dānaṃ, yaṃ dakkhiṇeyye anuppatte na dātabba’’nti? ‘‘Dasa kho panimāni, bhante nāgasena, dānāni, yāni loke adānasammatāni, yo tāni dānāni deti, so apāyagāmī hoti. Katamāni dasa? Majjadānaṃ, bhante nāgasena, loke adānasammataṃ, yo taṃ dānaṃ deti, so apāyagāmī hoti. Samajjadānaṃ…pe… itthidānaṃ…pe… usabhadānaṃ…pe… cittakammadānaṃ…pe… satthadānaṃ …pe… visadānaṃ…pe… saṅkhalikadānaṃ…pe… kukkuṭasūkaradānaṃ…pe… tulākūṭamānakūṭadānaṃ, bhante nāgasena, loke adānasammataṃ hoti, yo taṃ dānaṃ deti, so apāyagāmī hoti. Imāni kho, bhante nāgasena, dasa dānāni loke adānasammatāni, yo tāni dānāni deti, so apāyagāmī hotī’’ti.
‘‘наахам̣ д̇ам̣, махаарааж̇а, ад̣̇аанасаммад̇ам̣ бужчаами, имам̣ кваахам̣, махаарааж̇а, д̇ам̣ бужчаами ‘ад̇т̇и бана, махаарааж̇а, логз табанийяам̣ д̣̇аанам̣, яам̣ д̣̇агкин̣зяяз ануббад̇д̇з на д̣̇аад̇аб̣б̣а’нд̇и. ‘‘над̇т̇и, бханд̇з нааг̇асзна, логз табанийяам̣ д̣̇аанам̣. яам̣ д̣̇агкин̣зяяз ануббад̇д̇з на д̣̇аад̇аб̣б̣ам̣, жид̇д̇аббасаад̣̇з уббаннз гзжи д̣̇агкин̣зяяаанам̣ бхож̇анам̣ д̣̇знд̇и, гзжи ажчаад̣̇анам̣, гзжи саяанам̣, гзжи аавасат̇ам̣, гзжи ад̇т̇аран̣абаавуран̣ам̣, гзжи д̣̇аасид̣̇аасам̣, гзжи кзд̇д̇авад̇т̇ум̣, гзжи д̣̇вибад̣̇ажад̇уббад̣̇ам̣, гзжи сад̇ам̣ сахассам̣ сад̇асахассам̣, гзжи махаараж̇ж̇ам̣, гзжи ж̇ийвид̇амби д̣̇знд̇ий’’д̇и. ‘‘яад̣̇и бана, махаарааж̇а, гзжи ж̇ийвид̇амби д̣̇знд̇и, гим̣ гааран̣аа взссанд̇арам̣ д̣̇аанабад̇им̣ ад̇иб̣аал̣хам̣ барибаад̇зси суд̣̇иннз буд̇д̇з жа д̣̇аарз жа?
‘‘Nāhaṃ taṃ, mahārāja, adānasammataṃ pucchāmi, imaṃ khvāhaṃ, mahārāja, taṃ pucchāmi ‘atthi pana, mahārāja, loke ṭhapanīyaṃ dānaṃ, yaṃ dakkhiṇeyye anuppatte na dātabba’nti. ‘‘Natthi, bhante nāgasena, loke ṭhapanīyaṃ dānaṃ. Yaṃ dakkhiṇeyye anuppatte na dātabbaṃ, cittappasāde uppanne keci dakkhiṇeyyānaṃ bhojanaṃ denti, keci acchādanaṃ, keci sayanaṃ, keci āvasathaṃ, keci attharaṇapāvuraṇaṃ, keci dāsidāsaṃ, keci khettavatthuṃ, keci dvipadacatuppadaṃ, keci sataṃ sahassaṃ satasahassaṃ, keci mahārajjaṃ, keci jīvitampi dentī’’ti. ‘‘Yadi pana, mahārāja, keci jīvitampi denti, kiṃ kāraṇā vessantaraṃ dānapatiṃ atibāḷhaṃ paripātesi sudinne putte ca dāre ca?
‘‘аби ну ко, махаарааж̇а, ад̇т̇и логабагад̇и логаажин̣н̣ам̣, лабхад̇и бид̇аа буд̇д̇ам̣ ин̣аддо ваа ааж̇ийвигабагад̇о ваа аавабид̇ум̣ ваа 11 виггин̣ид̇ум̣ ваа’’д̇и? ‘‘аама, бханд̇з, лабхад̇и бид̇аа буд̇д̇ам̣ ин̣аддо ваа ааж̇ийвигабагад̇о ваа аавабид̇ум̣ ваа виггин̣ид̇ум̣ ваа’’д̇и. ‘‘яад̣̇и, махаарааж̇а, лабхад̇и бид̇аа буд̇д̇ам̣ ин̣аддо ваа ааж̇ийвигабагад̇о ваа аавабид̇ум̣ ваа виггин̣ид̇ум̣ ваа , взссанд̇ароби, махаарааж̇а, рааж̇аа алабхамаано саб̣б̣ан̃н̃уд̇ан̃аан̣ам̣ убад̣̇д̣̇уд̇о д̣̇угкид̇о д̇асса д̇хаммад̇ханасса бадилаабхааяа буд̇д̇ад̣̇аарам̣ аавабзси жа виггин̣и жа. ид̇и, махаарааж̇а, взссанд̇арзна ран̃н̃аа ан̃н̃зсам̣ д̣̇иннам̣ язва д̣̇иннам̣, гад̇ам̣ язва гад̇ам̣. гисса бана д̇вам̣, махаарааж̇а, д̇зна д̣̇аанзна взссанд̇арам̣ д̣̇аанабад̇им̣ ад̇иб̣аал̣хам̣ абасаад̣̇зсий’’д̇и?
‘‘Api nu kho, mahārāja, atthi lokapakati lokāciṇṇaṃ, labhati pitā puttaṃ iṇaṭṭo vā ājīvikapakato vā āvapituṃ vā 12 vikkiṇituṃ vā’’ti? ‘‘Āma, bhante, labhati pitā puttaṃ iṇaṭṭo vā ājīvikapakato vā āvapituṃ vā vikkiṇituṃ vā’’ti. ‘‘Yadi, mahārāja, labhati pitā puttaṃ iṇaṭṭo vā ājīvikapakato vā āvapituṃ vā vikkiṇituṃ vā , vessantaropi, mahārāja, rājā alabhamāno sabbaññutañāṇaṃ upadduto dukkhito tassa dhammadhanassa paṭilābhāya puttadāraṃ āvapesi ca vikkiṇi ca. Iti, mahārāja, vessantarena raññā aññesaṃ dinnaṃ yeva dinnaṃ, kataṃ yeva kataṃ. Kissa pana tvaṃ, mahārāja, tena dānena vessantaraṃ dānapatiṃ atibāḷhaṃ apasādesī’’ti?
‘‘наахам̣, бханд̇з нааг̇асзна, взссанд̇арасса д̣̇аанабад̇ино д̣̇аанам̣ г̇арахаами, аби жа буд̇д̇ад̣̇аарам̣ яаажанд̇з ниминид̇ваа ад̇д̇аанам̣ д̣̇аад̇аб̣б̣а’’нд̇и. ‘‘зд̇ам̣ ко, махаарааж̇а, асаб̣бхигааран̣ам̣, яам̣ буд̇д̇ад̣̇аарам̣ яаажанд̇з ад̇д̇аанам̣ д̣̇ад̣̇зяяа, яам̣ яам̣ хи яаажанд̇з д̇ам̣ д̇ад̣̇зва д̣̇аад̇аб̣б̣ам̣, зд̇ам̣ саббурисаанам̣ гаммам̣. яат̇аа, махаарааж̇а, гожи бурисо баанийяам̣ аахараабзяяа, д̇асса яо бхож̇анам̣ д̣̇ад̣̇зяяа, аби ну со, махаарааж̇а, бурисо д̇асса гижжагаарий ассаа’’д̇и? ‘‘на хи, бханд̇з, яам̣ со аахараабзд̇и, д̇амзва д̇асса д̣̇знд̇о гижжагаарий ассаа’’д̇и. ‘‘звамзва ко, махаарааж̇а, взссанд̇аро рааж̇аа б̣раахман̣з буд̇д̇ад̣̇аарам̣ яаажанд̇з буд̇д̇ад̣̇аарам̣ язва ад̣̇ааси. сажз, махаарааж̇а, б̣раахман̣о взссанд̇арасса сарийрам̣ яаажзяяа, на со, махаарааж̇а, ад̇д̇аанам̣ рагкзяяа на гамбзяяа на раж̇ж̇зяяа, д̇асса д̣̇иннам̣ барижжад̇д̇ам̣ язва сарийрам̣ бхавзяяа. сажз, махаарааж̇а, гожи взссанд̇арам̣ д̣̇аанабад̇им̣ убаг̇анд̇ваа яаажзяяа ‘д̣̇аасад̇д̇ам̣ мз убзхий’д̇и, д̣̇иннам̣ барижжад̇д̇ам̣ язвасса сарийрам̣ бхавзяяа, на со д̣̇ад̇ваа д̇абзяяа 13, ран̃н̃о, махаарааж̇а, взссанд̇арасса гааяо б̣ахусаад̇хааран̣о.
‘‘Nāhaṃ, bhante nāgasena, vessantarassa dānapatino dānaṃ garahāmi, api ca puttadāraṃ yācante niminitvā attānaṃ dātabba’’nti. ‘‘Etaṃ kho, mahārāja, asabbhikāraṇaṃ, yaṃ puttadāraṃ yācante attānaṃ dadeyya, yaṃ yaṃ hi yācante taṃ tadeva dātabbaṃ, etaṃ sappurisānaṃ kammaṃ. Yathā, mahārāja, koci puriso pānīyaṃ āharāpeyya, tassa yo bhojanaṃ dadeyya, api nu so, mahārāja, puriso tassa kiccakārī assā’’ti? ‘‘Na hi, bhante, yaṃ so āharāpeti, tameva tassa dento kiccakārī assā’’ti. ‘‘Evameva kho, mahārāja, vessantaro rājā brāhmaṇe puttadāraṃ yācante puttadāraṃ yeva adāsi. Sace, mahārāja, brāhmaṇo vessantarassa sarīraṃ yāceyya, na so, mahārāja, attānaṃ rakkheyya na kampeyya na rajjeyya, tassa dinnaṃ pariccattaṃ yeva sarīraṃ bhaveyya. Sace, mahārāja, koci vessantaraṃ dānapatiṃ upagantvā yāceyya ‘dāsattaṃ me upehī’ti, dinnaṃ pariccattaṃ yevassa sarīraṃ bhaveyya, na so datvā tapeyya 14, rañño, mahārāja, vessantarassa kāyo bahusādhāraṇo.
‘‘яат̇аа, махаарааж̇а, баггаа мам̣сабзси б̣ахусаад̇хааран̣аа, звамзва ко, махаарааж̇а, ран̃н̃о взссанд̇арасса гааяо б̣ахусаад̇хааран̣о. яат̇аа ваа бана, махаарааж̇а, палид̇о 15 ругко наанаад̣̇иж̇аг̇ан̣асаад̇хааран̣о, звамзва ко, махаарааж̇а, ран̃н̃о взссанд̇арасса гааяо б̣ахусаад̇хааран̣о. гим̣ гааран̣аа? ‘зваахам̣ бадибаж̇ж̇анд̇о саммаасамб̣од̇хим̣ баабун̣иссаамий’д̇и.
‘‘Yathā, mahārāja, pakkā maṃsapesi bahusādhāraṇā, evameva kho, mahārāja, rañño vessantarassa kāyo bahusādhāraṇo. Yathā vā pana, mahārāja, phalito 16 rukkho nānādijagaṇasādhāraṇo, evameva kho, mahārāja, rañño vessantarassa kāyo bahusādhāraṇo. Kiṃ kāraṇā? ‘Evāhaṃ paṭipajjanto sammāsambodhiṃ pāpuṇissāmī’ti.
‘‘яат̇аа, махаарааж̇а, бурисо ад̇хано д̇ханад̇т̇иго д̇ханабариязсанам̣ жарамаано аж̇абат̇ам̣ сан̇губат̇ам̣ взд̇д̇абат̇ам̣ г̇ажчад̇и, ж̇алат̇алаваан̣иж̇ж̇ам̣ гарод̇и, гааязна ваажааяа манасаа д̇ханам̣ аараад̇хзд̇и, д̇ханаббадилаабхааяа вааяамад̇и. звамзва ко, махаарааж̇а, взссанд̇аро д̣̇аанабад̇и ад̇хано б̣уд̣̇д̇хад̇ханзна саб̣б̣ан̃н̃уд̇ан̃аан̣арад̇анаббадилаабхааяа яаажагаанам̣ д̇ханад̇хан̃н̃ам̣ д̣̇аасид̣̇аасам̣ яаанавааханам̣ сагаласаабад̇зяяам̣ сагам̣ буд̇д̇ад̣̇аарам̣ ад̇д̇аанан̃жа жаж̇ид̇ваа саммаасамб̣од̇хим̣ язва бариязсад̇и.
‘‘Yathā, mahārāja, puriso adhano dhanatthiko dhanapariyesanaṃ caramāno ajapathaṃ saṅkupathaṃ vettapathaṃ gacchati, jalathalavāṇijjaṃ karoti, kāyena vācāya manasā dhanaṃ ārādheti, dhanappaṭilābhāya vāyamati. Evameva kho, mahārāja, vessantaro dānapati adhano buddhadhanena sabbaññutañāṇaratanappaṭilābhāya yācakānaṃ dhanadhaññaṃ dāsidāsaṃ yānavāhanaṃ sakalasāpateyyaṃ sakaṃ puttadāraṃ attānañca cajitvā sammāsambodhiṃ yeva pariyesati.
‘‘яат̇аа ваа бана, махаарааж̇а, амажжо муд̣̇д̣̇агаамо муд̣̇д̣̇аад̇хигаран̣ам̣ яам̣ гин̃жи г̇зхз д̇ханад̇хан̃н̃ам̣ хиран̃н̃асуван̣н̣ам̣, д̇ам̣ саб̣б̣ам̣ д̣̇ад̇вааби муд̣̇д̣̇аббадилаабхааяа вааяамад̇и. звамзва ко, махаарааж̇а, взссанд̇аро д̣̇аанабад̇и саб̣б̣ам̣ д̇ам̣ б̣аахираб̣бханд̇арад̇ханам̣ д̣̇ад̇ваа ж̇ийвид̇амби барзсам̣ д̣̇ад̇ваа саммаасамб̣од̇хим̣ язва бариязсад̇и.
‘‘Yathā vā pana, mahārāja, amacco muddakāmo muddādhikaraṇaṃ yaṃ kiñci gehe dhanadhaññaṃ hiraññasuvaṇṇaṃ, taṃ sabbaṃ datvāpi muddappaṭilābhāya vāyamati. Evameva kho, mahārāja, vessantaro dānapati sabbaṃ taṃ bāhirabbhantaradhanaṃ datvā jīvitampi paresaṃ datvā sammāsambodhiṃ yeva pariyesati.
‘‘аби жа, махаарааж̇а, взссанд̇арасса д̣̇аанабад̇ино звам̣ ахоси ‘яам̣ со б̣раахман̣о яаажад̇и, д̇амзваахам̣ д̇асса д̣̇знд̇о гижжагаарий наама хомий’д̇и, звам̣ со д̇асса буд̇д̇ад̣̇аарамад̣̇ааси. на ко, махаарааж̇а, взссанд̇аро д̣̇аанабад̇и д̣̇зссад̇ааяа б̣раахман̣асса буд̇д̇ад̣̇аарамад̣̇ааси, на ад̣̇ассанагаамад̇ааяа буд̇д̇ад̣̇аарамад̣̇ааси, на ад̇иб̣ахугаа мз буд̇д̇ад̣̇аараа, ‘на саггоми д̇з босзд̇у’нд̇и буд̇д̇ад̣̇аарамад̣̇ааси, на угган̣тид̇о ‘аббияаа мз’д̇и нийхарид̇угаамад̇ааяа буд̇д̇ад̣̇аарамад̣̇ааси. ат̇а ко саб̣б̣ан̃н̃уд̇ан̃аан̣арад̇анассзва бияад̇д̇аа саб̣б̣ан̃н̃уд̇ан̃аан̣асса гааран̣аа взссанд̇аро рааж̇аа зваруубам̣ ад̇улам̣ вибуламануд̇д̇арам̣ бияам̣ манаабам̣ д̣̇аяид̇ам̣ баан̣асамам̣ буд̇д̇ад̣̇аарад̣̇аанаварам̣ б̣раахман̣асса ад̣̇ааси.
‘‘Api ca, mahārāja, vessantarassa dānapatino evaṃ ahosi ‘yaṃ so brāhmaṇo yācati, tamevāhaṃ tassa dento kiccakārī nāma homī’ti, evaṃ so tassa puttadāramadāsi. Na kho, mahārāja, vessantaro dānapati dessatāya brāhmaṇassa puttadāramadāsi, na adassanakāmatāya puttadāramadāsi, na atibahukā me puttadārā, ‘na sakkomi te posetu’nti puttadāramadāsi, na ukkaṇṭhito ‘appiyā me’ti nīharitukāmatāya puttadāramadāsi. Atha kho sabbaññutañāṇaratanasseva piyattā sabbaññutañāṇassa kāraṇā vessantaro rājā evarūpaṃ atulaṃ vipulamanuttaraṃ piyaṃ manāpaṃ dayitaṃ pāṇasamaṃ puttadāradānavaraṃ brāhmaṇassa adāsi.
‘‘бхаасид̇амбзд̇ам̣ , махаарааж̇а, бхаг̇авад̇аа д̣̇зваад̇ид̣̇звзна жарияаабидагз –
‘‘Bhāsitampetaṃ , mahārāja, bhagavatā devātidevena cariyāpiṭake –
‘‘‘на мз д̣̇зссаа убхо буд̇д̇аа, мад̣̇д̣̇ий д̣̇звий на д̣̇зссияаа;
‘‘‘Na me dessā ubho puttā, maddī devī na dessiyā;
саб̣б̣ан̃н̃уд̇ам̣ бияам̣ маяхам̣, д̇асмаа бияз ад̣̇аасаха’нд̇и.
Sabbaññutaṃ piyaṃ mayhaṃ, tasmā piye adāsaha’nti.
‘‘д̇асмаа, махаарааж̇а, взссад̇аро рааж̇аа буд̇д̇ад̣̇аанам̣ 17 д̣̇ад̇ваа бан̣н̣асаалам̣ бависид̇ваа нибаж̇ж̇и. д̇асса ад̇ибзмзна д̣̇угкид̇асса б̣алавасого уббаж̇ж̇и, хад̣̇аяавад̇т̇у ун̣хамахоси. наасигааяа аббахонд̇ияаа мукзна ун̣хз ассаасабассаасз виссаж̇ж̇зси, ассууни баривад̇д̇ид̇ваа лохид̇аб̣инд̣̇ууни худ̇ваа нзд̇д̇зхи нигкамим̣су. звамзва ко, махаарааж̇а, д̣̇угкзна взссанд̇аро рааж̇аа б̣раахман̣асса буд̇д̇ад̣̇аарамад̣̇ааси ‘маа мз д̣̇аанабат̇о барихааяий’д̇и.
‘‘Tasmā, mahārāja, vessataro rājā puttadānaṃ 18 datvā paṇṇasālaṃ pavisitvā nipajji. Tassa atipemena dukkhitassa balavasoko uppajji, hadayavatthu uṇhamahosi. Nāsikāya appahontiyā mukhena uṇhe assāsapassāse vissajjesi, assūni parivattitvā lohitabindūni hutvā nettehi nikkhamiṃsu. Evameva kho, mahārāja, dukkhena vessantaro rājā brāhmaṇassa puttadāramadāsi ‘mā me dānapatho parihāyī’ti.
‘‘аби жа, махаарааж̇а, взссанд̇аро рааж̇аа д̣̇вз ад̇т̇авасз бадижжа б̣раахман̣асса д̣̇вз д̣̇аарагз ад̣̇ааси. гад̇амз д̣̇вз? д̣̇аанабат̇о жа мз абарихийно бхависсад̇и, д̣̇угкид̇з жа мз буд̇д̇агз ванамуулапалзхи ид̇онид̣̇аанам̣ аяяаго можзссад̇ийд̇и. ж̇аанаад̇и хи, махаарааж̇а, взссанд̇аро рааж̇аа ‘на мз д̣̇аарагаа саггаа гзнажи д̣̇аасабхог̇зна бхун̃ж̇ид̇ум̣, имз жа д̣̇аарагз аяяаго ниггин̣иссад̇и, звам̣ амхаагамби г̇аманам̣ бхависсад̇ий’д̇и. имз ко, махаарааж̇а, д̣̇вз ад̇т̇авасз бадижжа б̣раахман̣асса д̣̇вз д̣̇аарагз ад̣̇ааси.
‘‘Api ca, mahārāja, vessantaro rājā dve atthavase paṭicca brāhmaṇassa dve dārake adāsi. Katame dve? Dānapatho ca me aparihīno bhavissati, dukkhite ca me puttake vanamūlaphalehi itonidānaṃ ayyako mocessatīti. Jānāti hi, mahārāja, vessantaro rājā ‘na me dārakā sakkā kenaci dāsabhogena bhuñjituṃ, ime ca dārake ayyako nikkiṇissati, evaṃ amhākampi gamanaṃ bhavissatī’ti. Ime kho, mahārāja, dve atthavase paṭicca brāhmaṇassa dve dārake adāsi.
‘‘аби жа, махаарааж̇а, взссанд̇аро рааж̇аа ж̇аанаад̇и ‘аяам̣ ко б̣раахман̣о ж̇ин̣н̣о вуд̣дхо махаллаго д̣̇уб̣б̣ало бхаг̇г̇о д̣̇ан̣д̣абарааяан̣о кийн̣ааяуго барид̇д̇абун̃н̃о, нзсо самад̇т̇о имз д̣̇аарагз д̣̇аасабхог̇зна бхун̃ж̇ид̇у’нд̇и. саггун̣зяяа бана, махаарааж̇а, бурисо баагад̇игзна б̣алзна имз жанд̣̇имасуурияз звам̣махид̣̇д̇хигз звам̣махаанубхаавз г̇ахзд̇ваа бзл̣ааяа ваа самуг̇г̇з ваа багкибид̇ваа ниббабхз гад̇ваа т̇аалагабарибхог̇зна 19 барибхун̃ж̇ид̇у’’нд̇и? ‘‘на хи, бханд̇з’’д̇и. ‘‘звамзва ко, махаарааж̇а, имасмим̣ логз жанд̣̇имасуурияаббадибхааг̇асса взссанд̇арасса д̣̇аарагаа на саггаа гзнажи д̣̇аасабхог̇зна бхун̃ж̇ид̇унд̇и.
‘‘Api ca, mahārāja, vessantaro rājā jānāti ‘ayaṃ kho brāhmaṇo jiṇṇo vuḍḍho mahallako dubbalo bhaggo daṇḍaparāyaṇo khīṇāyuko parittapuñño, neso samattho ime dārake dāsabhogena bhuñjitu’nti. Sakkuṇeyya pana, mahārāja, puriso pākatikena balena ime candimasūriye evaṃmahiddhike evaṃmahānubhāve gahetvā peḷāya vā samugge vā pakkhipitvā nippabhe katvā thālakaparibhogena 20 paribhuñjitu’’nti? ‘‘Na hi, bhante’’ti. ‘‘Evameva kho, mahārāja, imasmiṃ loke candimasūriyappaṭibhāgassa vessantarassa dārakā na sakkā kenaci dāsabhogena bhuñjitunti.
‘‘абарамби, махаарааж̇а, уд̇д̇арим̣ гааран̣ам̣ сун̣охи, язна гааран̣зна взссанд̇арасса д̣̇аарагаа на саггаа гзнажи д̣̇аасабхог̇зна бхун̃ж̇ид̇ум̣. яат̇аа, махаарааж̇а, ран̃н̃о жаггавад̇д̇исса ман̣ирад̇анам̣ субхам̣ ж̇аад̇иманд̇ам̣ адтам̣сам̣ субаригаммагад̇ам̣ жад̇ухад̇т̇ааяаамам̣ сагаданаабхибарин̣аахам̣ на саггаа гзнажи билод̇игааяа взтзд̇ваа бзл̣ааяа багкибид̇ваа сад̇т̇аганисаанабарибхог̇зна барибхун̃ж̇ид̇ум̣, звамзва ко, махаарааж̇а, логз жаггавад̇д̇иран̃н̃о ман̣ирад̇анаббадибхааг̇асса взссанд̇арасса д̣̇аарагаа на саггаа гзнажи д̣̇аасабхог̇зна бхун̃ж̇ид̇ум̣.
‘‘Aparampi, mahārāja, uttariṃ kāraṇaṃ suṇohi, yena kāraṇena vessantarassa dārakā na sakkā kenaci dāsabhogena bhuñjituṃ. Yathā, mahārāja, rañño cakkavattissa maṇiratanaṃ subhaṃ jātimantaṃ aṭṭhaṃsaṃ suparikammakataṃ catuhatthāyāmaṃ sakaṭanābhipariṇāhaṃ na sakkā kenaci pilotikāya veṭhetvā peḷāya pakkhipitvā satthakanisānaparibhogena paribhuñjituṃ, evameva kho, mahārāja, loke cakkavattirañño maṇiratanappaṭibhāgassa vessantarassa dārakā na sakkā kenaci dāsabhogena bhuñjituṃ.
‘‘абарамби, махаарааж̇а, уд̇д̇арим̣ гааран̣ам̣ сун̣охи, язна гааран̣зна взссанд̇арасса д̣̇аарагаа на саггаа гзнажи д̣̇аасабхог̇зна бхун̃ж̇ид̇ум̣. яат̇аа, махаарааж̇а, д̇ид̇хаа бабхинно саб̣б̣асзд̇о сад̇д̇аббад̇идтид̇о адтарад̇ануб̣б̣зд̇хо наварад̇анааяаамабарин̣аахо баасаад̣̇иго д̣̇ассанийяо убосат̇о нааг̇арааж̇аа на саггаа гзнажи суббзна ваа сараавзна ваа бид̣̇ахид̇ум̣, г̇оважчаго вияа важчагасаалааяа багкибид̇ваа барихарид̇ум̣ ваа, звамзва ко, махаарааж̇а, логз убосат̇анааг̇арааж̇аббадибхааг̇асса взссанд̇арасса д̣̇аарагаа на саггаа гзнажи д̣̇аасабхог̇зна бхун̃ж̇ид̇ум̣.
‘‘Aparampi, mahārāja, uttariṃ kāraṇaṃ suṇohi, yena kāraṇena vessantarassa dārakā na sakkā kenaci dāsabhogena bhuñjituṃ. Yathā, mahārāja, tidhā pabhinno sabbaseto sattappatiṭṭhito aṭṭharatanubbedho navaratanāyāmapariṇāho pāsādiko dassanīyo uposatho nāgarājā na sakkā kenaci suppena vā sarāvena vā pidahituṃ, govacchako viya vacchakasālāya pakkhipitvā pariharituṃ vā, evameva kho, mahārāja, loke uposathanāgarājappaṭibhāgassa vessantarassa dārakā na sakkā kenaci dāsabhogena bhuñjituṃ.
‘‘абарамби, махаарааж̇а, уд̇д̇арим̣ гааран̣ам̣ сун̣охи, язна гааран̣зна взссанд̇арасса д̣̇аарагаа на саггаа гзнажи д̣̇аасабхог̇зна бхун̃ж̇ид̇ум̣. яат̇аа, махаарааж̇а, махаасамуд̣̇д̣̇о д̣̇ийгхабут̇улавид̇т̇ин̣н̣о г̇амбхийро аббамзяяо д̣̇уруд̇д̇аро абарияог̇аал̣хо анаавадо на саггаа гзнажи саб̣б̣ад̇т̇а бид̣̇ахид̇ваа згад̇ид̇т̇зна барибхог̇ам̣ гаад̇ум̣, звамзва ко, махаарааж̇а, логз махаасамуд̣̇д̣̇аббадибхааг̇асса взссанд̇арасса д̣̇аарагаа на саггаа гзнажи д̣̇аасабхог̇зна бхун̃ж̇ид̇ум̣.
‘‘Aparampi, mahārāja, uttariṃ kāraṇaṃ suṇohi, yena kāraṇena vessantarassa dārakā na sakkā kenaci dāsabhogena bhuñjituṃ. Yathā, mahārāja, mahāsamuddo dīghaputhulavitthiṇṇo gambhīro appameyyo duruttaro apariyogāḷho anāvaṭo na sakkā kenaci sabbattha pidahitvā ekatitthena paribhogaṃ kātuṃ, evameva kho, mahārāja, loke mahāsamuddappaṭibhāgassa vessantarassa dārakā na sakkā kenaci dāsabhogena bhuñjituṃ.
‘‘абарамби, махаарааж̇а, уд̇д̇арим̣ гааран̣ам̣ сун̣охи, язна гааран̣зна взссанд̇арасса д̣̇аарагаа на саггаа гзнажи д̣̇аасабхог̇зна бхун̃ж̇ид̇ум̣. яат̇аа, махаарааж̇а, химаванд̇о баб̣б̣ад̇арааж̇аа бан̃жаяож̇анасад̇ам̣ ажжуг̇г̇ад̇о набхз д̇исахассаяож̇анааяаамавид̇т̇ааро жад̇ураасийд̇игуудасахассаббадиман̣д̣ид̇о бан̃жаннам̣ махаанад̣̇ийсад̇аанам̣ бабхаво махаабхууд̇аг̇ан̣аалаяо наанаавид̇хаг̇анд̇хад̇харо д̣̇иб̣б̣осад̇хасад̇асамалан̇гад̇о набхз валаахаго вияа ажжуг̇г̇ад̇о д̣̇иссад̇и, звамзва ко, махаарааж̇а, логз химаванд̇абаб̣б̣ад̇арааж̇аббадибхааг̇асса взссанд̇арасса д̣̇аарагаа на саггаа гзнажи д̣̇аасабхог̇зна бхун̃ж̇ид̇ум̣.
‘‘Aparampi, mahārāja, uttariṃ kāraṇaṃ suṇohi, yena kāraṇena vessantarassa dārakā na sakkā kenaci dāsabhogena bhuñjituṃ. Yathā, mahārāja, himavanto pabbatarājā pañcayojanasataṃ accuggato nabhe tisahassayojanāyāmavitthāro caturāsītikūṭasahassappaṭimaṇḍito pañcannaṃ mahānadīsatānaṃ pabhavo mahābhūtagaṇālayo nānāvidhagandhadharo dibbosadhasatasamalaṅkato nabhe valāhako viya accuggato dissati, evameva kho, mahārāja, loke himavantapabbatarājappaṭibhāgassa vessantarassa dārakā na sakkā kenaci dāsabhogena bhuñjituṃ.
‘‘абарамби, махаарааж̇а, уд̇д̇арим̣ гааран̣ам̣ сун̣охи, язна гааран̣зна взссанд̇арасса д̣̇аарагаа на саггаа гзнажи д̣̇аасабхог̇зна бхун̃ж̇ид̇ум̣. яат̇аа, махаарааж̇а, рад̇д̇анд̇хагаарад̇имисааяам̣ убарибаб̣б̣ад̇аг̇г̇з ж̇аламаано махаааг̇г̇игканд̇хо сувид̣̇уурзби бан̃н̃ааяад̇и, звамзва ко, махаарааж̇а, взссанд̇аро рааж̇аа баб̣б̣ад̇аг̇г̇з ж̇аламаано махаааг̇г̇игканд̇хо вияа сувид̣̇уурзби баагадо бан̃н̃ааяад̇и, д̇асса д̣̇аарагаа на саггаа гзнажи д̣̇аасабхог̇зна бхун̃ж̇ид̇ум̣.
‘‘Aparampi, mahārāja, uttariṃ kāraṇaṃ suṇohi, yena kāraṇena vessantarassa dārakā na sakkā kenaci dāsabhogena bhuñjituṃ. Yathā, mahārāja, rattandhakāratimisāyaṃ uparipabbatagge jalamāno mahāaggikkhandho suvidūrepi paññāyati, evameva kho, mahārāja, vessantaro rājā pabbatagge jalamāno mahāaggikkhandho viya suvidūrepi pākaṭo paññāyati, tassa dārakā na sakkā kenaci dāsabhogena bhuñjituṃ.
‘‘абарамби, махаарааж̇а, уд̇д̇арим̣ гааран̣ам̣ сун̣охи, язна гааран̣зна взссанд̇арасса д̣̇аарагаа на саггаа гзнажи д̣̇аасабхог̇зна бхун̃ж̇ид̇ум̣. яат̇аа, махаарааж̇а, химаванд̇з баб̣б̣ад̇з нааг̇абубпасамаяз уж̇уваад̇з вааяанд̇з д̣̇аса д̣̇ваад̣̇аса яож̇анаани бубпаг̇анд̇хо вааяад̇и, звамзва ко , махаарааж̇а, взссанд̇арасса ран̃н̃о аби яож̇анасахассзхиби яаава аганидтабхаванам̣ зд̇т̇анд̇арз сураасураг̇арул̣аг̇анд̇хаб̣б̣аяагкарагкасамахораг̇агиннараинд̣̇абхаванзсу гид̇д̇исад̣̇д̣̇о аб̣бхуг̇г̇ад̇о, сийлавараг̇анд̇хо жасса самбавааяад̇и, д̇зна д̇асса д̣̇аарагаа на саггаа гзнажи д̣̇аасабхог̇зна бхун̃ж̇ид̇ум̣. анусидто, махаарааж̇а, ж̇аалий гумааро бид̇араа взссанд̇арзна ран̃н̃аа ‘аяяаго д̇з, д̇аад̇а, д̇умхз б̣раахман̣асса д̇ханам̣ д̣̇ад̇ваа ниггин̣анд̇о д̇ам̣ нигкасахассам̣ д̣̇ад̇ваа ниггин̣аад̇у, ган̣хааж̇инам̣ ниггин̣анд̇о д̣̇аасасад̇ам̣ д̣̇аасисад̇ам̣ хад̇т̇исад̇ам̣ ассасад̇ам̣ д̇хзнусад̇ам̣ усабхасад̇ам̣ нигкасад̇анд̇и саб̣б̣асад̇ам̣ д̣̇ад̇ваа ниггин̣аад̇у, яад̣̇и д̇з, д̇аад̇а, аяяаго д̇умхз б̣раахман̣асса хад̇т̇ад̇о аан̣ааяа б̣аласаа муд̇хаа г̇ан̣хаад̇и, маа д̇умхз аяяагасса важанам̣ гарид̇т̇а, б̣раахман̣ассзва ануяааяино хот̇аа’д̇и, зваманусаасид̇ваа буд̇д̇з бзсзси, д̇ад̇о ж̇аалийгумааро г̇анд̇ваа аяяагзна будто гат̇зси –
‘‘Aparampi, mahārāja, uttariṃ kāraṇaṃ suṇohi, yena kāraṇena vessantarassa dārakā na sakkā kenaci dāsabhogena bhuñjituṃ. Yathā, mahārāja, himavante pabbate nāgapupphasamaye ujuvāte vāyante dasa dvādasa yojanāni pupphagandho vāyati, evameva kho , mahārāja, vessantarassa rañño api yojanasahassehipi yāva akaniṭṭhabhavanaṃ etthantare surāsuragaruḷagandhabbayakkharakkhasamahoragakinnaraindabhavanesu kittisaddo abbhuggato, sīlavaragandho cassa sampavāyati, tena tassa dārakā na sakkā kenaci dāsabhogena bhuñjituṃ. Anusiṭṭho, mahārāja, jālī kumāro pitarā vessantarena raññā ‘ayyako te, tāta, tumhe brāhmaṇassa dhanaṃ datvā nikkiṇanto taṃ nikkhasahassaṃ datvā nikkiṇātu, kaṇhājinaṃ nikkiṇanto dāsasataṃ dāsisataṃ hatthisataṃ assasataṃ dhenusataṃ usabhasataṃ nikkhasatanti sabbasataṃ datvā nikkiṇātu, yadi te, tāta, ayyako tumhe brāhmaṇassa hatthato āṇāya balasā mudhā gaṇhāti, mā tumhe ayyakassa vacanaṃ karittha, brāhmaṇasseva anuyāyino hothā’ti, evamanusāsitvā putte pesesi, tato jālīkumāro gantvā ayyakena puṭṭho kathesi –
‘‘‘сахассаг̇гхам̣ хи мам̣ д̇аад̇а, б̣раахман̣асса бид̇аа ад̣̇аа;
‘‘‘Sahassagghaṃ hi maṃ tāta, brāhmaṇassa pitā adā;
ат̇о ган̣хааж̇инам̣ ган̃н̃ам̣, хад̇т̇ийнан̃жа сад̇зна жаа’’’д̇и.
Atho kaṇhājinaṃ kaññaṃ, hatthīnañca satena cā’’’ti.
‘‘суниб̣б̣зтид̇о, бханд̇з нааг̇асзна, бан̃хо; субхиннам̣ д̣̇идтиж̇аалам̣; сумад̣̇д̣̇ид̇о бараваад̣̇о; сагасамаяо суд̣̇ийбид̇о; б̣яан̃ж̇анам̣ субарисод̇хид̇ам̣; сувибхад̇д̇о ад̇т̇о; звамзд̇ам̣ д̇ат̇аа самбадижчаамий’’д̇и.
‘‘Sunibbeṭhito, bhante nāgasena, pañho; subhinnaṃ diṭṭhijālaṃ; sumaddito paravādo; sakasamayo sudīpito; byañjanaṃ suparisodhitaṃ; suvibhatto attho; evametaṃ tathā sampaṭicchāmī’’ti.
взссанд̇арабан̃хо батамо.
Vessantarapañho paṭhamo.
Footnotes:
