| Library / Tipiṭaka / திபிடக • Tipiṭaka / நெத்திப்பகரண-அட்ட²கதா² • Nettippakaraṇa-aṭṭhakathā |
10. வேவசனஹாரவிப⁴ங்க³வண்ணனா
10. Vevacanahāravibhaṅgavaṇṇanā
37. தத்த² கதமோ வேவசனோ ஹாரோதி வேவசனஹாரவிப⁴ங்கோ³. தத்த² யதா² வேவசனநித்³தே³ஸோ ஹோதி, தங் த³ஸ்ஸேதுங் ‘‘ஏகங் ப⁴க³வா த⁴ம்மங் அஞ்ஞமஞ்ஞேஹி வேவசனேஹி நித்³தி³ஸதீ’’தி வுத்தங். வேவசனேஹீதி பரியாயஸத்³தே³ஹீதி அத்தோ². பத³த்தோ² புப்³பே³ வுத்தோ ஏவ. கஸ்மா பன ப⁴க³வா ஏகங் த⁴ம்மங் அனேகபரியாயேஹி நித்³தி³ஸதீதி? வுச்சதே – தே³ஸனாகாலே ஆயதிஞ்ச கஸ்ஸசி கத²ஞ்சி தத³த்த²படிபோ³தோ⁴ ஸியாதி பரியாயவசனங், தஸ்மிங் க²ணே விக்கி²த்தசித்தானங் அஞ்ஞவிஹிதானங் அஞ்ஞேன பரியாயேன தத³த்தா²வபோ³த⁴னத்த²ங் பரியாயவசனங். தேனேவ பதே³ன புன வசனே தத³ஞ்ஞேஸங் தத்த² அதி⁴க³ததா ஸியாதி மந்த³பு³த்³தீ⁴னங் புனப்புனங் தத³த்த²ஸல்லக்க²ணே அஸம்மோஸனத்த²ங் பரியாயவசனங். அனேகேபி அத்தா² ஸமானப்³யஞ்ஜனா ஹொந்தீதி யா அத்த²ந்தரபரிகப்பனா ஸியா, தஸ்ஸா பரிவஜ்ஜனத்த²ம்பி பரியாயவசனங் அனஞ்ஞஸ்ஸ வசனே அனேகாஹி தாஹி தாஹி ஸஞ்ஞாஹி தேஸங் தேஸங் அத்தா²னங் ஞாபனத்த²ம்பி பரியாயவசனங் ஸெய்யதா²பி நிக⁴ண்டுஸத்தே². த⁴ம்மகதி²கானங் தந்திஅத்து²பனிப³ந்த⁴னபராவபோ³த⁴னானங் ஸுக²ஸித்³தி⁴யாபி பரியாயவசனங். அத்தனோ த⁴ம்மனிருத்திபடிஸம்பி⁴தா³ப்பத்தியா விபா⁴வனத்த²ங், வேனெய்யானங் தத்த² பீ³ஜாவாபனத்த²ங் வா பரியாயவசனங் ப⁴க³வா நித்³தி³ஸதி.
37.Tatthakatamo vevacano hāroti vevacanahāravibhaṅgo. Tattha yathā vevacananiddeso hoti, taṃ dassetuṃ ‘‘ekaṃ bhagavā dhammaṃ aññamaññehi vevacanehi niddisatī’’ti vuttaṃ. Vevacanehīti pariyāyasaddehīti attho. Padattho pubbe vutto eva. Kasmā pana bhagavā ekaṃ dhammaṃ anekapariyāyehi niddisatīti? Vuccate – desanākāle āyatiñca kassaci kathañci tadatthapaṭibodho siyāti pariyāyavacanaṃ, tasmiṃ khaṇe vikkhittacittānaṃ aññavihitānaṃ aññena pariyāyena tadatthāvabodhanatthaṃ pariyāyavacanaṃ. Teneva padena puna vacane tadaññesaṃ tattha adhigatatā siyāti mandabuddhīnaṃ punappunaṃ tadatthasallakkhaṇe asammosanatthaṃ pariyāyavacanaṃ. Anekepi atthā samānabyañjanā hontīti yā atthantaraparikappanā siyā, tassā parivajjanatthampi pariyāyavacanaṃ anaññassa vacane anekāhi tāhi tāhi saññāhi tesaṃ tesaṃ atthānaṃ ñāpanatthampi pariyāyavacanaṃ seyyathāpi nighaṇṭusatthe. Dhammakathikānaṃ tantiatthupanibandhanaparāvabodhanānaṃ sukhasiddhiyāpi pariyāyavacanaṃ. Attano dhammaniruttipaṭisambhidāppattiyā vibhāvanatthaṃ, veneyyānaṃ tattha bījāvāpanatthaṃ vā pariyāyavacanaṃ bhagavā niddisati.
கிங் ப³ஹுனா யஸ்ஸா த⁴ம்மதா⁴துயா ஸுப்படிவித்³த⁴த்தா ஸம்மாஸம்பு³த்³தா⁴ யதா² ஸப்³ப³ஸ்மிங் அத்தே² அப்படிஹதஞாணாசாரா, ததா² ஸப்³ப³ஸ்மிங் ஸத்³த³வோஹாரேதி ஏகம்பி அத்த²ங் அனேகேஹி பரியாயேஹி போ³தே⁴தி, ந தத்த² த³ந்தா⁴யிதத்தங் வித்தா²யிதத்தங் அத்த²ஸ்ஸ. நாபி த⁴ம்மதே³ஸனாஹானி, ஆவேணிகோவாயங் பு³த்³த⁴த⁴ம்மோதி பரியாயதே³ஸனங் த³ஸ்ஸெந்தோ ‘‘ஆஸா’’திஆதி³மாஹ. தத்த² அத்த²ங் த³ஸ்ஸெந்தோ ‘‘ஆஸா நாம வுச்சதி யா ப⁴விஸ்ஸஸ்ஸ அத்த²ஸ்ஸா’’திஆதி³மாஹ. தத்த² ப⁴விஸ்ஸஸ்ஸ அத்த²ஸ்ஸாதி அனாக³தஸ்ஸ இச்சி²தப்³ப³ஸ்ஸ அத்த²ஸ்ஸ. ‘‘அவஸ்ஸங் ஆக³மிஸ்ஸதீ’’திஆதி³னா தஸ்ஸா பவத்தியாகாரங் த³ஸ்ஸேதி. அனாக³தத்த²விஸயா தண்ஹா ஆஸா. அனாக³தபச்சுப்பன்னத்த²விஸயா தண்ஹா பிஹாதி அயமேதாஸங் விஸேஸோ.
Kiṃ bahunā yassā dhammadhātuyā suppaṭividdhattā sammāsambuddhā yathā sabbasmiṃ atthe appaṭihatañāṇācārā, tathā sabbasmiṃ saddavohāreti ekampi atthaṃ anekehi pariyāyehi bodheti, na tattha dandhāyitattaṃ vitthāyitattaṃ atthassa. Nāpi dhammadesanāhāni, āveṇikovāyaṃ buddhadhammoti pariyāyadesanaṃ dassento ‘‘āsā’’tiādimāha. Tattha atthaṃ dassento ‘‘āsā nāma vuccati yā bhavissassa atthassā’’tiādimāha. Tattha bhavissassa atthassāti anāgatassa icchitabbassa atthassa. ‘‘Avassaṃ āgamissatī’’tiādinā tassā pavattiyākāraṃ dasseti. Anāgatatthavisayā taṇhā āsā. Anāgatapaccuppannatthavisayā taṇhā pihāti ayametāsaṃ viseso.
அத்த²னிப்ப²த்திபடிபாலனாதி யாய இச்சி²தஸ்ஸ அத்த²ஸ்ஸ நிப்ப²த்திங் படிபாலேதி ஆக³மேதி, யாய வா நிப்ப²ன்னங் அத்த²ங் படிபாலேதி ரக்க²தி. அயங் அபி⁴னந்த³னா நாம, யதா²லத்³த⁴ஸ்ஸ அத்த²ஸ்ஸ கேலாயனா நாமாதி அத்தோ². தங் அத்த²னிப்ப²த்திங் ஸத்தஸங்கா²ரவஸேன விப⁴ஜித்வா த³ஸ்ஸெந்தோ ‘‘பியங் வா ஞாதி’’ந்திஆதி³மாஹ . தத்த² த⁴ம்மந்தி ரூபாதி³ஆரம்மணத⁴ம்மங், அதிஇட்டா²ரம்மணங் அபி⁴னந்த³தி, அனிட்டா²ரம்மணேஹிபி தங் த³ஸ்ஸேதுங் ‘‘அப்படிக்கூலதோ வா அபி⁴னந்த³தீ’’தி வுத்தங். படிக்கூலேபி ஹி விபல்லாஸவஸேன ஸத்தங், ஸங்கா²ரங் வா அப்படிக்கூலதோ அபி⁴னந்த³தி.
Atthanipphattipaṭipālanāti yāya icchitassa atthassa nipphattiṃ paṭipāleti āgameti, yāya vā nipphannaṃ atthaṃ paṭipāleti rakkhati. Ayaṃ abhinandanā nāma, yathāladdhassa atthassa kelāyanā nāmāti attho. Taṃ atthanipphattiṃ sattasaṅkhāravasena vibhajitvā dassento ‘‘piyaṃ vā ñāti’’ntiādimāha . Tattha dhammanti rūpādiārammaṇadhammaṃ, atiiṭṭhārammaṇaṃ abhinandati, aniṭṭhārammaṇehipi taṃ dassetuṃ ‘‘appaṭikkūlato vā abhinandatī’’ti vuttaṃ. Paṭikkūlepi hi vipallāsavasena sattaṃ, saṅkhāraṃ vā appaṭikkūlato abhinandati.
யாஸு அனேகதா⁴தூஸு பவத்தியா தண்ஹா ‘‘அனேகதா⁴தூஸு ஸரா’’தி வுத்தா, தா தா⁴துயோ விபா⁴கே³ன த³ஸ்ஸேதுங் ‘‘சக்கு²தா⁴தூ’’திஆதி³ வுத்தங். கிஞ்சாபி தா⁴துவிப⁴ங்கா³தீ³ஸு (விப⁴॰ 172 ஆத³யோ) காமதா⁴துஆத³யோ அஞ்ஞாபி அனேகதா⁴துயோ ஆக³தா, தாஸம்பி எத்தே²வ ஸமவரோதோ⁴தி த³ஸ்ஸனத்த²ங் அட்டா²ரஸேவெத்த² த³ஸ்ஸிதா. கேசி ரூபாதி⁴முத்தாதிஆதி³ தாஸு தா⁴தூஸு தண்ஹாய பவத்தித³ஸ்ஸனங். தத்த² யஸ்மா பஞ்ச அஜ்ஜ²த்திகா தா⁴துயோ ஸத்த ச விஞ்ஞாணதா⁴துயோ த⁴ம்மதா⁴து ச த⁴ம்மாரம்மணேனேவ ஸங்க³ஹிதா, தஸ்மா அட்டா²ரஸ தா⁴துயோ உத்³தி³ஸித்வா ச²ளேவ தண்ஹாய பவத்திட்டா²னானி விப⁴த்தானீதி த³ட்ட²ப்³ப³ங். தண்ஹாபக்கா² நெக்க²ம்மஸ்ஸிதாபி தோ³மனஸ்ஸுபவிசாரா தஸ்ஸ அனுத்தரேஸு விமொக்கே²ஸு பிஹங் உபட்டா²பயதோ உப்பஜ்ஜதி ‘‘பிஹபச்சயா தோ³மனஸ்ஸ’’ந்தி வசனதோ, கோ பன வாதோ³ கே³ஹஸ்ஸிதேஸு தோ³மனஸ்ஸுபவிசாரேஸூதி இமானி சதுவீஸதி பதா³னி ‘‘தண்ஹாபக்கோ²’’தி வுத்தங். கே³ஹஸ்ஸிதா பன உபெக்கா² அஞ்ஞாணுபெக்க²தாய யதா²பி⁴னிவேஸஸ்ஸ பச்சயோ ஹோதீதி ‘‘யா ச² உபெக்கா² கே³ஹஸ்ஸிதா, அயங் தி³ட்டி²பக்கோ²’’தி வுத்தங்.
Yāsu anekadhātūsu pavattiyā taṇhā ‘‘anekadhātūsu sarā’’ti vuttā, tā dhātuyo vibhāgena dassetuṃ ‘‘cakkhudhātū’’tiādi vuttaṃ. Kiñcāpi dhātuvibhaṅgādīsu (vibha. 172 ādayo) kāmadhātuādayo aññāpi anekadhātuyo āgatā, tāsampi ettheva samavarodhoti dassanatthaṃ aṭṭhārasevettha dassitā. Keci rūpādhimuttātiādi tāsu dhātūsu taṇhāya pavattidassanaṃ. Tattha yasmā pañca ajjhattikā dhātuyo satta ca viññāṇadhātuyo dhammadhātu ca dhammārammaṇeneva saṅgahitā, tasmā aṭṭhārasa dhātuyo uddisitvā chaḷeva taṇhāya pavattiṭṭhānāni vibhattānīti daṭṭhabbaṃ. Taṇhāpakkhā nekkhammassitāpi domanassupavicārā tassa anuttaresu vimokkhesu pihaṃ upaṭṭhāpayato uppajjati ‘‘pihapaccayā domanassa’’nti vacanato, ko pana vādo gehassitesu domanassupavicāresūti imāni catuvīsati padāni ‘‘taṇhāpakkho’’ti vuttaṃ. Gehassitā pana upekkhā aññāṇupekkhatāya yathābhinivesassa paccayo hotīti ‘‘yā cha upekkhā gehassitā, ayaṃ diṭṭhipakkho’’ti vuttaṃ.
38. இதா³னி தேஸங் உபவிசாரானங் தண்ஹாபரியாயங் த³ஸ்ஸெந்தோ ‘‘ஸாயேவ பத்த²னாகாரேன த⁴ம்மனந்தீ³’’திஆதி³மாஹ. புன சித்தங் பஞ்ஞா ப⁴க³வா த⁴ம்மோ ஸங்கோ⁴ ஸீலங் சாகோ³தி இமேஸங் பரியாயவசனநித்³தா⁴ரணேன வேவசனஹாரங் விப⁴ஜித்வா த³ஸ்ஸேதுங் ‘‘சித்தங் மனோ விஞ்ஞாண’’ந்திஆதி³ ஆரத்³த⁴ங். தத்த² ‘‘அஞ்ஞம்பி ஏவங் ஜாதிய’’ந்தி இமினா பஞ்ஞா பஜானநா விசயோ பவிசயோ த⁴ம்மவிசயோ ஸல்லக்க²ணா உபலக்க²ணா பச்சுபலக்க²ணா பண்டி³ச்சங் கோஸல்லங் நேபுஞ்ஞங் வேப⁴ப்³யா சிந்தா உபபரிக்கா² பூ⁴ரீ மேதா⁴ பரிணாயிகா விபஸ்ஸனா ஸம்பஜஞ்ஞங் பதோதோ³ பஞ்ஞா பஞ்ஞிந்த்³ரியங் பஞ்ஞாப³லங் பஞ்ஞாஸத்த²ங் பஞ்ஞாபாஸாதோ³ பஞ்ஞாஆலோகோ பஞ்ஞாஓபா⁴ஸோ பஞ்ஞாபஜ்ஜோதோ பஞ்ஞாரதனங் அமோஹோதி (மஹானி॰ 149) ஏவமாதீ³னம்பி பஞ்ஞாய பரியாயஸத்³தா³னங் ஸங்க³ஹோ த³ட்ட²ப்³போ³.
38. Idāni tesaṃ upavicārānaṃ taṇhāpariyāyaṃ dassento ‘‘sāyeva patthanākārena dhammanandī’’tiādimāha. Puna cittaṃ paññā bhagavā dhammo saṅgho sīlaṃ cāgoti imesaṃ pariyāyavacananiddhāraṇena vevacanahāraṃ vibhajitvā dassetuṃ ‘‘cittaṃ mano viññāṇa’’ntiādi āraddhaṃ. Tattha ‘‘aññampi evaṃ jātiya’’nti iminā paññā pajānanā vicayo pavicayo dhammavicayo sallakkhaṇā upalakkhaṇā paccupalakkhaṇā paṇḍiccaṃ kosallaṃ nepuññaṃ vebhabyā cintā upaparikkhā bhūrī medhā pariṇāyikā vipassanā sampajaññaṃ patodo paññā paññindriyaṃ paññābalaṃ paññāsatthaṃ paññāpāsādo paññāāloko paññāobhāso paññāpajjoto paññāratanaṃ amohoti (mahāni. 149) evamādīnampi paññāya pariyāyasaddānaṃ saṅgaho daṭṭhabbo.
பஞ்சிந்த்³ரியானி லோகுத்தரானீதி க²யே ஞாணந்திஆதீ³னி பஞ்சிந்த்³ரியானி லோகுத்தரானி, லோகுத்தரபஞ்ஞாய வேவசனானீதி அத்தோ². ஸப்³பா³ பஞ்ஞாதி இதரேஹி வேவசனேஹி வுத்தா ஸப்³பா³ பஞ்ஞா லோகியலோகுத்தரமிஸ்ஸிகாதி அத்தோ². ‘‘அபி சா’’திஆதி³னா இமினாபி பரியாயேன வேவசனங் வத்தப்³ப³ந்தி த³ஸ்ஸேதி. ஆதி⁴பதெய்யட்டே²னாதி அதி⁴மொக்க²லக்க²ணே ஆதி⁴பதெய்யட்டே²ன. யதா² ச பு³த்³தா⁴னுஸ்ஸதியங் வுத்தந்தி யதா² பு³த்³தா⁴னுஸ்ஸதினித்³தே³ஸே (விஸுத்³தி⁴॰ 1.123) ‘‘இதிபி ஸோ ப⁴க³வா’’திஆதி³னா பாளியா ஸோ ப⁴க³வா இதிபி அரஹங்…பே॰… இதிபி ப⁴க³வாதி அனேகேஹி வேவசனேஹி ப⁴க³வா அனுஸ்ஸரிதப்³போ³தி வுத்தங். இமினாவ நயேன ப³லனிப்ப²த்திக³தோ வேஸாரஜ்ஜப்பத்தோ யாவ த⁴ம்மோபா⁴ஸபஜ்ஜோதகரோதி, ஏதேஹி பரியாயேஹி பு³த்³த⁴ஸ்ஸ ப⁴க³வதோ வேவசனங் பு³த்³தா⁴னுஸ்ஸதியங் வத்தப்³ப³ந்தி பத³ங் ஆஹரித்வா ஸம்ப³ந்தோ⁴ வேதி³தப்³போ³. ஏதானிபி கதிபயானி ஏவ ப⁴க³வதோ வேவசனானி. அஸங்க்²யெய்யா ஹி பு³த்³த⁴கு³ணா கு³ணனேமித்தகானி ச ப⁴க³வதோ நாமானி. வுத்தஞ்ஹேதங் த⁴ம்மஸேனாபதினா –
Pañcindriyānilokuttarānīti khaye ñāṇantiādīni pañcindriyāni lokuttarāni, lokuttarapaññāya vevacanānīti attho. Sabbā paññāti itarehi vevacanehi vuttā sabbā paññā lokiyalokuttaramissikāti attho. ‘‘Api cā’’tiādinā imināpi pariyāyena vevacanaṃ vattabbanti dasseti. Ādhipateyyaṭṭhenāti adhimokkhalakkhaṇe ādhipateyyaṭṭhena. Yathā ca buddhānussatiyaṃvuttanti yathā buddhānussatiniddese (visuddhi. 1.123) ‘‘itipi so bhagavā’’tiādinā pāḷiyā so bhagavā itipi arahaṃ…pe… itipi bhagavāti anekehi vevacanehi bhagavā anussaritabboti vuttaṃ. Imināva nayena balanipphattigato vesārajjappatto yāva dhammobhāsapajjotakaroti, etehi pariyāyehi buddhassa bhagavato vevacanaṃ buddhānussatiyaṃ vattabbanti padaṃ āharitvā sambandho veditabbo. Etānipi katipayāni eva bhagavato vevacanāni. Asaṅkhyeyyā hi buddhaguṇā guṇanemittakāni ca bhagavato nāmāni. Vuttañhetaṃ dhammasenāpatinā –
‘‘அஸங்க்²யெய்யானி நாமானி, ஸகு³ணேன மஹேஸினோ;
‘‘Asaṅkhyeyyāni nāmāni, saguṇena mahesino;
கு³ணேன நாமமுத்³தெ⁴ய்யங், அபி நாம ஸஹஸ்ஸதோ’’தி. (உதா³॰ அட்ட²॰ 53);
Guṇena nāmamuddheyyaṃ, api nāma sahassato’’ti. (udā. aṭṭha. 53);
த⁴ம்மானுஸ்ஸதியங் ‘‘அஸங்க²த’’ந்திஆதீ³ஸு ந கேனசி பச்சயேன ஸங்க²தந்தி அஸங்க²தங். நத்தி² ஏதஸ்ஸ அந்தோ வினாஸோதி அனந்தங். ஆஸவானங் அனாரம்மணதோ அனாஸவங். அவிபரீதஸபா⁴வத்தா ஸச்சங். ஸங்ஸாரஸ்ஸ பரதீரபா⁴வதோ பாரங். நிபுணஞாணவிஸயத்தா ஸுகு²மஸபா⁴வத்தா ச நிபுண. அனுபசிதஞாணஸம்பா⁴ரேஹி த³ட்டு²ங் ந ஸக்காதி ஸுது³த்³த³ஸங். உப்பாத³ஜராஹி அனப்³பா⁴ஹதத்தா அஜஜ்ஜரங். தி²ரபா⁴வேன து⁴வங். ஜராமரணேஹி அபலுஜ்ஜனதோ அபலோகிதங். மங்ஸசக்கு²னா தி³ப்³ப³சக்கு²னா ச அபஸ்ஸிதப்³ப³த்தா அனித³ஸ்ஸனங். ராகா³தி³பபஞ்சாபா⁴வேன நிப்பபஞ்சங். கிலேஸாபி⁴ஸங்கா²ரானங் வூபஸமஹேதுதாய ஸந்தங்.
Dhammānussatiyaṃ ‘‘asaṅkhata’’ntiādīsu na kenaci paccayena saṅkhatanti asaṅkhataṃ. Natthi etassa anto vināsoti anantaṃ. Āsavānaṃ anārammaṇato anāsavaṃ. Aviparītasabhāvattā saccaṃ. Saṃsārassa paratīrabhāvato pāraṃ. Nipuṇañāṇavisayattā sukhumasabhāvattā ca nipuṇa. Anupacitañāṇasambhārehi daṭṭhuṃ na sakkāti sududdasaṃ. Uppādajarāhi anabbhāhatattā ajajjaraṃ. Thirabhāvena dhuvaṃ. Jarāmaraṇehi apalujjanato apalokitaṃ. Maṃsacakkhunā dibbacakkhunā ca apassitabbattā anidassanaṃ. Rāgādipapañcābhāvena nippapañcaṃ. Kilesābhisaṅkhārānaṃ vūpasamahetutāya santaṃ.
அமதஹேதுதாய ப⁴ங்கா³பா⁴வதோ ச அமதங். உத்தமட்டே²ன அதப்பகட்டே²ன ச பணீதங். அஸிவானங் கம்மகிலேஸவிபாகவட்டானங் அபா⁴வேன ஸிவங். சதூஹி யோகே³ஹி அனுபத்³த³வபா⁴வேன கே²மங். தண்ஹா கீ²யதி எத்தா²தி தண்ஹக்க²யோ. கதபுஞ்ஞேஹிபி கதா³சிதே³வ பஸ்ஸிதப்³ப³த்தா அச்ச²ரியங். அபூ⁴தபுப்³ப³த்தா அப்³பு⁴தங் . அனந்தராயத்தா அனீதிகங். அனந்தராயபா⁴வஹேதுதோ அனீதிகத⁴ம்மங் (ஸங்॰ நி॰ அட்ட²॰ 3.5.377-409).
Amatahetutāya bhaṅgābhāvato ca amataṃ. Uttamaṭṭhena atappakaṭṭhena ca paṇītaṃ. Asivānaṃ kammakilesavipākavaṭṭānaṃ abhāvena sivaṃ. Catūhi yogehi anupaddavabhāvena khemaṃ. Taṇhā khīyati etthāti taṇhakkhayo. Katapuññehipi kadācideva passitabbattā acchariyaṃ. Abhūtapubbattā abbhutaṃ. Anantarāyattā anītikaṃ. Anantarāyabhāvahetuto anītikadhammaṃ (saṃ. ni. aṭṭha. 3.5.377-409).
அனிப்³ப³த்திஸபா⁴வத்தா அஜாதங். ததோ ஏவ அபூ⁴தங். உப⁴யேனாபி உப்பாத³ரஹிதந்தி வுத்தங் ஹோதி. கேனசி அனுபத்³து³தத்தா அனுபத்³த³வங். ந கேனசி பச்சயேன கதந்தி அகதங். நத்தி² எத்த² ஸோகோதி அஸோகங். ஸோகஹேதுவிக³மேன விஸோகங். கேனசி அனுபஸஜ்ஜிதப்³ப³த்தா அனுபஸக்³க³ங். அனுபஸக்³க³பா⁴வஹேதுதோ அனுபஸக்³க³த⁴ம்மங்.
Anibbattisabhāvattā ajātaṃ. Tato eva abhūtaṃ. Ubhayenāpi uppādarahitanti vuttaṃ hoti. Kenaci anupaddutattā anupaddavaṃ. Na kenaci paccayena katanti akataṃ. Natthi ettha sokoti asokaṃ. Sokahetuvigamena visokaṃ. Kenaci anupasajjitabbattā anupasaggaṃ. Anupasaggabhāvahetuto anupasaggadhammaṃ.
க³ம்பீ⁴ரஞாணகோ³சரதோ க³ம்பீ⁴ரங். ஸம்மாபடிபத்திங் வினா பஸ்ஸிதுங் பத்துங் அஸக்குணெய்யத்தா து³ப்பஸ்ஸங். ஸப்³ப³லோகங் உத்தரித்வா டி²தந்தி உத்தரங். நத்தி² ஏதஸ்ஸ உத்தரந்தி அனுத்தரங். ஸமஸ்ஸ ஸதி³ஸஸ்ஸ அபா⁴வேன அஸமங். படிபா⁴கா³பா⁴வேன அப்படிஸமங். உத்தமட்டே²ன ஜெட்ட²ங், பாஸங்ஸதமத்தா வா ஜெட்ட²ங். ஸங்ஸாரது³க்க²ட்டிதேஹி லேதப்³ப³தோ லேணங். ததோ ரக்க²ணதோ தாணங். ரணாபா⁴வேன அரணங். அங்க³ணாபா⁴வேன அனங்க³ணங். நித்³தோ³ஸதாய அகாசங். ராகா³தி³மலாபக³மேன விமலங். சதூஹி ஓகே⁴ஹி அனஜ்ஜொ²த்த²ரணீயதோ தீ³போ. ஸங்ஸாரவூபஸமஸுக²தாய ஸுக²ங். பமாணகரத⁴ம்மாபா⁴வதோ அப்பமாணங், க³ணேதுங் ஏதஸ்ஸ ந ஸக்காதி ச அப்பமாணங். ஸங்ஸாரஸமுத்³தே³ அனோஸீத³னட்டா²னதாய பதிட்டா². ராகா³தி³கிஞ்சனாபா⁴வேன பரிக்³க³ஹாபா⁴வேன ச அகிஞ்சனந்தி ஏவமத்தோ² த³ட்ட²ப்³போ³.
Gambhīrañāṇagocarato gambhīraṃ. Sammāpaṭipattiṃ vinā passituṃ pattuṃ asakkuṇeyyattā duppassaṃ. Sabbalokaṃ uttaritvā ṭhitanti uttaraṃ. Natthi etassa uttaranti anuttaraṃ. Samassa sadisassa abhāvena asamaṃ. Paṭibhāgābhāvena appaṭisamaṃ. Uttamaṭṭhena jeṭṭhaṃ, pāsaṃsatamattā vā jeṭṭhaṃ. Saṃsāradukkhaṭṭitehi letabbato leṇaṃ. Tato rakkhaṇato tāṇaṃ. Raṇābhāvena araṇaṃ. Aṅgaṇābhāvena anaṅgaṇaṃ. Niddosatāya akācaṃ. Rāgādimalāpagamena vimalaṃ. Catūhi oghehi anajjhottharaṇīyato dīpo. Saṃsāravūpasamasukhatāya sukhaṃ. Pamāṇakaradhammābhāvato appamāṇaṃ, gaṇetuṃ etassa na sakkāti ca appamāṇaṃ. Saṃsārasamudde anosīdanaṭṭhānatāya patiṭṭhā. Rāgādikiñcanābhāvena pariggahābhāvena ca akiñcananti evamattho daṭṭhabbo.
ஸங்கா⁴னுஸ்ஸதியங் ஸத்தானங் ஸாரோதி ஸீலஸாராதி³ஸாரகு³ணயோக³தோ ஸத்தேஸு ஸாரபூ⁴தோ. ஸத்தானங் மண்டோ³தி கோ³ரஸேஸு ஸப்பிமண்டோ³ விய ஸத்தேஸு மண்ட³பூ⁴தோ. ஸாரகு³ணவஸேனேவ ஸத்தேஸு உத்³த⁴ரிதப்³ப³தோ ஸத்தானங் உத்³தா⁴ரோ. நிச்சலகு³ணதாய ஸத்தானங் ஏஸிகா. கு³ணஸோபா⁴ஸுரபி⁴பா⁴வேன ஸத்தானங் பஸூனங் ஸுரபி⁴ குஸுமந்தி அத்தோ².
Saṅghānussatiyaṃ sattānaṃ sāroti sīlasārādisāraguṇayogato sattesu sārabhūto. Sattānaṃ maṇḍoti gorasesu sappimaṇḍo viya sattesu maṇḍabhūto. Sāraguṇavaseneva sattesu uddharitabbato sattānaṃ uddhāro. Niccalaguṇatāya sattānaṃ esikā. Guṇasobhāsurabhibhāvena sattānaṃ pasūnaṃ surabhi kusumanti attho.
கு³ணேஸு உத்தமங்க³ங் பஞ்ஞா தஸ்ஸா உபஸோபா⁴ஹேதுதாய ஸீலங் உத்தமங்கோ³பஸோப⁴னங் வுத்தங். ஸீலேஸு பரிபூரகாரினோ அனிஜ்ஜ²ந்தா நாம கு³ணா நத்தீ²தி ‘‘நிதா⁴னஞ்ச ஸீலங் ஸப்³ப³தோ³ப⁴க்³க³ஸமதிக்கமனட்டே²னா’’தி வுத்தங். அயஞ்ச அத்தோ² ஆகங்கெ²ய்யஸுத்தேன (ம॰ நி॰ 1.64 ஆத³யோ) தீ³பேதப்³போ³. அபரம்பி வுத்தங் – ‘‘இஜ்ஜ²தி, பி⁴க்க²வே, ஸீலவதோ சேதோபணிதி⁴ விஸுத்³த⁴த்தா’’தி (தீ³॰ நி॰ 3.337; ஸங்॰ நி॰ 4.352; அ॰ நி॰ 8.35). ஸிப்பந்தி த⁴னுஸிப்பங். த⁴ஞ்ஞந்தி த⁴னாயிதப்³ப³ங். த⁴ம்மவோலோகனதாயாதி ஸமத²விபஸ்ஸனாதி³த⁴ம்மஸ்ஸ வோலோகனபா⁴வேன . வோலோகனட்டே²னாதி ஸத்தபூ⁴மகாதி³பாஸாதே³ விய ஸீலே ட²த்வா அபி⁴ஞ்ஞாசக்கு²னா லோகஸ்ஸ வோலோகேதுங் ஸக்காதி வுத்தங். ஸப்³ப³பூ⁴மானுபரிவத்தி ச ஸீலங் சதுபூ⁴மககுஸலஸ்ஸாபி தத³னுவத்தனதோ. ஸேஸங் உத்தானமேவாதி.
Guṇesu uttamaṅgaṃ paññā tassā upasobhāhetutāya sīlaṃ uttamaṅgopasobhanaṃ vuttaṃ. Sīlesu paripūrakārino anijjhantā nāma guṇā natthīti ‘‘nidhānañca sīlaṃ sabbadobhaggasamatikkamanaṭṭhenā’’ti vuttaṃ. Ayañca attho ākaṅkheyyasuttena (ma. ni. 1.64 ādayo) dīpetabbo. Aparampi vuttaṃ – ‘‘ijjhati, bhikkhave, sīlavato cetopaṇidhi visuddhattā’’ti (dī. ni. 3.337; saṃ. ni. 4.352; a. ni. 8.35). Sippanti dhanusippaṃ. Dhaññanti dhanāyitabbaṃ. Dhammavolokanatāyāti samathavipassanādidhammassa volokanabhāvena . Volokanaṭṭhenāti sattabhūmakādipāsāde viya sīle ṭhatvā abhiññācakkhunā lokassa voloketuṃ sakkāti vuttaṃ. Sabbabhūmānuparivatti ca sīlaṃ catubhūmakakusalassāpi tadanuvattanato. Sesaṃ uttānamevāti.
வேவசனஹாரவிப⁴ங்க³வண்ணனா நிட்டி²தா.
Vevacanahāravibhaṅgavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / நெத்திப்பகரணபாளி • Nettippakaraṇapāḷi / 10. வேவசனஹாரவிப⁴ங்கோ³ • 10. Vevacanahāravibhaṅgo
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திப்பகரண-டீகா • Nettippakaraṇa-ṭīkā / 10. வேவசனஹாரவிப⁴ங்க³வண்ணனா • 10. Vevacanahāravibhaṅgavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திவிபா⁴வினீ • Nettivibhāvinī / 10. வேவசனஹாரவிப⁴ங்க³விபா⁴வனா • 10. Vevacanahāravibhaṅgavibhāvanā
