| Library / Tipiṭaka / д̇ибидага • Tipiṭaka / нзд̇д̇иббагаран̣а-адтагат̇аа • Nettippakaraṇa-aṭṭhakathā |
10. взважанахааравибхан̇г̇аван̣н̣анаа
10. Vevacanahāravibhaṅgavaṇṇanā
37. д̇ад̇т̇а гад̇амо взважано хаарод̇и взважанахааравибхан̇г̇о. д̇ад̇т̇а яат̇аа взважананид̣̇д̣̇зсо ход̇и, д̇ам̣ д̣̇ассзд̇ум̣ ‘‘згам̣ бхаг̇аваа д̇хаммам̣ ан̃н̃аман̃н̃зхи взважанзхи нид̣̇д̣̇исад̇ий’’д̇и вуд̇д̇ам̣. взважанзхийд̇и барияааяасад̣̇д̣̇зхийд̇и ад̇т̇о. бад̣̇ад̇т̇о буб̣б̣з вуд̇д̇о зва. гасмаа бана бхаг̇аваа згам̣ д̇хаммам̣ анзгабарияааязхи нид̣̇д̣̇исад̇ийд̇и? вужжад̇з – д̣̇зсанаагаалз ааяад̇ин̃жа гассажи гат̇ан̃жи д̇ад̣̇ад̇т̇абадиб̣од̇хо сияаад̇и барияааяаважанам̣, д̇асмим̣ кан̣з вигкид̇д̇ажид̇д̇аанам̣ ан̃н̃авихид̇аанам̣ ан̃н̃зна барияааязна д̇ад̣̇ад̇т̇ааваб̣од̇ханад̇т̇ам̣ барияааяаважанам̣. д̇знзва бад̣̇зна буна важанз д̇ад̣̇ан̃н̃зсам̣ д̇ад̇т̇а ад̇хиг̇ад̇ад̇аа сияаад̇и манд̣̇аб̣уд̣̇д̇хийнам̣ бунаббунам̣ д̇ад̣̇ад̇т̇асаллагкан̣з асаммосанад̇т̇ам̣ барияааяаважанам̣. анзгзби ад̇т̇аа самаанаб̣яан̃ж̇анаа хонд̇ийд̇и яаа ад̇т̇анд̇арабаригаббанаа сияаа, д̇ассаа бариваж̇ж̇анад̇т̇амби барияааяаважанам̣ анан̃н̃асса важанз анзгаахи д̇аахи д̇аахи сан̃н̃аахи д̇зсам̣ д̇зсам̣ ад̇т̇аанам̣ н̃аабанад̇т̇амби барияааяаважанам̣ сзяяат̇ааби нигхан̣дусад̇т̇з. д̇хаммагат̇игаанам̣ д̇анд̇иад̇т̇убаниб̣анд̇ханабарааваб̣од̇ханаанам̣ сукасид̣̇д̇хияааби барияааяаважанам̣. ад̇д̇ано д̇хамманируд̇д̇ибадисамбхид̣̇ааббад̇д̇ияаа вибхааванад̇т̇ам̣, взнзяяаанам̣ д̇ад̇т̇а б̣ийж̇ааваабанад̇т̇ам̣ ваа барияааяаважанам̣ бхаг̇аваа нид̣̇д̣̇исад̇и.
37.Tatthakatamo vevacano hāroti vevacanahāravibhaṅgo. Tattha yathā vevacananiddeso hoti, taṃ dassetuṃ ‘‘ekaṃ bhagavā dhammaṃ aññamaññehi vevacanehi niddisatī’’ti vuttaṃ. Vevacanehīti pariyāyasaddehīti attho. Padattho pubbe vutto eva. Kasmā pana bhagavā ekaṃ dhammaṃ anekapariyāyehi niddisatīti? Vuccate – desanākāle āyatiñca kassaci kathañci tadatthapaṭibodho siyāti pariyāyavacanaṃ, tasmiṃ khaṇe vikkhittacittānaṃ aññavihitānaṃ aññena pariyāyena tadatthāvabodhanatthaṃ pariyāyavacanaṃ. Teneva padena puna vacane tadaññesaṃ tattha adhigatatā siyāti mandabuddhīnaṃ punappunaṃ tadatthasallakkhaṇe asammosanatthaṃ pariyāyavacanaṃ. Anekepi atthā samānabyañjanā hontīti yā atthantaraparikappanā siyā, tassā parivajjanatthampi pariyāyavacanaṃ anaññassa vacane anekāhi tāhi tāhi saññāhi tesaṃ tesaṃ atthānaṃ ñāpanatthampi pariyāyavacanaṃ seyyathāpi nighaṇṭusatthe. Dhammakathikānaṃ tantiatthupanibandhanaparāvabodhanānaṃ sukhasiddhiyāpi pariyāyavacanaṃ. Attano dhammaniruttipaṭisambhidāppattiyā vibhāvanatthaṃ, veneyyānaṃ tattha bījāvāpanatthaṃ vā pariyāyavacanaṃ bhagavā niddisati.
гим̣ б̣ахунаа яассаа д̇хаммад̇хаад̇уяаа суббадивид̣̇д̇хад̇д̇аа саммаасамб̣уд̣̇д̇хаа яат̇аа саб̣б̣асмим̣ ад̇т̇з аббадихад̇ан̃аан̣аажаараа, д̇ат̇аа саб̣б̣асмим̣ сад̣̇д̣̇авохаарзд̇и згамби ад̇т̇ам̣ анзгзхи барияааязхи б̣од̇хзд̇и, на д̇ад̇т̇а д̣̇анд̇хааяид̇ад̇д̇ам̣ вид̇т̇ааяид̇ад̇д̇ам̣ ад̇т̇асса. нааби д̇хаммад̣̇зсанаахаани, аавзн̣иговааяам̣ б̣уд̣̇д̇хад̇хаммод̇и барияааяад̣̇зсанам̣ д̣̇ассзнд̇о ‘‘аасаа’’д̇иаад̣̇имааха. д̇ад̇т̇а ад̇т̇ам̣ д̣̇ассзнд̇о ‘‘аасаа наама вужжад̇и яаа бхависсасса ад̇т̇ассаа’’д̇иаад̣̇имааха. д̇ад̇т̇а бхависсасса ад̇т̇ассаад̇и анааг̇ад̇асса ижчид̇аб̣б̣асса ад̇т̇асса. ‘‘авассам̣ ааг̇амиссад̇ий’’д̇иаад̣̇инаа д̇ассаа бавад̇д̇ияаагаарам̣ д̣̇ассзд̇и. анааг̇ад̇ад̇т̇ависаяаа д̇ан̣хаа аасаа. анааг̇ад̇абажжуббаннад̇т̇ависаяаа д̇ан̣хаа бихаад̇и аяамзд̇аасам̣ висзсо.
Kiṃ bahunā yassā dhammadhātuyā suppaṭividdhattā sammāsambuddhā yathā sabbasmiṃ atthe appaṭihatañāṇācārā, tathā sabbasmiṃ saddavohāreti ekampi atthaṃ anekehi pariyāyehi bodheti, na tattha dandhāyitattaṃ vitthāyitattaṃ atthassa. Nāpi dhammadesanāhāni, āveṇikovāyaṃ buddhadhammoti pariyāyadesanaṃ dassento ‘‘āsā’’tiādimāha. Tattha atthaṃ dassento ‘‘āsā nāma vuccati yā bhavissassa atthassā’’tiādimāha. Tattha bhavissassa atthassāti anāgatassa icchitabbassa atthassa. ‘‘Avassaṃ āgamissatī’’tiādinā tassā pavattiyākāraṃ dasseti. Anāgatatthavisayā taṇhā āsā. Anāgatapaccuppannatthavisayā taṇhā pihāti ayametāsaṃ viseso.
ад̇т̇анибпад̇д̇ибадибааланаад̇и яааяа ижчид̇асса ад̇т̇асса нибпад̇д̇им̣ бадибаалзд̇и ааг̇амзд̇и, яааяа ваа нибпаннам̣ ад̇т̇ам̣ бадибаалзд̇и рагкад̇и. аяам̣ абхинанд̣̇анаа наама, яат̇аалад̣̇д̇хасса ад̇т̇асса гзлааяанаа наамаад̇и ад̇т̇о. д̇ам̣ ад̇т̇анибпад̇д̇им̣ сад̇д̇асан̇кааравасзна вибхаж̇ид̇ваа д̣̇ассзнд̇о ‘‘бияам̣ ваа н̃аад̇и’’нд̇иаад̣̇имааха . д̇ад̇т̇а д̇хамманд̇и руубаад̣̇иаарамман̣ад̇хаммам̣, ад̇иидтаарамман̣ам̣ абхинанд̣̇ад̇и, анидтаарамман̣зхиби д̇ам̣ д̣̇ассзд̇ум̣ ‘‘аббадиггуулад̇о ваа абхинанд̣̇ад̇ий’’д̇и вуд̇д̇ам̣. бадиггуулзби хи вибаллаасавасзна сад̇д̇ам̣, сан̇каарам̣ ваа аббадиггуулад̇о абхинанд̣̇ад̇и.
Atthanipphattipaṭipālanāti yāya icchitassa atthassa nipphattiṃ paṭipāleti āgameti, yāya vā nipphannaṃ atthaṃ paṭipāleti rakkhati. Ayaṃ abhinandanā nāma, yathāladdhassa atthassa kelāyanā nāmāti attho. Taṃ atthanipphattiṃ sattasaṅkhāravasena vibhajitvā dassento ‘‘piyaṃ vā ñāti’’ntiādimāha . Tattha dhammanti rūpādiārammaṇadhammaṃ, atiiṭṭhārammaṇaṃ abhinandati, aniṭṭhārammaṇehipi taṃ dassetuṃ ‘‘appaṭikkūlato vā abhinandatī’’ti vuttaṃ. Paṭikkūlepi hi vipallāsavasena sattaṃ, saṅkhāraṃ vā appaṭikkūlato abhinandati.
яаасу анзгад̇хаад̇уусу бавад̇д̇ияаа д̇ан̣хаа ‘‘анзгад̇хаад̇уусу сараа’’д̇и вуд̇д̇аа, д̇аа д̇хаад̇уяо вибхааг̇зна д̣̇ассзд̇ум̣ ‘‘жагкуд̇хаад̇уу’’д̇иаад̣̇и вуд̇д̇ам̣. гин̃жааби д̇хаад̇увибхан̇г̇аад̣̇ийсу (вибха. 172 аад̣̇аяо) гаамад̇хаад̇уаад̣̇аяо ан̃н̃ааби анзгад̇хаад̇уяо ааг̇ад̇аа, д̇аасамби зд̇т̇зва самаварод̇ход̇и д̣̇ассанад̇т̇ам̣ адтаарасзвзд̇т̇а д̣̇ассид̇аа. гзжи руубаад̇химуд̇д̇аад̇иаад̣̇и д̇аасу д̇хаад̇уусу д̇ан̣хааяа бавад̇д̇ид̣̇ассанам̣. д̇ад̇т̇а яасмаа бан̃жа аж̇жхад̇д̇игаа д̇хаад̇уяо сад̇д̇а жа вин̃н̃аан̣ад̇хаад̇уяо д̇хаммад̇хаад̇у жа д̇хаммаарамман̣знзва сан̇г̇ахид̇аа, д̇асмаа адтаараса д̇хаад̇уяо уд̣̇д̣̇исид̇ваа чал̣зва д̇ан̣хааяа бавад̇д̇идтаанаани вибхад̇д̇аанийд̇и д̣̇адтаб̣б̣ам̣. д̇ан̣хаабагкаа нзгкаммассид̇ааби д̣̇оманассубавижаараа д̇асса ануд̇д̇арзсу вимогкзсу бихам̣ убадтаабаяад̇о уббаж̇ж̇ад̇и ‘‘бихабажжаяаа д̣̇оманасса’’нд̇и важанад̇о, го бана ваад̣̇о г̇зхассид̇зсу д̣̇оманассубавижаарзсууд̇и имаани жад̇увийсад̇и бад̣̇аани ‘‘д̇ан̣хаабагко’’д̇и вуд̇д̇ам̣. г̇зхассид̇аа бана убзгкаа ан̃н̃аан̣убзгкад̇ааяа яат̇аабхинивзсасса бажжаяо ход̇ийд̇и ‘‘яаа ча убзгкаа г̇зхассид̇аа, аяам̣ д̣̇идтибагко’’д̇и вуд̇д̇ам̣.
Yāsu anekadhātūsu pavattiyā taṇhā ‘‘anekadhātūsu sarā’’ti vuttā, tā dhātuyo vibhāgena dassetuṃ ‘‘cakkhudhātū’’tiādi vuttaṃ. Kiñcāpi dhātuvibhaṅgādīsu (vibha. 172 ādayo) kāmadhātuādayo aññāpi anekadhātuyo āgatā, tāsampi ettheva samavarodhoti dassanatthaṃ aṭṭhārasevettha dassitā. Keci rūpādhimuttātiādi tāsu dhātūsu taṇhāya pavattidassanaṃ. Tattha yasmā pañca ajjhattikā dhātuyo satta ca viññāṇadhātuyo dhammadhātu ca dhammārammaṇeneva saṅgahitā, tasmā aṭṭhārasa dhātuyo uddisitvā chaḷeva taṇhāya pavattiṭṭhānāni vibhattānīti daṭṭhabbaṃ. Taṇhāpakkhā nekkhammassitāpi domanassupavicārā tassa anuttaresu vimokkhesu pihaṃ upaṭṭhāpayato uppajjati ‘‘pihapaccayā domanassa’’nti vacanato, ko pana vādo gehassitesu domanassupavicāresūti imāni catuvīsati padāni ‘‘taṇhāpakkho’’ti vuttaṃ. Gehassitā pana upekkhā aññāṇupekkhatāya yathābhinivesassa paccayo hotīti ‘‘yā cha upekkhā gehassitā, ayaṃ diṭṭhipakkho’’ti vuttaṃ.
38. ид̣̇аани д̇зсам̣ убавижаараанам̣ д̇ан̣хаабарияааяам̣ д̣̇ассзнд̇о ‘‘сааязва бад̇т̇анаагаарзна д̇хаммананд̣̇ий’’д̇иаад̣̇имааха. буна жид̇д̇ам̣ бан̃н̃аа бхаг̇аваа д̇хаммо сан̇гхо сийлам̣ жааг̇од̇и имзсам̣ барияааяаважананид̣̇д̇хааран̣зна взважанахаарам̣ вибхаж̇ид̇ваа д̣̇ассзд̇ум̣ ‘‘жид̇д̇ам̣ мано вин̃н̃аан̣а’’нд̇иаад̣̇и аарад̣̇д̇хам̣. д̇ад̇т̇а ‘‘ан̃н̃амби звам̣ ж̇аад̇ияа’’нд̇и иминаа бан̃н̃аа баж̇аананаа вижаяо бавижаяо д̇хаммавижаяо саллагкан̣аа убалагкан̣аа бажжубалагкан̣аа бан̣д̣ижжам̣ госаллам̣ нзбун̃н̃ам̣ взбхаб̣яаа жинд̇аа убабаригкаа бхуурий мзд̇хаа барин̣ааяигаа вибассанаа самбаж̇ан̃н̃ам̣ бад̇од̣̇о бан̃н̃аа бан̃н̃инд̣̇рияам̣ бан̃н̃ааб̣алам̣ бан̃н̃аасад̇т̇ам̣ бан̃н̃аабаасаад̣̇о бан̃н̃аааалого бан̃н̃ааобхаасо бан̃н̃аабаж̇ж̇од̇о бан̃н̃аарад̇анам̣ амоход̇и (махаани. 149) звамаад̣̇ийнамби бан̃н̃ааяа барияааяасад̣̇д̣̇аанам̣ сан̇г̇ахо д̣̇адтаб̣б̣о.
38. Idāni tesaṃ upavicārānaṃ taṇhāpariyāyaṃ dassento ‘‘sāyeva patthanākārena dhammanandī’’tiādimāha. Puna cittaṃ paññā bhagavā dhammo saṅgho sīlaṃ cāgoti imesaṃ pariyāyavacananiddhāraṇena vevacanahāraṃ vibhajitvā dassetuṃ ‘‘cittaṃ mano viññāṇa’’ntiādi āraddhaṃ. Tattha ‘‘aññampi evaṃ jātiya’’nti iminā paññā pajānanā vicayo pavicayo dhammavicayo sallakkhaṇā upalakkhaṇā paccupalakkhaṇā paṇḍiccaṃ kosallaṃ nepuññaṃ vebhabyā cintā upaparikkhā bhūrī medhā pariṇāyikā vipassanā sampajaññaṃ patodo paññā paññindriyaṃ paññābalaṃ paññāsatthaṃ paññāpāsādo paññāāloko paññāobhāso paññāpajjoto paññāratanaṃ amohoti (mahāni. 149) evamādīnampi paññāya pariyāyasaddānaṃ saṅgaho daṭṭhabbo.
бан̃жинд̣̇рияаани логуд̇д̇араанийд̇и каяз н̃аан̣анд̇иаад̣̇ийни бан̃жинд̣̇рияаани логуд̇д̇араани, логуд̇д̇арабан̃н̃ааяа взважанаанийд̇и ад̇т̇о. саб̣б̣аа бан̃н̃аад̇и ид̇арзхи взважанзхи вуд̇д̇аа саб̣б̣аа бан̃н̃аа логияалогуд̇д̇арамиссигаад̇и ад̇т̇о. ‘‘аби жаа’’д̇иаад̣̇инаа иминааби барияааязна взважанам̣ вад̇д̇аб̣б̣анд̇и д̣̇ассзд̇и. аад̇хибад̇зяяадтзнаад̇и ад̇химогкалагкан̣з аад̇хибад̇зяяадтзна. яат̇аа жа б̣уд̣̇д̇хаануссад̇ияам̣ вуд̇д̇анд̇и яат̇аа б̣уд̣̇д̇хаануссад̇инид̣̇д̣̇зсз (висуд̣̇д̇хи. 1.123) ‘‘ид̇иби со бхаг̇аваа’’д̇иаад̣̇инаа баал̣ияаа со бхаг̇аваа ид̇иби арахам̣…бз… ид̇иби бхаг̇аваад̇и анзгзхи взважанзхи бхаг̇аваа ануссарид̇аб̣б̣од̇и вуд̇д̇ам̣. иминаава наязна б̣аланибпад̇д̇иг̇ад̇о взсаараж̇ж̇аббад̇д̇о яаава д̇хаммобхаасабаж̇ж̇од̇агарод̇и, зд̇зхи барияааязхи б̣уд̣̇д̇хасса бхаг̇авад̇о взважанам̣ б̣уд̣̇д̇хаануссад̇ияам̣ вад̇д̇аб̣б̣анд̇и бад̣̇ам̣ аахарид̇ваа самб̣анд̇хо взд̣̇ид̇аб̣б̣о. зд̇ааниби гад̇ибаяаани зва бхаг̇авад̇о взважанаани. асан̇кязяяаа хи б̣уд̣̇д̇хаг̇ун̣аа г̇ун̣анзмид̇д̇агаани жа бхаг̇авад̇о наамаани. вуд̇д̇ан̃хзд̇ам̣ д̇хаммасзнаабад̇инаа –
Pañcindriyānilokuttarānīti khaye ñāṇantiādīni pañcindriyāni lokuttarāni, lokuttarapaññāya vevacanānīti attho. Sabbā paññāti itarehi vevacanehi vuttā sabbā paññā lokiyalokuttaramissikāti attho. ‘‘Api cā’’tiādinā imināpi pariyāyena vevacanaṃ vattabbanti dasseti. Ādhipateyyaṭṭhenāti adhimokkhalakkhaṇe ādhipateyyaṭṭhena. Yathā ca buddhānussatiyaṃvuttanti yathā buddhānussatiniddese (visuddhi. 1.123) ‘‘itipi so bhagavā’’tiādinā pāḷiyā so bhagavā itipi arahaṃ…pe… itipi bhagavāti anekehi vevacanehi bhagavā anussaritabboti vuttaṃ. Imināva nayena balanipphattigato vesārajjappatto yāva dhammobhāsapajjotakaroti, etehi pariyāyehi buddhassa bhagavato vevacanaṃ buddhānussatiyaṃ vattabbanti padaṃ āharitvā sambandho veditabbo. Etānipi katipayāni eva bhagavato vevacanāni. Asaṅkhyeyyā hi buddhaguṇā guṇanemittakāni ca bhagavato nāmāni. Vuttañhetaṃ dhammasenāpatinā –
‘‘асан̇кязяяаани наамаани, саг̇ун̣зна махзсино;
‘‘Asaṅkhyeyyāni nāmāni, saguṇena mahesino;
г̇ун̣зна наамамуд̣̇д̇хзяяам̣, аби наама сахассад̇о’’д̇и. (уд̣̇аа. адта. 53);
Guṇena nāmamuddheyyaṃ, api nāma sahassato’’ti. (udā. aṭṭha. 53);
д̇хаммаануссад̇ияам̣ ‘‘асан̇кад̇а’’нд̇иаад̣̇ийсу на гзнажи бажжаязна сан̇кад̇анд̇и асан̇кад̇ам̣. над̇т̇и зд̇асса анд̇о винаасод̇и ананд̇ам̣. аасаваанам̣ анаарамман̣ад̇о анаасавам̣. авибарийд̇асабхаавад̇д̇аа сажжам̣. сам̣саарасса барад̇ийрабхаавад̇о баарам̣. нибун̣ан̃аан̣ависаяад̇д̇аа сукумасабхаавад̇д̇аа жа нибун̣а. анубажид̇ан̃аан̣асамбхаарзхи д̣̇адтум̣ на саггаад̇и суд̣̇уд̣̇д̣̇асам̣. уббаад̣̇аж̇араахи анаб̣бхаахад̇ад̇д̇аа аж̇аж̇ж̇арам̣. т̇ирабхаавзна д̇хувам̣. ж̇араамаран̣зхи абалуж̇ж̇анад̇о абалогид̇ам̣. мам̣сажагкунаа д̣̇иб̣б̣ажагкунаа жа абассид̇аб̣б̣ад̇д̇аа анид̣̇ассанам̣. рааг̇аад̣̇ибабан̃жаабхаавзна ниббабан̃жам̣. гилзсаабхисан̇каараанам̣ вуубасамахзд̇уд̇ааяа санд̇ам̣.
Dhammānussatiyaṃ ‘‘asaṅkhata’’ntiādīsu na kenaci paccayena saṅkhatanti asaṅkhataṃ. Natthi etassa anto vināsoti anantaṃ. Āsavānaṃ anārammaṇato anāsavaṃ. Aviparītasabhāvattā saccaṃ. Saṃsārassa paratīrabhāvato pāraṃ. Nipuṇañāṇavisayattā sukhumasabhāvattā ca nipuṇa. Anupacitañāṇasambhārehi daṭṭhuṃ na sakkāti sududdasaṃ. Uppādajarāhi anabbhāhatattā ajajjaraṃ. Thirabhāvena dhuvaṃ. Jarāmaraṇehi apalujjanato apalokitaṃ. Maṃsacakkhunā dibbacakkhunā ca apassitabbattā anidassanaṃ. Rāgādipapañcābhāvena nippapañcaṃ. Kilesābhisaṅkhārānaṃ vūpasamahetutāya santaṃ.
амад̇ахзд̇уд̇ааяа бхан̇г̇аабхаавад̇о жа амад̇ам̣. уд̇д̇амадтзна ад̇аббагадтзна жа бан̣ийд̇ам̣. асиваанам̣ гаммагилзсавибаагаваддаанам̣ абхаавзна сивам̣. жад̇уухи яог̇зхи анубад̣̇д̣̇авабхаавзна кзмам̣. д̇ан̣хаа кийяад̇и зд̇т̇аад̇и д̇ан̣хагкаяо. гад̇абун̃н̃зхиби гад̣̇аажид̣̇зва бассид̇аб̣б̣ад̇д̇аа ажчарияам̣. абхууд̇абуб̣б̣ад̇д̇аа аб̣бхуд̇ам̣ . ананд̇арааяад̇д̇аа анийд̇игам̣. ананд̇арааяабхаавахзд̇уд̇о анийд̇игад̇хаммам̣ (сам̣. ни. адта. 3.5.377-409).
Amatahetutāya bhaṅgābhāvato ca amataṃ. Uttamaṭṭhena atappakaṭṭhena ca paṇītaṃ. Asivānaṃ kammakilesavipākavaṭṭānaṃ abhāvena sivaṃ. Catūhi yogehi anupaddavabhāvena khemaṃ. Taṇhā khīyati etthāti taṇhakkhayo. Katapuññehipi kadācideva passitabbattā acchariyaṃ. Abhūtapubbattā abbhutaṃ. Anantarāyattā anītikaṃ. Anantarāyabhāvahetuto anītikadhammaṃ (saṃ. ni. aṭṭha. 3.5.377-409).
аниб̣б̣ад̇д̇исабхаавад̇д̇аа аж̇аад̇ам̣. д̇ад̇о зва абхууд̇ам̣. убхаязнааби уббаад̣̇арахид̇анд̇и вуд̇д̇ам̣ ход̇и. гзнажи анубад̣̇д̣̇уд̇ад̇д̇аа анубад̣̇д̣̇авам̣. на гзнажи бажжаязна гад̇анд̇и агад̇ам̣. над̇т̇и зд̇т̇а согод̇и асогам̣. согахзд̇увиг̇амзна висогам̣. гзнажи анубасаж̇ж̇ид̇аб̣б̣ад̇д̇аа анубасаг̇г̇ам̣. анубасаг̇г̇абхаавахзд̇уд̇о анубасаг̇г̇ад̇хаммам̣.
Anibbattisabhāvattā ajātaṃ. Tato eva abhūtaṃ. Ubhayenāpi uppādarahitanti vuttaṃ hoti. Kenaci anupaddutattā anupaddavaṃ. Na kenaci paccayena katanti akataṃ. Natthi ettha sokoti asokaṃ. Sokahetuvigamena visokaṃ. Kenaci anupasajjitabbattā anupasaggaṃ. Anupasaggabhāvahetuto anupasaggadhammaṃ.
г̇амбхийран̃аан̣аг̇ожарад̇о г̇амбхийрам̣. саммаабадибад̇д̇им̣ винаа бассид̇ум̣ бад̇д̇ум̣ асаггун̣зяяад̇д̇аа д̣̇уббассам̣. саб̣б̣алогам̣ уд̇д̇арид̇ваа тид̇анд̇и уд̇д̇арам̣. над̇т̇и зд̇асса уд̇д̇аранд̇и ануд̇д̇арам̣. самасса сад̣̇исасса абхаавзна асамам̣. бадибхааг̇аабхаавзна аббадисамам̣. уд̇д̇амадтзна ж̇здтам̣, баасам̣сад̇амад̇д̇аа ваа ж̇здтам̣. сам̣саарад̣̇угкаддид̇зхи лзд̇аб̣б̣ад̇о лзн̣ам̣. д̇ад̇о рагкан̣ад̇о д̇аан̣ам̣. ран̣аабхаавзна аран̣ам̣. ан̇г̇ан̣аабхаавзна анан̇г̇ан̣ам̣. нид̣̇д̣̇осад̇ааяа агаажам̣. рааг̇аад̣̇ималаабаг̇амзна вималам̣. жад̇уухи огхзхи анаж̇жход̇т̇аран̣ийяад̇о д̣̇ийбо. сам̣сааравуубасамасукад̇ааяа сукам̣. бамаан̣агарад̇хаммаабхаавад̇о аббамаан̣ам̣, г̇ан̣зд̇ум̣ зд̇асса на саггаад̇и жа аббамаан̣ам̣. сам̣саарасамуд̣̇д̣̇з аносийд̣̇анадтаанад̇ааяа бад̇идтаа. рааг̇аад̣̇игин̃жанаабхаавзна бариг̇г̇ахаабхаавзна жа агин̃жананд̇и звамад̇т̇о д̣̇адтаб̣б̣о.
Gambhīrañāṇagocarato gambhīraṃ. Sammāpaṭipattiṃ vinā passituṃ pattuṃ asakkuṇeyyattā duppassaṃ. Sabbalokaṃ uttaritvā ṭhitanti uttaraṃ. Natthi etassa uttaranti anuttaraṃ. Samassa sadisassa abhāvena asamaṃ. Paṭibhāgābhāvena appaṭisamaṃ. Uttamaṭṭhena jeṭṭhaṃ, pāsaṃsatamattā vā jeṭṭhaṃ. Saṃsāradukkhaṭṭitehi letabbato leṇaṃ. Tato rakkhaṇato tāṇaṃ. Raṇābhāvena araṇaṃ. Aṅgaṇābhāvena anaṅgaṇaṃ. Niddosatāya akācaṃ. Rāgādimalāpagamena vimalaṃ. Catūhi oghehi anajjhottharaṇīyato dīpo. Saṃsāravūpasamasukhatāya sukhaṃ. Pamāṇakaradhammābhāvato appamāṇaṃ, gaṇetuṃ etassa na sakkāti ca appamāṇaṃ. Saṃsārasamudde anosīdanaṭṭhānatāya patiṭṭhā. Rāgādikiñcanābhāvena pariggahābhāvena ca akiñcananti evamattho daṭṭhabbo.
сан̇гхаануссад̇ияам̣ сад̇д̇аанам̣ саарод̇и сийласаараад̣̇исаараг̇ун̣аяог̇ад̇о сад̇д̇зсу саарабхууд̇о. сад̇д̇аанам̣ ман̣д̣од̇и г̇орасзсу саббиман̣д̣о вияа сад̇д̇зсу ман̣д̣абхууд̇о. саараг̇ун̣авасзнзва сад̇д̇зсу уд̣̇д̇харид̇аб̣б̣ад̇о сад̇д̇аанам̣ уд̣̇д̇хааро. нижжалаг̇ун̣ад̇ааяа сад̇д̇аанам̣ зсигаа. г̇ун̣асобхаасурабхибхаавзна сад̇д̇аанам̣ басуунам̣ сурабхи гусуманд̇и ад̇т̇о.
Saṅghānussatiyaṃ sattānaṃ sāroti sīlasārādisāraguṇayogato sattesu sārabhūto. Sattānaṃ maṇḍoti gorasesu sappimaṇḍo viya sattesu maṇḍabhūto. Sāraguṇavaseneva sattesu uddharitabbato sattānaṃ uddhāro. Niccalaguṇatāya sattānaṃ esikā. Guṇasobhāsurabhibhāvena sattānaṃ pasūnaṃ surabhi kusumanti attho.
г̇ун̣зсу уд̇д̇аман̇г̇ам̣ бан̃н̃аа д̇ассаа убасобхаахзд̇уд̇ааяа сийлам̣ уд̇д̇аман̇г̇обасобханам̣ вуд̇д̇ам̣. сийлзсу барибуурагаарино аниж̇жханд̇аа наама г̇ун̣аа над̇т̇ийд̇и ‘‘нид̇хаанан̃жа сийлам̣ саб̣б̣ад̣̇обхаг̇г̇асамад̇иггаманадтзнаа’’д̇и вуд̇д̇ам̣. аяан̃жа ад̇т̇о ааган̇кзяяасуд̇д̇зна (ма. ни. 1.64 аад̣̇аяо) д̣̇ийбзд̇аб̣б̣о. абарамби вуд̇д̇ам̣ – ‘‘иж̇жхад̇и, бхигкавз, сийлавад̇о жзд̇обан̣ид̇хи висуд̣̇д̇хад̇д̇аа’’д̇и (д̣̇ий. ни. 3.337; сам̣. ни. 4.352; а. ни. 8.35). сиббанд̇и д̇ханусиббам̣. д̇хан̃н̃анд̇и д̇ханааяид̇аб̣б̣ам̣. д̇хаммавологанад̇ааяаад̇и самат̇авибассанаад̣̇ид̇хаммасса вологанабхаавзна . вологанадтзнаад̇и сад̇д̇абхуумагаад̣̇ибаасаад̣̇з вияа сийлз тад̇ваа абхин̃н̃аажагкунаа логасса вологзд̇ум̣ саггаад̇и вуд̇д̇ам̣. саб̣б̣абхуумаанубаривад̇д̇и жа сийлам̣ жад̇убхуумагагусалассааби д̇ад̣̇анувад̇д̇анад̇о. сзсам̣ уд̇д̇аанамзваад̇и.
Guṇesu uttamaṅgaṃ paññā tassā upasobhāhetutāya sīlaṃ uttamaṅgopasobhanaṃ vuttaṃ. Sīlesu paripūrakārino anijjhantā nāma guṇā natthīti ‘‘nidhānañca sīlaṃ sabbadobhaggasamatikkamanaṭṭhenā’’ti vuttaṃ. Ayañca attho ākaṅkheyyasuttena (ma. ni. 1.64 ādayo) dīpetabbo. Aparampi vuttaṃ – ‘‘ijjhati, bhikkhave, sīlavato cetopaṇidhi visuddhattā’’ti (dī. ni. 3.337; saṃ. ni. 4.352; a. ni. 8.35). Sippanti dhanusippaṃ. Dhaññanti dhanāyitabbaṃ. Dhammavolokanatāyāti samathavipassanādidhammassa volokanabhāvena . Volokanaṭṭhenāti sattabhūmakādipāsāde viya sīle ṭhatvā abhiññācakkhunā lokassa voloketuṃ sakkāti vuttaṃ. Sabbabhūmānuparivatti ca sīlaṃ catubhūmakakusalassāpi tadanuvattanato. Sesaṃ uttānamevāti.
взважанахааравибхан̇г̇аван̣н̣анаа нидтид̇аа.
Vevacanahāravibhaṅgavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / нзд̇д̇иббагаран̣абаал̣и • Nettippakaraṇapāḷi / 10. взважанахааравибхан̇г̇о • 10. Vevacanahāravibhaṅgo
дийгаа • Tīkā / суд̇д̇абидага (дийгаа) • Suttapiṭaka (ṭīkā) / куд̣̇д̣̇аганигааяа (дийгаа) • Khuddakanikāya (ṭīkā) / нзд̇д̇иббагаран̣а-дийгаа • Nettippakaraṇa-ṭīkā / 10. взважанахааравибхан̇г̇аван̣н̣анаа • 10. Vevacanahāravibhaṅgavaṇṇanā
дийгаа • Tīkā / суд̇д̇абидага (дийгаа) • Suttapiṭaka (ṭīkā) / куд̣̇д̣̇аганигааяа (дийгаа) • Khuddakanikāya (ṭīkā) / нзд̇д̇ивибхаавиний • Nettivibhāvinī / 10. взважанахааравибхан̇г̇авибхааванаа • 10. Vevacanahāravibhaṅgavibhāvanā
