| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
១០. វិភង្គសុត្តំ
10. Vibhaṅgasuttaṃ
៤០៦. ‘‘សតិបដ្ឋានញ្ច វោ, ភិក្ខវេ, ទេសេស្សាមិ សតិបដ្ឋានភាវនញ្ច សតិបដ្ឋានភាវនាគាមិនិញ្ច បដិបទំ។ តំ សុណាថ’’។ ‘‘កតមញ្ច, ភិក្ខវេ, សតិបដ្ឋានំ? ឥធ, ភិក្ខវេ, ភិក្ខុ កាយេ កាយានុបស្សី វិហរតិ អាតាបី សម្បជានោ សតិមា, វិនេយ្យ លោកេ អភិជ្ឈាទោមនស្សំ; វេទនាសុ វេទនានុបស្សី វិហរតិ…បេ.… ចិត្តេ ចិត្តានុបស្សី វិហរតិ…បេ.… ធម្មេសុ ធម្មានុបស្សី វិហរតិ អាតាបី សម្បជានោ សតិមា, វិនេយ្យ លោកេ អភិជ្ឈាទោមនស្សំ។ ឥទំ វុច្ចតិ, ភិក្ខវេ, សតិបដ្ឋានំ’’។
406. ‘‘Satipaṭṭhānañca vo, bhikkhave, desessāmi satipaṭṭhānabhāvanañca satipaṭṭhānabhāvanāgāminiñca paṭipadaṃ. Taṃ suṇātha’’. ‘‘Katamañca, bhikkhave, satipaṭṭhānaṃ? Idha, bhikkhave, bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṃ; vedanāsu vedanānupassī viharati…pe… citte cittānupassī viharati…pe… dhammesu dhammānupassī viharati ātāpī sampajāno satimā, vineyya loke abhijjhādomanassaṃ. Idaṃ vuccati, bhikkhave, satipaṭṭhānaṃ’’.
‘‘កតមា ច, ភិក្ខវេ, សតិបដ្ឋានភាវនា? ឥធ, ភិក្ខវេ, ភិក្ខុ សមុទយធម្មានុបស្សី កាយស្មិំ វិហរតិ, វយធម្មានុបស្សី កាយស្មិំ វិហរតិ, សមុទយវយធម្មានុបស្សី កាយស្មិំ វិហរតិ, អាតាបី សម្បជានោ សតិមា, វិនេយ្យ លោកេ អភិជ្ឈាទោមនស្សំ។ សមុទយធម្មានុបស្សី វេទនាសុ វិហរតិ…បេ.… សមុទយធម្មានុបស្សី ចិត្តេ វិហរតិ… សមុទយធម្មានុបស្សី ធម្មេសុ វិហរតិ, វយធម្មានុបស្សី ធម្មេសុ វិហរតិ, សមុទយវយធម្មានុបស្សី ធម្មេសុ វិហរតិ, អាតាបី សម្បជានោ សតិមា, វិនេយ្យ លោកេ អភិជ្ឈាទោមនស្សំ។ អយំ វុច្ចតិ, ភិក្ខវេ, សតិបដ្ឋានភាវនា។
‘‘Katamā ca, bhikkhave, satipaṭṭhānabhāvanā? Idha, bhikkhave, bhikkhu samudayadhammānupassī kāyasmiṃ viharati, vayadhammānupassī kāyasmiṃ viharati, samudayavayadhammānupassī kāyasmiṃ viharati, ātāpī sampajāno satimā, vineyya loke abhijjhādomanassaṃ. Samudayadhammānupassī vedanāsu viharati…pe… samudayadhammānupassī citte viharati… samudayadhammānupassī dhammesu viharati, vayadhammānupassī dhammesu viharati, samudayavayadhammānupassī dhammesu viharati, ātāpī sampajāno satimā, vineyya loke abhijjhādomanassaṃ. Ayaṃ vuccati, bhikkhave, satipaṭṭhānabhāvanā.
‘‘កតមា ច, ភិក្ខវេ, សតិបដ្ឋានភាវនាគាមិនី បដិបទា? អយមេវ អរិយោ អដ្ឋង្គិកោ មគ្គោ, សេយ្យថិទំ – សម្មាទិដ្ឋិ, សម្មាសង្កប្បោ, សម្មាវាចា, សម្មាកម្មន្តោ, សម្មាអាជីវោ, សម្មាវាយាមោ, សម្មាសតិ, សម្មាសមាធិ។ អយំ វុច្ចតិ, ភិក្ខវេ, សតិបដ្ឋានភាវនាគាមិនី បដិបទា’’តិ។ ទសមំ។
‘‘Katamā ca, bhikkhave, satipaṭṭhānabhāvanāgāminī paṭipadā? Ayameva ariyo aṭṭhaṅgiko maggo, seyyathidaṃ – sammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhi. Ayaṃ vuccati, bhikkhave, satipaṭṭhānabhāvanāgāminī paṭipadā’’ti. Dasamaṃ.
អននុស្សុតវគ្គោ ចតុត្ថោ។
Ananussutavaggo catuttho.
តស្សុទ្ទានំ –
Tassuddānaṃ –
អននុស្សុតំ វិរាគោ, វិរទ្ធោ ភាវនា សតិ;
Ananussutaṃ virāgo, viraddho bhāvanā sati;
អញ្ញា ឆន្ទំ បរិញ្ញាយ, ភាវនា វិភង្គេន ចាតិ។
Aññā chandaṃ pariññāya, bhāvanā vibhaṅgena cāti.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៤. អននុស្សុតវគ្គវណ្ណនា • 4. Ananussutavaggavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ៤. អននុស្សុតវគ្គវណ្ណនា • 4. Ananussutavaggavaṇṇanā
