| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
2. விப⁴ங்க³ஸுத்தவண்ணனா
2. Vibhaṅgasuttavaṇṇanā
2. து³தியேபி வுத்தனயேனேவ ஸுத்தனிக்கே²போ வேதி³தப்³போ³. அயங் பன விஸேஸோ – பட²மங் உக்³க⁴டிதஞ்ஞூபுக்³க³லானங் வஸேன ஸங்கே²பதோ த³ஸ்ஸிதங், இத³ங் விபஞ்சிதஞ்ஞூனங் வஸேன வித்தா²ரதோதி. இமஸ்மிஞ்ச பன ஸுத்தே சதஸ்ஸோ வல்லிஹாரகபுரிஸூபமா வத்தப்³பா³, தா விஸுத்³தி⁴மக்³கே³ வுத்தா ஏவ. யதா² ஹி வல்லிஹாரகோ புரிஸோ வல்லியா அக்³க³ங் தி³ஸ்வா தத³னுஸாரேன மூலங் பரியேஸந்தோ தங் தி³ஸ்வா வல்லிங் மூலே செ²த்வா ஆதா³ய கம்மே உபனெய்ய, ஏவங் ப⁴க³வா வித்தா²ரதே³ஸனங் தே³ஸெந்தோ படிச்சஸமுப்பாத³ஸ்ஸ அக்³க³பூ⁴தா ஜராமரணா பட்டா²ய யாவ மூலபூ⁴தங் அவிஜ்ஜாபத³ங், தாவ தே³ஸனங் ஆஹரித்வா புன வட்டவிவட்டங் தே³ஸெந்தோ நிட்ட²பேஸி.
2. Dutiyepi vuttanayeneva suttanikkhepo veditabbo. Ayaṃ pana viseso – paṭhamaṃ ugghaṭitaññūpuggalānaṃ vasena saṅkhepato dassitaṃ, idaṃ vipañcitaññūnaṃ vasena vitthāratoti. Imasmiñca pana sutte catasso vallihārakapurisūpamā vattabbā, tā visuddhimagge vuttā eva. Yathā hi vallihārako puriso valliyā aggaṃ disvā tadanusārena mūlaṃ pariyesanto taṃ disvā valliṃ mūle chetvā ādāya kamme upaneyya, evaṃ bhagavā vitthāradesanaṃ desento paṭiccasamuppādassa aggabhūtā jarāmaraṇā paṭṭhāya yāva mūlabhūtaṃ avijjāpadaṃ, tāva desanaṃ āharitvā puna vaṭṭavivaṭṭaṃ desento niṭṭhapesi.
தத்ராயங் ஜராமரணாதீ³னங் வித்தா²ரதே³ஸனாய அத்த²னிச்ச²யோ – ஜராமரணனித்³தே³ஸே தாவ தேஸங் தேஸந்தி அயங் ஸங்கே²பதோ அனேகேஸங் ஸத்தானங் ஸாதா⁴ரணனித்³தே³ஸோதி விஞ்ஞாதப்³போ³. யா தே³வத³த்தஸ்ஸ ஜரா, யா ஸோமத³த்தஸ்ஸாதி ஏவஞ்ஹி தி³வஸம்பி கதெ²ந்தஸ்ஸ நேவ ஸத்தா பரியாதா³னங் க³ச்ச²ந்தி. இமேஹி பன த்³வீஹி பதே³ஹி ந கோசி ஸத்தோ அபரியாதி³ன்னோ ஹோதி. தஸ்மா வுத்தங், ‘‘அயங் ஸங்கே²பதோ அனேகேஸங் ஸத்தானங் ஸாதா⁴ரணனித்³தே³ஸோ’’தி. தம்ஹி தம்ஹீதி அயங் க³திஜாதிவஸேன அனேகேஸங் ஸத்தனிகாயானங் ஸாதா⁴ரணனித்³தே³ஸோ. ஸத்தனிகாயேதி ஸாதா⁴ரணனித்³தே³ஸேன நித்³தி³ட்ட²ஸ்ஸ ஸரூபனித³ஸ்ஸனங். ஜரா ஜீரணதாதிஆதீ³ஸு பன ஜராதி ஸபா⁴வனித்³தே³ஸோ. ஜீரணதாதி ஆகாரனித்³தே³ஸோ. க²ண்டி³ச்சந்திஆத³யோ தயோ காலாதிக்கமே கிச்சனித்³தே³ஸா, பச்சி²மா த்³வே பகதினித்³தே³ஸா. அயஞ்ஹி ஜராதி இமினா பதே³ன ஸபா⁴வதோ தீ³பிதா, தேனஸ்ஸாயங் ஸபா⁴வனித்³தே³ஸோ . ஜீரணதாதி இமினா ஆகாரதோ, தேனஸ்ஸாயங் ஆகாரனித்³தே³ஸோ. க²ண்டி³ச்சந்தி இமினா காலாதிக்கமே த³ந்தனகா²னங் க²ண்டி³தபா⁴வகரணகிச்சதோ. பாலிச்சந்தி இமினா கேஸலோமானங் பலிதபா⁴வகரணகிச்சதோ. வலித்தசதாதி இமினா மங்ஸங் மிலாபெத்வா தசவலிபா⁴வகரணகிச்சதோ தீ³பிதா. தேனஸ்ஸா இமே க²ண்டி³ச்சந்திஆத³யோ தயோ காலாதிக்கமே கிச்சனித்³தே³ஸா. தேஹி இமேஸங் விகாரானங் த³ஸ்ஸனவஸேன பாகடீபூ⁴தா பாகடஜரா த³ஸ்ஸிதா. யதே²வ ஹி உத³கஸ்ஸ வா வாதஸ்ஸ வா அக்³கி³னோ வா திணருக்கா²தீ³னங் ஸங்ப⁴க்³க³பலிப⁴க்³க³தாய வா ஜா²மதாய வா க³தமக்³கோ³ பாகடோ ஹோதி, ந ச ஸோ க³தமக்³கோ³ தானேவ உத³காதீ³னி, ஏவமேவ ஜராய த³ந்தாதீ³ஸு க²ண்டி³ச்சாதி³வஸேன க³தமக்³கோ³ பாகடோ, சக்கு²ங் உம்மீலெத்வாபி க³ய்ஹதி ந ச க²ண்டி³ச்சாதீ³னேவ ஜரா. ந ஹி ஜரா சக்கு²விஞ்ஞெய்யா ஹோதி.
Tatrāyaṃ jarāmaraṇādīnaṃ vitthāradesanāya atthanicchayo – jarāmaraṇaniddese tāva tesaṃ tesanti ayaṃ saṅkhepato anekesaṃ sattānaṃ sādhāraṇaniddesoti viññātabbo. Yā devadattassa jarā, yā somadattassāti evañhi divasampi kathentassa neva sattā pariyādānaṃ gacchanti. Imehi pana dvīhi padehi na koci satto apariyādinno hoti. Tasmā vuttaṃ, ‘‘ayaṃ saṅkhepato anekesaṃ sattānaṃ sādhāraṇaniddeso’’ti. Tamhi tamhīti ayaṃ gatijātivasena anekesaṃ sattanikāyānaṃ sādhāraṇaniddeso. Sattanikāyeti sādhāraṇaniddesena niddiṭṭhassa sarūpanidassanaṃ. Jarā jīraṇatātiādīsu pana jarāti sabhāvaniddeso. Jīraṇatāti ākāraniddeso. Khaṇḍiccantiādayo tayo kālātikkame kiccaniddesā, pacchimā dve pakatiniddesā. Ayañhi jarāti iminā padena sabhāvato dīpitā, tenassāyaṃ sabhāvaniddeso . Jīraṇatāti iminā ākārato, tenassāyaṃ ākāraniddeso. Khaṇḍiccanti iminā kālātikkame dantanakhānaṃ khaṇḍitabhāvakaraṇakiccato. Pāliccanti iminā kesalomānaṃ palitabhāvakaraṇakiccato. Valittacatāti iminā maṃsaṃ milāpetvā tacavalibhāvakaraṇakiccato dīpitā. Tenassā ime khaṇḍiccantiādayo tayo kālātikkame kiccaniddesā. Tehi imesaṃ vikārānaṃ dassanavasena pākaṭībhūtā pākaṭajarā dassitā. Yatheva hi udakassa vā vātassa vā aggino vā tiṇarukkhādīnaṃ saṃbhaggapalibhaggatāya vā jhāmatāya vā gatamaggo pākaṭo hoti, na ca so gatamaggo tāneva udakādīni, evameva jarāya dantādīsu khaṇḍiccādivasena gatamaggo pākaṭo, cakkhuṃ ummīletvāpi gayhati na ca khaṇḍiccādīneva jarā. Na hi jarā cakkhuviññeyyā hoti.
ஆயுனோ ஸங்ஹானி இந்த்³ரியானங் பரிபாகோதி இமேஹி பன பதே³ஹி காலாதிக்கமேயேவ அபி⁴ப்³யத்தாய ஆயுக்க²ய-சக்கா²தி³இந்த்³ரிய-பரிபாகஸஞ்ஞிதாய பகதியா தீ³பிதா. தேனஸ்ஸிமே பச்சி²மா த்³வே பகதினித்³தே³ஸாதி வேதி³தப்³பா³. தத்த² யஸ்மா ஜரங் பத்தஸ்ஸ ஆயு ஹாயதி, தஸ்மா ஜரா ‘‘ஆயுனோ ஸங்ஹானீ’’தி ப²லூபசாரேன வுத்தா. யஸ்மா ச த³ஹரகாலே ஸுப்பஸன்னானி ஸுகு²மம்பி அத்தனோ விஸயங் ஸுகே²னேவ க³ண்ஹனஸமத்தா²னி சக்கா²தீ³னி இந்த்³ரியானி ஜரங் பத்தஸ்ஸ பரிபக்கானி ஆலுளிதானி அவிஸதா³னி, ஓளாரிகம்பி அத்தனோ விஸயங் க³ஹேதுங் அஸமத்தா²னி ஹொந்தி, தஸ்மா ‘‘இந்த்³ரியானங் பரிபாகோ’’தி ப²லூபசாரேனேவ வுத்தா.
Āyuno saṃhāni indriyānaṃ paripākoti imehi pana padehi kālātikkameyeva abhibyattāya āyukkhaya-cakkhādiindriya-paripākasaññitāya pakatiyā dīpitā. Tenassime pacchimā dve pakatiniddesāti veditabbā. Tattha yasmā jaraṃ pattassa āyu hāyati, tasmā jarā ‘‘āyuno saṃhānī’’ti phalūpacārena vuttā. Yasmā ca daharakāle suppasannāni sukhumampi attano visayaṃ sukheneva gaṇhanasamatthāni cakkhādīni indriyāni jaraṃ pattassa paripakkāni āluḷitāni avisadāni, oḷārikampi attano visayaṃ gahetuṃ asamatthāni honti, tasmā ‘‘indriyānaṃ paripāko’’ti phalūpacāreneva vuttā.
ஸா பனாயங் ஏவங் நித்³தி³ட்டா² ஸப்³பா³பி ஜரா பாகடா படிச்ச²ன்னாதி து³விதா⁴ ஹோதி. தத்த² த³ந்தாதீ³ஸு க²ண்டா³தி³பா⁴வத³ஸ்ஸனதோ ரூபத⁴ம்மேஸு ஜரா பாகடஜரா நாம, அரூபத⁴ம்மேஸு பன ஜரா தாதி³ஸஸ்ஸ விகாரஸ்ஸ அத³ஸ்ஸனதோ படிச்ச²ன்னஜரா நாம. தத்த² ய்வாயங் க²ண்டா³தி³பா⁴வோ தி³ஸ்ஸதி, ஸோ தாதி³ஸானங் த³ந்தாதீ³னங் ஸுவிஞ்ஞெய்யத்தா வண்ணோயேவ, தங் சக்கு²னா தி³ஸ்வா மனொத்³வாரேன சிந்தெத்வா ‘‘இமே த³ந்தா ஜராய பஹடா’’தி ஜரங் ஜானாதி உத³கட்டா²னே ப³த்³தா⁴னி கோ³ஸீஸாதீ³னி ஓலோகெத்வா ஹெட்டா² உத³கஸ்ஸ அத்தி²பா⁴வங் ஜானநங் விய. புன அவீசி ஸவீசீதி ஏவம்பி து³விதா⁴ ஹோதி. தத்த² மணி-கனக-ரஜத-பவாளசந்த³ஸூரியாதீ³னங் விய மந்த³த³ஸகாதீ³ஸு பாணீனங் விய ச புப்ப²ப²லபல்லவாதீ³ஸு ச அபாணீனங் விய அந்தரந்தரா வண்ணவிஸேஸாதீ³னங் து³விஞ்ஞெய்யத்தா ஜரா அவீசிஜரா நாம, நிரந்தரஜராதி அத்தோ². ததோ அஞ்ஞேஸு பன யதா²வுத்தேஸு அந்தரந்தரா வண்ணவிஸேஸாதீ³னங் ஸுவிஞ்ஞெய்யத்தா ஜரா ஸவீசிஜரா நாமாதி வேதி³தப்³பா³.
Sā panāyaṃ evaṃ niddiṭṭhā sabbāpi jarā pākaṭā paṭicchannāti duvidhā hoti. Tattha dantādīsu khaṇḍādibhāvadassanato rūpadhammesu jarā pākaṭajarā nāma, arūpadhammesu pana jarā tādisassa vikārassa adassanato paṭicchannajarā nāma. Tattha yvāyaṃ khaṇḍādibhāvo dissati, so tādisānaṃ dantādīnaṃ suviññeyyattā vaṇṇoyeva, taṃ cakkhunā disvā manodvārena cintetvā ‘‘ime dantā jarāya pahaṭā’’ti jaraṃ jānāti udakaṭṭhāne baddhāni gosīsādīni oloketvā heṭṭhā udakassa atthibhāvaṃ jānanaṃ viya. Puna avīci savīcīti evampi duvidhā hoti. Tattha maṇi-kanaka-rajata-pavāḷacandasūriyādīnaṃ viya mandadasakādīsu pāṇīnaṃ viya ca pupphaphalapallavādīsu ca apāṇīnaṃ viya antarantarā vaṇṇavisesādīnaṃ duviññeyyattā jarā avīcijarā nāma, nirantarajarāti attho. Tato aññesu pana yathāvuttesu antarantarā vaṇṇavisesādīnaṃ suviññeyyattā jarā savīcijarā nāmāti veditabbā.
இதோ பரங் தேஸங் தேஸந்திஆதி³ வுத்தனயேனேவ வேதி³தப்³ப³ங். சுதி சவனதாதிஆதீ³ஸு பன சுதீதி சவனகவஸேன வுச்சதி, ஏகசதுபஞ்சக்க²ந்த⁴ஸாமஞ்ஞவசனமேதங். சவனதாதி பா⁴வவசனேன லக்க²ணனித³ஸ்ஸனங் . பே⁴தோ³தி சுதிக்க²ந்தா⁴னங் ப⁴ங்கு³ப்பத்திபரிதீ³பனங். அந்தரதா⁴னந்தி க⁴டஸ்ஸேவ பி⁴ன்னஸ்ஸ பி⁴ன்னானங் சுதிக்க²ந்தா⁴னங் யேன கேனசி பரியாயேன டா²னாபா⁴வபரிதீ³பனங். மச்சு மரணந்தி மச்சுஸங்கா²தங் மரணங், தேன ஸமுச்சே²த³மரணாதீ³னி நிஸேதே⁴தி. காலோ நாம அந்தகோ, தஸ்ஸ கிரியா காலகிரியா. ஏவங் தேன லோகஸம்முதியா மரணங் தீ³பேதி.
Ito paraṃ tesaṃ tesantiādi vuttanayeneva veditabbaṃ. Cuti cavanatātiādīsu pana cutīti cavanakavasena vuccati, ekacatupañcakkhandhasāmaññavacanametaṃ. Cavanatāti bhāvavacanena lakkhaṇanidassanaṃ . Bhedoti cutikkhandhānaṃ bhaṅguppattiparidīpanaṃ. Antaradhānanti ghaṭasseva bhinnassa bhinnānaṃ cutikkhandhānaṃ yena kenaci pariyāyena ṭhānābhāvaparidīpanaṃ. Maccu maraṇanti maccusaṅkhātaṃ maraṇaṃ, tena samucchedamaraṇādīni nisedheti. Kālo nāma antako, tassa kiriyā kālakiriyā. Evaṃ tena lokasammutiyā maraṇaṃ dīpeti.
இதா³னி பரமத்தே²ன தீ³பேதுங் க²ந்தா⁴னங் பே⁴தோ³திஆதி³மாஹ. பரமத்தே²ன ஹி க²ந்தா⁴யேவ பி⁴ஜ்ஜந்தி, ந ஸத்தோ நாம கோசி மரதி. க²ந்தே⁴ஸு பன பி⁴ஜ்ஜமானேஸு ஸத்தோ மரதி, பி⁴ன்னேஸு மதோதி வோஹாரோ ஹோதி. எத்த² ச சதுபஞ்சவோகாரவஸேன க²ந்தா⁴னங் பே⁴தோ³, ஏகவோகாரவஸேன களேவரஸ்ஸ நிக்கே²போ. சதுவோகாரவஸேன ச க²ந்தா⁴னங் பே⁴தோ³, ஸேஸத்³வயவஸேன களேவரஸ்ஸ நிக்கே²போ வேதி³தப்³போ³. கஸ்மா? ப⁴வத்³வயேபி ரூபகாயஸங்கா²தஸ்ஸ களேவரஸ்ஸ ஸப்³பா⁴வதோ. அத² வா யஸ்மா சாதுமஹாராஜிகாதீ³ஸு க²ந்தா⁴ பி⁴ஜ்ஜந்தேவ, ந கிஞ்சி நிக்கி²பதி, தஸ்மா தேஸங் வஸேன க²ந்தா⁴னங் பே⁴தோ³, மனுஸ்ஸாதீ³ஸு களேவரஸ்ஸ நிக்கே²போ. எத்த² ச களேவரஸ்ஸ நிக்கே²பகாரணதோ மரணங் ‘‘களேவரஸ்ஸ நிக்கே²போ’’தி வுத்தந்தி ஏவமத்தோ² த³ட்ட²ப்³போ³. இதி அயஞ்ச ஜரா இத³ஞ்ச மரணங், இத³ங் வுச்சதி, பி⁴க்க²வேதி இத³ங் உப⁴யம்பி ஏகதோ கத்வா ஜராமரணந்தி கதீ²யதி.
Idāni paramatthena dīpetuṃ khandhānaṃ bhedotiādimāha. Paramatthena hi khandhāyeva bhijjanti, na satto nāma koci marati. Khandhesu pana bhijjamānesu satto marati, bhinnesu matoti vohāro hoti. Ettha ca catupañcavokāravasena khandhānaṃ bhedo, ekavokāravasena kaḷevarassa nikkhepo. Catuvokāravasena ca khandhānaṃ bhedo, sesadvayavasena kaḷevarassa nikkhepo veditabbo. Kasmā? Bhavadvayepi rūpakāyasaṅkhātassa kaḷevarassa sabbhāvato. Atha vā yasmā cātumahārājikādīsu khandhā bhijjanteva, na kiñci nikkhipati, tasmā tesaṃ vasena khandhānaṃ bhedo, manussādīsu kaḷevarassa nikkhepo. Ettha ca kaḷevarassa nikkhepakāraṇato maraṇaṃ ‘‘kaḷevarassa nikkhepo’’ti vuttanti evamattho daṭṭhabbo. Iti ayañca jarā idañca maraṇaṃ, idaṃ vuccati, bhikkhaveti idaṃ ubhayampi ekato katvā jarāmaraṇanti kathīyati.
ஜாதினித்³தே³ஸே ஜாதி ஸஞ்ஜாதீதிஆதீ³ஸு ஜாயனட்டே²ன ஜாதி, ஸா அபரிபுண்ணாயதனவஸேன யுத்தா. ஸஞ்ஜாயனட்டே²ன ஸஞ்ஜாதி, ஸா பரிபுண்ணாயதனவஸேன யுத்தா. ஓக்கமனட்டே²ன ஓக்கந்தி, ஸா அண்ட³ஜஜலாபு³ஜவஸேன யுத்தா. தே ஹி அண்ட³கோஸஞ்ச வத்தி²கோஸஞ்ச ஓக்கமந்தா பவிஸந்தா விய படிஸந்தி⁴ங் க³ண்ஹந்தி. அபி⁴னிப்³ப³த்தனட்டே²ன அபி⁴னிப்³ப³த்தி, ஸா ஸங்ஸேத³ஜஓபபாதிகவஸேன யுத்தா. தே ஹி பாகடாயேவ ஹுத்வா நிப்³ப³த்தந்தி. அயங் தாவ வோஹாரதே³ஸனா.
Jātiniddese jāti sañjātītiādīsu jāyanaṭṭhena jāti, sā aparipuṇṇāyatanavasena yuttā. Sañjāyanaṭṭhena sañjāti, sā paripuṇṇāyatanavasena yuttā. Okkamanaṭṭhena okkanti, sā aṇḍajajalābujavasena yuttā. Te hi aṇḍakosañca vatthikosañca okkamantā pavisantā viya paṭisandhiṃ gaṇhanti. Abhinibbattanaṭṭhena abhinibbatti, sā saṃsedajaopapātikavasena yuttā. Te hi pākaṭāyeva hutvā nibbattanti. Ayaṃ tāva vohāradesanā.
இதா³னி பரமத்த²தே³ஸனா ஹோதி. க²ந்தா⁴யேவ ஹி பரமத்த²தோ பாதுப⁴வந்தி, ந ஸத்தோ. தத்த² ச க²ந்தா⁴னந்தி ஏகவோகாரப⁴வே ஏகஸ்ஸ, சதுவோகாரப⁴வே சதுன்னங், பஞ்சவோகாரப⁴வே பஞ்சன்னம்பி க³ஹணங் வேதி³தப்³ப³ங். பாதுபா⁴வோதி உப்பத்தி. ஆயதனானந்தி எத்த² தத்ர தத்ர உப்பஜ்ஜமானாயதனவஸேன ஸங்க³ஹோ வேதி³தப்³போ³. படிலாபோ⁴தி ஸந்ததியங் பாதுபா⁴வோயேவ. பாதுப⁴வந்தானேவ ஹி தானி படிலத்³தா⁴னி நாம ஹொந்தி. அயங் வுச்சதி, பி⁴க்க²வே, ஜாதீதி இமினா பதே³ன வோஹாரதோ பரமத்த²தோ ச தே³ஸிதாய ஜாதியா நிக³மனங் கரோதீதி.
Idāni paramatthadesanā hoti. Khandhāyeva hi paramatthato pātubhavanti, na satto. Tattha ca khandhānanti ekavokārabhave ekassa, catuvokārabhave catunnaṃ, pañcavokārabhave pañcannampi gahaṇaṃ veditabbaṃ. Pātubhāvoti uppatti. Āyatanānanti ettha tatra tatra uppajjamānāyatanavasena saṅgaho veditabbo. Paṭilābhoti santatiyaṃ pātubhāvoyeva. Pātubhavantāneva hi tāni paṭiladdhāni nāma honti. Ayaṃ vuccati, bhikkhave, jātīti iminā padena vohārato paramatthato ca desitāya jātiyā nigamanaṃ karotīti.
ப⁴வனித்³தே³ஸே காமப⁴வோதி கம்மப⁴வோ ச உபபத்திப⁴வோ ச. தத்த² கம்மப⁴வோ நாம காமப⁴வூபக³கம்மமேவ. தஞ்ஹி தத்த² உபபத்திப⁴வஸ்ஸ காரணத்தா ‘‘ஸுகோ² பு³த்³தா⁴னங் உப்பாதோ³ (த⁴॰ ப॰ 194) து³க்கோ² பாபஸ்ஸ உச்சயோ’’திஆதீ³னி (த⁴॰ ப॰ 117) விய ப²லவோஹாரேன ப⁴வோதி வுத்தங். உபபத்திப⁴வோ நாம தேன கம்மேன நிப்³ப³த்தங் உபாதி³ண்ணக்க²ந்த⁴பஞ்சகங். தஞ்ஹி தத்த² ப⁴வதீதி கத்வா ப⁴வோதி வுத்தங். ஸப்³ப³தா²பி இத³ங் கம்மஞ்ச உபபத்திஞ்ச உப⁴யம்பேதமித⁴ ‘‘காமப⁴வோ’’தி வுத்தங். ஏஸ நயோ ரூபாரூபப⁴வேஸூதி.
Bhavaniddese kāmabhavoti kammabhavo ca upapattibhavo ca. Tattha kammabhavo nāma kāmabhavūpagakammameva. Tañhi tattha upapattibhavassa kāraṇattā ‘‘sukho buddhānaṃ uppādo (dha. pa. 194) dukkho pāpassa uccayo’’tiādīni (dha. pa. 117) viya phalavohārena bhavoti vuttaṃ. Upapattibhavo nāma tena kammena nibbattaṃ upādiṇṇakkhandhapañcakaṃ. Tañhi tattha bhavatīti katvā bhavoti vuttaṃ. Sabbathāpi idaṃ kammañca upapattiñca ubhayampetamidha ‘‘kāmabhavo’’ti vuttaṃ. Esa nayo rūpārūpabhavesūti.
உபாதா³னநித்³தே³ஸே காமுபாதா³னந்திஆதீ³ஸு வத்து²காமங் உபாதி³யந்தி ஏதேன, ஸயங் வா தங் உபாதி³யதீதி காமுபாதா³னங், காமோ ச ஸோ உபாதா³னஞ்சாதி காமுபாதா³னங். உபாதா³னந்தி த³ள்ஹக்³க³ஹணங் வுச்சதி. த³ள்ஹத்தோ² ஹி எத்த² உபஸத்³தோ³ உபாயாஸஉபகட்டா²தீ³ஸு விய. பஞ்சகாமகு³ணிகராக³ஸ்ஸேதங் அதி⁴வசனங். அயமெத்த² ஸங்கே²போ. வித்தா²ரதோ பனேதங், ‘‘தத்த² கதமங் காமுபாதா³னங்? யோ காமேஸு காமச்ச²ந்தோ³’’தி (த⁴॰ ஸ॰ 1220; விப⁴॰ 938) வுத்தனயேனேவ வேதி³தப்³ப³ங்.
Upādānaniddese kāmupādānantiādīsu vatthukāmaṃ upādiyanti etena, sayaṃ vā taṃ upādiyatīti kāmupādānaṃ, kāmo ca so upādānañcāti kāmupādānaṃ. Upādānanti daḷhaggahaṇaṃ vuccati. Daḷhattho hi ettha upasaddo upāyāsaupakaṭṭhādīsu viya. Pañcakāmaguṇikarāgassetaṃ adhivacanaṃ. Ayamettha saṅkhepo. Vitthārato panetaṃ, ‘‘tattha katamaṃ kāmupādānaṃ? Yo kāmesu kāmacchando’’ti (dha. sa. 1220; vibha. 938) vuttanayeneva veditabbaṃ.
ததா² தி³ட்டி² ச ஸா உபாதா³னஞ்சாதி தி³ட்டு²பாதா³னங். அத² வா தி³ட்டி²ங் உபாதி³யதி, உபாதி³யந்தி வா ஏதேன தி³ட்டி²ந்தி தி³ட்டு²பாதா³னங். உபாதி³யதி ஹி புரிமதி³ட்டி²ங் உத்தரதி³ட்டி², உபாதி³யந்தி ச தாய தி³ட்டி²ங். யதா²ஹ – ‘‘ஸஸ்ஸதோ அத்தா ச லோகோ ச இத³மேவ ஸச்சங் மோக⁴மஞ்ஞ’’ந்திஆதி³ (ம॰ நி॰ 3.27). ஸீலப்³ப³துபாதா³னஅத்தவாது³பாதா³னவஜ்ஜஸ்ஸ ஸப்³ப³தி³ட்டி²க³தஸ்ஸேதங் அதி⁴வசனங். அயமெத்த² ஸங்கே²போ, வித்தா²ரதோ பனேதங், ‘‘தத்த² கதமங் தி³ட்டு²பாதா³னங்? நத்தி² தி³ன்ன’’ந்தி (த⁴॰ ஸ॰ 1221) வுத்தனயேனேவ வேதி³தப்³ப³ங்.
Tathā diṭṭhi ca sā upādānañcāti diṭṭhupādānaṃ. Atha vā diṭṭhiṃ upādiyati, upādiyanti vā etena diṭṭhinti diṭṭhupādānaṃ. Upādiyati hi purimadiṭṭhiṃ uttaradiṭṭhi, upādiyanti ca tāya diṭṭhiṃ. Yathāha – ‘‘sassato attā ca loko ca idameva saccaṃ moghamañña’’ntiādi (ma. ni. 3.27). Sīlabbatupādānaattavādupādānavajjassa sabbadiṭṭhigatassetaṃ adhivacanaṃ. Ayamettha saṅkhepo, vitthārato panetaṃ, ‘‘tattha katamaṃ diṭṭhupādānaṃ? Natthi dinna’’nti (dha. sa. 1221) vuttanayeneva veditabbaṃ.
ததா² ஸீலப்³ப³தமுபாதி³யந்தி ஏதேன, ஸயங் வா தங் உபாதி³யதி, ஸீலப்³ப³தஞ்ச தங் உபாதா³னஞ்சாதி வா ஸீலப்³ப³துபாதா³னங். கோ³ஸீலகோ³வதாதீ³னி ஹி ‘‘ஏவங் ஸுத்³தீ⁴’’தி (த⁴॰ ஸ॰ 1222; விப⁴॰ 938) அபி⁴னிவேஸதோ ஸயமேவ உபாதா³னானீதி. அயமெத்த² ஸங்கே²போ, வித்தா²ரதோ பனேதங், ‘‘தத்த² கதமங் ஸீலப்³ப³துபாதா³னங்? இதோ ப³ஹித்³தா⁴ ஸமணப்³ராஹ்மணானங் ஸீலேன ஸுத்³தீ⁴’’தி வுத்தனயேனேவ வேதி³தப்³ப³ங்.
Tathā sīlabbatamupādiyanti etena, sayaṃ vā taṃ upādiyati, sīlabbatañca taṃ upādānañcāti vā sīlabbatupādānaṃ. Gosīlagovatādīni hi ‘‘evaṃ suddhī’’ti (dha. sa. 1222; vibha. 938) abhinivesato sayameva upādānānīti. Ayamettha saṅkhepo, vitthārato panetaṃ, ‘‘tattha katamaṃ sīlabbatupādānaṃ? Ito bahiddhā samaṇabrāhmaṇānaṃ sīlena suddhī’’ti vuttanayeneva veditabbaṃ.
இதா³னி வத³ந்தி ஏதேனாதி வாதோ³, உபாதி³யந்தி ஏதேனாதி உபாதா³னங், கிங் வத³ந்தி உபாதி³யந்தி வா? அத்தானங். அத்தனோ வாது³பாதா³னங் அத்தவாது³பாதா³னங். அத்தவாத³மத்தமேவ வா அத்தாதி உபாதி³யந்தி ஏதேனாதி அத்தவாது³பாதா³னங். வீஸதிவத்து²காய ஸக்காயதி³ட்டி²யா ஏதங் அதி⁴வசனங். அயமெத்த² ஸங்கே²போ, வித்தா²ரதோ பனேதங், ‘‘தத்த² கதமங் அத்தவாது³பாதா³னங்? இத⁴ அஸ்ஸுதவா புது²ஜ்ஜனோ அரியானங் அத³ஸ்ஸாவீ’’தி வுத்தனயேனேவ வேதி³தப்³ப³ங்.
Idāni vadanti etenāti vādo, upādiyanti etenāti upādānaṃ, kiṃ vadanti upādiyanti vā? Attānaṃ. Attano vādupādānaṃ attavādupādānaṃ. Attavādamattameva vā attāti upādiyanti etenāti attavādupādānaṃ. Vīsativatthukāya sakkāyadiṭṭhiyā etaṃ adhivacanaṃ. Ayamettha saṅkhepo, vitthārato panetaṃ, ‘‘tattha katamaṃ attavādupādānaṃ? Idha assutavā puthujjano ariyānaṃ adassāvī’’ti vuttanayeneva veditabbaṃ.
தண்ஹானித்³தே³ஸே ரூபதண்ஹா…பே॰… த⁴ம்மதண்ஹாதி ஏதங் சக்கு²த்³வாராதீ³ஸு ஜவனவீதி²யா பவத்தாய தண்ஹாய ‘‘ஸெட்டி²புத்தோ ப்³ராஹ்மணபுத்தோ’’தி ஏவமாதீ³ஸு பிதிதோ நாமங் விய பிதிஸதி³ஸாரம்மணதோ நாமங். எத்த² ச ரூபாரம்மணா தண்ஹா, ரூபே தண்ஹாதி ரூபதண்ஹா. ஸா காமராக³பா⁴வேன ரூபங் அஸ்ஸாதெ³ந்தீ பவத்தமானா காமதண்ஹா, ஸஸ்ஸததி³ட்டி²ஸஹக³தராக³பா⁴வேன ‘‘ரூபங் நிச்சங் து⁴வங் ஸஸ்ஸத’’ந்தி ஏவங் அஸ்ஸாதெ³ந்தீ பவத்தமானா ப⁴வதண்ஹா, உச்சே²த³தி³ட்டி²ஸஹக³தராக³பா⁴வேன ‘‘ரூபங் உச்சி²ஜ்ஜதி வினஸ்ஸதி பேச்ச ந ப⁴வதீ’’தி ஏவங் அஸ்ஸாதெ³ந்தீ பவத்தமானா விப⁴வதண்ஹாதி ரூபதண்ஹா ஏவங் திவிதா⁴ ஹோதி. யதா² ச ரூபதண்ஹா, ததா² ஸத்³த³தண்ஹாத³யோபீதி ஏவங் தானி அட்டா²ரஸ தண்ஹாவிசரிதானி ஹொந்தி. தானி அஜ்ஜ²த்தரூபாதீ³ஸு அட்டா²ரஸ, ப³ஹித்³தா⁴ரூபாதீ³ஸு அட்டா²ரஸாதி ச²த்திங்ஸ. இதி அதீதானி ச²த்திங்ஸ, அனாக³தானி ச²த்திங்ஸ, பச்சுப்பன்னானி ச²த்திங்ஸாதி ஏவங் அட்ட²ஸதங் தண்ஹாவிசரிதானி ஹொந்தி. ‘‘அஜ்ஜ²த்திகஸ்ஸ உபாதா³ய அஸ்மீதி ஹோதி, இத்த²ஸ்மீதி ஹோதீ’’தி (விப⁴॰ 973) வா ஏவமாதீ³னி அஜ்ஜ²த்திகரூபாதி³னிஸ்ஸிதானி அட்டா²ரஸ, ‘‘பா³ஹிரஸ்ஸ உபாதா³ய இமினா அஸ்மீதி ஹோதி, இமினா இத்த²ஸ்மீதி ஹோதீ’’தி (விப⁴॰ 975) வா ஏவமாதீ³னி பா³ஹிரரூபாதி³னிஸ்ஸிதானி அட்டா²ரஸாதி ச²த்திங்ஸ, இதி அதீதானி ச²த்திங்ஸ, அனாக³தானி ச²த்திங்ஸ, பச்சுப்பன்னானி ச²த்திங்ஸாதி ஏவம்பி அட்ட²ஸதங் தண்ஹாவிசரிதானி ஹொந்தி. புன ஸங்க³ஹே கரியமானே ரூபாதீ³ஸு ஆரம்மணேஸு ச²ளேவ தண்ஹாகாயா திஸ்ஸோயேவ காமதண்ஹாத³யோ ஹொந்தீதி. ஏவங் –
Taṇhāniddese rūpataṇhā…pe… dhammataṇhāti etaṃ cakkhudvārādīsu javanavīthiyā pavattāya taṇhāya ‘‘seṭṭhiputto brāhmaṇaputto’’ti evamādīsu pitito nāmaṃ viya pitisadisārammaṇato nāmaṃ. Ettha ca rūpārammaṇā taṇhā, rūpe taṇhāti rūpataṇhā. Sā kāmarāgabhāvena rūpaṃ assādentī pavattamānā kāmataṇhā, sassatadiṭṭhisahagatarāgabhāvena ‘‘rūpaṃ niccaṃ dhuvaṃ sassata’’nti evaṃ assādentī pavattamānā bhavataṇhā, ucchedadiṭṭhisahagatarāgabhāvena ‘‘rūpaṃ ucchijjati vinassati pecca na bhavatī’’ti evaṃ assādentī pavattamānā vibhavataṇhāti rūpataṇhā evaṃ tividhā hoti. Yathā ca rūpataṇhā, tathā saddataṇhādayopīti evaṃ tāni aṭṭhārasa taṇhāvicaritāni honti. Tāni ajjhattarūpādīsu aṭṭhārasa, bahiddhārūpādīsu aṭṭhārasāti chattiṃsa. Iti atītāni chattiṃsa, anāgatāni chattiṃsa, paccuppannāni chattiṃsāti evaṃ aṭṭhasataṃ taṇhāvicaritāni honti. ‘‘Ajjhattikassa upādāya asmīti hoti, itthasmīti hotī’’ti (vibha. 973) vā evamādīni ajjhattikarūpādinissitāni aṭṭhārasa, ‘‘bāhirassa upādāya iminā asmīti hoti, iminā itthasmīti hotī’’ti (vibha. 975) vā evamādīni bāhirarūpādinissitāni aṭṭhārasāti chattiṃsa, iti atītāni chattiṃsa, anāgatāni chattiṃsa, paccuppannāni chattiṃsāti evampi aṭṭhasataṃ taṇhāvicaritāni honti. Puna saṅgahe kariyamāne rūpādīsu ārammaṇesu chaḷeva taṇhākāyā tissoyeva kāmataṇhādayo hontīti. Evaṃ –
‘‘நித்³தே³ஸத்தே²ன நித்³தே³ஸ, வித்தா²ரா வித்தா²ரஸ்ஸ ச;
‘‘Niddesatthena niddesa, vitthārā vitthārassa ca;
புன ஸங்க³ஹதோ தண்ஹா, விஞ்ஞாதப்³பா³ விபா⁴வினா’’தி.
Puna saṅgahato taṇhā, viññātabbā vibhāvinā’’ti.
வேத³னானித்³தே³ஸே வேத³னாகாயாதி வேத³னாஸமூஹா. சக்கு²ஸம்ப²ஸ்ஸஜா வேத³னா…பே॰… மனோஸம்ப²ஸ்ஸஜாவேத³னாதி ஏதங் ‘‘சக்கு²ஸம்ப²ஸ்ஸஜாவேத³னா அத்தி² குஸலா, அத்தி² அகுஸலா, அத்தி² அப்³யாகதா’’தி ஏவங் விப⁴ங்கே³ (விப⁴॰ 34) ஆக³தத்தா சக்கு²த்³வாராதீ³ஸு பவத்தானங் குஸலாகுஸலாப்³யாகதவேத³னானங் ‘‘ஸாரிபுத்தோ மந்தாணிபுத்தோ’’தி ஏவமாதீ³ஸு மாதிதோ நாமங் விய மாதிஸதி³ஸதோ வத்து²தோ நாமங். வசனத்தோ² பனெத்த² – சக்கு²ஸம்ப²ஸ்ஸஹேது ஜாதா வேத³னா சக்கு²ஸம்ப²ஸ்ஸஜா வேத³னாதி. ஏஸேவ நயோ ஸப்³ப³த்த². அயங் தாவெத்த² ஸப்³ப³ஸங்கா³ஹிகா கதா². விபாகவஸேன பன சக்கு²த்³வாரே த்³வே சக்கு²விஞ்ஞாணானி, த்³வே மனோதா⁴துயோ, திஸ்ஸோ மனோவிஞ்ஞாணதா⁴துயோதி ஏதாஹி ஸம்பயுத்தவஸேன வேத³னா வேதி³தப்³பா³. ஏஸேவ நயோ ஸோதத்³வாராதீ³ஸு. மனொத்³வாரே மனோவிஞ்ஞாணதா⁴துஸம்பயுத்தாவ.
Vedanāniddese vedanākāyāti vedanāsamūhā. Cakkhusamphassajā vedanā…pe… manosamphassajāvedanāti etaṃ ‘‘cakkhusamphassajāvedanā atthi kusalā, atthi akusalā, atthi abyākatā’’ti evaṃ vibhaṅge (vibha. 34) āgatattā cakkhudvārādīsu pavattānaṃ kusalākusalābyākatavedanānaṃ ‘‘sāriputto mantāṇiputto’’ti evamādīsu mātito nāmaṃ viya mātisadisato vatthuto nāmaṃ. Vacanattho panettha – cakkhusamphassahetu jātā vedanā cakkhusamphassajā vedanāti. Eseva nayo sabbattha. Ayaṃ tāvettha sabbasaṅgāhikā kathā. Vipākavasena pana cakkhudvāre dve cakkhuviññāṇāni, dve manodhātuyo, tisso manoviññāṇadhātuyoti etāhi sampayuttavasena vedanā veditabbā. Eseva nayo sotadvārādīsu. Manodvāre manoviññāṇadhātusampayuttāva.
ப²ஸ்ஸனித்³தே³ஸே சக்கு²ஸம்ப²ஸ்ஸோதி சக்கு²ம்ஹி ஸம்ப²ஸ்ஸோ. ஏஸ நயோ ஸப்³ப³த்த². சக்கு²ஸம்ப²ஸ்ஸோ…பே॰… காயஸம்ப²ஸ்ஸோதி எத்தாவதா ச குஸலாகுஸலவிபாகா பஞ்சவத்து²கா த³ஸ ப²ஸ்ஸா வுத்தா ஹொந்தி. மனோஸம்ப²ஸ்ஸோதி இமினா ஸேஸபா³வீஸதிலோகியவிபாகமனஸம்பயுத்தா ப²ஸ்ஸா.
Phassaniddese cakkhusamphassoti cakkhumhi samphasso. Esa nayo sabbattha. Cakkhusamphasso…pe… kāyasamphassoti ettāvatā ca kusalākusalavipākā pañcavatthukā dasa phassā vuttā honti. Manosamphassoti iminā sesabāvīsatilokiyavipākamanasampayuttā phassā.
ஸளாயதனநித்³தே³ஸே சக்கா²யதனந்திஆதீ³ஸு யங் வத்தப்³ப³ங், தங் விஸுத்³தி⁴மக்³கே³ க²ந்த⁴னித்³தே³ஸே சேவ ஆயதனநித்³தே³ஸே ச வுத்தமேவ.
Saḷāyatananiddese cakkhāyatanantiādīsu yaṃ vattabbaṃ, taṃ visuddhimagge khandhaniddese ceva āyatananiddese ca vuttameva.
நாமரூபனித்³தே³ஸே நமனலக்க²ணங் நாமங். ருப்பனலக்க²ணங் ரூபங். விப⁴ஜனே பனஸ்ஸ வேத³னாதி வேத³னாக்க²ந்தோ⁴, ஸஞ்ஞாதி ஸஞ்ஞாக்க²ந்தோ⁴, சேதனா ப²ஸ்ஸோ மனஸிகாரோதி ஸங்கா²ரக்க²ந்தோ⁴ வேதி³தப்³போ³. காமஞ்ச அஞ்ஞேபி ஸங்கா²ரக்க²ந்த⁴ஸங்க³ஹிதா த⁴ம்மா ஸந்தி, இமே பன தயோ ஸப்³ப³து³ப்³ப³லேஸுபி சித்தேஸு ஸந்தி, தஸ்மா ஏதேஸங்யேவ வஸேனெத்த² ஸங்கா²ரக்க²ந்தோ⁴ த³ஸ்ஸிதோ. சத்தாரோ ச மஹாபூ⁴தாதி எத்த² சத்தாரோதி க³ணனபரிச்சே²தோ³. மஹாபூ⁴தாதி பத²வீஆபதேஜவாயானமேதங் அதி⁴வசனங். யேன பன காரணேன தானி மஹாபூ⁴தானீதி வுச்சந்தி, யோ செத்த² அஞ்ஞோ வினிச்ச²யனயோ, ஸோ ஸப்³போ³ விஸுத்³தி⁴மக்³கே³ ரூபக்க²ந்த⁴னித்³தே³ஸே வுத்தோ. சதுன்னஞ்ச மஹாபூ⁴தானங் உபாதா³யாதி எத்த² பன சதுன்னந்தி உபயோக³த்தே² ஸாமிவசனங், சத்தாரி மஹாபூ⁴தானீதி வுத்தங் ஹோதி. உபாதா³யாதி உபாதி³யித்வா, க³ஹெத்வாதி அத்தோ². நிஸ்ஸாயாதிபி ஏகே. ‘‘வத்தமான’’ந்தி அயஞ்செத்த² பாட²ஸேஸோ. ஸமூஹத்தே² வா ஏதங் ஸாமிவசனங், சதுன்னங் மஹாபூ⁴தானங் ஸமூஹங் உபாதா³ய வத்தமானங் ரூபந்தி எத்த² அத்தோ² வேதி³தப்³போ³. ஏவங் ஸப்³ப³தா²பி யானி ச சத்தாரி பத²வீஆதீ³னி மஹாபூ⁴தானி, யஞ்ச சதுன்னங் மஹாபூ⁴தானங் உபாதா³ய வத்தமானங் சக்கா²யதனாதி³பே⁴தே³ன அபி⁴த⁴ம்மபாளியமேவ வுத்தங் தேவீஸதிவித⁴ங் ரூபங், தங் ஸப்³ப³ம்பி ரூபந்தி வேதி³தப்³ப³ங்.
Nāmarūpaniddese namanalakkhaṇaṃ nāmaṃ. Ruppanalakkhaṇaṃ rūpaṃ. Vibhajane panassa vedanāti vedanākkhandho, saññāti saññākkhandho, cetanā phasso manasikāroti saṅkhārakkhandho veditabbo. Kāmañca aññepi saṅkhārakkhandhasaṅgahitā dhammā santi, ime pana tayo sabbadubbalesupi cittesu santi, tasmā etesaṃyeva vasenettha saṅkhārakkhandho dassito. Cattāro ca mahābhūtāti ettha cattāroti gaṇanaparicchedo. Mahābhūtāti pathavīāpatejavāyānametaṃ adhivacanaṃ. Yena pana kāraṇena tāni mahābhūtānīti vuccanti, yo cettha añño vinicchayanayo, so sabbo visuddhimagge rūpakkhandhaniddese vutto. Catunnañca mahābhūtānaṃ upādāyāti ettha pana catunnanti upayogatthe sāmivacanaṃ, cattāri mahābhūtānīti vuttaṃ hoti. Upādāyāti upādiyitvā, gahetvāti attho. Nissāyātipi eke. ‘‘Vattamāna’’nti ayañcettha pāṭhaseso. Samūhatthe vā etaṃ sāmivacanaṃ, catunnaṃ mahābhūtānaṃ samūhaṃ upādāya vattamānaṃ rūpanti ettha attho veditabbo. Evaṃ sabbathāpi yāni ca cattāri pathavīādīni mahābhūtāni, yañca catunnaṃ mahābhūtānaṃ upādāya vattamānaṃ cakkhāyatanādibhedena abhidhammapāḷiyameva vuttaṃ tevīsatividhaṃ rūpaṃ, taṃ sabbampi rūpanti veditabbaṃ.
விஞ்ஞாணனித்³தே³ஸே சக்கு²விஞ்ஞாணந்தி சக்கு²ம்ஹி விஞ்ஞாணங், சக்கு²தோ வா ஜாதங் விஞ்ஞாணந்தி சக்கு²விஞ்ஞாணங். ஏவங் ஸோதகா⁴னஜிவ்ஹாகாயவிஞ்ஞாணானி. இதரங் பன மனோயேவ விஞ்ஞாணந்தி மனோவிஞ்ஞாணங். த்³விபஞ்சவிஞ்ஞாணவஜ்ஜிததேபூ⁴மகவிபாகசித்தஸ்ஸேதங் அதி⁴வசனங்.
Viññāṇaniddese cakkhuviññāṇanti cakkhumhi viññāṇaṃ, cakkhuto vā jātaṃ viññāṇanti cakkhuviññāṇaṃ. Evaṃ sotaghānajivhākāyaviññāṇāni. Itaraṃ pana manoyeva viññāṇanti manoviññāṇaṃ. Dvipañcaviññāṇavajjitatebhūmakavipākacittassetaṃ adhivacanaṃ.
ஸங்கா²ரனித்³தே³ஸே அபி⁴ஸங்க²ரணலக்க²ணோ ஸங்கா²ரோ. விப⁴ஜனே பனஸ்ஸ காயஸங்கா²ரோதி காயதோ பவத்தஸங்கா²ரோ. காயத்³வாரே சோபனவஸேன பவத்தானங் காமாவசரகுஸலதோ அட்ட²ன்னங், அகுஸலதோ த்³வாத³ஸன்னந்தி வீஸதியா காயஸஞ்சேதனானமேதங் அதி⁴வசனங். வசீஸங்கா²ரோதி வசனதோ பவத்தஸங்கா²ரோ, வசீத்³வாரே வசனபே⁴த³வஸேன பவத்தானங் வீஸதியா ஏவ வசீஸஞ்சேதனானமேதங் அதி⁴வசனங். சித்தஸங்கா²ரோதி சித்ததோ பவத்தஸங்கா²ரோ, காயவசீத்³வாரே சோபனங் அகத்வா ரஹோ நிஸீதி³த்வா சிந்தெந்தஸ்ஸ பவத்தானங் லோகியகுஸலாகுஸலவஸேன ஏகூனதிங்ஸமனோஸஞ்சேதனானமேதங் அதி⁴வசனங்.
Saṅkhāraniddese abhisaṅkharaṇalakkhaṇo saṅkhāro. Vibhajane panassa kāyasaṅkhāroti kāyato pavattasaṅkhāro. Kāyadvāre copanavasena pavattānaṃ kāmāvacarakusalato aṭṭhannaṃ, akusalato dvādasannanti vīsatiyā kāyasañcetanānametaṃ adhivacanaṃ. Vacīsaṅkhāroti vacanato pavattasaṅkhāro, vacīdvāre vacanabhedavasena pavattānaṃ vīsatiyā eva vacīsañcetanānametaṃ adhivacanaṃ. Cittasaṅkhāroti cittato pavattasaṅkhāro, kāyavacīdvāre copanaṃ akatvā raho nisīditvā cintentassa pavattānaṃ lokiyakusalākusalavasena ekūnatiṃsamanosañcetanānametaṃ adhivacanaṃ.
அவிஜ்ஜானித்³தே³ஸே து³க்கே² அஞ்ஞாணந்தி து³க்க²ஸச்சே அஞ்ஞாணங், மோஹஸ்ஸேதங் அதி⁴வசனங். ஏஸ நயோ து³க்க²ஸமுத³யே அஞ்ஞாணந்திஆதீ³ஸு. தத்த² சதூஹி காரணேஹி து³க்கே² அஞ்ஞாணங் வேதி³தப்³ப³ங் அந்தோக³த⁴தோ வத்து²தோ ஆரம்மணதோ படிச்சா²த³னதோ ச. ததா² ஹி தங் து³க்க²ஸச்சபரியாபன்னத்தா து³க்கே² அந்தோக³த⁴ங், து³க்க²ஸச்சஞ்சஸ்ஸ நிஸ்ஸயபச்சயபா⁴வேன வத்து², ஆரம்மணபச்சயபா⁴வேன ஆரம்மணங், து³க்க²ஸச்சங் ஏதங் படிச்சா²தே³தி தஸ்ஸ யாதா²வலக்க²ணபடிவேத⁴னிவாரணேன ஞாணப்பவத்தியா செத்த² அப்பதா³னேன.
Avijjāniddese dukkhe aññāṇanti dukkhasacce aññāṇaṃ, mohassetaṃ adhivacanaṃ. Esa nayo dukkhasamudaye aññāṇantiādīsu. Tattha catūhi kāraṇehi dukkhe aññāṇaṃ veditabbaṃ antogadhato vatthuto ārammaṇato paṭicchādanato ca. Tathā hi taṃ dukkhasaccapariyāpannattā dukkhe antogadhaṃ, dukkhasaccañcassa nissayapaccayabhāvena vatthu, ārammaṇapaccayabhāvena ārammaṇaṃ, dukkhasaccaṃ etaṃ paṭicchādeti tassa yāthāvalakkhaṇapaṭivedhanivāraṇena ñāṇappavattiyā cettha appadānena.
து³க்க²ஸமுத³யே அஞ்ஞாணங் தீஹி காரணேஹி வேதி³தப்³ப³ங் வத்து²தோ ஆரம்மணதோ படிச்சா²த³னதோ ச. நிரோதே⁴ படிபதா³ய ச அஞ்ஞாணங் ஏகேனேவ காரணேன வேதி³தப்³ப³ங் படிச்சா²த³னதோ. நிரோத⁴படிபதா³னஞ்ஹி படிச்சா²த³கமேவ அஞ்ஞாணங் தேஸங் யாதா²வலக்க²ணபடிவேத⁴னிவாரணேன தேஸு ச ஞாணப்பவத்தியா அப்பதா³னேன. ந பன தங் தத்த² அந்தோக³த⁴ங் தஸ்மிங் ஸச்சத்³வயே அபரியாபன்னத்தா, ந தஸ்ஸ தங் ஸச்சத்³வயங் வத்து² அஸஹஜாதத்தா, நாரம்மணங், ததா³ரப்³ப⁴ அப்பவத்தனதோ. பச்சி²மஞ்ஹி ஸச்சத்³வயங் க³ம்பீ⁴ரத்தா து³த்³த³ஸங், ந தத்த² அந்த⁴பூ⁴தங் அஞ்ஞாணங் பவத்ததி. புரிமங் பன வசனீயத்தேன ஸபா⁴வலக்க²ணஸ்ஸ து³த்³த³ஸத்தா க³ம்பீ⁴ரங், தத்த² விபல்லாஸகா³ஹவஸேன பவத்ததி.
Dukkhasamudaye aññāṇaṃ tīhi kāraṇehi veditabbaṃ vatthuto ārammaṇato paṭicchādanato ca. Nirodhe paṭipadāya ca aññāṇaṃ ekeneva kāraṇena veditabbaṃ paṭicchādanato. Nirodhapaṭipadānañhi paṭicchādakameva aññāṇaṃ tesaṃ yāthāvalakkhaṇapaṭivedhanivāraṇena tesu ca ñāṇappavattiyā appadānena. Na pana taṃ tattha antogadhaṃ tasmiṃ saccadvaye apariyāpannattā, na tassa taṃ saccadvayaṃ vatthu asahajātattā, nārammaṇaṃ, tadārabbha appavattanato. Pacchimañhi saccadvayaṃ gambhīrattā duddasaṃ, na tattha andhabhūtaṃ aññāṇaṃ pavattati. Purimaṃ pana vacanīyattena sabhāvalakkhaṇassa duddasattā gambhīraṃ, tattha vipallāsagāhavasena pavattati.
அபிச ‘‘து³க்கே²’’தி எத்தாவதா ஸங்க³ஹதோ வத்து²தோ ஆரம்மணதோ கிச்சதோ ச அவிஜ்ஜா தீ³பிதா. ‘‘து³க்க²ஸமுத³யே’’தி எத்தாவதா வத்து²தோ ஆரம்மணதோ கிச்சதோ ச. ‘‘து³க்க²னிரோதே⁴ து³க்க²னிரோத⁴கா³மினியா படிபதா³யா’’தி எத்தாவதா கிச்சதோ. அவிஸேஸதோ பன ‘‘அஞ்ஞாண’’ந்தி ஏதேன ஸபா⁴வதோ நித்³தி³ட்டா²தி ஞாதப்³பா³.
Apica ‘‘dukkhe’’ti ettāvatā saṅgahato vatthuto ārammaṇato kiccato ca avijjā dīpitā. ‘‘Dukkhasamudaye’’ti ettāvatā vatthuto ārammaṇato kiccato ca. ‘‘Dukkhanirodhe dukkhanirodhagāminiyā paṭipadāyā’’ti ettāvatā kiccato. Avisesato pana ‘‘aññāṇa’’nti etena sabhāvato niddiṭṭhāti ñātabbā.
இதி கோ², பி⁴க்க²வேதி ஏவங் கோ², பி⁴க்க²வே. நிரோதோ⁴ ஹோதீதி அனுப்பாதோ³ ஹோதி. அபிசெத்த² ஸப்³பே³ஹேவ தேஹி நிரோத⁴பதே³ஹி நிப்³பா³னங் தே³ஸிதங். நிப்³பா³னஞ்ஹி ஆக³ம்ம தே தே த⁴ம்மா நிருஜ்ஜ²ந்தி, தஸ்மா தங் தேஸங் தேஸங் நிரோதோ⁴தி வுச்சதி. இதி ப⁴க³வா இமஸ்மிங் ஸுத்தே த்³வாத³ஸஹி பதே³ஹி வட்டவிவட்டங் தே³ஸெந்தோ அரஹத்தனிகூடேனேவ தே³ஸனங் நிட்ட²பேஸி. தே³ஸனாபரியோஸானே வுத்தனயேனேவ பஞ்சஸதா பி⁴க்கூ² அரஹத்தே பதிட்ட²ஹிங்ஸூதி.
Iti kho, bhikkhaveti evaṃ kho, bhikkhave. Nirodho hotīti anuppādo hoti. Apicettha sabbeheva tehi nirodhapadehi nibbānaṃ desitaṃ. Nibbānañhi āgamma te te dhammā nirujjhanti, tasmā taṃ tesaṃ tesaṃ nirodhoti vuccati. Iti bhagavā imasmiṃ sutte dvādasahi padehi vaṭṭavivaṭṭaṃ desento arahattanikūṭeneva desanaṃ niṭṭhapesi. Desanāpariyosāne vuttanayeneva pañcasatā bhikkhū arahatte patiṭṭhahiṃsūti.
விப⁴ங்க³ஸுத்தங் து³தியங்.
Vibhaṅgasuttaṃ dutiyaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. விப⁴ங்க³ஸுத்தங் • 2. Vibhaṅgasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. விப⁴ங்க³ஸுத்தவண்ணனா • 2. Vibhaṅgasuttavaṇṇanā
