| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
8. விப⁴ங்க³ஸுத்தவண்ணனா
8. Vibhaṅgasuttavaṇṇanā
8. அட்ட²மே கதமா ச பி⁴க்க²வே ஸம்மாதி³ட்டீ²தி ஏகேன பரியாயேன அட்ட²ங்கி³கமக்³க³ங் விப⁴ஜித்வா புன அபரேன பரியாயேன விப⁴ஜிதுகாமோ இத³ங் தே³ஸனங் ஆரபி⁴. தத்த² து³க்கே² ஞாணந்தி ஸவனஸம்மஸனபடிவேத⁴பச்சவெக்க²ணவஸேன சதூஹாகாரேஹி உப்பன்னங் ஞாணங். ஸமுத³யேபி ஏஸேவ நயோ. ஸேஸேஸு பன த்³வீஸு ஸம்மஸனஸ்ஸ அபா⁴வா திவித⁴மேவ வட்டதி. ஏவமேதங் ‘‘து³க்கே² ஞாண’’ந்திஆதி³னா சதுஸச்சகம்மட்டா²னங் த³ஸ்ஸிதங்.
8. Aṭṭhame katamā ca bhikkhave sammādiṭṭhīti ekena pariyāyena aṭṭhaṅgikamaggaṃ vibhajitvā puna aparena pariyāyena vibhajitukāmo idaṃ desanaṃ ārabhi. Tattha dukkhe ñāṇanti savanasammasanapaṭivedhapaccavekkhaṇavasena catūhākārehi uppannaṃ ñāṇaṃ. Samudayepi eseva nayo. Sesesu pana dvīsu sammasanassa abhāvā tividhameva vaṭṭati. Evametaṃ ‘‘dukkhe ñāṇa’’ntiādinā catusaccakammaṭṭhānaṃ dassitaṃ.
தத்த² புரிமானி த்³வே ஸச்சானி வட்டங், பச்சி²மானி விவட்டங். தேஸு பி⁴க்கு²னோ வட்டே கம்மட்டா²னாபி⁴னிவேஸோ ஹோதி, விவட்டே நத்தி² அபி⁴னிவேஸோ. புரிமானி ஹி த்³வே ஸச்சானி ‘‘பஞ்சக்க²ந்தா⁴ து³க்க²ங், தண்ஹா ஸமுத³யோ’’தி ஏவங் ஸங்கே²பேன ச, ‘‘கதமே பஞ்சக்க²ந்தா⁴ ரூபக்க²ந்தோ⁴’’திஆதி³னா நயேன வித்தா²ரேன ச ஆசரியஸந்திகே உக்³க³ண்ஹித்வா வாசாய புனப்புனங் பரிவத்தெந்தோ யோகா³வசரோ கம்மங் கரோதி. இதரேஸு பன த்³வீஸு ஸச்சேஸு – ‘‘நிரோத⁴ஸச்சங் இட்ட²ங் கந்தங் மனாபங், மக்³க³ஸச்சங் இட்ட²ங் கந்தங் மனாப’’ந்தி ஏவங் ஸவனேனேவ கம்மங் கரோதி. ஸோ ஏவங் கரொந்தோ சத்தாரி ஸச்சானி ஏகபடிவேதே⁴ன படிவிஜ்ஜ²தி, ஏகாபி⁴ஸமயேன அபி⁴ஸமேதி . து³க்க²ங் பரிஞ்ஞாபடிவேதே⁴ன படிவிஜ்ஜ²தி, ஸமுத³யங் பஹானபடிவேதே⁴ன, நிரோத⁴ங் ஸச்சி²கிரியபடிவேதே⁴ன, மக்³க³ங் பா⁴வனாபடிவேதே⁴ன படிவிஜ்ஜ²தி. து³க்க²ங் பரிஞ்ஞாபி⁴ஸமயேன…பே॰… மக்³க³ங் பா⁴வனாபி⁴ஸமயேன அபி⁴ஸமேதி.
Tattha purimāni dve saccāni vaṭṭaṃ, pacchimāni vivaṭṭaṃ. Tesu bhikkhuno vaṭṭe kammaṭṭhānābhiniveso hoti, vivaṭṭe natthi abhiniveso. Purimāni hi dve saccāni ‘‘pañcakkhandhā dukkhaṃ, taṇhā samudayo’’ti evaṃ saṅkhepena ca, ‘‘katame pañcakkhandhā rūpakkhandho’’tiādinā nayena vitthārena ca ācariyasantike uggaṇhitvā vācāya punappunaṃ parivattento yogāvacaro kammaṃ karoti. Itaresu pana dvīsu saccesu – ‘‘nirodhasaccaṃ iṭṭhaṃ kantaṃ manāpaṃ, maggasaccaṃ iṭṭhaṃ kantaṃ manāpa’’nti evaṃ savaneneva kammaṃ karoti. So evaṃ karonto cattāri saccāni ekapaṭivedhena paṭivijjhati, ekābhisamayena abhisameti . Dukkhaṃ pariññāpaṭivedhena paṭivijjhati, samudayaṃ pahānapaṭivedhena, nirodhaṃ sacchikiriyapaṭivedhena, maggaṃ bhāvanāpaṭivedhena paṭivijjhati. Dukkhaṃ pariññābhisamayena…pe… maggaṃ bhāvanābhisamayena abhisameti.
ஏவமஸ்ஸ புப்³ப³பா⁴கே³ த்³வீஸு ஸச்சேஸு உக்³க³ஹபரிபுச்சா²ஸவனதா⁴ரணஸம்மஸனபடிவேதோ⁴ ஹோதி, த்³வீஸு ஸவனபடிவேதோ⁴யேவ. அபரபா⁴கே³ தீஸு கிச்சதோ படிவேதோ⁴ ஹோதி, நிரோதே⁴ ஆரம்மணபடிவேதோ⁴. பச்சவெக்க²ணா பன பத்தஸச்சஸ்ஸ ஹோதி. இமஸ்ஸ பி⁴க்கு²னோ புப்³பே³ பரிக்³க³ஹதோ – ‘‘து³க்க²ங் பரிஜானாமி, ஸமுத³யங் பஜஹாமி, நிரோத⁴ங் ஸச்சி²கரோமி, மக்³க³ங் பா⁴வேமீ’’தி ஆபோ⁴க³ஸமன்னாஹாரமனஸிகாரபச்சவெக்க²ணா நத்தி², பரிக்³க³ஹதோ பட்டா²ய ஹோதி. அபரபா⁴கே³ பன து³க்க²ங் பரிஞ்ஞாதமேவ ஹோதி…பே॰… மக்³கோ³ பா⁴விதோவ ஹோதி.
Evamassa pubbabhāge dvīsu saccesu uggahaparipucchāsavanadhāraṇasammasanapaṭivedho hoti, dvīsu savanapaṭivedhoyeva. Aparabhāge tīsu kiccato paṭivedho hoti, nirodhe ārammaṇapaṭivedho. Paccavekkhaṇā pana pattasaccassa hoti. Imassa bhikkhuno pubbe pariggahato – ‘‘dukkhaṃ parijānāmi, samudayaṃ pajahāmi, nirodhaṃ sacchikaromi, maggaṃ bhāvemī’’ti ābhogasamannāhāramanasikārapaccavekkhaṇā natthi, pariggahato paṭṭhāya hoti. Aparabhāge pana dukkhaṃ pariññātameva hoti…pe… maggo bhāvitova hoti.
தத்த² த்³வே ஸச்சானி து³த்³த³ஸத்தா க³ம்பீ⁴ரானி, த்³வே க³ம்பீ⁴ரத்தா து³த்³த³ஸானி. து³க்க²ஸச்சஞ்ஹி உப்பத்திதோ பாகடங், கா²ணுகண்டகபஹாராதீ³ஸு ‘‘அஹோ து³க்க²’’ந்தி வத்தப்³ப³தம்பி ஆபஜ்ஜதி. ஸமுத³யம்பி கா²தி³துகாமதாபு⁴ஞ்ஜிதுகாமதாதி³வஸேன உப்பத்திதோ பாகடங். லக்க²ணபடிவேத⁴தோ பன உப⁴யம்பி க³ம்பீ⁴ரங். இதி தானி து³த்³த³ஸத்தா க³ம்பீ⁴ரானி. இதரேஸங் த்³வின்னங் த³ஸ்ஸனத்தா²ய பயோகோ³ ப⁴வக்³க³க்³க³ஹணத்த²ங் ஹத்த²பஸாரணங் விய அவீசிபு²ஸனத்த²ங் பாத³பஸாரணங் விய ஸததா⁴ பி⁴ன்னஸ்ஸ வாலஸ்ஸ கோடியா கோடிங் படிபாத³னங் விய ச ஹோதி. இதி தானி க³ம்பீ⁴ரத்தா து³த்³த³ஸானி. ஏவங் து³த்³த³ஸத்தா க³ம்பீ⁴ரேஸு க³ம்பீ⁴ரத்தா ச து³த்³த³ஸேஸு சதூஸு ஸச்சேஸு உக்³க³ஹாதி³வஸேன இத³ங் ‘‘து³க்கே² ஞாண’’ந்திஆதி³ வுத்தங். படிவேத⁴க்க²ணே பன ஏகமேவ தங் ஞாணங் ஹோதி.
Tattha dve saccāni duddasattā gambhīrāni, dve gambhīrattā duddasāni. Dukkhasaccañhi uppattito pākaṭaṃ, khāṇukaṇṭakapahārādīsu ‘‘aho dukkha’’nti vattabbatampi āpajjati. Samudayampi khāditukāmatābhuñjitukāmatādivasena uppattito pākaṭaṃ. Lakkhaṇapaṭivedhato pana ubhayampi gambhīraṃ. Iti tāni duddasattā gambhīrāni. Itaresaṃ dvinnaṃ dassanatthāya payogo bhavaggaggahaṇatthaṃ hatthapasāraṇaṃ viya avīciphusanatthaṃ pādapasāraṇaṃ viya satadhā bhinnassa vālassa koṭiyā koṭiṃ paṭipādanaṃ viya ca hoti. Iti tāni gambhīrattā duddasāni. Evaṃ duddasattā gambhīresu gambhīrattā ca duddasesu catūsu saccesu uggahādivasena idaṃ ‘‘dukkhe ñāṇa’’ntiādi vuttaṃ. Paṭivedhakkhaṇe pana ekameva taṃ ñāṇaṃ hoti.
நெக்க²ம்மஸங்கப்பாதீ³ஸு காமபச்சனீகட்டே²ன காமதோ நிஸ்ஸடபா⁴வேன வா, காமங் ஸம்மஸந்தஸ்ஸ உப்பன்னோதி வா, காமபத³கா⁴தங் காமவூபஸமங் கரொந்தோ உப்பன்னோதி வா , காமவிவித்தந்தே உப்பன்னோதி வா நெக்க²ம்மஸங்கப்போ. ஸேஸபத³த்³வயேபி ஏஸேவ நயோ. ஸப்³பே³பி ச தே நெக்க²ம்மஸங்கப்பாத³யோ காமப்³யாபாத³விஹிங்ஸாவிரமணஸஞ்ஞானங் நானத்தா புப்³ப³பா⁴கே³ நானா, மக்³க³க்க²ணே பன இமேஸு தீஸு டா²னேஸு உப்பன்னஸ்ஸ அகுஸலஸங்கப்பஸ்ஸ பத³ச்சே²த³தோ அனுப்பத்திஸாத⁴னவஸேன மக்³க³ங்க³ங் பூரயமானோ ஏகோவ குஸலஸங்கப்போ உப்பஜ்ஜதி. அயங் ஸம்மாஸங்கப்போ நாம.
Nekkhammasaṅkappādīsu kāmapaccanīkaṭṭhena kāmato nissaṭabhāvena vā, kāmaṃ sammasantassa uppannoti vā, kāmapadaghātaṃ kāmavūpasamaṃ karonto uppannoti vā , kāmavivittante uppannoti vā nekkhammasaṅkappo. Sesapadadvayepi eseva nayo. Sabbepi ca te nekkhammasaṅkappādayo kāmabyāpādavihiṃsāviramaṇasaññānaṃ nānattā pubbabhāge nānā, maggakkhaṇe pana imesu tīsu ṭhānesu uppannassa akusalasaṅkappassa padacchedato anuppattisādhanavasena maggaṅgaṃ pūrayamāno ekova kusalasaṅkappo uppajjati. Ayaṃ sammāsaṅkappo nāma.
முஸாவாதா³ வேரமணீஆத³யோபி முஸாவாதா³தீ³ஹி விரமணஸஞ்ஞானங் நானத்தா புப்³ப³பா⁴கே³ நானா, மக்³க³க்க²ணே பன இமேஸு சதூஸு டா²னேஸு உப்பன்னாய அகுஸலது³ஸ்ஸீல்யசேதனாய பத³ச்சே²த³தோ அனுப்பத்திஸாத⁴னவஸேன மக்³க³ங்க³ங் பூரயமானா ஏகாவ குஸலவேரமணீ உப்பஜ்ஜதி. அயங் ஸம்மாவாசா நாம.
Musāvādā veramaṇīādayopi musāvādādīhi viramaṇasaññānaṃ nānattā pubbabhāge nānā, maggakkhaṇe pana imesu catūsu ṭhānesu uppannāya akusaladussīlyacetanāya padacchedato anuppattisādhanavasena maggaṅgaṃ pūrayamānā ekāva kusalaveramaṇī uppajjati. Ayaṃ sammāvācā nāma.
பாணாதிபாதா வேரமணீ ஆத³யோபி பாணாதிபாதாதீ³ஹி விரமணஸஞ்ஞானங் நானத்தா புப்³ப³பா⁴கே³ நானா, மக்³க³க்க²ணே பன இமேஸு தீஸு டா²னேஸு உப்பன்னாய அகுஸலது³ஸ்ஸீல்யசேதனாய அகிரியதோ பத³ச்சே²த³தோ அனுப்பத்திஸாத⁴னவஸேன மக்³க³ங்க³ங் பூரயமானா ஏகாவ குஸலவேரமணீ உப்பஜ்ஜதி. அயங் ஸம்மாகம்மந்தோ நாம.
Pāṇātipātā veramaṇī ādayopi pāṇātipātādīhi viramaṇasaññānaṃ nānattā pubbabhāge nānā, maggakkhaṇe pana imesu tīsu ṭhānesu uppannāya akusaladussīlyacetanāya akiriyato padacchedato anuppattisādhanavasena maggaṅgaṃ pūrayamānā ekāva kusalaveramaṇī uppajjati. Ayaṃ sammākammanto nāma.
மிச்சா²ஆஜீவந்தி கா²த³னீயபோ⁴ஜனீயாதீ³னங் அத்தா²ய பவத்திதங் காயவசீது³ச்சரிதங். பஹாயாதி வஜ்ஜெத்வா. ஸம்மாஆஜீவேனாதி பு³த்³த⁴பஸத்தே²ன ஆஜீவேன. ஜீவிகங் கப்பேதீதி ஜீவிதவுத்திங் பவத்தேதி. ஸம்மாஜீவோபி குஹனாதீ³ஹி விரமணஸஞ்ஞானங் நானத்தா புப்³ப³பா⁴கே³ நானா. மக்³க³க்க²ணே பன இமேஸுயேவ ஸத்தஸு டா²னேஸு உப்பன்னாய மிச்சா²ஜீவது³ஸ்ஸீல்யசேதனாய பத³ச்சே²த³தோ அனுப்பத்திஸாத⁴னவஸேன மக்³க³ங்க³ங் பூரயமானா ஏகாவ குஸலவேரமணீ உப்பஜ்ஜதி. அயங் ஸம்மாஆஜீவோ நாம.
Micchāājīvanti khādanīyabhojanīyādīnaṃ atthāya pavattitaṃ kāyavacīduccaritaṃ. Pahāyāti vajjetvā. Sammāājīvenāti buddhapasatthena ājīvena. Jīvikaṃ kappetīti jīvitavuttiṃ pavatteti. Sammājīvopi kuhanādīhi viramaṇasaññānaṃ nānattā pubbabhāge nānā. Maggakkhaṇe pana imesuyeva sattasu ṭhānesu uppannāya micchājīvadussīlyacetanāya padacchedato anuppattisādhanavasena maggaṅgaṃ pūrayamānā ekāva kusalaveramaṇī uppajjati. Ayaṃ sammāājīvo nāma.
அனுப்பன்னானந்தி ஏகஸ்மிங் ப⁴வே ததா²ரூபே வா ஆரம்மணே அத்தனோ ந உப்பன்னானங், பரஸ்ஸ பன உப்பஜ்ஜமானே தி³ஸ்வா – ‘‘அஹோ வத மே ஏவரூபா பாபகா த⁴ம்மா ந உப்பஜ்ஜெய்யு’’ந்தி ஏவங் அனுப்பன்னானங் பாபகானங் அகுஸலானங் த⁴ம்மானங் அனுப்பாதா³ய. ச²ந்த³ந்தி தேஸங் அகுஸலானங் அனுப்பாத³கபடிபத்திஸாத⁴கங் வீரியச்ச²ந்த³ங் ஜனேதி. வாயமதீதி வாயாமங் கரோதி. வீரியங் ஆரப⁴தீதி வீரியங் பவத்தேதி. சித்தங் பக்³க³ண்ஹாதீதி வீரியேன சித்தங் பக்³க³ஹிதங் கரோதி. பத³ஹதீதி ‘‘காமங் தசோ ச ந்ஹாரு ச அட்டி² ச அவஸிஸ்ஸதூ’’தி (ம॰ நி॰ 2.184) பதா⁴னங் பவத்தேதி . உப்பன்னானந்தி ஸமுதா³சாரவஸேன அத்தனோ உப்பன்னபுப்³பா³னங். இதா³னி தாதி³ஸே ந உப்பாதெ³ஸ்ஸாமீதி தேஸங் பஹானாய ச²ந்த³ங் ஜனேதி.
Anuppannānanti ekasmiṃ bhave tathārūpe vā ārammaṇe attano na uppannānaṃ, parassa pana uppajjamāne disvā – ‘‘aho vata me evarūpā pāpakā dhammā na uppajjeyyu’’nti evaṃ anuppannānaṃ pāpakānaṃ akusalānaṃ dhammānaṃ anuppādāya. Chandanti tesaṃ akusalānaṃ anuppādakapaṭipattisādhakaṃ vīriyacchandaṃ janeti. Vāyamatīti vāyāmaṃ karoti. Vīriyaṃ ārabhatīti vīriyaṃ pavatteti. Cittaṃ paggaṇhātīti vīriyena cittaṃ paggahitaṃ karoti. Padahatīti ‘‘kāmaṃ taco ca nhāru ca aṭṭhi ca avasissatū’’ti (ma. ni. 2.184) padhānaṃ pavatteti . Uppannānanti samudācāravasena attano uppannapubbānaṃ. Idāni tādise na uppādessāmīti tesaṃ pahānāya chandaṃ janeti.
அனுப்பன்னானங் குஸலானந்தி அபடிலத்³தா⁴னங் பட²மஜ்ஜா²னாதீ³னங். உப்பன்னானந்தி தேஸங்யேவ படிலத்³தா⁴னங். டி²தியாதி புனப்புனங் உப்பத்திபப³ந்த⁴வஸேன டி²தத்த²ங். அஸம்மோஸாயாதி அவினாஸத்த²ங். பி⁴ய்யோபா⁴வாயாதி உபரிபா⁴வாய. வேபுல்லாயாதி விபுலபா⁴வாய. பாரிபூரியாதி பா⁴வனாய பரிபூரணத்த²ங். அயம்பி ஸம்மாவாயாமோ அனுப்பன்னானங் அகுஸலானங் அனுப்பாத³னாதி³சித்தனானத்தா புப்³ப³பா⁴கே³ நானா. மக்³க³க்க²ணே பன இமேஸுயேவ சதூஸு டா²னேஸு கிச்சஸாத⁴னவஸேன மக்³க³ங்க³ங் பூரயமானங் ஏகமேவ குஸலவீரியங் உப்பஜ்ஜதி. அயங் ஸம்மாவாயாமோ நாம.
Anuppannānaṃ kusalānanti apaṭiladdhānaṃ paṭhamajjhānādīnaṃ. Uppannānanti tesaṃyeva paṭiladdhānaṃ. Ṭhitiyāti punappunaṃ uppattipabandhavasena ṭhitatthaṃ. Asammosāyāti avināsatthaṃ. Bhiyyobhāvāyāti uparibhāvāya. Vepullāyāti vipulabhāvāya. Pāripūriyāti bhāvanāya paripūraṇatthaṃ. Ayampi sammāvāyāmo anuppannānaṃ akusalānaṃ anuppādanādicittanānattā pubbabhāge nānā. Maggakkhaṇe pana imesuyeva catūsu ṭhānesu kiccasādhanavasena maggaṅgaṃ pūrayamānaṃ ekameva kusalavīriyaṃ uppajjati. Ayaṃ sammāvāyāmo nāma.
ஸம்மாஸதிபி காயாதி³பரிக்³கா³ஹகசித்தானங் நானத்தா புப்³ப³பா⁴கே³ நானா, மக்³க³க்க²ணே பன இமேஸு சதூஸு டா²னேஸு கிச்சஸாத⁴னவஸேன மக்³க³ங்க³ங் பூரயமானா ஏகா ஸதி உப்பஜ்ஜதி. அயங் ஸம்மாஸதி நாம.
Sammāsatipi kāyādipariggāhakacittānaṃ nānattā pubbabhāge nānā, maggakkhaṇe pana imesu catūsu ṭhānesu kiccasādhanavasena maggaṅgaṃ pūrayamānā ekā sati uppajjati. Ayaṃ sammāsati nāma.
ஜா²னாதீ³னி புப்³ப³பா⁴கே³பி மக்³க³க்க²ணேபி நானா, புப்³ப³பா⁴கே³ ஸமாபத்திவஸேன நானா, மக்³க³க்க²ணே நானாமக்³க³வஸேன. ஏகஸ்ஸ ஹி பட²மமக்³கோ³ பட²மஜ்ஜா²னிகோ ஹோதி, து³தியமக்³கா³த³யோபி பட²மஜ்ஜா²னிகா வா து³தியாதீ³ஸு அஞ்ஞதரஜ்ஜா²னிகா வா. ஏகஸ்ஸ பட²மமக்³கோ³ து³தியாதீ³னங் அஞ்ஞதரஜ்ஜா²னிகோ ஹோதி, து³தியாத³யோபி து³தியாதீ³னங் அஞ்ஞதரஜ்ஜா²னிகா வா பட²மஜ்ஜா²னிகா வா. ஏவங் சத்தாரோபி மக்³கா³ ஜா²னவஸேன ஸதி³ஸா வா அஸதி³ஸா வா ஏகச்சஸதி³ஸா வா ஹொந்தி.
Jhānādīni pubbabhāgepi maggakkhaṇepi nānā, pubbabhāge samāpattivasena nānā, maggakkhaṇe nānāmaggavasena. Ekassa hi paṭhamamaggo paṭhamajjhāniko hoti, dutiyamaggādayopi paṭhamajjhānikā vā dutiyādīsu aññatarajjhānikā vā. Ekassa paṭhamamaggo dutiyādīnaṃ aññatarajjhāniko hoti, dutiyādayopi dutiyādīnaṃ aññatarajjhānikā vā paṭhamajjhānikā vā. Evaṃ cattāropi maggā jhānavasena sadisā vā asadisā vā ekaccasadisā vā honti.
அயங் பனஸ்ஸ விஸேஸோ பாத³கஜ்ஜா²னநியமேன ஹோதி. பாத³கஜ்ஜா²னநியமேன ஹி பட²மஜ்ஜா²னலாபி⁴னோ பட²மஜ்ஜா²னா வுட்டா²ய விபஸ்ஸந்தஸ்ஸ உப்பன்னமக்³கோ³ பட²மஜ்ஜா²னிகோ ஹோதி, மக்³க³ங்க³பொ³ஜ்ஜ²ங்கா³னி பனெத்த² பரிபுண்ணானேவ ஹொந்தி. து³தியஜ்ஜா²னதோ வுட்டா²ய விபஸ்ஸந்தஸ்ஸ உப்பன்னோ து³தியஜ்ஜா²னிகோ ஹோதி, மக்³க³ங்கா³னி பனெத்த² ஸத்த ஹொந்தி. ததியஜ்ஜா²னதோ வுட்டா²ய விபஸ்ஸந்தஸ்ஸ உப்பன்னோ ததியஜ்ஜா²னிகோ, மக்³க³ங்கா³னி பனெத்த² ஸத்த, பொ³ஜ்ஜ²ங்கா³னி ச² ஹொந்தி. ஏஸ நயோ சதுத்த²ஜ்ஜா²னதோ பட்டா²ய யாவ நேவஸஞ்ஞானாஸஞ்ஞாயதனா .
Ayaṃ panassa viseso pādakajjhānaniyamena hoti. Pādakajjhānaniyamena hi paṭhamajjhānalābhino paṭhamajjhānā vuṭṭhāya vipassantassa uppannamaggo paṭhamajjhāniko hoti, maggaṅgabojjhaṅgāni panettha paripuṇṇāneva honti. Dutiyajjhānato vuṭṭhāya vipassantassa uppanno dutiyajjhāniko hoti, maggaṅgāni panettha satta honti. Tatiyajjhānato vuṭṭhāya vipassantassa uppanno tatiyajjhāniko, maggaṅgāni panettha satta, bojjhaṅgāni cha honti. Esa nayo catutthajjhānato paṭṭhāya yāva nevasaññānāsaññāyatanā .
ஆருப்பே சதுக்கபஞ்சகஜ்ஜா²னங் உப்பஜ்ஜதி, தஞ்ச லோகுத்தரங், நோ லோகியந்தி வுத்தங். எத்த² கத²ந்தி? எத்தா²பி பட²மஜ்ஜா²னாதீ³ஸு யதோ வுட்டா²ய ஸோதாபத்திமக்³க³ங் படிலபி⁴த்வா அரூபஸமாபத்திங் பா⁴வெத்வா ஸோ ஆருப்பே உப்பன்னோ, தங்ஜா²னிகாவஸ்ஸ தத்த² தயோ மக்³கா³ உப்பஜ்ஜந்தி. ஏவங் பாத³கஜ்ஜா²னமேவ நியமேதி. கேசி பன தே²ரா – ‘‘விபஸ்ஸனாய ஆரம்மணபூ⁴தா க²ந்தா⁴ நியமெந்தீ’’தி வத³ந்தி . கேசி ‘‘புக்³க³லஜ்ஜா²ஸயோ நியமேதீ’’தி வத³ந்தி. கேசி ‘‘வுட்டா²னகா³மினீவிபஸ்ஸனா நியமேதீ’’தி வத³ந்தி. தேஸங் வாத³வினிச்ச²யோ விஸுத்³தி⁴மக்³கே³ வுட்டா²னகா³மினீவிபஸ்ஸனாதி⁴காரே வுத்தனயேனேவ வேதி³தப்³போ³. அயங் வுச்சதி, பி⁴க்க²வே, ஸம்மாஸமாதீ⁴தி அயங் புப்³ப³பா⁴கே³ லோகியோ, அபரபா⁴கே³ லோகுத்தரோ ஸம்மாஸமாதீ⁴தி வுச்சதி.
Āruppe catukkapañcakajjhānaṃ uppajjati, tañca lokuttaraṃ, no lokiyanti vuttaṃ. Ettha kathanti? Etthāpi paṭhamajjhānādīsu yato vuṭṭhāya sotāpattimaggaṃ paṭilabhitvā arūpasamāpattiṃ bhāvetvā so āruppe uppanno, taṃjhānikāvassa tattha tayo maggā uppajjanti. Evaṃ pādakajjhānameva niyameti. Keci pana therā – ‘‘vipassanāya ārammaṇabhūtā khandhā niyamentī’’ti vadanti . Keci ‘‘puggalajjhāsayo niyametī’’ti vadanti. Keci ‘‘vuṭṭhānagāminīvipassanā niyametī’’ti vadanti. Tesaṃ vādavinicchayo visuddhimagge vuṭṭhānagāminīvipassanādhikāre vuttanayeneva veditabbo. Ayaṃ vuccati, bhikkhave, sammāsamādhīti ayaṃ pubbabhāge lokiyo, aparabhāge lokuttaro sammāsamādhīti vuccati.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. விப⁴ங்க³ஸுத்தங் • 8. Vibhaṅgasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8. விப⁴ங்க³ஸுத்தவண்ணனா • 8. Vibhaṅgasuttavaṇṇanā
