| Library / Tipiṭaka / д̇ибидага • Tipiṭaka / сам̣яуд̇д̇анигааяа (дийгаа) • Saṃyuttanikāya (ṭīkā) |
2. вибхан̇г̇асуд̇д̇аван̣н̣анаа
2. Vibhaṅgasuttavaṇṇanā
2. д̣̇уд̇иязбийд̇и д̣̇уд̇ияасуд̇д̇зби. би-сад̣̇д̣̇зна д̇ад̣̇ан̃н̃зсу суд̇д̇зсубийд̇и ад̇т̇о. ‘‘висуд̣̇д̇химаг̇г̇з вуд̇д̇аа зваа’’д̇и вад̇вааби д̇ад̣̇згад̣̇зсам̣ ид̇ха винияог̇агкамам̣ д̣̇ассзд̇ум̣ ‘‘яат̇аа хий’’д̇иаад̣̇и вуд̇д̇ам̣. д̇анд̇и муулам̣. вид̇т̇аарад̣̇зсананд̇и ‘‘вибхаж̇иссаамий’’д̇и бад̣̇асса ад̇т̇асса д̣̇ассанавасзна бавад̇д̇ам̣ вибхан̇г̇ад̣̇зсанам̣. уд̣̇д̣̇зсад̣̇зсанаа батамасуд̇д̇з ануломад̣̇зсанаасад̣̇исаава. буна ваддавиваддам̣ д̣̇ассзнд̇од̇и ‘‘ид̇и ко, бхигкавз’’д̇иаад̣̇инаа бавад̇д̇им̣ нивад̇д̇ин̃жа д̣̇ассзнд̇о. батамам̣ уд̣̇д̣̇зсавасзна вибхаж̇анавасзна виваддам̣ д̣̇ассид̇ам̣, д̇ад̇о зва б̣яад̇ирзганаязна виваддамби д̣̇ассид̇амзва ход̇ийд̇и бунаг̇г̇ахан̣ам̣.
2.Dutiyepīti dutiyasuttepi. Pi-saddena tadaññesu suttesupīti attho. ‘‘Visuddhimagge vuttā evā’’ti vatvāpi tadekadesaṃ idha viniyogakkhamaṃ dassetuṃ ‘‘yathā hī’’tiādi vuttaṃ. Tanti mūlaṃ. Vitthāradesananti ‘‘vibhajissāmī’’ti padassa atthassa dassanavasena pavattaṃ vibhaṅgadesanaṃ. Uddesadesanā paṭhamasutte anulomadesanāsadisāva. Puna vaṭṭavivaṭṭaṃ dassentoti ‘‘iti kho, bhikkhave’’tiādinā pavattiṃ nivattiñca dassento. Paṭhamaṃ uddesavasena vibhajanavasena vivaṭṭaṃ dassitaṃ, tato eva byatirekanayena vivaṭṭampi dassitameva hotīti punaggahaṇaṃ.
д̇зсам̣ д̇зсам̣ сад̇д̇аананд̇и ид̣̇ам̣ гин̃жи багаарад̇о анаамасид̇ваа саб̣б̣зби сад̇д̇з сааман̃н̃ад̇о б̣яаабзд̇ваа г̇ахан̣анд̇и ааха ‘‘сан̇кзбад̇о…бз… нид̣̇д̣̇зсо’’д̇и. г̇ад̇иж̇аад̇ивасзнаад̇и бан̃жаг̇ад̇ивасзна, д̇ад̇т̇ааби згзгааяа г̇ад̇ияаа кад̇д̇ияаад̣̇ибхуммад̣̇зваад̣̇ихад̇т̇иаад̣̇иж̇аад̇ивасзна жа. ‘‘жид̇д̇ам̣ мано’’д̇иаад̣̇ийсу вияа гижжависзсам̣, ‘‘маанаса’’нд̇иаад̣̇ийсу вияа самаанз ад̇т̇з сад̣̇д̣̇ависзсам̣, ‘‘бан̣д̣ара’’нд̇иаад̣̇ийсу вияа г̇ун̣ависзсам̣, ‘‘жзд̇асигам̣ хад̣̇аяа’’нд̇иаад̣̇ийсу вияа ниссаяависзсам̣, ‘‘жид̇д̇асса тид̇ий’’д̇иаад̣̇ийсу вияа ан̃н̃асса авад̇т̇аабхаавависзсам̣, ‘‘алуб̣бханаа’’д̇иаад̣̇ийсу вияа ан̃н̃асса гирияаабхаавависзсам̣, ‘‘алуб̣бхид̇ад̇д̇а’’нд̇иаад̣̇ийсу вияа ан̃н̃асса абхаавад̇аависзсанд̇и звамаад̣̇игам̣ анабзгкид̇ваа д̇хаммамад̇д̇ам̣ ваа д̣̇ийбанаа сабхааванид̣̇д̣̇зсо. ж̇ин̣н̣асса ж̇ийран̣авасзна бавад̇д̇анаагааро ж̇ийран̣ад̇аад̇и ааха ‘‘аагааранид̣̇д̣̇зсо’’д̇и.
Tesaṃtesaṃ sattānanti idaṃ kiñci pakārato anāmasitvā sabbepi satte sāmaññato byāpetvā gahaṇanti āha ‘‘saṅkhepato…pe… niddeso’’ti. Gatijātivasenāti pañcagativasena, tatthāpi ekekāya gatiyā khattiyādibhummadevādihatthiādijātivasena ca. ‘‘Cittaṃ mano’’tiādīsu viya kiccavisesaṃ, ‘‘mānasa’’ntiādīsu viya samāne atthe saddavisesaṃ, ‘‘paṇḍara’’ntiādīsu viya guṇavisesaṃ, ‘‘cetasikaṃ hadaya’’ntiādīsu viya nissayavisesaṃ, ‘‘cittassa ṭhitī’’tiādīsu viya aññassa avatthābhāvavisesaṃ, ‘‘alubbhanā’’tiādīsu viya aññassa kiriyābhāvavisesaṃ, ‘‘alubbhitatta’’ntiādīsu viya aññassa abhāvatāvisesanti evamādikaṃ anapekkhitvā dhammamattaṃ vā dīpanā sabhāvaniddeso. Jiṇṇassa jīraṇavasena pavattanākāro jīraṇatāti āha ‘‘ākāraniddeso’’ti.
гаалаад̇иггамз гижжанид̣̇д̣̇зсаад̇и галалагаалад̇о бабхуд̇и буримаруубаанам̣ ж̇араабад̇д̇агкан̣з уббаж̇ж̇амаанаани бажчимаруубаани барибаггаруубаануруубаани барин̣ад̇абарин̣ад̇аани уббаж̇ж̇анд̇ийд̇и ануггамзна субарин̣ад̇аруубаанам̣ барибаагагаалз уббаж̇ж̇амаанаани кан̣д̣ижжаад̣̇исабхааваани уббаж̇ж̇анд̇ийд̇и ‘‘кан̣д̣ижжа’’нд̇иаад̣̇аяо гаалаад̇иггамз ж̇арааяа гижжанид̣̇д̣̇зсаа. багад̇инид̣̇д̣̇зсаад̇и палавибажжанабагад̇ияаа нид̣̇д̣̇зсаа, ж̇арааяа ваа баабун̣ид̇аб̣б̣апаламзва багад̇и, д̇ассаа нид̣̇д̣̇зсаа, на жа кан̣д̣ижжаад̣̇ийнзва ж̇араад̇и уд̣̇агаад̣̇иг̇ад̇амаг̇г̇зсу д̇ин̣аругкасам̣бхаг̇г̇ад̇аад̣̇аяо вияа барибаагаг̇ад̇амаг̇г̇асан̇каад̇зсу барибун̣н̣аруубзсу лаб̣бхамаанаа кан̣д̣ижжаад̣̇аяо ж̇арааяа г̇ад̇амаг̇г̇ааижжзва взд̣̇ид̇аб̣б̣аа, на ж̇араад̇и.
Kālātikkame kiccaniddesāti kalalakālato pabhuti purimarūpānaṃ jarāpattakkhaṇe uppajjamānāni pacchimarūpāni paripakkarūpānurūpāni pariṇatapariṇatāni uppajjantīti anukkamena supariṇatarūpānaṃ paripākakāle uppajjamānāni khaṇḍiccādisabhāvāni uppajjantīti ‘‘khaṇḍicca’’ntiādayo kālātikkame jarāya kiccaniddesā. Pakatiniddesāti phalavipaccanapakatiyā niddesā, jarāya vā pāpuṇitabbaphalameva pakati, tassā niddesā, na ca khaṇḍiccādīneva jarāti udakādigatamaggesu tiṇarukkhasaṃbhaggatādayo viya paripākagatamaggasaṅkhātesu paripuṇṇarūpesu labbhamānā khaṇḍiccādayo jarāya gatamaggāicceva veditabbā, na jarāti.
яасмаа ж̇арам̣ бад̇д̇асса ааяу хааяад̇и, инд̣̇рияаани ж̇аж̇ж̇араани хонд̇ийд̇и ааяухаанаад̣̇аяо багад̇инид̣̇д̣̇зсаа, д̇асмаа вуд̇д̇ам̣ ‘‘бажчимаа д̣̇вз багад̇инид̣̇д̣̇зсаа’’д̇и. д̇знааха ‘‘имзхи банаа’’д̇иаад̣̇и.
Yasmā jaraṃ pattassa āyu hāyati, indriyāni jajjarāni hontīti āyuhānādayo pakatiniddesā, tasmā vuttaṃ ‘‘pacchimā dve pakatiniddesā’’ti. Tenāha ‘‘imehi panā’’tiādi.
авин̃н̃ааяамаананд̇арад̇д̇аа авийжиж̇араа ман̣иаад̣̇ийсу манд̣̇ад̣̇асагаад̣̇ийсу згзгад̣̇асагзсу жа кан̣з кан̣з ж̇ин̣н̣авигаараад̣̇ийнам̣ д̣̇увин̃н̃зяяад̇д̇аа. д̇ад̇о ан̃н̃зсууд̇и ман̣иаад̣̇ид̇о ан̃н̃зсу ахижчад̇д̇агаад̣̇ийсу, баан̣ийнам̣ згабхавабарияаабаннз сагалаааяусмим̣ г̇ахид̇ад̇арун̣аяувааж̇араагаалзсу, згад̣̇вид̇д̇ид̣̇ивасаад̇иггамзсу бубпаад̣̇ийсу ваад̇и ад̇т̇о. д̇ад̇т̇а хи ж̇араависзсасса сувин̃н̃зяяад̇д̇аа савийжиж̇араа наама.
Aviññāyamānantarattā avīcijarā maṇiādīsu mandadasakādīsu ekekadasakesu ca khaṇe khaṇe jiṇṇavikārādīnaṃ duviññeyyattā. Tato aññesūti maṇiādito aññesu ahicchattakādīsu, pāṇīnaṃ ekabhavapariyāpanne sakalaāyusmiṃ gahitataruṇayuvājarākālesu, ekadvittidivasātikkamesu pupphādīsu vāti attho. Tattha hi jarāvisesassa suviññeyyattā savīcijarā nāma.
жаванагавасзнаад̇и жаванагаанам̣ канд̇хаанам̣ васзна. згажад̇убан̃жагканд̇хааяа жуд̇ияаа жаванамзва жаванад̇аад̇и ааха ‘‘бхаававажанзна лагкан̣анид̣̇ассана’’нд̇и, баал̣ияам̣ ‘‘жуд̇ий’’д̇и вуд̇д̇асса маран̣асса сабхаавад̣̇ассананд̇и ад̇т̇о. бхан̇г̇уббад̇д̇и бхиж̇ж̇амаанад̇аа. д̇зна ‘‘бхзд̣̇о’’д̇и иминаа канд̇хаанам̣ бхиж̇ж̇амаанад̇аа бхзд̣̇асаман̇г̇ид̇аа вуд̇д̇аад̇и д̣̇ассзд̇и. таанаабхаавабарид̣̇ийбананд̇и гзнажиби аагаарзна авадтаанаабхаавад̣̇ийбанам̣. гхадассзваад̇и хи висад̣̇исууд̣̇аахаран̣ам̣. яат̇аа гхадз бхиннз габаалаад̣̇иаваяавасзсо лаб̣бхад̇и, на звам̣ жуд̇игканд̇хзсу бхан̇г̇зсу, на гожи висзсо д̇идтад̇ийд̇и д̣̇ассзд̇ум̣ ‘‘анд̇арад̇хаана’’нд̇и вуд̇д̇ам̣. мажжусан̇каад̇ам̣ маран̣анд̇и мажжусан̃н̃ид̇ам̣ маран̣ам̣. ‘‘гааламаран̣а’’нд̇и вад̣̇анд̇и. санд̇аанасса ажжанд̇асамужчзд̣̇абхууд̇ам̣ кийн̣аасаваанам̣ маран̣ам̣ самужчзд̣̇амаран̣ам̣. аад̣̇и-сад̣̇д̣̇зна кан̣игамаран̣ам̣ сан̇г̇ан̣хаад̇и. д̇асса гирияаад̇и анд̇агасса гирияаа, яаа логз вужжад̇и ‘‘мажжуу’’д̇и, маран̣анд̇и ад̇т̇о. жаванагаало зва ваа анад̇иггаманийяад̇д̇аа висзсзна гаалод̇и вуд̇д̇од̇и д̇асса гирияаа ад̇т̇ад̇о жуд̇игканд̇хаанам̣ бхзд̣̇абавад̇д̇иязва. ‘‘мажжу маран̣а’’нд̇и ваа зд̇т̇а самаасам̣ агад̇ваа яо ‘‘мажжуу’’д̇и вужжад̇и бхзд̣̇о, д̇амзва маран̣ам̣ ‘‘баан̣ажааг̇о’’д̇и звамзд̇т̇а ад̇т̇о д̣̇адтаб̣б̣о.
Cavanakavasenāti cavanakānaṃ khandhānaṃ vasena. Ekacatupañcakkhandhāya cutiyā cavanameva cavanatāti āha ‘‘bhāvavacanena lakkhaṇanidassana’’nti, pāḷiyaṃ ‘‘cutī’’ti vuttassa maraṇassa sabhāvadassananti attho. Bhaṅguppatti bhijjamānatā. Tena ‘‘bhedo’’ti iminā khandhānaṃ bhijjamānatā bhedasamaṅgitā vuttāti dasseti. Ṭhānābhāvaparidīpananti kenacipi ākārena avaṭṭhānābhāvadīpanaṃ. Ghaṭassevāti hi visadisūdāharaṇaṃ. Yathā ghaṭe bhinne kapālādiavayavaseso labbhati, na evaṃ cutikkhandhesu bhaṅgesu, na koci viseso tiṭṭhatīti dassetuṃ ‘‘antaradhāna’’nti vuttaṃ. Maccusaṅkhātaṃ maraṇanti maccusaññitaṃ maraṇaṃ. ‘‘Kālamaraṇa’’nti vadanti. Santānassa accantasamucchedabhūtaṃ khīṇāsavānaṃ maraṇaṃ samucchedamaraṇaṃ. Ādi-saddena khaṇikamaraṇaṃ saṅgaṇhāti. Tassa kiriyāti antakassa kiriyā, yā loke vuccati ‘‘maccū’’ti, maraṇanti attho. Cavanakālo eva vā anatikkamanīyattā visesena kāloti vuttoti tassa kiriyā atthato cutikkhandhānaṃ bhedapavattiyeva. ‘‘Maccu maraṇa’’nti vā ettha samāsaṃ akatvā yo ‘‘maccū’’ti vuccati bhedo, tameva maraṇaṃ ‘‘pāṇacāgo’’ti evamettha attho daṭṭhabbo.
жад̇увогааравасзнаад̇и жад̇увогаарабхававасзна. д̇ад̇т̇а хи руубагааяасан̃н̃ид̇о гал̣зваро над̇т̇и, яам̣ нигкибзяяа. гин̃жааби згавогаарабхавзби гал̣зваранигкзбо над̇т̇и, руубагааяасса бана д̇ад̇т̇а ад̇т̇ид̇аамад̇д̇ам̣ г̇ахзд̇ваа ‘‘згавогааравасзна гал̣зварасса нигкзбо’’д̇и вуд̇д̇о. жад̇увогааравасзна жаад̇и жа-сад̣̇д̣̇зна ‘‘сзсад̣̇ваяавасзна канд̇хаанам̣ бхзд̣̇о’’д̇и имамад̇т̇ам̣ д̣̇ассзд̇и саб̣б̣ад̇т̇зва канд̇хабхзд̣̇асаб̣бхаавад̇о. сзсад̣̇ваяавасзнаад̇и сзсабхавад̣̇ваяавасзнзва гал̣зварасса нигкзбо. яад̣̇иби згавогаарабхавз руубагааяо виж̇ж̇ад̇и, гал̣зваранигкзбо бана над̇т̇ийд̇и ‘‘гал̣зварасса саб̣бхаавад̇о’’ижжзва вуд̇д̇ам̣. яасмаа мануссаад̣̇ийсу гал̣зваранигкзбо ад̇т̇и, д̇асмаа мануссаад̣̇ийсу гал̣зварасса нигкзбод̇и яож̇анаа. гал̣зварам̣ нигкибийяад̇и зд̇знаад̇и маран̣ам̣ гал̣зварасса нигкзбо. згад̇о гад̇ваад̇и згаж̇жхам̣ гад̇ваа, згаж̇жхам̣ г̇ахан̣амад̇д̇зна.
Catuvokāravasenāti catuvokārabhavavasena. Tattha hi rūpakāyasaññito kaḷevaro natthi, yaṃ nikkhipeyya. Kiñcāpi ekavokārabhavepi kaḷevaranikkhepo natthi, rūpakāyassa pana tattha atthitāmattaṃ gahetvā ‘‘ekavokāravasena kaḷevarassa nikkhepo’’ti vutto. Catuvokāravasena cāti ca-saddena ‘‘sesadvayavasena khandhānaṃ bhedo’’ti imamatthaṃ dasseti sabbattheva khandhabhedasabbhāvato. Sesadvayavasenāti sesabhavadvayavaseneva kaḷevarassa nikkhepo. Yadipi ekavokārabhave rūpakāyo vijjati, kaḷevaranikkhepo pana natthīti ‘‘kaḷevarassa sabbhāvato’’icceva vuttaṃ. Yasmā manussādīsu kaḷevaranikkhepo atthi, tasmā manussādīsu kaḷevarassa nikkhepoti yojanā. Kaḷevaraṃ nikkhipīyati etenāti maraṇaṃ kaḷevarassa nikkhepo. Ekato katvāti ekajjhaṃ katvā, ekajjhaṃ gahaṇamattena.
ж̇ааяанадтзнаад̇иаад̣̇и ааяад̇анавасзна яонивасзна жа д̣̇вийхи бад̣̇зхи саб̣б̣асад̇д̇з барияаад̣̇ияид̇ваа барияаад̣̇ияид̇ваа ж̇аад̇им̣ д̣̇ассзд̇ум̣ вуд̇д̇ам̣. гзжи бана ‘‘гад̇д̇убхаававасзна бад̣̇ад̣̇ваяам̣ вуд̇д̇а’’нд̇и вад̣̇анд̇и. ‘‘д̇зсам̣ д̇зсам̣ сад̇д̇аанам̣ ж̇аад̇и сан̃ж̇аад̇ий’’д̇и бана гад̇д̇ари сааминид̣̇д̣̇зсасса гад̇ад̇д̇аа убхаяад̇т̇ааби бхааванид̣̇д̣̇зсо. самбун̣н̣аа ж̇аад̇и сан̃ж̇аад̇и. баагадаа ниб̣б̣ад̇д̇и абхиниб̣б̣ад̇д̇и. д̇зсам̣ д̇зсам̣ сад̇д̇аанам̣…бз… абхиниб̣б̣ад̇д̇ийд̇и сад̇д̇авасзна бавад̇д̇ад̇д̇аа вохаарад̣̇зсанаа.
Jāyanaṭṭhenātiādi āyatanavasena yonivasena ca dvīhi padehi sabbasatte pariyādiyitvā pariyādiyitvā jātiṃ dassetuṃ vuttaṃ. Keci pana ‘‘kattubhāvavasena padadvayaṃ vutta’’nti vadanti. ‘‘Tesaṃ tesaṃ sattānaṃ jāti sañjātī’’ti pana kattari sāminiddesassa katattā ubhayatthāpi bhāvaniddeso. Sampuṇṇā jāti sañjāti. Pākaṭā nibbatti abhinibbatti. Tesaṃ tesaṃ sattānaṃ…pe… abhinibbattīti sattavasena pavattattā vohāradesanā.
д̇ад̇ра д̇ад̇раад̇и згажад̇увогаарабхавзсу д̣̇виннам̣ сзсаруубад̇хаад̇уяам̣ бадисанд̇хигкан̣з уббаж̇ж̇амаанаанам̣ бан̃жаннам̣, гаамад̇хаад̇уяам̣ вигалаавигалинд̣̇рияаанам̣ васзна сад̇д̇аннам̣ наваннам̣ д̣̇асаннам̣ буна д̣̇асаннам̣ згаад̣̇асаннан̃жа ааяад̇анаанам̣ васзна сан̇г̇ахо взд̣̇ид̇аб̣б̣о. санд̇ад̇ияанд̇и язна гаммунаа канд̇хаанам̣ баад̇убхааво, д̇зна абхисан̇кад̇асанд̇ад̇ияам̣. д̇ан̃жа ко бадисанд̇хигкан̣авасзна взд̣̇ид̇аб̣б̣ам̣.
Tatra tatrāti ekacatuvokārabhavesu dvinnaṃ sesarūpadhātuyaṃ paṭisandhikkhaṇe uppajjamānānaṃ pañcannaṃ, kāmadhātuyaṃ vikalāvikalindriyānaṃ vasena sattannaṃ navannaṃ dasannaṃ puna dasannaṃ ekādasannañca āyatanānaṃ vasena saṅgaho veditabbo. Santatiyanti yena kammunā khandhānaṃ pātubhāvo, tena abhisaṅkhatasantatiyaṃ. Tañca kho paṭisandhikkhaṇavasena veditabbaṃ.
гаммам̣язва гаммабхаво ‘‘бхавад̇и зд̇асмаа убабад̇д̇ибхаво’’д̇и гад̇ваа. гаммзна нияяаад̣̇ид̇аад̇д̇абхаавубабад̇д̇ивасзна бхавад̇ийд̇и бхаво, д̇ат̇аа д̇ат̇аа ниб̣б̣ад̇д̇авибааго гадад̇д̇ааруубан̃жа. адтагат̇ааяам̣ бана ‘‘бхавад̇ийд̇и гад̇ваа бхаво’’д̇и убабад̇д̇ибхавасса вагкамаанад̇д̇аа ‘‘гаммам̣ палавохаарзна бхавод̇и вуд̇д̇а’’нд̇и гат̇ид̇ам̣.
Kammaṃyeva kammabhavo ‘‘bhavati etasmā upapattibhavo’’ti katvā. Kammena niyyāditaattabhāvupapattivasena bhavatīti bhavo, tathā tathā nibbattavipāko kaṭattārūpañca. Aṭṭhakathāyaṃ pana ‘‘bhavatīti katvā bhavo’’ti upapattibhavassa vakkhamānattā ‘‘kammaṃ phalavohārena bhavoti vutta’’nti kathitaṃ.
убаад̣̇ияанд̇и сад̇д̇аа д̣̇ал̣хаг̇г̇аахам̣ г̇ан̣ханд̇и зд̇зна гилзсагаамзна. на гзвалам̣ ид̇ха гаран̣асаад̇ханамзва, ат̇а ко гад̇д̇усаад̇ханамби лаб̣бхад̇ийд̇и вуд̇д̇ам̣ ‘‘саяам̣ ваа’’д̇и. д̇анд̇и вад̇т̇угаамам̣. гаамо жа со гааманадтзна, убаад̣̇аанан̃жа бхусамаад̣̇аанадтзнаад̇и гаамубаад̣̇аанам̣. зд̇анд̇и гаамубаад̣̇аанабад̣̇ам̣. буна зд̇анд̇и гаамубаад̣̇аанасан̇каад̇ам̣.
Upādiyanti sattā daḷhaggāhaṃ gaṇhanti etena kilesakāmena. Na kevalaṃ idha karaṇasādhanameva, atha kho kattusādhanampi labbhatīti vuttaṃ ‘‘sayaṃ vā’’ti. Tanti vatthukāmaṃ. Kāmo ca so kāmanaṭṭhena, upādānañca bhusamādānaṭṭhenāti kāmupādānaṃ. Etanti kāmupādānapadaṃ. Puna etanti kāmupādānasaṅkhātaṃ.
сассад̇о ад̇д̇аад̇и ид̣̇ам̣ буримад̣̇идтим̣ убаад̣̇ияамаанам̣ уд̇д̇арад̣̇идтим̣ д̣̇ассзд̇ум̣ вуд̇д̇ам̣. яат̇аа зсаа д̣̇идти д̣̇ал̣хийгаран̣авасзна буримам̣ уд̇д̇араа убаад̣̇ияад̇и, звам̣ ‘‘над̇т̇и д̣̇инна’’нд̇иаад̣̇игаабийд̇и. ад̇д̇аг̇г̇ахан̣ам̣ бана ‘‘ад̇д̇аваад̣̇убаад̣̇аана’’нд̇и ид̣̇ам̣ на д̣̇идтубаад̣̇аанад̣̇ассананд̇и д̣̇адтаб̣б̣ам̣. лого жаад̇и ад̇д̇аг̇г̇ахан̣авинимуд̇д̇аг̇г̇ахан̣ам̣ д̣̇идтубаад̣̇аанабхууд̇ам̣ ид̇ха буримад̣̇идтиуд̇д̇арад̣̇идтиважанзхи вуд̇д̇анд̇и д̣̇адтаб̣б̣ам̣.
Sassatoattāti idaṃ purimadiṭṭhiṃ upādiyamānaṃ uttaradiṭṭhiṃ dassetuṃ vuttaṃ. Yathā esā diṭṭhi daḷhīkaraṇavasena purimaṃ uttarā upādiyati, evaṃ ‘‘natthi dinna’’ntiādikāpīti. Attaggahaṇaṃ pana ‘‘attavādupādāna’’nti idaṃ na diṭṭhupādānadassananti daṭṭhabbaṃ. Loko cāti attaggahaṇavinimuttaggahaṇaṃ diṭṭhupādānabhūtaṃ idha purimadiṭṭhiuttaradiṭṭhivacanehi vuttanti daṭṭhabbaṃ.
язна мижчаабхинивзсзна г̇осийлаг̇овад̇аад̣̇им̣ самаад̣̇ияад̇и жзва ануд̇идтад̇и жа, со г̇осийлаг̇овад̇аад̣̇ийнийд̇и ад̇хиббзд̇аани. д̇знааха ‘‘г̇осийла…бз… саяамзва убаад̣̇аанааний’’д̇и. абхинивзсад̇од̇и абхинивзсанад̇о.
Yena micchābhinivesena gosīlagovatādiṃ samādiyati ceva anutiṭṭhati ca, so gosīlagovatādīnīti adhippetāni. Tenāha ‘‘gosīla…pe… sayameva upādānānī’’ti. Abhinivesatoti abhinivesanato.
ад̇д̇аваад̣̇убаад̣̇аананд̇и ‘‘ад̇д̇аа’’д̇и ваад̣̇асса бан̃н̃аабанасса г̇ахан̣асса гааран̣абхууд̇аа д̣̇идтийд̇и ад̇т̇о. ад̇д̇аваад̣̇амад̇д̇амзваад̇и ад̇д̇асса абхааваа ‘‘ад̇д̇аа’’д̇и ид̣̇ам̣ важанамад̇д̇амзва. убаад̣̇ияанд̇и д̣̇ал̣хам̣ г̇ан̣ханд̇и.
Attavādupādānanti ‘‘attā’’ti vādassa paññāpanassa gahaṇassa kāraṇabhūtā diṭṭhīti attho. Attavādamattamevāti attassa abhāvā ‘‘attā’’ti idaṃ vacanamattameva. Upādiyanti daḷhaṃ gaṇhanti.
жагкуд̣̇ваараад̣̇ийсу бавад̇д̇ааяаад̇и ид̣̇ам̣ д̇ан̣хааяа руубад̇ан̣хаад̣̇ибхаавасса гааран̣аважанам̣ чад̣̇ваараарамман̣игад̇хаммаанам̣ бадинияад̇аарамман̣ад̇д̇аа. ж̇аванавийт̇ияаа бавад̇д̇ааяаад̇и ид̣̇ам̣ д̇ассаа бавад̇д̇идтаанад̣̇ассанам̣. сабхаавзнзва удтаад̇ум̣ асаггонд̇асса взл̣у вияа ниссаяо ахуд̇ваа олумбхагабхаавзна бхааво убаад̣̇аанасса бажжаяабхаавад̇о аарамман̣амби д̇ам̣сад̣̇исам̣ вуд̇д̇ам̣. руубзд̇и висаяз бхуммам̣. саа д̇ивид̇хаа ход̇ийд̇и самб̣анд̇хо. гаамад̇ан̣хаа гаамассаад̣̇абхаавзна бавад̇д̇ияаа. звам̣ ассаад̣̇знд̇ийд̇и сассад̇ад̣̇идтияаа сахаж̇аад̇аниссаяасамбаяуд̇д̇аад̇т̇иавиг̇ад̇аад̣̇ибажжаяабхууд̇ааяа сам̣садтад̇д̇аа нижжад̇хувасассад̇аабхинивзсамукзна ассаад̣̇знд̇ий. бхавасахаг̇ад̇аа д̇ан̣хаа бхавад̇ан̣хаа. бхавад̇и д̇идтад̇и саб̣б̣агааланд̇и хи бхавад̣̇идти бхаво уд̇д̇арабад̣̇алобзна, бхавассаад̣̇авасзна бавад̇д̇ияаа жа. иминаа наязна вибхавад̇ан̣хаад̇и зд̇т̇а ад̇т̇о взд̣̇ид̇аб̣б̣о. вибхавад̇и ужчиж̇ж̇ад̇и винассад̇ийд̇и звам̣ бавад̇д̇аа д̣̇идти вибхаво уд̇д̇арабад̣̇алобзна. звам̣ д̇аани адтаарасаад̇и яаа ча гаамад̇ан̣хаа, ча бхавад̇ан̣хаа, ча вибхавад̇ан̣хаа вуд̇д̇аа, зд̇аани адтаараса д̇ан̣хаавижарид̇аани д̇ан̣хаабажжаяо. аж̇жхад̇д̇анд̇и сагасанд̇ад̇ияам̣. б̣ахид̣̇д̇хаад̇и д̇ад̇о б̣ахид̣̇д̇хаа. ад̇ийд̇аарамман̣аани ваа хонд̇у ид̇араарамман̣аани ваа, саяам̣ бана ад̇ийд̇аани чад̇д̇им̣са д̇ан̣хаавижарид̇аани. сзсабад̣̇ад̣̇ваязби зсзва наяо. ‘‘адтасад̇ам̣ д̇ан̣хаавижарид̇ааний’’д̇иаад̣̇инаа самб̣анд̇хо. ид̣̇аани абарзнаби багаарзна адтасад̇ам̣ д̇ан̣хаавижарид̇аани д̣̇ассзд̇ум̣ ‘‘аж̇жхад̇д̇игассаа’’д̇иаад̣̇имааха. д̇ад̇т̇а аж̇жхад̇д̇игассаад̇и аж̇жхад̇д̇игаканд̇хабан̃жагам̣. убаяог̇ад̇т̇з хи ид̣̇ам̣ саамиважанам̣. убаад̣̇ааяаад̇и г̇ахзд̇ваа. асмийд̇и ход̇ийд̇и яад̣̇зд̇ам̣ аж̇жхад̇д̇игам̣ канд̇хабан̃жагам̣ убаад̣̇ааяа д̇ан̣хаамаанад̣̇идтивасзна самуд̣̇ааяаг̇г̇аахад̇о асмийд̇и г̇аахо ход̇и, д̇асмим̣ сад̇ийд̇и ад̇т̇о. ид̇ха бана руубаад̣̇иаарамман̣авасзна ад̇т̇о взд̣̇ид̇аб̣б̣о. ид̇т̇амасмийд̇и ход̇ийд̇и кад̇д̇ияаад̣̇ийсу ‘‘ид̣̇ам̣багааро аха’’нд̇и звам̣ д̇ан̣хаамаанад̣̇идтивасзна ход̇ийд̇и ад̇т̇о. ид̣̇ам̣ д̇аава анубанид̇хааяа г̇ахан̣ам̣.
Cakkhudvārādīsu pavattāyāti idaṃ taṇhāya rūpataṇhādibhāvassa kāraṇavacanaṃ chadvārārammaṇikadhammānaṃ paṭiniyatārammaṇattā. Javanavīthiyā pavattāyāti idaṃ tassā pavattiṭṭhānadassanaṃ. Sabhāveneva uṭṭhātuṃ asakkontassa veḷu viya nissayo ahutvā olumbhakabhāvena bhāvo upādānassa paccayabhāvato ārammaṇampi taṃsadisaṃ vuttaṃ. Rūpeti visaye bhummaṃ. Sā tividhā hotīti sambandho. Kāmataṇhā kāmassādabhāvena pavattiyā. Evaṃ assādentīti sassatadiṭṭhiyā sahajātanissayasampayuttaatthiavigatādipaccayabhūtāya saṃsaṭṭhattā niccadhuvasassatābhinivesamukhena assādentī. Bhavasahagatā taṇhā bhavataṇhā. Bhavati tiṭṭhati sabbakālanti hi bhavadiṭṭhi bhavo uttarapadalopena, bhavassādavasena pavattiyā ca. Iminā nayena vibhavataṇhāti ettha attho veditabbo. Vibhavati ucchijjati vinassatīti evaṃ pavattā diṭṭhi vibhavo uttarapadalopena. Evaṃ tāni aṭṭhārasāti yā cha kāmataṇhā, cha bhavataṇhā, cha vibhavataṇhā vuttā, etāni aṭṭhārasa taṇhāvicaritāni taṇhāpaccayo. Ajjhattanti sakasantatiyaṃ. Bahiddhāti tato bahiddhā. Atītārammaṇāni vā hontu itarārammaṇāni vā, sayaṃ pana atītāni chattiṃsa taṇhāvicaritāni. Sesapadadvayepi eseva nayo. ‘‘Aṭṭhasataṃ taṇhāvicaritānī’’tiādinā sambandho. Idāni aparenapi pakārena aṭṭhasataṃ taṇhāvicaritāni dassetuṃ ‘‘ajjhattikassā’’tiādimāha. Tattha ajjhattikassāti ajjhattikakhandhapañcakaṃ. Upayogatthe hi idaṃ sāmivacanaṃ. Upādāyāti gahetvā. Asmīti hotīti yadetaṃ ajjhattikaṃ khandhapañcakaṃ upādāya taṇhāmānadiṭṭhivasena samudāyaggāhato asmīti gāho hoti, tasmiṃ satīti attho. Idha pana rūpādiārammaṇavasena attho veditabbo. Itthamasmīti hotīti khattiyādīsu ‘‘idaṃpakāro aha’’nti evaṃ taṇhāmānadiṭṭhivasena hotīti attho. Idaṃ tāva anupanidhāya gahaṇaṃ.
звамаад̣̇ийнийд̇и аад̣̇и-сад̣̇д̣̇зна ‘‘звамасми, ан̃н̃ат̇аасми, ахам̣ бхависсам̣, ид̇т̇ам̣ бхависсам̣, звам̣ бхависсам̣, ан̃н̃ат̇аа бхависсам̣, асасми, сад̇асми, ахам̣ сияам̣, ид̇т̇ам̣ сияам̣, звам̣ сияам̣, ан̃н̃ат̇аа сияам̣, абаахам̣ сияам̣, абаахам̣ ид̇т̇ам̣ сияам̣, абаахам̣ звам̣ сияам̣, абаахам̣ ан̃н̃ат̇аа сияа’’нд̇и зд̇зсам̣ сан̇г̇ахо. убанид̇хааяа г̇ахан̣амби д̣̇увид̇хам̣ самад̇о асамад̇о ваад̇и д̇ам̣ д̣̇ассзд̇ум̣ ‘‘звамасми, ан̃н̃ат̇аасмий’’д̇и жа вуд̇д̇ам̣. д̇ад̇т̇а звамасмийд̇и ид̣̇ам̣ самад̇о убанид̇хааяа г̇ахан̣ам̣, яат̇аа аяам̣ кад̇д̇ияо, звам̣ ахамасмийд̇и ад̇т̇о. ан̃н̃ат̇аасмийд̇и ид̣̇ам̣ бана асамад̇о г̇ахан̣ам̣, яат̇ааяам̣ кад̇д̇ияо д̇ад̇о ан̃н̃ат̇аа ахам̣ хийно ваа ад̇хиго ваад̇и ад̇т̇о. имаани д̇аава бажжуббаннавасзна жад̇д̇аари д̇ан̣хаавижарид̇аани. бхависсанд̇иаад̣̇ийни бана жад̇д̇аари анааг̇ад̇авасзна вуд̇д̇аани, д̇зсам̣ буримажад̇уггз вуд̇д̇анаязнзва ад̇т̇о взд̣̇ид̇аб̣б̣о. асасмийд̇и сассад̇о асми, нижжассзд̇ам̣ ад̇хиважанам̣. сад̇асмийд̇и асассад̇о асми, анижжассзд̇ам̣ ад̇хиважанам̣. ид̇и имаани д̣̇вз сассад̇ужчзд̣̇авасзна вуд̇д̇аани. ид̇о бараани сияанд̇иаад̣̇ийни жад̇д̇аари сам̣саяабаривид̇аггавасзна вуд̇д̇аани, д̇аани буримажад̇уггз вуд̇д̇анаязна ад̇т̇ад̇о взд̣̇ид̇аб̣б̣аани. абаахам̣ сияанд̇иаад̣̇ийни бана жад̇д̇аари ‘‘аби наамаахам̣ бхавзяяа’’нд̇и звам̣ бад̇т̇анаагаббанавасзна вуд̇д̇аани, д̇ааниби буримажад̇уггз вуд̇д̇анаязнзва взд̣̇ид̇аб̣б̣аани. звамзд̇зсу –
Evamādīnīti ādi-saddena ‘‘evamasmi, aññathāsmi, ahaṃ bhavissaṃ, itthaṃ bhavissaṃ, evaṃ bhavissaṃ, aññathā bhavissaṃ, asasmi, satasmi, ahaṃ siyaṃ, itthaṃ siyaṃ, evaṃ siyaṃ, aññathā siyaṃ, apāhaṃ siyaṃ, apāhaṃ itthaṃ siyaṃ, apāhaṃ evaṃ siyaṃ, apāhaṃ aññathā siya’’nti etesaṃ saṅgaho. Upanidhāya gahaṇampi duvidhaṃ samato asamato vāti taṃ dassetuṃ ‘‘evamasmi, aññathāsmī’’ti ca vuttaṃ. Tattha evamasmīti idaṃ samato upanidhāya gahaṇaṃ, yathā ayaṃ khattiyo, evaṃ ahamasmīti attho. Aññathāsmīti idaṃ pana asamato gahaṇaṃ, yathāyaṃ khattiyo tato aññathā ahaṃ hīno vā adhiko vāti attho. Imāni tāva paccuppannavasena cattāri taṇhāvicaritāni. Bhavissantiādīni pana cattāri anāgatavasena vuttāni, tesaṃ purimacatukke vuttanayeneva attho veditabbo. Asasmīti sassato asmi, niccassetaṃ adhivacanaṃ. Satasmīti asassato asmi, aniccassetaṃ adhivacanaṃ. Iti imāni dve sassatucchedavasena vuttāni. Ito parāni siyantiādīni cattāri saṃsayaparivitakkavasena vuttāni, tāni purimacatukke vuttanayena atthato veditabbāni. Apāhaṃ siyantiādīni pana cattāri ‘‘api nāmāhaṃ bhaveyya’’nti evaṃ patthanākappanavasena vuttāni, tānipi purimacatukke vuttanayeneva veditabbāni. Evametesu –
д̣̇вз д̣̇идтисийсаа жад̇д̇ааро, суд̣̇д̇хасийсаа сийсамуулагаа;
Dve diṭṭhisīsā cattāro, suddhasīsā sīsamūlakā;
д̇аяо д̇аяод̇и зд̇аани, адтаараса вибхааваяз.
Tayo tayoti etāni, aṭṭhārasa vibhāvaye.
зд̇з хи сассад̇ужчзд̣̇авасзна вуд̇д̇аа д̣̇вз д̣̇идтисийсаа наама, ‘‘асми, бхависсам̣ сияам̣, абаахам̣ сияа’’нд̇и зд̇з жад̇д̇ааро суд̣̇д̇хасийсаа наама, ‘‘ид̇т̇амасмий’’д̇иаад̣̇аяо д̇аяо д̇аяод̇и д̣̇ваад̣̇аса сийсамуулагаа наамаад̇и взд̣̇ид̇аб̣б̣ам̣. ид̇ха баал̣ияам̣ руубаарамман̣аад̣̇ивасзна д̇ан̣хаа ааг̇ад̇аад̇и ааха ‘‘аж̇жхад̇д̇игаруубаад̣̇иниссид̇ааний’’д̇и. адтаараса д̇ан̣хаавижарид̇аанийд̇и аанзд̇ваа самб̣анд̇хо. иминаа асмийд̇и иминаа абхисзгасзнаабажжаад̣̇инаа ‘‘кад̇д̇ияо аха’’нд̇и муулабхаавад̇о ‘‘асмий’’д̇и ход̇и. сзсам̣ буб̣б̣з вуд̇д̇анаязнзва взд̣̇ид̇аб̣б̣ам̣. сан̇г̇ахзд̇и д̇ан̣хааяа яат̇аавуд̇д̇авибхааг̇асса сам̣кибанавасзна сан̇г̇ан̣ханз гарияамаанз. ‘‘чаяимз, бхигкавз, д̇ан̣хаагааяаа’’д̇иаад̣̇и нид̣̇д̣̇зсо. ‘‘руубз д̇ан̣хаа руубад̇ан̣хаа’’д̇иаад̣̇и нид̣̇д̣̇зсад̇т̇о. ‘‘гаамарааг̇абхаавзнаа’’д̇иаад̣̇иго, ‘‘аж̇жхад̇д̇игассубаад̣̇ааяаа’’д̇иаад̣̇иго жа нид̣̇д̣̇зсавид̇т̇ааро. ‘‘руубаад̣̇ийсу аарамман̣зсу чал̣зваа’’д̇иаад̣̇иго сан̇г̇ахо.
Ete hi sassatucchedavasena vuttā dve diṭṭhisīsā nāma, ‘‘asmi, bhavissaṃ siyaṃ, apāhaṃ siya’’nti ete cattāro suddhasīsā nāma, ‘‘itthamasmī’’tiādayo tayo tayoti dvādasa sīsamūlakā nāmāti veditabbaṃ. Idha pāḷiyaṃ rūpārammaṇādivasena taṇhā āgatāti āha ‘‘ajjhattikarūpādinissitānī’’ti. Aṭṭhārasa taṇhāvicaritānīti ānetvā sambandho. Iminā asmīti iminā abhisekasenāpaccādinā ‘‘khattiyo aha’’nti mūlabhāvato ‘‘asmī’’ti hoti. Sesaṃ pubbe vuttanayeneva veditabbaṃ. Saṅgaheti taṇhāya yathāvuttavibhāgassa saṃkhipanavasena saṅgaṇhane kariyamāne. ‘‘Chayime, bhikkhave, taṇhākāyā’’tiādi niddeso. ‘‘Rūpe taṇhā rūpataṇhā’’tiādi niddesattho. ‘‘Kāmarāgabhāvenā’’tiādiko, ‘‘ajjhattikassupādāyā’’tiādiko ca niddesavitthāro. ‘‘Rūpādīsu ārammaṇesu chaḷevā’’tiādiko saṅgaho.
яасмаа жагкуд̣̇ваараад̣̇ийсу згзгасмим̣ д̣̇ваарз уббаж̇ж̇анагавин̃н̃аан̣аани вияа анзгаа зва взд̣̇анаа, д̇асмаа д̇аа раасивасзна згаж̇жхам̣ г̇ахзд̇ваа ‘‘ча взд̣̇анаагааяаа’’д̇и вуд̇д̇анд̇и ааха ‘‘взд̣̇анаасамуухаа’’д̇и. ниссаяабхаавзна уббад̇д̇ид̣̇ваарабхаавзна наанаабажжаяаа хонд̇и жагкуд̇хаад̇уаад̣̇аяо, д̇аа гужчинаа д̇хаарзнд̇ияо вияа босзнд̇ияо вияа жа хонд̇ийд̇и д̇аасам̣ маад̇усад̣̇исад̇аа вуд̇д̇аа. жагкусампассахзд̇ууд̇и ниссаяаад̣̇ижагкусампассабажжаяаа. аяанд̇и аяам̣ взд̣̇анаа ‘‘жагкусампассаж̇аа взд̣̇анаа’’д̇иаад̣̇инаа саад̇хааран̣ад̇о вуд̇д̇аа. зд̇т̇аад̇и зд̇асмим̣ взд̣̇анаабад̣̇з. саб̣б̣асан̇г̇аахигаад̇и гусалаагусалавибаагагирияаанам̣ васзна саб̣б̣асан̇г̇аахигаа. звам̣ вибхан̇г̇з ааг̇ад̇анаязна саад̇хааран̣ад̇о вад̇вааби ид̇хаад̇хиббзд̇авзд̣̇анамзва д̣̇ассзд̇ум̣ ‘‘вибаагавасзна банаа’’д̇иаад̣̇имааха. жагкумхи сампассод̇и жагкумхи ниссаяабхууд̇з уббаннапассо. зса наяо сзсзсу. яасмаа жагкаад̣̇ийни висуд̣̇д̇химаг̇г̇з канд̇ханид̣̇д̣̇зсз лагкан̣аад̣̇ивибхааг̇ад̇о, ааяад̇ананид̣̇д̣̇зсз висзсад̇о, сааман̃н̃ад̇о жа сад̣̇д̣̇ад̇т̇ад̣̇ассанаад̣̇ивасзна вибхаавид̇аани, д̇асмаа ‘‘яам̣ вад̇д̇аб̣б̣ам̣…бз… вуд̇д̇амзваа’’д̇и ааха.
Yasmā cakkhudvārādīsu ekekasmiṃ dvāre uppajjanakaviññāṇāni viya anekā eva vedanā, tasmā tā rāsivasena ekajjhaṃ gahetvā ‘‘cha vedanākāyā’’ti vuttanti āha ‘‘vedanāsamūhā’’ti. Nissayabhāvena uppattidvārabhāvena nānāpaccayā honti cakkhudhātuādayo, tā kucchinā dhārentiyo viya posentiyo viya ca hontīti tāsaṃ mātusadisatā vuttā. Cakkhusamphassahetūti nissayādicakkhusamphassapaccayā. Ayanti ayaṃ vedanā ‘‘cakkhusamphassajā vedanā’’tiādinā sādhāraṇato vuttā. Etthāti etasmiṃ vedanāpade. Sabbasaṅgāhikāti kusalākusalavipākakiriyānaṃ vasena sabbasaṅgāhikā. Evaṃ vibhaṅge āgatanayena sādhāraṇato vatvāpi idhādhippetavedanameva dassetuṃ ‘‘vipākavasena panā’’tiādimāha. Cakkhumhi samphassoti cakkhumhi nissayabhūte uppannaphasso. Esa nayo sesesu. Yasmā cakkhādīni visuddhimagge khandhaniddese lakkhaṇādivibhāgato, āyatananiddese visesato, sāmaññato ca saddatthadassanādivasena vibhāvitāni, tasmā ‘‘yaṃ vattabbaṃ…pe… vuttamevā’’ti āha.
наманалагкан̣анд̇и аарамман̣аабхимукам̣ худ̇ваа наманасабхаавам̣ д̇зна винаа аббавад̇д̇анад̇о. руббаналагкан̣ам̣ хздтаа вуд̇д̇амзва. взд̣̇анаагканд̇хо бана згаава взд̣̇анаа. саб̣б̣ад̣̇уб̣б̣алажид̇д̇аани наама бан̃жавин̃н̃аан̣аани . нану д̇ад̇т̇а ж̇ийвид̇ажид̇д̇адтид̇ияо жа санд̇ийд̇и? сажжам̣, д̇аасам̣ бана гижжам̣ на д̇ат̇аа баагадам̣, яат̇аа жзд̇анаад̣̇ийнанд̇и д̇з звзд̇т̇а баал̣ияам̣ уд̣̇д̇хадаа. язна маханд̇абаад̇убхааваад̣̇инаа гааран̣зна. зд̇т̇аад̇и зд̇асмим̣ махаабхууд̇анид̣̇д̣̇зсз. ан̃н̃о винижчаяанаяод̇и ‘‘важанад̇т̇ад̇о галаабад̇о’’д̇иаад̣̇инаа лагкан̣аад̣̇инижчаяад̇о ан̃н̃о винижчаяанаяо. нану со жад̇уд̇хаад̇увавад̇т̇аанз вуд̇д̇о, на руубагканд̇ханид̣̇д̣̇зсзд̇и? д̇ад̇т̇а вуд̇д̇зби ‘‘жад̇уд̇хаад̇увавад̇т̇аанз вуд̇д̇ааний’’д̇и ад̇ид̣̇зсавасзна вуд̇д̇ад̇д̇аа ‘‘руубагканд̇ханид̣̇д̣̇зсз вуд̇д̇о’’д̇и вуд̇д̇ам̣. убаад̣̇ааяаад̇и бадижжа. бхууд̇аани хи бадижжа уббаж̇ж̇амаанам̣ убаад̣̇ааруубам̣ ‘‘д̇аани г̇ахзд̇ваа’’д̇и вуд̇д̇ам̣ ависсаж̇ж̇анад̇о. ниссааяаад̇иби згз д̇зсам̣ ниссаяабажжаяабхаавад̇о. буб̣б̣агаалагирияаа наама згам̣сад̇о абарагаалагирияаабзгкаад̇и баатасзсзна ад̇т̇ам̣ вад̣̇ад̇и. вибхад̇д̇ивибаллаасзна винаа зва ад̇т̇ам̣ д̣̇ассзд̇ум̣ ‘‘самуухад̇т̇з ваа’’д̇иаад̣̇и вуд̇д̇ам̣. самуухасамб̣анд̇хз сааминид̣̇д̣̇зсзна самуухад̇т̇о д̣̇ийбид̇од̇и д̇ам̣ д̣̇ассзнд̇о ааха ‘‘самуухам̣ убаад̣̇ааяаа’’д̇и. д̇хаммасан̇г̇ан̣ияам̣ (д̇ха. са. 584) ааг̇ад̇анаязна ‘‘д̇звийсад̇ивид̇ха’’нд̇и вуд̇д̇ам̣. д̇ад̇т̇а хи хад̣̇аяавад̇т̇у на нид̣̇д̣̇идтам̣, ‘‘яам̣ руубам̣ ниссааяаа’’д̇и ваа бадтаанз (бадтаана. 1.1.8) ааг̇ад̇ад̇д̇аа хад̣̇аяавад̇т̇умби г̇ахзд̇ваа ж̇аад̇ируубабхаавзна убажаяасанд̇ад̇ияо згад̇о гад̇ваа ‘‘д̇звийсад̇ивид̇ха’’нд̇и вуд̇д̇ам̣.
Namanalakkhaṇanti ārammaṇābhimukhaṃ hutvā namanasabhāvaṃ tena vinā appavattanato. Ruppanalakkhaṇaṃ heṭṭhā vuttameva. Vedanākkhandho pana ekāva vedanā. Sabbadubbalacittāni nāma pañcaviññāṇāni . Nanu tattha jīvitacittaṭṭhitiyo ca santīti? Saccaṃ, tāsaṃ pana kiccaṃ na tathā pākaṭaṃ, yathā cetanādīnanti te evettha pāḷiyaṃ uddhaṭā. Yena mahantapātubhāvādinā kāraṇena. Etthāti etasmiṃ mahābhūtaniddese. Añño vinicchayanayoti ‘‘vacanatthato kalāpato’’tiādinā lakkhaṇādinicchayato añño vinicchayanayo. Nanu so catudhātuvavatthāne vutto, na rūpakkhandhaniddeseti? Tattha vuttepi ‘‘catudhātuvavatthāne vuttānī’’ti atidesavasena vuttattā ‘‘rūpakkhandhaniddese vutto’’ti vuttaṃ. Upādāyāti paṭicca. Bhūtāni hi paṭicca uppajjamānaṃ upādārūpaṃ ‘‘tāni gahetvā’’ti vuttaṃ avissajjanato. Nissāyātipi eke tesaṃ nissayapaccayabhāvato. Pubbakālakiriyā nāma ekaṃsato aparakālakiriyāpekkhāti pāṭhasesena atthaṃ vadati. Vibhattivipallāsena vinā eva atthaṃ dassetuṃ ‘‘samūhatthe vā’’tiādi vuttaṃ. Samūhasambandhe sāminiddesena samūhattho dīpitoti taṃ dassento āha ‘‘samūhaṃ upādāyā’’ti. Dhammasaṅgaṇiyaṃ (dha. sa. 584) āgatanayena ‘‘tevīsatividha’’nti vuttaṃ. Tattha hi hadayavatthu na niddiṭṭhaṃ, ‘‘yaṃ rūpaṃ nissāyā’’ti vā paṭṭhāne (paṭṭhāna. 1.1.8) āgatattā hadayavatthumpi gahetvā jātirūpabhāvena upacayasantatiyo ekato katvā ‘‘tevīsatividha’’nti vuttaṃ.
жагкусса вин̃н̃аан̣анд̇и ваа жагкувин̃н̃аан̣ам̣. асаад̇хааран̣агааран̣зна жааяам̣ нид̣̇д̣̇зсо. ‘‘сан̇каарабажжаяаа вин̃н̃аан̣а’’нд̇и зд̇т̇а саб̣б̣алогияавибаагавин̃н̃аан̣асса г̇ахзд̇аб̣б̣ад̇д̇аа ‘‘д̇збхуумагавибаагажид̇д̇ассзд̇ам̣ ад̇хиважана’’нд̇и вуд̇д̇ам̣.
Cakkhussa viññāṇanti vā cakkhuviññāṇaṃ. Asādhāraṇakāraṇena cāyaṃ niddeso. ‘‘Saṅkhārapaccayā viññāṇa’’nti ettha sabbalokiyavipākaviññāṇassa gahetabbattā ‘‘tebhūmakavipākacittassetaṃ adhivacana’’nti vuttaṃ.
абхисан̇каран̣алагкан̣од̇и ааяууханасабхааво. жобанавасзнаад̇и вин̃н̃ад̇д̇исам̣жобанавасзна, гааяавин̃н̃ад̇д̇ияаа самудтаабанавасзнаад̇и ад̇т̇о. важанабхзд̣̇авасзнаад̇и важийбхзд̣̇уббаад̣̇авасзна, важийвин̃н̃ад̇д̇ияаа самудтаабанавасзнаад̇и ад̇т̇о. звам̣ жобанам̣ на бхавзяяаад̇и д̣̇ассзд̇ум̣ ‘‘рахо нисийд̣̇ид̇ваа жинд̇знд̇ассаа’’д̇и вуд̇д̇ам̣. згуунад̇им̣саад̇и зд̇т̇а абхин̃н̃аажзд̇анаавинимуд̇д̇аа зва згуунад̇им̣са жзд̇анаа взд̣̇ид̇аб̣б̣аа д̇ассаа вибаагавин̃н̃аан̣асса бажжаяад̇д̇аабхаавад̇о.
Abhisaṅkharaṇalakkhaṇoti āyūhanasabhāvo. Copanavasenāti viññattisaṃcopanavasena, kāyaviññattiyā samuṭṭhāpanavasenāti attho. Vacanabhedavasenāti vacībheduppādavasena, vacīviññattiyā samuṭṭhāpanavasenāti attho. Evaṃ copanaṃ na bhaveyyāti dassetuṃ ‘‘raho nisīditvā cintentassā’’ti vuttaṃ. Ekūnatiṃsāti ettha abhiññācetanāvinimuttā eva ekūnatiṃsa cetanā veditabbā tassā vipākaviññāṇassa paccayattābhāvato.
д̣̇угкзд̇и згамби ид̣̇ам̣ бхуммаважанам̣ сам̣силзсананиссаяависаяаб̣яаабанавасзна ад̇д̇аанам̣ бхинд̣̇ид̇ваа винияог̇ам̣ г̇ажчад̇ийд̇и ‘‘жад̇уухи гааран̣зхий’’д̇иаад̣̇и вуд̇д̇ам̣. згоби хи вибхад̇д̇инид̣̇д̣̇зсо анзгад̇хаа винияог̇ам̣ г̇ажчад̇и яат̇аа д̇ад̣̇д̇хид̇ад̇т̇з уд̇д̇арабад̣̇асамаахаарзд̇и. д̇анд̇и ан̃н̃аан̣ам̣. д̣̇угкасажжанд̇и хад̣̇аяавад̇т̇улагкан̣ам̣ д̣̇угкасажжам̣. ассаад̇и ан̃н̃аан̣асса. ниссаяабажжаяабхаавзнаад̇и бурзж̇аад̇аниссаяабхаавзна. сахаж̇аад̇аниссаяабажжаяабхаавзна бана д̇ам̣сахаж̇аад̇аа пассаад̣̇аяо вад̇д̇аб̣б̣аа. аарамман̣абажжаяабхаавзна д̣̇угкасажжам̣ асса аарамман̣анд̇и яож̇анаа. д̣̇угкасажжанд̇и убаяог̇азгаважанам̣ . зд̇анд̇и ан̃н̃аан̣ам̣. д̇ассаад̇и д̣̇угкасажжасса. ‘‘бадижчаад̣̇зд̇ий’’д̇и зд̇т̇а вуд̇д̇ам̣ бадижчаад̣̇анаагаарам̣ д̣̇ассзд̇ум̣ ‘‘яаат̇ааваа’’д̇иаад̣̇и вуд̇д̇ам̣. н̃аан̣авиббаяуд̇д̇ажид̇д̇знаби згад̣̇зсзна яаат̇аавад̇о лагкан̣абадивзд̇хо ход̇иязваад̇и ‘‘яаат̇аавалагкан̣абадивзд̇ханивааран̣знаа’’д̇и вад̇ваа ‘‘н̃аан̣абавад̇д̇ияаа жзд̇т̇а аббад̣̇аанзнаа’’д̇и вуд̇д̇анд̇и вад̣̇анд̇и. буримам̣ бана бадивзд̇хан̃аан̣уббад̇д̇ияаа нисзд̇хагат̇аад̣̇ассанам̣, бажчимам̣ ануб̣од̇хан̃аан̣уббад̇д̇ияаа. звамзд̇т̇а ад̇т̇о взд̣̇ид̇аб̣б̣о. зд̇т̇аад̇и д̣̇угкасажжз.
Dukkheti ekampi idaṃ bhummavacanaṃ saṃsilesananissayavisayabyāpanavasena attānaṃ bhinditvā viniyogaṃ gacchatīti ‘‘catūhi kāraṇehī’’tiādi vuttaṃ. Ekopi hi vibhattiniddeso anekadhā viniyogaṃ gacchati yathā taddhitatthe uttarapadasamāhāreti. Tanti aññāṇaṃ. Dukkhasaccanti hadayavatthulakkhaṇaṃ dukkhasaccaṃ. Assāti aññāṇassa. Nissayapaccayabhāvenāti purejātanissayabhāvena. Sahajātanissayapaccayabhāvena pana taṃsahajātā phassādayo vattabbā. Ārammaṇapaccayabhāvena dukkhasaccaṃ assa ārammaṇanti yojanā. Dukkhasaccanti upayogaekavacanaṃ . Etanti aññāṇaṃ. Tassāti dukkhasaccassa. ‘‘Paṭicchādetī’’ti ettha vuttaṃ paṭicchādanākāraṃ dassetuṃ ‘‘yāthāvā’’tiādi vuttaṃ. Ñāṇavippayuttacittenapi ekadesena yāthāvato lakkhaṇapaṭivedho hotiyevāti ‘‘yāthāvalakkhaṇapaṭivedhanivāraṇenā’’ti vatvā ‘‘ñāṇapavattiyā cettha appadānenā’’ti vuttanti vadanti. Purimaṃ pana paṭivedhañāṇuppattiyā nisedhakathādassanaṃ, pacchimaṃ anubodhañāṇuppattiyā. Evamettha attho veditabbo. Etthāti dukkhasacce.
сахаж̇аад̇асса ан̃н̃аан̣асса самуд̣̇аяасажжам̣ вад̇т̇у ход̇и ниссаяабажжаяабхаавад̇од̇и вуд̇д̇ам̣ ‘‘вад̇т̇уд̇о’’д̇и. аарамман̣ад̇од̇и аарамман̣абажжаяабхаавзна. яасмаа самуд̣̇аяасажжам̣ ан̃н̃аан̣асса аарамман̣ам̣ ход̇и, д̇асмаа ‘‘д̣̇угкасамуд̣̇аяз ан̃н̃аан̣а’’нд̇и вуд̇д̇анд̇и ад̇т̇о. бадижчаад̣̇анам̣ д̣̇угкасажжз вуд̇д̇анаяамзва згзнзва гааран̣зна ид̇арзсам̣ д̇ин̣н̣ам̣ асамбхавад̇о, гим̣ бана зд̇ам̣ згам̣ гааран̣анд̇и ааха ‘‘бадижчаад̣̇анад̇о’’д̇и. ид̣̇ам̣ вид̇т̇аарад̇о вибхаавзд̇ум̣ ‘‘нирод̇хабадибад̣̇аанам̣ хий’’д̇иаад̣̇и вуд̇д̇ам̣. д̇ад̣̇аараб̣бхаад̇и д̇ам̣ аараб̣бха д̇ам̣ аарамман̣ам̣ гад̇ваа. бажчиман̃хи сажжад̣̇ваяанд̇и нирод̇хо маг̇г̇о. д̇ан̃хи наяаг̇амбхийрад̇д̇аа. д̣̇уд̣̇д̣̇асанд̇и сан̣хасукумад̇хаммад̇д̇аа сабхаавзнзва г̇амбхийрад̇ааяа д̣̇уд̣̇д̣̇асам̣ д̣̇увин̃н̃зяяам̣ д̣̇ураваг̇г̇аахам̣. д̇ад̇т̇аад̇и буримз сажжад̣̇ваяз. анд̇хабхууд̇анд̇и анд̇хагаарабхууд̇ам̣. на бавад̇д̇ад̇и аарамман̣ам̣ гаад̇ум̣ на висахад̇и. важанийяад̇д̇знаад̇и ваажагабхаавзна д̇ат̇аа убадтаанад̇о. сабхаавалагкан̣асса д̣̇уд̣̇д̣̇асад̇д̇аад̇и бийл̣анаад̣̇иааяууханаад̣̇ивасзна ‘‘ид̣̇ам̣ д̣̇угкам̣, аяам̣ самуд̣̇аяо’’д̇и (ма. ни. 484; 3.104) яаат̇аавад̇о сабхаавалагкан̣асса д̣̇уд̣̇д̣̇асад̇д̇аа д̣̇увин̃н̃зяяад̇д̇аа буримад̣̇ваяам̣ г̇амбхийрам̣. д̇ад̇т̇аад̇и буримасмим̣ сажжад̣̇ваяз. вибаллаасаг̇г̇аахавасзна бавад̇д̇ад̇ийд̇и субхаад̣̇ивибарийд̇аг̇г̇аахаанам̣ бажжаяабхаававасзна ан̃н̃аан̣ам̣ бавад̇д̇ад̇и.
Sahajātassa aññāṇassa samudayasaccaṃ vatthu hoti nissayapaccayabhāvatoti vuttaṃ ‘‘vatthuto’’ti. Ārammaṇatoti ārammaṇapaccayabhāvena. Yasmā samudayasaccaṃ aññāṇassa ārammaṇaṃ hoti, tasmā ‘‘dukkhasamudaye aññāṇa’’nti vuttanti attho. Paṭicchādanaṃ dukkhasacce vuttanayameva ekeneva kāraṇena itaresaṃ tiṇṇaṃ asambhavato, kiṃ pana etaṃ ekaṃ kāraṇanti āha ‘‘paṭicchādanato’’ti. Idaṃ vitthārato vibhāvetuṃ ‘‘nirodhapaṭipadānaṃ hī’’tiādi vuttaṃ. Tadārabbhāti taṃ ārabbha taṃ ārammaṇaṃ katvā. Pacchimañhi saccadvayanti nirodho maggo. Tañhi nayagambhīrattā. Duddasanti saṇhasukhumadhammattā sabhāveneva gambhīratāya duddasaṃ duviññeyyaṃ duravaggāhaṃ. Tatthāti purime saccadvaye. Andhabhūtanti andhakārabhūtaṃ. Na pavattati ārammaṇaṃ kātuṃ na visahati. Vacanīyattenāti vācakabhāvena tathā upaṭṭhānato. Sabhāvalakkhaṇassa duddasattāti pīḷanādiāyūhanādivasena ‘‘idaṃ dukkhaṃ, ayaṃ samudayo’’ti (ma. ni. 484; 3.104) yāthāvato sabhāvalakkhaṇassa duddasattā duviññeyyattā purimadvayaṃ gambhīraṃ. Tatthāti purimasmiṃ saccadvaye. Vipallāsaggāhavasena pavattatīti subhādiviparītaggāhānaṃ paccayabhāvavasena aññāṇaṃ pavattati.
ид̣̇аани ‘‘д̣̇угкз ан̃н̃аан̣а’’нд̇иаад̣̇ийсу багааранд̇арзнаби ад̇т̇ам̣ д̣̇ассзд̇ум̣ ‘‘абижаа’’д̇иаад̣̇и вуд̇д̇ам̣. д̇ад̇т̇а д̣̇угкзд̇и зд̇д̇аавад̇аад̇и ‘‘ан̃н̃аан̣анд̇и вужжамаанааяа авиж̇ж̇ааяа д̣̇угкз’’д̇и зд̇д̇агзна. сан̇г̇ахад̇од̇и самод̇хаанад̇о. гижжад̇од̇и асамбадивзд̇хагижжад̇о. ан̃н̃аан̣амиваад̇и висаяасабхаавам̣ яаат̇аавад̇о бадивиж̇жхид̇ум̣ аббад̣̇аанагижжамива. ‘‘д̣̇угкз’’д̇иаад̣̇инаа д̇ад̇т̇а авиж̇ж̇аа бавад̇д̇ад̇и, висзсад̇о нид̣̇д̣̇идтам̣ ход̇ийд̇и гад̇ваа саб̣б̣ад̇т̇зва д̇ат̇аа ависидтасабхаавад̣̇ассанам̣ ид̣̇анд̇и д̣̇ассзд̇ум̣ ‘‘ависзсад̇о банаа’’д̇иаад̣̇и вуд̇д̇ам̣.
Idāni ‘‘dukkhe aññāṇa’’ntiādīsu pakārantarenapi atthaṃ dassetuṃ ‘‘apicā’’tiādi vuttaṃ. Tattha dukkheti ettāvatāti ‘‘aññāṇanti vuccamānāya avijjāya dukkhe’’ti ettakena. Saṅgahatoti samodhānato. Kiccatoti asampaṭivedhakiccato. Aññāṇamivāti visayasabhāvaṃ yāthāvato paṭivijjhituṃ appadānakiccamiva. ‘‘Dukkhe’’tiādinā tattha avijjā pavattati, visesato niddiṭṭhaṃ hotīti katvā sabbattheva tathā avisiṭṭhasabhāvadassanaṃ idanti dassetuṃ ‘‘avisesato panā’’tiādi vuttaṃ.
кан̣иганирод̇хасса ид̇ха анад̇хиббзд̇ад̇д̇аа аяуж̇ж̇амаанад̇д̇аа вирааг̇аг̇г̇ахан̣ад̇о жа авиж̇ж̇аад̣̇ийнам̣ бадибагкавасзна бадиб̣ааханам̣ ид̇ха ‘‘нирод̇хо’’д̇и ад̇хиббзд̇о, со жа нзсам̣ саб̣б̣асо ануббаж̇ж̇анамзваад̇и ааха ‘‘нирод̇хо ход̇ийд̇и ануббаад̣̇о ход̇ий’’д̇и. ‘‘авиж̇ж̇аа нируж̇жхад̇и зд̇т̇аад̇и авиж̇ж̇аанирод̇хо, сан̇каараа нируж̇жханд̇и зд̇т̇аад̇и сан̇кааранирод̇хо’’д̇и звам̣ саб̣б̣зхи зд̇зхи нирод̇хабад̣̇зхи ниб̣б̣аанасса д̣̇зсид̇ад̇д̇аа д̣̇адтаб̣б̣аа. д̇знааха ‘‘ниб̣б̣аанам̣ хий’’д̇иаад̣̇и. ваддавивадданд̇и ваддан̃жа виваддан̃жа. ‘‘д̣̇ваад̣̇асахий’’д̇и ид̣̇ам̣ бажжзгам̣ яож̇зд̇аб̣б̣ам̣ ‘‘ануломад̇о д̣̇ваад̣̇асахи бад̣̇зхи ваддам̣, бадиломад̇о д̣̇ваад̣̇асахи виваддам̣ ид̇ха д̣̇ассид̇а’’нд̇и.
Khaṇikanirodhassa idha anadhippetattā ayujjamānattā virāgaggahaṇato ca avijjādīnaṃ paṭipakkhavasena paṭibāhanaṃ idha ‘‘nirodho’’ti adhippeto, so ca nesaṃ sabbaso anuppajjanamevāti āha ‘‘nirodho hotīti anuppādo hotī’’ti. ‘‘Avijjā nirujjhati etthāti avijjānirodho, saṅkhārā nirujjhanti etthāti saṅkhāranirodho’’ti evaṃ sabbehi etehi nirodhapadehi nibbānassa desitattā daṭṭhabbā. Tenāha ‘‘nibbānaṃ hī’’tiādi. Vaṭṭavivaṭṭanti vaṭṭañca vivaṭṭañca. ‘‘Dvādasahī’’ti idaṃ paccekaṃ yojetabbaṃ ‘‘anulomato dvādasahi padehi vaṭṭaṃ, paṭilomato dvādasahi vivaṭṭaṃ idha dassita’’nti.
вибхан̇г̇асуд̇д̇аван̣н̣анаа нидтид̇аа.
Vibhaṅgasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 2. вибхан̇г̇асуд̇д̇ам̣ • 2. Vibhaṅgasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) / 2. вибхан̇г̇асуд̇д̇аван̣н̣анаа • 2. Vibhaṅgasuttavaṇṇanā
