| Library / Tipiṭaka / д̇ибидага • Tipiṭaka / сам̣яуд̇д̇анигааяа (дийгаа) • Saṃyuttanikāya (ṭīkā) |
8. вибхан̇г̇асуд̇д̇аван̣н̣анаа
8. Vibhaṅgasuttavaṇṇanā
8. згзна барияааязна адтан̇г̇игамаг̇г̇ам̣ вибхаж̇ид̇ваад̇и ‘‘саммаад̣̇идтий’’д̇иаад̣̇инаа згзна барияааязна арияам̣ адтан̇г̇игам̣ маг̇г̇ам̣ вибхааг̇зна д̣̇ассзд̇ваа ‘‘гад̇амаа жа, бхигкавз, саммаад̣̇идтий’’д̇иаад̣̇инаа буна абарзна барияааязна вибхаж̇ид̇угаамо. уг̇г̇ахад̇хааран̣абарижаяан̃аан̣ааниби саванан̃аан̣з зва аварод̇хам̣ г̇ажчанд̇ийд̇и ‘‘саванасаммасанабадивзд̇хабажжавзгкан̣авасзнаа’’д̇и вуд̇д̇ам̣.
8.Ekena pariyāyena aṭṭhaṅgikamaggaṃ vibhajitvāti ‘‘sammādiṭṭhī’’tiādinā ekena pariyāyena ariyaṃ aṭṭhaṅgikaṃ maggaṃ vibhāgena dassetvā ‘‘katamā ca, bhikkhave, sammādiṭṭhī’’tiādinā puna aparena pariyāyena vibhajitukāmo. Uggahadhāraṇaparicayañāṇānipi savanañāṇe eva avarodhaṃ gacchantīti ‘‘savanasammasanapaṭivedhapaccavekkhaṇavasenā’’ti vuttaṃ.
гаммадтаанаабхинивзсод̇и гаммадтаанабадибад̇д̇и. буримаани д̣̇вз сажжаани уг̇г̇ан̣хид̇ваад̇и самб̣анд̇хо. идтам̣ ганд̇ам̣ манаабанд̇и нирод̇хамаг̇г̇зсу ниннабхаавам̣ д̣̇ассзд̇и, на абхинанд̣̇анам̣, д̇анниннабхааво зва жа д̇ад̇т̇а гаммагаран̣ам̣ д̣̇адтаб̣б̣ам̣. згзнзваагаарзна сажжаанам̣ бадивзд̇ханимид̇д̇ад̇аа, со зва абхимукабхааво д̇зсам̣ самааг̇амод̇и згаабхисамаяо.
Kammaṭṭhānābhinivesoti kammaṭṭhānapaṭipatti. Purimāni dve saccāni uggaṇhitvāti sambandho. Iṭṭhaṃ kantaṃ manāpanti nirodhamaggesu ninnabhāvaṃ dasseti, na abhinandanaṃ, tanninnabhāvo eva ca tattha kammakaraṇaṃ daṭṭhabbaṃ. Ekenevākārena saccānaṃ paṭivedhanimittatā, so eva abhimukhabhāvo tesaṃ samāgamoti ekābhisamayo.
ассаад̇и н̃аан̣асса, яог̇ино ваа. зд̇т̇а жа гзжи ‘‘логияан̃аан̣амби бадивзд̇хо саб̣б̣асса яаат̇ааваб̣од̇хабхаавад̇о’’д̇и вад̣̇анд̇и. нану уг̇г̇ахаад̣̇ибадивзд̇хо жа бадивзд̇хова, на жа со логуд̇д̇арод̇и? д̇ам̣ на, гзвалзна бадивзд̇ха-сад̣̇д̣̇зна уг̇г̇ахаад̣̇ибадивзд̇хаанам̣ аважанийяад̇д̇аа, бадивзд̇ханимид̇д̇ад̇д̇аа ваа уг̇г̇ахаад̣̇ивасзна бавад̇д̇ам̣ д̣̇угкаад̣̇ийсу буб̣б̣абхааг̇з н̃аан̣ам̣ ‘‘бадивзд̇хо’’д̇и вужжад̇и, на бадивзд̇хад̇д̇аа, бадивзд̇хабхууд̇амзва бана н̃аан̣ам̣ уж̇угам̣ бадивзд̇ход̇и вад̇д̇аб̣б̣ад̇ам̣ арахад̇и. гижжад̇од̇и барин̃н̃аад̣̇игижжад̇о. аарамман̣абадивзд̇ход̇и сажчигирияаабадивзд̇хамааха. гижжад̇од̇и асаммохабадивзд̇хам̣. уг̇г̇ахаад̣̇ийхи сажжасса бариг̇г̇ан̣ханам̣ бариг̇г̇ахо.
Assāti ñāṇassa, yogino vā. Ettha ca keci ‘‘lokiyañāṇampi paṭivedho sabbassa yāthāvabodhabhāvato’’ti vadanti. Nanu uggahādipaṭivedho ca paṭivedhova, na ca so lokuttaroti? Taṃ na, kevalena paṭivedha-saddena uggahādipaṭivedhānaṃ avacanīyattā, paṭivedhanimittattā vā uggahādivasena pavattaṃ dukkhādīsu pubbabhāge ñāṇaṃ ‘‘paṭivedho’’ti vuccati, na paṭivedhattā, paṭivedhabhūtameva pana ñāṇaṃ ujukaṃ paṭivedhoti vattabbataṃ arahati. Kiccatoti pariññādikiccato. Ārammaṇapaṭivedhoti sacchikiriyāpaṭivedhamāha. Kiccatoti asammohapaṭivedhaṃ. Uggahādīhi saccassa pariggaṇhanaṃ pariggaho.
д̣̇уд̣̇д̣̇асад̇д̇аад̇и анад̇хиг̇ад̇ан̃аан̣зна яаат̇аавасарасалагкан̣ад̇о д̣̇адтум̣ асаггун̣зяяад̇д̇аа уббад̇д̇ид̇о баагадааниби. д̇знааха ‘‘д̣̇угкасажжам̣ хий’’д̇иаад̣̇и. убхаяанд̇и буримам̣ сажжад̣̇ваяам̣. баяог̇од̇и гирияаа, вааяаамо ваа. д̇асса маханд̇ад̇арасса ижчид̇аб̣б̣ад̇ам̣ д̣̇уггарад̇арад̇ан̃жа убамаахи д̣̇ассзд̇и ‘‘бхаваг̇г̇аг̇г̇ахан̣ад̇т̇а’’нд̇иаад̣̇инаа. яат̇аа буримам̣ сажжад̣̇ваяам̣ вияа гзнажи барияааязна абаагадад̇ааяа барамаг̇амбхийрад̇д̇аа уг̇г̇ахаад̣̇ивасзна буб̣б̣абхааг̇з бавад̇д̇ибхзд̣̇ам̣ г̇ахзд̇ваа ‘‘д̣̇угкз н̃аан̣а’’нд̇иаад̣̇инаа жад̇уб̣б̣ид̇хам̣ гад̇ваа вуд̇д̇ам̣. згамзва д̇ам̣ н̃аан̣ам̣ ход̇и згаабхисамаяавасзнзва бавад̇д̇анад̇о.
Duddasattāti anadhigatañāṇena yāthāvasarasalakkhaṇato daṭṭhuṃ asakkuṇeyyattā uppattito pākaṭānipi. Tenāha ‘‘dukkhasaccaṃ hī’’tiādi. Ubhayanti purimaṃ saccadvayaṃ. Payogoti kiriyā, vāyāmo vā. Tassa mahantatarassa icchitabbataṃ dukkarataratañca upamāhi dasseti ‘‘bhavaggaggahaṇattha’’ntiādinā. Yathā purimaṃ saccadvayaṃ viya kenaci pariyāyena apākaṭatāya paramagambhīrattā uggahādivasena pubbabhāge pavattibhedaṃ gahetvā ‘‘dukkhe ñāṇa’’ntiādinā catubbidhaṃ katvā vuttaṃ. Ekameva taṃ ñāṇaṃ hoti ekābhisamayavaseneva pavattanato.
гаамабажжанийгадтзнаад̇и гаамаанам̣ уж̇убажжанийгабхаавзна. гаамад̇о ниссадабхаавзнаад̇и гаамзхи висам̣яуд̇д̇абхаавзна. гаамам̣ саммасанд̇ассаад̇и д̣̇увид̇хамби гаамам̣ анижжаад̣̇ид̇о саммасанд̇асса. баж̇ж̇ад̇и бавад̇д̇ад̇и зд̇знаад̇и бад̣̇ам̣, гаамасса бад̣̇анд̇и гаамабад̣̇ам̣, гаамасса уббад̇д̇игааран̣асса гхаад̇о самуг̇гхаад̇о, д̇ам̣ гаамабад̣̇агхаад̇ам̣. д̇знааха ‘‘гаамавуубасама’’нд̇и. гаамзхи вивид̇д̇ам̣ гаамавивид̇д̇ам̣. со зва жа нзсам̣ анд̇о самужчзд̣̇авивзгзд̇и гад̇ваа д̇асмим̣ саад̇хзд̇аб̣б̣з уббаннод̇и вуд̇д̇ам̣ ‘‘гаамавивид̇д̇анд̇з уббанно’’д̇и. гаамад̇о нигкамад̇ийд̇и нигкамо, со зва нзгкаммасан̇габбо. имасмин̃жа нзгкаммасан̇габбасса сад̣̇д̣̇ад̇т̇авибхаавзна яат̇аавуд̇д̇о гаамабажжанийгадтаад̣̇иго ад̇т̇анид̣̇д̇хааран̣ависзсо анд̇ог̇ад̇хо.
Kāmapaccanīkaṭṭhenāti kāmānaṃ ujupaccanīkabhāvena. Kāmato nissaṭabhāvenāti kāmehi visaṃyuttabhāvena. Kāmaṃ sammasantassāti duvidhampi kāmaṃ aniccādito sammasantassa. Pajjati pavattati etenāti padaṃ, kāmassa padanti kāmapadaṃ, kāmassa uppattikāraṇassa ghāto samugghāto, taṃ kāmapadaghātaṃ. Tenāha ‘‘kāmavūpasama’’nti. Kāmehi vivittaṃ kāmavivittaṃ. So eva ca nesaṃ anto samucchedaviveketi katvā tasmiṃ sādhetabbe uppannoti vuttaṃ ‘‘kāmavivittante uppanno’’ti. Kāmato nikkhamatīti nikkhamo, so eva nekkhammasaṅkappo. Imasmiñca nekkhammasaṅkappassa saddatthavibhāvena yathāvutto kāmapaccanīkaṭṭhādiko atthaniddhāraṇaviseso antogadho.
зсзва наяод̇и иминаа б̣яаабаад̣̇абажжанийгадтзна вихим̣сааяа бажжанийгадтзнаад̇иаад̣̇игам̣ аб̣яаабаад̣̇аавихим̣саасан̇габбаанам̣ ад̇т̇уд̣̇д̇хааран̣авид̇хим̣ ад̇ид̣̇исад̇и. нзгкаммасан̇габбаад̣̇аяод̇и аад̣̇и-сад̣̇д̣̇зна аб̣яаабаад̣̇аавихим̣саасан̇габбз зва сан̇г̇ан̣хаад̇и. гаама…бз… сан̃н̃аананд̇и гаамавид̇аггаад̣̇ивирад̇исамбаяуд̇д̇аанам̣ нзгкаммаад̣̇исан̃н̃аанам̣. наанад̇д̇аад̇и наанаакан̣игад̇д̇аа. д̇ийсу таанзсууд̇и д̇иббагаарзсу гааран̣зсу. уббаннассаад̇и уббаж̇ж̇анаарахасса. бхуумилад̣̇д̇хауббаннам̣ ид̇хаад̇хиббзд̇ам̣. зса наяо ид̇о барзсуби. бад̣̇ажчзд̣̇ад̇од̇и гааран̣убажчзд̣̇ад̇о. бад̣̇анд̇и хи уббад̇д̇игааран̣анд̇и вуд̇д̇овааяамад̇т̇о. ануббад̇д̇исаад̇ханавасзнаад̇и яат̇аа сан̇габбо ааяад̇им̣ нуббаж̇ж̇ад̇и, звам̣ ануббад̇д̇исаад̇ханавасзна. саммаад̣̇идти вияа згова гусаласан̇габбо уббаж̇ж̇ад̇и.
Eseva nayoti iminā byāpādapaccanīkaṭṭhena vihiṃsāya paccanīkaṭṭhenātiādikaṃ abyāpādāvihiṃsāsaṅkappānaṃ atthuddhāraṇavidhiṃ atidisati. Nekkhammasaṅkappādayoti ādi-saddena abyāpādaavihiṃsāsaṅkappe eva saṅgaṇhāti. Kāma…pe… saññānanti kāmavitakkādiviratisampayuttānaṃ nekkhammādisaññānaṃ. Nānattāti nānākhaṇikattā. Tīsu ṭhānesūti tippakāresu kāraṇesu. Uppannassāti uppajjanārahassa. Bhūmiladdhauppannaṃ idhādhippetaṃ. Esa nayo ito paresupi. Padacchedatoti kāraṇupacchedato. Padanti hi uppattikāraṇanti vuttovāyamattho. Anuppattisādhanavasenāti yathā saṅkappo āyatiṃ nuppajjati, evaṃ anuppattisādhanavasena. Sammādiṭṭhi viya ekova kusalasaṅkappo uppajjati.
жад̇уусу таанзсууд̇и висам̣ваад̣̇анаад̣̇ийсу жад̇уусу вийд̇иггамадтаанзсу. баб̣б̣аж̇ид̇аанам̣ мижчааж̇ийво наама аахааранимид̇д̇агод̇и ааха ‘‘каад̣̇анийяабхож̇анийяаад̣̇ийнам̣ ад̇т̇ааяаа’’д̇и. саб̣б̣асо анзсанааяа бахаанам̣ саммааааж̇ийвод̇и ааха ‘‘б̣уд̣̇д̇хаббасад̇т̇зна ааж̇ийвзнаа’’д̇и. гаммабат̇абад̇д̇аанам̣ васзна ‘‘сад̇д̇асу таанзсуу’’д̇и вуд̇д̇ам̣. агаммабат̇абад̇д̇ааяа хи анзсанааяа со бад̣̇агхаад̇ам̣ гарод̇иязва.
Catūsu ṭhānesūti visaṃvādanādīsu catūsu vītikkamaṭṭhānesu. Pabbajitānaṃ micchājīvo nāma āhāranimittakoti āha ‘‘khādanīyabhojanīyādīnaṃ atthāyā’’ti. Sabbaso anesanāya pahānaṃ sammāājīvoti āha ‘‘buddhappasatthena ājīvenā’’ti. Kammapathapattānaṃ vasena ‘‘sattasu ṭhānesū’’ti vuttaṃ. Akammapathapattāya hi anesanāya so padaghātaṃ karotiyeva.
д̇ат̇ааруубз ваа аарамман̣зд̇и яасмим̣ аарамман̣з имасса буб̣б̣з гилзсаа на уббаннаа, д̇асмим̣ зва. ануббаннаананд̇и ануббаад̣̇ассаби бад̇т̇анаавасзна ануббаннаанам̣. вийрияажчанд̣̇анд̇и вийрияасса ниб̣б̣ад̇д̇зд̇угаамад̇аачанд̣̇ам̣. ‘‘чанд̣̇асамбаяуд̇д̇авийрияан̃жаа’’д̇и вад̣̇анд̇и. вийрияамзва бана ануббаннаагусалаануббаад̣̇анз лаб̣бхамааначанд̣̇ад̇ааяа д̇хурасамбаг̇г̇ахад̇ааяа чанд̣̇абарияааязна вуд̇д̇ам̣. д̇ат̇аа хи вийрияам̣ – ‘‘анигкид̇д̇ачанд̣̇ад̇аа анигкид̇д̇ад̇хурад̇аа’’д̇и (д̇ха. са. 26) нид̣̇д̣̇идтам̣. госаж̇ж̇абагкз бад̇ид̇ум̣ ад̣̇ад̇ваа жид̇д̇ам̣ баг̇г̇ахид̇ам̣ гарод̇и. бад̇хаананд̇и бад̇хаанабхууд̇авийрияам̣.
Tathārūpe vā ārammaṇeti yasmiṃ ārammaṇe imassa pubbe kilesā na uppannā, tasmiṃ eva. Anuppannānanti anuppādassapi patthanāvasena anuppannānaṃ. Vīriyacchandanti vīriyassa nibbattetukāmatāchandaṃ. ‘‘Chandasampayuttavīriyañcā’’ti vadanti. Vīriyameva pana anuppannākusalānuppādane labbhamānachandatāya dhurasampaggahatāya chandapariyāyena vuttaṃ. Tathā hi vīriyaṃ – ‘‘anikkhittachandatā anikkhittadhuratā’’ti (dha. sa. 26) niddiṭṭhaṃ. Kosajjapakkhe patituṃ adatvā cittaṃ paggahitaṃ karoti. Padhānanti padhānabhūtavīriyaṃ.
уббад̇д̇ибаб̣анд̇хавасзнаад̇и ниранд̇аруббаад̣̇анавасзна. жад̇уусу таанзсу гижжасаад̇ханавасзнаад̇и яат̇аавуд̇д̇зсу жад̇уусу таанзсу бад̇хаанагижжасса нибпаад̣̇анавасзна ануббаад̣̇анаад̣̇ивасзна. гижжасаад̇ханавасзнаад̇и гааяавзд̣̇анаажид̇д̇ад̇хаммзсу субхасуканижжаад̇д̇аг̇аахавид̇хаманавасзна асубхад̣̇угкаанижжаанад̇д̇асаад̇ханавасзна.
Uppattipabandhavasenāti nirantaruppādanavasena. Catūsu ṭhānesu kiccasādhanavasenāti yathāvuttesu catūsu ṭhānesu padhānakiccassa nipphādanavasena anuppādanādivasena. Kiccasādhanavasenāti kāyavedanācittadhammesu subhasukhaniccaattagāhavidhamanavasena asubhadukkhāniccānattasādhanavasena.
аяанд̇и яат̇аавуд̇д̇о сад̣̇исаасад̣̇исад̇аависзсо. ассаад̇и маг̇г̇асса. зд̇т̇а гат̇анд̇и яад̣̇и руубааважаражад̇уд̇т̇аж̇жхаанад̇о бадтааяа яаава саб̣б̣абхаваг̇г̇аа жхаанан̇г̇амаг̇г̇ан̇г̇аб̣ож̇жхан̇г̇аанам̣ сад̣̇исад̇аа, звам̣ санд̇з ‘‘ааруббз жад̇уггабан̃жагаж̇жхаанам̣ уббаж̇ж̇ад̇и, д̇ан̃жа логуд̇д̇ара’’нд̇и зд̇т̇а гат̇ам̣ ад̇т̇о г̇ахзд̇аб̣б̣од̇и ааха ‘‘зд̇т̇аабий’’д̇иаад̣̇и. д̇ам̣жхаанигааваад̇и батамаж̇жхаанаад̣̇ийсу яам̣ жхаанам̣ маг̇г̇абадилаабхасса баад̣̇агабхууд̇ам̣, д̇ам̣жхаанигаава асса арияасса убариби д̇аяо маг̇г̇аа . званд̇и вуд̇д̇аагаарзна. баад̣̇агаж̇жхаанамзва нияамзд̇и ааруббз жад̇уггабан̃жагаж̇жхаануббад̇д̇ияам̣. вибассанааяа аарамман̣абхууд̇аа канд̇хаад̇и саммасид̇аканд̇хз вад̣̇анд̇и. буг̇г̇алаж̇жхаасаяо нияамзд̇и баад̣̇агасаммасид̇аж̇жхаанаанам̣ бхзд̣̇з. яасмаа сан̇каарубзгкаан̃аан̣амзва арияамаг̇г̇асса б̣ож̇жхан̇г̇аад̣̇ивисзсам̣ нияамзд̇и, д̇ад̇о д̣̇уд̇ияаад̣̇ибаад̣̇агаж̇жхаанад̇о уббаннасса сан̇каарубзгкаан̃аан̣асса баад̣̇агаж̇жхаанаад̇игганд̇аанам̣ ан̇г̇аанам̣ асамаабаж̇ж̇ид̇угаамад̇аавирааг̇абхаавад̇о ид̇арасса жа ад̇аб̣бхаавад̇о д̇ийсуби ваад̣̇зсу вибассанаава нияамзд̇ийд̇и взд̣̇ид̇аб̣б̣о, д̇асмаа вибассанаанияамзнзва хи батамаваад̣̇зби абаад̣̇агаж̇жхаанаад̣̇ибаад̣̇агааби маг̇г̇аа батамаж̇жхаанигаа хонд̇и. ид̇арзхи жа баад̣̇агаж̇жхаанзхи вибассанаанияамзхи д̇ам̣д̇ам̣жхаанигаава. звам̣ сзсаваад̣̇зсу вибассанаанияамо яат̇аасамбхавам̣ яож̇зд̇аб̣б̣о. д̣̇уд̇ияаваад̣̇з д̇ам̣д̇ам̣жхаанигад̇аа саммасид̇асан̇кааравибассанаанияамзхи ход̇и. д̇ад̇ра хи вибассанаа д̇ам̣д̇ам̣вирааг̇абхааванаа бхаавзд̇аб̣б̣аа, на соманассасахаг̇ад̇аа убзгкаасахаг̇ад̇аа худ̇ваа жхаанан̇г̇аад̣̇инияамам̣ маг̇г̇асса гарод̇ийд̇и звам̣ вибассанаанияамо вуд̇д̇анаязнзва взд̣̇ид̇аб̣б̣о. имасмин̃жа ваад̣̇з баад̣̇агасаммасид̇аж̇жхаанубаниссаяасаб̣бхаавз аж̇жхаасаяо зганд̇зна ход̇ийд̇и ‘‘буг̇г̇алаж̇жхаасаяо нияамзд̇ийд̇и вад̣̇анд̇ий’’д̇и вуд̇д̇ам̣, адтагат̇ааяам̣ бана висуд̣̇д̇химаг̇г̇асса зд̇иссаа адтагат̇ааяа згасан̇г̇ахид̇ад̇д̇аа ‘‘д̇зсам̣ ваад̣̇авинижчаяо…бз… взд̣̇ид̇аб̣б̣о’’д̇и вуд̇д̇ам̣. буб̣б̣абхааг̇зд̇и вибассанаагкан̣з.
Ayanti yathāvutto sadisāsadisatāviseso. Assāti maggassa. Ettha kathanti yadi rūpāvacaracatutthajjhānato paṭṭhāya yāva sabbabhavaggā jhānaṅgamaggaṅgabojjhaṅgānaṃ sadisatā, evaṃ sante ‘‘āruppe catukkapañcakajjhānaṃ uppajjati, tañca lokuttara’’nti ettha kathaṃ attho gahetabboti āha ‘‘etthāpī’’tiādi. Taṃjhānikāvāti paṭhamajjhānādīsu yaṃ jhānaṃ maggapaṭilābhassa pādakabhūtaṃ, taṃjhānikāva assa ariyassa uparipi tayo maggā. Evanti vuttākārena. Pādakajjhānameva niyameti āruppe catukkapañcakajjhānuppattiyaṃ. Vipassanāya ārammaṇabhūtā khandhāti sammasitakhandhe vadanti. Puggalajjhāsayo niyameti pādakasammasitajjhānānaṃ bhede. Yasmā saṅkhārupekkhāñāṇameva ariyamaggassa bojjhaṅgādivisesaṃ niyameti, tato dutiyādipādakajjhānato uppannassa saṅkhārupekkhāñāṇassa pādakajjhānātikkantānaṃ aṅgānaṃ asamāpajjitukāmatāvirāgabhāvato itarassa ca atabbhāvato tīsupi vādesu vipassanāva niyametīti veditabbo, tasmā vipassanāniyameneva hi paṭhamavādepi apādakajjhānādipādakāpi maggā paṭhamajjhānikā honti. Itarehi ca pādakajjhānehi vipassanāniyamehi taṃtaṃjhānikāva. Evaṃ sesavādesu vipassanāniyamo yathāsambhavaṃ yojetabbo. Dutiyavāde taṃtaṃjhānikatā sammasitasaṅkhāravipassanāniyamehi hoti. Tatra hi vipassanā taṃtaṃvirāgabhāvanā bhāvetabbā, na somanassasahagatā upekkhāsahagatā hutvā jhānaṅgādiniyamaṃ maggassa karotīti evaṃ vipassanāniyamo vuttanayeneva veditabbo. Imasmiñca vāde pādakasammasitajjhānupanissayasabbhāve ajjhāsayo ekantena hotīti ‘‘puggalajjhāsayo niyametīti vadantī’’ti vuttaṃ, aṭṭhakathāyaṃ pana visuddhimaggassa etissā aṭṭhakathāya ekasaṅgahitattā ‘‘tesaṃ vādavinicchayo…pe… veditabbo’’ti vuttaṃ. Pubbabhāgeti vipassanākkhaṇe.
вибхан̇г̇асуд̇д̇аван̣н̣анаа нидтид̇аа.
Vibhaṅgasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 8. вибхан̇г̇асуд̇д̇ам̣ • 8. Vibhaṅgasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) / 8. вибхан̇г̇асуд̇д̇аван̣н̣анаа • 8. Vibhaṅgasuttavaṇṇanā
