| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੧੦. વਿਭਙ੍ਗਸੁਤ੍ਤવਣ੍ਣਨਾ
10. Vibhaṅgasuttavaṇṇanā
੮੩੨. ਦਸਮੇ ਕੋਸਜ੍ਜਸਹਗਤੋਤਿ ਇਧ ਭਿਕ੍ਖੁ ਛਨ੍ਦਂ ਉਪ੍ਪਾਦੇਤ੍વਾ ਕਮ੍ਮਟ੍ਠਾਨਂ ਮਨਸਿਕਰੋਨ੍ਤੋ ਨਿਸੀਦਤਿ। ਅਥਸ੍ਸ ਚਿਤ੍ਤੇ ਲੀਨਾਕਾਰੋ ਓਕ੍ਕਮਤਿ, ਸੋ ‘‘ਲੀਨਾਕਾਰੋ ਮੇ ਓਕ੍ਕਨ੍ਤੋ’’ਤਿ ਞਤ੍વਾ ਅਪਾਯਭਯੇਨ ਚਿਤ੍ਤਂ ਤਜ੍ਜੇਤ੍વਾ ਪੁਨ ਛਨ੍ਦਂ ਉਪ੍ਪਾਦੇਤ੍વਾ ਕਮ੍ਮਟ੍ਠਾਨਂ ਮਨਸਿ ਕਰੋਤਿ। ਅਥਸ੍ਸ ਪੁਨ ਲੀਨਾਕਾਰੋ ਓਕ੍ਕਮਤਿ। ਸੋ ਪੁਨ ਅਪਾਯਭਯੇਨ ਚਿਤ੍ਤਂ ਤਜ੍ਜੇਤ੍વਾ ਛਨ੍ਦਂ ਉਪ੍ਪਾਦੇਤ੍વਾ ਕਮ੍ਮਟ੍ਠਾਨਂ ਮਨਸਿ ਕਰੋਤੀਤਿ ਏવਮਸ੍ਸ ਕੋਸਜ੍ਜੇਨ વੋਕਿਣ੍ਣਤ੍ਤਾ ਛਨ੍ਦੋ ਕੋਸਜ੍ਜਸਹਗਤੋ ਨਾਮ ਹੋਤਿ। ਕੋਸਜ੍ਜਸਮ੍ਪਯੁਤ੍ਤੋਤਿ ਤਸ੍ਸੇવ વੇવਚਨਂ।
832. Dasame kosajjasahagatoti idha bhikkhu chandaṃ uppādetvā kammaṭṭhānaṃ manasikaronto nisīdati. Athassa citte līnākāro okkamati, so ‘‘līnākāro me okkanto’’ti ñatvā apāyabhayena cittaṃ tajjetvā puna chandaṃ uppādetvā kammaṭṭhānaṃ manasi karoti. Athassa puna līnākāro okkamati. So puna apāyabhayena cittaṃ tajjetvā chandaṃ uppādetvā kammaṭṭhānaṃ manasi karotīti evamassa kosajjena vokiṇṇattā chando kosajjasahagato nāma hoti. Kosajjasampayuttoti tasseva vevacanaṃ.
ਉਦ੍ਧਚ੍ਚਸਹਗਤੋਤਿ ਇਧ ਭਿਕ੍ਖੁ ਛਨ੍ਦਂ ਉਪ੍ਪਾਦੇਤ੍વਾ ਕਮ੍ਮਟ੍ਠਾਨਂ ਮਨਸਿਕਰੋਨ੍ਤੋ ਨਿਸੀਦਤਿ। ਅਥਸ੍ਸ ਚਿਤ੍ਤਂ ਉਦ੍ਧਚ੍ਚੇ ਪਤਤਿ। ਸੋ ਬੁਦ੍ਧਧਮ੍ਮਸਙ੍ਘਗੁਣੇ ਆવਜ੍ਜੇਤ੍વਾ ਚਿਤ੍ਤਂ ਹਾਸੇਤ੍વਾ ਤੋਸੇਤ੍વਾ ਕਮ੍ਮਨਿਯਂ ਕਤ੍વਾ ਪੁਨ ਛਨ੍ਦਂ ਉਪ੍ਪਾਦੇਤ੍વਾ ਕਮ੍ਮਟ੍ਠਾਨਂ ਮਨਸਿ ਕਰੋਤਿ। ਅਥਸ੍ਸ ਪੁਨ ਚਿਤ੍ਤਂ ਉਦ੍ਧਚ੍ਚੇ ਪਤਤਿ। ਸੋ ਪੁਨ ਬੁਦ੍ਧਧਮ੍ਮਸਙ੍ਘਗੁਣੇ ਆવਜ੍ਜੇਤ੍વਾ ਚਿਤ੍ਤਂ ਹਾਸੇਤ੍વਾ ਤੋਸੇਤ੍વਾ ਕਮ੍ਮਨਿਯਂ ਕਤ੍વਾ ਛਨ੍ਦਂ ਉਪ੍ਪਾਦੇਤ੍વਾ ਕਮ੍ਮਟ੍ਠਾਨਂ ਮਨਸਿ ਕਰੋਤੀਤਿ ਏવਮਸ੍ਸ ਉਦ੍ਧਚ੍ਚੇਨ વੋਕਿਣ੍ਣਤ੍ਤਾ ਛਨ੍ਦੋ ਉਦ੍ਧਚ੍ਚਸਹਗਤੋ ਨਾਮ ਹੋਤਿ।
Uddhaccasahagatoti idha bhikkhu chandaṃ uppādetvā kammaṭṭhānaṃ manasikaronto nisīdati. Athassa cittaṃ uddhacce patati. So buddhadhammasaṅghaguṇe āvajjetvā cittaṃ hāsetvā tosetvā kammaniyaṃ katvā puna chandaṃ uppādetvā kammaṭṭhānaṃ manasi karoti. Athassa puna cittaṃ uddhacce patati. So puna buddhadhammasaṅghaguṇe āvajjetvā cittaṃ hāsetvā tosetvā kammaniyaṃ katvā chandaṃ uppādetvā kammaṭṭhānaṃ manasi karotīti evamassa uddhaccena vokiṇṇattā chando uddhaccasahagato nāma hoti.
ਥਿਨਮਿਦ੍ਧਸਹਗਤੋਤਿ ਇਧ ਭਿਕ੍ਖੁ ਛਨ੍ਦਂ ਉਪ੍ਪਾਦੇਤ੍વਾ ਕਮ੍ਮਟ੍ਠਾਨਂ ਮਨਸਿਕਰੋਨ੍ਤੋ ਨਿਸੀਦਤਿ। ਅਥਸ੍ਸ ਥਿਨਮਿਦ੍ਧਂ ਉਪ੍ਪਜ੍ਜਤਿ। ਸੋ ‘‘ਉਪ੍ਪਨ੍ਨਂ ਮੇ ਥਿਨਮਿਦ੍ਧ’’ਨ੍ਤਿ ਞਤ੍વਾ ਉਦਕੇਨ ਮੁਖਂ ਪੁਞ੍ਛਿਤ੍વਾ, ਕਣ੍ਣੇ ਆਕਡ੍ਢਿਤ੍વਾ ਪਗੁਣਂ ਧਮ੍ਮਂ ਸਜ੍ਝਾਯਿਤ੍વਾ ਦਿવਾ ਗਹਿਤਂ વਾ ਆਲੋਕਸਞ੍ਞਂ ਮਨਸਿਕਰਿਤ੍વਾ ਥਿਨਮਿਦ੍ਧਂ વਿਨੋਦੇਤ੍વਾ ਪੁਨ ਛਨ੍ਦਂ ਉਪ੍ਪਾਦੇਤ੍વਾ ਕਮ੍ਮਟ੍ਠਾਨਂ ਮਨਸਿ ਕਰੋਤਿ। ਅਥਸ੍ਸ ਪੁਨ ਥਿਨਮਿਦ੍ਧਂ ਉਪ੍ਪਜ੍ਜਤਿ। ਸੋ વੁਤ੍ਤਨਯੇਨੇવ ਪੁਨ ਥਿਨਮਿਦ੍ਧਂ વਿਨੋਦੇਤ੍વਾ ਛਨ੍ਦਂ ਉਪ੍ਪਾਦੇਤ੍વਾ ਕਮ੍ਮਟ੍ਠਾਨਂ ਮਨਸਿ ਕਰੋਤੀਤਿ ਏવਮਸ੍ਸ ਥਿਨਮਿਦ੍ਧੇਨ વੋਕਿਣ੍ਣਤ੍ਤਾ ਛਨ੍ਦੋ ਥਿਨਮਿਦ੍ਧਸਹਗਤੋ ਨਾਮ ਹੋਤਿ।
Thinamiddhasahagatoti idha bhikkhu chandaṃ uppādetvā kammaṭṭhānaṃ manasikaronto nisīdati. Athassa thinamiddhaṃ uppajjati. So ‘‘uppannaṃ me thinamiddha’’nti ñatvā udakena mukhaṃ puñchitvā, kaṇṇe ākaḍḍhitvā paguṇaṃ dhammaṃ sajjhāyitvā divā gahitaṃ vā ālokasaññaṃ manasikaritvā thinamiddhaṃ vinodetvā puna chandaṃ uppādetvā kammaṭṭhānaṃ manasi karoti. Athassa puna thinamiddhaṃ uppajjati. So vuttanayeneva puna thinamiddhaṃ vinodetvā chandaṃ uppādetvā kammaṭṭhānaṃ manasi karotīti evamassa thinamiddhena vokiṇṇattā chando thinamiddhasahagato nāma hoti.
ਅਨੁવਿਕ੍ਖਿਤ੍ਤੋਤਿ ਇਧ ਭਿਕ੍ਖੁ ਛਨ੍ਦਂ ਉਪ੍ਪਾਦੇਤ੍વਾ ਕਮ੍ਮਟ੍ਠਾਨਂ ਮਨਸਿਕਰੋਨ੍ਤੋ ਨਿਸੀਦਤਿ। ਅਥਸ੍ਸ ਕਾਮਗੁਣਾਰਮ੍ਮਣੇ ਚਿਤ੍ਤਂ વਿਕ੍ਖਿਪਤਿ। ਸੋ ‘‘ਬਹਿਦ੍ਧਾ વਿਕ੍ਖਿਤ੍ਤਂ ਮੇ ਚਿਤ੍ਤ’’ਨ੍ਤਿ ਞਤ੍વਾ ਅਨਮਤਗ੍ਗ (ਸਂ॰ ਨਿ॰ ੨.੧੨੪-੧੨੫) ਦੇવਦੂਤ- (ਮ॰ ਨਿ॰ ੩.੨੬੧) ਚੇਲੋਪਮ (ਸਂ॰ ਨਿ॰ ੫.੧੧੦੪) ਅਨਾਗਤਭਯਸੁਤ੍ਤਾਦੀਨਿ (ਅ॰ ਨਿ॰ ੫.੭੭) ਆવਜ੍ਜੇਨ੍ਤੋ ਸੁਤ੍ਤਦਣ੍ਡੇਨ ਚਿਤ੍ਤਂ ਤਜ੍ਜੇਤ੍વਾ ਕਮ੍ਮਨਿਯਂ ਕਤ੍વਾ ਪੁਨ ਛਨ੍ਦਂ ਉਪ੍ਪਾਦੇਤ੍વਾ ਕਮ੍ਮਟ੍ਠਾਨਂ ਮਨਸਿ ਕਰੋਤਿ। ਅਥਸ੍ਸ ਪੁਨ ਚਿਤ੍ਤਂ વਿਕ੍ਖਿਪਤਿ। ਸੋ ਪੁਨ ਸੁਤ੍ਤਦਣ੍ਡੇਨ ਚਿਤ੍ਤਂ ਕਮ੍ਮਨਿਯਂ ਕਤ੍વਾ ਛਨ੍ਦਂ ਉਪ੍ਪਾਦੇਤ੍વਾ ਕਮ੍ਮਟ੍ਠਾਨਂ ਮਨਸਿ ਕਰੋਤੀਤਿ ਏવਮਸ੍ਸ ਕਾਮવਿਤਕ੍ਕવੋਕਿਣ੍ਣਤ੍ਤਾ ਛਨ੍ਦੋ ਬਹਿਦ੍ਧਾ ਪਞ੍ਚ ਕਾਮਗੁਣੇ ਆਰਬ੍ਭ ਅਨੁવਿਕ੍ਖਿਤ੍ਤੋ ਅਨੁવਿਸਟੋ ਹੋਤਿ।
Anuvikkhittoti idha bhikkhu chandaṃ uppādetvā kammaṭṭhānaṃ manasikaronto nisīdati. Athassa kāmaguṇārammaṇe cittaṃ vikkhipati. So ‘‘bahiddhā vikkhittaṃ me citta’’nti ñatvā anamatagga (saṃ. ni. 2.124-125) devadūta- (ma. ni. 3.261) celopama (saṃ. ni. 5.1104) anāgatabhayasuttādīni (a. ni. 5.77) āvajjento suttadaṇḍena cittaṃ tajjetvā kammaniyaṃ katvā puna chandaṃ uppādetvā kammaṭṭhānaṃ manasi karoti. Athassa puna cittaṃ vikkhipati. So puna suttadaṇḍena cittaṃ kammaniyaṃ katvā chandaṃ uppādetvā kammaṭṭhānaṃ manasi karotīti evamassa kāmavitakkavokiṇṇattā chando bahiddhā pañca kāmaguṇe ārabbha anuvikkhitto anuvisaṭo hoti.
ਯਥਾ ਪੁਰੇ ਤਥਾ ਪਚ੍ਛਾਤਿ ਕਮ੍ਮਟ੍ਠਾਨવਸੇਨਪਿ ਦੇਸਨਾવਸੇਨਪਿ ਪੁਰਿਮਪਚ੍ਛਿਮਤਾ વੇਦਿਤਬ੍ਬਾ। ਕਥਂ? ਕਮ੍ਮਟ੍ਠਾਨੇ ਤਾવ ਕਮ੍ਮਟ੍ਠਾਨਸ੍ਸ ਅਭਿਨਿવੇਸੋ ਪੁਰੇ ਨਾਮ, ਅਰਹਤ੍ਤਂ ਪਚ੍ਛਾ ਨਾਮ। ਤਤ੍ਥ ਯੋ ਭਿਕ੍ਖੁ ਮੂਲਕਮ੍ਮਟ੍ਠਾਨੇ ਅਭਿਨਿવਿਸਿਤ੍વਾ ਅਤਿਲੀਨਾਦੀਸੁ ਚਤੂਸੁ ਠਾਨੇਸੁ ਚਿਤ੍ਤਸ੍ਸ ਓਕ੍ਕਮਨਂ ਪਟਿਸੇਧੇਤ੍વਾ, ਦੁਟ੍ਠਗੋਣੇ ਯੋਜੇਤ੍વਾ ਸਾਰੇਨ੍ਤੋ વਿਯ ਚਤੁਰਸ੍ਸਘਟਿਕਂ ਓਤਾਰੇਨ੍ਤੋ વਿਯ ਚਤੁਨ੍ਨਂ ਠਾਨਾਨਂ ਏਕਟ੍ਠਾਨੇਪਿ ਅਸਜ੍ਜਨ੍ਤੋ ਸਙ੍ਖਾਰੇ ਸਮ੍ਮਸਿਤ੍વਾ ਅਰਹਤ੍ਤਂ ਪਾਪੁਣਾਤਿ। ਅਯਮ੍ਪਿ ਯਥਾ ਪੁਰੇ ਤਥਾ ਪਚ੍ਛਾ વਿਹਰਤਿ ਨਾਮ। ਅਯਂ ਕਮ੍ਮਟ੍ਠਾਨવਸੇਨ ਪੁਰਿਮਪਚ੍ਛਿਮਤਾ। ਦੇਸਨਾવਸੇਨ ਪਨ ਕੇਸਾ ਪੁਰੇ ਨਾਮ, ਮਤ੍ਥਲੁਙ੍ਗਂ ਪਚ੍ਛਾ ਨਾਮ। ਤਤ੍ਥ ਯੋ ਭਿਕ੍ਖੁ ਕੇਸੇਸੁ ਅਭਿਨਿવਿਸਿਤ੍વਾ વਣ੍ਣਸਣ੍ਠਾਨਾਦਿવਸੇਨ ਕੇਸਾਦਯੋ ਪਰਿਗ੍ਗਣ੍ਹਨ੍ਤੋ ਚਤੂਸੁ ਠਾਨੇਸੁ ਅਸਜ੍ਜਨ੍ਤੋ ਯਾવ ਮਤ੍ਥਲੁਙ੍ਗਾ ਭਾવਨਂ ਪਾਪੇਤਿ, ਅਯਮ੍ਪਿ ਯਥਾ ਪੁਰੇ ਤਥਾ ਪਚ੍ਛਾ વਿਹਰਤਿ ਨਾਮ। ਏવਂ ਦੇਸਨਾવਸੇਨ ਪੁਰਿਮਪਚ੍ਛਿਮਤਾ વੇਦਿਤਬ੍ਬਾ। ਯਥਾ ਪਚ੍ਛਾ ਤਥਾ ਪੁਰੇਤਿ ਇਦਂ ਪੁਰਿਮਸ੍ਸੇવ વੇવਚਨਂ।
Yathā pure tathā pacchāti kammaṭṭhānavasenapi desanāvasenapi purimapacchimatā veditabbā. Kathaṃ? Kammaṭṭhāne tāva kammaṭṭhānassa abhiniveso pure nāma, arahattaṃ pacchā nāma. Tattha yo bhikkhu mūlakammaṭṭhāne abhinivisitvā atilīnādīsu catūsu ṭhānesu cittassa okkamanaṃ paṭisedhetvā, duṭṭhagoṇe yojetvā sārento viya caturassaghaṭikaṃ otārento viya catunnaṃ ṭhānānaṃ ekaṭṭhānepi asajjanto saṅkhāre sammasitvā arahattaṃ pāpuṇāti. Ayampi yathā pure tathā pacchā viharati nāma. Ayaṃ kammaṭṭhānavasena purimapacchimatā. Desanāvasena pana kesā pure nāma, matthaluṅgaṃ pacchā nāma. Tattha yo bhikkhu kesesu abhinivisitvā vaṇṇasaṇṭhānādivasena kesādayo pariggaṇhanto catūsu ṭhānesu asajjanto yāva matthaluṅgā bhāvanaṃ pāpeti, ayampi yathā pure tathā pacchā viharati nāma. Evaṃ desanāvasena purimapacchimatā veditabbā. Yathā pacchā tathā pureti idaṃ purimasseva vevacanaṃ.
ਯਥਾ ਅਧੋ ਤਥਾ ਉਦ੍ਧਨ੍ਤਿ ਇਦਂ ਸਰੀਰવਸੇਨ વੇਦਿਤਬ੍ਬਂ। ਤੇਨੇવਾਹ ‘‘ਉਦ੍ਧਂ ਪਾਦਤਲਾ ਅਧੋ ਕੇਸਮਤ੍ਥਕਾ’’ਤਿ। ਤਤ੍ਥ ਯੋ ਭਿਕ੍ਖੁ ਪਾਦਤਲਤੋ ਪਟ੍ਠਾਯ ਯਾવ ਕੇਸਮਤ੍ਥਕਾ ਦ੍વਤ੍ਤਿਂਸਾਕਾਰવਸੇਨ વਾ ਪਾਦਙ੍ਗੁਲਿਅਗ੍ਗਪਬ੍ਬਟ੍ਠਿਤੋ ਯਾવ ਸੀਸਕਟਾਹਂ, ਸੀਸਕਟਾਹਤੋ ਯਾવ ਪਾਦਙ੍ਗੁਲੀਨਂ ਅਗ੍ਗਪਬ੍ਬਟ੍ਠੀਨਿ , ਤਾવ ਅਟ੍ਠਿવਸੇਨ વਾ ਭਾવਨਂ ਪਾਪੇਤਿ ਚਤੂਸੁ ਠਾਨੇਸੁ ਏਕਟ੍ਠਾਨੇਪਿ ਅਸਜ੍ਜਨ੍ਤੋ। ਅਯਂ ਯਥਾ ਉਦ੍ਧਂ ਤਥਾ ਅਧੋ, ਯਥਾ ਅਧੋ ਤਥਾ ਉਦ੍ਧਂ વਿਹਰਤਿ ਨਾਮ।
Yathā adho tathā uddhanti idaṃ sarīravasena veditabbaṃ. Tenevāha ‘‘uddhaṃ pādatalā adho kesamatthakā’’ti. Tattha yo bhikkhu pādatalato paṭṭhāya yāva kesamatthakā dvattiṃsākāravasena vā pādaṅguliaggapabbaṭṭhito yāva sīsakaṭāhaṃ, sīsakaṭāhato yāva pādaṅgulīnaṃ aggapabbaṭṭhīni , tāva aṭṭhivasena vā bhāvanaṃ pāpeti catūsu ṭhānesu ekaṭṭhānepi asajjanto. Ayaṃ yathā uddhaṃ tathā adho, yathā adho tathā uddhaṃ viharati nāma.
ਯੇਹਿ ਆਕਾਰੇਹੀਤਿ ਯੇਹਿ ਕੋਟ੍ਠਾਸੇਹਿ। ਯੇਹਿ ਲਿਙ੍ਗੇਹੀਤਿ ਯੇਹਿ ਸਣ੍ਠਾਨੇਹਿ। ਯੇਹਿ ਨਿਮਿਤ੍ਤੇਹੀਤਿ ਯੇਹਿ ਉਪਟ੍ਠਾਨੇਹਿ। ਆਲੋਕਸਞ੍ਞਾ ਸੁਗ੍ਗਹਿਤਾ ਹੋਤੀਤਿ ਯੋ ਭਿਕ੍ਖੁ ਅਙ੍ਗਣੇ ਨਿਸੀਦਿਤ੍વਾ ਆਲੋਕਸਞ੍ਞਂ ਮਨਸਿ ਕਰੋਤਿ, ਕਾਲੇਨ ਨਿਮੀਲੇਤਿ, ਕਾਲੇਨ ਉਮ੍ਮੀਲੇਤਿ। ਅਥਸ੍ਸ ਯਦਾ ਨਿਮੀਲੇਨ੍ਤਸ੍ਸਾਪਿ ਉਮ੍ਮੀਲੇਤ੍વਾ ਓਲੋਕੇਨ੍ਤਸ੍ਸ વਿਯ ਏਕਸਦਿਸਮੇવ ਉਪਟ੍ਠਾਤਿ, ਤਦਾ ਆਲੋਕਸਞ੍ਞਾ ਜਾਤਾ ਨਾਮ ਹੋਤਿ। ‘‘ਦਿવਾਸਞ੍ਞਾ’’ਤਿਪਿ ਤਸ੍ਸੇવ ਨਾਮਂ। ਸਾ ਚ ਪਨ ਰਤ੍ਤਿਂ ਉਪ੍ਪਜ੍ਜਮਾਨਾ ਸੁਗ੍ਗਹਿਤਾ ਨਾਮ ਹੋਤਿ। ਸ੍વਾਧਿਟ੍ਠਿਤਾਤਿਪਿ ਤਸ੍ਸੇવ વੇવਚਨਂ। ਸੁਟ੍ਠੁ ਅਧਿਟ੍ਠਿਤਾ ਸੁਟ੍ਠੁ ਠਪਿਤਾ ਸ੍વਾਧਿਟ੍ਠਿਤਾ ਨਾਮ વੁਚ੍ਚਤਿ। ਸਾ ਅਤ੍ਥਤੋ ਸੁਗ੍ਗਹਿਤਾਯੇવ। ਯੋ વਾ ਆਲੋਕੇਨ ਥਿਨਮਿਦ੍ਧਂ વਿਨੋਦੇਤ੍વਾ ਛਨ੍ਦਂ ਉਪ੍ਪਾਦੇਤ੍વਾ ਕਮ੍ਮਟ੍ਠਾਨਂ ਮਨਸਿ ਕਰੋਤਿ, ਤਸ੍ਸ ਦਿવਾਪਿ ਆਲੋਕਸਞ੍ਞਾ ਸੁਗ੍ਗਹਿਤਾ ਸ੍વਾਧਿਟ੍ਠਿਤਾ ਨਾਮ। ਰਤ੍ਤਿ વਾ ਹੋਤੁ ਦਿવਾ વਾ ਯੇਨ ਆਲੋਕੇਨ ਥਿਨਮਿਦ੍ਧਂ વਿਨੋਦੇਤ੍વਾ ਕਮ੍ਮਟ੍ਠਾਨਂ ਮਨਸਿ ਕਰੋਤਿ, ਤਸ੍ਮਿਂ ਥਿਨਮਿਦ੍ਧવਿਨੋਦਨੇ ਆਲੋਕੇ ਉਪ੍ਪਨ੍ਨਾ ਸਞ੍ਞਾ ਸੁਗ੍ਗਹਿਤਾਯੇવ ਨਾਮ। વੀਰਿਯਾਦੀਸੁਪਿ ਏਸੇવ ਨਯੋ। ਇਮਸ੍ਮਿਂ ਸੁਤ੍ਤੇ ਛਨ੍ਨਂ ਅਭਿਞ੍ਞਾਨਂ ਪਾਦਕਿਦ੍ਧਿ ਕਥਿਤਾ।
Yehi ākārehīti yehi koṭṭhāsehi. Yehi liṅgehīti yehi saṇṭhānehi. Yehi nimittehīti yehi upaṭṭhānehi. Ālokasaññā suggahitā hotīti yo bhikkhu aṅgaṇe nisīditvā ālokasaññaṃ manasi karoti, kālena nimīleti, kālena ummīleti. Athassa yadā nimīlentassāpi ummīletvā olokentassa viya ekasadisameva upaṭṭhāti, tadā ālokasaññā jātā nāma hoti. ‘‘Divāsaññā’’tipi tasseva nāmaṃ. Sā ca pana rattiṃ uppajjamānā suggahitā nāma hoti. Svādhiṭṭhitātipi tasseva vevacanaṃ. Suṭṭhu adhiṭṭhitā suṭṭhu ṭhapitā svādhiṭṭhitā nāma vuccati. Sā atthato suggahitāyeva. Yo vā ālokena thinamiddhaṃ vinodetvā chandaṃ uppādetvā kammaṭṭhānaṃ manasi karoti, tassa divāpi ālokasaññā suggahitā svādhiṭṭhitā nāma. Ratti vā hotu divā vā yena ālokena thinamiddhaṃ vinodetvā kammaṭṭhānaṃ manasi karoti, tasmiṃ thinamiddhavinodane āloke uppannā saññā suggahitāyeva nāma. Vīriyādīsupi eseva nayo. Imasmiṃ sutte channaṃ abhiññānaṃ pādakiddhi kathitā.
ਪਾਸਾਦਕਮ੍ਪਨવਗ੍ਗੋ ਦੁਤਿਯੋ।
Pāsādakampanavaggo dutiyo.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੧੦. વਿਭਙ੍ਗਸੁਤ੍ਤਂ • 10. Vibhaṅgasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੧੦. વਿਭਙ੍ਗਸੁਤ੍ਤવਣ੍ਣਨਾ • 10. Vibhaṅgasuttavaṇṇanā
