| Library / Tipiṭaka / তিপিটক • Tipiṭaka / নেত্তিপ্পকরণ-অট্ঠকথা • Nettippakaraṇa-aṭṭhakathā |
৮. ৰিভত্তিহারসম্পাতৰণ্ণনা
8. Vibhattihārasampātavaṇṇanā
৭০. কুসলপক্খো কুসলপক্খেন নিদ্দিসিতব্বোতি রক্খিতচিত্তস্সাতি সতিসংৰরো, সো ছব্বিধো দ্ৰারৰসেন চক্খুদ্ৰারসংৰরো যাৰ মনোদ্ৰারসংৰরোতি। সম্মাসঙ্কপ্পো তিৰিধো – নেক্খম্মসঙ্কপ্পো, অব্যাপাদসঙ্কপ্পো, অৰিহিংসাসঙ্কপ্পোতি। সম্মাদিট্ঠি অট্ঠৰিধা দুক্খে ঞাণং…পে॰… ইদপ্পচ্চযতাপটিচ্চসমুপ্পন্নেসু ধম্মেসু ঞাণন্তি। উদযব্বযঞাণং পঞ্ঞাসৰিধং অৰিজ্জাসমুদযা রূপসমুদযো…পে॰… ৰিপরিণামলক্খণং পস্সন্তোপি ৰিঞ্ঞাণক্খন্ধস্স ৰযং পস্সতি। থিনমিদ্ধাভিভৰনং চতুব্বিধং চতুমগ্গৰসেন। তত্থ সতিসংৰরো লোকিযলোকুত্তরৰসেন দুৰিধো। তেসু লোকিযো কামাৰচরোৰ, লোকুত্তরো দস্সনভাৰনাভেদতো দুৰিধো। একমেকো চেত্থ চতুসতিপট্ঠানভেদতো চতুব্বিধো। এস নযো সম্মাসঙ্কপ্পাদীসুপি।
70.Kusalapakkhokusalapakkhena niddisitabboti rakkhitacittassāti satisaṃvaro, so chabbidho dvāravasena cakkhudvārasaṃvaro yāva manodvārasaṃvaroti. Sammāsaṅkappo tividho – nekkhammasaṅkappo, abyāpādasaṅkappo, avihiṃsāsaṅkappoti. Sammādiṭṭhi aṭṭhavidhā dukkhe ñāṇaṃ…pe… idappaccayatāpaṭiccasamuppannesu dhammesu ñāṇanti. Udayabbayañāṇaṃ paññāsavidhaṃ avijjāsamudayā rūpasamudayo…pe… vipariṇāmalakkhaṇaṃ passantopi viññāṇakkhandhassa vayaṃ passati. Thinamiddhābhibhavanaṃ catubbidhaṃ catumaggavasena. Tattha satisaṃvaro lokiyalokuttaravasena duvidho. Tesu lokiyo kāmāvacarova, lokuttaro dassanabhāvanābhedato duvidho. Ekameko cettha catusatipaṭṭhānabhedato catubbidho. Esa nayo sammāsaṅkappādīsupi.
অযং পন ৰিসেসো – সম্মাসঙ্কপ্পো পঠমজ্ঝানৰসেন রূপাৰচরোতিপি নীহরিতব্বো। পদট্ঠানৰিভাগো পদট্ঠানহারসম্পাতে ৰুত্তনযেন ৰত্তব্বো । অকুসলপক্খে অসংৰরো চক্খুঅসংৰরো…পে॰… কাযঅসংৰরো, চোপনকাযঅসংৰরো, ৰাচাঅসংৰরো, মনোঅসংৰরোতি অট্ঠৰিধো। মিচ্ছাসঙ্কপ্পো কামৰিতক্কাদিৰসেন তিৰিধো। অঞ্ঞাণং ‘‘দুক্খে অঞ্ঞাণ’’ন্তিআদিনা অট্ঠৰিধা ৰিভত্তং। সম্মাদিট্ঠিপটিপক্খতো মিচ্ছাদিট্ঠি দ্ৰাসট্ঠিৰিধেন ৰেদিতব্বা। থিনমিদ্ধং উপ্পত্তিভূমিতো পঞ্চৰিধন্তি এৰং অকুসলপক্খে ৰিভত্তি ৰেদিতব্বা।
Ayaṃ pana viseso – sammāsaṅkappo paṭhamajjhānavasena rūpāvacarotipi nīharitabbo. Padaṭṭhānavibhāgo padaṭṭhānahārasampāte vuttanayena vattabbo . Akusalapakkhe asaṃvaro cakkhuasaṃvaro…pe… kāyaasaṃvaro, copanakāyaasaṃvaro, vācāasaṃvaro, manoasaṃvaroti aṭṭhavidho. Micchāsaṅkappo kāmavitakkādivasena tividho. Aññāṇaṃ ‘‘dukkhe aññāṇa’’ntiādinā aṭṭhavidhā vibhattaṃ. Sammādiṭṭhipaṭipakkhato micchādiṭṭhi dvāsaṭṭhividhena veditabbā. Thinamiddhaṃ uppattibhūmito pañcavidhanti evaṃ akusalapakkhe vibhatti veditabbā.
ৰিভত্তিহারসম্পাতৰণ্ণনা নিট্ঠিতা।
Vibhattihārasampātavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / নেত্তিপ্পকরণপাল়ি • Nettippakaraṇapāḷi / ৮. ৰিভত্তিহারসম্পাতো • 8. Vibhattihārasampāto
টীকা • Tīkā / সুত্তপিটক (টীকা) • Suttapiṭaka (ṭīkā) / খুদ্দকনিকায (টীকা) • Khuddakanikāya (ṭīkā) / নেত্তিৰিভাৰিনী • Nettivibhāvinī / ৮. ৰিভত্তিহারসম্পাতৰিভাৰনা • 8. Vibhattihārasampātavibhāvanā
