| Library / Tipiṭaka / තිපිටක • Tipiṭaka / නෙත්‌තිප්‌පකරණ-අට්‌ඨකථා • Nettippakaraṇa-aṭṭhakathā |
8. විභත්‌තිහාරසම්‌පාතවණ්‌ණනා
8. Vibhattihārasampātavaṇṇanā
70. කුසලපක්‌ඛො කුසලපක්‌ඛෙන නිද්‌දිසිතබ්‌බොති රක්‌ඛිතචිත්‌තස්‌සාති සතිසංවරො, සො ඡබ්‌බිධො ද්‌වාරවසෙන චක්‌ඛුද්‌වාරසංවරො යාව මනොද්‌වාරසංවරොති. සම්‌මාසඞ්‌කප්‌පො තිවිධො – නෙක්‌ඛම්‌මසඞ්‌කප්‌පො, අබ්‍යාපාදසඞ්‌කප්‌පො, අවිහිංසාසඞ්‌කප්‌පොති. සම්‌මාදිට්‌ඨි අට්‌ඨවිධා දුක්‌ඛෙ ඤාණං…පෙ.… ඉදප්‌පච්‌චයතාපටිච්‌චසමුප්‌පන්‌නෙසු ධම්‌මෙසු ඤාණන්‌ති. උදයබ්‌බයඤාණං පඤ්‌ඤාසවිධං අවිජ්‌ජාසමුදයා රූපසමුදයො…පෙ.… විපරිණාමලක්‌ඛණං පස්‌සන්‌තොපි විඤ්‌ඤාණක්‌ඛන්‌ධස්‌ස වයං පස්‌සති. ථිනමිද්‌ධාභිභවනං චතුබ්‌බිධං චතුමග්‌ගවසෙන. තත්‌ථ සතිසංවරො ලොකියලොකුත්‌තරවසෙන දුවිධො. තෙසු ලොකියො කාමාවචරොව, ලොකුත්‌තරො දස්‌සනභාවනාභෙදතො දුවිධො. එකමෙකො චෙත්‌ථ චතුසතිපට්‌ඨානභෙදතො චතුබ්‌බිධො. එස නයො සම්‌මාසඞ්‌කප්‌පාදීසුපි.
70.Kusalapakkhokusalapakkhena niddisitabboti rakkhitacittassāti satisaṃvaro, so chabbidho dvāravasena cakkhudvārasaṃvaro yāva manodvārasaṃvaroti. Sammāsaṅkappo tividho – nekkhammasaṅkappo, abyāpādasaṅkappo, avihiṃsāsaṅkappoti. Sammādiṭṭhi aṭṭhavidhā dukkhe ñāṇaṃ…pe… idappaccayatāpaṭiccasamuppannesu dhammesu ñāṇanti. Udayabbayañāṇaṃ paññāsavidhaṃ avijjāsamudayā rūpasamudayo…pe… vipariṇāmalakkhaṇaṃ passantopi viññāṇakkhandhassa vayaṃ passati. Thinamiddhābhibhavanaṃ catubbidhaṃ catumaggavasena. Tattha satisaṃvaro lokiyalokuttaravasena duvidho. Tesu lokiyo kāmāvacarova, lokuttaro dassanabhāvanābhedato duvidho. Ekameko cettha catusatipaṭṭhānabhedato catubbidho. Esa nayo sammāsaṅkappādīsupi.
අයං පන විසෙසො – සම්‌මාසඞ්‌කප්‌පො පඨමජ්‌ඣානවසෙන රූපාවචරොතිපි නීහරිතබ්‌බො. පදට්‌ඨානවිභාගො පදට්‌ඨානහාරසම්‌පාතෙ වුත්‌තනයෙන වත්‌තබ්‌බො . අකුසලපක්‌ඛෙ අසංවරො චක්‌ඛුඅසංවරො…පෙ.… කායඅසංවරො, චොපනකායඅසංවරො, වාචාඅසංවරො, මනොඅසංවරොති අට්‌ඨවිධො. මිච්‌ඡාසඞ්‌කප්‌පො කාමවිතක්‌කාදිවසෙන තිවිධො. අඤ්‌ඤාණං ‘‘දුක්‌ඛෙ අඤ්‌ඤාණ’’න්‌තිආදිනා අට්‌ඨවිධා විභත්‌තං. සම්‌මාදිට්‌ඨිපටිපක්‌ඛතො මිච්‌ඡාදිට්‌ඨි ද්‌වාසට්‌ඨිවිධෙන වෙදිතබ්‌බා. ථිනමිද්‌ධං උප්‌පත්‌තිභූමිතො පඤ්‌චවිධන්‌ති එවං අකුසලපක්‌ඛෙ විභත්‌ති වෙදිතබ්‌බා.
Ayaṃ pana viseso – sammāsaṅkappo paṭhamajjhānavasena rūpāvacarotipi nīharitabbo. Padaṭṭhānavibhāgo padaṭṭhānahārasampāte vuttanayena vattabbo . Akusalapakkhe asaṃvaro cakkhuasaṃvaro…pe… kāyaasaṃvaro, copanakāyaasaṃvaro, vācāasaṃvaro, manoasaṃvaroti aṭṭhavidho. Micchāsaṅkappo kāmavitakkādivasena tividho. Aññāṇaṃ ‘‘dukkhe aññāṇa’’ntiādinā aṭṭhavidhā vibhattaṃ. Sammādiṭṭhipaṭipakkhato micchādiṭṭhi dvāsaṭṭhividhena veditabbā. Thinamiddhaṃ uppattibhūmito pañcavidhanti evaṃ akusalapakkhe vibhatti veditabbā.
විභත්‌තිහාරසම්‌පාතවණ්‌ණනා නිට්‌ඨිතා.
Vibhattihārasampātavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / නෙත්‌තිප්‌පකරණපාළි • Nettippakaraṇapāḷi / 8. විභත්‌තිහාරසම්‌පාතො • 8. Vibhattihārasampāto
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / ඛුද්‌දකනිකාය (ටීකා) • Khuddakanikāya (ṭīkā) / නෙත්‌තිවිභාවිනී • Nettivibhāvinī / 8. විභත්‌තිහාරසම්‌පාතවිභාවනා • 8. Vibhattihārasampātavibhāvanā
