| Library / Tipiṭaka / திபிடக • Tipiṭaka / நெத்திவிபா⁴வினீ • Nettivibhāvinī |
8. விப⁴த்திஹாரஸம்பாதவிபா⁴வனா
8. Vibhattihārasampātavibhāvanā
70. யேன யேன ஆவட்டஹாரஸம்பாதேன ஸுத்தத்தா² ஆவட்டேதப்³பா³, ஸோ ஆவட்டஹாரஸம்பாதோ பரிபுண்ணோ, ‘‘கதமோ விப⁴த்திஹாரஸம்பாதோ’’தி புச்சி²தப்³ப³த்தா ‘‘தத்த² கதமோ விப⁴த்திஹாரஸம்பாதோ’’திஆதி³ வுத்தங். தத்த² கதமோ ஸங்வண்ணனாவிஸேஸோ விப⁴த்திஹாரஸம்பாதோ நாமாதி புச்ச²தி.
70. Yena yena āvaṭṭahārasampātena suttatthā āvaṭṭetabbā, so āvaṭṭahārasampāto paripuṇṇo, ‘‘katamo vibhattihārasampāto’’ti pucchitabbattā ‘‘tattha katamo vibhattihārasampāto’’tiādi vuttaṃ. Tattha katamo saṃvaṇṇanāviseso vibhattihārasampāto nāmāti pucchati.
‘‘கதமே ஸுத்தத்தா² கத்த² விப⁴த்தா’’தி புச்சி²தப்³ப³த்தா ‘‘தஸ்மா ரக்கி²தசித்தஸ்ஸா’’திஆதி³ வுத்தங். யா ‘‘தஸ்மா…பே॰… கோ³சரோ’’தி கா³தா² வுத்தா, திஸ்ஸங் கா³தா²யங் வுத்தோ குஸலபக்கோ² த⁴ம்மோ குஸலபக்கே²ன த⁴ம்மேன ஸதிஸங்வரோ த⁴ம்மோ நித்³தி³ஸிதப்³போ³ விப⁴ஜிதப்³போ³, அகுஸலபக்கே²ன த⁴ம்மேன நித்³தி³ஸிதப்³போ³ விப⁴ஜிதப்³போ³.
‘‘Katame suttatthā kattha vibhattā’’ti pucchitabbattā ‘‘tasmā rakkhitacittassā’’tiādi vuttaṃ. Yā ‘‘tasmā…pe… gocaro’’ti gāthā vuttā, tissaṃ gāthāyaṃ vutto kusalapakkho dhammo kusalapakkhena dhammena satisaṃvaro dhammo niddisitabbo vibhajitabbo, akusalapakkhena dhammena niddisitabbo vibhajitabbo.
கத²ங்? ‘‘ரக்கி²தசித்தஸ்ஸா’’தி பதே³ன வுத்தோ குஸலபக்கோ² ஸதிஸங்வரோ த⁴ம்மோ ‘‘சக்கு²த்³வாரஸங்வரோ…பே॰… மனொத்³வாரஸங்வரோ’’தி ச²ப்³பி³தே⁴ன குஸலபக்கே²ன த⁴ம்மேன நித்³தி³ஸிதப்³போ³ விப⁴ஜிதப்³போ³. ‘‘ஸம்மாஸங்கப்போ’’தி பதே³ன வுத்தோ குஸலபக்கோ² ஸம்மாஸங்கப்போ த⁴ம்மோ ‘‘நெக்க²ம்மஸங்கப்போ அப்³யாபாத³-ஸங்கப்போ அவிஹிங்ஸாஸங்கப்போ’’தி திவிதே⁴ன குஸலபக்கே²ன த⁴ம்மேன விப⁴ஜிதப்³போ³. ‘‘ஸம்மாதி³ட்டி²புரெக்கா²ரோ’’தி பதே³ன வுத்தா குஸலபக்கா² த⁴ம்மஜாதி ‘‘து³க்கே² ஞாணங், து³க்க²ஸமுத³யே ஞாணங், து³க்க²னிரோதே⁴ ஞாணங், து³க்க²னிரோத⁴கா³மினிபடிபதா³ய ஞாணங், புப்³ப³ந்தே ஞாணங், அபரந்தே ஞாணங், புப்³ப³ந்தாபரந்தே ஞாணங், இத³ப்பச்சயதாபடிச்சஸமுப்பன்னேஸு த⁴ம்மேஸு ஞாண’’ந்தி (த⁴॰ ஸ॰ 1063) அட்ட²விதே⁴ன குஸலபக்கே²ன த⁴ம்மேன விப⁴ஜிதப்³பா³. ‘‘ஞத்வான உத³யப்³ப³ய’’ந்தி பதே³ன வுத்தங் குஸலபக்க²உத³யப்³ப³யஞாணங் த⁴ம்மஜாதங் பஞ்ஞாஸவிதே⁴ன உத³யப்³ப³யஞாணேன குஸலபக்கே²ன விப⁴ஜிதப்³ப³ங். ‘‘தி²னமித்³தா⁴பி⁴பூ⁴’’தி பதே³ன வுத்தங் தி²னமித்³தா⁴பி⁴ப⁴வனங் குஸலபக்க²ங் த⁴ம்மஜாதங் ‘‘ஸோதாபத்திமக்³கா³பி⁴ப⁴வனங் ஸகதா³கா³மிமக்³கா³பி⁴ப⁴வனங் அனாகா³மிமக்³கா³பி⁴ப⁴வனங் அரஹத்தமக்³கா³பி⁴ப⁴வன’’ந்தி சதுப்³பி³தே⁴ன குஸலபக்கே²ன விப⁴ஜிதப்³ப³ங்.
Kathaṃ? ‘‘Rakkhitacittassā’’ti padena vutto kusalapakkho satisaṃvaro dhammo ‘‘cakkhudvārasaṃvaro…pe… manodvārasaṃvaro’’ti chabbidhena kusalapakkhena dhammena niddisitabbo vibhajitabbo. ‘‘Sammāsaṅkappo’’ti padena vutto kusalapakkho sammāsaṅkappo dhammo ‘‘nekkhammasaṅkappo abyāpāda-saṅkappo avihiṃsāsaṅkappo’’ti tividhena kusalapakkhena dhammena vibhajitabbo. ‘‘Sammādiṭṭhipurekkhāro’’ti padena vuttā kusalapakkhā dhammajāti ‘‘dukkhe ñāṇaṃ, dukkhasamudaye ñāṇaṃ, dukkhanirodhe ñāṇaṃ, dukkhanirodhagāminipaṭipadāya ñāṇaṃ, pubbante ñāṇaṃ, aparante ñāṇaṃ, pubbantāparante ñāṇaṃ, idappaccayatāpaṭiccasamuppannesu dhammesu ñāṇa’’nti (dha. sa. 1063) aṭṭhavidhena kusalapakkhena dhammena vibhajitabbā. ‘‘Ñatvāna udayabbaya’’nti padena vuttaṃ kusalapakkhaudayabbayañāṇaṃ dhammajātaṃ paññāsavidhena udayabbayañāṇena kusalapakkhena vibhajitabbaṃ. ‘‘Thinamiddhābhibhū’’ti padena vuttaṃ thinamiddhābhibhavanaṃ kusalapakkhaṃ dhammajātaṃ ‘‘sotāpattimaggābhibhavanaṃ sakadāgāmimaggābhibhavanaṃ anāgāmimaggābhibhavanaṃ arahattamaggābhibhavana’’nti catubbidhena kusalapakkhena vibhajitabbaṃ.
ஸதிஸங்வரோ குஸலபக்கோ² ‘‘லோகியோ ஸதிஸங்வரோ, லோகுத்தரோ ஸதிஸங்வரோ’’தி து³ப்³பி³தே⁴ன விப⁴ஜிதப்³போ³தி. லோகியோ ஸதிஸங்வரோ காமாவசரோவாதி ஏகவிதே⁴ன விப⁴ஜிதப்³போ³. லோகுத்தரா ஸதிஸங்வரோ ‘‘த³ஸ்ஸனபூ⁴மி, பா⁴வனாபூ⁴மீ’’தி து³ப்³பி³தே⁴ன விப⁴ஜிதப்³போ³. காமாவசரோ ஸதிஸங்வரோ ‘‘காயானுபஸ்ஸனாஸதிஸங்வரோ வேத³னானுபஸ்ஸனாஸதிஸங்வரோ சித்தானுபஸ்ஸனாஸதிஸங்வரோ த⁴ம்மானுபஸ்ஸனாஸதிஸங்வரோ’’தி சதுப்³பி³தே⁴ன விப⁴ஜிதப்³போ³. லோகுத்தரோ ஸதிஸங்வரோபி ததா² சதுப்³பி³தே⁴ன விப⁴ஜிதப்³போ³. ஸம்மாஸங்கப்பஸம்மாதி³ட்டி²யோபி லோகியலோகுத்தரவஸேன து³ப்³பி³தா⁴தி³பே⁴தே³ன விப⁴ஜிதப்³பா³. பத³ட்டா²னேனபி பத³ட்டா²னஹாரஸம்பாதே வுத்தனயேன விப⁴ஜிதப்³பா³.
Satisaṃvaro kusalapakkho ‘‘lokiyo satisaṃvaro, lokuttaro satisaṃvaro’’ti dubbidhena vibhajitabboti. Lokiyo satisaṃvaro kāmāvacarovāti ekavidhena vibhajitabbo. Lokuttarā satisaṃvaro ‘‘dassanabhūmi, bhāvanābhūmī’’ti dubbidhena vibhajitabbo. Kāmāvacaro satisaṃvaro ‘‘kāyānupassanāsatisaṃvaro vedanānupassanāsatisaṃvaro cittānupassanāsatisaṃvaro dhammānupassanāsatisaṃvaro’’ti catubbidhena vibhajitabbo. Lokuttaro satisaṃvaropi tathā catubbidhena vibhajitabbo. Sammāsaṅkappasammādiṭṭhiyopi lokiyalokuttaravasena dubbidhādibhedena vibhajitabbā. Padaṭṭhānenapi padaṭṭhānahārasampāte vuttanayena vibhajitabbā.
அகுஸலபக்கே²ன ‘‘அரக்கி²தேன சித்தேனா’’தி பதே³ன வுத்தோ அஸங்வரோ ‘‘சக்கு²அஸங்வரோ …பே॰… காயஅஸங்வரோ, சோபனகாயஅஸங்வரோ, வாசாஅஸங்வரோ, மனோஅஸங்வரோ’’தி அட்ட²விதே⁴ன விப⁴ஜிதப்³போ³. ‘‘மிச்சா²தி³ட்டி²ஹதேனா’’தி பதே³ன க³ஹிதோ மிச்சா²ஸங்கப்போ ‘‘காமவிதக்கோ ப்³யாபாத³விதக்கோ விஹிங்ஸாவிதக்கோ’’தி திவிதே⁴ன விப⁴ஜிதப்³போ³. ‘‘மிச்சா²தி³ட்டீ²’’தி பதே³ன வுத்தா மிச்சா²தி³ட்டி² ‘‘து³க்கே² அஞ்ஞாணங்…பே॰…இத³ப்பச்சயதாபடிச்சஸமுப்பன்னேஸு த⁴ம்மேஸு அஞ்ஞாண’’ந்தி அட்ட²விதே⁴ன விப⁴ஜிதப்³பா³, த்³வாஸட்டி²தி³ட்டி²விதே⁴னபி விப⁴ஜிதப்³பா³. தி²னமித்³த⁴ங் பஞ்சவிதே⁴ன ஸஸங்கா²ரிகவிதே⁴ன விப⁴ஜிதப்³ப³ங்.
Akusalapakkhena ‘‘arakkhitena cittenā’’ti padena vutto asaṃvaro ‘‘cakkhuasaṃvaro …pe… kāyaasaṃvaro, copanakāyaasaṃvaro, vācāasaṃvaro, manoasaṃvaro’’ti aṭṭhavidhena vibhajitabbo. ‘‘Micchādiṭṭhihatenā’’ti padena gahito micchāsaṅkappo ‘‘kāmavitakko byāpādavitakko vihiṃsāvitakko’’ti tividhena vibhajitabbo. ‘‘Micchādiṭṭhī’’ti padena vuttā micchādiṭṭhi ‘‘dukkhe aññāṇaṃ…pe…idappaccayatāpaṭiccasamuppannesu dhammesu aññāṇa’’nti aṭṭhavidhena vibhajitabbā, dvāsaṭṭhidiṭṭhividhenapi vibhajitabbā. Thinamiddhaṃ pañcavidhena sasaṅkhārikavidhena vibhajitabbaṃ.
‘‘எத்தகோவ விப⁴த்திஹாரஸம்பாதோ பரிபுண்ணோ’’தி வத்தப்³ப³த்தா ‘‘நியுத்தோ விப⁴த்திஹாரஸம்பாதோ’’தி வுத்தங். யேன யேன ஸங்வண்ணனாவிஸேஸபூ⁴தேன விப⁴த்திஹாரஸம்பாதேன ஸுத்தப்பதே³ஸத்தா² விப⁴த்தா, ஸோ ஸோ ஸங்வண்ணனாவிஸேஸபூ⁴தோ விப⁴த்திஹாரஸம்பாதோ நியுத்தோதி யதா²ரஹ நித்³தா⁴ரெத்வா யுஜ்ஜிதப்³போ³தி அத்தோ² க³ஹேதப்³போ³தி.
‘‘Ettakova vibhattihārasampāto paripuṇṇo’’ti vattabbattā ‘‘niyutto vibhattihārasampāto’’ti vuttaṃ. Yena yena saṃvaṇṇanāvisesabhūtena vibhattihārasampātena suttappadesatthā vibhattā, so so saṃvaṇṇanāvisesabhūto vibhattihārasampāto niyuttoti yathāraha niddhāretvā yujjitabboti attho gahetabboti.
இதி விப⁴த்திஹாரஸம்பாதே ஸத்திப³லானுரூபா ரசிதா
Iti vibhattihārasampāte sattibalānurūpā racitā
விபா⁴வனா நிட்டி²தா.
Vibhāvanā niṭṭhitā.
பண்டி³தேஹி பன…பே॰… க³ஹேதப்³போ³தி.
Paṇḍitehi pana…pe… gahetabboti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / நெத்திப்பகரணபாளி • Nettippakaraṇapāḷi / 8. விப⁴த்திஹாரஸம்பாதோ • 8. Vibhattihārasampāto
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / நெத்திப்பகரண-அட்ட²கதா² • Nettippakaraṇa-aṭṭhakathā / 8. விப⁴த்திஹாரஸம்பாதவண்ணனா • 8. Vibhattihārasampātavaṇṇanā
