| Library / Tipiṭaka / তিপিটক • Tipiṭaka / নেত্তিপ্পকরণ-টীকা • Nettippakaraṇa-ṭīkā |
৮. ৰিভত্তিহারৰিভঙ্গৰণ্ণনা
8. Vibhattihāravibhaṅgavaṇṇanā
৩৩. ধম্মেসূতি পুঞ্ঞাদিদানাদিভেদভিন্নেসু সভাৰধম্মেসু। তত্থ লব্ভমানোতি তেসু যথাৰুত্তেসু ধম্মেসু লব্ভমানো। ভূমিৰিভাগোতি কামাৰচরাদিদস্সনাদিভূমিপ্পভেদো। পদট্ঠানৰিভাগোতি তে পুঞ্ঞাদিধম্মা যেসং পদট্ঠানং, তেসং ৰা যে ধম্মা পদট্ঠানং, তব্বিভাগো। যেসং সুত্তানন্তি মূলপদট্ঠানভূতানং সংকিলেসভাগিযাদীনং চতুন্নং সুত্তানং ৰসেন। অসঙ্করৰৰত্থানেন হি এতেসু সুত্তেসু সাতিসযং ধম্মা ৰিভত্তা নাম হোন্তি। তেনাহ ‘‘ৰিসেসতো’’তি। যদি এৰং কস্মা ৰাসনাভাগিযনিব্বেধভাগিযসুত্তানি এৰেত্থ গহিতানীতি? নযিদমেৰং নিক্খমনপরিযোসানভাৰেন ইতরেসম্পি গহিতত্তা। যতো হি নিস্সটা ৰাসনাভাগিযা ধম্মা, তে সংকিলেসভাগিযা। যংপরিযোসানা নিব্বেধভাগিযা ধম্মা, তে অসেক্খভাগিযাতি দ্ৰযগ্গহণেনেৰ ইতরম্পি দ্ৰযং গহিতমেৰ হোতি। তেনাহ ‘‘ইমেসং চতুন্নং সুত্তানং দেসনাযা’’তি। ইমানি চত্তারি সুত্তানীতি পাল়িযা, ৰক্খমানায দেসনায ৰা ইতরদ্ৰযসঙ্গহো দট্ঠব্বো, ন পটিক্খেপো।
33.Dhammesūti puññādidānādibhedabhinnesu sabhāvadhammesu. Tattha labbhamānoti tesu yathāvuttesu dhammesu labbhamāno. Bhūmivibhāgoti kāmāvacarādidassanādibhūmippabhedo. Padaṭṭhānavibhāgoti te puññādidhammā yesaṃ padaṭṭhānaṃ, tesaṃ vā ye dhammā padaṭṭhānaṃ, tabbibhāgo. Yesaṃ suttānanti mūlapadaṭṭhānabhūtānaṃ saṃkilesabhāgiyādīnaṃ catunnaṃ suttānaṃ vasena. Asaṅkaravavatthānena hi etesu suttesu sātisayaṃ dhammā vibhattā nāma honti. Tenāha ‘‘visesato’’ti. Yadi evaṃ kasmā vāsanābhāgiyanibbedhabhāgiyasuttāni evettha gahitānīti? Nayidamevaṃ nikkhamanapariyosānabhāvena itaresampi gahitattā. Yato hi nissaṭā vāsanābhāgiyā dhammā, te saṃkilesabhāgiyā. Yaṃpariyosānā nibbedhabhāgiyā dhammā, te asekkhabhāgiyāti dvayaggahaṇeneva itarampi dvayaṃ gahitameva hoti. Tenāha ‘‘imesaṃ catunnaṃ suttānaṃ desanāyā’’ti. Imāni cattāri suttānīti pāḷiyā, vakkhamānāya desanāya vā itaradvayasaṅgaho daṭṭhabbo, na paṭikkhepo.
তেনেৰাতি নিযমস্স অকতত্তা, ততো চ তেন তন্নিস্সিতেন চ ব্রহ্মচারী ভৰতীতি সিদ্ধং হোতি। এৰ-সদ্দো ৰা সমুচ্চযত্থো দট্ঠব্বো। সিযা তস্স পটিক্খেপোতি তস্স অট্ঠসমাপত্তিব্রহ্মচরিযস্স সিযা পটিক্খেপো। এৰং সতি সাৰসেসা দেসনা সিযা।
Tenevāti niyamassa akatattā, tato ca tena tannissitena ca brahmacārī bhavatīti siddhaṃ hoti. Eva-saddo vā samuccayattho daṭṭhabbo. Siyā tassa paṭikkhepoti tassa aṭṭhasamāpattibrahmacariyassa siyā paṭikkhepo. Evaṃ sati sāvasesā desanā siyā.
তদঙ্গাদিপ্পহানদ্ৰযং পদট্ঠানভূতং ইধ গণনূপগং ন হোতীতি ‘‘সমুচ্ছেদপটিপ্পস্সদ্ধিপ্পহানানং ৰসেনা’’তি ৰুত্তং। তথা হেত্থ কেচি ‘‘তেনেৰা’’তি পঠন্তি। ‘‘তেনেৰ ব্রহ্মচরিযেনাতি পঠন্তী’’তি ইদং ‘‘সংৰরসীলে ঠিতো’’তি (নেত্তি॰ ৩৩) এত্থ ৰুত্তং পাল়িৰিকপ্পং সন্ধায ৰদতি। ‘‘যস্মা…পে॰… ৰক্খতী’’তি ইদং পচ্ছিমপাঠস্সেৰ যুত্ততায কারণৰচনং।
Tadaṅgādippahānadvayaṃ padaṭṭhānabhūtaṃ idha gaṇanūpagaṃ na hotīti ‘‘samucchedapaṭippassaddhippahānānaṃ vasenā’’ti vuttaṃ. Tathā hettha keci ‘‘tenevā’’ti paṭhanti. ‘‘Teneva brahmacariyenāti paṭhantī’’ti idaṃ ‘‘saṃvarasīle ṭhito’’ti (netti. 33) ettha vuttaṃ pāḷivikappaṃ sandhāya vadati. ‘‘Yasmā…pe… vakkhatī’’ti idaṃ pacchimapāṭhasseva yuttatāya kāraṇavacanaṃ.
কথং মন্তাতি? অনিব্বেধসভাৰত্তা মহগ্গতপুঞ্ঞানং ন নিব্বেধভাগিযসুত্তেন সঙ্গহো, ৰাসনাভাগিযত্তা পন ৰাসনাভাগিযসুত্তেনেৰ সঙ্গহোতি। তদুপসঙ্গা হি পচ্ছিমো এৰ পাঠো যুত্ততরো। ইতরথা সাৰসেসা দেসনা ভৰেয্য। তেনাহ ‘‘ন হি…পে॰… দেসেতী’’তি।
Kathaṃ mantāti? Anibbedhasabhāvattā mahaggatapuññānaṃ na nibbedhabhāgiyasuttena saṅgaho, vāsanābhāgiyattā pana vāsanābhāgiyasutteneva saṅgahoti. Tadupasaṅgā hi pacchimo eva pāṭho yuttataro. Itarathā sāvasesā desanā bhaveyya. Tenāha ‘‘na hi…pe… desetī’’ti.
সংকিলেসভাগিযঅসেক্খভাগিযানং পরতো ৰক্খমানত্তা ৰুত্তং ‘‘ৰক্খমানানং…পে॰… ৰসেনা’’তি। ‘‘সব্বতো’’তি ইদং পুব্বপরাপেক্খং। তস্স পরাপেক্খতায ‘‘সব্বতোভাগেন একাদসসু ঠানেসু পক্খিপিত্ৰা’’তি অট্ঠকথাযং যোজিতং। তত্থ পদাদিকে ৰিচযহারপদত্থে সন্ধায ‘‘একাদসসু ঠানেসূ’’তি ৰুত্তং। পুব্বপেক্খতায পন ‘‘সব্বতোভাগেন দেসনায ফলেনা’’তিআদিনা যোজেতব্বং।
Saṃkilesabhāgiyaasekkhabhāgiyānaṃ parato vakkhamānattā vuttaṃ ‘‘vakkhamānānaṃ…pe… vasenā’’ti. ‘‘Sabbato’’ti idaṃ pubbaparāpekkhaṃ. Tassa parāpekkhatāya ‘‘sabbatobhāgena ekādasasu ṭhānesu pakkhipitvā’’ti aṭṭhakathāyaṃ yojitaṃ. Tattha padādike vicayahārapadatthe sandhāya ‘‘ekādasasu ṭhānesū’’ti vuttaṃ. Pubbapekkhatāya pana ‘‘sabbatobhāgena desanāya phalenā’’tiādinā yojetabbaṃ.
সংকিলেসভাগিযানং তণ্হাসংকিলেসাদিনা দেসনানযো ৰেদিতব্বো। ফলং অপাযদুক্খেন মনুস্সেসু দোভগ্গিযেন। অসেক্খভাগিযানং অসেক্খেহি সীলক্খন্ধাদীহি দেসনানযো। ফলং অগ্গফলেন চ অনুপাদিসেসায চ নিব্বানধাতুযা ৰেদিতব্বং। ইতরেসং পাল়িযং ৰুত্তমেৰ। কামরাগব্যাপাদউদ্ধম্ভাগিযসংযোজনগ্গহণেন সংকিলেসভাগিযানং, ৰিরাগগ্গহণেন অসেক্খগ্গহণেনেৰ চ অসেক্খভাগিযানং ৰক্খমানত্তা ৰুত্তং ‘‘ৰক্খমানানং…পে॰… ৰসেনা’’তি। পদপদত্থৰিচারযুত্তিনিদ্ধারণমুখেন ধম্মৰিভত্তিআদিৰিচারো কাতব্বোতি দস্সেতুং পাল়িযং ‘‘ৰিচযেন…পে॰… তব্বানী’’তি ৰুত্তন্তি অট্ঠকথাযং ‘‘ৰিচযেন…পে॰… দস্সেতী’’তি ৰুত্তং।
Saṃkilesabhāgiyānaṃ taṇhāsaṃkilesādinā desanānayo veditabbo. Phalaṃ apāyadukkhena manussesu dobhaggiyena. Asekkhabhāgiyānaṃ asekkhehi sīlakkhandhādīhi desanānayo. Phalaṃ aggaphalena ca anupādisesāya ca nibbānadhātuyā veditabbaṃ. Itaresaṃ pāḷiyaṃ vuttameva. Kāmarāgabyāpādauddhambhāgiyasaṃyojanaggahaṇena saṃkilesabhāgiyānaṃ, virāgaggahaṇena asekkhaggahaṇeneva ca asekkhabhāgiyānaṃ vakkhamānattā vuttaṃ ‘‘vakkhamānānaṃ…pe… vasenā’’ti. Padapadatthavicārayuttiniddhāraṇamukhena dhammavibhattiādivicāro kātabboti dassetuṃ pāḷiyaṃ ‘‘vicayena…pe… tabbānī’’ti vuttanti aṭṭhakathāyaṃ ‘‘vicayena…pe… dassetī’’ti vuttaṃ.
৩৪. এৰন্তি ইতি। ধম্মেতি ৰুত্তসভাগধম্মে। সাধারণাসাধারণভাৰেহীতি সামঞ্ঞৰিসেসেন ৰিসিট্ঠেহি। দ্ৰে ধম্মা সাধারণাতি দ্ৰে ইমে ধম্মা যেহি সভাগধম্মা সাধারণা নাম হোন্তি। কতমে দ্ৰে? নামং, ৰত্থু চ। তত্থ নামং নামপঞ্ঞত্তি, তংমুখেনেৰ সদ্দতো তদত্থাৰগমো। সদ্দেন চ সামঞ্ঞরূপেনেৰ তথারূপস্স অত্থস্স গহণং, ন ৰিসেসরূপেন, তস্মা সদ্দৰচনীযা অত্থা সাধারণরূপনামাযত্তগহণীযতায নামসাধারণা ৰুত্তা। ৰত্থূতি পৰত্তিট্ঠানং। যত্থ হি যে ধম্মা পৰত্তন্তি, তেসং সব্বেসং তে ধম্মা সাধারণাতি পৰত্তিট্ঠানসঙ্খাতানং ৰত্থূনং সাধারণা। যস্মা পনিদং দ্ৰযং তেসং ধম্মানং সাধারণভাৰে পকতিভূতং সভাৰভূতং, তস্মা ৰুত্তং ‘‘দ্ৰে ধম্মাতি দুৰে পকতিযো’’তি। একসন্ততিপতিততাযাতি সমানসন্ততিপৰত্তিযা। তেনাহ ‘‘সমানৰত্থুকা’’তি। দস্সনপহাতব্বানঞ্হি যথা মিচ্ছত্তনিযতসত্তা পৰত্তিট্ঠানং, এৰং অনিযতাপীতি উভযে হি তে সমানৰত্থুকা। এস নযো ইতরেসুপি। সক্কাযদিট্ঠিৰিচিকিচ্ছাসীলব্বতপরামাসা হি ভিন্নসভাৰাপেতে ধম্মা দস্সনেন পহাতব্বতং নাতিৰত্তন্তীতি তে নামসামঞ্ঞতং পত্তা, রূপরাগাদযো চ ভাৰনায পহাতব্বতন্তি আহ ‘‘পহানেকট্ঠা নামসাধারণা’’তি। যথা পন ‘‘ৰত্থূনং সাধারণা ৰত্থুসাধারণা’’তি অযমত্থো লব্ভতি, এৰং ‘‘ৰত্থুনা সাধারণা ৰত্থুসাধারণা’’তি অযম্পি অত্থো লব্ভতীতি দস্সেন্তো ‘‘সহজেকট্ঠা ৰত্থুসাধারণা’’তি আহ। তে হি অঞ্ঞমঞ্ঞং ফুসনাদিসভাৰতো ভিন্নাপি যস্মিং পৰত্তন্তি, তেন ৰত্থুনা সাধারণা নাম হোন্তি। এত্থ চ লব্ভমানম্পি কুসলাদিনামসাধারণং অনামসিত্ৰা ৰত্থুসাধারণা তাৰ যোজিতাতি ৰেদিতব্বা। পটিপক্খাদীহীতি আদিসদ্দেন সমানফলতাসহব্যতাদিকে সঙ্গণ্হাতি। সেসপদেসূতি ‘‘পুথুজ্জনস্সা’’তিআদিৰাক্যেসু। কথং? তত্থ হি পুথুজ্জনস্স, সোতাপন্নস্স চ সম্ভৰতো অনাগামিনো, অরহতো চ অসম্ভৰতোতিআদিনা যোজেতব্বং।
34.Evanti iti. Dhammeti vuttasabhāgadhamme. Sādhāraṇāsādhāraṇabhāvehīti sāmaññavisesena visiṭṭhehi. Dve dhammā sādhāraṇāti dve ime dhammā yehi sabhāgadhammā sādhāraṇā nāma honti. Katame dve? Nāmaṃ, vatthu ca. Tattha nāmaṃ nāmapaññatti, taṃmukheneva saddato tadatthāvagamo. Saddena ca sāmaññarūpeneva tathārūpassa atthassa gahaṇaṃ, na visesarūpena, tasmā saddavacanīyā atthā sādhāraṇarūpanāmāyattagahaṇīyatāya nāmasādhāraṇā vuttā. Vatthūti pavattiṭṭhānaṃ. Yattha hi ye dhammā pavattanti, tesaṃ sabbesaṃ te dhammā sādhāraṇāti pavattiṭṭhānasaṅkhātānaṃ vatthūnaṃ sādhāraṇā. Yasmā panidaṃ dvayaṃ tesaṃ dhammānaṃ sādhāraṇabhāve pakatibhūtaṃ sabhāvabhūtaṃ, tasmā vuttaṃ ‘‘dve dhammāti duve pakatiyo’’ti. Ekasantatipatitatāyāti samānasantatipavattiyā. Tenāha ‘‘samānavatthukā’’ti. Dassanapahātabbānañhi yathā micchattaniyatasattā pavattiṭṭhānaṃ, evaṃ aniyatāpīti ubhaye hi te samānavatthukā. Esa nayo itaresupi. Sakkāyadiṭṭhivicikicchāsīlabbataparāmāsā hi bhinnasabhāvāpete dhammā dassanena pahātabbataṃ nātivattantīti te nāmasāmaññataṃ pattā, rūparāgādayo ca bhāvanāya pahātabbatanti āha ‘‘pahānekaṭṭhā nāmasādhāraṇā’’ti. Yathā pana ‘‘vatthūnaṃ sādhāraṇā vatthusādhāraṇā’’ti ayamattho labbhati, evaṃ ‘‘vatthunā sādhāraṇā vatthusādhāraṇā’’ti ayampi attho labbhatīti dassento ‘‘sahajekaṭṭhā vatthusādhāraṇā’’ti āha. Te hi aññamaññaṃ phusanādisabhāvato bhinnāpi yasmiṃ pavattanti, tena vatthunā sādhāraṇā nāma honti. Ettha ca labbhamānampi kusalādināmasādhāraṇaṃ anāmasitvā vatthusādhāraṇā tāva yojitāti veditabbā. Paṭipakkhādīhīti ādisaddena samānaphalatāsahabyatādike saṅgaṇhāti. Sesapadesūti ‘‘puthujjanassā’’tiādivākyesu. Kathaṃ? Tattha hi puthujjanassa, sotāpannassa ca sambhavato anāgāmino, arahato ca asambhavatotiādinā yojetabbaṃ.
কথং তে ওধিসো গহিতাতি কেনাকারেন তে ‘‘সাধারণা’’তি ৰুত্তধম্মা ভাগসো গহিতা। ‘‘অমুকস্স, অমুকস্স চা’’তি অযঞ্হেত্থ অত্থো। সামঞ্ঞভূতা ধম্মা সাধারণা নাম, এৰং সন্তে কথং তেসং মিচ্ছত্তনিযতানিযতাদিৰসেন ৰিভাগেন পৰত্তিট্ঠানতা ৰুচ্চতি, ন ৰত্তব্বন্তি অধিপ্পাযো। অথ ৰিভাগেন তং ৰত্তব্বং, ননু তে সাধারণাতি ন ৰত্তব্বমেৰাতি? এৰং সাধারণাতি মিচ্ছত্তনিযতানং, অনিযতানন্তি ইমেসং উভযেসংযেৰ তে ধম্মা সাধারণা। তেনাহ – ‘‘ন সব্বসত্তানং সাধারণতায সাধারণা’’তি। ‘‘যস্মা’’তিআদিনা তত্থ কারণমাহ, তেনেতং দস্সেতি ‘‘কেচি ধম্মা কেসঞ্চিদেৰ ধম্মানং সাধারণা হোন্তি, অঞ্ঞেসং অসাধারণা’’তি। তেনাহ ‘‘পটিনিযতঞ্হি তেসং পৰত্তিট্ঠান’’ন্তি।
Kathaṃ te odhiso gahitāti kenākārena te ‘‘sādhāraṇā’’ti vuttadhammā bhāgaso gahitā. ‘‘Amukassa, amukassa cā’’ti ayañhettha attho. Sāmaññabhūtā dhammā sādhāraṇā nāma, evaṃ sante kathaṃ tesaṃ micchattaniyatāniyatādivasena vibhāgena pavattiṭṭhānatā vuccati, na vattabbanti adhippāyo. Atha vibhāgena taṃ vattabbaṃ, nanu te sādhāraṇāti na vattabbamevāti? Evaṃ sādhāraṇāti micchattaniyatānaṃ, aniyatānanti imesaṃ ubhayesaṃyeva te dhammā sādhāraṇā. Tenāha – ‘‘na sabbasattānaṃ sādhāraṇatāya sādhāraṇā’’ti. ‘‘Yasmā’’tiādinā tattha kāraṇamāha, tenetaṃ dasseti ‘‘keci dhammā kesañcideva dhammānaṃ sādhāraṇā honti, aññesaṃ asādhāraṇā’’ti. Tenāha ‘‘paṭiniyatañhi tesaṃ pavattiṭṭhāna’’nti.
ইতরথাতি অনিযতপৰত্তিট্ঠানতায সব্বেসং সাধারণা, অসাধারণা ৰা সিযুং, তথা সতি। তথা ৰোহারোতি ‘‘সাধারণা, অসাধারণা’’তি চ অযং ৰোহারো সামঞ্ঞা এৰ ন ভৰেয্য। এতে এৰ ধম্মাতি ‘‘সাধারণা’’তি ৰুত্তধম্মা এৰ। এৰন্তি ‘‘মিচ্ছত্তনিযতান’’ন্তিআদিনা ৰুত্তপ্পকারেন। নিযতৰিসযা পরিচ্ছিন্নপ্পৰত্তিট্ঠানা। ‘‘যোপী’’তিআদি পুগ্গলাধিট্ঠানেন ৰুত্তস্সেৰত্থস্স পাকটকরণং। ‘‘ন হী’’তিআদিনা অন্ৰযতো, ব্যতিরেকতো চ তমেৰত্থং ৰিভাৰেতি। সেসেপীতি ‘‘ভাৰনাপহাতব্বা’’তি এৰমাদিম্হিপি।
Itarathāti aniyatapavattiṭṭhānatāya sabbesaṃ sādhāraṇā, asādhāraṇā vā siyuṃ, tathā sati. Tathā vohāroti ‘‘sādhāraṇā, asādhāraṇā’’ti ca ayaṃ vohāro sāmaññā eva na bhaveyya. Ete eva dhammāti ‘‘sādhāraṇā’’ti vuttadhammā eva. Evanti ‘‘micchattaniyatāna’’ntiādinā vuttappakārena. Niyatavisayā paricchinnappavattiṭṭhānā. ‘‘Yopī’’tiādi puggalādhiṭṭhānena vuttassevatthassa pākaṭakaraṇaṃ. ‘‘Na hī’’tiādinā anvayato, byatirekato ca tamevatthaṃ vibhāveti. Sesepīti ‘‘bhāvanāpahātabbā’’ti evamādimhipi.
পচ্চত্তনিযতোতি পাটিপুগ্গলিকো। ইতরস্সাতি অপচ্চত্তনিযতস্স। তথাতি অসাধারণভাৰেন। কোচি ধম্মো কঞ্চি ধম্মং উপাদায সাধারণোপি সমানো তদঞ্ঞং উপাদায অসাধারণোপি হোতীতি আহ ‘‘সাধারণাৰিধুরতাযা’’তি। তেনাহ ‘‘তং তং উপাদাযা’’তিআদি। তথা হি ‘‘ধম্মতা’’তি ৰুত্তপঠমমগ্গট্ঠতা দীপিতা, তাদিসানং এৰ অনেকেসং অরিযানং ৰসেন সাধারণাতি । পঠমস্সাতি অট্ঠমকস্স। দুতিযস্সাতি সোতাপন্নস্স। পুন অট্ঠমকস্সাতি ‘‘অট্ঠমকস্স, অনাগামিস্স চা’’তি এত্থ ৰুত্তঅট্ঠমকস্স। তেনাহ ‘‘অনাগামিমগ্গট্ঠস্সা’’তি। অগ্গফলট্ঠতো পট্ঠায পটিলোমতো গণিযমানো পঠমমগ্গট্ঠো অট্ঠমকো, মগ্গট্ঠতায, পহীযমানকিলেসতায চ সব্বেপি মগ্গট্ঠা অট্ঠমকা ৰিযাতি অট্ঠমকা, ‘‘একচিত্তক্খণতো উদ্ধং ন তিট্ঠতীতি অট্ঠমকো’’তি অপরে নিরুত্তিনযেন। ‘‘সেক্খা’’তি নামং সাধারণন্তি সম্বন্ধো। ইতরেসূতি ‘‘ভব্বাভব্বা’’তি ৰুত্তেসু অনরিযেসু। তেনাহ পাল়িযং ‘‘হীনুক্কট্ঠমজ্ঝিমং উপাদাযা’’তি।
Paccattaniyatoti pāṭipuggaliko. Itarassāti apaccattaniyatassa. Tathāti asādhāraṇabhāvena. Koci dhammo kañci dhammaṃ upādāya sādhāraṇopi samāno tadaññaṃ upādāya asādhāraṇopi hotīti āha ‘‘sādhāraṇāvidhuratāyā’’ti. Tenāha ‘‘taṃ taṃ upādāyā’’tiādi. Tathā hi ‘‘dhammatā’’ti vuttapaṭhamamaggaṭṭhatā dīpitā, tādisānaṃ eva anekesaṃ ariyānaṃ vasena sādhāraṇāti . Paṭhamassāti aṭṭhamakassa. Dutiyassāti sotāpannassa. Puna aṭṭhamakassāti ‘‘aṭṭhamakassa, anāgāmissa cā’’ti ettha vuttaaṭṭhamakassa. Tenāha ‘‘anāgāmimaggaṭṭhassā’’ti. Aggaphalaṭṭhato paṭṭhāya paṭilomato gaṇiyamāno paṭhamamaggaṭṭho aṭṭhamako, maggaṭṭhatāya, pahīyamānakilesatāya ca sabbepi maggaṭṭhā aṭṭhamakā viyāti aṭṭhamakā, ‘‘ekacittakkhaṇato uddhaṃ na tiṭṭhatīti aṭṭhamako’’ti apare niruttinayena. ‘‘Sekkhā’’ti nāmaṃ sādhāraṇanti sambandho. Itaresūti ‘‘bhabbābhabbā’’ti vuttesu anariyesu. Tenāha pāḷiyaṃ ‘‘hīnukkaṭṭhamajjhimaṃ upādāyā’’ti.
নিযামাৰক্কন্তিযাতি অৰক্কন্তনিযামতায। ঞাণুত্থরস্সাতি ঞাণাধিকস্স। তথাৰিধপচ্চযসমাযোগেতি ঞাণৰিসেসপচ্চযসমৰাযে। যথা হি ঞাণবলেন দন্ধাভিঞ্ঞতা ন হোতি, এৰং পটিপদাপটিপন্নোপি সুখেন ৰিসোসীযতীতি। সা হি সুখাপটিপদা খিপ্পাভিঞ্ঞা তংসমঙ্গিনো ঞাণুত্তরত্তা ৰিপস্সনায পদট্ঠানন্তি ৰুত্তা।
Niyāmāvakkantiyāti avakkantaniyāmatāya. Ñāṇuttharassāti ñāṇādhikassa. Tathāvidhapaccayasamāyogeti ñāṇavisesapaccayasamavāye. Yathā hi ñāṇabalena dandhābhiññatā na hoti, evaṃ paṭipadāpaṭipannopi sukhena visosīyatīti. Sā hi sukhāpaṭipadā khippābhiññā taṃsamaṅgino ñāṇuttarattā vipassanāya padaṭṭhānanti vuttā.
ধম্মতো অনপেতা চিন্তা ধম্মচিন্তা, যোনিসোমনসিকারেন পৰত্তিতত্তা ধম্মেসু চিন্তা, ধম্মো ৰা ঞাণং, তস্মা ধম্মাৰহা চিন্তা ধম্মচিন্তা, চিন্তামযঞাণস্স হেতুভূতা চিন্তাতি অত্থো।
Dhammato anapetā cintā dhammacintā, yonisomanasikārena pavattitattā dhammesu cintā, dhammo vā ñāṇaṃ, tasmā dhammāvahā cintā dhammacintā, cintāmayañāṇassa hetubhūtā cintāti attho.
পাল়িযং সুতমযপঞ্ঞাগ্গহণেন ‘‘যে তে ধম্মা আদিকল্যাণা…পে॰… তথারূপাস্স ধম্মা বহুস্সুতা হোন্তী’’তিআদি (অ॰ নি॰ ৮.২) সুত্তপদসঙ্গহো অত্থো পরিগ্গহিতো, তথা যোনিসোমনসিকারগ্গহণেন ‘‘সো ‘অনিচ্চ’ন্তি যোনিসো মনসি করোতী’’তিআদিনা ৰুত্তো উপাযমনসিকারো পরিগ্গহিতো। সম্মাদিট্ঠিগ্গহণেন ‘‘সম্মাদিট্ঠিং ভাৰেতি ৰিৰেকনিস্সিত’’ন্তিআদিনা ৰুত্তা সম্মাদিট্ঠি পরিগ্গহিতাতি দস্সেন্তো আহ ‘‘অথ খো…পে॰… দস্সেতু’’ন্তি। সেসন্তি ‘‘ধম্মস্ৰাক্খাততা’’তি এৰমাদি।
Pāḷiyaṃ sutamayapaññāggahaṇena ‘‘ye te dhammā ādikalyāṇā…pe… tathārūpāssa dhammā bahussutā hontī’’tiādi (a. ni. 8.2) suttapadasaṅgaho attho pariggahito, tathā yonisomanasikāraggahaṇena ‘‘so ‘anicca’nti yoniso manasi karotī’’tiādinā vutto upāyamanasikāro pariggahito. Sammādiṭṭhiggahaṇena ‘‘sammādiṭṭhiṃ bhāveti vivekanissita’’ntiādinā vuttā sammādiṭṭhi pariggahitāti dassento āha ‘‘atha kho…pe… dassetu’’nti. Sesanti ‘‘dhammasvākkhātatā’’ti evamādi.
যস্স চ পুব্বে অত্থো ন সংৰণ্ণিতো, তত্থ কল্যাণমিত্ততায আযতনগতো পসাদো, চিত্তৰূপসমো চ ফলন্তি দস্সেন্তো ‘‘সপ্পুরিস…পে॰… পদট্ঠান’’ন্তি আহ। অত্তসম্মাপণিহিতত্তা পাপজেগুচ্ছিনিব্বিদাদিবহুলোৰ হোতীতি দস্সেন্তো আহ ‘‘অত্থ…পে॰… পদট্ঠান’’ন্তি। ধম্মো স্ৰাক্খাতো আদিতো পট্ঠায যাৰ পরিযোসানা সব্বসম্পত্তিপারিপূরিহেতূতি দস্সেন্তো ‘‘ধম্মস্ৰাক্খাততা…পে॰… পদট্ঠান’’ন্তি আহ। কুসলমূলরোপনা হি সমাপত্তিপরিযোসানাতি । সঙ্ঘসুট্ঠুতায সঙ্ঘস্স সুট্ঠুভাৰায সঙ্ঘস্স সপ্পতিস্সতায ‘‘সুট্ঠু, ভন্তে’’তি ৰচনসম্পটিচ্ছনভাৰায। ইতরং সুৰিঞ্ঞেয্যমেৰ।
Yassa ca pubbe attho na saṃvaṇṇito, tattha kalyāṇamittatāya āyatanagato pasādo, cittavūpasamo ca phalanti dassento ‘‘sappurisa…pe… padaṭṭhāna’’nti āha. Attasammāpaṇihitattā pāpajegucchinibbidādibahulova hotīti dassento āha ‘‘attha…pe… padaṭṭhāna’’nti. Dhammo svākkhāto ādito paṭṭhāya yāva pariyosānā sabbasampattipāripūrihetūti dassento ‘‘dhammasvākkhātatā…pe… padaṭṭhāna’’nti āha. Kusalamūlaropanā hi samāpattipariyosānāti . Saṅghasuṭṭhutāya saṅghassa suṭṭhubhāvāya saṅghassa sappatissatāya ‘‘suṭṭhu, bhante’’ti vacanasampaṭicchanabhāvāya. Itaraṃ suviññeyyameva.
ৰিভত্তিহারৰিভঙ্গৰণ্ণনা নিট্ঠিতা।
Vibhattihāravibhaṅgavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / নেত্তিপ্পকরণপাল়ি • Nettippakaraṇapāḷi / ৮. ৰিভত্তিহারৰিভঙ্গো • 8. Vibhattihāravibhaṅgo
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / নেত্তিপ্পকরণ-অট্ঠকথা • Nettippakaraṇa-aṭṭhakathā / ৮. ৰিভত্তিহারৰিভঙ্গৰণ্ণনা • 8. Vibhattihāravibhaṅgavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / খুদ্দকনিকায (টীকা) • Khuddakanikāya (ṭīkā) / নেত্তিৰিভাৰিনী • Nettivibhāvinī / ৮. ৰিভত্তিহারৰিভঙ্গৰিভাৰনা • 8. Vibhattihāravibhaṅgavibhāvanā
